ကယ်ဆယ်ရေး (၂)

ကင်းထောက်အမျိုးသမီး စုန့်ဝေသည် ဒူးတစ်ဖက်ထောက် ထိုင်ချလိုက်ပြီး ပူပြင်းလှသော သဲကျောက်ခဲများပေါ်သို့ လက်ဝါး တင်းတင်းကြပ်ကြပ်ဖိကပ်လိုက်ရာ သူမထံမှ မမြင်နိုင်သော စွမ်းအင်တုန်ခါလှိုင်းတစ်ခု ပျံ့နှံ့သွားသည်။ စက္ကန့်အနည်းငယ်အကြာတွင် သူမ မျက်မှောင်ကြုတ်သွားသည်၊၊

“သင်္ဘောကိုယ်ထည်ထဲမှာ အားနည်းတဲ့ သက်ရှိလှုပ်ရှားမှု အရိပ်အယောင်ရှိနေတယ်၊၊ ဒါပေမဲ့ ဘာကောင်လဲတော့ ခွဲလို့မရဘူး။ တစ်ခုခုထွက်သွားတာ ဖြစ်နိုင်သလို... ဒါမှမဟုတ် အထဲမှာရှိနေဆဲလည်း ဖြစ်နိုင်တယ်”

သူနှင့် အရပ်ချင်းနီးပါးတူသော လေးလံသည့် Gauss စနိုက်ပါရိုင်ဖယ်ကို ထမ်းပိုးထားသည့် စနိုက်ပါသမား လုစ်က မျက်နှာဖုံးနောက်ကွယ်မှ စကားပြောလာသည်။

“ဖြစ်နိုင်ခြေတွက်ချက်မှုအရ လူသားမဟုတ်တဲ့ ပစ်မှတ်ဖြစ်ဖို့ ၉၉.၇ ရာခိုင်နှုန်း ရှိတယ်၊၊ မွန်းစတားဖြစ်ဖို့ အလားအလာအများဆုံးပဲ။ ဘော့စ်... ဘာလုပ်ကြမလဲ”

ရေမွန်သည် ကီကီကို တစ်ချက်လှမ်းကြည့်ကာ ချက်ချင်းပင် တုံ့ပြန်လိုက်သည်။

“ဖက်ဒရေးရှင်းရဲ့ စံနှုန်းမီစစ်သင်္ဘောတွေမှာပါတဲ့ အေးခဲအိပ်စက်အခန်းတွေက အားကောင်းတဲ့ အချက်ပြစနစ်ပါတယ်။ အကယ်၍ အဲဒါက အလုပ်လုပ်နေတုန်းဆိုရင် ငါတို့ ဒီအကွာအဝေးကနေ သေချာပေါက်ဖမ်းယူနိုင်ရမယ်”

သူ၏ဆိုလိုရင်းမှာ ရှင်းနေသည်။ အကယ်၍ လင်းရှန်သာ သက်ရှိထင်ရှားရှိနေသေးလျှင် အေးခဲအိပ်စက်အခန်းသည် အလုပ်လုပ်နေရမည်ဖြစ်ပြီး သို့မှသာ လူသားတစ်ဦးအနေဖြင့် ယခုကဲ့သို့ ပိတ်ဆို့နေသော အခန်းငယ်ထဲတွင် အချိန်အတော်ကြာအသက်ရှင်နိုင်မည်ဖြစ်သည်။ သို့သော် ဤပို့ဆောင်ရေးသင်္ဘောပေါ်တွင် အေးခဲအိပ်စက်အခန်း၏ မည်သည့်အချက်ပြမှုကိုမျှ မတွေ့ရှိရသဖြင့် လင်းရှန်က ဤနေရာတွင်ရှိမနေကြောင်း ညွှန်ပြနေသည်။

