အခန်း ၂၄၅၃-၂၄၅၄)

အခန်း (၂၄၅၃) - ကောင်းကင်နှင့်မြေပြင် အကြွင်းအကျန်များထက် ပိုမိုဆိုးရွားသည်

"ဒါဆိုရင်တော့ ကျောက်ကျိက ဒီကိစ္စနဲ့ ပတ်သက်နေတာပေါ့။ သူ့ရဲ့ နောက်ကွယ်မှာ ချင်ဂွေ့ ရှိနေတယ်။ ချင်မျိုးနွယ်စုထဲမှာ ယင်သူတော်စင် ကျင့်စဉ်ကို ပိုင်ဆိုင်ထားတဲ့သူတွေ တကယ်ပဲ အများကြီးပဲ။"

ဖန့်ချန် က တိုးတိုးလေး ရေရွတ်လိုက်သည်။

ကျိလင် သည် ရုတ်တရက် လှောင်ပြုံး ရယ်မောလိုက်သည်။

"စိတ်မိစ္ဆာ... ယင်သူတော်စင် ကျင့်စဉ်ဆိုတာ ကောင်းတဲ့အရာတစ်ခုပါ။ ကောင်းကင်ငါးပါးနယ်မြေ က ဒီကျင့်စဉ်ကို ပိတ်ပင်ထားသင့်တာ မဟုတ်ဘူး။ ပြောရရင် ဒါက လောဘကြီးသော နတ်ဆိုးမျိုးနွယ် ရဲ့ ဟွမ်ချွမ် တွင်းနက် နဲ့ ဘာများ ကွာခြားလို့လဲ လောဘကြီးသော နတ်ဆိုး မျိုးနွယ်က သူများရဲ့ အတွင်းကမ္ဘာနယ်မြေကို ဝါးမြိုနိုင်ပြီး ငါတို့ကျတော့ ဘာလို့ မရရမှာလဲ "

"ကောင်းပြီ၊ မင်းကို ငါ ပြန်ခေါ်သွားတော့မယ်။"

ဖန့်ချန် ရယ်မောလိုက်ပြီး လှည့်စားခြင်း နတ်ဘုရာစွမ်းရည်ကို ချက်ချင်း ရုပ်သိမ်းလိုက်သည်။

ချက်ချင်းဆိုသလိုပင် ကျိလင် သည် သူ့ရှေ့တွင် ပြိုပျက်နေသော အပျက်အစီးပုံသဏ္ဍာန် ဖြစ်နေသည့် အတွင်းကမ္ဘာနယ်မြေကို မြင်လိုက်ရပြီး သူ၏ အမူအရာမှာ တဖြည်းဖြည်းနှင့် ထိုင်းမှိုင်းသွားသည်။ သူသည် တစ်စုံတစ်ခုကို ဖမ်းဆုပ်မိချင်သည့်အလား လက်ဖဝါးကို ဖြည်းညှင်းစွာ ဆန့်ထုတ်လိုက်သော်လည်း ဘာတစ်ခုမှ ဖမ်းဆုပ်မမိခဲ့ပေ။ နောက်ဆုံးတွင် သူသည် ဖန့်ချန် ၏ လက်ဖဝါးကိုသာ ဆုပ်ကိုင်မိလိုက်သည်။

"သွားကြရအောင်။"

ဖန့်ချန် သည် ကျိလင် ကို ဆွဲခေါ်ကာ အတွင်းကမ္ဘာနယ်မြေမှ ထွက်ခွာခဲ့ပြီး ကျောင်းတော်ရှိရာဘက်သို့ အရှိန်အဟုန်ဖြင့် ပြန်လည် ထွက်ခွာသွားလေသည်။

……

ရွှေဟွေးကျောင်းတော်၊ လူသားမျိုးနွယ်စု ကျောင်းခွဲ။

"အားလုံးပဲ ကြားပြီးကြပြီ ဖြစ်မှာပါ။ ဖန့်ချန် ကို သစွာစကား အစည်းအဝေးခန်းမဆီ စောစီးစွာ ပို့လိုက်ပြီး ဒီတစ်ခေါက် ရွေးချယ်မှု စစ်ဆေးခြင်းမှာ ပါဝင်စေခဲ့တယ်လေ။"

ချင်ဂွေ့ က အေးဆေးစွာ ပြောသည်။

ထိုနေရာရှိ ကာကွယ်ရေးဆရာများ ၏ အမူအရာမှာ အလွန်ပင် လေးနက်သွားသည်။ ဤ ကာကွယ်ရးဆရာများတွင် တူညီသော အချက်တစ်ခု ရှိသည်မှာ အားလုံးက ချင် အမည်ခံများသာ ဖြစ်ကြသည်။ ရွှီကာကွယ်ရေးဆရာ၊ နာလန်ချိုဟုန် တို့ကဲ့သို့သော ပုဂ္ဂိုလ်များမှာ ယနေ့တွင် မပါဝင်ကြပေ။

"ဒီကောင်လေးက တကယ်ပဲ မဟာမိတ်အဖွဲ့ ရဲ့ အဆင့်တက်လမ်းကြောင်းပေါ် ရောက်သွားတာလား"

ကာကွယ်ရေးဆရာ တစ်ဦးက သက်ပြင်းအသာချလိုက်သည်။

"သူသာ စစ်ဆေးမှုကို အောင်မြင်သွားရင်တော့ နောက်ပိုင်း လူသားမျိုးနွယ်စုမှာ သူ့ကို ဘယ်သူမှ ထိန်းချုပ်နိုင်တော့မှာ မဟုတ်ဘူး။"

"ဟုတ်တယ်လေ၊ ဒီရာထူးက သာမန်ရာထူးတွေထက် ပိုပြီး သြဇာအာဏာကြီးတယ်။ အထက်အရာရှိတွေရဲ့ နားထဲအထိ တိုက်ရိုက် ရောက်သွားနိုင်တဲ့ အဆင့်မျိုးပဲ။"

