အခန်း ၆၃

အပိုင်း(၆၃) ကမ္ဘာပျက်ကပ်သုံး ပစ်ကပ်ကားကို ပထမဆုံး စမ်းသပ်ခြင်း

"မနေ့ညက သတင်းတစ်ခုခုများ ကြားရသေးလား"

ခေါင်းဆောင်ချူက လက်ဖက်ရည်ကြမ်း တစ်ခွက်ကို ကိုင်ကာ တဲအိမ်ပြတင်းပေါက်နားတွင် ရပ်နေပြီး မလှမ်းမကမ်း၌ အလုပ်ရှုပ်နေသော ချန်းရီကို လှမ်းကြည့်နေ၏။

ချန်းရီက သူ့ဘက်သို့ လှမ်းကြည့်လာသည့်အခါ ခေါင်းဆောင်ချူက လက်ထဲမှ ခွက်ကို မြှောက်ပြကာ အသိအမှတ်ပြု နှုတ်ဆက်လိုက်သည်။

ချန်းရီ၏ ထိုကားနှင့် ပတ်သက်၍ ခေါင်းဆောင်ချူက အတော်လေး အံ့အားသင့်နေမိသည်။

မနေ့ညကအထိ စုတ်ပြတ်သတ်နေသော သုံးဘီးဆိုင်ကယ် တစ်စီးသာ ဖြစ်နေသေးသော်လည်း တစ်ညတည်းနှင့် ကမ္ဘာပျက်ကပ်သုံး ပစ်ကပ်ကားကြီး တစ်စီးအဖြစ်သို့ ပြောင်းလဲသွားခဲ့ချေပြီ။

သံသယ မဝင်ဘူးဆိုလျှင် ခေါင်းဆောင်ချူ တစ်ယောက် ဤခေါင်းဆောင်နေရာတွင် မြဲမြံစွာ ထိုင်နိုင်မည် မဟုတ်ပေ။

ထို့ပြင် ခိုးနားထောင်သည့် ရေဒီယိုကို ပိုင်ဆိုင်ထားသော ခေါင်းဆောင်တစ်ယောက် ဖြစ်သည်နှင့်အညီ ယာဉ်တန်းထဲရှိ မည်သည့် လျှို့ဝှက်ချက်မျှ သူ၏ နားကို မလွတ်ကင်းနိုင်ပေ။

"ဘာထူးဆန်းတဲ့ အသံမှ မကြားရပါဘူး"

"ထူးဆန်းတယ်... ထူးဆန်းတယ်"

ရေဒီယိုထဲမှ ကျောချမ်းဖွယ်ကောင်းသော အသံတစ်သံ ထွက်ပေါ်လာသည်။

စနစ်၏ အဆင့်မြှင့်တင်မှုက မည်သည့် အသံမျှ ထွက်ပေါ်စေခြင်း မရှိဘဲ အဆင့်မြှင့်တင်မှု ပြီးဆုံးသွားသည့် နောက်ဆုံးအချိန်လေးတွင်သာ အဆင့်မြှင့်တင်ခံရသည့် အရာဝတ္ထုက မျက်တောင်တစ်ခတ်စာမျှ ဝါးတားတား ဖြစ်သွားခြင်းမျိုးသာ ရှိသည်။

ထို့ကြောင့် ခိုးနားထောင်သည့် ရေဒီယိုက စနစ်နှင့် ပတ်သက်သည့် သတင်းအချက်အလက်များကို မကြားနိုင်ခဲ့ခြင်း ဖြစ်သည်။

ဤကဲ့သို့သော ကိစ္စမျိုး ဖြစ်ပွားခဲ့သည်မှာ ပထမဆုံးအကြိမ် မဟုတ်တော့ပေ။

ခိုးနားထောင်သည့် ရေဒီယိုပင်လျှင် မသိနိုင်သော လျှို့ဝှက်ချက်ကို တွေးမိလိုက်တိုင်း ခေါင်းဆောင်ချူ၏ တစ်ကိုယ်လုံးရှိ ဆဲလ်များအားလုံး စိတ်လှုပ်ရှားစွာဖြင့် နိုးကြားလာသကဲ့သို့ ခံစားရသည်။

