အခန်း (၆၉၃-၆၉၄)

အပိုင်း (၆၉၃)

ယွင်ကျုံးဟဲ့က ပြောလိုက်သည်။ “အဘိုး... အဲဒီတုန်းက ပိရမစ် အပြောင်းအလဲ ဖြစ်တုန်းက ကျုပ် သားကို တာရှီအင်ပါယာရဲ့ သွေးစွန်း ဘုရင်မ လက်ထဲ အပ်ခဲ့တယ်။ မွေးစားအဖေ အောက်ရှင်းနဲ့ လူယုံ ယွမ်ထျန်းရှဲ့ တို့လည်း သတင်း အစအန ပျောက်ဆုံးနေတယ်။ ပြီးတော့ ကျင်းကျုံးယွဲ့ ရောပဲ။ ဒီလူတွေက ကျုပ် မိသားစုဝင်တွေ ဖြစ်ရုံသာမက အနာဂတ် ကပ်ဘေးကြီး စစ်ပွဲမှာလည်း ကျုပ်တို့အတွက် ကြီးမားတဲ့ အထောက်အကူတွေ ဖြစ်လာမှာပါ။”

ဧကရာဇ် ယုံချီက ပြောလိုက်၏။ “မင်း မိသားစုဝင်တွေရဲ့ သတင်းကို သွားရှာဖို့ ငါ အတော်ဆုံး ဟေးကျိုးထိုင် သိုင်းပညာရှင်တွေကို ချက်ချင်း လွှတ်လိုက်မယ်။ နောက်ပြီး တာရှီအင်ပါယာကိုလည်း သံတမန်အဖွဲ့ လွှတ်လိုက်မယ်။”

ထို့နောက် ဧကရာဇ် ယုံချီက ရုတ်တရက် မေးလိုက်သည်။ “မြေးလေး။ မင်း ဆိုလိုတာက ငါတို့နဲ့ တာရှန်း မိစ္ဆာနိုင်ငံတော် ဖြစ်မယ့် ပထမဆုံး စစ်ပွဲက ရေတပ် စစ်ပွဲ ဖြစ်လိမ့်မယ်လို့ ပြောတာလား။”

“ဟုတ်တယ်။ ကျုပ်တို့နဲ့ တာယင်အင်ပါယာ ကြားမှာ ထျန်းကျန်းမြစ် ခြားနေတာ။ တာရှန်း မိစ္ဆာနိုင်ငံတော်က ကျုပ်တို့ တာရှကို ဖျက်ဆီးချင်ရင် ကျုပ်တို့ရဲ့ ရေတပ်ကို အရင် ဖျက်ဆီးရမယ်။” ယွင်ကျုံးဟဲ့က ဖြေ၏။

ဧကရာဇ် ယုံချီက ပြောလိုက်သည်။ “ငါတို့ တာရှအင်ပါယာရဲ့ ရေတပ်က သာမန်လောက်ပဲ ရှိတာ။ မင်းရဲ့ မင်္ဂလာကိစ္စနဲ့ ပတ်သက်ပြီး မင်း ဘယ်လို စိတ်ကူး ရှိလဲ”

‘မင်္ဂလာကိစ္စ ဟုတ်လား။ ယွင်ကျုံးဟဲ့မှာ ဇနီး သုံးယောက် ရှိနေပြီလေ။’

ဧကရာဇ် ယုံချီက ပြောလိုက်၏။ “တာရှီအင်ပါယာကို ငါ သံတမန်အဖွဲ့ လွှတ်တာ။ ပထမ တစ်ချက်က ယောင်အာလေးရဲ့ သတင်းကို စုံစမ်းဖို့။ နောက်တစ်ချက်က မင်းအတွက် တာရှီအင်ပါယာကို သွားပြီး လက်ထပ်ခွင့် တောင်းဖို့ပဲ။ ငါတို့ နိုင်ငံ နှစ်ခု မင်္ဂလာဆက်စပ်ပြီး တာရှန်း မိစ္ဆာနိုင်ငံတော်ကို အတူတူ ဆန့်ကျင် တိုက်ခိုက်ကြမယ်။ သွေးစွန်း ဘုရင်မကို မင်းနဲ့ လက်ထပ်ခိုင်းမယ်။”

ယွင်ကျုံးဟဲ့က မေးလိုက်သည်။ “အဘိုး... အဘိုးက သွေးစွန်း ဘုရင်မရဲ့ တင်တောင်းမှုကို သဘောကျနေတာလား။”

ပိုင်ယင်မြို့ ပြီးလျှင် ဒုတိယ အင်အားအကြီးဆုံး ရေတပ်မှာ သွေးစွန်း ဘုရင်မတွင် ရှိသည်။

နောက်ထပ် တာရှန်း မိစ္ဆာနိုင်ငံတော်နှင့် ဖြစ်ပွားမည့် ပထမဆုံး စစ်ပွဲက ပင်လယ်ပြင်တွင် ဖြစ်ပွားမည်မှာ သေချာ၏။

တာရှအင်ပါယာ၏ စစ်သင်္ဘောများမှာ ရှေးရိုးဆန်လွန်းပြီး ပြုပြင်ပြောင်းလဲရန် နေရာ သိပ်မရှိပေ။ သို့ပေမည့် တာရှီအင်ပါယာတွင်မူ ပိုင်ယင်မြို့ စစ်သင်္ဘောများ ပြီးလျှင် အဆင့်မြင့်ဆုံး ဖြစ်သော စစ်သင်္ဘောများ ရှိသည်။

အကယ်၍ သွေးစွန်း ဘုရင်မ၏ စစ်သင်္ဘောများကို ရရှိပါက ပြုပြင်ပြောင်းလဲရန် နေရာ အများကြီး ရှိလာမည် ဖြစ်၏။

ယွင်ကျုံးဟဲ့သည် တာရှီအင်ပါယာ စစ်သင်္ဘော၏ ပုံစံကြမ်းများကို မြင်ဖူးသည်။ ကုန်းပတ် အလွှာ အနည်းငယ် ရှိပြီး ပစ်ခတ်ရန် အပေါက် ဆယ်ခုကျော်လည်း ပါရှိကာ အတွင်းတွင် ဧရာမ လေးပစ်စက်များ တပ်ဆင်ထားသည်။

အကယ်၍ အားလုံးကို အမြောက်များဖြင့် အစားထိုးလိုက်မည် ဆိုပါက ရေတပ် တစ်ခုလုံး၏ တိုက်ခိုက်ရေး စွမ်းရည်က အလွန် ကြီးမားစွာ တိုးတက်လာမှာဖြစ်၏။

‘အများကြီး မလိုပါဘူး၊ အမြောက် ရာဂဏန်းလောက် ရှိရင်ပဲ လုံလောက်ပါပြီ။’

တာရှန်းမိစ္ဆာနိုင်ငံတော်၏ ရေတပ်မှာ ပြိုင်ဘက်ကင်းအောင် အစွမ်းထက်သည်ဟု ဆိုသော်လည်း၊ ယွင်ကျုံးဟဲ့ ဘက်က အမြောက်များ တပ်ဆင်ထားသည့် စစ်သင်္ဘောများအဖြစ် အဆင့်မြှင့်တင်လိုက်မည်ဆိုပါက ခေတ်တစ်ခေတ်ကို ဦးဆောင်နိုင်စွမ်း ရှိလာမည်ဖြစ်သည်။

