အခန်း ၁၈၅

အခန်း(၁၈၅) ငါ့စည်းမျဉ်းတွေကသာ စည်းမျဉ်း‌ဖြစ်တယ်

ခွေးရူး၏ အကျည်းတန်လှသော အမာရွတ်ပြည့်နှက်နေသည့် မျက်နှာသည် အလွန်အမင်း စိတ်လှုပ်ရှားမှုကြောင့် ပြင်းထန်စွာ တွန့်လိမ်သွားပြီး အသက်ဝင်လာသော သွေးဆာနေသည့် ကင်းခြေများတစ်ကောင်နှင့် တူနေ၏။

သူ၏ မျက်လုံးများထဲတွင် လောဘနှင့် အရူးအမူးစွဲလမ်းမှုတို့က လက်တွေ့အဖြစ်သို့ လောင်ကျွမ်းသွားမတတ် ပေါက်ကွဲထွက်ပေါ်နေပေသည်။

သုဿန်တစပြင်ကဲ့သို့ တိတ်ဆိတ်နေသော လေထုသည် အောက်ဆီဂျင်ကို တစ်ဖန် ပြန်လည်ဖြည့်သွင်းလိုက်ရသကဲ့သို့ ရှိနေတော့သည်။

ကြောက်လန့်တကြားဖြစ်နေကြသော လောင်းကစားသမားများနှင့် လူမိုက်များသည် နောက်ဆုံးတွင် ပြင်းပြင်းထန်ထန် အသက်ရှူရဲသွားကြသော်လည်း ချူးရှန့်အား ကြည့်ရှုသည့် သူတို့၏ အကြည့်များမှာ စူးစမ်းမှုမှသည် နတ်ဘုရား သို့မဟုတ် မိစ္ဆာတစ်ပါးကဲ့သို့ ရိုသေလေးစားမှုနှင့် ကြောက်ရွံ့မှုအဖြစ်သို့ လုံးဝ ပြောင်းလဲသွားခဲ့လေသည်။

ခွေးရူးကမူ ကြမ်းပြင်ပေါ်တွင် တဆတ်ဆတ်တုန်ခါနေသော ပုပ်ဟောင်နေသည့် အသားတုံးကြီးနှင့် ပတ်ဝန်းကျင်ရှိ လူတိုင်းကို လျစ်လျူရှုထားလိုက်၏။

သူသည် သူ၏ ပေါင်ကို အသံကျယ်လောင်စွာ ထွက်ပေါ်လာသည်အထိ ပြင်းပြင်းထန်ထန် ရိုက်ချလိုက်လေသည်။

“ကောင်းတယ်…”

“ကောင်းတယ်…”

“ကောင်းတယ်…”

သူက ကောင်းနယ်ဟူသော စကားကို သုံးခွန်းဆက်တိုက် ဟိန်းဟောက်လိုက်ပြီး စကားလုံးတိုင်းတွင် ရင်ထဲမှလှိုက်လှဲစွာ တုန်လှုပ်မှုနှင့် လေးစားအံ့သြမှုတို့ ပြည့်နှက်နေပေသည်။

“မိုက်တယ်… ဒါကမှ တကယ့် စွမ်းအားရှင်စစ်စစ်ပဲ…”

ခွေးရူး၏ တံတွေးများမှာ ချူးရှန့်၏ မျက်နှာပေါ်သို့ ကျရောက်မတတ် ဖြစ်သွားသော်လည်း သူက လုံးဝ ဂရုမစိုက်ချေ။ နှစ်ပေါင်းများစွာ မတွေ့ရသော အစ်ကိုဟောင်းတစ်ယောက်ကဲ့သို့ ရင်းနှီးစွာဖြင့် သူက ချူးရှန့်၏ ပခုံးကို လက်လှမ်းဖက်လိုက်သည်။

“သတ်ဖြတ်တယ်ဆိုတာ ဒါမျိုးပဲလုပ်ရမယ်…”

“ပြတ်သားတယ် သန့်ရှင်းတယ် မလိုအပ်တဲ့ စိတ်ခံစားမှု အရိပ်အယောင်လေးတောင် မရှိဘူး…”