"ချင်ဂွေ့၊ မင်း ငါတို့ကို ခေါ်တာက ဒီကိစ္စကို အကြောင်းကြားဖို့ သက်သက်လား ဖန့်ချန် က ငါတို့ ချင်မျိုးနွယ်စုနဲ့ သိပ်မရင်းနှီးပေမဲ့ သူက လူသားတစ်ယောက်ပါပဲ။ သူ ဒီလမ်းကြောင်းပေါ် လျှောက်တာက ငါတို့အတွက်လည်း အကျိုးရှိကောင်း ရှိနိုင်ပါတယ်။"

"မိုက်မဲလိုက်တာ။"

ချင်ဂွေ့ က ထိုကာကွယ်ရေးဆရာ ကို ကြည့်ကာ မျက်လုံးများမှာ တင်းမာသွားသည်။

"ကရုဏာတောင် ရဲ့ လက်ရှိ သဘောထားကို မင်းတို့ မမြင်မိဘူးလား"

"ကရုဏာတောင်..."

ကာကွယ်ရေးဆရာများ၏ အမူအရာမှာ အလွန်ပင် တည်ကြည်သွားသည်။ ရှူရှန့် ၏ အစစ်အမှန် ကျင့်စဉ်ကို ထုတ်ဖော်ပြသပြီးနောက် ကရုဏာတောင်မှ သူတော်စင်များအားလုံးမှာ လွန်စွာမှ မရိုးရှင်းကြတော့ပေ။ မဟာမိတ်အဖွဲ့တွင် တာဝန်ထမ်းဆောင်နေသော ကရုဏာတောင် သူတော်စင်အချို့ပင် မကြာသေးမီက ထူးခြားစွာ ထင်ရှားလာကြသည်။ သူတို့သည် မဟာမိတ်အဖွဲ့ထဲသို့ အပြည့်အဝ ဝင်ရောက်ပြီး အဆင့်တက်လမ်းကြောင်းကို လျှောက်လှမ်းရန် ပြင်ဆင်နေပုံ ရသည်။

"အကယ်၍ ကရုဏာတောင်က သူတော်စင်တွေရဲ့ မဟာမိတ်အဖွဲ့ထဲက ရာထူးတွေသာ ပိုပြီး မြင့်တက်လာမယ်ဆိုရင်... နောက်ပိုင်း လူသားမျိုးနွယ်စုကို ဘယ်သူက ဆုံးဖြတ်မှာလဲ ငါတို့လား ဒါမှမဟုတ် ကရုဏာတောင်လား "

ချင်ဂွေ့ က အေးစက်စက် လှောင်ပြုံး ပြုံးလိုက်သည်။

"ဟော်ဆွေ့ဘိုးဘေး ရဲ့ သဘောထားက ရှင်းနေပါတယ်။ သူက ငါတို့ကို မဟာမိတ်အဖွဲ့ရဲ့ အဆင့်တက်လမ်းကြောင်းပေါ် မလျှောက်စေချင်ဘူး။ ဒါကြောင့်ပဲ အစကတည်းက လူသားကျောင်းခွဲရဲ့ တရားစီရင်ရေး အကြီးအကဲ နေရာကို ငါတို့ အလွယ်တကူ လက်လွှတ်ပေးလိုက်တာပဲ။ တစ်ဖက်က ဘိုးဘေးရဲ့ ဆန္ဒ၊ တစ်ဖက်ကလည်း ဒီလမ်းကြောင်းက လျှောက်ရတာ ခက်ခဲလွန်းလို့ ဘယ်သူမှ မအောင်မြင်နိုင်ဘူးလို့ ထင်ထားခဲ့တာ။"

"ငါတို့လည်း ကရုဏာတောင်ကို မတားဆီးနိုင်ပါဘူး။ ငါတို့ရဲ့ ကောင်းကင်အရှင်ဆက်ခံသူက ကရုဏာတောင်ကို အသေအလဲ ရန်စထားမိတာလေ။"

"လီရွှမ်းရွှေ ရဲ့ သေဆုံးမှုနဲ့ ကရုဏာတောင် ကျောင်းသား ဝမ်ယန် ပျောက်ဆုံးမှုတွေကလည်း သူနဲ့ပဲ ပတ်သက်နေတာ မဟုတ်လား။"

"ကရုဏာတောင်က လူသားမျိုးနွယ်စုချင်း အတူတူမို့လို့ ဒီကိစ္စကို ဖွင့်မပြောသေးတာ၊ ငါတို့က ဘာတတ်နိုင်မှာလဲ "

ကာကွယ်ရေးဆရာ များမှာ တိတ်ဆိတ်သွားကြသည်။ သူတို့သည် ကျောင်းတော်တွင်သာ အချိန်အကြာကြီး နေထိုင်ကြသော်လည်း အပြင်လောက သတင်းများကို အလွန်ပင် သိရှိနားလည်ကြသည်။ အပြင်လောကကို မသိသည့်သူများ မဟုတ်ကြပေ။

ချင်ဂွေ့ က အေးစက်စက် နှာမှုတ်လိုက်သည်။

"ဖွင့်မပြောတာက ကရုဏာတောင်ရဲ့ အနှစ်သာရက ငါတို့နဲ့ မျက်နှာချင်းဆိုင် ရန်ဖြစ်ဖို့ မလုံလောက်သေးလို့ပဲ။ ဟော်ဆွေ့ဘိုးဘေး က သမာဓိခုံရုံး မှာ အသံတစ်သံ ဖြစ်နေသေးလို့ပဲ။ ဒါပေမဲ့ ကရုဏာတောင်က သူတော်စင်တစ်ယောက်ယောက်သာ ရာထူးကြီးကြီး ရသွားရင်တော့ မဟာမိတ်အဖွဲ့ရဲ့ စွမ်းအားကို အသုံးပြုပြီး ငါတို့ လူသားမျိုးနွယ်စုကို ဖိနှိပ်တော့မှာ အသေအချာပဲ။