အမြောက်ဟူသည့် လက်နက်မှာ ဤလောကတွင် မပေါ်ပေါက်သေးသည့်အတွက် ၎င်း၏အစွမ်းသတ္တိဖြင့် အံ့ဩစရာကောင်းသည့် အောင်ပွဲများကို ဆွတ်ခူးပေးနိုင်မည်မှာ အသေအချာပင်။

ပင်လယ်ပြင်စစ်ပွဲတွင် တာရှန်းမိစ္ဆာနိုင်ငံတော်၏ ရေတပ်ကို အနိုင်ယူလိုက်နိုင်မည်ဆိုပါက ထိုနိုင်ငံတော်၏ အမှောင်သခင်ကြီး လက်တစ်ဖက်ကို ဖြတ်ပစ်လိုက်သကဲ့သို့ ဖြစ်သွားပေလိမ့်မည်။

ထို့ကြောင့်ပင် သွေးစွန်းဘုရင်မ၏ တင်တောင်းမှုမှာ အထူးသဖြင့် တန်ဖိုးကြီးမားနေရခြင်း ဖြစ်သည်။

“ကောင်းပြီ။”

ယွင်ကျုံးဟဲ့က ပြော၏။ “အဘိုးက ကျုပ်အတွက် သွေးစွန်း ဘုရင်မကို လက်ထပ်ခွင့် တောင်းပေးပါ။”

ဧကရာဇ်က ပြောလိုက်သည်။ “ကျုပ် အခုပဲ နိုင်ငံတော် သဝဏ်လွှာကို ကိုယ်တိုင် ရေးလိုက်မယ်။”

ထို့နောက် ဧကရာဇ်မင်းမြတ်သည် တစ်ကိုယ်လုံးရှိ နာကျင်မှုကို အတင်းအကျပ် အောင့်ခံကာ မဟာမိတ်ဖွဲ့ရေး နိုင်ငံတော် သဝဏ်လွှာကို ကိုယ်တိုင် စတင် ရေးသားတော့၏။

သူ၏ လက်တစ်ဖက်သည် စုတ်တံကိုပင် မကိုင်နိုင်တော့သောကြောင့် လက်နှစ်ဖက်ဖြင့် ကိုင်ကာ ရေးသားနေရ၏။ စာလုံး တစ်လုံး ရေးတိုင်း တစ်ကိုယ်လုံး တုန်ယင်နေသည်။

ထိုသို့ဖြင့် ဧကရာဇ် ယုံချီသည် စာလုံး ရာကျော် ပါဝင်သော နိုင်ငံတော် သဝဏ်လွှာကို ခက်ခက်ခဲခဲဖြင့် ရေးသား ပြီးစီးသွားခဲ့သည်။ တစ်ကိုယ်လုံး နာကျင်လွန်း၍ ချွေးစေးများ ပြန်လာကာ သေမလောက် နာကျင်နေခဲ့၏။

ဤလက်ရေးမှာ ဧကရာဇ်၏ လက်ရေး ဖြစ်သော်လည်း စာလုံးများ အားလုံးမှာ တုန်ယင်နေပြီး စာလုံးတိုင်း ရှင်းလင်းစွာ မြင်ရသော်လည်း စာလုံးတိုင်း အနည်းငယ် ပုံပျက်နေသည်။

သို့ပေမည့် ဤကဲ့သို့သော နိုင်ငံတော် သဝဏ်လွှာကမှ တာရှီအင်ပါယာ ဧကရာဇ်ကို ပိုမို ဆွဲဆောင်စေနိုင်မှာ ဖြစ်၏။

ရေးသားပြီးနောက် ယွင်ကျုံးဟဲ့သည် ဧကရာဇ်ကို လဲလျောင်းရန် ကူပေးခဲ့၏။ နှိပ်နယ်ပေး၍လည်း မရပေ။ အကြောင်းမှာ သူ၏ အရေပြားများက အလွန် ပါးလွှာနေပြီး နေရာတော်တော်များများတွင် ပုပ်ပွနေ သောကြောင့် အထိမခံနိုင်အောင် နာကျင်နေသောကြောင့်ပင်။

အင်ဆူလင်ကို ချက်ချင်း ထုတ်လုပ်ရမှာဖြစ်၏။ ဤအရာမှာလည်း မခက်ခဲပေ။ ဝက်၏ မုန့်ချိုအိတ်မှ တိုက်ရိုက် ထုတ်ယူ၍ သန့်စင်လိုက်ရုံသာ ဖြစ်သည်။

အင်ဆူလင် ရရှိပြီဆိုပါက အဘိုး ဧကရာဇ်၏ နာကျင်မှုများကို လျော့ပါးစေနိုင်ပြီး သူ၏ ခန္ဓာကိုယ်ကို တဖြည်းဖြည်း ပုံမှန် အတိုင်း ပြန်လည် ကောင်းမွန်လာစေနိုင်ပေလိမ့်မည်။

ဧကရာဇ် ကိုယ်တိုင် အာဏာ ပြန်လည် ချုပ်ကိုင်နိုင်ခြင်းက ယွင်ကျုံးဟဲ့ အတွက် ကြီးမားသော အကျိုးကျေးဇူးများ ရှိသည်။

“အဘိုး... ကျုပ်တို့ တာရှအင်ပါယာ မင်းမျိုးမင်းနွယ်တွေမှာ တာရှန်း မိစ္ဆာနိုင်ငံတော်ကို ရင်ဆိုင်နိုင်တဲ့ လျှို့ဝှက် နည်းလမ်း ရှိတယ်လို့ ကြားဖူးတယ်။” ယွင်ကျုံးဟဲ့က မေးလိုက်၏။

ဧကရာဇ်က ပြန်မေးသည်။ “မြေးလေး။ မင်း ဘယ်သူ့ဆီက ကြားတာလဲ”

ယွင်ကျုံးဟဲ့က ဖြေ၏။ “မီတျဲ ချိုင့်ဝှမ်းရဲ့ ရှောင်ယောင်ဇီ ဆီကပါ။”

“သူလား။ ဒါဆို… ဒါဆိုလည်း အံ့ဩစရာ မရှိတော့ဘူး။”

ဧကရာဇ်က ပြောလိုက်သည်။ “မြေးလေး။ မင်း သိသင့်တယ်။ အဲဒီတုန်းက တာရှန်း မိစ္ဆာနိုင်ငံတော်က လောကကို လွှမ်းမိုးခဲ့ပြီး တိုက်ပွဲတိုင်းမှာ အနိုင်ရကာ လောက တစ်ခုလုံးကို စည်းလုံးတော့မလို ဖြစ်ခဲ့တယ်။”