သူက ကြမ်းပြင်ပေါ်တွင် ငြိမ်သက်လုနီးပါး ဖြစ်နေသော သံမဏိမျှော်စင်ကို လက်ညှိုးထိုးပြလိုက်ပြီး သူ၏လေသံတွင် ချူးရှန့်၏ လုပ်ရပ်များအပေါ် ရူးသွပ်စွာ လေးစားအားကျမှုတို့ ပြည့်နှက်နေ၏။

“အဲဒါကမှ တကယ့်သတ်ဖြတ်ခြင်းပဲ အဲ့အမှိုက်ကောင် သံမဏိမျှော်စင်ကတော့ အကောင်းဆုံးလုပ်နိုင်တာက သူ့ဒေါသကို ဖြေဖျောက်ရုံလောက်ပဲ ရှိတယ်…”

ခွေးရူး၏ အလိုသိစိတ်များက ရူးသွပ်စွာ အော်ဟစ်နေပေသည်။ လူ့အသက်ကို အမှိုက်ကဲ့သို့ သဘောထားသည့် ချူးရှန့်ထံမှ သန့်စင်သော အကြမ်းဖက်မှုသည် သူနှင့် မြေခွေးနက်ဂိုဏ်းတစ်ခုလုံးအတွက် အလိုအပ်ဆုံးသော အဆုံးစွန် လက်နက်ပင် ဖြစ်လေသည်။

သူသည် လှည့်ပတ်သွားပြီး သူ၏နောက်ကွယ်ရှိ ထိတ်လန့်နေသော ယုံကြည်ရသည့် တပည့်ဖြစ်သူအား ဟိန်းဟောက်လိုက်၏။

“မင်းတို့ကောင်တွေ အဲဒီမှာ ဘာရပ်လုပ်နေတာလဲ…”

“နေရာမှာရှိတဲ့ အကောင်းဆုံး ဝိုင်ကို ယူခဲ့စမ်း ခွေးကောင်တွေ မြန်မြန်ယူခဲ့…”

“ငါတို့ အစ်ကိုကြီးချန်လုံကို တောင်းပန်ဖို့ လိုတယ်…”

ထိုတပည့်ဖြစ်သူမှာ အကြောက်လွန်ကာ တုန်ယင်သွားပြီး ဘားကောင်တာဆီသို့ အပြေးအလွှား သွားလေတော့သည်။

ခွေးရူးက ခေါင်းပြန်လှည့်လာပြီး သူ၏အပြုံးမှာ ဖော်ရွေမှုဟု ဖော်ပြ၍ မရနိုင်တော့ဘဲ အရူးအမူး ကိုးကွယ်ခြင်းမျိုးကဲ့သို့ ဖြစ်နေပေသည်။

“အစ်ကိုလုံ စောစောက ကျွန်တော် ခင်ဗျားရဲ့ ကြီးမြတ်မှုကို မမြင်နိုင်လောက်အောင် မျက်ကန်းဖြစ်သွားခဲ့တယ် ကျေးဇူးပြုပြီး စိတ်ထဲမထားပါနဲ့…”

ချူးရှန့်က တိတ်ဆိတ်စွာ နေလိုက်၏။

သူ၏ စိတ်ထဲတွင် အေးစက်သော ရွှေရောင် အချက်အလက် စီးကြောင်းတစ်ခု တိတ်ဆိတ်စွာ ပေါ်လာပေသည်။

[ဒင်….ပိုင်ရှင်သည် အထူးမစ်ရှင်မုဒ် လျှို့ဝှက်စစ်ဆင်ရေးသို့ ဝင်ရောက်လာသည်ကို သိရှိရပါသည် ]

[ရဲတပ်ဖွဲ့ ခြိမ်းခြောက်နိုင်စွမ်း စနစ်သည် ယာယီ ကိုက်ညီမှု ပြုပြင်ပြောင်းလဲမှုများကို လုပ်ဆောင်နေပါသည် ပြုပြင်ပြောင်းလဲမှု ပြီးစီးသွားပါပြီ]

