အခန်း ၁၉၅၅

အခန်း(၁၉၅၅) ငါက ဥပ‌ဒေမဲ့တယ်လို့ပြောနေမှတော့ ကောင်းကင်ကို လက်ဝါးနဲ့အုပ်လည်းဘာဖြစ်လဲ

ထိုအခိုက်တွင်မှ သူတို့သုံးယောက်စလုံး ကြောက်ရွံ့ခြင်း၏ အဓိပ္ပါယ်ကို အမှန်တကယ် နားလည်သွားကြတော့သည်။ အစောပိုင်းက ချူးယွင်ဖန်းသည် သူ၏ စွမ်းအားအစစ်အမှန်ကိုပင် အသုံးမပြုရသေးဘဲ သူတို့ကို ကြောက်လန့်အောင် လုပ်နိုင်ခဲ့လျှင် ယခုမူ သူတို့ကို မျှော်လင့်ချက်မဲ့သည့်အထိ ဖြစ်သွားစေခဲ့ပြီ ဖြစ်သည်။

သူ၏ အရှိန်အဝါ တစ်ခုတည်းဖြင့်ပင် ထိုသုံးယောက်ကို ဖိနှိပ်ထားနိုင်ခဲ့ပြီဖြစ်၏။

"သူ့ကို အသေခံပြီး တိုက်ကြမယ် သူ ဒီလိုမျိုး ဆက်ပြီး သောင်းကျန်းနေနိုင်မယ်လို့ ငါမထင်ဘူး" ရှန့်ဖန်က ဟိန်းဟောက်လိုက်သည်။

သူ၏ အနီရောင်ဝတ်ရုံမှ မီးလျှံများ တဟုန်ထိုး ထွက်ပေါ်လာပြီး မီးတောင်ပေါက်ကွဲသကဲ့သို့ ကောင်းကင်ယံသို့ မီးတိုင်ကြီးအဖြစ် တက်လှမ်းသွားလေသည်။

ကျန်ရှိနေသော နှစ်ယောက်မှာ စကားတစ်ခွန်းမျှ မဆိုသော်လည်း စိတ်ကူးချင်း တူညီနေကြသည်။ ကျန်းဟိန်သည် ငွေရောင်ချပ်ဝတ်တန်ဆာကို ဝတ်ဆင်လိုက်ရာ စစ်မြေပြင်သို့ တက်လှမ်းလာသော စစ်သူကြီးတစ်ဦးအလား ထင်မှတ်ရသည်။ သူ၏ လှံအလင်းတန်းများက အထက်ကောင်းကင်ယံမှ တိမ်တိုက်များကို လှုပ်ခတ်သွားစေသည်။ ဝူဟွေ့မှာမူ ဟင်းလင်းပြင်ထဲသို့ ပျော်ဝင်ပျောက်ကွယ်သွားပြီး အစအနပင် မကျန်တော့ပေ။ သို့သော် ထိုအခြေအနေသည် လျို့ဝှက်လူသတ်သမားတစ်ဦးနှင့်ပတ်သက်၍ အကြောက်ရဆုံး ပုံစံဖြစ်ကြောင်း လူတိုင်း သိကြသည်။

"ဟင်း... ငါက ကောင်းကင်ကို လက်ဝါးနဲ့ဖုံးလို့ဥပဒေမဲ့သောင်းကျန်းတယ်လို့ပြောချင်တာလား။ ငါက အမြဲတမ်း ဥပဒေမဲ့နေတဲ့သူပဲ၊ အဲဒီတော့ ငါ တကယ်ပဲ အဲဒီလို လုပ်နိုင်တယ်ဆိုရင်ရော ဘာဖြစ်လဲ" ချူးယွင်ဖန်းက ခပ်အေးအေးပင် နှာခေါင်းရှုံ့လိုက်သည်။ သူ၏ အကြည့်များက ပတ်ဝန်းကျင်တစ်ခုလုံးကို ဝေ့ကြည့်လိုက်ရာ ပါရမီရှင်များမှာ သူ၏ အကြည့်ကို မရင်ဆိုင်ရဲဘဲ မျက်နှာလွှဲလိုက်ကြရသည်။