ယွင်ကျုံးဟဲ့ ခေါင်းညိတ်လိုက်၏။

ဧကရာဇ်က ဆက်ပြောသည်။ “အရှေ့တိုင်း ယဉ်ကျေးမှုရဲ့ တရားဝင် မင်းဆက်က မိစ္ဆာနိုင်ငံတော်ရဲ့ ဖျက်ဆီးမှုကို ခံရတော့မလို ဖြစ်နေပြီး ကပ်ဘေးကြီး ဆိုက်ရောက်လာတော့မယ်ကို တွေ့ရတော့ အရှေ့တိုင်း လောကရဲ့ နယ်စားတွေ အားလုံး စည်းလုံးပြီး တာရှန်း မိစ္ဆာနိုင်ငံတော်ကို ဆက်တိုက် ဆန့်ကျင် တိုက်ခိုက်ခဲ့ကြတယ်။

ဒါပေမဲ့ တာရှန်း မိစ္ဆာ တပ်ဖွဲ့ကို လုံးဝ မယှဉ်နိုင်ဘဲ အကြိမ်ကြိမ် ရှုံးနိမ့်ခဲ့ကြတယ်။ အဲဒီအချိန်မှာ လူတစ်ယောက်က အကြံပေးလာတယ်။ ရန်သူ့ စခန်းကို တိုက်ရိုက် ဝင်တိုက်ပြီး နုဧကရာဇ်ကို ရင်ဆိုင်ဖို့၊ ခေါင်းဆောင်ကို အရင် ဖမ်းဖို့ပေါ့။”

ဤလျှို့ဝှက် သမိုင်းကြောင်းကို ယွင်ကျုံးဟဲ့ အမှန်တကယ် မသိခဲ့ပေ။

ဧကရာဇ်က ပြောလိုက်သည်။ “နုဧကရာဇ်ကို တိုက်ရိုက် သွားရောက် ဖျက်ဆီးဖို့ အကြံပေးခဲ့တဲ့ သူက ကျုပ်တို့ရဲ့ ဘိုးဘေး ရှကျိုးပဲ။”

“ဧကရာဇ် ကောင်ကျူ လား။” ယွင်ကျုံးဟဲ့က မေးလိုက်၏။

ဧကရာဇ် ယုံချီက ဖြေသည်။ “ဟုတ်တယ်။ သူက ကျုပ်တို့ရဲ့ ဧကရာဇ် ကောင်ကျူ ပဲ။ ဒါပေမဲ့ တကယ်တော့ သူက ဧကရာဇ် တစ်ရက်တောင် မလုပ်ခဲ့ရဘူး။ နုဧကရာဇ် ပျက်စီးပြီး နှစ်တစ်ရာကျော်ကြာမှ ကျုပ်တို့ တာရှအင်ပါယာ တကယ် တည်ထောင်ဖြစ်ခဲ့တာ။ ဒါပေမဲ့ ဧကရာဇ် တိုက်ကျူက ဘိုးဘေး ရှကျိုးကမှ ကျုပ်တို့ တာရှအင်ပါယာရဲ့ အုတ်မြစ်ချသူလို့ ထင်ပြီး သူ့ကို ဧကရာဇ် ကောင်ကျူ အဖြစ် ဘွဲ့အမည် ပေးခဲ့တာ။”

ယွင်ကျုံးဟဲ့က မေးလိုက်၏။ “ပြီးတော့ရော...”

ဧကရာဇ် ယုံချီက ဆက်ပြောသည်။ “ကောင်ကျူ ရှကျိုးက အရှေ့တိုင်း လောကရဲ့ အင်အားအကောင်းဆုံး သိုင်းပညာရှင် တစ်ထောင်ကျော်ကို ဦးဆောင်ပြီး တာရှန်း မိစ္ဆာ မြို့တော်ထဲ ခိုးဝင်တယ်။ ခေါင်းဆောင်ကို လုပ်ကြံတဲ့ စစ်ဆင်ရေး လုပ်ဖို့ နုဧကရာဇ်ကို လုပ်ကြံခဲ့တယ်။ ရလဒ်ကတော့ သူတို့ အားလုံး ပျောက်ကွယ် သွားတယ်။ လုံးဝ သတင်း အစအန မရတော့ဘူး။ တစ်ယောက်မှ ပြန်မလာခဲ့ကြဘူး။”

ယွင်ကျုံးဟဲ့ အံ့ဩသွား၏။

‘လွန်ခဲ့သော နှစ်တစ်ထောင်ကျော်က အရှေ့တိုင်း လောကရဲ့ သိုင်းပညာက အခုထက် ပိုမို မြင့်မားတယ်။ ဒါတောင်မှ အရှေ့တိုင်းရဲ့ ထိပ်တန်း သိုင်းပညာရှင် တစ်ထောင်ကျော်က တစ်ယောက်မှ ပြန်မလာခဲ့ဘူး ဟုတ်လား။ အဲဒီတုန်းက အတိအကျ ဘာတွေ ဖြစ်သွားခဲ့တာလဲ။’

ဧကရာဇ် ယုံချီက ဆက်ပြော၏။ “ဒါပေမဲ့ မကြာခင်မှာပဲ နုဧကရာဇ် ရုတ်တရက် ကံတော်ကုန်သွားတယ် ဆိုတဲ့ သတင်း ထွက်လာပြီး။ တာရှန်း မိစ္ဆာနိုင်ငံတော်လည်း မြန်မြန်ဆန်ဆန် ပြိုကွဲသွားခဲ့တယ်။”

‘ဒါက နောက်ထပ် ကြီးမားတဲ့ ပဟေဠိကြီး တစ်ခု ဖြစ်လာပြန်ပြီ။ ဒီအရှေ့တိုင်း ထိပ်တန်း သိုင်းပညာရှင် တစ်ထောင်ကျော်က နုဧကရာဇ်ကို လုပ်ကြံဖို့ တကယ် အောင်မြင်ခဲ့တာလား။ နုဧကရာဇ် ဘာလို့ ရုတ်တရက် ကံတော်ကုန်သွားတာလဲ။’

ဧကရာဇ် ယုံချီက ပြောလိုက်သည်။ “ဒါပေမဲ့ အဲဒီနောက်မှာ စာအုပ်တစ်အုပ် ကျန်ရစ်ခဲ့တယ်။ အဲဒါကို ငါတို့က ကောင်ကျူ သေတမ်းစာလို့ ခေါ်တယ်။ အဲဒါက စာတစ်စောင် မဟုတ်ဘဲ စာအုပ် တစ်အုပ်ပါ။ ဒဏ္ဍာရီတွေ အရ ဒီစာအုပ်ထဲမှာ နုဧကရာဇ်၊ တာရှန်း အင်ပါယာနဲ့ ပတ်သက်တဲ့ လျှို့ဝှက်ချက်တွေ မှတ်တမ်းတင်ထားတယ်။ တာရှန်း မိစ္ဆာနိုင်ငံတော်ကို ဖျက်ဆီးမယ့် နည်းလမ်းတွေတောင် ပါဝင်တယ်လို့ ဆိုတယ်။ ဒီစာအုပ်ကို အရှေ့တိုင်း လောကရဲ့ အမြင့်ဆုံး လျှို့ဝှက်ချက်လို့ သတ်မှတ်ထားပြီး တာရှ ဧကရာဇ် အဆက်ဆက်သာ သိခွင့် ရှိတယ်။”

