အခန်း ၃၇၀

အခန်း (၃၇၀) - ရေခဲဖြင့် ထုဆစ်ထားသော တော်ဝင်တရားရုံး (၂)

“...အာရုံကြောချိတ်ဆက်မှု ပြီးစီးနှုန်း ၉၈.၇ ရာခိုင်နှုန်း... အဆိပ်အိတ် ပုံတူပတ်လမ်းတုံ့ပြန်ချက် ပြီးပြည့်စုံသည်...”

မြေအောက်မီတာသုံးဆယ်အကွာရှိ ဓာတ်ခွဲခန်းအတွင်း၌ ယန်ချင်းယွမ်သည် စောင့်ကြည့်ရေးမျက်နှာပြင်ပေါ်သို့ လုံးဝ အာရုံစိုက်နေပြီး သူ့လက်ထဲရှိ စက်ကိရိယာက ဟုန့်ကျိ၏ ခန္ဓာကိုယ်ပေါ်သို့ အသစ်ပြောင်းရွှေ့တပ်ဆင်ထားသည့် မြွေဘုရင်၏ တစ်သျှူးများနှင့် ချိတ်ဆက်ထားသည်။

ဓာတ်ခွဲခန်းအလင်းရောင်များက သူ့နဖူးပေါ်တွင် နက်နဲသော အရိပ်များကို ချန်ထားခဲ့သဖြင့် မူလက ယဉ်ကျေးပုံရသော မျက်နှာကို ပိုမို၍ လျှို့ဝှက်ဆန်းကြယ်စွာ ‌ဆိုးသွမ်းပုံပေါ်စေသည်။

“...မပျက်စီးနိုင်တဲ့ မီးလျှံဝိညာဉ်ရဲ့ ထပ်တူကျမှုနှုန်းက မျှော်လင့်ထားတာထက် အများကြီး ကျော်လွန်နေတယ်…”

“သတ္တမအကြိမ်မြောက် စွမ်းအင်ရိုက်ခတ်မှုခံနိုင်ရည် စမ်းသပ်ချက် အောင်မြင်တယ်... စမ်းသပ်ပစ္စည်း B-7 ရဲ့ ဆဲလ်ကျန်းမာမှုက စံပြအခြေအနေမှာ ရှိနေတုန်းပဲ...”

သူ မသိရှိခဲ့သည်မှာ သူ၏ သေးငယ်လှသော လှုပ်ရှားမှုတိုင်းကြောင့် ဖြစ်ပေါ်လာသည့် စွမ်းအင်လှိုင်းဂယက်တိုင်းကို ယင်းဖုန်း၏ အသိစိတ်အတွင်း၌ တိကျစွာ ပြန်လည်ပုံဖော်နေခြင်းကိုပင်။

နှင်းခဲအရိပ်လျှို့ဝှက်အစောင့်အရှောက်များ၏ ကွပ်ကဲသူဖြစ်သည့် သူမသည် သည်းခံနိုင်ဆုံးသော အမဲလိုက်သူတစ်ဦးဖြစ်ပြီး အရိပ်များထဲတွင် မမြင်နိုင်သော စောင့်ကြည့်ရေးကွန်ရက်တစ်ခုကို ပုံသွင်းထားခဲ့ပြီ ဖြစ်သည်။

ယင်းဖုန်းသည် ဓာတ်ခွဲခန်း အတွင်းပိုင်းရှိ ပိုမို၍ မတည်မငြိမ်ဖြစ်လာနေသော ထိုစွမ်းအင်အတက်အကျများကို ရှင်းလင်းစွာ ခံစားသိရှိနိုင်နေသည်။

၎င်းမှာ ဆူပွက်လုနီးပါးဖြစ်နေသည့် ရေနွေးအိုးကြီးတစ်လုံးအလားပင်။ အပြင်ပန်းတွင် တည်ငြိမ်နေသော်လည်း အတွင်းပိုင်း၌မူ အပြင်းအထန် ဆူပွက်နေပြီဖြစ်သည်။

မွန်းတည့်ချိန်၌ ချော်ရည်ခန်းမဆောင်၏ ပြုပြင်ပြောင်းလဲရေးလုပ်ငန်းစဉ်ကြီးမှာ အကြမ်းထည်ပုံစံ ထွက်ပေါ်လာခဲ့ပြီ ဖြစ်သည်။

