အခန်း ၃၆၈

အခန်း (၃၆၈) - စည်းကမ်းသစ်နှင့် ဖုံးကွယ်ထားသော ဒဏ်ရာဟောင်းများ (၂)

“ဒါတွေကိုလည်း မင်းအတွက် ပေးလိုက်မယ်”

လင်းထျန်းလုံ ပြောဆိုလိုက်ရာ သူ၏ အကြည့်များက အစိုင်အခဲတစ်ခုအလား ယန်ချင်းယွမ်အပေါ်သို့ ဖိချလိုက်သည်။

“မှတ်ထားပါ၊ ငါ မင်းရဲ့ သုသေသန ရလဒ်တွေကို မျှော်လင့်နေတယ်။ ဒါပေမဲ့ မင်းရဲ့ ဓာတ်ခွဲခန်းကတော့ ဒီနေ့လိုမျိုး... ထာဝရသန့်ရှင်းနေဖို့ပဲ မျှော်လင့်ပါတယ်”

ယန်ချင်းယွမ်၏ ခန္ဓာကိုယ် သတိထားမိရန် ခက်ခဲလောက်အောင် တစ်ချက် တုန်ယင်သွားခဲ့ရှာသည်။

သူ ချက်ချင်း ခေါင်းကို ပိုမို နက်နဲစွာ ညွတ်ချလိုက်မိပြီး အသံတွင် “တုန်ယင်မှု” အချို့ ပါဝင်နေသည်။

“ကျွန်တော်မျိုး... ဝံပုလွေဘုရင်မင်းမြတ်ရဲ့ သွန်သင်ချက်တွေကို နှလုံးသားထဲမှာ တင်းကြပ်စွာ မှတ်သားထားပါ့မယ်ခင်ဗျာ…ကျွန်တော်မျိုး ဘယ်တော့မှ သစ္စာဖောက်မယ့် စိတ်ကူးမျိုး ရှိဝံ့မှာ မဟုတ်ပါဘူး”

မီးပွားသုသေသနပညာရှင်အသင်းမှ ထွက်ခွာခဲ့ပြီး တဖြည်းဖြည်းနှင့် တက်ကြွမှုအချို့ ပြန်လည် ရရှိလာနေပြီဖြစ်သည့် လမ်းမများပေါ်တွင် လျှောက်လှမ်းနေကြစဉ်၊ ယွဲ့ရီက တိုးတိုးလေး ပြောဆိုလိုက်သည်။

“ပြီးပြည့်စုံတဲ့ သရုပ်ဆောင်မှုပဲ အနာအဆာ လုံးဝ မရှိဘူး”

“သူက ပိုပြီး အနာအဆာမရှိတာက သူ့ရဲ့သရုပ်ဆောင်မှုပေါ်မှာ အားထုတ်မှုတွေ ပိုပြီး ပုံအောထားခဲ့ကြောင်း သက်သေပြနေတာပဲ”

လင်းထျန်းလုံသည် ဝံပုလွေအသိုက်၏ ဗိသုကာ ဝံပုလွေများက နှင်းခဲများနှင့် ကျောက်ဆောင်များကို အသုံးပြု၍ ပြန်လည် ပုံသွင်းနေကြသည့် ချော်ရည် ခန်းမဆောင်သို့ လှမ်းကြည့်နေမိသည်။

“သူက အရင်းအမြစ်တွေကို လိုချင်နေမှတော့၊ ငါ သူ့ကို အရင်းအမြစ်တွေ ပေးလိုက်တာပေါ့… သူက နောက်ဆုံးမှာ ငါ့အတွက် ဘာတွေဖန်တီးပေးမလဲဆိုတာကို စောင့်ကြည့်ရသေးတာပေါ့”

လင်းထျန်းလုံ ဓာတ်ခွဲခန်းကို စောင့်ကြည့်စစ်ဆေးနေခဲ့သည့် အချိန်မှာပင်၊ မီးပွားသုသေသနပညာရှင်အသင်း၏ အောက်တည့်တည့် မြေအောက်နက်ရှိုင်းရာရှိ အမျိုးမျိုးသော အတားအဆီးများနှင့် ဟင်းလင်းပြင် ချိပ်ပိတ်နည်းပညာများဖြင့် ဖုံးကွယ်ထားသည့် အဓိက ဓာတ်ခွဲခန်းအတွင်းက မြင်ကွင်းမှာမူ လုံးဝ ကွဲပြားခြားနားလှသည်။