မင်းတို့ မသိတာ ဖြစ်မယ်၊ သူတို့ လုပ်နေကြပြီ။ ငါတို့ ချင်မျိုးနွယ်စုက မဟာမိတ်အဖွဲ့ထဲမှာ အရေးကြီးတဲ့ ဌာနအချို့ကို တာဝန်ယူထားတဲ့ သူတော်စင်တွေ ရှိကြတယ်။ ဒါပေမဲ့ အခုတော့ အဲဒီသူတော်စင်တွေကို အကြောင်းပြချက် အမျိုးမျိုးနဲ့ တခြားနေရာတွေကို ပြောင်းရွှေ့ခံလိုက်ရတယ်။ တစ်ယောက်ဆိုရင် လာဘ်ပေးလာဘ်ယူမှုနဲ့ ဟင်းလင်းပြင် တံခါးကို စောင့်ကြပ်ဖို့ ပို့ခံလိုက်ရတယ်"

"ဒီလောက်ထိ ဖြစ်နေပြီလား"

ကာကွယ်ရေးဆရာ အများအပြားမှာ အံ့အားသင့်သွားကြသည်။ ကရုဏာတောင်က တိတ်တိတ်ပုန်း လုပ်နေတာလား။

"အရင်ကတည်းက ကောင်းကင်အရှင်ဆက်ခံသူက ကရုဏာတောင် သူတော်စင်တွေနဲ့ ငါတို့နဲ့ မတည့်ဘူးလို့ ခံစားနေရတာ။ သူတို့က ရှန်းဟုန် အကြွင်းအကျန်တွေ မဟုတ်ပေမဲ့ သူတို့ထက်တောင် ပိုဆိုးရွားနေတယ်။ ဒါကြောင့် ကောင်းကင်အရှင်ဆက်ခံသူက ဖိနှိပ်ခဲ့တာပေါ့၊ နောက်ပိုင်း အန္တရာယ် မကြီးလာအောင်လေ။ ဒါပေမဲ့ အခုတော့ ကရုဏာတောင်ရဲ့ လုပ်ရပ်တွေက ငါတို့ရဲ့ အနိမ့်ဆုံး စံနှုန်းကိုတောင် ကျော်လွန်နေပြီ။ မထိန်းချုပ်ဘူးဆိုရင် မင်းတို့ နောက်ထပ် ကောင်းကင်အရှင်အသစ် ပေါ်လာတာကို မြင်ချင်သေးလို့လား"

ချင်ဂွေ့ က အေးဆေးစွာ ပြောသည်။

"မင်းပြောချင်တာက... ဒီကိစ္စရဲ့ အဓိက သော့ချက်က ဖန့်ချန် ဆီမှာ ရှိနေတာလား "

ကာကွယ်ရေးဆရာ တစ်ဦးက စဉ်းစားဟန်ဖြင့် -

"ငါတို့ အခု ဖိနှိပ်ဖို့ ကြိုးစားရင်တောင် နောက်ကျနေပြီ မဟုတ်ဘူးလား သူက စစ်ဆေးမှုကို အောင်မြင်သွားတာနဲ့ စုံစမ်းစစ်ဆေးရေးဌာနရဲ့ သူတော်စင် ဖြစ်သွားမှာလေ။ ငါတို့လည်း လက်လှမ်းမမီတော့ဘူး။"

"ဒီကောင်လေးက တကယ်ကို ထူးချွန်တယ်။ နေမင်းခုနစ်ပါးခန်းမမှာ ရခဲ့တဲ့ ရလဒ်တွေက မျိုးရိုးကြီးတွေက ဆင်းသက်လာတဲ့ ကောင်းကင်အရှင်ဆက်ခံသူတွေထက်တောင် ပိုသာနေတယ်။ စုံစမ်းစစ်ဆေးရေးဌာန သူတော်စင် ဆိုတဲ့ ရာထူးပါ တိုးလာရင်တော့ ငါတို့ ဘာနဲ့ သွားဖိနှိပ်ရမှာလဲ "

"အားလုံးပဲ စိတ်မပူကြနဲ့။ ဖန့်ချန် က စစ်ဆေးမှုကို အောင်မြင်မှာ မဟုတ်ဘူး။ သူ့ရဲ့ ဒီတစ်ခေါက် စစ်ဆေးမှုက ယင်သူတော်စင် ကျိလင် ကို ဖမ်းဆီးဖို့ပဲ။"

ချင်ဂွေ့ က ရုတ်တရက် ရယ်မောလိုက်သည်။

"တိုက်တိုက်ဆိုင်ဆိုင်ပါပဲ။ ကျိလင် က ယင်သူတော်စင် ဖြစ်လာတာက စုံစမ်းစစ်ဆေးရေးဌာနက ကျောင်းခွဲတိုင်းရဲ့ တရားစီရင်ရေး အကြီးအကဲတွေကို စစ်ဆေးတဲ့အချိန်နဲ့ တိုက်ဆိုင်နေတယ်။ ဖန့်ချန် ရဲ့ အမှုတွဲက ကျိလင် ကို ဖမ်းဖို့ပဲ။ ဒါပေမဲ့ ကျိလင် က ယင်သူတော်စင်ပဲလေ၊ လူသားကျောင်းခွဲမှာ နှစ်ပေါင်းများစွာ ပုန်းခိုနေနိုင်ပြီး ဘယ်သူမှ မသိခဲ့ဘူး။ ချင်လွမ်း ရဲ့ အတွင်းကမ္ဘာနယ်မြေ အနှစ်သာရကိုတောင် လုယူနိုင်ခဲ့တယ်။ သူက ထွက်ပြေးသွားပြီးမှတော့ ဒီလောက်နဲ့ ဖမ်းမိမှာတဲ့လား ဒါကြောင့် ဖန့်ချန် က ဒီစစ်ဆေးမှုမှာ မုချမုချ ကျရှုံးလိမ့်မယ်။"

