အခန်း ၅၃၁

အခန်း ၅၃၁ - နောက်ကွယ်ကအကြောင်းများနှင့် နေရာရွှေ့ပြောင်းခြင်း အဆောင်

"ယန္တရားတစ်ထောင် အလုပ်ရုံက လှုပ်ရှားတော့မလို့လား"

မျက်နှာနီနီ အကြီးအကဲမှာ အံ့အားသင့်သွားလေသည်။

ယန္တရားတစ်ထောင် အလုပ်ရုံက ချန်းလန်မြို့တော်၏ စည်းမျဉ်းများကို လျစ်လျူရှုပြီး တိုက်ရိုက် လှုပ်ရှားရဲလောက်အောင် သတ္တိရှိသည်လော။

"ဒုတိယခန်းမဆောင်သခင် နားလည်မှုလွဲနေပါပြီ။ ယန္တရားတစ်ထောင် အလုပ်ရုံက တိုက်ရိုက် တိုက်ခိုက်ဖို့ စီစဉ်နေတာ မဟုတ်ပါဘူး။ သူတို့က ရတနာခန်းမဆောင်ကို ဖိအားပေးဖို့ ကျွန်တော်တို့နဲ့ ပူးပေါင်းချင်တယ်ဆိုပြီး သတင်းစကားပါးလိုက်တာပါ"

အိမ်တော်ထိန်းရှန်က ရှင်းပြလိုက်သည်။

"ယန္တရားတစ်ထောင် အလုပ်ရုံက ငါတို့နဲ့ ပူးပေါင်းချင်တယ် ဟုတ်လား"

မျက်နှာနီနီ အကြီးအကဲမှာ နောက်တစ်ဖန် အံ့သြသွားရပြန်၏။

"ဟုတ်ပါတယ်။ ကျွန်တော်တို့တင် မဟုတ်ဘူး... သူတို့က ချန်းလန်မြို့တော်က တခြားကုန်သည်တွေ အားလုံးကိုပါ စုစည်းထားတယ်။ သူတို့အားလုံး ပေါင်းပြီး ရတနာခန်းမဆောင်ကို ဖိအားပေးချင်နေတာ။ ဒုတိယခန်းမဆောင်သခင်... ကျွန်တော်တို့ကော သူတို့နဲ့ ပူးပေါင်းသင့်လား"

အိမ်တော်ထိန်းရှန်က မေးလိုက်သည်။

"သေချာပေါက် ပူးပေါင်းရမှာပေါ့။ တိုက်ခိုက်ဖို့ ဦးဆောင်မယ့်သူရှိတာ ရှားတယ်။ အဲဒါက ငါတို့ လိုအပ်နေတာပဲ မဟုတ်ဘူးလား။ ဒီနည်းနဲ့ဆိုရင် ယန္တရားတစ်ထောင် အလုပ်ရုံက ငါတို့အတွက် ရှေ့ပြေး စမ်းသပ်ပေးလိမ့်မယ်။ အဲဒီမိန်းမဆီမှာ ဘယ်လိုဝှက်ဖဲတွေ ရှိနေလို့ ဒီလောက် မုန်တိုင်းတစ်ခု ဖန်တီးရဲနေတာလဲဆိုတာ ငါတို့ မြင်ရမှာပေါ့"

"တကယ်တော့ ကျွန်တော် ကြားထားတာ ယန္တရားတစ်ထောင် အလုပ်ရုံက သုံးနှစ်တစ်ကြိမ် အထက်လောက ကိုယ်စားလှယ်တွေရဲ့ စာရင်းစစ်ဆေးတာကို ခံရတယ်တဲ့။ သူတို့က စာရင်းတွေ စစ်ဆေးပြီး အမြတ်တွေ လာသိမ်းတာလေ။ တွက်ကြည့်ရသလောက်ဆို အချိန်က ကွက်တိပဲ။ လက်ရှိ ယန္တရားတစ်ထောင် အလုပ်ရုံရဲ့ အခြေအနေကိုသာ အထက်လောကက ဂုဏ်သရေရှိ လူကြီးတွေ မြင်သွားရင်... ယန္တရားတစ်ထောင် အလုပ်ရုံရဲ့ သခင် သေချာပေါက် ပြဿနာ ကြီးကြီးမားမား တက်မှာပဲလေ။ ဒါကြောင့်လည်း သူ စိုးရိမ်နေတာပေါ့"

"ကောင်းတယ်။ သူ စိုးရိမ်နေတာက ငါတို့ရဲ့ ရည်ရွယ်ချက်ကို အထောက်အကူပြုတယ်လေ။ သူတို့သာ အပူတပြင်းဖြစ်နေရင် ငါတို့အတွက် ရှေ့ကနေ လမ်းဖောက်ပေးလိမ့်မယ်။ သူတို့ကို ဝူရှန့်ခန်းမဆောင်က သဘောတူတယ်လို့ ပြောလိုက်"

...

"သခင်မလေး... ဒါက ယန္တရားတစ်ထောင် အလုပ်ရုံက စာပို့သမား လာပို့သွားတဲ့ ဖိတ်စာပါ"

ရတနာခန်းမဆောင်အတွင်းတွင် ဖူပေါ်သည် ရွှေရောင် ဖိတ်စာကတ်တစ်ခုကို ကိုင်ဆောင်ကာ ခန်းမဆောင်သခင်ထံသို့ ပြောလိုက်လေသည်။

"ဪ... ဒီအချိန်ကြီးမှ ဖိတ်စာလား" ခန်းမဆောင်သခင်က မျက်ခုံးပင့်လိုက်သည်။ "ဘာတွေ ရေးထားလဲ"

"ယန္တရားတစ်ထောင် အလုပ်ရုံက ဝူရှန့်ခန်းမဆောင်နဲ့ ချန်းလန်မြို့တော်က တခြားကုန်သည်တွေ တော်တော်များများနဲ့ ပေါင်းပြီး အရေးကြီးတဲ့ ကိစ္စရပ်တွေကို ဆွေးနွေးဖို့ အစည်းအဝေးကြီးတစ်ခု ကျင်းပချင်တယ်လို့ ရေးထားပါတယ်။ ရတနာခန်းမဆောင်ကိုလည်း တက်ရောက်ဖို့ မျှော်လင့်ပါတယ်တဲ့"

ဖူပေါ်က ဖိတ်စာကိုဖွင့်ကာ အသံထွက် ဖတ်ပြလိုက်သည်။

" 'အရေးကြီးတဲ့ ကိစ္စရပ်တွေကို ဆွေးနွေးဖို့' ဟုတ်လား။ ငါတို့ကို ဖိအားပေးဖို့ ပူးပေါင်းချင်နေတာနဲ့ ပိုတူနေသလားလို့။ ကြည့်ရတာ သူတို့ နောက်ဆုံးတော့ သည်းခံနိုင်စွမ်း ကုန်သွားပြီတူပါရဲ့" ခန်းမဆောင်သခင်က လှောင်ပြုံးပြုံးလိုက်၏။