အထက်က “သန့်ရှင်း” လှသော ဓာတ်ခွဲခန်းနှင့် မတူဘဲ၊ ဤနေရာတွင် ထူထဲလှသော သွေးညှီနံ့များ၊ ပိုးသတ်ဆေးနံ့များနှင့် ဖော်ပြ၍မရနိုင်လောက်သော စွမ်းအင် ခမ်းခြောက်တိုက်စားမှု ရနံ့များ ပြည့်နှက်နေသည်။

ခန်းမဆောင်၏ အလယ်ဗဟိုတည့်တည့်တွင် ကြီးမားလှသော အသက်ထောက်ပံ့မှု ကွန်တိန်နာကြီး နှစ်ခု ဘေးချင်းယှဉ်လျက် နေရာယူထားသည်။

ဘယ်ဘက်က အသက်ထောက်ပံ့မှု ကွန်တိန်နာအတွင်း၌၊ “တစ်ဝက်တစ်ပျက် ဖန်တီးမှု”ရှိနေသည်။၎င်းအတွင်း၌ အမျိုးမျိုးသော ဇီဝတစ်သျှူးများကို အတင်းအဓမ္မ ရက်လုပ်ထားပုံရသည့် ဖော်ပြ၍မရနိုင်သော အသားစိုင်ကြီးသည် အရောင်ဖျော့ဖျော့ အစိမ်းရောင်အာဟာရရည်များအတွင်း ဖြည်းညင်းစွာ လှုပ်ရှားနေပြီး မတည်ငြိမ်သော စွမ်းအင် အတက်အကျများကို ထုတ်လွှတ်နေသည်။

ညာဘက်က အသက်ထောက်ပံ့မှု ကွန်တိန်နာအတွင်း၌မူ ဟော်ကျန့် လဲလျောင်းနေရှာသည်။ ထိုအရာသည် တစ်ချိန်က ဟော်ကျန့်ဖြစ်ခဲ့ဖူးသည့် ခန္ဓာကိုယ် ဖြစ်သည်။

သူ၏ ခန္ဓာကိုယ် မျက်နှာပြင်ပေါ်တွင် အရောင်ဖျော့ဖျော့ လင်းလက်နေသည့် မြွေကြေးခွံ အလွှာတစ်ခု ဖုံးလွှမ်းနေပြီး၊ သူ၏ ဘယ်ဘက်လက်မောင်းမှာမူ ဖြူရော်ရော် အရိုးစု လက်သည်းကြီးတစ်ခုအဖြစ် ပြောင်းလဲနေခဲ့ပြီ ဖြစ်သည်။

လင်းထျန်းလုံံ သူ၏ ရင်ဘတ်ပေါ်တွင် ချန်ထားခဲ့ဖူးသည့် အယူအဆပိုင်းဆိုင်ရာကို စွမ်းအင်ဆိုင်ရာ ဖျက်ဆီးခြင်းဒဏ်ရာကြီး၏ ပတ်ဝန်းကျင်၌၊ မြွေဘုရင်နှင့် သက်ဆိုင်သည့် အမည်းရောင် အဆိပ်ကျိန်စာ စွမ်းအားများနှင့် အရောင်ဖျော့ဖျော့ ဝိညာဉ်မီးတောက်များက အချင်းချင်း ရောယှက်နေကြသည်။

လက်ရှိတွင်၊ ထူထဲလှသော စွမ်းအင်ပြွန် နှစ်ခုက ထို အသက်ထောက်ပံ့မှု ကွန်တိန်နာကြီး နှစ်ခုကို ချိတ်ဆက်ထားသည်။

သာမန်မျက်စိဖြင့် မြင်တွေ့နိုင်သည်မှာ “တစ်ဝက်တစ်ပျက် ဖန်တီးမှု” ဟူသော အသားစိုင်ကြီးမှာ တဖြည်းဖြည်းနှင့် ကျုံ့ဝင်လာနေပြီး၊ ၎င်း၏ မူလအစ စွမ်းအားများနှင့် ဇီဝတစ်သျှူးများသည် ထိုပြွန်များမှတစ်ဆင့် ဟော်ကျန့်၏ ခန္ဓာကိုယ်အတွင်းသို့ အတင်းအဓမ္မ စုပ်ယူ ထိုးသွင်းခြင်း ခံနေရခြင်းပင် ဖြစ်သည်။

