အခန်း ၁၉၆၃

အခန်း(၁၉၆၃) ငါ့မှာ မင်းအတွက် လေးစားမှုမရှိဘူး

ချူးယွင်ဖန်းသည် မီးတောက်နီဂိုဏ်းမှ အဆင့်မြင့်အကြီးအကဲကို အလွန်လျင်မြန်စွာပင် ဖြေရှင်းလိုက်သည်။ တစ်စက္ကန့်အတွင်းမှာပင် ရန်သူကို သတ်ဖြတ်လိုက်ခြင်း ဖြစ်သည်။ သွေးတစ်စက်မျှပင် မြေသို့မကျဘဲ ချူးယွင်ဖန်းက သူ၏ တောင်မြစ်ပန်းချီကားထဲသို့ အလုံးစုံ စုပ်ယူကာ ဗြဟ္မာသစ်ပင်သို့ သွန်းလောင်းလိုက်သည်။

အထူးသဖြင့် ပွဲကြည့်ချင်နေကြသူများမှာ မျက်လုံးများ ပြူးထွက်မတတ် အံ့အားသင့်သွားကြရသည်။

၎င်းတို့အားလုံးက ချူးယွင်ဖန်းအရှက်ကွဲမည့်အရေးကိုသာ စောင့်ကြည့်နေခဲ့ကြခြင်း ဖြစ်သည်။ အားလုံး၏ အမြင်တွင် ယခုမျိုးဆက်မှ ထိပ်သီးကျွမ်းကျင်သူများသည် ဖန်ဆင်းရှင်အဆင့်သို့ ယခုမှ စတင်ဝင်ရောက်လာကြသူများ ဖြစ်သဖြင့် ဂိုဏ်းအသီးသီးမှ အဆင့်မြင့်အကြီးအကဲများကို ယှဉ်နိုင်ရန်မှာ အလှမ်းဝေးသေးသည်ဟု ယူဆထားကြသည်။

အကြီးအကဲများမှာ တစ်ချိန်က လောကကို စိုးမိုးခဲ့သော ပါရမီရှင်များ ဖြစ်ကြသည်။ ဤမျိုးဆက်သစ် လူငယ်များအနေဖြင့် သူတို့ကို ယှဉ်ပြိုင်နိုင်ရန်မှာ နောက်ထပ် နှစ်အနည်းငယ်မျှ ကြိုးစားရဦးမည် ဖြစ်သည်။

သို့သော် ယခုမူ ချူးယွင်ဖန်းက ၎င်းတို့၏ မျက်နှာကို လက်ဝါးဖြင့် ပြင်းထန်စွာ ရိုက်နှက်လိုက်သကဲ့သို့ ဖြစ်သွားသည်။ မျိုးဆက်သစ်တို့၏ ကြီးထွားမှုမှာ သူတို့၏ စိတ်ကူးထက် များစွာ ကျော်လွန်နေပြီ ဖြစ်သည်။

မီးတောက်နီဂိုဏ်းမှ အဆင့်မြင့်အကြီးအကဲတစ်ဦးသည် ချူးယွင်ဖန်း၏ တိုက်ကွက်တစ်ခုကိုပင် မခုခံနိုင်ခဲ့ချေ။

ရောက်ရှိနေသော ကျွမ်းကျင်သူအများစု၏ ကျင့်ကြံမှုမှာ အသတ်ခံလိုက်ရသော အကြီးအကဲထက် နိမ့်ကျကြသူများ ဖြစ်သည်။ အများဆုံးရှိလှမှ ထိုအဆင့်နှင့် တူတူပင် ဖြစ်သည်။ ချူးယွင်ဖန်းက ထိုသူကို အေးဆေးစွာ ဆွဲဖြဲသတ်ဖြတ်လိုက်သည်ကို မြင်သောအခါ လူအများမှာ ထိတ်လန့်တုန်လှုပ်ခြင်းနှင့်အတူ ဝမ်းနည်းမှုကိုပါ ခံစားလိုက်ရသည်။

"မျိုးဆက်သစ်တွေ တကယ်ပဲ ကြီးပြင်းလာခဲ့ကြပြီပေါ့"

လူအများမှာ ရင်ထဲတွင် သက်ပြင်းချမိကြသည်။ သို့သော် ခဏအကြာတွင် ကွင်းပြင်တစ်ခုလုံးမှာ ကျိန်ဆဲသံများဖြင့် ပြည့်နှက်သွားတော့သည်။

"မောက်မာလိုက်တာ"

"ဘယ်လောက်တောင် ရဲတင်းသလဲ ဒီနေရာမှာ လူသတ်ရဲတယ်ပေါ့"

"မင်း သေချင်နေပြီပဲ"

"သူ့ကို ဖမ်းကြစမ်း"