[လှည့်စားမှုကုဒ်ကို လူဆိုးခြိမ်းခြောက်မှု အငွေ့အသက်အဖြစ် ယာယီ ပြောင်းလဲလိုက်ပါပြီ]

[အငွေ့အသက်၏ အကျိုးသက်ရောက်မှု သင့်၏ ရက်စက်သော အသွင်အပြင်နှင့် အပြုအမူတို့သည် ရာဇဝတ်ကောင်များအပေါ် ကြောက်ရွံ့မှုနှင့် ယုံကြည်မှုဟူသော အကျိုးသက်ရောက်မှု နှစ်မျိုးကို ဖြစ်ပေါ်စေလိမ့်မည်]

[ခြိမ်းခြောက်နိုင်စွမ်းတန်ဖိုး ရယူခြင်းနည်းလမ်း ပြောင်းလဲသွားပါပြီ ခြိမ်းခြောက်နိုင်စွမ်းတန်ဖိုးများကို စကားလုံးများ အပြုအမူများနှင့် အငွေ့အသက်များမှတစ်ဆင့် ရာဇဝတ်ကောင်များထံမှ ကြောက်ရွံ့မှု လေးစားမှု အားကျမှု သို့မဟုတ် ယုံကြည်မှုတို့ကို သွတ်သွင်းခြင်းဖြင့် ရရှိနိုင်ပါသည်]

[သတိပေးချက် ရာဇဝတ်ကောင်များရှေ့တွင် သင့်၏ ရဲအရာရှိမည်သော အမှတ်အသား သို့မဟုတ် တရားမျှတမှုအပေါ် ခံစားချက်ကို ထုတ်ဖော်ပါက မစ်ရှင်ကျရှုံးမှု ဖြစ်စေလိမ့်မည်]

တစ်ချိန်တည်းလောက်မှာပင် အခြားသော အသိပေးချက်တစ်ခု ထွက်ပေါ်လာ၏။

[ပိုင်ရှင်တွင် ညံ့ဖျင်းသော ဆက်သွယ်ရေးစွမ်းရည်ရှိသည်ကို တွေ့ရှိရပါသည် လျှို့ဝှက်မစ်ရှင်တွင် ကူညီရန်အတွက် ယာယီ လှုပ်ရှားရန်မလိုသော စွမ်းရည်တစ်ခုကို ဖွင့်လှစ်လိုက်ပါပြီ]

[ယာယီစွမ်းရည် လိမ်လည်ခြင်း ကျွမ်းကျင်မှု အဆင့်၁ လှုပ်ရှားရန်မလိုသော စွမ်းရည်]

[စွမ်းရည်အကျိုးသက်ရောက်မှု သင်ပြောသော စကားလုံးတိုင်းကို နားထောင်သူ ရာဇဝတ်ကောင်များသာသည် သင့်၏ ထိပ်တန်း ရက်စက်သော ရာဇဝတ်ကောင် အသွင်အပြင်နှင့် ပိုမိုကိုက်ညီစေရန် အလိုအလျောက် ပြင်ဆင်ပြီး အဓိပ္ပါယ်ကောက်ယူပါလိမ့်မည်]

ချူးရှန့်က တည်ငြိမ်အေးဆေးစွာပင် ရှိနေခဲ့သည်။

လူမှုရေးအရ ပျင်းရိခြင်းက စနစ်မှ သူ့ကို ပေးအပ်ထားသော အကြီးမားဆုံးသော လှည့်စားမှုကုဒ် ဖြစ်လာခဲ့သည်ဟုပင် ဆိုရပေမည်။

ထိုစဉ် ယုံကြည်ရသော တပည့်ဖြစ်သူက ဗန်းတစ်ခုကို ကိုင်ဆောင်ကာ ပြေးလာခဲ့၏။

ဗန်းပေါ်တွင် ဈေးကြီးပုံရသော နိုင်ငံခြားအရက်တစ်ပုလင်းနှင့် သန့်ရှင်းသော ဖန်ခွက်နှစ်ခွက် ရှိနေပေသည်။