ဟော်ကျန့်၏ ခန္ဓာကိုယ်မှာ ပြင်းထန်စွာ တုန်ယင်နေရှာသည်။ ဤသို့သော ကြမ်းတမ်းလှသည့် ပေါင်းစပ်မှုများကို မသိစိတ်မှ ခုခံနေသကဲ့သို့ပင် ဖြစ်ပြီး၊ သူ၏ ရင်ဘတ်ပေါ်က အယူအဆပိုင်းဆိုင်ရာ ဒဏ်ရာကြီးမှာမူ အပြင်းထန်ဆုံးသော စွမ်းအင် ပဋိပက္ခများ ဖြစ်ပွားရာ ဗဟိုချက် ဖြစ်လာခဲ့ရပြီ ဖြစ်သည်။

ယန်ချင်းယွမ်သည် လင်းထျန်းလုံကို လိုက်လံပို့ဆောင်ပြီးနောက် ချက်ချင်းပင် ဤနေရာသို့ ပြန်လည်ရောက်ရှိလာခဲ့သည်။

စောင့်ကြည့်ရေးမျက်နှာပြင်ပေါ်တွင် ရူးသွပ်စွာ ဖြတ်ပြေးနေကြသည့် ဒေတာများကို စိုက်ကြည့်နေမိရာ မျက်နှာပေါ်တွင် ယခင်က ထိတ်လန့်မှုများ လုံးဝ မရှိတော့ဘဲ ကျွမ်းကျင်မှုဆိုင်ရာ ရူးသွပ်သူတစ်ဦး၏ စိတ်လှုပ်ရှားမှုများသာ ပြည့်နှက်နေတော့သည်။

“စွမ်းအင် ပဋိပက္ခက ပိုပြီး ပြင်းထန်လာနေပါတယ်... ငြင်းပယ်မှု တုံ့ပြန်ချက်က အမြင့်ဆုံး သတ်မှတ်ချက်ကို ရောက်ရှိနေပါတယ်... ‘အခြေခံကျောက်တုံး’ (တစ်ဝက်တစ်ပျက် ဖန်တီးမှုကို ရည်ညွှန်းသည်) ရဲ့ အသက်စွမ်းအင်တွေက မြန်မြန်ဆန်ဆန် ခမ်းခြောက်နေပါတယ်”

သုသေသနပညာရှင်တစ်ဦးက စိုးရိမ်တကြီးဖြင့် အစီရင်ခံလိုက်သည်။

“ယခုလေးတင် ရောက်ရှိလာတဲ့ မိစ္ဆာဘုရင် ရိုးတွင်းခြင်ဆီ‌တွေကို ချက်ချင်း ထိုးသွင်းလိုက်စမ်း”

“မျှခြေဖြစ်အောင် အတင်းအဓမ္မ လုပ်စမ်း”

“ငါ သူတို့ကို လုံးဝ ပေါင်းစပ်သွားဖို့ လိုအပ်တယ် ‘အခြေခံကျောက်တုံး’ ဆိုတာ အစကတည်းက ဒီအဆင့်အတွက် အာဟာရအဖြစ် ပြင်ဆင်ထားခဲ့တာပဲ”

ယန်ချင်းယွမ် အမိန့်ပေးလိုက်ရင်း၊ သူ၏ မျက်လုံးများက ဟော်ကျန့်၏ အသက်ထောက်ပံ့မှု ကွန်တိန်နာအတွင်းက လိမ်ကောက်ပြောင်းလဲနေသည့် ပုံရိပ်အပေါ်သို့ တင်းကြပ်စွာ စောင့်ကြည့်နေသည်။

“မကြာခင်ပါပဲ... မကြာခင် ဖြစ်တော့မှာပါ... ‘သယ်ဆောင်သူ’ (ဟုန့်ကျိကို ရည်ညွှန်းသည်) ဒီစွမ်းအားအားလုံးကို လက်ခံလိုက်တဲ့ အချိန်ကျရင် ‘နတ်ဘုရား’ ဆိုတာ မွေးဖွားလာတော့မှာ...”

