အခန်း ၂၇၈

အခန်း (၂၇၈) - ပလွေတေးသွားနှင့် တိုက်ဆိုင်စွာ ဆုံတွေ့ခြင်း

မြင့်မြတ်နယ်မြေ။

ကောင်းကင်ဆေးလုံး မြို့တော်။

နန်ကုန်းယွီက သွမ်းမူနျန်းချူး၏ ယာဉ်ပျံ ထွက်ခွာသွားသည်ကို ကြည့်နေပြီး သူ၏ မျက်နှာအမူအရာမှာ တည်ငြိမ်အေးဆေးနေဆဲ ဖြစ်၏။

သူက ရွှမ်ယွမ်ကျင်းဟုန်ဘက်သို့ လှည့်ကာ ပြုံးလျက် ပြောလိုက်သည်။

"နတ်မိမယ် ကျင်းဟုန်... အခုလို ဒုက္ခခံပေးတဲ့အတွက် ကျေးဇူးတင်ပါတယ်"

"သခင်လေး စစ်ချန်... အားနာနေဖို့ မလိုပါဘူး... သူငယ်ချင်းအချင်းချင်း ကူညီကြတာ သဘာဝပါပဲ"

ရွှမ်ယွမ်ကျင်းဟုန်က ပြုံးလိုက်၏။

သွမ်းမူနျန်းချူးက ကျင်းရှန်အား နန်ကုန်းယွီ စောင့်ဆိုင်းနေစဉ် အဖော်ပြုပေးရန်နှင့် ထို့နောက် နေရာရွှေ့ပြောင်းခြင်း ဝင်္ကပါဆီသို့ ခေါ်သွားပေးရန် ပြောသည်ကို ကြားချိန်၌ ဤတာဝန်ကို ယူရန် ရွှမ်ယွမ်ကျင်းဟုန်က ကိုယ်တိုင် တောင်းဆိုခဲ့သည်။

သွမ်းမူနျန်းချူးက အများကြီး မတွေးတော့ဘဲ အဆင့်မြင့် ဝိညာဉ်ကျောက်တုံး ငါးသိန်းကို သူမထံ လွှဲပြောင်းပေးခဲ့ပြီးနောက် သူမ၏ အဖွဲ့နှင့်အတူ ထွက်ခွာသွားခဲ့ပေ၏။

ထို့ကြောင့် နန်ကုန်းယွီကို နေရာရွှေ့ပြောင်းခြင်း ဝင်္ကပါဆီသို့ ပို့ဆောင်ရန် တာဝန်မှာ သူမအပေါ် ကျရောက်လာခဲ့သည်။

"သခင်လေး... မွန်းတည့်ဖို့ အချိန်နည်းနည်း လိုသေးတယ်... ကောင်းကင်ဆေးလုံး မြို့တော်ကို ကျွန်မ လိုက်ပြပေးပါရစေ"

ရွှမ်ယွမ်ကျင်းဟုန်က အနည်းငယ် ပြုံးလျက် ပြောဆိုလာ၏။

"ဒါက…"

နန်ကုန်းယွီ ခေတ္တမျှ တုံ့ဆိုင်းသွားပြီးနောက် ပြုံးကာ ပြောလိုက်သည်။

"ဒါဆိုရင် ကျေးဇူးအများကြီး တင်ပါတယ်"

"သခင်လေး... ဒီဘက်ကို ကြွပါ"

"ကျေးဇူးပြုပြီး…"

ထိုနှစ်ဦး အတူတကွ လျှောက်သွားသည်ကို ကြည့်ရင်း ချီယန်ရှင်းမှာ သူမ၏ နှုတ်ခမ်းများ တွန့်ကွေးသွားခြင်းကို မထိန်းချုပ်နိုင်ဘဲ မိမိဘာသာ ရေရွတ်လိုက်၏။

'ဒါက ပုံမှန်ဆို အေးစက်စက်နဲ့ မပြုံးမရယ်တတ်တဲ့ စီနီယာအစ်မ ကျင်းဟုန် ဟုတ်သေးရဲ့လား...'