လမ်းစဉ်အသစ်တစ်ခုရဲ့ အစွမ်းပိုင်ရှင် ဖြစ်နေလို့များလား။

မက္ကန်းနစ် လမ်းစဉ်က သာမန်မဟုတ်တဲ့လမ်းစဉ်များလား။

ယုံစရာ အကြောင်းကို မရှိပေ။

"ဟားဟား... ကြည့်ရတာ ဒီကောင်လေးဆီမှာ ကြီးမားတဲ့ လျှို့ဝှက်ချက်တွေ ရှိနေတာ သေချာတယ်"

"ဒါပေမဲ့... လျှို့ဝှက်ချက်ရှိနေတော့ရော ဘာဖြစ်လဲ"

"ဒီယာဉ်တန်းထဲမှာ လျှို့ဝှက်ချက် မရှိတဲ့သူ ဘယ်သူရှိလို့လဲ"

"ဒါပေမဲ့... ငါသိထားတဲ့ လျှို့ဝှက်ချက်တွေလောက် ဘယ်သူကများ ပိုသိထားလို့လဲ"

"စိတ်ဝင်စားစရာပဲ"

ချန်းရီ၏ လျှို့ဝှက်ချက်နှင့် ပတ်သက်၍ ခေါင်းဆောင်ချူက လုံးဝ ဂရုမစိုက်ကြောင်း ပြသနေသည်။

သို့သော် သူ၏ စပ်စုချင်စိတ်ကသာ ခေါင်းဆောင်ချူကို မနေနိုင် မထိုင်နိုင် ဖြစ်စေခဲ့သည်။

ခေါင်းဆောင်ချူ အလေးထားသည်မှာ လျှို့ဝှက်ချက်များကို ခိုးနားထောင်ရသည့် ရောဂါရနေသော သာယာမှုမျိုးကိုသာ ဖြစ်သည်။

လျှို့ဝှက်ချက် နောက်ကွယ်မှ ကိုယ်စားပြုနေသော အရာများကို ရယူလိုခြင်းမျိုး မဟုတ်ပေ။

ချန်းရီ၏ လျှို့ဝှက်ချက်မှာ သေးငယ်မည် မဟုတ်မှန်း သိထားသော်လည်း ခေါင်းဆောင်ချူက ချန်းရီအား အတင်းအကျပ် ထုတ်ဖော်ခိုင်းရန် အစီအစဉ် မရှိခဲ့ပေ။

ကမ္ဘာပျက်ကပ်ကြီးထဲတွင် လျှို့ဝှက်ချက် မရှိသူ မည်သူ ရှိမည်နည်း။

ပန်းရောင်ဆံပင်နှင့် ခြေတံရှည်ကောင်မလေးဖြစ်လို အရက်စွဲနေသော ကျောင်းသူလေးပဲဖြစ်ဖြစ်၊ ထုံအအ သံမဏိခြင်္သေ့ကြီးပဲဖြစ်ဖြစ် သို့မဟုတ် သူကိုယ်တိုင်ပဲဖြစ်ဖြစ်ပင်။

လူတိုင်းတွင် ကိုယ်ပိုင် လျှို့ဝှက်ချက်များ ရှိကြစမြဲပင်။

သာမန် အသက်ရှင်ကျန်ရစ်သူများတွင်ပင် သူတို့၏ ကိုယ်ပိုင် လျှို့ဝှက်ချက်များ ရှိနေကြသည်။

သို့သော်... မည်သူ၏ လျှို့ဝှက်ချက်ကမျှ ခေါင်းဆောင်ချူ သိထားသည့် လျှို့ဝှက်ချက်လောက် မများပြားပေ။

...