"သခင်မလေး... ကျွန်တော်တို့ ဘာလုပ်သင့်လဲ။ မြို့ထဲက ကုန်သည်အများကြီးက ပူးပေါင်းနေကြတာဆိုတော့... မြို့စားမင်းတောင်မှ သူတို့ကို ပေါ့ပေါ့တန်တန် သဘောထားမှာ မဟုတ်ဘူး။ သူတို့သာ ကျွန်တော်တို့ကို တကယ် အရေးယူဖို့ ဆုံးဖြတ်လိုက်ရင် ဘယ်လို တုံ့ပြန်ကြမလဲ"

ဖူပေါ်က စိုးရိမ်တကြီး မေးလိုက်သည်။

"မစိုးရိမ်ပါနဲ့ ဖူပေါ်။ ချန်းလန်မြို့တော်က ရှောင်ချန်းကမ္ဘာမှာ အကြီးဆုံး မြို့ကြီးတွေထဲက တစ်ခုလေ။ မြို့စားမင်းက အထက်လောကနဲ့ နက်နက်ရှိုင်းရှိုင်း ပတ်သက်နေတော့ တခြားသူတွေက သူ့ရဲ့ အာဏာကို စိန်ခေါ်တာဖြစ်ဖြစ်၊ သူချမှတ်ထားတဲ့ စည်းမျဉ်းတွေကို ချိုးဖောက်တာဖြစ်ဖြစ် ခွင့်ပြုမှာ မဟုတ်ဘူး။ အဲဒါကြောင့်လည်း ယန္တရားတစ်ထောင် အလုပ်ရုံနဲ့ တခြားသူတွေက ဖိအားပေးဖို့ ကြိုးစားနေကြတာလေ။ သူတို့မှာ ငါတို့ကို ကိုင်တွယ်ဖို့ တခြားနည်းလမ်းမှ မရှိတာ"

ခန်းမဆောင်သခင်က တည်ငြိမ်စွာ ပြန်ဖြေလိုက်လေသည်။ ဖူပေါ်သည် သူမ၏ စကားများကို သေချာ စဉ်းစားကြည့်ပြီးနောက်၌ အဓိပ္ပာယ်ရှိကြောင်း နားလည်သွားကာ အနည်းငယ် စိတ်အေးသွားတော့၏။

"ဒါဆိုရင် သခင်မ... ကျွန်တော်တို့ အစည်းအဝေးကို တက်ရောက်မှာလားဗျ"

"သေချာပေါက် မတက်ဘူးပေါ့" ခန်းမဆောင်သခင်က ပြတ်သားစွာ ပြောလိုက်သည်။ "ဘယ်စားပွဲမှ တကယ် ရင်းနှီးမှု မရှိဘူးလေ။ ဒီပွဲက ငါတို့အတွက် အကျိုးမရှိတာ ရှင်းနေတာပဲ... ဘာလို့ သူတို့ကို အခွင့်အရေး ပေးရမှာလဲ။ သူတို့ကို တိုက်ရိုက် ငြင်းလိုက်ပါ။ ရတနာခန်းမဆောင်က လောလောဆယ် စီးပွားရေးကိစ္စတွေနဲ့ အလုပ်များနေလို့ တက်ရောက်ဖို့ အချိန်မရှိဘူးလို့ ပြောလိုက်"

...

ရတနာခန်းမဆောင်၏ ငြင်းပယ်မှု သတင်းက ယန္တရားတစ်ထောင် အလုပ်ရုံသို့ ရောက်ရှိလာသောအခါ ခမ်းနားထည်ဝါသော ဝတ်ရုံများကို ဝတ်ဆင်ထားသည့် သက်လတ်ပိုင်းအရွယ် အမျိုးသားဖြစ်သော ယန္တရားတစ်ထောင် အလုပ်ရုံသခင်၏ မျက်နှာမှာ အလွန်ကိုမှ ဒေါသမီးတဟုန်းဟုန်းတောက်နေတော့၏။

"ကျိန်စာသင့်မယ့် မိန်းမ... ကျေးဇူးကန်းလိုက်တာ"

"သခင်ကြီး... ရတနာခန်းမဆောင်က တက်ရောက်ဖို့ ငြင်းဆန်လိုက်ပြီဆိုတော့ အခု ကျွန်မတို့ ဘာလုပ်ကြမလဲ။ အထက်လောက ကိုယ်စားလှယ် ဆင်းလာဖို့ ဆယ်ရက်တောင် မလိုတော့ဘူး။ သူသာ ကျွန်မတို့ရဲ့ လက်ရှိ အခြေအနေကို တွေ့သွားရင် သေချာပေါက် ဒေါသထွက်မှာပဲ"

လှပခမ်းနားစွာ ဝတ်စားဆင်ယင်ထားသော အမျိုးသမီးတစ်ဦးက စိုးရိမ်တကြီး ပြောလိုက်၏။

"အဲဒီ ကျိန်စာသင့်မယ့် မိန်းမက ချန်းလန်မြို့တော်ရဲ့ စည်းမျဉ်းတွေ အကာအကွယ်ပေးထားတာကို အားကိုးပြီး ဒီလောက်ထိ ရမ်းကားနေတာလေ။ မြို့စားမင်းရဲ့ ကန့်သတ်ချက်တွေသာ မရှိဘူးဆိုရင် ငါ သူ့ကို အစောကြီးကတည်းက ဖမ်းပြီးတော့ ကျင့်ကြံခြင်းတွေကို ဖျက်ဆီးပစ်ပြီး ပြည့်တန်ဆာအိမ်ကို ရောင်းစားပစ်လိုက်ပြီ"

ယန္တရားတစ်ထောင် အလုပ်ရုံသခင်မှာ ဒေါသပေါက်ကွဲသွားကာ ပတ်ဝန်းကျင် နိယာမများကိုပင် မသိမသာ တုန်ခါသွားစေနိုင်သည့် ကြောက်မက်ဖွယ်အငွေ့အသက်များကို ထုတ်လွှတ်လိုက်လေတော့သည်။ သူ၏ ကျင့်ကြံခြင်းက ရွှေအမြုတေ နှောင်းပိုင်းအဆင့်ဖြစ်သော အနည်းဆုံး သတ္တမ အသွင်ပြောင်းခြင်း သို့မဟုတ် ယင်းထက် ပိုမိုမြင့်မားသော အဆင့်သို့ ရောက်ရှိနေပြီ ဖြစ်ကြောင်း ရှင်းလင်းစွာ ပြသနေပေ၏။