ယွင်ကျုံးဟဲ့က မေးလိုက်၏။ “ဒါဆို မီတျဲ ချိုင့်ဝှမ်းရဲ့ ရှောင်ယောင်ဇီက ဘာလို့ သိနေတာလဲ။”

ဧကရာဇ် ယုံချီက ဖြေသည်။ “ဘာလို့လဲဆိုတော့ အဲဒီတုန်းက နုဧကရာဇ်ကို သွားလုပ်ကြံတဲ့ အထဲမှာ မီတျဲ ချိုင့်ဝှမ်းရဲ့ ဘိုးဘေးလည်း ပါဝင်ခဲ့လို့ပဲ။ ကောင်ကျူ ဧကရာဇ်ရဲ့ ချစ်သူလေ။”

‘ဪ... ဒါကြောင့် တာရှအင်ပါယာနဲ့ မီတျဲ ချိုင့်ဝှမ်းရဲ့ ဆက်ဆံရေးက ဒီလောက်တောင် ရှုပ်ထွေးနေတာကိုး။ ရှောင်ယောင်ဇီ ပြောတာမှန်တယ်။ တာရှအင်ပါယာမှာ တကယ်ပဲ နုဧကရာဇ်ရဲ့ လျှို့ဝှက်ချက်နဲ့ တာရှန်း မိစ္ဆာနိုင်ငံတော်ကို ဖျက်ဆီးမယ့် နည်းလမ်း ရှိနေတာပဲ။ အဓိက အချက်က ဒီ ကောင်ကျူ သေတမ်းစာမှာ ရှိနေတာ။’

ယွင်ကျုံးဟဲ့က ပြောလိုက်၏။ “အဘိုး... အဲဒီ ကောင်ကျူ သေတမ်းစာနဲ့ ပတ်သက်ပြီး…”

ဧကရာဇ် ယုံချီက ပြောလိုက်သည်။ “ဒါက ငါတို့ တာရှအင်ပါယာရဲ့ အမြင့်ဆုံး လျှို့ဝှက်ချက်ပဲ။ ဒီအရာကို တာရှအင်ပါယာ ဧကရာဇ် အဆက်ဆက်ပဲ ကိုင်တွယ်ခွင့် ရှိတယ်။ သူက ငါတို့ တာရှအင်ပါယာရဲ့ အဖိုးတန် ရတနာပဲ။ ဘယ်သူမှ မသိတဲ့ နေရာမှာ ဝှက်ထားတယ်။ ရက်အနည်းငယ်နေလို့ အဘိုး လမ်းလျှောက်နိုင်ရင် မင်းကို ခေါ်သွားပြီး ဒီအရာကို သွားရှာကြမယ်။”

ယွင်ကျုံးဟဲ့ အံ့ဩသွား၏။ ‘ကျုပ်က အိမ်ရှေ့စံလည်း မဖြစ်သေးဘူး။ ထီးနန်းကိုလည်း မဆက်ခံရသေးဘူးလေ။ ဧကရာဇ် ယုံချီက တာရှအင်ပါယာရဲ့ အဖိုးတန်ရတနာကို ကျုပ်ကို ပေးအပ်တော့ မလို့လား။ အဘိုး ဧကရာဇ်... အဘိုးက ဒီလောက်တောင် လွတ်လပ်ပေါ့ပါးတာလား။ ကျုပ်က တာယင်အင်ပါယာရဲ့ သူလျှို ဖြစ်နေရင် ဘယ်လို လုပ်မလဲ။’

ယွင်ကျုံးဟဲ့ ဆက်ပြောရန် ပြင်လိုက်စဉ် ဧကရာဇ်က ရုတ်တရက် လက်ညှိုး ထောင်ကာ အပြင်ဘက်ကို ညွှန်ပြလိုက်သည်။ ‘လူရောက်လာပြီ။’

အတန်ကြာပြီးနောက် အပြင်ဘက်မှ မိန်းမစိုး တစ်ဦး၏ အသံ ထွက်ပေါ်လာ၏။ “ဧကရာဇ်မင်းမြတ်။ တာယင်အင်ပါယာ သံတမန်အဖွဲ့ ရောက်လာပြီး ဧကရာဇ်မင်းမြတ်ကို တွေ့ခွင့်တောင်းနေတယ်။ ပြီးတော့ သခင်လေး ကိုလည်း တွေ့ခွင့်တောင်းနေပါတယ်။”

ယွင်ကျုံးဟဲ့ မျက်လုံးများ တုန်လှုပ်သွားသည်။ ‘တာယင် ဧကရာဇ်က ဘာအဓိပ္ပာယ်လဲ။ ဒီအချိန်မှာ သံတမန်အဖွဲ့ လွှတ်ပြီး ဧကရာဇ်နဲ့ ယွင်ကျုံးဟဲ့ကို လာတွေ့တာလား။’

အပြင်ဘက်က မိန်းမစိုးကြီးက ပြောလိုက်၏။ “အိမ်ရှေ့စံက သံတမန်အဖွဲ့ကို ဧည့်ခံနေတယ်။ ဧကရာဇ်မင်းမြတ် ဘယ်လို စီစဉ်မလဲလို့ မေးချင်လို့ပါ။”

ဧကရာဇ် ယုံချီက တည်ငြိမ်စွာ ဖြေလိုက်သည်။ “မိုးလည်း ချုပ်နေပြီ။ ငါလည်း ပင်ပန်းနေပြီ။ သခင်လေးလည်း အနားယူဖို့ လိုအပ်တယ်။ အမိန့်တော် ထုတ်ပြန်လိုက်ပါ။ မနက်ဖြန် ညီလာခံကြီး ကျင်းပမယ်။ ငါကိုယ်တိုင် ညီလာခံကို တက်ရောက်ပြီး ကြီးမားတဲ့ အရေးကြီးကိစ္စ တစ်ခုကို ကြေညာမယ်။”

ထိုမိန်းမစိုးကြီးက ဒူးထောက်ကာ ပြောလိုက်၏။ “ကျုပ် အမိန့်တော်အတိုင်း နာခံပါ့မယ်။”

ထို့နောက် သူသည် အိမ်ရှေ့စံထံသို့ အမိန့်တော်ကို သွားရောက် ပို့ဆောင်တော့သည်။

အပိုင်း (၆၉၄)

ဧကရာဇ်၏ အမိန့်တော်ကြောင့် ချက်ချင်းပဲ ကြီးမားသော ဂယက်ရိုက်မှု ထပ်မံ ဖြစ်ပေါ်လာပြန်သည်။