ထိုအခိုက်တွင် သူ ရုတ်တရက် တိုက်ခိုက်လိုက်သည်။ သူ၏ လက်ငါးချောင်းကို လက်သီးအဖြစ် ကျစ်ကျစ်ပါအောင် ဆုပ်လိုက်ရာ စွမ်းအင်များမှာ တဟုန်ထိုး ထွက်ပေါ်လာပြီး ခဏချင်းတွင်ပင် နတ်ဘုရားနဂါး ရှစ်ကောင် အဖြစ် ပြောင်းလဲသွားလေတော့သည်။

အံ့ဖွယ်လက်သီးရှစ်ချက်

ထိုတိုက်ကွက်သည် ကောင်းကင်ဘုံရှိ အစွမ်းအထက်ဆုံး နတ်ဘုရား ရှစ်ပါးကို ကိုယ်စားပြုပြီး အရပ်မျက်နှာတစ်ခုသို့ ဦးတည်ကာ ကောင်းကင်ယံကို ခွဲထုတ်သွားသည်။

ထိုအခိုက်တွင် ဟင်းလင်းပြင်ထဲမှ ပုံရိပ်တစ်ခု လွင့်စင်ထွက်လာသည်။ လူတိုင်း ကြည့်လိုက်ရာ ထိုသူမှာ ဝူဟွေ့မှတပါး အခြားသူ မဟုတ်ပေ။

အားလုံးမှာ အံ့အားသင့်သွားကြသည်။ ၎င်းတို့က သွေးဆိုးမျှော်စင် ၏ နည်းလမ်းများကို မမြင်ဖူးကြသော်လည်း ၎င်းတို့၏ ကျော်ကြားမှုကို ကြားဖူးကြသည်။ ၎င်းတို့က အလွန်ပင် လျှို့ဝှက်စွာ လှုပ်ရှားတတ်ကြပြီး တိုက်ခိုက်မှု မအောင်မြင်ပါက မိုင်ပေါင်းထောင်ချီ ဝေးရာသို့ ချက်ချင်း ထွက်ပြေးလေ့ရှိသူများ ဖြစ်သည်။

အကယ်၍ ဝူဟွေ့တွင် အစွမ်းထက်သော အရှိန်အဝါဖျောက်ကွယ်ခြင်း အတတ်မရှိပါက မည်သူမျှ မသိအောင် ပစ်မှတ်အနီးသို့ မည်သို့ ချဉ်းကပ်ကာ လုပ်ကြံနိုင်မည်နည်း။ ၎င်းတို့ လုပ်ကြံခဲ့သူများအနက် ဖန်ဆင်းရှင်အဆင့်ကိုကျော်လွန်သွားသူများပင် ပါဝင်ပေသည်။

အကယ်၍ ၎င်းတို့၏ အတတ်ပညာသာ မခိုင်မာပါက အကြိမ်ပေါင်းများစွာ သေဆုံးပြီးဖြစ်ပေလိမ့်မည်။

အစောပိုင်းက လူအများအပြားသည် ဝူဟွေ့ကို ရှာဖွေရန် ၎င်းတို့၏ နတ်ဘုရားအာရုံများကို အသုံးပြုခြင်း၊ ၎င်းတို့၏ ဓမ္မမျက်လုံးများကို ဖွင့်ကြည့်ခြင်းများ ပြုလုပ်ခဲ့ကြသည်။ သူတို့ မရှာတွေ့နိုင်သော်လည်း ဤလူသတ်သမားများက မည်သို့ လုပ်ဆောင်သလဲဆိုသည်ကို သိလိုကြသည်။ နောင်တစ်ချိန်တွင် ထိုလူသတ်သမားများနှင့် ရန်ငြိုးဖြစ်လာပါက ကြိုတင်ပြင်ဆင်နိုင်ရန် ဖြစ်သည်။