ဝံပုလွေအသိုက်၏ ဗိသုကာဝံပုလွေများသည် ရေခဲစနစ်ပင်ကိုစွမ်းရည်များကို အသုံးပြု၍ အထူးသတ္တုများနှင့် မူလအဆောက်အအုံအရိုးစုကြီးကို ပြီးပြည့်စုံစွာ ပေါင်းစပ်ပေးခဲ့ကြသည်။

အစောင့်အရှောက်ဝံပုလွေများသည် အသစ်တည်ဆောက်ပြီးစီးသွားခဲ့သည့် ကင်းမျှော်စင်များပေါ်တွင် ကင်းလှည့်နေကြပြီး သူတို့၏ ရေခဲချပ်ဝတ်တန်ဆာများက နေရောင်အောက်တွင် အေးစက်သော အလင်းတန်းများကို ဖြာထွက်နေစေသည်။

မဟာနှင်းအစောင့်အရှောက်ကိုးဦးက အရေးကြီးသော အမှတ်များတွင် ကာကွယ်ပေးထားကြသည်။

သူတို့၏ ငွေမီးခိုးရောင်အမွေးအမျှင်များနှင့် ရေခဲချပ်ဝတ်တန်ဆာများမှာ ပတ်ဝန်းကျင်နှင့် လုံးဝ တစ်သားတည်းဖြစ်နေပြီး ရံဖန်ရံခါ လှုပ်ရှားတတ်သော ရေခဲမျက်ဝန်းပြာများကသာ သူတို့အားလုံး တင်းကြပ်စွာ စောင့်ကြပ်နေကြောင်း ဖော်ပြနေကြသည်။

နင်မြို့၏ အဓိကဧရိယာသည် ဝံပုလွေမျိုးနွယ်စု၏ ရိုက်နှိပ်ချက်များဖြင့် လျင်မြန်စွာ လွှမ်းခြုံခြင်း ခံနေရသည်။

လောင်ကျွမ်းမီးလျှံဂိုဏ်း၏ မူလမီးတောက်တိုတမ်နေရာကို ယခုအခါ နှင်းခဲဂါထာအက္ခရာများဖြင့် အစားထိုးလိုက်ပြီဖြစ်သည်။

အဆောက်အအုံအစွန်းများကို ဝံပုလွေဦးခေါင်းပုံထွင်းထုမှုများဖြင့် တန်ဆာဆင်ထားကြပြီး လမ်းမများ၏ ဖွဲ့စည်းပုံကိုပင် ဝံပုလွေအသိုက်၏ ကာကွယ်ရေးစနစ်အတိုင်း ပြန်လည်၍ အစီအစဉ်ချ တည်ဆောက်နေကြသည်။

အညံ့ခံမျိုးနွယ်စုများသည် ကြီးကြပ်သူများ၏ စောင့်ကြည့်မှုအောက်တွင် ပြန်လည်တည်ဆောက်ရေးလုပ်ငန်းစဉ်များကို ဆောင်ရွက်နေကြရသည်။

သူတို့၏ လှုပ်ရှားမှုဧရိယာများကို တင်းကြပ်စွာ ကန့်သတ်ထားပြီး မည်သည့်စည်းကမ်းချိုးဖောက်မှုမဆို ချက်ချင်း ပြင်းထန်စွာ နှိမ်နင်းခြင်း ခံရတတ်သည်။

လေ့ဟောက်သည် စည်းကမ်းများ တဖြည်းဖြည်း ပြန်လည်တည်ငြိမ်လာနေပြီဖြစ်သည့် လမ်းမများပေါ်တွင် လျှောက်လှမ်းနေရင်း အရပ်သားများ၏ အမျိုးမျိုးသော တောင်းဆိုချက်များကို ကိုင်တွယ်ဖြေရှင်းပေးနေသည်။

လူထုက သူ့အား ကြည့်ရှုကြသည့် အကြည့်များထဲတွင် အားကိုးလိုစိတ်များနှင့် ဝံပုလွေအုပ်စုကင်းလှည့်တပ်ဖွဲ့များကို မြင်တွေ့ရချိန်၌ ထွက်ပေါ်လာတတ်သည့် မွေးရာပါကြောက်ရွံ့မှုတို့က လေထုထဲတွင် သိမ်မွေ့လှသော မျှခြေတစ်ခုကို ဖန်တီးထားသည်။