သာမန်ထက် သာလွန်သော ခန္ဓာကိုယ် ကြံ့ခိုင်မှုကြောင့် ချန်းရီက တာယာတစ်လုံးကို အလျင်အမြန် တပ်ဆင်လိုက်နိုင်ပြီး နောက်တစ်လုံးကို ဆက်လက် တပ်ဆင်နေသည်။

အချိန်သိပ်မကြာလိုက်ဘဲ တာယာလေးလုံးစလုံးကို တပ်ဆင်ပြီးသွားလေသည်။

တာယာများ တပ်ဆင်ပြီးသွားသော ကမ္ဘာပျက်ကပ်သုံး ပစ်ကပ်ကားကြီးသည် နာနာနှင့် ခေါင်းဆောင်ချူတို့၏ အဆင့်မြှင့်တင်ထားသော လမ်းကြမ်းမောင်းကားများနှင့် ယှဉ်လျှင်ပင် အနည်းငယ်မျှ သိမ်ငယ်သွားခြင်း မရှိပေ။

အပြင်ပန်း အသွင်အပြင်ကိုသာ ကြည့်မည်ဆိုလျှင် ထိုကားများထက်ပင် အနည်းငယ် ပိုကြီးနေသေးသည်။

ကားအလျားက (၂၁) ပေခန့် ရှိပြီး ကားအကျယ်က ရှစ်ပေခန့်အထိ ရှိလေသည်။

ကြည့်ရသည်မှာ သဲကန္တာရ လမ်းမကြီးပေါ်တွင် ဝပ်နေသော သားရဲကြီး တစ်ကောင်နှင့်ပင် တူနေတော့သည်။

ထိုလုပ်ငန်းစဉ် တစ်ခုလုံးတွင် ရှုလီနာက ချန်းရီ၏ ဘေး၌ အသံတိတ် ကူညီပေးနေခဲ့ပြီး သူမ လုံးဝ မရှိနေသကဲ့သို့ စကားတစ်ခွန်းမျှပင် မဟခဲ့ပေ။

ဒုတိယမြောက် တာယာကို တပ်ဆင်သည့် အချိန်တွင် ဤအမျိုးသမီးက ချန်းရီ သတိပေးရန်ပင် မလိုအပ်တော့ဘဲ ချန်းရီ လက်လှမ်းလိုက်သည်နှင့် ဘာလိုအပ်နေသလဲ ဆိုတာကို သူမက အလိုလို သိနေခဲ့သည်။

သူ့ရှေ့ရှိ ကမ္ဘာပျက်ကပ်သုံး ပစ်ကပ်ကားကြီးကို ကြည့်ရင်း ချန်းရီက အလွန် စိတ်ကျေနပ်နေသည်။

ဘောင်းဘီအိတ်ကပ်ထဲမှ ဆေးလိပ်ဘူးကို နှိုက်ယူကာ တာဇီးဆေးလိပ်တစ်လိပ်ကို ဆွဲထုတ်လိုက်သည်။

မီးခြစ်ကို နှစ်ချက်ခန့် ခြစ်လိုက်သော်လည်း မီးက တောက်မလာခဲ့ပေ။

အဝါရောင် သဲမှုန့်များကို သယ်ဆောင်လာသော လေပြေတစ်ချက်က တိုက်ခတ်လာပြီး မီးခြစ်၏ မီးတောက်ငယ်ကို ငြိမ်းသတ်သွားလေသည်။

ရုတ်တရက် မွှေးပျံ့သော ရနံ့တစ်ခု နီးကပ်လာသည်ကို ခံစားလိုက်ရပြီး ခေါင်းမော့ကြည့်လိုက်ရာ သူ့ရှေ့ရှိ အမျိုးသမီးက သူမ၏ အပေါ်ဝတ်အင်္ကျီကို ဖြန့်ကာ လေကာပေးထားသည်ကို တွေ့လိုက်ရ၏။

နံနက်ခင်းဖြစ်သဖြင့် လေထုက အနည်းငယ် အေးစိမ့်နေဆဲ ဖြစ်ရာ ထိုအမျိုးသမီးက လေကာအင်္ကျီ အရှည်တစ်ထည်ကို ဝတ်ဆင်ထားပြီး အတွင်းဘက်တွင် ခန္ဓာကိုယ်နှင့် အံဝင်ခွင်ကျဖြစ်သော လည်ပင်းရှည် အနက်ရောင် တီရှပ်ကို ဝတ်ဆင်ထားကာ အောက်ပိုင်းတွင်လည်း တင်းကျပ်သော ဂျင်းဘောင်းဘီကို ဝတ်ဆင်ထားသည်။