သို့သော်လည်း ရလဒ်မှာ မထူးခြားခဲ့ပေ။ ဝူဟွေ့၏ အဆင့်ဖြင့်ဆိုလျှင် သူသည် ဖန်ဆင်းရှင်အဆင့် ကျင့်ကြံသူကိုပင် လုပ်ကြံနိုင်သကဲ့သို့ ဟင်းလင်းပြင်ထဲတွင်လည်း ပုန်းအောင်းနိုင်သည်။ ကျင့်စဉ်အဆင့် အများကြီး သာလွန်နေသူမှလွဲ၍ မည်သူမျှ သူ့ကို လွယ်လွယ်နှင့် ရှာတွေ့နိုင်မည် မဟုတ်ပေ။

သို့သော်လည်း ချူးယွင်ဖန်းက ဝူဟွေ့ ရှိနေခြင်းကို အလွယ်တကူ သိရှိသွားပြီး လက်သီးတစ်ချက်ဖြင့်ပင် အတင်းအကျပ် ထွက်လာအောင် လုပ်လိမ့်မည်ဟု သူတို့ မထင်ထားခဲ့ကြပေ။

"မဖြစ်နိုင်တာ"

ဝူဟွေ့၏ မျက်လုံးများထဲတွင် သရဲသဘက်ကို မြင်လိုက်ရသည့်အလား မယုံကြည်နိုင်မှုများ ပြည့်နှက်နေသည်။

သူ အရှိန်အဝါ ဖျောက်ကွယ်ထားပြီးနောက် မည်သူ့ကြောင့်မျှ ရှာဖွေတွေ့ရှိခြင်း မခံခဲ့ရဖူးပေ။ ဤသည်မှာ သူ၏ အထူးကျွမ်းကျင်မှု ဖြစ်သည်။ အကယ်၍ သူသာ အရှာခံလိုက်ရပါက သူ၏ လက်ရှိခွန်အားဖြင့် အဆင့်တူ ပညာရှင်များကိုပင် ယှဉ်နိုင်မည် မဟုတ်ပေ။

ရုတ်တရက် သူသည် ပြင်းထန်သော အန္တရာယ်တစ်ခုကို ခံစားလိုက်ရသည်။ အံ့ဖွယ် လက်သီးရှစ်ချက် ကြောင့် ပေါ်ထွက်လာသော နဂါးရှစ်ကောင်မှာ ပတ်ဝန်းကျင်ကို ဆွဲဖြဲပစ်လိုက်ရုံဖြင့် ရပ်တန့်မသွားပေ။ ဆန့်ကျင်ဘက်အနေဖြင့် ချူးယွင်ဖန်း၏ လက်သီးအရှိန်မှာ မလျော့သွားဘဲ ဝူဟွေ့ဆီသို့ တည့်တည့် တိုးဝင်လာသည်။

“အစွမ်းကုန်တိုက်ကြမယ်” ဝူဟွေ့၏ လက်ထဲ၌ ဓားမြှောင်တစ်လက်ပေါ်လာ၏။

၎င်းကား အဆိပ်၏ ပြယုဂ်ဖြစ်သော အပြာရောင်အလင်းများ တဖျပ်ဖျပ်တောက်ပနေသည်။ သူသည် ဓားမြှောင်ဖြင့် လက်သီးစွမ်းအင်ကို ခုတ်ပိုင်းလိုက်သည်။

သို့သော် ၎င်းမှာ အချည်းနှီးသာ ဖြစ်သည်။ ဝူဟွေ့က ထိုတိုက်ကွက်ကို မတားနိုင်ခဲ့ဘဲ သူ၏ ဓားမြှောင်မှာလည်း တလက်မချင်းအပိုင်းပိုင်း ကွဲအက်သွားလေသည်။ ၎င်းမှာ ထိပ်တန်း မှော်လက်နက်တစ်ခု ဖြစ်သော်လည်း ချူးယွင်ဖန်း၏ ရှေ့တွင်မူ အသုံးမဝင်ပေ။ ရိုးရှင်းသော လက်သီးတစ်ချက်ဖြင့်ပင် ကျိုးပျက်သွားရသည်။