"နှုတ်တောင် မဆက်ဘဲ ထွက်သွားတာလား... ချစ်သူရသွားလို့ ဂျူနီယာညီမကို မေ့သွားပြီဆိုတဲ့ သဘောလား"

ချီယန်ရှင်းက ညင်သာစွာ ခေါင်းယမ်းလိုက်ပြီး သူမ၏ မျက်နှာပေါ်တွင် ကူကယ်ရာမဲ့သည့် အမူအရာ ပြည့်နှက်နေပေသည်။

သူမ ခေတ္တမျှ တုံ့ဆိုင်းသွားသော်လည်း ဆက်လက် လိုက်သွားခဲ့၏။

သို့သော် စကားမပြောဘဲ အနီးကပ် လိုက်ပါသွားခြင်းကြောင့် သူမသည် သူတို့၏ အစေခံမလေးနှင့် အနည်းငယ် တူနေပေသည်။

ချီယန်ရှင်းက သူမရှေ့ရှိ ရယ်မောကာ စကားပြောနေကြသော ထိုနှစ်ဦးကို ကြည့်ပြီး စိတ်ထဲမှ အံကြိတ်ကာ တွေးလိုက်မိ၏။

'ပြီးသွားပြီ... စီနီယာအစ်မ ကျင်းဟုန်က သူ့ကို ကျရှုံးသွားလောက်ပြီ...'

သူမက သူမရှေ့ရှိ ထူးခြားလှသော လူငယ်လေးကို ကြည့်လိုက်ပြီး သိချင်စိတ် အနည်းငယ်ဖြစ်ပေါ်ခြင်းကို မထိန်းချုပ်နိုင်ခဲ့ချေ။

ရွှမ်ယွမ်ကျင်းဟုန်က လူမှားသွားသည်ဟု ပြောသော်လည်း သူမ၏ အလိုအလျောက်သိစိတ်က ရွှမ်ယွမ်ကျင်းဟုန် လိမ်ပြောနေကြောင်း ပြောပြနေပေ၏။

သို့သော် သူမမှာလည်း နားမလည်နိုင်အောင် ဖြစ်နေမိသည်။ နန်ကုန်းယွီက ဘယ်လိုလုပ်ပြီး ရွှမ်ယွမ်ကျင်းဟုန်ရဲ့ အသက်ကို ကယ်တင်နိုင်မှာလဲ။

သိချင်စိတ်ဖြင့် သူမက အချက်အလက်တချို့ ရှာဖွေနိုင်ရန် ကြိုးစားရင်း ထိုနှစ်ဦးနောက်သို့ ဆက်လက် လိုက်ပါသွားခဲ့သည်။

သူတို့သုံးဦး မြို့ထဲ လှည့်လည်သွားလာကြပြီး ရွှမ်ယွမ်ကျင်းဟုန်က မြင်ကွင်းအမျိုးမျိုးနှင့် ထူးခြားသော ဆိုင်များကို နန်ကုန်းယွီအား စိတ်အားထက်သန်စွာ မိတ်ဆက်ပေးခဲ့၏။

နန်ကုန်းယွီကလည်း ယဉ်ကျေးစွာ တုံ့ပြန်ခဲ့ပြီး သူ၏ ချောမောလှပသော မျက်နှာပေါ်တွင် မှိန်ဖျော့သော အပြုံးတစ်ခု ရှိနေပေသည်။

ချီယန်ရှင်းက အနောက်မှ တိတ်ဆိတ်စွာ လိုက်ပါသွားပြီး စကားတစ်ခွန်းမျှ မဆိုဘဲ ထိုနှစ်ဦးကို စောင့်ကြည့်နေ၏။

ရုတ်တရက် သာယာနာပျော်ဖွယ်ကောင်းသော ပလွေတေးသွားတစ်ခု လွင့်ပျံလာသည်။

အားလုံး မော့ကြည့်လိုက်ချိန်တွင် ခရမ်းရောင် ဇာပဝါကို ဝတ်ဆင်ထားသော အဖြူရောင်ဝတ်စုံနှင့် မိန်းကလေးတစ်ဦး အဝေးမှ အထပ်မြင့်အဆောက်အအုံတစ်ခုပေါ်တွင် ပလွေမှုတ်နေသည်ကို မြင်လိုက်ရ၏။ ပလွေသံမှာ အထူးစွမ်းအင် လှိုင်းအတက်အကျ ရှိနေပုံရပေသည်။