“အစ်ကိုလုံ ဒါက ကျွန်တော်တို့ ဘားမှာရှိတဲ့ အကောင်းဆုံးဝိုင်ပါ ကျေးဇူးပြုပြီး မြည်းကြည့်ပါဦး…”

ခွေးရူးက ပုလင်းကို ကိုယ်တိုင်ယူကာ အဖုံးကိုဖွင့်လိုက်ပြီး ချူးရှန့်အတွက် ခွက်အပြည့် လေးစားစွာ ငဲ့ပေးလိုက်ပြီးနောက် သူ့ကိုယ်သူ တစ်ဝက်ခန့် ငဲ့ထည့်လိုက်၏။

သူသည် ဝိုင်ခွက်ကို လက်နှစ်ဖက်ဖြင့် ကိုင်ထားကာ အရှေ့သို့ အနည်းငယ် ကိုင်းညွတ်လိုက်ပြီး အလွန်နှိမ့်ချသော အနေအထားကို ပြုလုပ်လိုက်သည်။

“အစ်ကိုလုံ စောစောက ကျွန်တော် တကယ်ပဲ မျက်ကန်းဖြစ်ခဲ့တယ် ဒီဝိုင်ခွက်က ခင်ဗျားကို တောင်းပန်တဲ့အနေနဲ့ သောက်တာပါ…”

ထိုသို့ ပြောပြီးနောက် သူက ခေါင်းကိုမော့ကာ ခွက်ထဲရှိ ဝိုင်ကို တစ်ကျိုက်တည်းဖြင့် သောက်ချလိုက်၏။ ဝိုင်များက သူ၏ ပါးစပ်ထောင့်မှတစ်ဆင့် အမာရွတ်ပေါ်သို့ စီးကျသွားသော်လည်း သူက လုံးဝ ဂရုမစိုက်ချေ။

မျက်လုံးများအားလုံးက ချူးရှန့်အပေါ် စူးစိုက်ကြည့်နေကြပြီး သူမည်သို့ တုံ့ပြန်မည်ကို စောင့်ကြည့်နေကြပေသည်။

ချူးရှန့်သည် သူ၏အရှေ့ရှိ ပယင်းရောင် အရည်ကို ကြည့်ရင်း မျက်မှောင်ကြုတ်လိုက်ပြန်သည်။

အရက်သောက်ရမယ် ပေါင်းသင်းဆက်ဆံရမယ် ပြီးတော့ စိတ်ပျက်စရာကောင်းတဲ့ မိသားစု ညစာစားပွဲ တစ်ခုကို သွားရဦးမည်။

စည်းမျဉ်းတွေက အရမ်းများလွန်းလှ၏။

ပြဿနာပဲ။

သူက စိတ်ထဲမှ ဤသို့တွေးလိုက်ပြီးနောက် အသံထွက်ကာ ပြောလိုက်သည်။

*စည်းမျဉ်းတွေ အရမ်းများတယ် အလုပ်ရှုပ်တယ်…*

[ဒင် လှုပ်ရှားရန်မလိုသော စွမ်းရည် လိမ်လည်ခြင်း ကျွမ်းကျင်မှုကို စတင် အသုံးပြုလိုက်ပါပြီ]

[အတွင်းစိတ်ကူးများ….စည်းမျဉ်းတွေ အရမ်းများတယ် အလုပ်ရှုပ်လိုက်တာ ရက်စက်သော လူမိုက်တစ်ဦး၏ ဘာသာစကားသို့ ပြောင်းလဲခြင်း ပြောင်းလဲခြင်း ပြီးစီးသွားပါပြီ]

ခွေးရူးက ဝိုင်ခွက်ကို ချလိုက်ကာ ယဉ်ကျေးသော စကားအချို့ကို ထပ်ပြောရန် ပြင်လိုက်စဉ်မှာပင် ချူးရှန့်၏ အေးစက်ပြီး စိတ်ခံစားမှု ကင်းမဲ့နေသော အသံက သူ၏ နားထဲတွင် မြည်ဟည်းသွားလေသည်။