"သခင်ကြီး... စကားပြောတာ သတိထားပါဦး"

အမျိုးသမီး၏ မျက်နှာအမူအရာက ပြောင်းလဲသွားပြီး အလျင်အမြန် ဖြတ်ပြောလိုက်၏။

"...ရတနာခန်းမဆောင်ရဲ့ ခန်းမဆောင်သခင်က အထက်လောကက ပုဂ္ဂိုလ်တစ်ဦးရဲ့ မျက်နှာသာပေးတာကို ခံထားရတယ်လို့ ပြောကြတယ်။ ခုနက ရှင်ပြောလိုက်တဲ့ စကားတွေသာ ပျံ့သွားမယ်ဆိုရင် အရမ်းကို အန္တရာယ်များလိမ့်မယ်"

"ကောလာဟလသက်သက်ပါကွာ။ အဲ့ဒီစကားတွေ ထွက်နေတာဖြင့် နှစ်ပေါင်းများစွာတောင် ကြာနေပြီကိစ္စ၊ သက်သေအထောက်အထားတစ်ခုမှမှ မရှိသေးတာ။ ပွင့်ပွင့်လင်းလင်း ပြောရရင် အဲဒီမိန်းမကိုယ်တိုင်က ဒီကောလာဟလတွေကို လွှင့်ထားတာလို့တောင် ငါ သံသယရှိတယ်။ တခြားသူတွေ သူ့ကို အရေးမယူရဲအောင် လှည့်စားထားတဲ့ လှည့်ကွက်တစ်ခုပဲနေမယ်"

ယန္တရားတစ်ထောင် အလုပ်ရုံသခင်က လှောင်ပြုံးပြုံးလိုက်သည်။

အမျိုးသမီးမှာ တိတ်ဆိတ်သွားလေ၏။ ထိုသံသယမှာ အသစ်အဆန်း မဟုတ်ချေ။

လူအများအပြားကလည်း ဤသို့ တွေးထင်ခဲ့ကြဖူးသည်။ သို့သော် ဆိုရိုးစကားအတိုင်း နောင်တရမည့်အစား ဘေးကင်းသည်က ပိုကောင်းပေသည်။ အခြားသော သက်သေများ မရှိသရွေ့ မည်သူမျှ ၎င်းကို ပေါ့ပေါ့တန်တန် သဘောမထားရဲကြချေ။ မည်သို့ပင်ဆိုစေ ထိုကောလာဟလသည် မြို့စားမင်းအိမ်တော်မှ စတင်ထွက်ပေါ်လာခြင်း ဖြစ်သည်ဟု ဆိုကြပေ၏။ ထို့အပြင် နှစ်ကာလများတစ်လျှောက် မြို့စားမင်းအိမ်တော်သည် ကိစ္စရပ်များစွာတွင် ရတနာခန်းမဆောင်ကို သိသာထင်ရှားစွာ မျက်နှာသာပေးခဲ့ကြောင်းက မြို့တော်၏ အင်အားစုများကြားတွင် လူသိရှင်ကြား လျှို့ဝှက်ချက်တစ်ခု ဖြစ်နေလေသည်။

သို့မဟုတ်ပါက ရွှေအမြုတေ အလယ်အလတ်အဆင့်သာရှိပြီး နှောင်းပိုင်းအဆင့်သို့ပင် မရောက်သေးသော သာမန် အမျိုးသမီးတစ်ဦးက ချန်းလန်ကဲ့သို့သော အစွမ်းထက် အင်အားစုများဖြင့် ပြည့်နှက်နေသည့် မြို့တော်တွင် မည်သို့များ ခြေကုပ်ယူကာ ဤမျှကြီးမားသော လုပ်ငန်းကြီးတစ်ခုကို တည်ဆောက်နိုင်မည်နည်း။

သို့သော်လည်း အလုပ်ရုံသခင် ဒေါသထွက်နေပြီး အကျိုးအကြောင်း ဆင်ခြင်မှုကို နားထောင်မည့် အခြေအနေ မဟုတ်ကြောင်း သိထားသဖြင့် အမျိုးသမီးမှာ ထပ်မပြောရဲတော့ချေ။

ကံကောင်းထောက်မစွာပင် ယန္တရားတစ်ထောင် အလုပ်ရုံသခင်သည် သူ၏ ဒေါသကိုသာ ဖောက်ခွဲလိုက်ခြင်း ဖြစ်ပြီး မကြာမီမှာပင် အသိတရား ပြန်လည်ဝင်ရောက်လာခဲ့လေသည်။

"သခင်ကြီး... ရတနာခန်းမဆောင်က ငြိမ်းငြိမ်းချမ်းချမ်းနဲ့ ဆွေးနွေးဖို့ကို ငြင်းဆန်နေပြီဆိုတော့ အခု ကျွန်မတို့ ဘာလုပ်ကြမလဲ"

အမျိုးသမီးက မေးလိုက်သည်။

"ငါတို့ရဲ့ ထောက်လှမ်းရေးသတင်းတွေအရတော့ ရတနာခန်းမဆောင်က အဆောင်သစ်တွေကို ဒီလောက် ပမာဏအများကြီး ရောင်းချနိုင်ရတဲ့အကြောင်းရင်းက... မကြာသေးခင်ကမှ ပေါ်လာတဲ့ လျှို့ဝှက်ဆန်းကြယ်တဲ့ မန္တန်အဆောင် ဆရာသခင်နဲ့ပဲ ပတ်သက်နေတာ ရှင်းနေတာပဲလေ။ တကယ်လို့ ငါတို့သာ အဲဒီလူကို ရှင်းထုတ်နိုင်မယ်ဆိုရင် ငါတို့ရဲ့ ပြဿနာတွေ အားလုံး ပြေလည်သွားလိမ့်မယ်"