"အဲ့ဒီ ပလွေသံက…"

ချီယန်ရှင်း၏ မျက်နှာအမူအရာ အနည်းငယ် ပြောင်းလဲသွားပြီး တစ်ခုခုကို သတိရသွားသည့်အလား ညင်သာစွာ သတိပေးလိုက်သည်။

"စီနီယာအစ်မ... အဲ့ဒါက မြူခိုးနတ်ဘုရားနယ်မြေ ထျန်းယင်မျိုးဆက် ရဲ့ ထူးခြားတဲ့ သက်သာစေတဲ့ တေးသွားတွေ ဖြစ်ပုံရတယ်"

ဤစကားကို ကြားချိန်၌ ရွှမ်ယွမ်ကျင်းဟုန် အနည်းငယ် အံ့အားသင့်သွား၏။

"မြူခိုးနတ်ဘုရားနယ်မြေရဲ့ ထျန်းယင်မျိုးဆက် က အမြဲတမ်း လျှို့ဝှက်ဆန်းကြယ်မှုတွေနဲ့ ဖုံးလွှမ်းနေတာ... သူက ဘယ်လိုလုပ် ဒီနေရာကို ရောက်လာတာလဲ"

သူတို့၏ စကားကို ကြားသောအခါ နန်ကုန်းယွီက သိချင်စိတ်ဖြင့် ပြည့်နှက်စွာ မေးလိုက်သည်။

"နတ်မိမယ် ကျင်းဟုန်... ဒီမြူခိုးနတ်ဘုရားနယ်မြေရဲ့ ထျန်းယင်မျိုးဆက် က ထူးခြားလား"

"အရမ်း ထူးခြားတယ်"

ချီယန်ရှင်းက ပြန်ဖြေလိုက်၏။

"ထျန်းယင်မျိုးဆက် မှာ တပည့်အရေအတွက် အရမ်းနည်းတယ်လို့ ကောလာဟလ ထွက်ကြတယ်... ဒီအနွယ်ထဲကို ဝင်နိုင်တဲ့သူတွေက ဂီတပါရမီ အရမ်းမြင့်မားတဲ့ လူတွေချည်းပဲ"

"ဒီအနွယ်က အသံကို လက်နက်အဖြစ် အသုံးပြုတာဆိုတော့ တိုက်ပွဲမှာ အရမ်း စွမ်းအားကြီးတယ်... အထူးသဖြင့် ရန်သူအုပ်စုတွေကို ရင်ဆိုင်တဲ့နေရာမှာ ယုံနိုင်စရာမရှိအောင်ကို စွမ်းအားကြီးတာ"

"ဒါ့အပြင် ဒီအနွယ်ကို ပိုပြီး ထူးခြားစေတာက သူတို့ရဲ့ ဂီတက ရန်သူတွေရဲ့ ခွန်အားကို ဖိနှိပ်နိုင်သလို၊ ကိုယ့်လူတွေကိုလည်း ကူညီပေးနိုင်တယ်... ဥပမာ - ဒဏ်ရာတွေကို ကုသပေးတာနဲ့ အင်မော်တယ်စွမ်းအင်ကို ယာယီ မြှင့်တင်ပေးတာမျိုးပေါ့"

"လွန်ခဲ့တဲ့ ဆယ်နှစ်ကျော်လောက်က ဆရာနဲ့အတူ မြူခိုးနတ်ဘုရားနယ်မြေ ကို သွားခဲ့ဖူးတယ်... အဲ့ဒီတုန်းက ဒီတေးသွားကို တိုက်ဆိုင်စွာ ကြားခဲ့ရတာကြောင့် ဆရာ ပြောပြတဲ့ အချက်အလက်တွေကို ကြားခဲ့ရတာပဲ"

ဤစကားကို ကြားချိန်၌ နန်ကုန်းယွီ မျက်လုံးများကို အနည်းငယ် ကျဉ်းမြောင်းလိုက်သည်။ ဤအရာက သူ၏ ဂီတနားလည်မှုနှင့် အမှန်တကယ်ပင် တူညီမှုတချို့ ရှိနေပေ၏။