အသံက မကျယ်သော်လည်း ရေခဲကဲ့သို့ အေးစက်နေသော သံမဏိအပ်တစ်ချောင်းက သူ၏ နားစည်ကို ဖောက်ထွင်းသွားသကဲ့သို့ ဖြစ်နေပေသည်။

“ငါ့စည်းမျဉ်းတွေကသာ စည်းမျဉ်းတွေပဲ…”

“အဓိပ္ပါယ်မရှိတာတွေ တော်လိုက်တော့…”

“ဝုန်း…”

ခွေးရူး၏ ဦးနှောက်မှာ တုန်ခါသွားပြီး သစ်တုံးကြီးတစ်တုံးဖြင့် ပြင်းထန်စွာ အရိုက်ခံလိုက်ရသကဲ့သို့ ရှိနေတော့သည်။

သူ၏မျက်နှာပေါ်ရှိ အပြုံးမှာ ချက်ချင်း အေးခဲသွားပြီး သူ၏ မျက်ဆန်များမှာ ပြင်းထန်စွာနှင့် ထိန်းချုပ်မရနိုင်အောင် ကျုံ့ဝင်သွားလေသည်။

လူပုံအလယ်တွင် အရှက်ခွဲခံရမှုကြောင့် ဖြစ်ပေါ်လာသော ဒေါသတစ်ရပ်က သူ၏ ရင်ဘတ်အောက်ခြေမှ အလိုအလျောက် ထွက်ပေါ်လာပြီး သူ၏ ခါးတစ်ဝိုက်ရှိ ကြွက်သားများမှာ ချက်ချင်း တင်းမာသွား၏။

သူသည် တုံချန်တွင် နှစ်ပေါင်းများစွာ ထင်သလို သောင်းကျန်းလာခဲ့ရာ မည်သည့်အချိန်ကမှ ဤကဲ့သို့ ဆက်ဆံမခံခဲ့ရဖူးချေ။

သို့သော် ဤလူသတ်လိုသော ရည်ရွယ်ချက်က သူ၏ ဦးခေါင်းထဲသို့ မရောက်လာမီမှာပင် ၎င်းသည် ပို၍ အားကောင်းပြီး ပိုမို စူးရှသော အေးစက်မှုတစ်ခုကြောင့် ချက်ချင်း ငြိမ်းသတ်ခံလိုက်ရလေသည်။

ချူးရှန့်သည် သူ့ကို တစ်ချက်ပင် မကြည့်ခဲ့ချေ။

ခွေးရူးသည် သူ့ပတ်ဝန်းကျင်ရှိ လေထုအပူချိန်က ဆယ်ဒီဂရီကျော် ကျဆင်းသွားသည်ကို ခံစားလိုက်ရ၏။ မမြင်နိုင်သော်လည်း ခံစားသိရှိနိုင်သော ကြောက်မက်ဖွယ်ကောင်းသည့် ဖိအားကြီးတစ်ခုက တောင်ကြီးတစ်တောင်ကဲ့သို့ သူ၏ ဝိညာဉ်အပေါ်သို့ ဖိချလာသဖြင့် အသက်ရှူရန်ပင် ခက်ခဲသွားစေသည်။

သူ ရုတ်တရက် နားလည်သွား၏။

ဤသူသည် တကယ့် ထိပ်တန်း ကျွမ်းကျင်သူတစ်ဦး ဖြစ်ပေသည်။

လူသေအလောင်း တောင်များနှင့် သွေးပင်လယ်များထဲမှ တွားသွားထွက်ပေါ်လာသော တကယ့် ငရဲမင်းတစ်ပါးက အခြားသူများ၏ စည်းမျဉ်းများကို မည်သို့မျှ လိုက်နာနိုင်မည် မဟုတ်ချေ။

သူကိုယ်တိုင်ကသာ စည်းမျဉ်းများကို ဖန်တီးသူ ဖြစ်လေသည်။

သူ၏အမြင်တွင် မိမိ၏ အစောပိုင်း လုပ်ရပ်များမှာ သုံးနှစ်အရွယ် ကလေးတစ်ဦး အိမ်ဆော့တမ်း ကစားနေသကဲ့သို့ ရယ်စရာကောင်းနေမည်မှာ သေချာပေသည်။