သူမက အသေအချာ ဂရုတစိုက် ပြင်ဆင်ထားကြောင်း အထင်အရှားပင်။

အကျိုး ညီအစ်မအစားကျနလှသော ခန္ဓာကိုယ် ကောက်ကြောင်းများက ချန်းရီ၏ မျက်စိရှေ့တွင် ပေါ်လွင်နေလေသည်။

ချန်းရီ၏ အကြည့်ကို မြင်လိုက်ရသောအခါ ထိုအမျိုးသမီး၏ မျက်နှာက အနည်းငယ် နီရဲသွားပြီး မျက်နှာလွှဲသွားကာ ချန်းရီကို မကြည့်ရဲတော့ပေ။

ထိုအချိန်က သူတို့နှစ်ဦး၏ အမူအရာများမှာ ဗီဒီယိုတိုများထဲမှ နာမည်ကြီး ဇာတ်ဝင်ခန်း တစ်ခုနှင့်ပင် တူနေတော့သည်။

ဒီလောက်ရက်တွေ အကြာကြီး ရေမကျိုး ညီအစ်မထားဘဲနှင့် ဤအမျိုးသမီး၏ ခန္ဓာကိုယ်မှ အနံ့အသက်ဆိုးများ မထွက်သည်မှာ တကယ်ကို အံ့ဩစရာပင်။

ဆေးလိပ်မီး ညှိပြီးသွားသောအခါ အမျိုးသမီးက အင်္ကျီကို ပြန်ရုပ်သိမ်းလိုက်ပြီး နီရဲနေသော မျက်နှာဖြင့် အဝေးရှိ တိမ်နီများကို လှည့်ကြည့်နေသည်။

ဤမျှလောက် သေးငယ်သော ဆွဲဆောင်မှုလေးက ချန်းရီအား မည်သည့် အလွန်အကျွံ အပြုအမူကိုမျှ လုပ်ဆောင်စေခြင်း မရှိခဲ့ပေ။

ဆေးလိပ်တစ်လိပ် ကုန်အောင်ပင် မသောက်ရသေးခင် ချန်းရီက ဆေးလိပ်ကို ပါးစပ်တွင် ခဲထားရင်း အင်ဂျင်ကို စတင် တပ်ဆင်တော့သည်။

ဤကမ္ဘာပျက်ကပ်သုံး ပစ်ကပ်ကားကြီးသည် လောင်စာဆီနှင့် လျှပ်စစ်စွမ်းအင် နှစ်မျိုးစလုံးကို အသုံးပြုနိုင်သော စနစ်ကို အသုံးပြုထားသည်။

လျှပ်စစ်မောင်းနှင်မှုစနစ်တွင် ယခင် မီနီကားလေး၏ မြင်းကောင်ရေ (၂၇) ကောင်အားရှိသော အင်ဂျင်ကို အသုံးပြုထားပြီး ဘက်ထရီတွင် လျှပ်စစ်စွမ်းအင် (၁၀) ယူနစ်ခန့် သိုလှောင်နိုင်စွမ်း ရှိသည်။

အကယ်၍ နေရောင်ခြည်စွမ်းအင်သုံး အားသွင်းပြားများကို အသုံးပြု၍ ဤကဲ့သို့သော ကားဘက်ထရီကို အားအပြည့်သွင်းရန် ကြိုးစားမည်ဆိုလျှင် အခြေခံအားဖြင့် မဖြစ်နိုင်သလောက်ပင်။

နေရောင်ခြည် ကောင်းကောင်းရသော အခြေအနေမျိုးတွင်ပင် ရက်ပေါင်းဆယ်ကျော် သို့မဟုတ် ရက်ပေါင်းများစွာ ကြာမြင့်နိုင်ပေသည်။

ထို့ကြောင့် အပြင်ဘက်တွင် နေရောင်ခြည်စွမ်းအင်သုံး အားသွင်းပြားများဖြင့် အားသွင်းရန် ချန်းရီ ယခင်က စဉ်းစားထားခဲ့သော အစီအစဉ်အတွက် အားသွင်းပြားများကို အဆင့်မြှင့်တင်ရန်က မရှိမဖြစ် လိုအပ်ချက် ဖြစ်နေသည်။

