အခန်း ၁၉၅၉

အခန်း (၁၉၅၉) သတိထားရမယ့်သူက ကျွန်တော်မဟုတ်ဘူး သူတို့ပဲ

"ဒါတောင်မှ ရှင် သတိထားသင့်တယ်၊ လီချန်းယွမ်လည်း ဒီကို ရောက်နေတယ်"

"ကျွန်မ ရရှိထားတဲ့ သတင်းတွေအရ လီချန်းယွမ်ဟာ ပင်လယ်ရပ်ခြားမှာ အကြီးအကျယ် ရှုံးနိမ့်ခဲ့ပြီး ဒဏ်ရာပြင်းပြင်းထန်ထန် ရခဲ့တယ်ဆိုပေမဲ့ သူဟာ 'ပင်လယ်လှန် ဓားကျမ်း' ကို ရရှိခဲ့တယ်။ ဒါကြောင့် သူဟာ အားနည်းသွားမယ့်အစား ကျင့်ကြံမှုတွေ ပိုတက်လာခဲ့တယ်။ သူဟာ ရှင့်အတွက် အကြီးမားဆုံး ရန်သူဖြစ်လာလိမ့်မယ်"

ချူးယွင်ဖန်း၏ မျက်နှာမှာ မည်သည့်အရိပ်အယောင်မျှ မပြသော်လည်း သူ၏ စိတ်ထဲတွင်မူ ရယ်ချင်စိတ်ကို အနိုင်နိုင်အောင့်ထားရသည်။ အခြားသူများက အကြောင်းရင်းကို မသိသော်လည်း သူကမူ အသိဆုံးပင် ဖြစ်သည်။

လီချန်းယွမ်ကို အပြင်းအထန် ဒဏ်ရာရအောင် လုပ်ခဲ့သူမှာ သူကိုယ်တိုင်ပင် မဟုတ်ပါလော။ အကယ်၍ လီချန်းယွမ်သာ ကံမကောင်းခဲ့လျှင် ချူးယွင်ဖန်း၏ လက်ထဲတွင်ပင် အသက်ပျောက်နေလောက်ပြီဖြစ်သည်။ ထိုစဉ်က လီချန်းယွမ် ထွက်ပြေးသွားနိုင်ခဲ့သည်မှာ သူ၏ ကံကောင်းမှုကြောင့်သာ ဖြစ်သည်။

သို့သော် ယခုအခါ ချူးယွင်ဖန်းသည် လီချန်းယွမ်ကို ဂရုမစိုက်တော့ပေ။ လီချန်းယွမ် မည်မျှပင် တိုးတက်လာပါစေ၊ တစ်ဟုန်ထိုး တိုးတက်လာသော ချူးယွင်ဖန်းကို မည်သို့ ယှဉ်နိုင်ပါမည်နည်း။ သူ၏ ကျင့်ကြံမှုမှာ ဖန်ဆင်းရှင်အဆင့်သို့ ရောက်ရှိသွားပြီးနောက်တွင် တစ်ချိန်က သူ့ကို အိပ်မပျော်အောင် ခြောက်လှန့်ခဲ့သော လီချန်းယွမ်မှာ သူ၏အာရုံစိုက်မှုကိုပင် မထိုက်တန်တော့ပေ။

အကယ်၍ ယခုအချိန်တွင် လီချန်းယွမ်နှင့် တွေ့ဆုံပါက သူသည် လက်သီးတစ်ချက်တည်းဖြင့်ပင် သတ်ပစ်နိုင်ပေသည်။ ကိုယ်စားပြုအရုပ်တစ်ခုမက ဆယ်ခုရှိနေလျှင်ပင် လုံလောက်လိမ့်မည် မဟုတ်ပေ။ အစွမ်းချင်း ကွာခြားချက်မှာ အလွန်ပင် ကြီးမားသွားပြီ ဖြစ်သည်။

"လီချန်းယွမ်အပြင် ပါရမီရှင်စာရင်းရဲ့ အဆင့် (၅) ဖြစ်တဲ့ သီလကျောင်းတော်က မုန့်ထျန်းရန်လည်း ဒီကို ရောက်နေတယ်" မင်းသမီးယွမ်ယန်က သူမ သိသမျှကို ဆက်လက်ပြောပြသည်။

"မုန့်ထျန်းရန် ဟုတ်လား" ချူးယွင်ဖန်းသည် တစ်ခါတွေ့ဖူးသော ထိုလူကို မှတ်မိနေသည်။ ထိုစဉ်က မုန့်ထျန်းရန်မှာ သူ မယှဉ်နိုင်သော မြင့်မြတ်လှသည့် တည်ရှိမှုကြီး တစ်ခုဖြစ်ခဲ့သည်။