ဤအရာကို တွေးမိသောအခါ ခွေးရူး၏ ကျောပြင်တွင် ချွေးအေးများ ထွက်လာပြီး သူ၏ ရှပ်အင်္ကျီကို ချက်ချင်း စိုရွှဲသွားစေသည်။

ဒေါသထွက်မည့်အစား သူက ပိုမိုနက်ရှိုင်းသော ရိုသေလေးစားမှုနှင့် စိတ်လှုပ်ရှားမှုကို ခံစားလိုက်ရ၏။

ဟုတ်ပေသည်။ သူသည် အလွန်စိတ်လှုပ်ရှားလွန်း၍ တုန်ယင်နေခဲ့ပေသည်။

ဤသည်ကပင် သူအလိုရှိသော လူမျိုး ဖြစ်ပေသည်။ တကယ့် ရက်စက်သော ခွေးရူးတစ်ကောင်မဟုတ်ဘဲ ကျားတစ်ကောင်။ သူ၏ ပြိုင်ဘက်အားလုံးကို သတ်ပစ်ရန် ကူညီနိုင်မည့် ကျားတစ်ကောင် ဖြစ်ပေသည်။

“ဟုတ်တယ် ဟုတ်တယ် အစ်ကိုလုံ ပြောတာမှန်တယ်…”

ခွေးရူးသည် ကိုးဆယ်ဒီဂရီနီးပါးအထိ ပို၍ ကိုင်းညွတ်သွားပြီး သူ၏မျက်နှာပေါ်တွင် မြှောက်ပင့်သော အပြုံးတစ်ခု ပြန်လည်ပေါ်လာ၏။

“မသိနားမလည်တာ ကျွန်တော့်အမှားပါ အစ်ကိုလုံ ခင်ဗျားလို အဆင့်အတန်းရှိတဲ့လူတစ်ယောက်က သဘာဝအတိုင်း ကိုယ်ပိုင် စည်းမျဉ်းတွေ ရှိရမှာပေါ့…*

သူသည် ရုတ်တရက် လှည့်ပတ်သွားပြီး သူ့ကို ဝိုင်ငဲ့ပေးခဲ့သော တပည့်ဖြစ်သူ၏ မျက်နှာကို ပြင်းပြင်းထန်ထန် ရိုက်ချလိုက်ရာ ကြည်လင်ပြတ်သားပြီး ကျယ်လောင်သော အသံတစ်ခု ထွက်ပေါ်လာလေသည်။

“အသုံးမကျတဲ့ အမှိုက်ကောင်တွေ အစ်ကိုလုံက ဒီနေရာက စည်းမျဉ်းတွေကို မကြိုက်ဘူးဆိုတာ မင်းတို့ မမြင်ဘူးလား…”

“မြန်မြန်သွားပြီး အစ်ကိုလုံအတွက် အကောင်းဆုံး ဗွီအိုင်ပီ နားနေခန်းကို ပြင်ဆင်လိုက်စမ်း…”

“မင်းတို့ သိမ်းထားတဲ့ လက်ဖက်ရည်တွေနဲ့ စီးကရက်တွေ အကုန်ထုတ်လာခဲ့ ပြီးတော့ သူ့ကို သွားဆက်သလိုက်…”

“ဉာဏ်ကောင်းတဲ့ ညီအစ်ကို နည်းနည်းလောက် ထပ်ခေါ်ခဲ့ ခုအချိန်ကစပြီး သူတို့က အစ်ကိုလုံရဲ့ တိုက်ရိုက်အမိန့်အောက်မှာ ရှိရမယ်…”

တပည့်ဖြစ်သူမှာ ရောင်ရမ်းနေသော မျက်နှာကိုအုပ်ကာ အသံတစ်သံမျှပင် မထွက်ရဲဘဲ အရိုအသေပေးလျက် ပြေးထွက်သွားလေတော့သည်။

ခွေးရူး၏ ဆက်တိုက်လုပ်ဆောင်မှုများက ပတ်ဝန်းကျင်ရှိ လူမိုက်များကို လုံးဝ အံ့အားသင့် ဆွံ့အသွားစေသည်။