ဘုန်း

လက်သီးချက်မှာ ဝူဟွေ့၏ ရင်ဘတ်ကို ထိမှန်သွားသည်။ သူ တုံ့ပြန်ရန်ပင် အချိန်မရလိုက်ဘဲ ခန္ဓာကိုယ်မှာ ဖောက်ထွက်သွားကာ သွေးများ ပန်းထွက်လာ၏။ နောက်တစ်စက္ကန့်တွင်မူ သူသည် လေထဲတွင်ပင် ပေါက်ကွဲသွားပြီး သွေးစိုင် သွေးခဲများအဖြစ် ပျံ့နှံ့သွားလေတော့သည်။

လက်သီးတစ်ချက်၊ အသက်တစ်ချောင်း

ထိုအခိုက်တွင် လူတိုင်းမှာ ဆွံ့အသွားကြသည်။ သူတို့သည် အစောပိုင်း တိုက်ပွဲမှပင် စိတ်မပြေသေးပေ။ ဤအရာအားလုံးကို နားလည်ရန် အချိန်ယူရမည် ဖြစ်သော်လည်း လက်တွေ့တွင်မူ ခဏချင်းအတွင်း ဖြစ်ပျက်သွားခြင်း ဖြစ်သည်။

ချူးယွင်ဖန်းက ဝူဟွေ့ကို ရှာတွေ့သွားပြီဖြစ်ကြောင်း လူအမြောက်အမြားက ယခုမှ သတိပြုမိကြသည်။

ချူးယွင်ဖန်းသည် ဝူဟွေ့ကို ရှာတွေ့သွားရုံသာမက လက်သီးတစ်ချက်တည်းဖြင့် သတ်ဖြတ်လိုက်ခြင်း ဖြစ်သည်။

"မင်းက အရိပ်ထဲမှာ ပုန်းနေတဲ့ ကြွက်တစ်ကောင်ပဲ။ ငါ့ရှေ့မှာ ပေါ်လာရဲတယ်ပေါ့” ချူးယွင်ဖန်းက အေးစက်စွာ ရယ်မောလိုက်သည်။

‌ဝူဟွေ့နှင့် သူ၏ သွေးဆိုးမျှော်စင်မှာ တကယ်ပင် သတ္တိကောင်းလှသည်။ သွေးဆိုးမျှော်စင်သည် ကမ္ဘာပေါ်ရှိ အင်အားစုအားလုံး၏ အလိုရှိစာရင်းတွင် ပါဝင်သော ပစ်မှတ်တစ်ခု ဖြစ်သည်။ ၎င်းတို့၏ လုပ်ငန်းမှာ အလွန်ကျယ်ပြန့်ပြီး တစ်ကမ္ဘာလုံးသို့ ပျံ့နှံ့နေကာ လူမျိုးပေါင်းစုံနှင့် ပတ်သက်နေသဖြင့် ဂိုဏ်းအသီးသီး၏ ရန်လိုမှုကို ခံရခြင်းမှာ သဘာဝပင် ဖြစ်သည်။ ၎င်းတို့ကို တွေ့သည်နှင့် သေအောင် ရိုက်နှက်ခံရမည်သာ ဖြစ်သည်။

ပုံမှန်အားဖြင့် ထိုမျှော်စင်မှ လူသတ်သမားများသည် လူအများရှေ့တွင် ဗြောင်ကျကျ ပေါ်လာခြင်း မရှိပေ။ သို့သော် ယခုတစ်ကြိမ်မှာမူ ထူးခြားနေသည်။ မင်းသမီးကြီး၏ မွေးနေ့ပွဲသည် တရှမှ အလိုရှိနေသော ရာဇဝတ်ကောင်များကို လာရောက်ခွင့် တားမြစ်ထားပုံ မရပေ။ ပထမဆုံးအနေဖြင့် မီးတောက်သခင်လေးရောက်လာခဲ့ကာ ယခု သွေးဆိုးမျှော်စင်မှ ရွှေတံဆိပ်အဆင့် လူသတ်သမားရောက်လာသည်။