ကျိန်ဆဲသံများနှင့် ရန်လိုသောအကြည့်များမှာ ကောင်းကင်ယံတစ်ခုလုံးကို ဖုံးလွှမ်းသွားသည်။ ချူးယွင်ဖန်းသည် ဂိုဏ်းပေါင်းစုံမှ တပည့်ကျော်များကို သတ်ဖြတ်ခဲ့သည့် သတင်းမှာလည်း ပျံ့နှံ့နေပြီ ဖြစ်ရာ ထိုဂိုဏ်းများမှ ကျွမ်းကျင်သူများမှာ သူ့ကို စားမတတ် ဝါးမတတ် ကြည့်နေကြသည်။ ဤနေရာမှာ မင်းသမီးကြီး၏ နယ်မြေသာ မဟုတ်လျှင် သူတို့ ဝိုင်းတိုက်ကြသည်မှာ ကြာပြီ ဖြစ်သည်။

ချူးယွင်ဖန်းကို သတ်ဖြတ်ရန် ပြင်းထန်သော အရှိန်အဝါများ ထွက်ပေါ်လာချိန်မှာပင် နတ်အင်မော်တယ်တောင်ကြား အနက်ရှိုင်းဆုံးဆီမှ အလင်းတန်းကြီးတစ်ခု ထွက်ပေါ်လာပြီး ကောင်းကင်ယံ၌ အလင်းမိုးစက်များအဖြစ် ကြွေကျလာသည်။

လူတိုင်း၏ အကြည့်မှာ ထိုနေရာသို့ ရောက်ရှိသွားရာ နို့နှစ်ရောင် ဝတ်စုံရှည်ကို ဆင်မြန်းထားပြီး အလင်းတန်းတစ်ခုပေါ်တွင် ရပ်နေသော အမျိုးသမီးတစ်ဦးကို တွေ့လိုက်ရသည်။

ထိုအမျိုးသမီးမှာ အသက် ၂၀ ဝန်းကျင်ခန့်သာ ရှိပုံရပြီး အသားမှာ နှင်းပမာ ဖြူဖွေးကာ အလွန်လှပသည်။ သာမန်အမျိုးသမီးများနှင့်မတူဘဲ သူမထံတွင် လွှမ်းမိုးချုပ်ကိုင်လိုသော အရှိန်အဝါတစ်ခု ရှိနေသည်။

"မင်းသမီးကြီးပဲ" တစ်စုံတစ်ဦးက ခပ်တိုးတိုး ရေရွတ်လိုက်သည်။

ရောက်လာသူမှာ တရှ အင်ပါယာ၏ လက်ရှိဘုရင်၏ အစ်မတော် မင်းသမီးကြီးပင် ဖြစ်သည်။ လူတိုင်းမှာ ထရပ်ကာ ဂါရဝပြုလိုက်ကြသည်။

ချူးယွင်ဖန်းသည် မင်းသမီးကြီး၏ နောက်သို့ လှမ်းကြည့်လိုက်သော်လည်း တန်စီယုကို မတွေ့ရသဖြင့် အနည်းငယ် စိတ်ပျက်သွားမိသည်။

လီချန်းယွမ်ကဲ့သို့သော ခေါင်းမာသူများပင်လျှင် မင်းသမီးကြီး၏ ရှေ့တွင် ခေါင်းငုံ့လိုက်ကြရသည်။ သူမ၏ အစွမ်းမှာ သူတို့ သိထားသည်ထက် များစွာ ပိုမိုနက်ရှိုင်းပြီး ခန့်မှန်းရခက်ကြောင်း သူတို့ သိမြင်လိုက်ကြရသောကြောင့် ဖြစ်သည်။

"အားလုံးပဲ... ထိုင်ကြပါ"

မင်းသမီးကြီးသည် တိမ်တိုက်များကြားရှိ ရာဇပလ္လင်ပေါ်တွင် ထိုင်လိုက်သည်။ သူမက လူသားအားလုံးကို အထက်မှ ငုံ့ကြည့်နေသော နတ်ဘုရားမတစ်ပါးနှင့်ပင် တူနေသည်။

လူအများမှာ သူမက ချူးယွင်ဖန်းကို အပြစ်ပေးလိမ့်မည်ဟု မျှော်လင့်နေကြသည်။ သူမ၏ နယ်မြေတွင် လူအများအပြားကို သတ်ဖြတ်ခဲ့ခြင်းမှာ သူမကို စော်ကားခြင်းပင် မဟုတ်ပါလော။ သို့သော် မင်းသမီးကြီးက ထိုအကြောင်းကို မည်သို့မျှ မပြောပေ။

"ငါ့ရဲ့ မွေးနေ့ပွဲကို အားလုံး လာရောက်ပေးကြတာ ငါ့အတွက် ဂုဏ်ယူစရာပါပဲ"