ယန္တရားတစ်ထောင် အလုပ်ရုံသခင်က လေသံတိုးတိုးဖြင့် ပြောလိုက်၏။

"ဒါပေမဲ့ ကျွန်မတို့ရဲ့ သူလျှိုတွေ ပြောတာကတော့ အဲဒီလူက အရမ်းကို သိုသိုသိပ်သိပ်နေတယ်တဲ့။ ရတနာခန်းမဆောင်ကို ဝင်ကတည်းက သူက အရမ်းကို တိတ်တိတ်ဆိတ်ဆိတ်နေပြီး အပြင်လည်း သိပ်မထွက်သလို ဘယ်အာဏာပြိုင်ပွဲမှာမှလည်း မပါဝင်ဘူးတဲ့လေ... တစ်နေ့လုံး သူ့ရဲ့ ကျင့်ကြံခြင်းဂူထဲမှာပဲ နေပြီး တခြားသူတွေနဲ့လည်း အဆက်အသွယ် လုံးဝ မလုပ်ဘူးတဲ့။ ရွေးချယ်ထားတဲ့ လူတစ်ယောက်၊ နှစ်ယောက်ကလွဲရင် ဘယ်သူမှ သူ့အနားကို ကပ်လို့မရဘူး။ ပြီးတော့ ဒီလူက သူ့ရဲ့ ကံကြမ္မာကို ကောင်းကင်ဘုံကနေ ဖုံးကွယ်ထားနိုင်တဲ့ ရှားပါး ဝိညာဉ်လက်နက်တစ်ခုကိုလည်း ပိုင်ဆိုင်ထားတဲ့ပုံပဲ။ ကျွန်မတို့ အလုပ်ရုံက ဗေဒင်ဟောကိန်းထုတ်တာမှာ အကျွမ်းကျင်ဆုံး ဆရာတောင်မှ သူ့ရဲ့ ဇာစ်မြစ်ကို တွက်ချက်လို့ မရဘူးလေ။ ဒါကြောင့် သူ့ကို ကိုင်တွယ်ဖို့က တကယ့်ကို ခက်ခဲလိမ့်မယ်"

လှပခမ်းနားစွာ ဝတ်စားဆင်ယင်ထားသော အမျိုးသမီးက အခက်အခဲကြီးစွာဖြင့် ပြောလိုက်လေ၏။

"ဘာပဲဖြစ်ဖြစ် ငါတို့ သူ့ကို ဆက်သွယ်နိုင်မယ့် နည်းလမ်းတစ်ခုခုတော့ ရှာရမယ်... ရတနာခန်းမဆောင်ထဲကနေ သူ့ကို ဆွဲထုတ်နိုင်ရင် ပိုကောင်းတယ်။ ငါတို့လူတွေ အနားကပ်လို့ မရဘူးဆိုရင် အတွင်းထဲကနေ အလုပ်လုပ်ရမယ်။ ရတနာခန်းမဆောင်က လုံးဝ စည်းလုံးနေတယ်ဆိုတာကို ငါ မယုံဘူး... မကျေမနပ်ဖြစ်နေတဲ့သူ တစ်ယောက်ယောက်တော့ သေချာပေါက် ရှိမှာပဲ။ အခုချိန်မှာ ခန်းမဆောင်သခင်က အဆောင်သစ်တွေကို မြှင့်တင်နေပြီး အဆောင်ဟောင်းတွေ အားလုံးကို ရုတ်သိမ်းထားတယ်မလား။ တခြား မန္တန်အဆောင် ဆရာသခင်တွေက ကန့်ကွက်တာ မရှိဘူးလား။ သူတို့ရဲ့ အဆောင်တွေ အရောင်းမသွက်တော့ သူတို့အတွက် ဝင်ငွေ အများကြီးဆုံးရှုံးထားရတာလေ။ ဒါကြောင့် လာဘ်ထိုးရတာဖြစ်ဖြစ် ခြိမ်းခြောက်တာဖြစ်ဖြစ် ဝိညာဉ်ကျောက်တုံးတွေ ဒါမှမဟုတ်လည်း ဝိညာဉ်လက်နက်တွေ ပေးရမယ်ဆိုရင်တောင် ကြီးမားတဲ့ ဆုလာဘ်တွေက ရဲရင့်တဲ့ လူတွေကို အမြဲတမ်း ဆွဲဆောင်နိုင်တယ်။ တစ်ယောက်ယောက်ကတော့ သေချာပေါက် လုပ်ချင်မှာပဲ"

ယန္တရားတစ်ထောင် အလုပ်ရုံသခင်က သွားကို တင်းတင်းကြိတ်ကာ ခြိမ်းခြောက်သည့် ဟန်ဖြင့် ပြောလိုက်၏။

"တခြားမန္တန်အဆောင် ဆရာသခင်တွေ ဟုတ်လား..."

အမျိုးသမီး၏ မျက်လုံးများက တစ်စုံတစ်ခုကို သတိရသွားသည့်အလား လက်ခနဲ ဖြစ်သွားတော့၏။

"သခင်ကြီး... အဲဒီလိုဆိုရင်တော့ ကျွန်မဆီမှာ သင့်တော်မယ့်သူတစ်ယောက် ရှိနိုင်ပါတယ်။ ကျွန်မတို့ရဲ့ သူလျှိုတွေ အဆိုအရ ရတနာခန်းမဆောင်မှာ ချိုးရုံလို့ခေါ်တဲ့ အကဲဖြတ်သခင်တစ်ယောက်ရှိတယ်၊ သူက မန္တန်အဆောင် ဆရာသခင်လည်း ဟုတ်တယ်။ အဲ့ဒီလူက မောက်မာပြီး သဘောထား သေးသိမ်တယ်လို့လည်း နာမည်ကြီးတယ်လေ။ ကြည့်ရတာ သူက အဲဒီ လျှို့ဝှက်ဆန်းကြယ်တဲ့ မန္တန်အဆောင် ဆရာသခင်နဲ့ ပဋိပက္ခ ဖြစ်ဖူးတယ်ထင်တယ်။ အဆောင်သစ်တွေကို စမိတ်ဆက်တုန်းက သူက ရုတ်ရုတ်သဲသဲတောင် လုပ်ခဲ့သေးတာ။ အခု ခန်းမဆောင်သခင်က သူ့ကို အပြစ်ပေးထားလို့ သူ့ရဲ့ လုပ်ရပ်တွေကို ပြန်ပြီးသုံးသပ်ဖို့ သူ့ရဲ့ ကျင့်ကြံခြင်းဂူထဲမှာပဲ အကျယ်ချုပ် ချထားပြီး အပြင်ထွက်ခွင့် ပိတ်ထားတယ်တဲ့။ သူ့လို စိတ်နေစိတ်ထားမျိုးနဲ့ဆိုရင် ရတနာခန်းမဆောင်အပေါ် သေချာပေါက် အငြိုးထားမှာပဲ။ သူက ကျွန်မတို့ရဲ့ ထိုးဖောက်ဝင်ရောက်နိုင်မယ့်လမ်းစ ဖြစ်နိုင်တယ်ရှင့်"

...