ယန်ချင်းယွမ် လက်တစ်ဖက်ကို ဝှေ့ယမ်းလျက် သုသေသနပညာရှင်အား အမိန့်ကို အကောင်အထည်ဖော်ရန် ခိုင်းစေလိုက်ပြီးနောက်၊ သူကိုယ်တိုင်မှာမူ ဟော်ကျန့်၏ အသက်ထောက်ပံ့မှု ကွန်တိန်နာရှေ့သို့ ဖြည်းညင်းစွာ လျှောက်လှမ်းသွားခဲ့သည်။

ထူထဲလှသော မှန်ချပ်ကြီးမှတစ်ဆင့် အတွင်း၌ လိမ်ကောက်ပြောင်းလဲနေသည့် ခန္ဓာကိုယ်ကို စိုက်ကြည့်နေမိသည်။

သူ၏ မျက်နှာပေါ်က ကျွမ်းကျင်မှုဆိုင်ရာ ရူးသွပ်မှုများမှာ အနည်းငယ် လျော့ပါးသွားခဲ့ပြီး၊ အတိတ်ကို ပြန်လည် အမှတ်ရနေသကဲ့သို့ တည်ငြိမ်လှသော်လည်း လုံးဝ သွေးအေးလှသော အမူအရာဖြင့် အစားထိုး နေရာယူလာသည်။

“ဂိုဏ်းချုပ်‌ဟော်၊ အို... ဂိုဏ်းချုပ်ဟော်”

သူ တိုးတိုးလေး ကိုယ်တိုင် ရေရွတ်လိုက်မိရာ သူ၏ အသံက ကျယ်ပြောပြီး ထူးဆန်းလှသော ဤ အဓိက ဓာတ်ခွဲခန်းအတွင်း ပဲ့တင်ထပ်သွားခဲ့ပြီး၊ စက်ကိရိယာများ ပုံမှန် လည်ပတ်နေသည့် တရှဲရှဲ မြည်သံများသာ နောက်ခံအသံအဖြစ် ရှိနေသည်။

“အမှန်အတိုင်း ပြောရရင်၊ ငါ တကယ်ပဲ ဝံပုလွေဘုရင်ရဲ့ ထိုးနှက်ချက်ကို ကျေးဇူးတင်ရမှာပဲ... တကယ်လို့ သူသာ မင်းကို ဒီလောက်ပြင်းထန်တဲ့ ဒဏ်ရာမရရှိစေခဲ့ရင်…”

“မင်းကို ဒီနောက်ပြန်လှည့်လို့မရတဲ့ အိပ်မောကျခြင်း အခြေအနေထဲ မကျရောက်စေခဲ့ရင်…ငါ တကယ်ပဲ ငါ့ရဲ့ ကြီးကျယ်ခမ်းနားလှတဲ့ ‘နတ်ဘုရားဖန်တီးရေး’ လုပ်ငန်းစဉ်ကြီးကို ဘယ်ကနေ စတင်ရမလဲဆိုတာ သိမှာမဟုတ်ဘူး”

သူ လက်ညှိုးတစ်ဖက်ကို ဆန့်ထုတ်လိုက်ပြီး အေးစက်သော မှန်ချပ်ကြီးပေါ်သို့ ညင်သာစွာ ခေါက်လိုက်‌လေသည်။လေထုကို ဖြတ်သန်းလျက် ဟော်ကျန့်၏ အသစ်စက်စက် ရက်စက်လှသော ပုံသဏ္ဌာန် အနားသတ်များကို ဆွဲခေါ်နေသကဲ့သို့ပင် ဖြစ်သည်။

“ငါတို့ သုံးဦးထဲမှာ၊ မင်းရဲ့ အဆင့်က အမြင့်ဆုံးဖြစ်သလို တိုက်ခိုက်ရေး စွမ်းအားကလည်း အားအကောင်းဆုံးပဲ”

“အထူးသဖြင့် မင်းရဲ့ မပျက်စီးနိုင်တဲ့ မီးလျှံဝိညာဉ်ကတော့... ကျွတ်ကျွတ်၊ ဒါက တကယ့်ကို ပြီးပြည့်စုံပြီး ဖြစ်နိုင်ခြေတွေ ပြည့်နှက်နေတဲ့ ပင်ကိုယ်စွမ်းရည်ပဲ မဟုတ်လား”

“အဲဒါက ကြမ်းတမ်းလှတဲ့ စွမ်းအားတွေကို သယ်ဆောင်ပြီး ပေါင်းစပ်ပေးနိုင်မယ့် အကောင်းဆုံး ‘မီးဖိုကြီး’ ဖြစ်လာမှာဖြစ်သလို၊ နတ်ဘုရားတစ်ပါးရဲ့ ‘ပလ္လင်တော် အခြေခံအုတ်မြစ်’ အဖြစ် ဆောင်ရွက်ပေးမယ့် အကောင်းဆုံး ပစ္စည်းလည်း ဖြစ်တယ်”