သေချာပေါက် ဒါက နောင်မှ စဉ်းစားရမည့် ကိစ္စဖြစ်သည်။

ယခုလောလောဆယ် လုပ်ရမည့်အရာမှာ ဤ ၂.၀ အင်ဂျင်ကို တပ်ဆင်ရန်ပင် ဖြစ်သည်။

စနစ်က အရှေ့ဘက် အင်ဂျင်ခန်းထဲတွင် တပ်ဆင်ရန် နေရာနှင့် လိုအပ်သော အခြေအနေအားလုံးကို ကြိုတင် ပြင်ဆင်ပေးထားပြီး ဖြစ်သည်။

စနစ်၏ လမ်းညွှန်မှုအတိုင်း ချန်းရီက ဤအင်ဂျင်ကို အလွန် လွယ်ကူစွာပင် တပ်ဆင်နိုင်ခဲ့သည်။

ချန်းရီက စိတ်လှုပ်ရှားစွာဖြင့် ကားတံခါးကိုဖွင့်ကာ ယာဉ်မောင်းခန်းထဲသို့ ဝင်ထိုင်လိုက်သည်။

ယာဉ်မောင်းခန်းအတွင်း၌ မီနီကားလေး၏ မူလ ဒက်ရှ်ဘုတ်မှလွဲ၍ စတီယာရင် တစ်ခုသာ ရှိလေသည်။

ရေဒီယို၊ အသံလွှင့်စက်၊ ထိုင်ခုံ အပူပေးစနစ်၊ အလိုအလျောက် လေဝင်လေထွက်စနစ် စသည်ဖြင့်...

ဘာဆိုဘာမှ မရှိပေ။

ကားတစ်စီးလုံးကလည်း မန်နျူရယ်ဂီယာ စနစ်သာ ဖြစ်သည်။

ထိုင်ခုံများကိုလည်း လက်ဖြင့်သာ ချိန်ညှိရသည်။

မန်နျူရယ်ဂီယာနှင့် ပတ်သက်၍ ချန်းရီက မကျွမ်းကျင်သော်လည်း မောင်းတော့ မောင်းနိုင်ပေသည်။

ပြတင်းပေါက်များကိုပင် လက်ဖြင့် လှည့်၍ ဖွင့်ရသော မှန်တင်မှန်ချစနစ်ကို အသုံးပြုထားသည်။

ဤအရာအားလုံးမှာ သတ်ဖြတ်မှတ်များကို ချွေတာရန်အတွက်ပင် ဖြစ်သည်။

ကားမီးလုံးပင်လျှင် ယခင် သုံးဘီးဆိုင်ကယ်တွင် တပ်ဆင်ထားသော မီးလုံးတစ်လုံးတည်းသာ ပါရှိသည်။

ဤရှုထောင့်မှ ကြည့်လျှင် ချန်းရီနှင့် အနည်းငယ် တူနေသည်။ လူရော ကားပါ မျက်လုံးတစ်ဖက်တည်းသာ ရှိနေသောကြောင့်ပင်။

ကားက တုန်ခါသွားပြီးနောက် ဟိန်းဟောက်သံ ထွက်ပေါ်လာသောအခါ...

ချန်းရီ၏ နှုတ်ခမ်းထောင့်များက နားရွက်အထိပင် ကွေးတက်သွားလေသည်။

မျက်နှာပေါ်ရှိ အပြုံးများကို မည်သို့မျှ ဖုံးကွယ်ထား၍ မရနိုင်တော့ပေ။

အပြင်အဆင်များက ရိုးရှင်းလွန်းပြီး အနိမ့်ဆုံးအဆင့် ဖြစ်နေသော်လည်း ကားထဲတွင် ထိုင်နေရသော ချန်းရီမှာမူ ဖော်ပြ၍ မရနိုင်သော ကျေနပ်မှုကို ခံစားနေရသည်။

အစကတည်းက သူက ဤယာဉ်တန်းထဲတွင် နောက်ဆုံးမှ လိုက်ရသူ ဖြစ်ခဲ့သည်။

နေရာပြောင်းရွှေ့တိုင်း သူက ယာဉ်တန်း၏ အနောက်ဆုံးမှနေ၍ ယိုင်တိယိုင်တိုင်ဖြင့် လိုက်ပါခဲ့ရစမြဲ ဖြစ်သည်။