ဤစကားကို ကြားသောအခါ ယန္တရားတစ်ထောင် အလုပ်ရုံသခင်မှာ အတိုင်းမသိ ဝမ်းသာသွားလေတော့သည်။

"အရမ်းကောင်းတယ်။ သူက အသင့်တော်ဆုံးသူပဲ။ ချိုးရုံနဲ့ အမြန်ဆုံး ဆက်သွယ်ဖို့ လူတစ်ယောက် လွှတ်လိုက်။ ဝိညာဉ်ကျောက်တုံးတွေကိုလည်း နှမြောမနေနဲ့... သူ့ကို ငါတို့ရဲ့ အတွင်းလူအဖြစ် သိမ်းသွင်းနိုင်ဖို့ ဘာပဲလုပ်ရလုပ်ရ လုပ်လိုက်"

"ဟုတ်ကဲ့ပါ... ကျွန်မ အခုပဲ သွားစီစဉ်လိုက်ပါ့မယ်"

အမျိုးသမီး ရိုသေစွာဖြင့် ထွက်ခွာသွားသည်နှင့် ယန္တရားတစ်ထောင် အလုပ်ရုံသခင်၏ မျက်နှာအမူအရာမှာ နောက်တစ်ဖန် မှုန်မှိုင်းသွားလေတော့သည်။ အထက်လောက ကိုယ်စားလှယ်သည် ဆယ်ရက်ထက်မပိုသော အချိန်အတွင်း ရောက်ရှိလာတော့မည် ဖြစ်၏။

အကယ်၍ ထိုအချိန်မတိုင်မီ လက်ရှိ ပြဿနာများကို သူ မဖြေရှင်းနိုင်ခဲ့လျှင်...

သူသည် အကျိုးအမြတ်များစွာ ရရှိနိုင်သော အလုပ်ရုံသခင် ရာထူးကို ဆုံးရှုံးရမည်သာမက အပြစ်ပေးခြင်းကိုပင် ခံရနိုင်ပေသည်။

ထိုသခင်ကြီး၏ စိတ်နေစိတ်ထားအရ...

အကယ်၍ အပြစ်ပေးခံရမည်ဆိုလျှင် အကျိုးဆက်များက ကြောက်မက်ဖွယ်ကောင်းလှပေမည်။

ထိုအကြောင်းကို တွေးမိရုံဖြင့် အလုပ်ရုံသခင်မှာ အလိုအလျောက် တုန်ယင်သွားကာ သူ၏ နှလုံးသား နက်ရှိုင်းရာမှ အေးစက်မှုတစ်ခု တက်လာတော့၏။ သူ၏ ဆုံးဖြတ်ချက်မှာ ပို၍ ခိုင်မာလာခဲ့သည်။

အကယ်၍ ၎င်းသာ သူ၏ ကံကြမ္မာ ဖြစ်လာမည်ဆိုလျှင်...

သူသည် အရာအားလုံးကို စွန့်စားရမည်သာ ဖြစ်လေတော့၏။

...

ပြင်ပလောကတွင် ရုန်းရင်းဆန်ခတ် ဖြစ်နေချိန်၌ လုချင်းကမူ သူ၏ ကျင့်ကြံခြင်းဂူအတွင်း တည်ငြိမ်စွာဖြင့် ကျင့်ကြံခြင်း၌သာ နစ်မြုပ်နေခဲ့လေသည်။

"ငါ နောက်ဆုံးတော့ အပြည့်အဝ နားလည်သဘောပေါက်သွားပြီပဲ"

လုချင်း မျက်လုံးများကို ဖွင့်လိုက်ရာ သူ၏ မျက်လုံးများထဲတွင် ဂါထာမန္တန်များ မှေးမှိန်စွာ လက်ခနဲ ဖြစ်သွားလေ၏။ လွန်ခဲ့သည့် ရက်များအတွင်း နေ့စဉ် သတ်မှတ်ထားသော အဆောင်အရေအတွက်ကို ဖန်တီးခြင်းမှလွဲ၍ သူသည် အချိန်အားလုံးနီးပါးကို နေရာရွှေ့ပြောင်းခြင်း ဝင်္ကပါ၏ အမွေအနှစ်ကို လေ့လာရာ၌ အသုံးပြုခဲ့ပါ၏။

ယခုအခါ သူသည် နောက်ဆုံးတွင် အပြည့်အဝ နားလည်သဘောပေါက်သွားခဲ့ပြီဖြစ်ပြီး သံသယ အနည်းငယ်မျှပင် မကျန်ရှိတော့ချေ။

"ဒါတောင်မှ ငါ့ရဲ့ နတ်မျက်စိစွမ်းရည်အကူအညီနဲ့ကို နားလည်ဖို့ ဒီလောက်ထိ အချိန်ယူလိုက်ရတယ်။ ဒီနေရာရွှေ့ပြောင်းခြင်း ဝင်္ကပါက တကယ့်ကို နက်နဲပြီး လျှို့ဝှက်ဆန်းကြယ်လွန်းတယ်။ နေရာလွတ် တာအိုဆိုတာ သန္ဓေသားဝိညာဉ် အဆင့်ရှိတဲ့ ကျင့်ကြံသူတွေမှပဲ စထိတွေ့နိုင်တဲ့ နယ်ပယ်တစ်ခုဆိုတာ သေချာတယ်"

လုချင်း စိတ်ထဲမှ သက်ပြင်းချလိုက်လေသည်။ ယခုအခါ သူသည် ကြယ်စင်မြို့တော်ရှိ နေရာရွှေ့ပြောင်းခြင်း ဝင်္ကပါကို အပြည့်အဝ နားလည်သဘောပေါက်သွားပြီ ဖြစ်သော်လည်း လက်ရှိ သူ၏ ကျင့်ကြံခြင်းအဆင့်ဖြင့် ၎င်းကို ကိုယ်တိုင် အသက်သွင်းနိုင်ရန်ကား များစွာ အလှမ်းဝေးနေဆဲပင် ဖြစ်၏။ နေရာရွှေ့ပြောင်းခြင်း ဝင်္ကပါတွင် နေရာလွတ် နိယာမများ ပါဝင်နေပြီး ၎င်းမှာ သန္ဓေသားဝိညာဉ် အဆင့်ရှိ အင်အားကြီးသူများသာ စူးစမ်းလေ့လာခွင့်ရှိသော နယ်ပယ်တစ်ခု ဖြစ်ပေသည်။ မန္တန်အဆောင် ဆရာသခင်များသည် ဂါထာမန္တန်များကို အသုံးပြု၍ နိယာမများနှင့် ဆက်သွယ်နိုင်သော်လည်း လုံလောက်သော ကျင့်ကြံခြင်းမရှိဘဲနှင့်တော့ ဤမျှ အဆင့်မြင့်သော အစီအရင်ကို တည်ဆောက်ရန်မှာ မဖြစ်နိုင်သလောက်ပင်။

ထို့ကြောင့် လုချင်းသည် သူ၏ ထူးခြားသော နတ်မျက်စိစွမ်းရည်ကို အသုံးပြု၍ ကြယ်စင်မြို့တော်၏ နေရာရွှေ့ပြောင်းခြင်း ဝင်္ကပါကို ထုတ်ဖော်နိုင်ခဲ့သော်လည်း နားလည်ခြင်းနှင့် အမှန်တကယ် ဖန်တီးခြင်းသည် အလွန် ကွာခြားလှပေသည်။ လက်ရှိ သူ၏ အဆင့်ဖြင့် ကြယ်စင်မြို့တော်ရှိ အစီအရင်ကဲ့သို့ ဧရာမ နေရာရွှေ့ပြောင်းခြင်း ဝင်္ကပါကို တည်ဆောက်ရန်မှာ လုံးဝ မဖြစ်နိုင်ချေ။