‘ဧကရာဇ်မင်းမြတ်က ညီလာခံ မတက်တာ ကြာလှပြီလေ။ အမြဲတမ်း အိမ်ရှေ့စံကပဲ ညီလာခံကို ကိုယ်စား ဦးဆောင်နေခဲ့တာ။ တစ်နှစ် လောက်တောင် ရှိတော့မယ်။ အခု ဧကရာဇ်မင်းမြတ်က ညီလာခံကို နောက်တစ်ကြိမ် ပြန်တက်တော့မယ် ဟုတ်လား။ ပြီးတော့ ကြီးမားတဲ့ အရေးကြီးကိစ္စ တစ်ခုကိုတောင် ကြေညာအုံးမယ်။ ဘာအရေးကြီး ကိစ္စလဲ။’

ယနေ့ည တာရှ မြို့တော်တွင် လူပေါင်းများစွာ အိပ်မပျော်နိုင် ဖြစ်နေကြ၏။

အချို့က စိတ်လှုပ်ရှားနေကြပြီး။ အချို့က စိုးရိမ်ပူပန်နေကြကာ။ အချို့က ကြောက်ရွံ့နေကြသည်။

မနက်ဖြန် ညီလာခံကြီးတွင် ကြီးမားသော အရေးကြီး ကိစ္စတစ်ခု ဖြစ်ပေါ်လာတော့မည် ဖြစ်ရာ လူတိုင်း မိုးလင်းမည့် အချိန်ကို စောင့်ဆိုင်းနေကြပြီး ညီလာခံကြီး အမြန် ရောက်လာရန် မျှော်လင့်နေကြ၏။

ပိုင်ယင်မြို့စား၊ တာရှန်း မိစ္ဆာနိုင်ငံတော်၏ အခြား အမှောင် သခင်ကြီး ပိုင်ကူ...

ပိုင်ယင်မြို့ မင်းသမီး ပိုင်ဖေးဖေးသည် မြေပြင်ပေါ်တွင် ဒူးထောက်လျက် မလှုပ်မယှက် ရှိနေ၏။ သူမ၏ ခန္ဓာကိုယ် အချိုးအစားမှာ အမြင့်ဆုံး အဆင့်အထိ ဆွဲဆောင်မှုရှိပြီး မိစ္ဆာ ကဲ့သို့သော ဖြားယောင်းမှုများ ပြည့်နှက်နေကာ လူများကို မျက်စိလည် လမ်းမှား ဖြစ်စေနိုင်သည်။

ပိုင်ရွှယ် နှင့် ကျင်းဝူရွမ်း တို့ထက် ပိုင်ဖေးဖေးသည်သာလျှင် အစစ်အမှန် ပိုင်ယင်မြို့၏ ပထမ မင်းသမီး ဖြစ်၏။

ပိုင်ကူက တာယင်အင်ပါယာ ဘက်သို့ ကြည့်ကာ ပြောလိုက်သည်။ “ငါနဲ့ သူရဲ့ သိုင်းပြိုင်ပွဲက အရမ်း နီးကပ်နေပြီ။”

“ဟုတ်ကဲ့ပါ ခမည်းတော်” ပိုင်ဖေးဖေးက ဖြေ၏။

ပိုင်ကူက ပြောလိုက်သည်။ “ဒီတစ်ခါ သိုင်းပြိုင်ပွဲက ငါတို့ ပိုင်ယင်မြို့ရဲ့ ကံကြမ္မာကို အဆုံးအဖြတ် ပေးလိမ့်မယ်။ တာရှန်း မိစ္ဆာနိုင်ငံတော် တစ်ခုလုံးရဲ့ ကံကြမ္မာ ကိုလည်း အဆုံးအဖြတ် ပေးလိမ့်မယ်။ တာရှန်း မိစ္ဆာနိုင်ငံတော် တစ်ခုလုံးမှာ ဧကရာဇ် တစ်ပါးတည်း ပဲ ရှိနိုင်တယ်။ ငါ မဟုတ်ရင် သူပဲ။

ပိရမစ် အပြောင်းအလဲ အပြီးမှာ သူက သေတွင်းထဲ ရောက်မှ ရှင်သန်ခွင့်ရပြီး မျိုးဗီဇ ပြောင်းလဲသွားတယ်။ ငါက သူ့ ပြိုင်ဘက် မဟုတ်တော့မှာကို စိုးရိမ်တယ်။”

ပိုင်ဖေးဖေး၏ လှပသော မျက်လုံးများ တုန်လှုပ်သွားပြီး ပြောလိုက်၏။ “ခမည်းတော်... ကျွန်မတို့ ရှုံးလို့ မရဘူး။ တာရှန်း မိစ္ဆာနိုင်ငံတော်မှာ ဧကရာဇ် တစ်ပါးတည်းပဲ ရှိနိုင်တယ်ဆိုရင် အဲဒီလူက ခမည်းတော်ပဲ ဖြစ်ရမယ်။”

ပိုင်ကူက ပြောလိုက်သည်။ “သူက ယွင်ကျုံးဟဲ့ကြောင့် သေတွင်းထဲ ရောက်မှ ရှင်သန်ခွင့်ရပြီး မျိုးဗီဇ ပြောင်းလဲသွားတာ။ အခု ယွင်ကျုံးဟဲ့က တာရှအင်ပါယာ မြို့တော်မှာ ရှိနေတယ်။ မင်းကို တာရှအင်ပါယာဆီ တစ်ခေါက် သွားခိုင်းချင်တယ်။ ယွင်ကျုံးဟဲ့ကို လျှို့ဝှက် သွားတွေ့ပြီး ကျုပ် သူ့ဆီကနေ ပစ္စည်း တစ်ခု တောင်းချင်တယ်။ ပစ္စည်း တစ်ခု အရောင်းအဝယ် လုပ်ချင်တယ်။”

မင်းသမီး ပိုင်ဖေးဖေးက ပြောလိုက်၏။ “ကောင်းပါပြီ။ သမီးတော်က ခမည်းတော် အတွက် အဲဒီ ပစ္စည်းကို သေချာပေါက် ရအောင် ယူလာပေးပါ့မယ်။”

ပိုင်ကူက ပြောလိုက်သည်။ “ဘာပေးရပေးရ ဂရုမစိုက်နဲ့။ ယွင်ကျုံးဟဲ့ ဆီကနေ အဲဒီ ပစ္စည်းကို ရအောင် ယူခဲ့ရမယ်။ မှတ်ထား။ ဘာပေးရပေးရ ဂရုမစိုက်နဲ့။”

“ကောင်းပါပြီ ခမည်းတော်။ သမီးတော် ဘာပေးရပေးရ ဂရုမစိုက်ဘူး။” မင်းသမီး ပိုင်ဖေးဖေးက ဖြေလိုက်၏။

“ဒါဆို သွားတော့...” ပိုင်ကူက ပြောသည်။

ပိုင်ဖေးဖေး ဒူးထောက်ကာ ပြောလိုက်၏။ “သမီးတော် နှုတ်ဆက်ပါတယ်။”

ထို့နောက် ပိုင်ယင်မြို့၏ ပထမ မင်းသမီးသည် သင်္ဘောတစ်စီး စီးကာ မြောက်ဘက်သို့ တက်သွားပြီး ယွင်ကျုံးဟဲ့ကို ရှာဖွေရန် တာရှအင်ပါယာသို့ ဦးတည် သွားတော့သည်။

နောက်တစ်နေ့...