မှန်ပေသည်၊၊ သူက လုံးဝငြင်းဆိုနေခြင်းတော့ မဟုတ်ချေ။

ကီကီက ထိုအချိန်တွင် တည်ငြိမ်စွာဖြင့် “လင်းရှန်ရဲ့ ယန္တရားစွမ်းအားက သာမန်နဲ့မတူဘူး၊၊ အေးခဲအိပ်စက်အခန်းမရှိရင်တောင် သူကိုယ်တိုင်တစ်ခုခုဖန်တီးနိုင်တယ်၊၊ ပြီးတော့ သူ့မှာ ကာကွယ်ရေးစွမ်းအားဝတ်စုံလည်းရှိသေးတယ်”

“စွမ်းအားဝတ်စုံ ဟုတ်လား” အားလွန်က ဤနေရာတွင် ဝင်ပြောသည်။

“အေးခဲအိပ်စက်နေတဲ့အချိန်မှာ စွမ်းအားဝတ်စုံကို ဘယ်လိုဝတ်ထားမှာလဲ”

ရေမွန်က ကီကီကို ကြည့်လိုက်ပြီး “မင်းက ပို့ဆောင်ရေးသင်္ဘောရဲ့ နံပါတ်ကို တကယ်ပဲ မမှတ်မိတော့ဘူးလား။ ဟတ်ကိုစစ်မြေပြင်က ရှုပ်ထွေးခဲ့ပေမဲ့ ဒီကာလအတွင်း ငါတို့ ရှာဖွေခဲ့သလောက်တော့ တပ်ဖွဲ့တွေရဲ့ တည်နေရာနဲ့ စစ်ကြောင်းတွေက လုံးဝကြီးပျက်ပြားသွားတာမျိုး မဟုတ်ဘူး။ အကယ်၍ တည်နေရာကို ရှာတွေ့ရင် ရှာဖွေရမယ့်ဇုန်က အများကြီးကျဉ်းမြောင်းသွားလိမ့်မယ်”

ကီကီက ခေါင်းခါယမ်းကာ တိုးညှင်းစွာ ပြောသည်။ “အဲဒီအချိန်တုန်းက မြေငလျင်ငါးခူက ချန်းယင်သင်္ဘောကို တိုက်ခိုက်ပြီး သွေးနီရောင်မြူတွေ အများကြီးထုတ်လွှတ်ခဲ့တယ်။ ကျွန်မလည်း လင်းရှန်ရဲ့ အေးခဲအိပ်စက်အခန်းကို စစ်မြေပြင်ကနေ လွတ်မြောက်ဖို့ ပို့ဆောင်ရေးသင်္ဘောတစ်စင်းပေါ် ပစ်တင်ပေးဖို့ပဲ အာရုံရောက်နေလို့ သင်္ဘောနံပါတ်ကို သတိမထားမိလိုက်ဘူး...”

“ပြီးတော့ မင်းက မြေငလျင်ငါးခူရဲ့ ရိုက်ခတ်လှိုင်းကို တစ်ယောက်တည်းရင်ဆိုင်ခဲ့တာပေါ့”

လုစ်က အံ့ဩချီးကျူးသည့်လေသံဖြင့် “အံ့ဩဖို့ကောင်းလိုက်တာ… အဲဒါက ကမ္ဘာပျက်ကပ်အဆင့်ကြီးလေ။ လူသားတွေရဲ့ စွမ်းအားက အခုလိုအဆင့်ထိ ရောက်နိုင်လိမ့်မယ်လို့ စိတ်ကူးဖို့တောင်ခက်တယ်”

“စိတ်စွမ်းအားကို သုံးပြီး မြေငလျင်ငါးခူရဲ့ တုန်ခါလှိုင်းပြန်ကန်ချက်ကို ထိန်းချုပ်ပြီး S-Class မွန်းစတားရဲ့ ခေါင်းတစ်ဝက်ကို ဖြတ်တောက်နိုင်ခဲ့တယ်၊၊ ဇီဝစွမ်းအင်ဒိုင်းအားလုံးကိုလည်း ချေဖျက်ပေးခဲ့လို့ အနည်းဆုံးလူတစ်သိန်းလောက် အောင်မြင်စွာ ဆုတ်ခွာနိုင်ခဲ့တာပဲ။ အဲဒါက သာမန်စွမ်းအားမျိုးမဟုတ်ဘူး”

