အခန်း ၄၃၄

အခန်း။ ၄၃၄

ယွဲ့နယ်ပယ်သည် မူလက လူသားဘက်မှ အထူးချွန်ဆုံး တိုက်ခိုက်ရေးတပ်ဖွဲ့ဖြစ်သည်။ ယခင်ကဆိုလျှင် ယွဲ့နယ်ပယ် တပ်ဖွဲ့တစ်ခုသည် သူနှင့် အဆင့်တူ မိစ္ဆာအင်အားစုသတ္တဝါ တစ်ကောင်ကိုသာ ရင်ဆိုင်နိုင်ခဲ့သည်။

သို့သော် ယခုအခါတွင် ရွှီရန်၏ အဆောင်များ၊ တိုက်ကွက်များနှင့် ချပ်ဝတ်တန်ဆာများ၏ အထောက်အပံ့ကြောင့် ကုသသူများမှလွဲ၍ ကျင့်ကြံသူတိုင်းသည် သူနှင့် အဆင့်တူ သတ္တဝါတစ်ကောင်ကို တည့်တည့်ရင်ဆိုင်နိုင်လာပြီဖြစ်သည်။

ယခုအခါ ရွှီရန်သည် တိုက်ကွက်များ ထွင်းထုထားသော လက်နက်များကို ဖန်တီးလိုက်ပြန်ရာ ယွဲ့နယ်ပယ်အတွက် တိုးမြှင့်ပေးမှုမှာ အလွန်ပင် ကြီးမားလှသည်။

လက်ရှိ ယွဲ့နယ်ပယ် တပ်ဖွဲ့များသည် သွေးစွမ်းအင် သန်းတစ်သန်းရှိသော သတ္တဝါများနှင့် ရင်ဆိုင်ရပါက တိုက်ခိုက်ရေး ကျင့်ကြံသူများသည် အချိန်တိုအတွင်း သတ်ဖြတ်နိုင်ပြီး ခုခံရေး ကျင့်ကြံသူများသည် သူတို့၏ ပြင်းထန်သော ခုခံမှုဖြင့် သတ္တဝါကို အသက်ကုန်သည်အထိ အားကုန်သွားအောင် လုပ်ဆောင်နိုင်သည်။

ထိန်းချုပ်ရေး ကျင့်ကြံသူများကမူ နည်းလမ်းအမျိုးမျိုးကို သုံး၍ သတ္တဝါကို လှုပ်ရှားမရအောင် ချုပ်ကိုင်ထားနိုင်သည်။

ဤအချက်များက ကျင့်ကြံသူတို့၏ တိုက်ခိုက်နိုင်စွမ်းကို တိုက်ရိုက်မြှင့်တင်ပေးလိုက်ခြင်းပင်။ ၎င်းအားလုံးမှာ ကျင့်ကြံခြင်းအဆင့်ကို မြှင့်တင်စရာမလိုဘဲ ရရှိလာခြင်းပင်။

"ရွှီရန်ရဲ့ ဦးနှောက်က ဘယ်လိုမျိုး အလုပ်လုပ်နေတာလဲ"

ကောင်းကင်ဘုံလက်မှုပညာရှင်က သက်ပြင်းချရင်း ထပ်မေးလိုက်သည်။

"အံ့ဖွယ် အရိုးစုရှိတဲ့ ရွှီရန်လိုမျိုး ကျင့်ကြံသူမျိုး အရင်က ရှိခဲ့ဖူးပါ့မလား"

အစိုးရအဖွဲ့ဝင်က တွေးတောသည်။

ခဏတာ တိတ်ဆိတ်သွားပြီးနောက် ဘဏ်လုပ်ငန်းရှင်က "ဘာပဲဖြစ်ဖြစ် ရွှီရန်ရဲ့ ကျောင်းသားတွေက တိုက်ကွက်ထွင်းထုတဲ့ ကျွမ်းကျင်မှုကို ရသွားပြီဆိုတော့ တိုက်ကွက်ပါတဲ့ လက်နက်နဲ့ ချပ်ဝတ်တွေကတော့ ဆက်တိုက် ပေါ်ထွက်လာတော့မှာပဲ"

"ဒါဆိုရင် ဒီအကြောင်းကို ကျယ်ကျယ်ပြန့်ပြန့် ကြေညာပေးလိုက်ကြရအောင်။ ကျင့်ကြံသူအားလုံး သိရှိသွားအောင် လုပ်ပြီး တစ်ပြိုင်နက်တည်းမှာပဲ အရင်က ဒီဇိုင်းဆွဲထားတဲ့ တိုက်ပွဲဝတ်ရုံကိုလည်း မြှင့်တင်ပေးလိုက်မယ်"