သူ၏ လေသံအတွင်း သတိထားမိရန် ခက်ခဲသော သက်သာရာရမှု အရိပ်အမြွက်တစ်ခု ပါဝင်နေသည်။

“တကယ်လို့ မင်းသာ အခု အသိစိတ် ရှိနေဦးမယ်ဆိုရင်၊ မင်းရဲ့ ခွန်အားတွေနဲ့ စရိုက်တွေအရ ငါ မင်းနားကို ချဉ်းကပ်ဖို့တောင် ဖြစ်နိုင်မှာ မဟုတ်ဘူး"

“မင်းကို ဒီအသက်ထောက်ပံ့မှု ကွန်တိန်နာအတွင်းမှာ ထားရှိဖို့ဆိုတာကတော့ ပိုလို့တောင် မဖြစ်နိုင်ဘူးပေါ့...”

“ဒါတွေက ပြောရရင် မင်းသာ ဒီလောက်အထိ ‘သင့်တော်’ တဲ့သူ မဟုတ်ခဲ့ဘူးဆိုရင်၊ ငါ့ရဲ့ ဒုတိယမြောက် အကောင်းဆုံး ရွေးချယ်မှုကတော့ လေ့ဟောက် ဖြစ်လာမှာ သေချာတယ်”

“သူရဲ့ ကျောက်ဆောင်နှလုံးသားက မင်းရဲ့ မပျက်စီးနိုင်တဲ့ မီးလျှံဝိညာဉ်လောက် ကြီးထွားနိုင်စွမ်း မရှိဘူးဆိုပေမဲ့၊ တည်ငြိမ်မှု အပိုင်းမှာတော့ အနိုင်ရတယ်၊ ဒါကြောင့် သူကလည်း ကနဦး ပြုပြင်ပြောင်းလဲမှုတွေကို တောင့်ခံနိုင်ကောင်း ခံနိုင်လိမ့်မယ်... ဟဲဟဲ”

သူ တိုးတိုးလေး ရယ်မောလိုက်ပြီး ခေါင်းခါလိုက်မိရာ၊ ကြည့်ရတာ ထိုအစားထိုးအစီအစဉ်က လက်ရှိ အစီအစဉ်လောက် ပြီးပြည့်စုံမှုမရှိဟု သူ ထင်မြင်နေပုံရသည်။

“ဒါကြောင့်၊ ဂိုဏ်းချုပ် ဟော်... ‘အိပ်မောကျခြင်း’ ကိုပဲ စိတ်အေးချမ်းစွာ ခံယူလိုက်ပါ။ မင်းရဲ့ စတေးခံရမှုတွေက ငါ့ကို အောင်မြင်စေမှာဖြစ်သလို၊ မီးပွားသုသေသနပညာရှင်အသင်းကိုလည်း အောင်မြင်စေမှာ ဖြစ်တယ်”

“ဒါတင်မကသေးဘူး လူသားအားလုံးရဲ့... ကြီးကျယ်ခမ်းနားလှတဲ့ ဖန်တီးမှုကြီးကိုပါ အောင်မြင်စေမှာ ဖြစ်တယ် မင်းက သာမန် တည်ရှိမှုတွေကို ကျော်လွန်သွားပြီး ထာဝရရှင်သန်သူ ဖြစ်လာလိမ့်မယ်”

သူ၏ မျက်လုံးများက ရူးသွပ်လှသော အလင်းတန်းများ၏ တစ်ဖန် ပြန်လည် ဝါးမြိုခြင်း ခံလိုက်ရပြန်သည်။

သူ ဟော်ကျန့်ကို ထပ်မံ ကြည့်မနေတော့ဘဲ၊ မျက်နှာပြင်ပေါ်ရှိ ပေါင်းစပ်ခြင်း လုပ်ငန်းစဉ်ကို ကိုယ်စားပြုနေပြီး လက်ရှိအချိန်အထိ ပြင်းထန်စွာ လှုပ်ခတ်နေဆဲဖြစ်သည့် ဒေတာ လိုင်းစင်းမျဉ်းကြောင်းများအပေါ်သို့ စိတ်ဝင်တစား ပြန်လည် စိုက်ကြည့်နေတော့သည်။

တစ်ချိန်တည်းတွင်၊ အခြားတစ်ဖက်၌ လေ့ဟောက်သည် သာမန် လူထုကြားတွင် လျှောက်လှမ်းနေရင်း၊ အမျိုးမျိုးသော သေးငယ်လှသည့် ကိစ္ဆာများကို ကိုင်တွယ်ဖြေရှင်းနေသည်။

အကန့်အသတ်ရှိသော အစားအစာများကို ခွဲဝေပေးခြင်း၊ နေရာပျောက်ဆုံးနေကြရသည့် ဒုက္ခသည်များကို နေရာချထားပေးခြင်းနှင့် အငြင်းပွားမှုများကို ညှိနှိုင်းပေးခြင်းတို့ပင်။

“စခန်းမှူးလေ့၊ ငါတို့ မင်းကို အရမ်း ကျေးဇူးတင်ပါတယ်...”