တာရှအင်ပါယာ၏ လူတိုင်း စောင့်ကြည့်နေကြသော ညီလာခံကြီး စတင်ပြီ ဖြစ်ပြီး တစ်နှစ်ခန့် ကြာပြီးနောက် ဧကရာဇ် ယုံချီသည် နောက်ဆုံးတွင် အရပ်ဖက်၊ စစ်ဖက် အမတ်များ ရှေ့သို့ နောက်တစ်ကြိမ် ပြန်လည် ရောက်ရှိလာပြီး ရွှေရောင် ပလ္လင်ပေါ်တွင် ထိုင်နေ၏။

အရင်က ထိုနေရာတွင် ထိုင်ခဲ့သော အိမ်ရှေ့စံသည် ယခုအခါ ဧကရာဇ်၏ အောက်ဘက်တွင် ပြန်လည် ထိုင်နေရသည်။

တာယင်အင်ပါယာ၏ သံတမန်အဖွဲ့သည် နန်းဆောင် အပြင်ဘက်တွင် ဧကရာဇ်၏ ခေါ်ယူမှုကို စောင့်ဆိုင်းနေကြ၏။

“ဧကရာဇ်မင်းမြတ် သက်တော်ရာကျော် ရှည်ပါစေ။ သက်တော်ရာကျော် ရှည်ပါစေ။ သက်တော်ရာကျော် ရှည်ပါစေ။”

အရပ်ဖက်၊ စစ်ဖက် အမတ်များက သုံးကြိမ် အော်ဟစ်ကာ သုံးကြိမ် ဦးချပြီး ကိုးကြိမ် အရိုအသေ ပေးလိုက်ကြသည်။

ဧကရာဇ် ယုံချီက ပြောလိုက်၏။ “မနေ့က ကျုပ် ပြောခဲ့တယ်။ ဒီနေ့ ကြီးမားတဲ့ အရေးကြီး ကိစ္စ ကြေညာစရာ ရှိတယ်လို့။ စုစုပေါင်း အရေးကြီး ကိစ္စ နှစ်ခု ရှိတယ်။ ပထမ တစ်ခုက ကျုပ် မြေးလေးကို ခေါ်လိုက်...”

မိန်းမစိုးကြီးက အသံကျယ်ကျယ်ဖြင့် အော်ဟစ်လိုက်သည်။ “သခင်လေးကို နန်းဆောင်ထဲ ဝင်ဖို့ ဆင့်ခေါ်ပါတယ်။”

ပြိုင်ဘက်ကင်းအောင် ချောမောလှပသော ယွင်ကျုံးဟဲ့သည် ပိုးသား ဝတ်စုံကို ဝတ်ဆင်ကာ နန်းဆောင် အတွင်းသို့ ဝင်ရောက်လာ၏။

ဤရုပ်ရည်က တကယ်ကို အမြင့်ဆုံး အဆင့်ဖြစ်၏။ သောင်းပုံ တစ်ပုံလို့တောင် ဖော်ပြလို့ မရနိုင်လောက်အောင် ချောမောလှပပြီး မင်းမျိုးမင်းနွယ် အငွေ့အသက် ရှိကာ အလွန် ကြော့ရှင်းလှသည်။

ယွင်ကျုံးဟဲ့က ဧကရာဇ်ကို ဒူးထောက်ကာ ပြောလိုက်၏။ “ဧကရာဇ်မင်းမြတ်ကို ဂါရဝပြုပါတယ်။ ဧကရာဇ်မင်းမြတ် သက်တော်ရာကျော် ရှည်ပါစေ။ သက်တော်ရာကျော် ရှည်ပါစေ။ သက်တော်ရာကျော် ရှည်ပါစေ။”

ဧကရာဇ် ယုံချီက ပြောလိုက်သည်။ “ဒီလူက ယွင်ကျုံးဟဲ့ ပဲ။ သူ့မှာ နောက်ထပ် ကိုယ်ပိုင်အမှတ်အသား တစ်ခု ရှိသေးတယ်။ အဲဒါက ကျုပ်ရဲ့ မြေးတော်၊ အိမ်ရှေ့စံ ထျန်းအန်းရဲ့ သွေးမျိုးဆက် အရင်းအချာပဲ။ ဒီနေ့ တရားဝင် မိသားစုထဲကို ပြန်လည် ဝင်ရောက်လာပြီ။ အမိန့်တော် ပြန်တမ်း ထုတ်ပြန်လိုက်။ ယွင်ကျုံးဟဲ့ကို ရှယန်လို့ နာမည် ပေးလိုက်တယ်။”

ထိုစကားကြောင့် လူတိုင်း ပြင်းထန်စွာ တုန်လှုပ်သွားကြ၏။

‘ရှမင်းမျိုးမင်းနွယ် ထဲကို ပြန်လည် ဝင်ရောက်လာတာက ဘာမှ မဟုတ်ပေမယ့် အဓိကက နာမည် ယန် ဆိုတာပဲ။ တာရှအင်ပါယာက တာ့ယန် မင်းဆက်ရဲ့ တရားဝင် အဆင့်အတန်းကို ဆက်ခံထားတာလေ။ ယန် ဆိုတဲ့ စကားလုံးကို ယွင်ကျုံးဟဲ့ရဲ့ နာမည် အဖြစ် သုံးတယ် ဆိုတာ ဘာအဓိပ္ပာယ်လဲ။

ဒီနာမည်က ဧကရာဇ် အဆက်ဆက်တောင် မယူရဲခဲ့တဲ့ နာမည်ပဲ။ ဧကရာဇ်တွေက လောကကို စည်းလုံး နိုင်မှသာ ရှယန်လို့ နာမည် ပြောင်းကြတာလေ။ အခု ဒီ နာမည်ကို ယွင်ကျုံးဟဲ့ကို ပေးလိုက်တယ် ဟုတ်လား။’

ထို့နောက် ဧကရာဇ် ယုံချီက ဆက်ပြောသည်။ “နောက်ထပ် အမိန့်တော် ပြန်တမ်း တစ်ခု ထုတ်ပြန်လိုက်။ ရှယန်ကို ကျုပ်တို့ တာရှအင်ပါယာရဲ့ ယန်ချင်ဝမ် အဖြစ် ခန့်အပ်လိုက်တယ်။ အမိန့်တော်အတိုင်း မှတ်သားစေ။”

ထိုစကားကြောင့် အရပ်ဖက်နှင့် စစ်ဖက်မှ အရာရှိများ ပို၍ အံ့အားသင့်သွားကြသည်။ ဧကရာဇ်မင်းမြတ်၏ ဤလုပ်ရပ်က ဘာကို ဆိုလိုသနည်း။

ယွင်ကျုံးဟဲ့ ကဲ့သို့ ဇာစ်မြစ်မသေချာသောသူကို တော်ဝင်မိသားစုဝင်အဖြစ် အသိအမှတ်ပြုခြင်းသည်ပင် လွန်နေပြီဖြစ်ကာ ရှယန် ဟု အမည်ပေးလိုက်ခြင်းက ပို၍ပင် ယုတ္တိမတန်လှပေ။ ယခုမူ သူ့ကို ယန်ချင်ဝမ် အဖြစ်ပင် ဘွဲ့ပေးလိုက်သေးသည်။