ဤမျှခြေကို ထိန်းသိမ်းထားရန်ကသာ လက်ရှိအချိန်တွင် သူ ဆောင်ရွက်ရမည့် အလုပ်ဖြစ်သည်။

လေ့ဟောက်မှာ ကြိုးတန်းတစ်ခုပေါ်တွင် လျှောက်လှမ်းနေရသကဲ့သို့ သူ့ကိုယ်သူ ခံစားမိနေသည်။

တစ်ဖက်တွင် ဝံပုလွေဘုရင်၏ အကြွင်းမဲ့အာဏာစက် ရှိနေပြီး အခြားတစ်ဖက်တွင် အရပ်သားများ၏ အသက်ရှင်သန်ရေးလိုအပ်ချက်များ ရှိနေသည်။

သူ ယာယီဆေးဘက်ဆိုင်ရာ စခန်းတစ်ခုဘေးမှ ဖြတ်သန်းသွားချိန်၌ သက်ကြီးရွယ်အိုအမျိုးသားတစ်ဦးက တုန်တုန်ယင်ယင်ဖြင့် သူ့အား တားဆီးရှာသည်။

“စခန်းမှူးလေ့၊ ကျွန်တော့်မြေးလေးအတွက် အဖျားပျောက်ဆေးပြတ်လပ်နေတာ နှစ်ရက်ရှိပါပြီဗျာ...”

လေ့ဟောက်မှာ မိမိလက်ထဲရှိ ရိက္ခာခွဲဝေမှုစာရင်းကို ကြည့်လိုက်ပြီးနောက် တစ်ခဏမျှ တိတ်ဆိတ်သွားခဲ့ပြီး သူ၏ ကိုယ်ပိုင်ဝေစုထဲမှ ဆေးဝါးပမာဏတစ်ခုကို တိုက်ရိုက်ထုတ်ပေးလိုက်သည်။

“ဒါကိုယူသွားလိုက်ပါ”

ထိုသက်ကြီးရွယ်အို၏ လက်ဖဝါးပေါ်တွင် အလုပ်ကြမ်းလုပ်ထားခဲ့ခြင်းကြောင့် ဖြစ်ပေါ်နေသည့် ဒဏ်ရာအမြောက်အမြားကို သူ သတိပြုမိလိုက်သကဲ့သို့ ဝတ်စုံပေါ်တွင်လည်း အပျက်အစီးများရှင်းလင်းစဉ်က ပေကျံခဲ့သည့် ဖုန်မှုန့်များ ရှိနေဆဲပင်။

ဤသို့သောမြင်ကွင်းမျိုးက ထောင့်တိုင်းတွင် ဖြစ်ပွားနေပြီး အလျှော့ပေးမှုတစ်ကြိမ်စီတိုင်းက မူလကတည်းကပင် ကန့်သတ်ချက်ရှိလှသော သူ၏ အရင်းအမြစ်ဝေစုများကို ခန်းခြောက်သွားစေသည်။

ပိုမိုဝေးလံသောနေရာ၌ အညံ့ခံမျိုးနွယ်စုဝင်အချို့က လမ်းမများကို ရှင်းလင်းနေကြသည်။

သူတို့သည် ခေါင်းများကို အောက်သို့ ငုံ့ထားကြသော်လည်း လေ့ဟောက်ကမူ ထိုအကြည့်များထဲတွင် ဖုံးကွယ်ထားသည့် မကျေနပ်မှုများကို ခံစားမိသည်။

အထူးသဖြင့် မူလက မြင့်မားသော အဆင့်အတန်းများ ရှိခဲ့ကြဖူးသော်လည်း ယခုအခါ သာမန်အဖွဲ့ဝင်များအလား အလုပ်ကြမ်းများလုပ်ကိုင်ရန် ဖိအားပေးခံထားရသည့် မျိုးနွယ်စုခေါင်းဆောင်အချို့၏ စိတ်ထဲတွင် ဤကွာဟချက်ကြီးက တိတ်တဆိတ် ကြီးထွားလာနေသည်။

နေဝင်ချိန်ရောက်လာသောအခါ လင်းထျန်းလုံသည် အကြမ်းထည်ပုံစံ ထွက်ပေါ်လာခဲ့ပြီဖြစ်သော ပလ္လင်တော်ထက်၌ လဲလျောင်းနေပြီး သူ၏ ညာဘက်ရှေ့ခြေမှ မိုးပြာရောင်အလင်းတန်းမှာ ဆည်းဆာအလင်းအောက်တွင် အားနည်းစွာ ဖြာထွက်နေသည်။