ယခင်က မုန့်ထျန်းရန်သည် စကြဝဠာအဆင့် ကျွမ်းကျင်သူတစ်ဦးကို တိုက်ကွက်တစ်ခုတည်းဖြင့် ဒဏ်ရာရအောင် လုပ်နိုင်ခဲ့သည်မှာ ချူးယွင်ဖန်းအတွက် မယုံနိုင်စရာ ဖြစ်ခဲ့သည်။ သို့သော် ယခု ပြန်စဉ်းစားကြည့်လျှင် မုန့်ထျန်းရန်မှာ ထိုစဉ်က အနည်းငယ် ပေါ့ဆခဲ့ခြင်းသာ ဖြစ်ရမည်။ သို့မဟုတ်လျှင် ထိုရန်သူမှာ လွတ်မြောက်နိုင်စရာ အကြောင်းမရှိပေ။

သို့သော် ယခုမူ ထိုအရာအားလုံးမှာ ချူးယွင်ဖန်းအတွက် ဘာမျှမဟုတ်တော့ပေ။ အဆင့်ပိုမြင့်သော ပင်လယ်မင်းသား ပင်လျှင် သူ၏လက်ထဲတွင် သေဆုံးခဲ့ရပြီးပြီ မဟုတ်ပါလော။ မုန့်ထျန်းရန်ကို သူ အဘယ်ကြောင့် ကြောက်နေရပါမည်နည်း။

ချူးယွင်ဖန်း၏ အေးစက်သော အမူအရာကို မြင်သောအခါ မင်းသမီး ယွမ်ယန်သည် သူက အမှန်တကယ် ယုံကြည်မှုရှိနေသည်လား သို့မဟုတ် ဟန်ဆောင်နေသည်လား ဆိုသည်ကို ဝေခွဲမရဖြစ်နေမိသည်။

"ဒါ့အပြင်နတ်ဆိုးမျိုးနွယ်ရဲ့ အဆင့် (၁၁) ပါရမီရှင် ကျားပျံလည်း ရှိသေးတယ်"

"နတ်ဆိုးတွေတောင် ပါဝင်နေတာလား၊ တကယ့်ကို တစ္ဆေတွေ၊ နတ်ဆိုးတွေ ရှုပ်နေတာပဲ" ချူးယွင်ဖန်းက လှောင်ပြုံးပြုံးလိုက်သည်။

"နတ်ဆိုးအကြီးအကဲက ကျွန်တော် တိုးတက်လာမှာ ကြောက်လို့ သူ့ရဲ့ အဆင့်အတန်းကိုတောင် ဂရုမစိုက်ဘဲ ကျွန်တော့်ကို တိုက်ခိုက်ခဲ့တာပဲ။ အဲဒီလိုဆိုမှတော့ ကျွန်တော်လည်း အားနာနေစရာ မလိုတော့ဘူး။ ကျားပျံရဲ့ ခေါင်းကို ကျွန်တော် ရာထူးတိုးဖို့အတွက် လက်ဆောင်အဖြစ် သုံးရမှာပေါ့"

မင်းသမီး ယွမ်ယန်မှာ ချူးယွင်ဖန်းကို အံ့အားသင့်စွာ ကြည့်နေမိသည်။ သူသည် နတ်ဆိုးအကြီးအကဲကို ရန်စနေခြင်းပင် ဖြစ်သည်။ သာမန်လူတစ်ဦးဆိုလျှင် သေဘေးမှ လွတ်မြောက်လာပြီးနောက် အေးအေးဆေးဆေး ပုန်းအောင်းနေမည် ဖြစ်သော်လည်း ချူးယွင်ဖန်းကမူ ထိုအကြီးအကဲကို အာခံနေပေသည်။

သူမက ခဏရပ်ပြီးမှ ဆက်၏။

"အဲဒီလို ရည်မှန်းချက်ရှိတာ ကောင်းပေမဲ့ ကျားပျံကို အထင်မသေးနဲ့ဦး။ သူဟာ နတ်ဆိုးတွေရဲ့ ဘုရင်မျိုးနွယ်စုဖြစ်တဲ့ 'အတောင်ပံပါကျားမျိုးနွယ်' ရဲ့ ခေါင်းဆောင်ငယ်ပဲ။ အဲဒီမျိုးနွယ်ဝင်တွေရဲ့ ခန္ဓာကိုယ်ဟာ ဘုရင်အဆင့်နဲ့ တူညီကြတယ်။ သူ့ရဲ့ ပါရမီဟာ ပြိုင်ဘက်မရှိသလောက်ပဲ။ သူနဲ့ ရင်ပေါင်တန်းနိုင်တဲ့လူဟာ သူ့မျိုးဆက်မှာ အရမ်းရှားတယ်”