"ငါတောင်မှ ရူးသွပ်တဲ့ အတွေးတစ်ခုကို တွေးမိသေးတယ်။ တကယ်လို့ ငါသာ ဒီနေရာရွှေ့ပြောင်းခြင်း ဝင်္ကပါကို အပြည့်အဝ ကျွမ်းကျင်နိုင်မယ်ဆိုရင် ထျန်းယွမ်ကမ္ဘာလောကကြီးထဲကို ကိုယ်တိုင် နေရာရွှေ့ပြောင်းနိုင်မယ့်အစီအရင်တစ်ခုကို တည်ဆောက်နိုင်မလားလို့လေ။ အဲဒီလိုဆိုရင် ဝိညာဉ်ကျောက်တုံးတွေ အများကြီး သက်သာသွားမှာ။ ဒါပေမဲ့ အခုတော့ ရှင်းသွားပါပြီ... အဲဒါက စိတ်ကူးသက်သက်ပါပဲ"

ထိုအတွေးကြောင့် လုချင်း သူ့ကိုယ်သူ ရယ်မောလိုက်မိတော့သည်။

"ဒါပေမဲ့ ငါက ကမ္ဘာ့အမြှေးပါးကို ထိုးဖောက်ပြီး ကမ္ဘာလောကကို ဖြတ်သန်းနိုင်တဲ့ နေရာရွှေ့ပြောင်းခြင်း ဝင်္ကပါကို မတည်ဆောက်နိုင်သေးပေမဲ့... ငါ့ရဲ့ နတ်မျက်စိစွမ်းရည်ကို သုံးပြီး အစီအရင်ကို ရိုးရှင်းအောင် လုပ်လိုက်မယ်ဆိုရင်တော့... နေရာလွတ်ကို ဖြတ်သန်းပြီး နေရာရွှေ့ပြောင်းဖို့သက်သက်အတွက် အသေးစား နေရာရွှေ့ပြောင်းခြင်း ဝင်္ကပါတစ်ခုကို ဖန်တီးနိုင်တာက မဖြစ်နိုင်စရာ အကြောင်းမှ မရှိတာ"

နေရာရွှေ့ပြောင်းခြင်း ဝင်္ကပါများတွင်လည်း သီးခြား အဆင့်များ ရှိပေသည်။

ကျယ်ပြောလှသော ကြယ်တာရာ ကောင်းကင်ယံကို ဖြတ်ကျော်နိုင်သည့် နယ်ပယ်ဖြတ်ကျော် အစီအရင်များမှသည် ကမ္ဘာ၏ သန္ဓေသားအမြှေးပါးကို ထိုးဖောက်ကာ မတူညီသော ကမ္ဘာများအကြား ကူးသန်းနိုင်သည့် ကမ္ဘာဖြတ်ကျော် အစီအရင်များအထိပင်။

အောက်ဆုံးတွင်တော့ ကမ္ဘာတစ်ခုတည်းအတွင်း ခရီးတို သွားလာရန် ရည်ရွယ်သော အသေးစား ဒေသတွင်း နေရာရွှေ့ပြောင်းခြင်း ဝင်္ကပါများအထိ ရှိလေသည်။ ဤအစီအရင်များအကြား စွမ်းအား ကွာခြားချက်မှာ ကြီးမားလှသကဲ့သို့ ပါဝင်သော နေရာလွတ် နိယာမများ၏ ရှုပ်ထွေးမှုမှာလည်း ထိုနည်းတူပင် ဖြစ်၏။

လုချင်း ရရှိခဲ့သော အမွေအနှစ်မှာ ကြယ်စင်မြို့တော်အတွင်း တွေ့ရှိရသော အစီအရင်ဖြစ်ပြီး ၎င်းသည် မြင့်မားသော အဆင့်ရှိ ကမ္ဘာဖြတ်ကျော် နေရာရွှေ့ပြောင်းခြင်း ဝင်္ကပါအမျိုးအစားတွင် ပါဝင်ပေသည်။ ဤသို့သော အစီအရင်မျိုးကို နေရာလွတ် နိယာမများအပေါ် နက်ရှိုင်းသော နားလည်မှုရှိပြီး ဂါထာမန္တန် အခြေခံ အစီအရင်များကို ကျွမ်းကျင်စွာ အမိန့်ပေးနိုင်သော ဝါရင့် သန္ဓေသားဝိညာဉ်အဆင့် ကျင့်ကြံသူများသာ တည်ဆောက်နိုင်ခြင်း ဖြစ်၏။

လက်ရှိ သူ၏ စွမ်းရည်များဖြင့် လုချင်းသည် ဤသို့သော အရာမျိုးကို တည်ဆောက်ရန် များစွာ အလှမ်းဝေးနေဆဲပင်။ သို့သော် ကမ္ဘာဖြတ်ကျော် နေရာရွှေ့ပြောင်းခြင်း ဝင်္ကပါက သူ့အတွက် လက်လှမ်းမမီနိုင်သော်လည်း အနိမ့်ဆုံး အဆင့်ဖြစ်သည့် အသေးစား နေရာလွတ် ရွှေ့ပြောင်းခြင်း အစီအရင်များနှင့် ပတ်သက်လာလျှင်မူ ဖြစ်နိုင်ခြေ အနည်းငယ်တော့ ရှိနေပေသည်။ လုချင်း မျက်လုံးများကို ပြန်မှိတ်လိုက်ပြီး သူ၏ နတ်မျက်စိစွမ်းရည်ကို အသက်သွင်းကာ ကျင့်ကြံခြင်းကို ပြန်၍စတင်လိုက်တော့သည်။

သို့သော် ဤတစ်ကြိမ်တွင်တော့ သူ၏ ချဉ်းကပ်ပုံကို ပြောင်းလဲလိုက်၏။ စိတ်ကို စုစည်းကာ သူ နားလည်သဘောပေါက်ထားပြီးဖြစ်သော နေရာရွှေ့ပြောင်းခြင်း ဝင်္ကပါကို စတင် ရိုးရှင်းအောင် ပြုလုပ်လေတော့သည်။ လုချင်း၏ တွက်ချက်မှု ဆက်လက်လုပ်ဆောင်နေသည်နှင့်အမျှ သူ၏ နှလုံးသားထဲတွင် အသိဉာဏ်လှိုင်းလုံးများ ပေါ်ထွက်လာခဲ့သည်။ နောက်ဆုံးတွင် ရိုးရှင်းသော်လည်း နက်နဲလှသော အသေးစားအစီအရင်တစ်ခု သူ၏ အသိစိတ်ထဲတွင် ပေါ်လာသည်အထိ မည်မျှကြာသွားမှန်းပင် မသိလိုက်ချေ။