ထာဝရရေခဲနှလုံးသား၏ အပိုင်းအစမှတစ်ဆင့် အာဟာရဖြည့်တင်းပေးမှုက မည်သည့်အချိန်ကမျှ မရပ်တန့်ခဲ့သကဲ့သို့ မိခင်သစ်ပင်ကြီး၏ စွမ်းအားများနှင့် ထပ်ဆင့်ပြုပြင်ပေးမှုကြောင့် အယူအဆပိုင်းဆိုင်ရာ ဒဏ်ရာမှာ တဖြည်းဖြည်း ကောင်းမွန်လာခဲ့ပြီဖြစ်သည်။

ထိုဗလာဖြစ်နေခဲ့ဖူးသော ဧရိယာမှာ ဤကမ္ဘာကြီးနှင့် ပြန်လည်ချိတ်ဆက်လာနေကြောင်း သူ ခံစားမိနေသည်။

စွမ်းအင်လည်ပတ်မှုတစ်ကြိမ်စီတိုင်းတွင် အသစ်စက်စက်လမ်းကြောင်းများက ဗလာနယ်အတွင်းသို့ ဆန့်တန်းသွားကြသည်။

အရှိန်အဟုန်မှာ နှေးကွေးသော်လည်း ရှေ့သို့ အမှန်တကယ်ပင် တိုးတက်နေခြင်းဖြစ်သည်။

ထိုအခိုက်အတန့်တွင် ယင်းဖုန်း၏ မက်ဆေ့ခ်ျမှာ ဝိညာဉ်ရေးရာကွန်ရက်မှတစ်ဆင့် စီးဝင်လာခဲ့သည်။

“ဘုရင်မင်းမြတ်၊ ပစ်မှတ်က ကျွမ်းကျင်မှုပတ်လမ်း ပုံတူစမ်းသပ်ချက်ကို ပြီးစီးသွားခဲ့ပါပြီ”

“စွမ်းအင်လှုပ်ခတ်မှုတွေက တည်ငြိမ်နေပေမဲ့ သူ့ရဲ့နက်ရှိုင်းမှုက မနေ့ကထက် ၁၂ ရာခိုင်နှုန်း ပိုတိုးလာပါတယ်”

“သူ အခု အရိုးဖြူမိစ္ဆာဘုရင်ရဲ့ ဝိညာဉ်မီးတောက်တွေကို စမ်းသပ်ပစ္စည်းထဲ လမ်းညွှန်ဖို့ စကြိုးစားနေပါတယ်”

“ဓာတ်ခွဲခန်းရဲ့ တတိယထပ် အရှေ့ဘက်က စွမ်းအင်ချိတ်ပိတ်မှုပေါ်မှာ အားနည်းတဲ့ လှုပ်ခတ်မှုတစ်ခု ရှိနေပြီးတော့ စက်ကိရိယာတွေ ဝန်ပိုဖြစ်မည့် ရှေ့ပြေးနိမိတ်ဖြစ်နိုင်ခြေ ရှိပါတယ်”

“ဆက်‌‌စောင့်ကြည့်ထားပါ”

လင်းထျန်းလုံ၏ လက်သည်းထိပ်ဖျားက ပလ္လင်တော်လက်တန်းပေါ်သို့ မသိစိတ်မှ တတောက်တောက်ခေါက်နေမိရာ သတ္တုမျက်နှာပြင်ပေါ်တွင် ရေခဲသလင်းကျောက်များ ပွင့်ဟလာလိုက်၊ ပြိုကွဲသွားလိုက် ဖြစ်နေသည်။

“သူ့လက်ထဲမှာ ဓားထက်ထက်တစ်လက်ကို ကိုင်ထားနိုင်ပြီလို့ လုံးဝ အခိုင်အမာ ယုံကြည်သွားမယ့် အချိန်ထိ စောင့်လိုက်ပါ”

“စွမ်းအင်မူမမှန်မှုတွေနဲ့ ပတ်သက်တဲ့ ဒေတာအပြောင်းအလဲအားလုံးကို သေချာမှတ်တမ်းတင်ထားဖို့ မမေ့ပါနဲ့”