ချူးယွင်ဖန်းသည် အတောင်ပံပါကျားမျိုးနွယ်အကြောင်း သိထားသည်။ ၎င်းတို့က ရှေးဟောင်း ကျားဖြူ၏ သွေးမျိုးဆက်များ ဖြစ်ကြပြီး လေကို စွမ်းဆောင်နိုင်စွမ်း ရှိကြသည်။ ကျင့်ကြံမှု မပြုလုပ်လျှင်ပင် ၎င်းတို့၏ သွေးမျိုးဆက်ကြောင့် ဖန်ဆင်းရှင်အဆင့်သို့ အလွယ်တကူ ရောက်ရှိနိုင်ကြသူများ ဖြစ်သည်။

"ကိစ္စမရှိပါဘူး။ သူ ငါနဲ့ တွေ့ပြီဆိုမှတော့ အတောင်ပံပါကျားမျိုးနွယ်ရဲ့ ခေါင်းဆောင်ငယ်ကို အသစ်လဲဖို့ အချိန်တန်ပြီလို့ပဲ ပြောရမှာပေါ့" ချူးယွင်ဖန်းက အေးဆေးစွာ ပြောသည်။

"ကျားပျံအပြင် တောင်ပိုင်းလူရိုင်းနယ်မြေက မီးလျှံတိမ်တိုက်ဂူရဲ့ သခင်လေး မုန့်ဖိုထျန်းလည်း ရှိသေးတယ်။ သူက အဆင့် (၁၅) မှာ ရှိပြီး အဆင့် (၂၀) အတွင်းမှာ ရှိတဲ့လူတွေဟာ တကယ့်ကို ကြောက်စရာကောင်းတဲ့ တည်ရှိမှုတွေပဲ" မင်းသမီးက သတိပေးပြန်သည်။

"လူရိုင်းတွေ၊ သတ္တဝါတွေနဲ့ နတ်ဆိုးတွေ... အကုန်လုံး ရှုပ်ပွနေတာပဲ" ချူးယွင်ဖန်းက မျက်မှောင်ကြုတ်လိုက်သည်။

"ဒါပေမဲ့ ဒီလူတွေပဲ ရှိတာလား အိမ်ရှေ့မင်းသားဘက်ကရော ဘာမှမလုပ်ဘူးလား"

"မလုပ်ဘဲ နေမလား" မင်းသမီး ယွမ်ယန်က ခေါင်းခါလိုက်သည်။

"ကျွန်မရဲ့ တခြားမောင်နှမတွေကလည်း အစွမ်းထက်တဲ့ လူတွေကို ပြင်ဆင်ထားကြတာပဲ။ ဒါပေမဲ့ ကျွန်မအမြင်အရတော့ သူတို့တွေဟာ ရှင့်ပြိုင်ဘက်တွေ မဟုတ်ကြဘူး။ ရှင့်အတွက် တကယ် အန္တရာယ်ရှိတာက ဒီလူလေးယောက်ပဲ။ ဒါကြောင့် ရှင် သတိထားရမယ်"

ချူးယွင်ဖန်းက အကျယ်ကြီး ရယ်မောလိုက်ပြီးသည်။

"ဟားဟားဟား မင်းသမီး... မင်းသမီး တစ်ခုခု မှားနေပြီထင်တယ်။ သတိထားရမှာက ကျွန်တော်မဟုတ်ဘူး၊ သူတို့ပဲ။ ဘယ်ဘက်က ပိုပြီး အန္တရာယ်များနေလဲဆိုတာ မသေချာသေးဘူးနော်"

"ဒါဟာ အခွင့်အရေးကောင်းပဲ။ ဒီလူတွေအားလုံးဟာ ပါရမီရှင်စာရင်းမှာ ကျွန်တော့်ထက် အဆင့်မြင့်တဲ့သူတွေပဲ။ သူတို့အားလုံးကို တစ်ပြိုင်နက်တည်း အနိုင်ယူလိုက်ရင် ပါရမီရှင်စာရင်းကို အသစ်ပြန်ပြင်ဖို့ အချိန်တန်ပြီပေါ့"

ချူးယွင်ဖန်း၏ မျက်နှာတွင် ယုံကြည်ချက်အပြည့်ရှိသော အမူအရာတစ်ခု ပေါ်လာသည်။ ထိုပါရမီရှင်များမှာ သူ၏ တိုက်ကွက်တစ်ခုကိုပင် တောင့်ခံနိုင်လိမ့်မည် မဟုတ်ကြောင်း သူ ကောင်းကောင်းသိနေပေသည်။

--