အထူးသဖြင့် ဤနေရာတွင် ရှိနေသော တော်ဝင်မိသားစုဝင် အချို့မှာမူ ပို၍ပင် ဒေါသထွက်လုမတတ် ဖြစ်သွားကြ၏။

ဧကရာဇ်မင်းမြတ်တွင် သားအရင်း ဆယ်ယောက်ကျော်ရှိသည့်အနက် ရှစ်ဆယ်ရာခိုင်နှုန်းခန့်မှာ မင်းသားဘွဲ့ပင် မရရှိကြသေးပေ။ မြေးတော် ရာနှင့်ချီရှိသည့်အနက် မည်သူမှ မင်းသားဘွဲ့ မရသေးပေ။

ယခု ယွင်ကျုံးဟဲ့သည် တာရှအင်ပါယာသို့ ပြန်ရောက်ကာစမျှသာ ရှိသေးပြီး မည်သည့်စွမ်းဆောင်ရည်မှ မပြရသေးဘဲ မင်းသားဘွဲ့ကို ရရှိသွားခဲ့၏။ ထို့အပြင် ယန်ချင်ဝမ်ဘွဲ့လည်း ဖြစ်နေသေးသည်။

ယန်ချင်ဝမ် ဘွဲ့ကို ဤအတိုင်း လွယ်လွယ်ကူကူ ပေး၍ရသည်လား။ တာရှအင်ပါယာသည် တာ့ယန် မင်းဆက်ကို ဆက်ခံထားခြင်းဖြစ်ကြောင်း မည်သူက မသိဘဲ နေမည်နည်း။

တာရှအင်ပါယာ၏ နှစ်တစ်ထောင် သမိုင်းတစ်လျှောက် မည်သည့်ဧကရာဇ်မှ ယန်ချင်ဝမ်ဘွဲ့ကို မပေးရဲခဲ့ပေ။ ဤမင်းသားဘွဲ့သည် အခြားမင်းသားဘွဲ့အားလုံး၏ အထက်တွင် ရှိနေသည် မဟုတ်ပါလား။

နှစ်တစ်ထောင် သမိုင်းတစ်လျှောက် တာရှအင်ပါယာ၏ အမြင့်ဆုံးမင်းသားဘွဲ့မှာ ယန်ချင်ဝမ် ဖြစ်သည်။ အကြောင်းမှာ တာရှအင်ပါယာ၏ မြို့တော်ကိုလည်း ယန်ကျင်း ဟု ခေါ်ဆိုသောကြောင့် ဖြစ်သည်။

တာရှမင်းဆက် နှစ်ဆက်တွင် ယန်ချင်ဝမ် သုံးပါးသာပေါ်ထွက်ခဲ့ဖူးပြီး နှစ်ပါးမှာ ဧကရာဇ် ဖြစ်လာခဲ့ကြ၏။ ယခု ဧကရာဇ်က ယန်ချင်ဝမ် တစ်ပါးကို ခန့်အပ်လိုက်ခြင်းသည် တစ်လောကလုံးကို မည်သည့်အချက်ပြမှု ပေးချင်နေသနည်း။ ယွင်ကျုံးဟဲ့တွင် မည်သည့် အရည်အချင်းနှင့် စွမ်းရည်များ ရှိနေ၍ ဖြစ်သနည်း။

ခဏမျှ တိတ်ဆိတ်သွားပြီးနောက် အရာရှိများ အတန်းလိုက် ဒူးထောက်ကျသွားကြ၏။ “ဧကရာဇ်မင်းမြတ်.. သေချာ စဉ်းစားတော်မူပါ။”

“ဧကရာဇ်မင်းမြတ်... အမိန့်တော်ကို ပြန်လည်ရုပ်သိမ်းပေးတော်မူပါ။”

ခန်းမအတွင်းရှိ အရာရှိအားလုံးနီးပါး ဒူးထောက်လိုက်ကြသော်လည်း ဆယ်ယောက်ခန့်သာ မတ်တတ်ရပ် နေကြသည်။ ၎င်းတို့အားလုံးမှာ အိမ်ရှေ့စံ ထျန်းအန်း၏ နောက်လိုက်ဟောင်းများ ဖြစ်ကြပြီး ယခုအခါ ယွင်ကျုံးဟဲ့ကို အခိုင်အမာ ထောက်ခံသူများ ဖြစ်လာကြသည်။

သို့ပေမည့် ခန်းမအတွင်းရှိ အရာရှိ ၉၉ ရာခိုင်နှုန်းက ဧကရာဇ်ကို ပြင်းထန်စွာ ဆန့်ကျင်နေကြ၏။

ခဏအကြာတွင် ဆံပင်နှင့် မုတ်ဆိတ်များ ဖြူဖွေးနေသော အဘိုးအိုတစ်ဦး ထွက်လာသည်။ ၎င်းမှာ တာရှအင်ပါယာ၏ တော်ဝင်တရားရုံး အကြီးအကဲ၊ လီချင်ဝမ် ပင် ဖြစ်သည်။

သူသည် ဧကရာဇ် ယုံချီထက် တစ်နှစ်သာ ကြီးသော်လည်း မျိုးဆက်အရ တစ်ဆက်ကြီးကာ ဘထွေးတော် ဖြစ်သည်။ ဤသည်မှာ ပုံမှန်အခြေအနေဖြစ်ပြီး တော်ဝင်တရားရုံး အကြီးအကဲရာထူးကို တော်ဝင်မိသားစုမှ လူကြီးသူမများကသာ တာဝန်ယူလေ့ရှိ၏။

“ဧကရာဇ်မင်းမြတ်၊ အမိန့်တော်ကို ပြန်လည်ရုပ်သိမ်းပေးရန် တောင်းဆိုပါတယ်။”

တော်ဝင်တရားရုံး အကြီးအကဲ လီချင်ဝမ်က ပြောလိုက်သည်။ “ပထမအချက်... ဒီယွင်ကျုံးဟဲ့ဆိုတာ တာယင်အင်ပါယာ၊ ဟေးလုံထိုင်ကနေ လာသူတစ်ယောက်ဖြစ်တယ်။ ဒုတိယအချက်အနေနဲ့ သူဟာ အိမ်ရှေ့စံ ထျန်းအန်းရဲ့ သွေးသား ဟုတ်၊ မဟုတ် ဆိုတာကို စစ်ဆေးဖို့ကလည်း အလွန်ခက်ခဲနေတယ်။ တတိယအချက်ကတော့ သူဟာ ဘာစွမ်းဆောင်ရည်မှ မရှိဘဲနဲ့ ရုတ်တရက် မင်းသားဘွဲ့ကို ရရှိသွားတာဟာ တစ်လောကလုံးရဲ့ ဝေဖန်မှုကို ခံရနိုင်တဲ့ အကြောင်းရင်းတစ်ခု ဖြစ်နေပါတယ်။”