အင်ဂျင်၏ ဟိန်းဟောက်သံက အခြားသူများ၏ အာရုံကို ဆွဲဆောင်သွားခဲ့ပြီ ဖြစ်သည်။

"အို... အစ်ကိုရီ... အစ်ကို တကယ်တော်တာပဲနော်... တစ်ညတည်းနဲ့ ဒီလောက် အကောင်ကြီးကြီး ထွက်လာအောင် လုပ်နိုင်ခဲ့တာပဲ"

"ဟင်... ဒါက... အရင် မီနီကားလေးလား"

ရှားရှားပါးပါး အမူးပြေနေသော ပန်းရောင်ဆံပင်နှင့် ခြေတံရှည်ကောင်မလေးက ချန်းရီ၏ ကားရှေ့သို့ လျှောက်လာပြီး ခန့်ညားထည်ဝါလှသော ကားကြီးကို လက်ဖြင့် စမ်းသပ်ကာ ပါးစပ်မှလည်း အဆက်မပြတ် ချီးကျူးစကားများ ဆိုနေသည်။

ခြေတံရှည်ကောင်မလေး တစ်ယောက်တည်း အံ့ဩနေခြင်း မဟုတ်ပေ။

ဘေးနားသို့ ဝိုင်းအုံလာကြသော အသက်ရှင်ကျန်ရစ်သူများ၏ မျက်လုံးများတွင်လည်း အရောင်များ တောက်ပနေကြသည်။

ဤကဲ့သို့သော ကမ္ဘာပျက်ကပ်ကြီးထဲတွင် ခြေလျင်လျှောက်စရာ မလိုဘဲ စီးနင်းနိုင်မည့် ကားတစ်စီးကို မည်သူက မလိုချင်ဘဲ နေမည်နည်း။

ထို ကျိုး ညီအစ်မ ညီအစ်မ နှစ်ယောက်ကိုသာ ကြည့်လိုက်။

သူတို့ ညီအစ်မနှစ်ယောက်တွင် ထိုလူစီးကားလေး တစ်စီး ရှိနေခြင်းကြောင့်ပင် သူတို့၏ နေထိုင်မှုအဆင့်အတန်းက အခြား အသက်ရှင်ကျန်ရစ်သူများနှင့် ယှဉ်၍ မရနိုင်လောက်အောင် ကွာခြားနေသည်။

ချန်းရီ၏ ဤကမ္ဘာပျက်ကပ်သုံး ပစ်ကပ်ကားကြီး ဆိုလျှင်တော့ ပြောစရာပင် မလိုတော့ပေ။

ကားကိုယ်ထည် တစ်ခုလုံး၏ အလျားကပင် (၂၁) ပေခန့် ရှိနေရာ ထိုအဆင့်မြှင့်တင်ထားသော လမ်းကြမ်းမောင်းကား နှစ်စီးထက်ပင် အများကြီး ပိုရှည်နေသေးသည်။

ဒါက ပစ္စည်းများ တင်ဆောင်နိုင်စွမ်းကို ကိုယ်စားပြုနေခြင်းပင်။

အခြား အသက်ရှင်ကျန်ရစ်သူများ၏ မျက်လုံးများထဲတွင် အားကျမှုနှင့် မနာလိုမှုများ အပြည့်အဝ ဖြစ်ပေါ်နေကြသည်။

"ဒီကားက... အရမ်းမိုက်တာပဲ အစ်ကိုရီ"

"မက္ကန်းနစ် လမ်းစဉ်ပိုင်ရှင်ဆိုတဲ့ နာမည်နဲ့ တကယ်ကို လိုက်ဖက်တာပဲ... အစ်ကို အရမ်းတော်တာပဲ"

ပန်းရောင်ဆံပင်ကောင်မလေးက ကားကို တစ်ပတ်ပြီးတစ်ပတ် ပတ်ကြည့်နေသည်။

"အစ်ကိုရီ... အောက်ဆင်းပါလား... ညီမ စမ်းမောင်းကြည့်ချင်လို့"