ခွေးရူးတစ်ကောင်က လူတစ်ဦးအပေါ် ဤမျှလောက် ကျိုးနွံနေသည်ကို သူတို့ တစ်ခါမျှ မမြင်တွေ့ခဲ့ဖူးချေ။

ဤသည်မှာ ရိုးရှင်းသော လေးစားမှုတစ်ခုမျှသာ မဟုတ်တော့ဘဲ အခြားလူအား ဘိုးဘေးတစ်ဦးကဲ့သို့ လက်တွေ့ကျကျ ဆက်ဆံနေခြင်းပင် ဖြစ်ပေသည်။

ဤအရာအားလုံးကို လုပ်ဆောင်ပြီးနောက် ခွေးရူးသည် ချူးရှန့်ထံသို့ သတိကြီးစွာဖြင့် ပြန်လှည့်လာ၏။

“အစ်ကိုလုံ ကျေးဇူးပြုပြီး အရင်နားလိုက်ပါ မိသားစု ညစာစားပွဲက နောက်တစ်နာရီဆိုရင် စတင်ပါလိမ့်မယ် အဲဒီအချိန်ကျရင် ကျွန်တော်ကိုယ်တိုင် လာခေါ်ပါ့မယ်…”

“စိတ်ချပါ ဒီနေ့ကစပြီး ဒီကွင်းထဲမှာ မဟုတ်ဘူး တုံချန်တစ်ခုလုံးက ခင်ဗျားရဲ့ စကားက စည်းမျဉ်းပဲ…”

နောက်ဆုံးတွင် ချူးရှန့်က ခေါင်းညိတ်လိုက်လေသည်။

နောက်ဆုံးတော့ ငါ အေးအေးချမ်းချမ်းနဲ့ တိတ်တိတ်ဆိတ်ဆိတ် နေရတော့မည်။

သူသည် ခွေးရူးကို ထပ်မကြည့်တော့ဘဲ ယုံကြည်ရသော တပည့်ဖြစ်သူ၏ လမ်းပြမှုဖြင့် သူ၏ လက်များကို အိတ်ကပ်ထဲထည့်ကာ လက်ဝှေ့ကွင်းနောက်ဘက်ရှိ နားနေဆောင်ဆီသို့ တိုက်ရိုက် လျှောက်သွားလေ၏။

လူသွားလမ်း၏ အဆုံးတွင် ချူးရှန့်၏ ကျောပြင် လုံးဝ ပျောက်ကွယ်သွားပြီးမှသာ ခွေးရူးက ဖြည်းညင်းစွာ မတ်တတ်ရပ်လိုက်သည်။

သူသည် သက်ပြင်းရှည်ကြီးတစ်ခုကို မှုတ်ထုတ်လိုက်ပြီး သူ၏ ကျောပြင်တစ်ခုလုံး ချွေးအေးများဖြင့် ရွှဲနစ်နေသည်ကို သတိပြုမိသွား၏။

သူ၏ တပည့်တစ်ဦးက အနီးသို့ တိုးကပ်လာပြီး တီးတိုးပြောလိုက်သည်။

“အစ်ကိုခွေးရူး အဲ့လူက သူ့နောက်ခံ ဇစ်မြစ်လည်း မသိရဘူး အဲဒီလိုမျိုး…”

“ဖြန်း…”

ခွေးရူးသည် သူ၏ လက်အောက်ငယ်သားကို နောက်တစ်ကြိမ် ရိုက်ချလိုက်ရာ ထိုသူမှာ တစ်ဝက်ခန့် လည်ထွက်သွားလေသည်။

“ဇစ်မြစ် ဟုတ်လား…”

ခွေးရူးသည် လှောင်ပြောင်လိုက်ပြီး ကြမ်းပြင်ပေါ်တွင် ခွေးသေတစ်ကောင်ကဲ့သို့ လဲလျောင်းနေသော သံမဏိမျှော်စင်အပေါ် သူ၏ အကြည့်များ ရောက်ရှိသွားကာ သူ၏ လေသံမှာ အေးစက်နေ၏။