တိုက်ပွဲဝတ်ရုံမှာ ကောင်းကင်ဘုံလက်မှုပညာရှင်၏ ဦးဆောင်မှုဖြင့် တီထွင်ထားသော တိုက်ခိုက်ရေးဝတ်စုံဖြစ်သည်။

ရွှီရန်၏ သန့်စင်ခြင်း တိုက်ကွက်မှ စိတ်ကူးကို ယူပြီး နောက်ဆုံးပေါ် ပစ္စည်းများကို အသုံးပြုထားသဖြင့် နတ်ဘုရားကို သတ်မည့်တပ်ဖွဲ့၏ တိုက်ခိုက်နိုင်စွမ်းကို မြှင့်တင်ပေးနိုင်သည်။

သူ၏ ပင်ပန်းကြီးစွာ တီထွင်ထားသော တိုက်ပွဲဝတ်ရုံမှာ နောက်ဆုံးတွင် လူသိများလာတော့မည်ဖြစ်၍ ကောင်းကင်ဘုံလက်မှုပညာရှင်မှာ အလွန်ပင် ပျော်ရွှင်နေသည်။

"ငါ့ရဲ့ တိုက်ပွဲဝတ်ရုံက နောက်ဆုံးတော့ ဈေးကွက်ထဲ ရောက်လာပြီ"

ထို့နောက် ဘဏ်လုပ်ငန်းရှင်က တစ်စုံတစ်ခုကို သတိရသွားသည်။

"လျှပ်စီးတပ်ဖွဲ့ရဲ့ လက်ရှိအခြေအနေကရော ဘယ်လိုရှိလဲ"

လျှပ်စီးတပ်ဖွဲ့အကြောင်း ပြောလိုက်သည်နှင့် ဗေဒင်ဆရာမှာ စိတ်လှုပ်ရှားမှုတို့ဖြင့် ပြည့်နှက်သွားသည်။

"အရင် အစည်းအဝေးမှာ လျှပ်စီးတပ်ဖွဲ့ကို ကျင့်ကြံရေး အရင်းအမြစ်တွေ အများကြီး ပံ့ပိုးပေးဖို့ ဆုံးဖြတ်ခဲ့ပြီးပြီ။ အခုဆိုရင် အားလုံးရဲ့ ကျင့်ကြံခြင်းက နတ်ဘုရားအဆင့်ကို နီးကပ်လာနေပြီ"

"ဒါ့အပြင် အရင်းအမြစ်တွေ အများကြီး ထည့်ပေးလိုက်တဲ့အတွက် လျှပ်စီးတပ်ဖွဲ့ရဲ့ ကောင်းချီး အရိုးစုက အံ့ဩစရာကောင်းလောက်အောင် ပြောင်းလဲသွားပြီး တိုက်ကွက်နဲ့ သင်္ကေတအားလုံးကို တစ်ရာ့ငါးဆယ်ရာခိုင်နှုန်းအထိ မြှင့်တင်ပေးနိုင်သွားပြီ"

"ကောင်းချီးတစ်ခုပေးလိုက်ရင် တစ်နှစ်ရဲ့ နှစ်ဝက်လောက်အထိ ခံတယ်"

ထိုစကားကို ကြားလိုက်သောအခါ ကျန်လေးဦးမှာ မျက်လုံးများ ပြူးကျယ်သွားကြသည်။

"ဒီလောက်တောင် ကောင်းတာလား"

ဗေဒင်ဆရာက ခေါင်းညိတ်လိုက်သည်။

"ကျွန်တော် သူ့ကို လုံခြုံရေးနယ်မြေထဲက တိုက်ကွက်နဲ့ သင်္ကေတအားလုံးကို ကောင်းချီးပေးဖို့ ညွှန်ကြားထားပြီးပြီ။ ဝိညာဉ်ချီစွမ်းအင်တွေက တကယ်ပဲ ပိုပြီး ကြွယ်ဝလာသလို ကာကွယ်ရေး အကာအကွယ်တွေကလည်း ပိုမိုခိုင်မာလာတယ်"

အစိုးရအဖွဲ့ဝင်က ရယ်မောလိုက်သည်။

"လျှပ်စီးတပ်ဖွဲ့က ငါတို့ကို ဒီလောက်ကြီးမားတဲ့ အံ့အားသင့်စရာ ပေးလိမ့်မယ်လို့ မထင်ထားခဲ့ဘူး"