စုန့်ဝေက လျှောက်လာပြီး ကီကီကို ကြည့်ကာ “အခု ငါတို့ ညလမ်းလျှောက်သူတွေအတွက် စိတ်စွမ်းအားလေ့ကျင့်ခန်း သင်ခန်းစာတွေရဲ့ စိတ်စွမ်းအင်အသုံးချမှုပုံစံက နင် ဟတ်ကိုတိုက်ပွဲတုန်းက ပြသခဲ့တဲ့ စွမ်းဆောင်ရည်ကိုပဲ အခြေခံထားတာပဲ”

စုန့်ဝေ၏ ချီးကျူးစကားကို ကြားသောအခါ ပုံမှန်အားဖြင့် တက်ကြွလှသော ကီကီသည် တိုးညှင်းစွာ တုံ့ပြန်လိုက်သည်၊၊

“အချိန်မဖြုန်းပါနဲ့တော့ လင်းရှန်ကို မြန်မြန်ရှာရအောင်”

ကပ္ပတိန် ရေမွန်သည် ကီကီ၏ စိုးရိမ်ပူပန်မှုကို နားလည်သောကြောင့် အချိန်ဆွဲမနေတော့ဘဲ ချက်ချင်းပင် အမိန့်ပေးလိုက်သည်။

“အားလွန်... ဖြိုဖျက်ဖို့ ပြင်ဆင်တော့… လုစ်... သေနတ်ကို အမြင့်ပိုင်းတစ်ခုမှာ နေရာချပြီး ပစ်မှတ်ကို လော့ခ်ချ… စုန့်ဝေ... ပုံမှန်မဟုတ်တဲ့ စွမ်းအင်အရင်းအမြစ်တွေကို ဆက်ပြီး စကင်ဖတ်… ကီကီ... ဒီပို့ဆောင်ရေးသင်္ဘောကို အပြင်ထုတ်လိုက်စို့”

“ကောင်းပြီ”

ကီကီ၏ မျက်ဝန်းများတွင် ခရမ်းရောင်အလင်းတန်းများ ဖျတ်ခနဲ လင်းလက်သွားသည်။ အားလုံးအဆင်သင့်ဖြစ်ပြီးနောက် သူမသည် ရှေ့သို့ တက်လှမ်းကာ လက်ညှိုးများကို ကောင်းကင်သို့ ကုတ်ဆွဲလိုက်ရာ သူမ၏ ကျယ်ပြန့်လှသော စိတ်စွမ်းအားသည် မမြင်နိုင်သော ဘီလူးလက်ကြီးတစ်ခုကဲ့သို့ အဝါရောင်သဲပြင်ထဲသို့ တိုးဝင်သွားတော့သည်။ နားကွဲလုမတတ်ပေါက်ကွဲသံကြီးနှင့်အတူ တန်ချိန်ရာချီလေးသော ပို့ဆောင်ရေးသင်္ဘော ပျက်စီးခြင်းအကြွင်းအကျန်တစ်ခုလုံးသည် ရေနက်ပိုင်းရှိ မွန်းစတားကြီးတစ်ကောင်က မတင်လိုက်သကဲ့သို့ မြေအောက်မှ အတင်းအကျပ်ဆွဲထုတ်ခံလိုက်ရကာ သဲများ တဝေါဝေါကျဆင်းလာသည်။

ပုံပျက်သွားသော သတ္တုများ၏ တဂျိဂျိမြည်သံများနှင့်အတူ ခြောက်သွေ့မည်းမှောင်နေသော အလောင်းများနှင့် ပျက်စီးနေသောရိက္ခာသေတ္တာများ လိမ့်ဆင်းလာကြသည်။ ပျက်စီးနေသောအကြွင်းအကျန်များ မြောက်တက်သွားသည့် ထိုအချိန်တွင်ပင် သင်္ဘောဝမ်းဗိုက်၏ အက်ကြောင်းမှ နက်မှောင်သော သွေးနီရောင်အရိပ်တစ်ခု ဝုန်းခနဲပြေးထွက်လာပြီး အနီးဆုံးရှိနေသည့် အားလွန်ထံသို့ တည့်တည့် ပျံသန်းလာသည်။ ၎င်းသည် အရေပြားခွာထားသော ပင့်ကူတစ်ကောင်နှင့် တူပြီး ၎င်း၏ဦးခေါင်းခွံအတွင်းရှိ အခေါင်းပွထဲမှ တောက်ပသောအာရုံခံမျှင်များထွက်ပေါ်နေသည်။