“တကယ်လို့ စခန်းမှူးလေ့သာ ထွက်မလာခဲ့ရင်၊ ငါတို့ တကယ်ပဲ ဘာလုပ်ရမှန်း သိမှာ မဟုတ်တော့ဘူး...”

ဤစကားလုံးများက သူ၏ ပုခုံးပေါ်က ဝန်ထုပ်ဝန်ပိုးကို ပိုမို လေးလံလာစေခဲ့သည်။ သူသည် လက်ရှိတွင် ပြုပြင်ပြောင်းလဲခြင်း ခံနေရသည့် မြင့်မားလှသော ချော်ရည် ခန်းမဆောင်ဆီသို့ မော့ကြည့်လိုက်မိရင်း၊ သူ၏ နှလုံးသားထဲတွင် တိတ်ဆိတ်စွာ တွေးတောနေမိသည်။

‘ဂိုဏ်းချုပ်ဟော် မင်းရဲ့ ဝိညာဉ်သာ ကောင်းကင်ထက်ကနေ စောင့်ကြည့်နေမယ်ဆိုရင် ငါ့ကို ပြောပြပေးပါဦး’

‘ငါ အခု လုပ်နေသမျှ အရာအားလုံးက မှန်နေရဲ့လား...’

လင်းထျန်းလုံအပေါ် သူ၏ ရိုသေကိုးကွယ်မှုမှာ ယာယီ ငြိမ်းချမ်းမှုများကြောင့် လျော့ပါးမသွားခဲ့သည့်အပြင် ခန့်မှန်းရခက်သော နည်းလမ်းများနှင့် ရက်စက်လှသော ဆန္ဒတရားများကြောင့် ပိုမို၍ပင် နက်နဲလာခဲ့ရပြီ ဖြစ်သည်။

ညဉ့်နက်ပိုင်း ရောက်ရှိလာချိန်၌၊ ခရမ်းရောင် ပုံရိပ်တစ်ခုသည် လင်းထျန်းလုံ၏ ယာယီ စံအိမ်အပြင်ဘက်သို့ ဆင်းသက်လာခဲ့သည်။

“ငါ ပုံမှန်မဟုတ်တဲ့ ရနံ့တစ်ခုကို ခံစားမိတယ်၊”

ယွဲ့ရီ အနည်းငယ် မျက်မှောင်ကြုတ်လိုက်မိရှာသည်။

“အဲဒီသန့်ရှင်းတဲ့ ဓာတ်ခွဲခန်းရဲ့ နက်ရှိုင်းရာဆီကနေ ထွက်ပေါ်လာတာ၊ ဒါဟာ တစ်ခုခု... ဆွေးမြည့်နေသလိုမျိုးဖြစ်ပြီး တစ်ချိန်တည်းမှာပဲ ပြန်လည်မွေးဖွားလာနေသလိုမျိုး ခံစားရစေတယ်… ဒါက အရမ်းအားနည်းပေမဲ့၊ လူကို စိတ်မအေးဖြစ်စေတယ်”

လင်းထျန်းလုံ မီးပွားသုသေသနပညာရှင်အသင်းရှိရာ ဦးတည်ချက်ဆီသို့ လှမ်းကြည့်လိုက်ရာ သူ၏ အကြည့်များက ထူထဲလှသော တံတိုင်း အမြောက်အမြားကို ထိုးဖောက်သွားသကဲ့သို့ပင် ဖြစ်သည်။

“ဒါဆိုရင်တော့ အဲဒါကို ဆက်ပြီး လုပ်ခွင့်ပြုထားလိုက်ပါ၊”

သူ တည်ငြိမ်စွာ စကားပြောဆိုလိုက်သည်။

“ငါ ကိုယ်တိုင် ကျွေးမွေးခဲ့တဲ့ ဒီငါးစာက၊ နောက်ဆုံးမှာ ဘယ်လို ငါးကြီးမျိုးကို မျှားခေါ်လာမလဲဆိုတာ ငါ စောင့်ကြည့်ရသေးတာပေါ့”