ချင်ဂွေ့ က ပြုံးကာ -

"စုံစမ်းစစ်ဆေးရေးဌာန ဘယ်လောက် တင်းကျပ်လဲဆိုတာ မင်းတို့ သိပါတယ်။ အဲဒီစစ်ဆေးမှုမှာ ကျရှုံးသွားတဲ့ သူတော်စင်ဆိုရင်တော့ နောက်ပိုင်း မဟာမိတ်အဖွဲ့ လမ်းကြောင်းကို မျှော်လင့်မနေနဲ့တော့။ မဟာမိတ်အဖွဲ့က ရန်သူကို တိုက်ခိုက်ဖို့ သုံးတဲ့ ဓားလက်နက် ဖြစ်သွားရုံပဲ ရှိတော့မှာ။"

"အော်... ဒီလိုလား"

"ဒီလိုဆိုရင် ဖန့်ချန် က စုံစမ်းစစ်ဆေးရေးဌာန သူတော်စင် ဖြစ်လာဖို့ အခွင့်အရေး မရှိတော့ဘူးပေါ့"

"ချင်ဂွေ့၊ ဒါဆိုရင် မင်း ငါတို့ကို ခေါ်တာက ဘာလုပ်ဖို့လဲ "

ထိုနေရာရှိ ကာကွယ်ရေးဆရာ များမှာ ရုတ်တရက် သဘောပေါက်သွားကြပြီး သူတို့၏ အကြည့်များမှာ ထူးဆန်းလာသည်။ ကိစ္စရပ်များမှာ တိုက်ဆိုင်လွန်းနေသဖြင့် သူတို့ပင် သံသယ ဝင်လာကြသည်။

"ငါတို့ လူသားမျိုးနွယ်စုအတွက် လိုအပ်တာက တည်ငြိမ်မှုပါ။ ကရုဏာတောင်က ကျန်တဲ့ သူတော်စင်တွေ ဘယ်လောက်ပဲ ခုန်ပေါက်နေပါစေ ကိစ္စမရှိပါဘူး။ ငါတို့ လူသားမျိုးနွယ်စုရဲ့ အခြေခံအုတ်မြစ်ကို မထိခိုက်နိုင်ဘူး။ ဒါပေမဲ့ ဖန့်ချန် က မတူဘူး။ သူ စုံစမ်းစစ်ဆေးရေးဌာန သူတော်စင် မဖြစ်နိုင်ရင်တောင် သူ့ကို ဆက်ပြီး ဖိနှိပ်ထားရမယ်။"

ချင်ဂွေ့ က ဖြည်းညှင်းစွာ ပြောသည်။

"ငါ သတ်မှတ်ထားတဲ့ အချိန်မှာ အစည်းအဝေးတစ်ခု ခေါ်မယ်။ အားလုံး ငါ့ကို ထောက်ခံပေးဖို့ မျှော်လင့်ပါတယ်။ ဖန့်ချန် က တရားစီရင်ရေး အကြီးအကဲ ဖြစ်လျက်နဲ့ ကျောင်းတော်မှာ ယင်သူတော်စင် ပေါ်လာတာကို လျစ်လျူရှုထားခဲ့တယ်။ ဒါဟာ အကြီးမားဆုံး အမှားပဲ၊ နှစ်ပေါင်း ငါးရာကြာအောင် နံရံကို မျက်နှာမူပြီး တရားမှတ် လုပ်ခိုင်းရမယ်။ သူ့ကို နှစ်ငါးရာကျော် ဖိနှိပ်ထားနိုင်ရင်တော့ ကိစ္စပြီးသွားပြီ။"

နှစ်ငါးရာ

ဒါဆိုရင် နေမင်းခုနစ်ပါး အမှတ်အသားကိုပါ ပြန်အပ်ရတော့မှာလား ဒါက ဖန့်ချန် ၏ နေမင်းခုနစ်ပါး ကျောင်းသား အရည်အချင်းကို အတင်းအဓမ္မ ဖျက်သိမ်းခိုင်းတာပဲ။

ကာကွယ်ရေးဆရာ တစ်ဦး၏ မျက်လုံးများမှာ တုန်လှုပ်သွားသည်။

"ချင်ဂွေ့... ဒီလိုလုပ်ရင် ငါတို့ လူသားမျိုးနွယ်စုက နေမင်းခုနစ်ပါး ကျောင်းသား တစ်ယောက် ဆုံးရှုံးသွားမှာပေါ့။ ကျောင်းတော်ကလည်း ငါတို့ရဲ့ ဘတ်ဂျက်ကို လျှော့ချလိုက်လိမ့်မယ်။"

"စွန့်လွှတ်ရမယ့်အရာတွေက ရှိရမှာပဲ။"

ချင်ဂွေ့ က အေးဆေးစွာ ပြောသည်။

"အရာရာကို စွန့်လွှတ်မှပဲ ရမှာ။ လူသားမျိုးနွယ်စု သန်မာမလား ဆိုတာက ဖန့်ချန် တစ်ယောက်တည်းနဲ့ မဆိုင်ပါဘူး။ အားလုံးပဲ၊ အခြေအနေကို ကြည့်ပြီး ဆုံးဖြတ်ကြပါ။"

"ကောင်းပြီ၊ ဒီတစ်ခေါက်တော့ မင်းပြောတဲ့အတိုင်းပဲ လုပ်မယ်။"

"ဟုတ်ပါပြီ၊ ငါတို့ ရွေးချယ်မှုက မှားမနေဖို့ မျှော်လင့်ပါတယ်။"

ကာကွယ်ရေးဆရာများမှာ တစ်ယောက်ပြီး တစ်ယောက် သဘောတူညီမှု ပေးလိုက်ကြသည်။ ချင်ဂွေ့ သည် ထိုမြင်ကွင်းကို ကြည့်ကာ သူ၏ မျက်ဝန်းထဲတွင် အပြုံးတစ်ခု ထွက်ပေါ်လာသည်။

"အားလုံးပဲ စိတ်မပူကြနဲ့၊ မင်းတို့ရဲ့ ရွေးချယ်မှုက မှားယွင်းမှာ မဟုတ်ပါဘူး "