သို့သော် မထင်မှတ်ဘဲ ဤအရာက လျှို့ဝှက်ဆန်းကြယ်သော သင်္ကေတတစ်ခု ဖြစ်လာခဲ့သည်လား။

သူက ရယ်မောလိုက်ပြီး ပြောဆိုလာသည်။

"ဒီပလွေသံမှာ ဝိညာဉ်အသွင်ပြောင်းလဲမှုကို သန့်စင်ပေးနိုင်တဲ့ အထူးစွမ်းအင်တစ်ခု ပါဝင်နေတယ်... တော်တော်လေး အံ့ဩစရာပဲ"

"ဒါကြောင့်ပဲ စင်ကြယ်ခြင်း တေးသွား လို့ ခေါ်တာ မဟုတ်လား"

ချီယန်ရှင်းက ပြောလိုက်၏။

"ထျန်းယင်မျိုးဆက် က အမြဲတမ်း လျှို့ဝှက်ဆန်းကြယ်ခဲ့တယ်... မြူခိုးနတ်ဘုရားနယ်မြေ ရဲ့ စီနီယာအစ်မ က ဘာလို့ ဒီနေရာမှာ ပေါ်လာရတာလဲဆိုတာ ကျွန်မ သိချင်မိတယ်"

ရွှမ်ယွမ်ကျင်းဟုန်က အနည်းငယ် သံသယဖြင့် မေးလိုက်သည်။

မြူခိုးနတ်ဘုရားနယ်မြေ နှင့် ယောင်ချီနတ်ဘုရားနယ်မြေ နှစ်ခုစလုံးသည် ဖြောင့်မတ်သော လမ်းစဉ်၏ အဖွဲ့ဝင်များဖြစ်ကြပြီး အမြဲတမ်း ဆက်ဆံရေးကောင်းမွန်ခဲ့ကြသည်။ ဤအမျိုးသမီး၏ ခွန်အားမှာ အဓိပတိသူတော်စင်အဆင့် ထက် မနည်းကြောင်း သူမ ခံစားရသဖြင့် စီနီယာအစ်မဟု ခေါ်လိုက်ခြင်း ဖြစ်၏။

ချီယန်ရှင်းက ခေါင်းယမ်းလိုက်ပြီး သူမ မသိကြောင်း ပြသလိုက်သည်။

မကြာမီမှာပင် ပလွေတေးသွား မှေးမှိန်သွားပြီး အဖြူရောင်ဝတ်စုံနှင့် မိန်းကလေးလည်း ပျောက်ကွယ်သွားပေ၏။

ဤသည်ကို မြင်သောအခါ ရွှမ်ယွမ်ကျင်းဟုန်တို့ အနည်းငယ် စိတ်မကောင်းဖြစ်သွားသည်။

"သွားပြီး ဂါရဝပြုချင်ခဲ့တာ... ဒါပေမဲ့ သူက အခွင့်အရေး မပေးဘူးပဲ"

နန်ကုန်းယွီက ရယ်မောလိုက်၏။

"ခင်ဗျားတို့က အဲ့ဒီ... စီနီယာနဲ့ မိတ်ဖွဲ့ချင်ပုံရတယ်"

"ဒါပေါ့"

ချီယန်ရှင်းက ခေါင်းညိတ်လိုက်ပြီး ပြောဆိုလာသည်။

"ထျန်းယင်မျိုးဆက် က ခွန်အားကြီးတဲ့သူနဲ့ မိတ်ဖွဲ့ရတာ ငါတို့အတွက် ကောင်းတဲ့ကိစ္စပဲ"

ရွှမ်ယွမ်ကျင်းဟုန်က သဘောတူသည့်ဟန်ဖြင့် ခေါင်းညိတ်လိုက်၏။

နန်ကုန်းယွီ အနည်းငယ် ပြုံးကာ ပြောဆိုလိုက်သည်။

"ခင်ဗျားတို့ မျက်လုံးထဲမှာ ထျန်းယင်မျိုးဆက်က တကယ်ကို အထင်ကြီးစရာကောင်းပုံရတယ်"