ယွဲ့ရီသည် ပလ္လင်တော်ဘေးတွင် တိတ်တဆိတ် ပေါ်လာခဲ့ပြီး ခရမ်းရောင်မျက်ဝန်းများက ပိုမိုနက်ရှိုင်းလာနေပြီဖြစ်သော ညဉ့်နက်အတွင်း၌ တောက်ပနေသည်။

“ငါ မြို့ရဲ့ တောင်ဘက်အရပ်မှာ စိတ်ဝင်စားစရာကောင်းတဲ့ လှုပ်ရှားမှုတချို့ကို ရှာတွေ့ခဲ့တယ်”

“တချို့မျိုးနွယ်စုခေါင်းဆောင်တွေ လျှို့ဝှက်တွေ့ဆုံနေကြတယ်”

“အခုထိတော့ တကယ့်လှုပ်ရှားမှုမျိုး မလုပ်ရဲကြသေးဘူးဆိုပေမဲ့... မကျေနပ်ချက်တွေကတော့ စုပုံနေပြီ”

“အထူးသဖြင့် အရင်တုန်းက စိမ့်ညွန်နက်မြွေဘုရင်ကို အားကိုးခဲ့ကြတဲ့ မျိုးနွယ်စုတွေပဲ။ သူတို့ရဲ့ လက်ရှိအခြေအနေတွေကို အရမ်း မကျေမနပ်ဖြစ်နေကြပုံ‌ရတယ်”

“အရမ်းကောင်းတယ်”

လင်းထျန်းလုံ၏ နဖူးပေါ်ရှိ ရေခဲမိုးကြိုးသရဖူတော်ထက်၌ အမှောင်ရွှေရောင် မိုးကြိုးပုံစံအချို့ ဖြတ်ပြေးသွားခဲ့ပြီ ဖြစ်သည်။

“ဖိအားတွေအကုန်လုံးကို ဆက်စုခိုင်းထားလိုက်။ မှတ်ထား၊ ငါတို့လိုချင်တာက အလုံးစုံ ထိန်းချုပ်မှုအာဏာစက်ပဲ၊ အပေါ်ယံနာခံမှုမျိုး မဟုတ်ဘူး”

ယွဲ့ရီ ခေါင်းညိတ်ပြလိုက်သည်။ သူမ၏ ခရမ်းရောင်အမွေးအမျှင်များက ညဉ့်နက်အလင်းအောက်တွင် တောက်ပနေလေသည်။

“နှင်းခဲအရိပ်လျှို့ဝှက်အစောင့်အရှောက်တွေရဲ့ စောင့်ကြည့်မှုတွေကို ပိုအားကောင်းအောင်လုပ်ဖို့ စီစဉ်ပေးရမလား”

“မလိုပါဘူး”

လင်းထျန်းလုံ၏ အကြည့်များက ပြတင်းပေါက်အပြင်ဘက်ရှိ နင်မြို့၏ ညမြင်ကွင်းအပေါ်သို့ ဖြတ်သန်းကြည့်ရှုလိုက်သည်။

“သူတို့ အခွင့်အရေးတစ်ခု ရှာတွေ့သွားပြီလို့ အထင်မှားခွင့်ပေးလိုက်တာက ပိုကောင်းပါတယ်”

“သူတို့ကိုယ်တိုင် တက်တက်ကြွကြွ လှုပ်ရှားလာတဲ့ အချိန်ကျမှပ ငါတို့ဘက်က တရားဝင်... ရှင်းလင်းရေးလုပ်လို့ရမှာ မဟုတ်လား”

ညဉ့်နက်သန်းခေါင်ယံအချိန်တွင်မူ နင်မြို့တော်ကြီးမှာ တိတ်ဆိတ်မှုထဲသို့ လုံးဝကျရောက်သွားခဲ့ပြီး ကင်းလှည့်တပ်ဖွဲ့များ၏ ခြေသံအချို့သာ ဤတိတ်ဆိတ်မှုကို ရံဖန်ရံခါ ဖြိုခွင်းနေချိန်၌ လင်းထျန်းလုံမှာ ဝရန်တာစွန်းတွင် တစ်ကိုယ်တည်း မတ်မတ်ရပ်နေသည်။