အခန်း (၂၄၅၄) - အမှားကို အတ္တဖြင့် ဖက်တွယ်ထားခြင်း

အချိန်များမှာ တရွေ့ရွေ့ ကုန်ဆုံးသွားသည်။

ကျိလင် သည် အကြိမ်ကြိမ် အနှိပ်စက်ခံရပြီးနောက် သူ၏ စိတ်အခြေအနေမှာ တဖြည်းဖြည်းနှင့် ပုံမှန်အတိုင်း ပြန်လည်ရောက်ရှိလာသည်။ သူ၏ မျက်ဝန်းထဲရှိ ရူးသွပ်သော အမူအရာတို့မှာ လျော့နည်းသွားပြီး စိတ်ပျက်အားငယ်မှုတို့မှာ ပိုမိုတိုးပွားလာသည်။ သူသည် ဖန့်ချန် ၏ အတွင်းကမ္ဘာနယ်မြေမှာ မည်မျှမြန်ဆန်စွာ ရွေ့လျားနေသည်ကို မခန့်မှန်းနိုင်သော်လည်း၊ မကြာမီ သူသည် ရွှေဟွေးကျောင်းတော် ပြန်လည်ရောက်ရှိတော့မည်ဟု မသိစိတ်က ခံစားနေရသည်။

ထိုအခါ သူသည် မိမိကို ရွံရှာသော မျက်ဝန်းများဖြင့် ကြည့်မည့် လူသားကျောင်းသားများကို ရင်ဆိုင်ရတော့မည် ဖြစ်သည်။ ဤအကြောင်းကို တွေးမိလိုက်သည်နှင့် ကျိလင် သည် တစ်ကိုယ်လုံး တုန်ခါသွားသည်။

"ဖန့်ချန်၊ မင်း ငါ့ကို သတ်ပစ်လိုက်စမ်းပါ။ ဒီတစ်ဘဝလုံး မင်းလက်ထဲမှာ ကျဆုံးရတာကိုပဲ ငါ လက်ခံလိုက်ပါပြီ။"

ကျိလင် သည် ရုတ်တရက် တံခါးပေါက်ရှေ့တွင် လက်ကိုပိုက်ကာ မတ်တပ်ရပ်နေသည့် ဖန့်ချန် ကို ကြည့်ကာ ပြောသည်။

"စိတ်မပူပါနဲ့၊ မင်းသာ သေသွားရင် ယင်လောက ကို ရောက်ပြီး ပြန်လည်ဝင်စားသွားမှာ။ ဒါက မင်းအတွက် ပြစ်ဒဏ် မဟုတ်ဘဲ လွတ်ငြိမ်းချမ်းသာခွင့် ဖြစ်သွားလိမ့်မယ်။ မင်း အခုတော့ အသက်ရှင်နေဖို့ လိုသေးတယ်၊ စုံစမ်းစစ်ဆေးရေးဌာနရဲ့ စစ်ဆေးမှုကို ငါ အပြီးသတ်နိုင်တဲ့အထိ စောင့်နေ။"

ဖန့်ချန် က ပြောသည်။

"စုံစမ်းစစ်ဆေးရေးဌာနရဲ့ စစ်ဆေးမှု"

ကျိလင် အံ့အားသင့်သွားသည်။

"မင်းက စွမ်းအင်စုစည်းခြင်းအဆင့် သူတော်စင်ပဲ ရှိသေးတာ၊ ဘယ်လိုလုပ်..."

"စောစီးစွာ ရွေးချယ်ခံလိုက်ရတာ။"

ဖန့်ချန် က ပေါ့ပေါ့ပါးပါးပင် ဖြေသည်။

"အရာရာက တိုက်ဆိုင်လွန်းနေတယ်၊ ဒီလောက်ထိ တိုက်ဆိုင်စရာ အကြောင်းမရှိဘူး... အော်၊ ငါဆိုတာ တခြားသူတွေရဲ့ လက်ထဲက အရုပ်တစ်ရုပ်ပဲပေါ့..."

ကျိလင် သည် တီးတိုး ရေရွတ်နေမိသည်။

ဖန့်ချန် က ပြုံးကာ

"မင်းလည်း သိပ်မမိုက်မဲသေးပါဘူး။" ဟု ပြောသည်။

"ဖန့်ချန်၊ တကယ်တော့ ငါနဲ့ မင်းကြားထဲမှာ ရန်ငြိုးရန်စ ရှိစရာ မလိုပါဘူး။ ဘာလို့များ ဒီနေ့လို အခြေအနေမျိုး ရောက်သွားရတာလဲ။"

ကျိလင် သည် ဖန့်ချန် ကို ကြည့်ကာ တီးတိုး ပြောသည်။

"မင်းကိုယ်မင်းပဲ မေးကြည့်။"

ဖန့်ချန် က ပြန်ဖြေသည်။

ကျိလင် ၏ ဦးနှောက်ထဲတွင် လွန်ခဲ့သော နှစ်များက ဖြစ်ရပ်များမှာ ချက်ချင်း ပေါ်လာသည်။ မြင်ကွင်းများမှာ တစ်ခုပြီးတစ်ခု တောက်လျှောက် ဖျတ်ခနဲ ပေါ်လာပြီးနောက် သူသည် ကောက်ချက်တစ်ခု ချလိုက်သည်။

"ဒါတွေအားလုံး မင်းကြောင့်"

ကျိလင် သည် ဖန့်ချန် ကို သွားများကြိတ်ကာ ကြည့်လိုက်သည်။

"မင်းသာ မရှိရင် ငါ့ရဲ့ သူတော်စင်လမ်းကြောင်းက ဒီမှာတင် ပြတ်တောက်သွားမှာ မဟုတ်ဘူး နောက်တစ်ခါ အခွင့်အရေး ထပ်ရမယ်ဆိုရင် ငါ သေရပါစေဦးတော့ မင်းနဲ့အတူတူ သေအောင် လုပ်မှာပဲ"