"ဒါပေါ့"

ချီယန်ရှင်းက ခေါင်းညိတ်လိုက်၏။

"အဲ့ဒီကို သွားပြီး သူမကို မေးကြည့်ရအောင်... အဲ့ဒီစီနီယာအစ်မက ဘာလို့ ဒီနေရာရောက်နေလဲဆိုတာ သိနိုင်မလား ကြည့်ရအောင်လေ... ဘယ်လိုသဘောရလဲ"

"ကောင်းပြီလေ"

ရွှမ်ယွမ်ကျင်းဟုန်က ခေါင်းညိတ်လိုက်သည်။

သူတို့သုံးဦး လျှောက်သွားကြပြီး ချီယန်ရှင်းက အနီးပတ်ဝန်းကျင်ကို မေးမြန်းစုံစမ်းပြီးနောက် ပြန်ရောက်လာ၏။

"သိခဲ့ရလား"

ရွှမ်ယွမ်ကျင်းဟုန်က မေးလိုက်သည်။

ချီယန်ရှင်းက ခေါင်းညိတ်ကာ ပြုံးလျက် ပြောဆိုလာ၏။

"ကောင်းကင်ဆေးလုံး မြို့တော်က မြို့စားရဲ့သားက ဂီတကို ဝါသနာပါပြီး ဂီတပါရမီ အများကြီး ရှိတယ်ထင်တယ်... မြို့စားက သူ့ရဲ့ အဆက်အသွယ်တွေကို သုံးပြီး အဲ့ဒီစီနီယာအစ်မကို ဖိတ်ခေါ်ခဲ့တာတဲ့"

"အိုး... သူမက တပည့်လက်ခံလိုက်တာလား"

ရွှမ်ယွမ်ကျင်းဟုန်က သိချင်စိတ်ဖြင့် မေးလိုက်သည်။

ချီယန်ရှင်းက ခေါင်းယမ်းလိုက်ပြီး ပြောဆိုလာ၏။

"အဲ့ဒီစီနီယာအစ်မက ပြောတယ်... စင်ကြယ်ခြင်း တေးသွား က ထျန်းယင်မျိုးဆက် အတွက် သီးသန့်ဖြစ်ပြီး တေးသွားတစ်ပုဒ်ကို နားထောင်ရုံနဲ့ သူ့ရဲ့ စစ်မှန်တဲ့ အဓိပ္ပါယ် သုံးပုံဆယ်ပုံကို နားလည်နိုင်တဲ့သူတွေသာ ထျန်းယင်မျိုးဆက် ထဲကို ဝင်နိုင်တယ်တဲ့"

"မြို့စားရဲ့သားက အဲ့ဒါကို မလုပ်နိုင်တဲ့ပုံပဲ အဲ့ဒီစီနီယာအစ်မရဲ့ အသိအမှတ်ပြုမှုကို မရခဲ့ဘူးလို့ ငါ ကြားတယ်"

ဤစကားကို ကြားချိန်၌ နန်ကုန်းယွီက ခေါင်းယမ်းကာ ပြုံးလျက် ပြောဆိုလိုက်သည်။

" ဒီစင်ကြယ်ခြင်း တေးသွား က နားထောင်လို့ ကောင်းပြီး သာယာတယ်... တီးမှုတ်ဖို့လည်း မခက်ခဲပါဘူး... ဒါပေမဲ့ သူပါဝင်နေတဲ့ စွမ်းအင်က ထူးခြားတယ်... တစ်ခါနားထောင်ရုံနဲ့ စစ်မှန်တဲ့ အဓိပ္ပါယ် သုံးပုံဆယ်ပုံ ပါအောင် တီးမှုတ်ဖို့ဆိုတာ ဒီလောက် မရိုးရှင်းဘူး"

"ပိုမှန်တာက... လိုက်ဖက်တဲ့ ဂီတစွမ်းရည်တွေ မရှိရင် သာမန်လူတွေက အဲ့ဒါကို လုံးဝမလုပ်နိုင်ဘူး... တကယ်ကို ထူးခြားတဲ့ ဂီတပါရမီ ရှိတဲ့သူတွေသာ အဲ့ဒါကို လုပ်နိုင်မှာ"