"နောက်ဆုံးတော့ ငါ အဖြေရှာတွေ့သွားပြီ"

လုချင်း၏ နှလုံးသားထဲတွင် ဝမ်းသာပီတိ အရိပ်အယောင်တစ်ခု ပေါ်ထွက်လာခဲ့၏။ သို့သော် သူ ချက်ချင်းပင် သူ့ကိုယ်သူ ပြန်၍တည်ငြိမ်စေလိုက်သည်။ ယခုအချိန်အထိ သူသည် အစီအရင်ကို သီအိုရီအရသာ တွက်ချက်ထားခြင်း ဖြစ်၏။ ၎င်းက အလုပ်လုပ်မည်၊ မလုပ်မည်ကိုတော့ လက်တွေ့တွင် သက်သေပြရန် လိုအပ်နေသေးပေသည်။ ခေတ္တမျှ စဉ်းစားပြီးနောက်တွင်တော့ လုချင်းသည် သူ၏ သိုလှောင်အိတ်ထဲမှ ဝိညာဉ်ကျောက်စိမ်းတစ်ခုကို ထုတ်ယူကာ စတင် ထွင်းထုလေတော့သည်။ ဂါထာမန္တန် လှိုင်းလုံးများက သူ၏ ထိန်းချုပ်မှုအောက်တွင် လေဟာနယ်ထဲမှ သန့်စင်ထွက်ပေါ်လာ၏။

ဤဂါထာမန္တန်များမှာ အလွန်ကိုမှ ရှုပ်ထွေးနက်နဲလှသည်။ ၎င်းတို့ ပေါ်လာသည်နှင့်တစ်ပြိုင်နက် ပတ်ဝန်းကျင် လေဟာနယ်မှာ မသိမသာ တုန်ခါလာတော့သည်။ ၎င်းတို့ကား အခြားမဟုတ်ဘဲ နေရာရွှေ့ပြောင်းခြင်း ဝင်္ကပါမှ သူနားလည်သဘောပေါက်ထားသော ဂါထာမန္တန်များပင် ဖြစ်ပြီး နေရာလွတ် နိယာမများကို အသက်သွင်းနိုင်စွမ်း ရှိကြပေသည်။

ပုံမှန်အားဖြင့် ဤသို့သော ဂါထာမန္တန်များကို ရွှေအမြုတေအဆင့်ရှိ မည်သူမဆို ကျွမ်းကျင်ရန်မဆိုထားနှင့်၊ နားလည်ရန်ပင် အလွန်ခက်ခဲလှပေသည်။ သို့သော် ထူးခြားသော နတ်မျက်စိစွမ်းရည်နှင့် ထူးကဲသော ဉာဏ်ရည်ဉာဏ်သွေးကို ပိုင်ဆိုင်ထားသည့်အပြင် ဂါထာမန္တန် တာအို၌လည်း မွေးရာပါ ပါရမီပါသော လုချင်းကမူ အခြားသူများ မဖြစ်နိုင်ဟု ထင်ရမည့်အရာကို အောင်မြင်စွာ လုပ်ဆောင်နိုင်ခဲ့ပါ၏။

သူ၏ ဝိညာဉ်ဆန္ဒများ မြင့်တက်လာသည်နှင့်အမျှ သန့်စင်ထားသော ဂါထာမန္တန်များသည် သူ၏ လက်ထဲရှိ ဝိညာဉ်ကျောက်စိမ်းထဲသို့ စတင်ပေါင်းစပ်သွားတော့သည်။ သို့သော် နောက်တစ်ခဏတွင် တဖျန်းဖျန်းမြည်သံတစ်ခု ထွက်ပေါ်လာပြီး ဝိညာဉ်ကျောက်စိမ်းမှာ အက်ကွဲကြောင်းများ ပေါ်လာကာ လုံးဝ အပိုင်းပိုင်းအစစ ကွဲအက်သွားလေတော့၏။

"ကြည့်ရတာ အဆင့်နိမ့် ဝိညာဉ်ကျောက်စိမ်းက ဒီအဆင့်ရှိတဲ့ ဂါထာမန္တန်တွေကို ခံနိုင်ရည်မရှိဘူး ထင်တယ်..."

လုချင်း အံ့အားသင့်မသွားခဲ့ချေ။ နေရာရွှေ့ပြောင်းခြင်း ဝင်္ကပါများသည် နေရာလွတ် နိယာမများနှင့် သက်ဆိုင်နေပေသည်။ သူ ကြိုးစားနေသည်မှာ ကြီးမားစွာ ရိုးရှင်းအောင် ပြုလုပ်ထားသော အသေးစား နေရာရွှေ့ပြောင်းခြင်း ဝင်္ကပါတစ်ခု ဖြစ်လင့်ကစား ၎င်း၏ စွမ်းအားက အဆင့်နိမ့် ဝိညာဉ်ကျောက်စိမ်း ခံနိုင်ရည်ရှိသည့် ပမာဏထက် ကျော်လွန်နေဆဲပင် ဖြစ်၏။

အတန်ကြာ စဉ်းစားပြီးနောက် လုချင်းသည် ဆက်သွယ်ရေး အဆောင်တစ်ခုကို ထုတ်ယူကာ သတင်းစကားတစ်ခု ပေးပို့လိုက်လေသည်။ သိပ်မကြာခင်မှာပင် ဂူအပြင်ဘက်မှ အစီအရင် စွမ်းအင်လှိုင်းတစ်ခု ထွက်ပေါ်လာ၏။ လုချင်း တံခါးကိုဖွင့်ကာ အပြင်သို့ ထွက်လာသောအခါ၌ အဝင်ဝတွင် ရိုသေစွာ ရပ်နေသော ကျိယွမ်ကို တွေ့လိုက်ရလေသည်။

"လုချန်ပေ့... ဒါက ရှင်တောင်းထားတဲ့ အဆင့်မြင့်နဲ့ ထိပ်တန်းအဆင့် ဝိညာဉ်ကျောက်စိမ်းတွေပါ"

ကျိယွမ်က ပိုးကြိုးသေတ္တာတစ်လုံးကို ကမ်းပေးလိုက်သည်။ လုချင်းက ၎င်းကို ယူပြီး ဖွင့်ကြည့်လိုက်ရာ အတွင်း၌ တောက်ပနေသော ဝိညာဉ်ကျောက်စိမ်းအချို့ကို သေသပ်စွာ စီရီထားသည်ကို တွေ့လိုက်ရ၏။