"အမှားကို အတ္တဖြင့် ဖက်တွယ်ထားတာပဲ

ဖန့်ချန် ပြုံးလိုက်ပြီး ကျိလင် ကို လျစ်လျူရှုလိုက်သည်။ လူသားလောက ၏ ဖိနှိပ်မှု ရှိနေသည်။ 'ချုပ်နှောင်ခြင်း' ၏ ပံ့ပိုးမှုလည်း ရှိနေသည်။ ကျိလင် သည် ယခုချက်ချင်း သေချင်လျှင်ပင် လုံးဝ မဖြစ်နိုင်ပေ။

"ဟုတ်ပြီ၊ အရင်ဆုံး ဆေွ့ဟုန်ကျူ ကို အကြောင်းကြားထားမှပဲ၊ တစ်ယောက်ယောက်က ငါ့ရှေ့မှာ အသံဖျောက်ပြီး သတ်ပစ်တာမျိုး မဖြစ်ရအောင်။"

ဖန့်ချန် က တိုးတိုးလေး ရေရွတ်လိုက်သည်။

…

မသိလိုက်မသိဘာသာဖြင့် နှစ်ပေါင်းများစွာ ကုန်ဆုံးသွားသည်။

ကောင်းကင် ငါးပါးနယ်မြေ ၏ ကျောင်းတော်အပြင်ဘက်တွင် အတွင်းကမ္ဘာနယ်မြေများမှာ တစ်ခုပြီးတစ်ခု ပေါ်ပေါက်လာသည်။ ချင်ဂွေ့ ဦးဆောင်သော ကာကွယ်ရေးဆရာများအားလုံး ရောက်ရှိလာကြသည်။ ကျောင်းတိုက်အသီးသီးမှ ဆရာများလည်း ရောက်ရှိလာကြသည်။ ထို့နောက်တွင်တော့ သူတို့၏ လက်အောက်မှ ကမ္ဘာငယ် အဆင့် ကျောင်းသားများမှာလည်း ရောက်လာကြသည်။ စွမ်းအင်စုစည်းခြင်း ၊ အသက်စွမ်းအင်၊ ကမ္ဘာကြီး အဆင့် အထိ ကျောင်းတော်တွင် ကျန်ရှိနေသူအားလုံးကို ဤနေရာသို့ ခေါ်ဆောင်လာသည်။ ကောင်းကင်တစ်ခုလုံးတွင် အတွင်းကမ္ဘာနယ်မြေများဖြင့် ပြည့်နှက်နေပြီး အလွန်ပင် စည်ကားနေသည်။

"အစ်ကိုကြီး၊ ဒီတစ်ခေါက် ငါတို့ ဒီကိုလာတာက ဖန့်ချန် ကို တစ်ယောက်ယောက်က ပစ်မှတ်ထားဖို့ ကြိုးစားနေတာ ဖြစ်မှာ..."

ကရုဏာတောင်မှ ကျောင်းသားများ အားလုံး စုဝေးနေကြသည်။ လင်ဖုန်း သည် ကျန်းတောက်ယွဲ့ ကို ကြည့်ကာ နှုတ်ခမ်းကို လှုပ်ရှားလိုက်သည်။ ဤနှစ်များအတွင်း သတင်းတစ်ခုမှာ ပျံ့နှံ့နေခဲ့သည်။ ကျောင်းတော်၏ ကာကွယ်ရေးဆရာများသည် ကျိလင် ယင်သူတော်စင် ဖြစ်လာသည့်ကိစ္စကို အကြောင်းပြပြီး ဖန့်ချန် ကို အပြစ်ပေးရန် စီစဉ်နေကြသည်ဟု ဆိုသည်။ ထိုသတင်း စတင်ပျံ့နှံ့စဉ်က ကရုဏာတောင်မှ သူတော်စင်များက ဂရုမစိုက်ခဲ့ကြပေ။

သို့သော် သတင်းမှာ ပိုမိုပြင်းထန်လာပြီးနောက် မည်သည့် ကာကွယ်ရေးဆရာမှ ထွက်ရှင်းခြင်း မရှိသည့်အခါ သူတို့၏ စိတ်ထဲတွင် သံသယ ဝင်လာကြသည်။ ယနေ့တွင်တော့ တကယ်ပင် အစောင့်အရှောက် အချို့က ဖန့်ချန် ကို ပစ်မှတ်ထားနေကြောင်း သူတို့ အတည်ပြုနိုင်လိုက်သည်။

ဝမ်ချုံစန်း ၊ ရှဲ့အာမန် ၊ ချန်အင်းရွှယ် တို့မှာ ကျန်းတောက်ယွဲ့ ကို မသိစိတ်က ကြည့်လိုက်မိကြသည်။ ကျန်းတောက်ယွဲ့ က မျက်လုံးကိုမှိတ်ကာ အသံလွှင့်လိုက်သည်။

"အရမ်း စိတ်မပူကြနဲ့၊ သူတို့လာတဲ့အတိုင်း ခံလိုက်၊ တကယ်လို့ မရတော့ရင် ဘိုးဘေးတွေက ဝင်ရောက်စွက်ဖက်ပေးလိမ့်မယ် "

လူတိုင်းမှာ စိတ်သက်သာရာ ရသွားကြသည်။ ကရုဏာတောင်တွင် အနည်းဆုံးတော့ အရန်အင်အား အနည်းငယ် ရှိနေသေး၍ အထီးကျန်မဖြစ်ပေ။

"ဒီနေ့ မင်းတို့ကို ခေါ်လာတာက အစည်းအဝေးတစ်ခု လုပ်ဖို့ပါ။"

ချင်ဂွေ့ သည် အတွင်းကမ္ဘာနယ်မြေကို မောင်းနှင်ကာ အလယ်သို့ ရောက်လာပြီး သူ၏ အသံမှာ သူတော်စင်တိုင်း၏ နားထဲသို့ ရောက်ရှိသွားသည်။

"ငါတို့ လူသားမျိုးနွယ်စု ကျောင်းခွဲမှာ အစည်းအဝေးလုပ်တာ ကြာလှပြီ။"

"အရေးကြီးတဲ့ ကိစ္စတွေ ပေါ်လာတဲ့အခါမှာပဲ ကာကွယ်ရေး ဆရာတွေက အစည်းအဝေး ခေါ်ယူဖို့ တောင်းဆိုခွင့် ရှိတယ်။"