ဗေဒင်ဆရာကလည်း ရယ်မောလိုက်သည်။

"လျှပ်စီးတပ်ဖွဲ့က ငါတို့ကို မလိမ်မညာခဲ့ဘူး။ သူတို့က နတ်ဘုရားအဆင့်ကို နီးကပ်နေပြီ။ ဒါက ရွှီရန်နဲ့ သူ့အဖွဲ့ပြီးရင် နတ်ဘုရားအဆင့်ကို အနီးကပ်ဆုံး ရောက်ရှိနေတဲ့ ပထမဆုံးသော နတ်ဘုရားကိုသတ်မဲ့တပ်ဖွဲ့ ဖြစ်လာနိုင်တယ်"

ဘဏ်လုပ်ငန်းရှင်က သူ၏ မျက်မှန်ကို ပင့်တင်လိုက်သည်။

"ဒါဆိုရင် ဒီအချက် သုံးချက်ကို တစ်ပြိုင်တည်း ကြေညာလိုက်ကြရအောင်"

...

မကြာမီ ကောင်းကင်ဘုံတောင်ထိပ်မျှော်စင်မှ ကြေညာချက် သုံးခုကို တစ်ပြိုင်တည်း ထုတ်ပြန်လိုက်သည်။

[ရွှီရန်၏ နောက်ဆုံးတီထွင်ထားသော တိုက်ကွက်ပါ ချပ်ဝတ်နှင့် တိုက်ကွက်ပါ လက်နက်များသည် ယွဲ့နယ်ပယ်အောက်တွင် ခုခံအားနှင့် တိုက်ခိုက်အားကို ငါးဆယ်ရာခိုင်နှုန်းအထိ တိုးမြှင့်ပေးသည်။ ယွဲ့နယ်ပယ်အထက်တွင်မူ ရှစ်ဆယ်ရာခိုင်နှုန်းအထိ တိုးမြှင့်ပေးသည်။]

[လျှပ်စီး နတ်ဘုရားကိုသတ်မည့်တပ်ဖွဲ့၏ ကောင်းချီး အရိုးစုမှာ ပြောင်းလဲသွားပြီး တိုက်ကွက်နှင့် သင်္ကေတများကို တစ်ရာ့ငါးဆယ်ရာခိုင်နှုန်းအထိ မြှင့်တင်ပေးနိုင်ကာ ကောင်းချီးမှာ ခြောက်လအထိ ခံသည်။]

[နတ်ဘုရားကိုသတ်မည့်တပ်ဖွဲ့အတွက် နောက်ဆုံးတီထွင်ထားသော တိုက်ပွဲဝတ်ရုံကို ထုတ်ပြန်လိုက်သည်။ နတ်ဘုရားကိုသတ်မည့်တပ်ဖွဲ့ ခေါင်းဆောင်အားလုံး ကောင်းကင်ဘုံတောင်ထိပ်မျှော်စင်သို့ လာရောက်ထုတ်ယူနိုင်ပါသည်။]

ကြေညာချက် သုံးခုသည် လုံခြုံရေးနယ်မြေတစ်လျှောက်တွင် ချက်ချင်းပင် ရုန်းရင်းဆန်ခတ် ဖြစ်သွားစေသည်။

ကောင်းကင်ဘုံတောင်ထိပ်မျှော်စင်က ထုတ်ပြန်တဲ့ ကြေညာချက်တွေက အချိန်အကြာကြီး စောင့်လိုက်ရရင်လည်း စောင့်ရသလောက် ဒါမှမဟုတ် ထုတ်ပြန်လိုက်ပြီဆိုရင်လည်း တစ်ပြိုင်နက်တည်းမှာပဲ ကြီးမားတဲ့ အပြောင်းအလဲကြီးတွေကို ဖြစ်ပေါ်စေတတ်တယ်လို့ ဘယ်သူက ထင်ထားမှာလဲ...

"ရွှီရန်ရဲ့ တိုက်ကွက်တွေနဲ့ သင်္ကေတအစီရင်တွေက ထပ်ပြီး ပြောင်းလဲသွားပြန်ပြီ။ အခုဆိုရင် လက်နက်တွေပေါ်မှာပါ ထွင်းထုလို့ ရနေပြီတဲ့ဗျာ..."

"ယွဲ့နယ်ပယ်ရဲ့ လက်နက်နဲ့ ချပ်ဝတ်တန်ဆာတွေက အခုဆိုရင် စွမ်းအား ၈၀ ရာခိုင်နှုန်းအထိ တိုးမြှင့်ပေးနိုင်ပြီလေ။ ဒါက တစ်ယောက်စာထက်မကတဲ့ စွမ်းအားကို ရလိုက်တာနဲ့ အတူတူပဲပေါ့..."