"ဘဏ္ဍာတိုက်မှာ အဆင့်မြင့် ကျောက်စိမ်းလက်ကျန်က အကန့်အသတ်ရှိလို့ပါ။ ရှင်က အရေးတကြီး လိုအပ်နေတယ်ဆိုလို့ ကျွန်မတို့ဆီမှာ လက်ရှိရှိသမျှ အားလုံးကို ယူလာခဲ့ပါတယ်။ ဒါတွေက မလုံလောက်ဘူးဆိုရင် ခန်းမဆောင်သခင်က တခြားခန်းမဆောင်ခွဲတွေကနေ ထပ်တောင်းပေးမယ်လို့ ပြောပါတယ်"

ကျိယွမ်က ရှင်းပြလိုက်သည်။

"လောလောဆယ်တော့ ဒါတွေဆို လုံလောက်ပါပြီ"

လုချင်းက အတွင်းရှိ ပစ္စည်းများကို လှမ်းကြည့်လိုက်သည်။ ဝိညာဉ်ကျောက်စိမ်း အခု လေးဆယ်နီးပါးခန့်ရှိပြီး ၎င်းတို့အနက် ဆယ်ခုမှာ ထိပ်တန်းအဆင့်ဖြစ်ကာ ကျန်သည်များမှာ အဆင့်မြင့်များ ဖြစ်ကြသည်။ ဝိညာဉ်ကျောက်တုံးများကဲ့သို့ပင် ဝိညာဉ်ကျောက်စိမ်းများသည်လည်း အဆင့်တစ်ဆင့်ချင်းစီအလိုက် တန်ဖိုး များစွာ မြင့်တက်လာပေသည်။ ထို့ကြောင့် အရေအတွက်က နည်းပါးပုံရသော်လည်း ၎င်းတို့၏ တကယ့်တန်ဖိုးမှာ အလွန် ကြီးမားလှပေ၏။

"လုချန်ပေ့... ရှင်က အဆင့်မြင့် အဆောင်တွေကို ဖန်တီးဖို့ စီစဉ်နေတာလား"

ကျိယွမ်က သိချင်စိတ်ဖြင့် မေးလိုက်သည်။ လုချင်းသည် အဆောင်များ ဖန်တီးရာတွင် အဆင့်နိမ့် ဝိညာဉ်ကျောက်စိမ်းများကိုသာ အမြဲတမ်း အသုံးပြုခဲ့ခြင်း ဖြစ်သည်။ ၎င်းမှာ သူ ပိုမိုမြင့်မားသော အဆင့်ရှိ ပစ္စည်းများကို ပထမဆုံးအကြိမ် တောင်းဆိုခြင်းပင်။

"ကျွန်တော် စမ်းလုပ်ကြည့်ချင်တဲ့ အထူးအဆောင်တချို့ ရှိလို့ပါ"

လုချင်းက ပြန်ဖြေလိုက်သည်။

ကျိယွမ်ကလည်း ခေါင်းညိတ်လိုက်ပြီး မည်သည့်သံသယကိုမျှ မပြသခဲ့ချေ။ အမှန်တကယ်တွင် ခန်းမဆောင်ရှိ မန္တန်အဆောင် ဆရာသခင်အများအပြားသည် ဖန်တီးရန်အတွက် အဆင့်မြင့် ဝိညာဉ်ကျောက်စိမ်းများကို မကြာခဏ တောင်းဆိုလေ့ရှိကြပေ၏။ ၎င်းနှင့်ဆန့်ကျင်စွာ လုချင်းကဲ့သို့သော သူကသာ အဆင့်နိမ့် ပစ္စည်းများကို အမြဲ တောင်းဆိုနေခြင်းက တကယ့်ကို ထူးဆန်းမှုတစ်ခု ဖြစ်နေပါ၏။ ကျိယွမ် ထွက်သွားပြီးနောက်၌ လုချင်းသည် သူ့ဂူထဲသို့ ပြန်ဝင်ကာ အဆင့်မြင့် ဝိညာဉ်ကျောက်စိမ်း တစ်ခုကို ကောက်ကိုင်လိုက်လေသည်။

သူ့စိတ်ကို စုစည်းကာ နက်ရှိုင်းသော ဂါထာမန္တန်များကို နောက်တစ်ဖန် ထုတ်ယူပြီး ကျောက်စိမ်းထဲသို့ ပေါင်းစပ်လိုက်၏။ အဆင့်မြင့် ဝိညာဉ်ကျောက်စိမ်းသည် အဆင့်နိမ့် ကျောက်စိမ်းနှင့် နှိုင်းယှဉ်ပါက ဂါထာမန္တန် အစီအရင်များ၏ စွမ်းအားကို ခံနိုင်ရည်ရှိမှုမှာ များစွာ သာလွန်ကောင်းမွန်လှပေသည်။ ဂါထာမန္တန်အများအပြားသည် ဝိညာဉ်ကျောက်စိမ်းထဲသို့ စီးဝင်သွားပြီး ဤတစ်ကြိမ်တွင်တော့ ၎င်းမှာ ကွဲအက်သွားခြင်း မရှိတော့ချေ။ သို့တိုင်အောင် လုချင်းက ပေါ့ဆရဲခြင်း မရှိပေ။ သူသည် အပြည့်အဝ အာရုံစိုက်ထားကာ ဂါထာမန္တန်တစ်ခုချင်းစီကို သေချာစွာ ထွင်းထုပြီး ကျောက်စိမ်းအတွင်းရှိ သင့်လျော်သော အစီအရင်တစ်ခုအတွင်း ညီညွတ်စွာ နေရာချထားလေသည်။

နောက်ဆုံးတွင် နောက်ဆုံးဂါထာမန္တန်တစ်ခု ဝင်ရောက်သွားသည်နှင့် ကျောက်စိမ်း၏ မျက်နှာပြင်ပေါ်တွင် တောက်ပသော အလင်းရောင်တစ်ခု ဖြာထွက်သွားတော့၏။ အလင်းရောင် မှေးမှိန်သွားသောအခါ အတွင်းမှ လျှို့ဝှက်ဆန်းကြယ်သော အငွေ့အသက်တစ်ခု စတင် ထွက်ပေါ်လာလေသည်။

"ပြီးသွားပြီပဲ"

လုချင်းက ကျောက်စိမ်းကို ကြည့်ရင်း အနည်းငယ် ပြုံးလိုက်လေသည်။

ထိုအချိန်မှာပင် ရတနာခန်းမဆောင်၏ အခြားတစ်ဖက်ရှိ ကျင့်ကြံခြင်းဂူတစ်ခု၏ အဝင်ဝအနီးသို့ ခိုးကြောင်ခိုးဝှက် ပုံရိပ်တစ်ခုက တိတ်တဆိတ် ချဉ်းကပ်လာနေခဲ့၏။

...