ထို့နောက် သူမက အကြောင်းအရာကို ပြောင်းလဲကာ ဆက်ပြောသည်။

"ဒါပေမဲ့ နောက်ထပ် ပြောချင်တာကတော့ မွေးနေ့ပွဲ တစ်ခုတည်းအတွက် မဟုတ်ပါဘူး။ ငါ့ရဲ့ နောက်ဆုံးတပည့် မင်းသမီးကူရှဲ့အတွက် ကြင်ယာတော် ရွေးချယ်ပေးဖို့လည်း ပါဝင်ပါတယ်။ စိတ်ပါဝင်စားသူတိုင်း ပါဝင်ယှဉ်ပြိုင်နိုင်ပါတယ်။ အနိုင်ရတဲ့သူဟာ သူမရဲ့ ခင်ပွန်း ဖြစ်လာပါလိမ့်မယ်"

ချက်ချင်းပင် လူအများ စိတ်လှုပ်ရှားသွားကြသည်။ လူငယ်ပါရမီရှင် အများအပြားမှာ ဤကိစ္စအတွက် လာခဲ့ကြခြင်း ဖြစ်သည်။ လူအများမှာ ချူးယွင်ဖန်းကို လှည့်ကြည့်လိုက်ကြသည်။ သူသည် တန်စီယု၏ စေ့စပ်ထားသူဖြစ်ရာ သူ ဒေါသထွက်ပြီး တစ်ခုခုလုပ်မိ၍ မင်းသမီးကြီး၏ လက်ချက်ဖြင့် အဆုံးသတ်သွားရန် သူတို့ ဆုတောင်းနေကြသည်။

ခဏအတွင်းမှာပင် ကွင်းပြင်၌ လူငယ် ၂၀ ကျော် ထွက်ပေါ်လာသည်။ သူတို့အားလုံးမှာ နဂါးနှင့် ဖီးနစ်များကဲ့သို့ ထူးခြားသော အသွင်အပြင်နှင့် မြင့်မားသော စွမ်းအင်များ ရှိကြသည်။ အားနည်းဆုံးသူမှာပင် ဖန်ဆင်းရှင်အဆင့်သို့ ယခုမှ ဝင်ရောက်ထားသူများ ဖြစ်သည်။

ချူးယွင်ဖန်းသည်လည်း သူတို့နှင့်အတူ ရှေ့သို့ ထွက်လာခဲ့သည်။

"ဒါဆိုရင် ဘယ်သူက အရင်ဆုံး စိန်ခေါ်မှုကို လက်ခံမလဲ”

မင်းသမီးကြီးက ကောင်းကင်ယံကို လက်ဖြင့် ဆွဲဖြဲလိုက်ရာ ဟင်းလင်းပြင်ခွဲတစ်ခုထွက်ပေါ်လာပြီး အတွင်း၌ ကြီးမားလှသော ကွင်းပြင်တစ်ခု ရှိနေသည်။ ၎င်းမှာ ပါရမီရှင်များ တိုက်ခိုက်ရမည့် နေရာပင် ဖြစ်သည်။

လူတိုင်းမှာ တစ်ဦးကိုတစ်ဦး ကြည့်နေကြပြီး အစောကြီး မတိုက်ချင်ကြပေ။ ထိုစဉ် ပုံရိပ်တစ်ခုမှာ အလင်းတန်းတစ်ခုအဖြစ် ဟင်းလင်းပြင်ထဲသို့ ဦးစွာ ဝင်ရောက်သွားသည်။

လူတိုင်း သေချာကြည့်လိုက်သောအခါ ထိုသူမှာ ချူးယွင်ဖန်းဖြစ်နေသည်။

"ဘာလို့ သူက အရင်ဆုံး ထွက်လာရတာလဲ”

"အခုချိန်မှာ အရင်ဆုံး ထွက်လာတာက ဉာဏ်မရှိတဲ့ လုပ်ရပ်ပဲ"

"သူက အရင်ဆုံး ထွက်ရဲတယ်ဆိုတော့... ပါရမီရှင်အားလုံးကို တစ်ယောက်တည်း ရင်ဆိုင်နိုင်မယ်လို့ ယုံကြည်ချက်ရှိနေတာလား”

ချူးယွင်ဖန်းသည် ကွင်းပြင်အလယ်တွင် ရပ်ကာ ပါရမီရှင်များကို ဝေ့ကြည့်လိုက်သည်။ သူက လက်အုပ်လျက် ယဥ်ကျေးစွာပြောသည်။

"အားလုံးပဲ... မင်းသမီးကူရှဲဟာ ကျွန်တော့်ရဲ့ စေ့စပ်ထားသူ ဖြစ်ပါတယ်။ ဒါကြောင့် အားလုံးက ဒါကို လေးစားပေးဖို့ ကျွန်တော် မျှော်လင့်ပါတယ်။ အခုချိန်မှာ နောက်ဆုတ်သွားမယ်ဆိုရင် မနှောင်းသေးပါဘူး"

"ငါ့မှာတော့ မင်းအတွက် ဘာလေးစားမှုမှ မရှိဘူး။ ဒါကြောင့် မင်းဆီကနေ သူ့ကို လုယူရမှာပဲ"

ရုတ်တရက် ရဲတင်းမောက်မာသော အသံတစ်ခု ဟိန်းထွက်လာတော့သည်။

--