"ကာကွယ်ရေးဆရာ တစ်ဝက်လောက်က သဘောတူရင် အစည်းအဝေးကို စတင်နိုင်တယ်။ ကျောင်းအုပ်ကြီး တွေတောင် တားဆီးလို့ မရဘူး။"

ချင်ဂွေ့ က ကျောင်းသားများကို တစ်ချက်ကြည့်လိုက်သည်။ သူ၏ အကြည့်မှာ ဆရာများနှင့် ကာကွယ်ရေးဆရာများထံမှ တစ်ဆင့် လျှောက်သွားပြီး နောက်ဆုံးတွင် နင်ကျောင်းအုပ် ထံသို့ ရောက်သွားကာ စက္ကန့်အနည်းငယ်ကြာ ရပ်တန့်သွားသည်။ ထိုလုပ်ငန်းစဉ်အတွင်းမှာပင် သူသည် မည်သူက သူ့ဘက်က ရပ်တည်မည်၊ မည်သူက ကြားနေမည်၊ မည်သူက ကန့်ကွက်မည်ဆိုသည်ကို သိသွားခဲ့သည်။

"ဒီနေ့ အစည်းအဝေး လုပ်ရတဲ့ ရည်ရွယ်ချက်က တစ်ခုပဲ ရှိတယ်။"

ချင်ဂွေ့ က ထပ်ပြောသည်။

"လူသားမျိုးနွယ်စု ကျောင်းခွဲရဲ့ တရားစီရင်ရေး အကြီးအကဲ တာဝန်မကျေပွန်မှုကြောင့် ကျောင်းတော်မှာ စိတ်ဓာတ်တွေ ရှုပ်ထွေးခဲ့ရတယ်။ ကျောင်းသား ကျိလင် က ယင်သူတော်စင် ဖြစ်လာပြီး ကျောင်းသား ချင်လွမ်း ကို သတ်ဖြတ်ခဲ့တယ်။ ဒီကိစ္စက အလွန်တရာ အကျိုးသက်ရောက်မှု ကြီးမားပြီး ငါတို့ လူသားမျိုးနွယ်စုရဲ့ သိက္ခာကို ကျဆင်းစေရုံသာမက ဆုံးရှုံးမှုလည်း ကြီးမားပါတယ်။ ဒါကြောင့် ဖန့်ချန် ကို တရားစီရင်ရေး အကြီးအကဲ ရာထူးကနေ ဖယ်ရှားဖို့နဲ့ နှစ်ပေါင်း ငါးရာ နံရံကို မျက်နှာမူပြီး တရားမှတ်ဖို့ တင်ပြလိုက်ပါတယ်။"

နံရံကို မျက်နှာမူပြီး တရားမှတ်... နှစ်ငါးရာ

ချက်ချင်းဆိုသလိုပင် ကျောင်းတော်မှ ကျောင်းသားများမှာ ထိုပြစ်ဒဏ်၏ နောက်ကွယ်မှ အဓိပ္ပာယ်ကို နားလည်သွားကြသည်။ ကာကွယ်‌‌ေရေးဆရာ တစ်ဦးမှာ အံ့အားသင့်သွားပြီးနောက် အေးစက်စက် နှာမှုတ်လိုက်သည်။

"ယင်သူတော်စင် ကိစ္စက ဖန့်ချန် ကို အပြစ်တင်စရာ မဟုတ်ဘူး။ နှစ်ငါးရာတောင် တရားမှတ်ခိုင်းတာလား အဲဒါဆိုရင် သူ့ရဲ့ နေမင်းခုနစ်ပါး အမှတ်အသား ကို ပြန်အပ်ခိုင်းတာပဲ မဟုတ်လား ဒါက ဘာလဲ ကိုယ့်ခြေထောက်ကိုယ် ပြန်ဖြတ်တာလား "

"စည်းမျဉ်းက စည်းမျဉ်းပဲ။ ပြဿနာတစ်ခုခု တက်လာရင် စည်းမျဉ်းအတိုင်းပဲ လုပ်ရမယ်။ စည်းမျဉ်းမရှိရင် ဘယ်လိုလုပ် အလုပ်ဖြစ်မလဲ။ ဖန့်ချန် ကလည်း စည်းမျဉ်းထက် ကျော်လွန်လို့ မရဘူး။ နောက်ပိုင်းမှာ တစ်ယောက်ယောက်က ကျိလင် ကို အတုယူပြီး ယင်သူတော်စင် ဖြစ်လာရင် ဘာလုပ်ကြမလဲ ငါတို့ လူသားမျိုးနွယ်စု ကျောင်းခွဲက ရွှေဟွေးကျောင်းတော်မှာ ဆက်နေနိုင်ဦးမလား "

ချင်မျိုးနွယ်စုမှ ကာကွယ်ရေးဆရာ တစ်ဦးက ဖြည်းဖြည်းချင်း ပြောသည်။

ကျောင်းသားများမှာ တစ်ယောက်မျက်နှာ တစ်ယောက် ကြည့်နေကြသည်။ သူတို့မှာ ဘာဖြစ်နေမှန်း မရေမရာ ခန့်မှန်းမိကြသည်။ ချင်မျိုးနွယ်စုမှ ကျောင်းသားများမှာတော့ လှောင်ပြောင်သော အမူအရာများဖြင့် ပြုံးနေကြသည်။

"အားလုံးပဲ ရန်ဖြစ်မနေပါနဲ့။ ဒီနေ့ အစည်းအဝေး လုပ်တာက ဆုံးဖြတ်ချက် ချဖို့ပဲ။"

ချင်ဂွေ့ က နှာမှုတ်လိုက်သည်။

"ဖန့်ချန် တာဝန်မကျေပွန်ဘူး၊ သူ့ကို နှစ်ငါးရာ တရားမှတ်ဖို့ သဘောတူတဲ့သူတွေ ဆန္ဒမဲပေးပါ။"

"သဘောတူတယ်။"

"ထောက်ခံတယ်။"