သူသည် ညာဘက်ရှေ့ခြေလက်၏ ထင်ရှားမြင်သာသော ပုံရိပ်ကို လရောင်အောက်တွင် မြှောက်လိုက်ရာ လက်သည်းထိပ်ဖျားရှိ အမည်းရောင်လျှပ်စစ်မီးပွားများက ရုတ်တရက် တက်ကြွစွာ ခုန်လှုပ်လာကြသည်မှာ တစ်စုံတစ်ရာကို ခံစားမိလိုက်ကြသကဲ့သို့ပင်။

သူသည် မြို့တော်တစ်ခုလုံးတွင် ဆူပွက်နေသော အဝါရောင်လှိုင်းများကို ရှင်းလင်းစွာ ခံစားသိရှိနိုင်နေသည်။

အညံ့ခံမျိုးနွယ်စုများ၏ မကျေနပ်မှုများ၊ အရပ်သားများ၏ ထိတ်လန့်မှုများ၊ လေ့ဟောက်၏ ရုန်းကန်မှုများနှင့်၊ ထို...ဓာတ်ခွဲခန်းအတွင်း ရုပ်လုံးပေါ်လာနေပြီဖြစ်သော ခြိမ်းခြောက်မှုကြီးပင်။

သူ မီးပွားသုသေသနပညာရှင်အသင်းရှိရာ လားရာဆီသို့ လှမ်းကြည့်လိုက်မိသောအခါ နှုတ်ခမ်းထောင့်တွင် သတိထားမိရန်ခက်ခဲသော အကွေးတစ်ခု ပေါ်လာခဲ့သည်။

လရောင်က သူ၏ ငွေဖြူရောင်ခန္ဓာကိုယ်ပေါ်သို့ ကျရောက်နေသဖြင့် အားနည်းသော မိုးပြာရောင်အလင်းတန်းများကို ရောင်ပြန်ဟပ်နေစေသည်မှာ သူ၏ခန္ဓာကိုယ်အတွင်း အဆုံးစွန်သော ကောင်းကင်ကြီးတစ်ခုအား အမှန်တကယ် ဖုံးကွယ်ထားသကဲ့သို့ပင်။

“ငါ မင်းကို စောင့်နေတယ်...”

လင်းထျန်းလုံ တိုးတိုးလေးရေရွတ်လိုက်မိရာ သူ၏ လက်သည်းထိပ်ဖျားရှိ အနက်ရောင်လျှပ်စစ်မီးပွားများမှာ ပျော်ရွှင်စွာ ခုန်လှုပ်နေကြသည်။

“မင်းရဲ့ဓားသွားကို ထုတ်ပြမယ့် အချိန်ကိုပေါ့...”

ဝေးကွာလှသော ဝံပုလွေအသိုက်အတွင်းတွင် ရှောင်လန်မှာ ရုတ်တရက် အိပ်မက်မှ လန့်နိုးလာခဲ့သည်။

သူမသည် ရင်ဘတ်ပေါ်ရှိ အဆောင်လေးကို မသိစိတ်မှ တင်းကြပ်စွာ ဆုပ်ကိုင်ထားမိရာ ရေခဲပင်မသတ္တုရိုင်းဖြင့် ပြုလုပ်ထားသည့် ထိုဆွဲသီးလေးမှာ အနည်းငယ် ပူနွေးနေခဲ့ပြီပင်။

“ဘာဖြစ်လို့လဲ၊ သမီး”

သူမ၏ အသိစိတ်ထဲတွင် ရှောင်ယင်း၏အသံ ထွက်ပေါ်လာသည်။

“သမီး မသိဘူး...”

ရှောင်လန်မှာ ထိုင်လိုက်မိရင်း မျက်လုံးလေးများကို ပွတ်သပ်နေရှာသည်။

“သမီး ရုတ်တရက် ခံစားလိုက်ရတာ... ဖေဖေတို့ဘက်မှာ တစ်ခုခုဖြစ်တော့မလိုမျိုးပဲ...”

သမီးငယ်နှစ်ဦးလုံး အချင်းချင်း ကြည့်လိုက်မိရာ မျက်လုံးလေးများထဲတွင် စိုးရိမ်ပူပန်မှုများ ပြည့်နှက်နေရှာသည်။

သူတို့သည် မိုင်ပေါင်းများစွာ ဝေးကွာနေကြသော်လည်း ရှေးဟောင်းဝံပုလွေသွေးစစ်စစ်၏ ချိတ်ဆက်မှုမှာ မည်သည့်ဆက်သွယ်ရေးနည်းလမ်းထက်မဆို ပိုမိုစူးရှလှပေသည်။