“စောစောက သူထုတ်ဖော်ခဲ့တဲ့ လူသတ်လိုတဲ့ အငွေ့အသက်က အကောင်းဆုံး ရှင်းလင်းချက်ပဲ…”

“ငါ့အမိန့်ကို ထပ်ဆင့်ပို့လိုက် အခုအချိန်ကစပြီး မင်းတို့ ချန်လုံကို မြင်တာနဲ့ ငါ့ကို မြင်သလိုပဲ သဘောထားရမယ်…”

“အနည်းငယ်လေးတောင် မလေးမစား လုပ်ရဲတဲ့သူကို အရင်ဆုံး လက်မောင်း ချိုးပစ်မယ်…”

“ဟုတ်ကဲ့ပါ…”

ဗွီအိုင်ပီ နားနေခန်းအတွင်း။

လေးလံသော အသံလုံတံခါးကြီး ပိတ်သွားပြီး အပြင်ဘက်ရှိ သွေးထွက်သံယိုနှင့် ညစ်ပတ်သော ဆူညံသံများကို လုံးဝ အထီးကျန်ဖြစ်သွားစေသည်။

ချူးရှန့်သည် လက်ယမ်းကာ တုန်ရီနေသော လက်အောက်ငယ်သားများကို ထွက်သွားစေလိုက်၏။

သူသည် ကြမ်းပြင်မှ မျက်နှာကြက်အထိ ရှည်လျားသော မှန်ကြီးဆီသို့ လျှောက်သွားကာ သူကိုယ်သူ ကြည့်လိုက်သည်။

ပန်းပွင့်ဒီဇိုင်း ရှပ်အင်္ကျီ ဘောင်းဘီအနက်ရောင်နှင့် ညှပ်ဖိနပ်များ။

ထို့ပြင်စနစ်၏ ပုံစံခွက် ဝင်ရောက်မှုကြောင့် ပိုမို ကြောက်မက်ဖွယ်ကောင်းနေသော ထိုမျက်နှာ။

သူ၏ လျှို့ဝှက်စစ်ဆင်ရေး အသက်မွေးဝမ်းကျောင်း၏ ပထမခြေလှမ်းသည် အနည်းငယ် ချောမွေ့လွန်းနေပေသည်။

သို့သော် ဤချောမွေ့စွာ ရွက်လွှင့်ခြင်းကိုယ်တိုင်က ပိုမိုကြီးမားသော ပြဿနာကို ရည်ညွှန်းနေ၏။

“တီ…”

သူ၏ အိတ်ကပ်ထဲရှိ ဖုန်းအသစ်မှာ ရုတ်တရက် တုန်ခါသွားလေသည်။

၎င်းမှာ ထိုလျှို့ဝှက်ကုဒ်ဖြင့် ပြုလုပ်ထားသော ဖုန်းနံပါတ်ထံမှ ပေးပို့လာသော မက်ဆေ့ခ်ျတစ်ခု ဖြစ်ပေသည်။

ချူးရှန့်သည် ဖန်သားပြင်ကို ပွတ်ဆွဲလိုက်ရာ သူ၏ မျက်ဆန်များမှာ အနည်းငယ် ကျုံ့ဝင်သွား၏။

စာတိုမက်ဆေ့ခ်ျမှာ အလွန်တိုတောင်းလှသည်။

မိသားစု ညစာစားပွဲဆိုသည်မှာ ထောင်ချောက်တစ်ခုဖြစ်ပြီး ပစ်မှတ်မှာ မြေခွေးနက်ဂိုဏ်းနှင့် နယ်မြေလုနေသော ကင်းမြီးကောက်ဂိုဏ်း ခေါင်းဆောင် ဖြစ်သည်။

ခွေးရူးသည် ၎င်း၏ အာဏာကို တည်ဆောက်ရန် သင့်အား လက်နက်တစ်ခုအဖြစ် အလိုရှိနေပြီး ဤသည်မှာ ၎င်း၏ နောက်ဆုံး စမ်းသပ်မှု ဖြစ်သည်။

အသက်ရှင်အောင်နေပါ။