ချူးယွင်ဖန်းက အမှန်ပင် ကခုန်နေသော နတ်ဆိုးအုပ်စုကြီးကို ရှင်းလင်းနေသကဲ့သို့ ဖြစ်၏။

ချူးယွင်ဖန်းက လှောင်ပြုံးပြုံးလိုက်သည်။ မင်းသမီးကြီးတွင် မိတ်ဆွေအပေါင်းအသင်း အလွန်များပြားကြောင်း သူ ကြားဖူးသော်လည်း ဤမျှအထိ ပြောင်ပြောင်တင်းတင်း ရှိလိမ့်မည်ဟု သူ မထင်ထားခဲ့ပေ။

မျှော်လင့်ထားသည့်အတိုင်းပင် ကိုယ်တိုင် အမှန်တကယ် အစွမ်းထက်မှသာ လူတိုင်းကို စိုးရိမ်ထိတ်လန့်အောင် လုပ်နိုင်မည် ဖြစ်သည်။ ထိုအခါမှသာ မည်သည့်အရာကိုမျှ မကြောက်ဘဲ မိမိလုပ်ချင်သည်ကို လုပ်နိုင်မည် ဖြစ်သည်။

သွေးဆိုးမျှော်စင်ကို နှစ်ပေါင်းများစွာတိုင်အောင် အမြစ်ပြတ် မချေမှုန်းနိုင်ခဲ့ခြင်းမှာ ၎င်းတို့နောက်ကွယ်တွင် အင်အားစုများစွာ ရှိနေနိုင်ပြီး ထိုအင်အားစုများက သူတို့ကိုယ်တိုင် မရှင်းလင်းနိုင်သော ရန်သူများကို သုတ်သင်ရန် ဤမျှော်စင်ကို အသုံးချနေခြင်းကြောင့် ဖြစ်နိုင်ပေသည်။ ဤကဲ့သို့သော အင်အားစုမျိုးသည် ပြည်ထောင်စု၌ အများအပြားရှိသဖြင့် ချူးယွင်ဖန်းက ကျင့်သားရနေပြီဖြစ်၏။

ဝူဟွေ့ကို လက်သီးတစ်ချက်တည်းဖြင့် သုတ်သင်ပြီးနောက် သူသည် ကျန်းဟိန်နှင့် ရှန့်ဖန်တို့ဆီ တန်းတန်းမတ်မတ်သွားလိုက်သည်။

ရှန့်ဖန်က တုန်လှုပ်သွားသည်။ ချူးယွင်ဖန်းက ဝူဟွေ့ကို ရိုးရှင်းပြတ်သားသော လက်သီးတစ်ချက်ဖြင့် သတ်ပစ်လိမ့်မည်ဟု သူ ကြိုတင်မပြင်ဆင်ထားခဲ့ပေ။

“ချူးယွင်ဖန်း… ငါ့ ဒီတိုက်ကွက်ကို မြည်းကြည့်စမ်း”

‘ဖျက်ဆီးခြင်း မီးလျှံကြာပန်း"

ကြိတ်ဆုံကျောက်တုံး အရွယ်အစားရှိသော တောက်လောင်နေသည့် ကြာပန်းတစ်ပွင့်သည် ရှန့်ဖန်၏ လက်ထဲတွင် ပေါ်လာသည်။ ထိုကြာပန်းမှ ကြောက်မက်ဖွယ် ဖိအားနှင့် ဖျက်ဆီးလိုသော အရှိန်အဝါများ ထွက်ပေါ်နေပြီး ကမ္ဘာကြီးကိုပင် ဖျက်ဆီးပစ်နိုင်မည့်အလား ထင်ရသည်။ ခဏချင်းတွင်ပင် သူသည် ထိုကြာပန်းကို ချူးယွင်ဖန်းဆီသို့ ဦးတည်ပစ်လွှတ်လိုက်လေတော့သည်။

--