“သေချင်နေတာပဲ”

ကီကီက အေးစက်စွာ နှာခေါင်းရှုံ့လိုက်ပြီး စိတ်စွမ်းအားများကို မမြင်နိုင်သော လက်ကြီးတစ်ဖက်အဖြစ် ချက်ချင်း စုစည်းကာ ထိုသွေးနီရောင်သတ္တဝါကို အတိကျဖမ်းဆုပ်လိုက်ရာ ဖောက်ခနဲအသံနှင့်အတူ ထိုအင်းဆက်သတ္တဝါမှာ လေထုထဲ၌ပင် ပေါက်ကွဲသွားပြီး စေးကပ်သော ညိုမည်းရောင်အရည်များ နေရာအနှံ့ စင်ထွက်သွားတော့သည်။

“လန့်သွားတာပဲ”

အားလွန်က တံတွေးထွေးလိုက်ပြီး သူ၏လက်ထဲရှိ အကြီးစား လျှပ်စစ်ပြောင်းတိုသေနတ်ကို အောက်ချလိုက်သည်။ သို့သော် သူ၏စိတ် အနည်းငယ်လျော့ရဲသွားသည့် ထိုအချိန်၌ပင် စုန့်ဝေ၏ စူးရှသောအော်ဟစ်သံက သွေးနီရောင်သဲမုန်တိုင်းကို ဖြတ်သန်းထွက်ပေါ်လာသည်။

“အဲဒါ အမဲလိုက်သတ္တဝါပဲ”

အားလွန်၏ တစ်ကိုယ်လုံးရှိ အမွေးအမှင်များ ထောင်ထသွားသည်။ သူ လှည့်မကြည့်ရသေးခင်မှာပင် သူ၏နောက်ဘက်ရှိ သွေးနီရောင်လေစီးကြောင်းများက တရှဲရှဲမြည်သံများ ထွက်ပေါ်နေသည်ကို သူ ခံစားလိုက်ရသည်။

ရေမွန်နှင့် ကီကီတို့သည် စုန့်ဝေ၏ အော်ဟစ်သံနောက်သို့ လိုက်ကြည့်လိုက်ရာ အလွန်၏ နောက်ကွယ် မီတာအနည်းငယ်အကွာရှိ သဲသောင်ခုံပေါ်တွင် မြင့်မားပြီး မည်းမှောင်သော သွေးနီရောင်အရိပ်တစ်ခုသည် စာခြောက်ရုပ်ကဲ့သို့ မတ်တတ်ရပ်နေသည်ကို မြင်လိုက်ရသည်။ ၎င်းသည် ကြီးမားသော လူသားတစ်ဦးနှင့် တူလှသည်။

“သတိထား... အဲဒီသတ္တဝါက အနည်းဆုံး သွေးနီရောင် A-level အဆင့်ပဲ”

ရေမွန်က ချက်ချင်း တုံ့ပြန်ကာ အသံကျယ်ကျယ်ဖြင့် သတိပေးလိုက်သော်လည်း သူ၏လက်များပေါ်တွင် လျှပ်စီးကြောင်းများစတင်စုစည်းလာချိန်၌ပင် ထိုသတ္တဝါသည် လေထဲတွင် အရည်ပျော်သွားသကဲ့သို့ ဖြစ်သွားပြီး ၁၀မီတာကျော်အကွာအဝေးမှနေ၍ မျက်စိတစ်မှိတ်အတွင်းမှာပင် အားလွန်၏ နောက်ကျောသို့ ရောက်သွားတော့သည်။ ခြောက်သွေ့ပြီး စေးကပ်သော သွေးနီရောင်စွမ်းအင်များ ဖုံးလွှမ်းနေသော လက်သည်းကြီးသည် လေထုကို ဆွဲဖြဲကာ တစ္ဆေတစ်ကောင်အလားအော်မြည်လျက် အားလွန်၏ နောက်ကျောကို ပြင်းထန်စွာ ရိုက်ခတ်လိုက်သည်။