ကာကွယ်ရေးဆရာများဘက်မှ စတင် ဆန္ဒမဲပေးကြသည်။ ချင်မျိုးနွယ်စုမှ ကာကွယ်ရေးဆရာများမှာ အခြေခံအားဖြင့် အားလုံး သဘောတူကြသည်။ ချင်မျိုးနွယ်စုနှင့် ရင်းနှီးသည့် ကာကွယ်ရေးဆရာ အချို့လည်း သဘောတူကြသည်။ နောက်ဆုံးတွင် သဘောမတူသူ ကာကွယ်ရေးဆရာမှာ သုံးလေးယောက်သာ ရှိတော့သည်။ ချင်ဂွေ့ ဘက်မှ လူအရေအတွက်ကို မယှဉ်နိုင်ပေ။ ထို ကာကွယ်ရေးဆရာများ၏ လက်အောက်မှ ဆရာများမှာလည်း သူတို့အတိုင်း လိုက်ပါ ဆန္ဒမဲပေးရတော့သည်။ ဝေကွမ်းရှောင် နှင့် ဝေလျန်ရွှမ် တို့မှာ တစ်ယောက်ကို တစ်ယောက် ကြည့်ပြီးနောက် ဖြည်းဖြည်းချင်း လက်မြှောက်လိုက်ကြသည်။

သဘောတူညီသော မဲအရေအတွက်မှာ ကြားနေနှင့် ကန့်ကွက်မဲများထက် အဆပေါင်းများစွာ ပိုများသွားသည်။

"အရူးတွေပဲ"

ရွှီကာကွယ်ရေးဆရာ က ရုတ်တရက် အော်ဟစ်လိုက်သဖြင့် လူတိုင်း၏ အကြည့်မှာ သူ့ထံ ရောက်သွားသည်။

"ဖန့်ချန် မှာ ဘာအမှား ရှိလို့လဲ တစ်ယောက်ယောက်က ယင်သူတော်စင် ဖြစ်လာရုံနဲ့ သူက အပြစ်ပေးခံရမှာလား ဘာလို့လဲ "

"ငါလည်း သဘောမတူဘူး။"

နာလန်ချိုဟုန် က ခေါင်းခါလိုက်သည်။

"ဒီလိုမျိုး စည်းမျဉ်း မရှိဘူး။"

ရွှီကာကွယ်ရေးဆရာ ၏ လက်အောက်မှ ကျောင်းသားများ၏ မျက်ဝန်းထဲတွင် ဒေါသများ ပေါ်လာသည်။ ဖန့်ချန် သည် စီီကုပေ့ ကို အနိုင်ယူပြီးနောက်၊ တုန်းဖန်ဟို အတွက် လက်စားချေပေးပြီးနောက်၊ ချင်းမင် အတွက် နောက်ထပ် ဂုဏ်ကျေးဇူးတစ်ခု ထပ်တိုးပေးခဲ့ပြီးနောက် လူသားကျောင်းခွဲတွင် သူ့ကို ဖိနှိပ်ရန် အကြောင်းပြချက် ရှာနေသော ကာကွယ်ရေးဆရာ ရှိနေလိမ့်မည်ဟု သူတို့ မထင်ထားခဲ့ပေ။ ဒါက ဘယ်လောက်တောင် အရူးအမူးနိုင်သလဲ။

"အစည်းအဝေးဆိုတာ အစည်းအဝေးပဲ။ မင်းတို့ မသဘောတူတာနဲ့ ဒီအစည်းအဝေးရဲ့ ရလဒ်ကို ပြောင်းလဲလို့ မရဘူး။ မင်းတို့က လူသားမျိုးနွယ်စုက မှားနေတယ်လို့ ထင်နေတာလား"

ချင်ဂွေ့ က အေးဆေးစွာ ပြောသည်။

ထိုစကား ထွက်လာသည်နှင့် ရွှီကာကွယ်ရေးတို့၏ အမူအရာမှာ ချက်ချင်း ပြောင်းလဲသွားသည်။ ပြိုင်ဘက်က တင်ပေးလိုက်သော စွပ်စွဲချက်မှာ အလွန်ပင် ကြီးမားလွန်းလှသည်။ ထိုအချိန်တွင် အတွင်းကမ္ဘာနယ်မြေတစ်ခုမှာ အဝေးမှနေ၍ ရောက်ရှိလာသည်။

"မင်းတို့ လူသားမျိုးနွယ်စုက တကယ်ပဲ စည်ကားနေတာပဲ၊ အစည်းအဝေး လုပ်နေတာလား"

ဆွေ့ဟုန်ကျူ က လှောင်ပြုံးဖြင့် ပြောသည်။

ချင်ဂွေ့ နှင့် အခြားသူများ၏ အမူအရာမှာ အနည်းငယ် ပြောင်းလဲသွားသည်။ ဆွေ့ဟုန်ကျူ နှင့် ဖန့်ချန် တို့ကြားတွင် ပတ်သက်မှု အနည်းငယ် ရှိနေသည်ကို သူတို့ သိထားကြသည်။

သို့သော်...

"ဆွေ့ဟုန်ကျူ၊ ဒါက ငါတို့ လူသားမျိုးနွယ်စုရဲ့ ပြည်တွင်းရေး။"

ချင်ဂွေ့ က အလေးအနက် ပြောသည်။

"အခြားမျိုးနွယ်စုက ဝင်ရောက်စွက်ဖက်လို့ မရဘူး၊ စုံစမ်းစစ်ဆေးရေးဌာန ဖြစ်နေရင်တောင် မှန်ကန်တဲ့ အကြောင်းပြချက် မရှိရင်..."

သူ၏ စကားမှာ ဆွေ့ဟုန်ကျူ ၏ ရယ်မောသံဖြင့် ပြတ်တောက်သွားသည်။

"ငါ အခုလေးတင်ပဲ သတင်းစကား လက်ခံရရှိတယ်။ ဖန့်ချန် က ကျိလင် ကို ခေါ်ပြီး ပြန်လာနေပြီတဲ့။"