နာနာက အားနာခြင်း အလျဉ်းမရှိဘဲ ဤကားကို စမ်းသပ်မောင်းနှင်ချင်ကြောင်း ပြောလာသည်။

ချန်းရီက ပြုံးရွှင်စွာဖြင့် ကားပေါ်မှ ဆင်းပေးလိုက်သည်။

ကောင်မလေးက ခြေလှမ်းလိုက်သည်နှင့် တစ်ပြိုင်နက် ကားထဲသို့ ဝင်ရောက်သွားလေသည်။

"ဟယ်... အစ်ကို့ကားက အထဲမှာ ဒီလောက်တောင် စုတ်ပြတ်နေတာလား"

"ဘာလို့ ဘာမှကို မရှိရတာလဲ"

"မန်နျူရယ်ဂီယာကြီး ဖြစ်နေသေးတယ်"

ကားထဲသို့ ဝင်ဝင်ချင်းပင် ပန်းရောင်ဆံပင်ကောင်မလေးက စိတ်ပျက်သလို ညည်းညူလိုက်သည်။

ဤကား၏ အတွင်းပိုင်း အပြင်အဆင်က သူမ၏ အဆင့်မြှင့်တင်ထားသော လမ်းကြမ်းမောင်းကားနှင့် ယှဉ်လျှင် အလွန်ကို ကွာခြားလွန်းလှသည်။

ချန်းရီကတော့ သူမ၏ စကားများကို လုံးဝ ဂရုမစိုက်ဘဲ သူ၏ ကားကိုသာ ပြုံးဖြီးဖြီးဖြင့် ကြည့်နေဆဲ ဖြစ်သည်။

လူအုပ်ကြီးထဲမှ အမျိုးသမီးဟန် အပြည့်ရှိသော ရှုလီနာက လူအုပ်ကို တိုးထွက်လာပြီး ဘေးရှိ ပစ္စည်းများထဲမှ မီးဖိုနှင့် အယ်လ်ကိုဟောတုံးများကို ရှာဖွေကာ နံနက်စာ စတင် ချက်ပြုတ်နေလေပြီ။

ဟွန့်... လူတိုင်းက ရှင်ရဲ့ အောင်မြင်မှုကို အားကျနေချိန်မှာ... ကျွန်မ တစ်ယောက်တည်းကသာ ရှင် ဗိုက်ဝ၊ မဝ ဆိုတာကို ဂရုစိုက်တာပါ။

ဒီတစ်ခါတော့... ရှင် ကျွန်မ လက်ထဲကနေ ဘယ်လို ပြေးထွက်နိုင်မလဲ ကြည့်ကြသေးတာပေါ့။

ရှုလီနာ၏ နှုတ်ခမ်းထောင့်များက အနည်းငယ် ကွေးတက်သွားသော်လည်း အလျင်အမြန်ပင် ပြန်လည် ပျောက်ကွယ်သွားလေသည်။

"ဝုန်း... ဝုန်း... ကျွီ..."

ရုတ်တရက် ကမ္ဘာပျက်ကပ်သုံး ပစ်ကပ်ကားကြီး၏ အင်ဂျင်က ပြင်းထန်စွာ ဟိန်းဟောက်လာပြီး ကားကြီးက တကျွီကျွီ မြည်လာသဖြင့် ဘေးတွင် ဝိုင်းနေကြသော အသက်ရှင်ကျန်ရစ်သူများမှာ အလွန်အမင်း ထိတ်လန့်သွားကြသည်။

ထိုအချိန်မှာပင် ကားကြီးက ရှေ့သို့ ရုတ်တရက် ထိုးထွက်သွားပြီး တာယာများဆီမှ ပြင်းထန်သော ပွတ်တိုက်သံများ ထွက်ပေါ်လာသည်။

ဘေးပတ်ဝန်းကျင်မှ ရှောင်တိမ်းချိန် မရလိုက်သော အသက်ရှင်ကျန်ရစ်သူများမှာ ချက်ချင်းပင် လိပ်ပြာလွင့်မတတ် ကြောက်လန့်သွားကြပြီး အားလုံးက မိဘကိုပင် တမ်းတ အော်ဟစ်ကာ အပြေးအလွှား ရှောင်တိမ်းချင်နေကြသည်။