ဝူး... အားလွန်၏ စွမ်းအားဝတ်စုံရှိ အရေးပေါ်စွမ်းအင်ဒိုင်းသည် ချက်ချင်းအလုပ်လုပ်သွားပြီး အပြာနုရောင်ဒိုင်းကာသည် ဝုန်းခနဲပေါက်ကွဲမသွားမီ ၁စက္ကန့်၏ ထောင်ပုံတစ်ပုံမျှသာ ခံနိုင်ခဲ့သည်။ သတ္တုများ ဆွဲဖြဲခံရသည့် စူးရှသောအသံ ထွက်ပေါ်လာပြီး အားလွန်သည် မြို့တံခါးဖျက်တုံးဖြင့် အတိုက်ခံရသကဲ့သို့ အမြှောက်ကျည်ဆန်တစ်ခုအလား ရှေ့သို့လွင့်ထွက်သွားတော့သည်။ သူ၏ ကြီးမားသော အလွိုင်းယန္တရားလက်မောင်းသည် ပခုံးချပ်ဝတ်နှင့်အတူ အတင်းအကျပ်ဆွဲဖြဲခြင်းခံလိုက်ရပြီး ပြတ်တောက်သွားသောနေရာမှ မီးပွားများနှင့် ဟိုက်ဒရောလစ်ဆီများ ကြမ်းတမ်းစွာ စင်ထွက်သွားသည်။

“အား...”

ပြင်းထန်လှသော နာကျင်မှုကြားမှပင် အားလွန်သည် အံ့ဩဖွယ်ကောင်းသော တိုက်ခိုက်ရေးစွမ်းရည်ကို ပြသခဲ့သည်။ သူသည် လေထဲ၌ပင် ဘယ်လက်ဖြင့် သူ၏နောက်ဘက်သို့ သေနတ်ဖြင့် ရမ်းသန်းပစ်ခတ်လိုက်သည်။ ဘန်း... ပြင်းထန်သော အဖြူရောင်လျှပ်စစ်စွမ်းအင်တစ်ခုသည် သူ၏နောက်၌ ပေါက်ကွဲသွားပြီး ထိုသတ္တဝါ၏ လိုက်လံတိုက်ခိုက်မှုကို ခဏတာ အဟန့်အတားဖြစ်စေခဲ့သည်။

“ကာဗာပေးကြ”

ရေမွန်က ဟိန်းဟောက်လိုက်ပြီး သူ၏လက်သီးနှစ်ဖက်ကို ရိုက်ခတ်လိုက်သည်။ ဝူး... မျက်စိဖြင့် မြင်နိုင်သော မိုးပြာရောင်သံလိုက်မုန်တိုင်းရိုက်ခတ်လှိုင်းတစ်ခုသည် သူ့ကိုဗဟိုချက်ပြု၍ ပြင်းထန်စွာ ပျံ့နှံ့သွားတော့သည်။ ရိုက်ခတ်လှိုင်းဖြတ်သန်းသွားစဉ် သဲများလွင့်တက်လာပြီး လေထုပုံပျက်သွားကာ သတ္တဝါ၏ လိုက်လံတိုက်ခိုက်မည့် လမ်းကြောင်းပေါ်သို့ ပြင်းထန်စွာ ရိုက်ခတ်မိသဖြင့် ၎င်း၏ ထူးဆန်းသော အရိပ်ပုံသဏ္ဌာန်မှာ ပထမဆုံးအကြိမ်အဖြစ် တုံ့ဆိုင်းသွားခဲ့သည်။