"၈၀ ရာခိုင်နှုန်းတောင် တိုးပေးတာလား... ဒါက တကယ်ကို ကြောက်စရာကောင်းတဲ့ အမျိုးအစားပဲ..."

"ဒီ ၈၀ ရာခိုင်နှုန်း တိုးမြှင့်မှုနဲ့သာဆိုရင်... ဂြိုဟ်သားစစ်မြေပြင်မှာ မိစ္ဆာအင်အားစုသတ္တဝါတွေကို တစ်ယောက်တည်းနဲ့တင် အသာလေး ရင်ဆိုင်နိုင်တော့မှာပဲ..."

"ရွှီရန်က သင်္ကေတအရိုးစုပါတဲ့ ပါရမီရှင် တစ်ထောင်ကို ထပ်ပြီး အင်အားဖြည့်ထားတယ်လို့ ကြားတယ်။ မကြာခင်မှာတော့ ဒီလို တိုက်ကွက်အစီရင် ထွင်းထုထားတဲ့ ချပ်ဝတ်တွေနဲ့ လက်နက်တွေက လူတိုင်းအတွက် သာမန်လို သုံးစွဲရမယ့် ပစ္စည်းတွေ ဖြစ်လာတော့မှာပဲ..."

လူတိုင်းသည် သူတို့၏ စွမ်းအားကို မြှင့်တင်ပေးနိုင်မည့် အရာများကို အလွန်ပင် စိတ်ဝင်စားနေကြသည်။

အထူးသဖြင့် ဂြိုဟ်သားစစ်မြေပြင်တွင် သူတို့၏ အသက်ရှင်သန်နိုင်စွမ်းနှင့် ပတ်သက်လာလျှင် ပို၍ပင်။

အကျပ်အတည်းများစွာနှင့် ရင်ဆိုင်ခဲ့ရပြီးနောက် လူတိုင်းသည် စွမ်းအား၏ အရေးပါမှုကို နားလည်သဘောပေါက်သွားကြပြီး စွမ်းအားတိုးတက်စေမည့် မည်သည့်အရာကိုမဆို အလွန်ဂရုပြုနေကြသည်။

အချို့သူများမှာမူ ဒုတိယကြေညာချက်အပေါ်တွင် အလွန်အာရုံစိုက်နေကြသည်။

"လျှပ်စီး နတ်ဘုရားကိုသတ်မည့်တပ်ဖွဲ့ အဲ့ဒါ အခု နံပါတ်တစ် အဖွဲ့မဟုတ်ဘူးလား သူတို့ရဲ့ ကောင်းချီး အရိုးစုက ပြောင်းလဲသွားတာလား"

"မယုံနိုင်စရာပဲ တိုက်ကွက်နဲ့ သင်္ကေတတွေကို ကောင်းချီးပေးနိုင်ပြီး ခြောက်လလောက်အထိ ခံတယ်ဆိုတာ အရမ်း အစွမ်းထက်တာပဲ"

"ဒါက အကောင်းဆုံး ထောက်ပံ့ပေးနိုင်တဲ့ ကျင့်ကြံသူ ဖြစ်လာနိုင်တယ်"

ပထမ ကြေညာချက်နှစ်ခုနှင့် ယှဉ်လျှင် တတိယကြေညာချက်မှာ လူတိုင်းကို ထိုမျှလောက် ထိတ်လန့်မသွားစေခဲ့ပေ။

လူတိုင်းသည် ကြေညာချက်ပါ အတိုင်း ကောင်းကင်ဘုံတောင်ထိပ်မျှော်စင်သို့သွား၍ တိုက်ပွဲဝတ်ရုံများကို ထုတ်ယူခဲ့ကြသည်။

ကောင်းကင်ဘုံတောင်ထိပ်မျှော်စင်မှ တိုက်ပွဲဝတ်ရုံများနှင့် တိုက်ခိုက်ရေးဝတ်စုံများကို ဝေငှနေချိန်တွင် ရွှီရန်မှာ ရင်ပြင်၌ရှိနေပြီး သင်္ကေတအရိုးစုပါသည့် ထူးချွန်သူများအတွက် သင်ကြားပေးကာ မေးခွန်းများကို ဖြေရှင်းပေးနေသည်။

"ရွှီရန်"

ရုတ်တရက် ဝေးလံသောနေရာမှ ယဲ့ဖျင်၏ အသံကို ကြားလိုက်ရသည်။

ကြားလိုက်သည်နှင့် ရွှီရန်သည် သူ၏လက်ယာလက်ကို ဝှေ့ယမ်းလိုက်ရာ ကျောင်းသားများမှာလည်း လူစုခွဲသွားကြသည်။