ကားက ပေ (၁၀) ခန့် ရှေ့သို့ ထိုးထွက်သွားရာ အဘိုးအို တစ်ဦးမှာ ကြောက်လန့်တကြား အော်ဟစ်လိုက်ပြီး ရှေ့တွင် လေးဖက်ထောက်ကာ ပြေးလွှားနေရသည်။ ကမ္ဘာပျက်ကပ်သုံး ပစ်ကပ်ကားကြီးနှင့် ထိုအဘိုးအိုကြား အကွာအဝေးမှာ ခြောက်ပေပင် မပြည့်တော့ပေ။

ကားက ထိုအဘိုးအိုကို ဝင်တိုက်မိတော့မည့် အချိန်လေးမှာပင်...

"ကျွီ..."

တာယာများက ကားလမ်းမပေါ်တွင် နက်ရှိုင်းသော ဘီးရာနှစ်ကြောင်းကို ချန်ရစ်ခဲ့ပြီးနောက် ထိုနေရာ၌ပင် ရပ်တန့်သွားတော့သည်။

ထိုအဘိုးအို၏ နဖူးပေါ်တွင် ချွေးစေးများ ပျံနေပြီ ဖြစ်ပြီး မျက်လုံးအပြူးသားဖြင့် သူ့ရှေ့ရှိ ကားကြီးကို ကြောင်အမ်းအမ်း ကြည့်ရင်း တစ်ကိုယ်လုံး ပျော့ခွေကာ မြေပြင်ပေါ်သို့ လဲကျသွားလေသည်။

ထိုအဘိုးအိုမှာ အခြားသူ မဟုတ်ဘဲ သက်ကြီးရွယ်အိုသုံး သုံးဘီးကို မောင်းနှင်သော အဘိုးကျန်း ပင် ဖြစ်သည်။

နာနာက ကားပေါ်မှ ခုန်ဆင်းလာပြီး သူမ၏ မျက်နှာက အနည်းငယ် နီရဲနေကာ "အို... မန်နျူရယ်ဂီယာကြီးကို မမောင်းရတာ ကြာပြီမို့လို့... ဒီလောက်တောင် လက်စိမ်းသွားလိမ့်မယ်လို့ မထင်ထားဘူး"

ထိုအဘိုးအိုက ဆဲရေးတိုင်းထွာချင်နေသော်လည်း ခြေတံရှည်ကောင်မလေးကို မြင်လိုက်ရသည့်အခါ ဆက်ပြောမည့် စကားလုံးများကို အတင်းအကျပ် မြိုချလိုက်ရသည်။

ဘေးနားရှိ အသက်ရှင်ကျန်ရစ်သူ အများအပြားမှာလည်း ခုနက အလွန် လန့်သွားခဲ့ကြသော်လည်း ပန်းရောင်ဆံပင်ကောင်မလေးကို မဆဲရဲကြသဖြင့် တစ်ယောက်ချင်းစီတိုင်း မျိုသိပ်ထားရသည်မှာ အတော်လေး ခက်ခဲနေကြသည်။

ချန်းရီ၏ မျက်နှာပေါ်တွင်မူ မည်သည့် အမူအရာမျှ မရှိပေ။

မည်သို့ပင်ဖြစ်စေ သဲကန္တာရကြီးက ဤမျှကျယ်ဝန်းနေရာ နာနာ မျက်စိမှိတ် မောင်းလျှင်ပင် ပြဿနာ ဖြစ်မည် မဟုတ်ပေ။

ထို့ပြင် ဤကားက ရိုးရှင်းသည်ဆိုသော်ငြား စနစ်မှ ထုတ်လုပ်ပေးထားခြင်း ဖြစ်သဖြင့် အရည်အသွေးကတော့ အာမခံချက် ရှိလေသည်။

ယာဉ်ကိစ္စ ပြီးစီးသွားပြီ ဖြစ်ရာ နောက်တစ်ဆင့်အနေဖြင့် သဘာဝလွန်ပစ္စည်းကို အဆင့်မြှင့်တင်ရန် စီစဉ်ရတော့မည် ဖြစ်သည်။

ဆက်ရန်...