ဤအခွင့်အရေးကိုအရယူကာ ရေမွန်သည် အားလွန်၏ ဘေးနားသို့ ပြေးသွားပြီး ကျောချင်းကပ်ကာ ကာကွယ်ရေးပုံစံယူလိုက်သည်။

“စုန့်ဝေ... အာရုံစိုက်ထား”

“အိုကေ”

စုန့်ဝေက ဘေးဘက်သို့ ဖျတ်လတ်စွာ လိမ့်သွားပြီး သူမ၏တစ်ကိုယ်လုံးမှ စွမ်းအားလှိုင်းများ ထွက်ပေါ်လာကာ လျင်မြန်သောသွေးနီရောင်သတ္တဝါကို ချုပ်နှောင်ရန် တုန်ခါလှိုင်းကို စတင်ထုတ်လွှတ်လိုက်သည်။

“ရပြီ”

အမြင့်ပိုင်းတွင်မူ လုစ်၏ စနိုက်ပါမှန်ပြောင်းသည် ပစ်မှတ်ပေါ်သို့ ကျရောက်နေသည်။ သတ္တဝါ၏ ခန္ဓာကိုယ်မှာ သွေးနီရောင်မြူခိုးများကြားတွင် တစ်ဝက်ခန့်သာထင်ရှားပြီး ပုံသေမရှိဘဲ တဖျတ်ဖျတ်ဖြစ်နေသဖြင့် ပစ်မှတ်ကို လော့ခ်ချရန် အလွန်ပင် ခက်ခဲလှသည်။ သို့သော် စုန့်ဝေ၏ သက်ရှိပဲ့တင်ထပ်လှိုင်းသည် သွေးနီရောင်မြူခိုးများကို ကြည်လင်သောလှိုင်းလုံးတစ်ခုအလား ခွဲထုတ်ပေးလိုက်သဖြင့် အဖွဲ့ဝင်များသည် လေကဲ့သို့ တုန်ခါနေသော လှုပ်ရှားမှုလှိုင်းကို လျင်မြန်စွာ ဖမ်းယူနိုင်ခဲ့သည်။ လုစ်က အသက်ကို ခပ်ပြင်းပြင်းရှူသွင်းလိုက်ပြီး သူ၏လက်သည် ခလုတ်ပေါ်တွင် ကျောက်ဆောင်ကဲ့သို့ တည်ငြိမ်နေကာ ထိုထူးဆန်းသောလှုပ်ရှားမှုကြားမှ ကွာဟချက်ကို တွက်ချက်လိုက်သည်။

ထိုအချိန်တွင် ကီကီလည်း လှုပ်ရှားလိုက်သည်။ သူမသည် လျင်မြန်စွာ ဝေဝါးနေသောသတ္တဝါကို ပစ်မှတ်ထားရန် မကြိုးစားဘဲ သူမ၏ ကျယ်ပြန့်သော စိတ်စွမ်းအားဖြင့် ပတ်လည်မီတာအနည်းငယ်အကွာအဝေးရှိ နေရာလွတ်ကို ချက်ချင်းလွှမ်းခြုံလိုက်သည်။ လေထုသည် ကော်ရည်ကဲ့သို့ ချက်ချင်း စေးကပ်သွားပြီး သတ္တဝါ၏ တစ္ဆေဆန်သော အရှိန်နှုန်းမှာ တုံ့ဆိုင်းသွားခဲ့ရသည်။ ၎င်းက ထပ်မံ၍ လှုပ်ရှားရန် ကြိုးစားစဉ်မှာပင် ကီကီက လက်သီးကို တင်းတင်းဆုပ်လိုက်ရာ ဒြပ်ထုပေါ်လာသော အမှောင်စွမ်းအင်သည် ထိုသတ္တဝါကို တိုက်ရိုက်ဖမ်းဆုပ်လိုက်ပြီး ၎င်း၏ ထူးဆန်းသော လက်မောင်းရှည်နှစ်ဖက်မှာ ပြင်းထန်စွာ ပေါက်ကွဲသွားတော့သည်။

ဝုန်း...

အခုပဲ...