"တကယ်လို့ ထျန်းယင်မျိုးဆက် က တပည့်လက်ခံတဲ့ နေရာမှာ ဒီလောက်အထိ တင်းကျပ်နေမယ်ဆိုရင်... သူတို့မှာ တပည့်အရေအတွက် နည်းနေတာက အံ့ဩစရာ မဟုတ်ပါဘူး"

ရွှမ်ယွမ်ကျင်းဟုန်တို့က သဘောတူသည့်ဟန်ဖြင့် ခေါင်းညိတ်လိုက်ကြ၏။

ထိုအခိုက်အတန့်၌ ချီယန်ရှင်း ရုတ်တရက် သတိဝင်လာပြီး သိချင်စိတ်ဖြင့် ကြည့်လိုက်သည်။

"ရှင်ပြောပုံအရဆို ရှင်လည်း ဂီတကို နားလည်တာလား"

နန်ကုန်းယွီက အနည်းငယ် ပြုံးလျက် ပြောဆိုလာ၏။

"စောင်းတီးတာ၊ စစ်တုရင်ကစားတာ၊ လက်ရေးလှရေးတာနဲ့ ပန်းချီဆွဲတာတွေက လူတစ်ယောက်ရဲ့ နှလုံးသားနဲ့ သဘာဝကို ပြုစုပျိုးထောင်တဲ့ နည်းလမ်းတွေချည်းပါပဲ... ကျွန်တော် အားလပ်ချိန် ပျင်းနေတဲ့အချိန်မှာ အဲ့ဒါတွေ တစ်ခုစီကို အချိန်ကာလ တစ်ခုလောက် ကိုယ်တိုင် သင်ယူခဲ့တယ်"

ချီယန်ရှင်း၏ မျက်လုံးများ ကစားသွားပြီး သူမက နောက်ပြောင်သည့်အပြုံးဖြင့် ပြောလိုက်သည်။

"ဒါဆို ရှင်က စင်ကြယ်ခြင်း တေးသွား ကို တီးမှုတ်နိုင်လား... သူ့ရဲ့ စစ်မှန်တဲ့ အဓိပ္ပါယ်ပါအောင် တီးမှုတ်ဖို့ မလိုပါဘူး... တေးသွား လောက် ဆိုရင် ရပြီ"

"ဂျူနီယာညီမ... နောက်မနေနဲ့တော့"

ရွှမ်ယွမ်ကျင်းဟုန်က သူမကို အလျင်အမြန် တားဆီးလိုက်၏။ နန်ကုန်းယွီနှင့်ပတ်သက်သော အချက်အလက်တချို့ကို သူမ သိထားသည်။

နန်ကုန်းယွီက အသက် ၂၅ နှစ်တောင် မပြည့်သေးဘူး... ဒါပေမဲ့ သူ့ရဲ့ ကျင့်ကြံမှုအဆင့်က အနည်းဆုံး သူတော်စင်တစ်ပိုင်း ရှိပြီး သူ့ရဲ့ ဆေးဖော်စပ်ခြင်းအဆင့်က အနည်းဆုံး ဧကရာဇ်အဆင့်မှာ ရှိနေတယ်... ဂီတကို လေ့လာဖို့ အဲ့ဒီလောက် အချိန်အများကြီးကို သူ ဘယ်က ရမှာလဲ။

ဘာပဲဖြစ်ဖြစ် သူက ရက်အနည်းငယ်လောက်ပဲ အကြမ်းဖျင်း လေ့လာခဲ့တာမို့ သီချင်းတစ်ပုဒ်ရဲ့ တေးသွားကို တစ်ခါနားထောင်ရုံနဲ့ မတီးမှုတ်နိုင်ပါဘူး။

သို့သော် ထိုအချိန်တွင် နန်ကုန်းယွီက ချီယန်ရှင်းကို ကြည့်လိုက်ပြီး သူ၏ နှုတ်ခမ်းများတွင် လှပသော အပြုံးတစ်ခု ကွေးညွတ်သွားပေ၏။