ဤတော်ဝင်တရားရုံး အကြီးအကဲသည် ယွင်ကျုံးဟဲ့၏ ဇာစ်မြစ်ကို တိုက်ရိုက် မေးခွန်းထုတ်လိုက်ပြီး သူသည် တာရှအင်ပါယာ၏ မြေးတော် မဟုတ်ကြောင်း ပြောဆိုလိုက်၏။

ခေါင်းဆောင်ရှိလာသောကြောင့် ခန်းမအတွင်းရှိ အမတ်များကလည်း ဒူးထောက်ကာ ပြောဆိုလိုက်ကြသည်။ “ဧကရာဇ်မင်းမြတ်... သေချာစဉ်းစားတော်မူပါ။ ယွင်ကျုံးဟဲ့ရဲ့ ဇာစ်မြစ်က မသေချာပါဘူး။ သူဟာ တကယ်ပဲ မြေးတော်အစစ် ဟုတ်၊ မဟုတ်ကို ဘယ်သူက သက်သေပြနိုင်မှာလဲ။”

“ဧကရာဇ်မင်းမြတ်၊ သေချာစဉ်းစားတော်မူပါ။ ဒီယွင်ကျုံးဟဲ့ဆိုတာ သူလျှိုတစ်ယောက် ဖြစ်နိုင်ပြီး တာယင်အင်ပါယာရဲ့ အကောက်ကြံမှုတစ်ခုသာ ဖြစ်နေနိုင်ပါတယ်။”

“ဧကရာဇ်မင်းမြတ်... ကျုပ် လျှောက်တင်စရာ ရှိပါတယ်။” လီထိုက်အာ ထွက်လာကာ ပြောလိုက်၏။

ဧကရာဇ်က ခွင့်ပြုလိုက်သည်။ “ပြောပါ။”

လီထိုက်အာက ပြောလိုက်၏။ လီချင်ဝမ်... ခင်ဗျား အသက်ကြီးပြီး မျက်စိမှုန်နေပြီလား။ ယန်ချင်ဝမ်က အိမ်ရှေ့စံ ထျန်းအန်း၏ သွေးသားဖြစ်ကြောင်း ခိုင်လုံသော သက်သေအထောက်အထားများ ရှိနေပါလျက် ခင်ဗျားက ငြင်းဆိုနေသေးတယ်။

အခု အသက်ရှစ်ဆယ်ကျော် အမတ်ဟောင်းများ သိပ်မကျန်တော့သော်လည်း လုံးဝ မရှိတော့တာတော့ မဟုတ်ဘူး။ ဒါကြောင့် ယခင်ဧကရာဇ်ရဲ့ ရုပ်သွင်ကို အားလုံးမှတ်မိကြသေးတယ် မဟုတ်လား။ ကိုယ့်ကိုယ်ကိုယ် ပြန်မေးကြည့်ကြပါ။

အရင်ဧကရာဇ်ရဲ့ ပုံတူပန်းချီကားကို ကြည့်ပြီး ရှယန်က အရင်ဧကရာဇ်နှင့် အလွန်တူကြောင်း ကျိန်ဆိုရဲသလား။ အရင်ဧကရာဇ်ရဲ့ ပုံတူပန်းချီကားက အားလုံးရှေ့မှာ ရှိနေတယ်။ သေသေချာချာ စစ်ဆေးကြည့်ကြပါ။”

အားလုံးက ရွှေရောင်ပလ္လင်နောက်ရှိ ပုံတူပန်းချီကားကို ကြည့်လိုက်ကြသည်။ ထိုအရာမှာ ယခင်ဧကရာဇ် ရှောင်ကျုံး၏ ပုံတူပန်းချီကား ဖြစ်သည်။

ဤပန်းချီကားကို ဧကရာဇ် ယုံချီ ကိုယ်တိုင် ရေးဆွဲခဲ့ခြင်း ဖြစ်သည်။ ဤဧကရာဇ်၏ လက်ရေးလှနှင့် ပန်းချီပညာသည် အလွန်အံ့မခန်း ဖြစ်၏။

ထို့အပြင် သူသည် ငယ်စဉ်တည်းက ယခင်ဧကရာဇ်၏ မေတ္တာကို ခံစားခဲ့ရပြီး ယခင်ဧကရာဇ် နတ်ရွာ စံပြီးနောက် ဧကရာဇ် ယုံချီသည် အလွန်လွမ်းဆွတ်နေခဲ့သည်။

ထို့ကြောင့် ယခင်ဧကရာဇ်၏ ပုံတူပန်းချီကားကို ကြည့်ကာ လွမ်းဆွတ်မှုကို ဖြေဖျောက်ခဲ့သော်လည်း ပန်းချီဆရာများ၏ လက်ရာကို အားမလို အားမရဖြစ်ကာ သူကိုယ်တိုင် ယခင်ဧကရာဇ်၏ ပုံတူကို ရေးဆွဲခဲ့ခြင်း ဖြစ်၏။

ဤပန်းချီကားကို မြင်ဖူးသူတိုင်းက ဧကရာဇ် ယုံချီသည် အလွန်တူအောင် ရေးဆွဲထားကြောင်း၊ ယခင်ဧကရာဇ်၏ ကြင်နာမှုနှင့် ခမ်းနားမှုကို အပြည့်အဝ ဖော်ပြနိုင်ကြောင်း ယူဆကြသည်။

လီထိုက်အာက မေးလိုက်၏။ “အားလုံး သေချာ ကြည့်ကြပါ။ ယန်ချင်ဝမ်နှင့် ယခင်ဧကရာဇ်က မတူညီဘူးလား။”

ခန်းမအတွင်းရှိ လူများက ပန်းချီကားကို တစ်လှည့်၊ ယွင်ကျုံးဟဲ့ကို တစ်လှည့် ကြည့်လိုက်ကြသည်။

တကယ်တမ်း ပြောရလျှင် အတော်လေး တူညီသည်။ ပြီးတော့ ကြည့်လေလေ ပိုတူလေလေ ဖြစ်နေ၏။

အမှန်တကယ်၌ အရင်က ယွင်ကျုံးဟဲ့သည် ယခင်ဧကရာဇ် ရှောင်ကျုံးနှင့် မတူပေ။ ထိုစဉ်က သူသည် အလွန်ဆွဲဆောင်မှုရှိပြီး မိစ္ဆာဆန်ကာ ပေါ့ပျက်ပျက်နိုင်လွန်းသည်။

သို့ပေမည့် အစ်ကိုဖြစ်သူ အောက်ယွီအဖြစ် ဆယ်နှစ်ကြာ ဟန်ဆောင်ခဲ့ပြီးနောက် ပြန်လည်ပိန်ကျလာကာ မူလပုံစံသို့ ပြန်ရောက်လာချိန်မှာတော့ သူ၏ ကိုယ်ရည်ကိုယ်သွေးသည် လုံးဝပြောင်းလဲသွားခဲ့သည်။ ထို့ကြောင့် ယခင်ဧကရာဇ် ရှောင်ကျုံးနှင့် ဆင်တူနေခြင်း ဖြစ်၏။