အခန်း ၁၄၉

အခန်း (၁၄၉) - အဖွဲ့သစ်

လင်းဖန်သည် နောက်ထပ် ငါးရက်တာကာလပတ်လုံးတွင် ကျင့်ကြံခြင်းလေ့ကျင့်ရန်အတွက် ခန္ဓာကိုယ်ကြံ့ခိုင်ရေးတောင်ထွတ်သို့ သွားရောက်ခဲ့လေသည်။

ကျန်းရီနျန်သည် လင်းဖန်၏အလားအလာကို အစွမ်းကုန်ဆွဲထုတ်နိုင်ရန်အတွက် သူ၏ လေ့ကျင့်ခန်းများကို ပိုမိုပြင်းထန်အောင် ပြုလုပ်ပေးထားလေသည်။

ပထမ၌ သာမန်မီးနှင့် ရေခဲဓာတ်များကိုသာ အသုံးပြုခဲ့သည်။

ထို့နောက်တွင်မူ မိစ္ဆာသားရဲအမြုတေများမှ ထွက်ပေါ်လာသော မီးနှင့် ရေခဲဓာတ်များအဖြစ်သို့ ပြောင်းလဲသွားချေသည်။

မိစ္ဆာသားရဲအမြုတေများကို အသုံးပြုခြင်းကြောင့် လင်းဖန်၏ကျင့်ကြံမှုအရှိန်အဟုန်မှာ ပိုမိုမြန်ဆန်လာခဲ့ပေသည်။

လင်းဖန်သည် ပိုမိုတိုးတက်လာပြီး အခြေခံတည်ဆောက်ခြင်းအဆင့် ဒုတိယအဆင့်ခွဲသို့ တဖြည်းဖြည်း နီးကပ်လာခဲ့လေသည်။

ထိုငါးရက်အတွင်း၌ မိစ္ဆာသားရဲအမြုတေ တစ်ဆယ်ခုကို အသုံးပြုခဲ့ရလေသည်။

ဤအခြေအနေက ကျင့်ကြံခြင်းလမ်းစဉ်သည် အရင်းအမြစ်များအား မည်မျှအထိ သုံးစွဲရသည်ကို သတိရစေခဲ့ပြီး မြင့်မားသောအဆင့်များသို့ ရောက်ရှိလေလေ ပိုမိုလိုအပ်လေလေ ဖြစ်ပေသည်။

လက်ရှိအချိန်တွင် ချင်ဖုန်းဂိုဏ်းသည် ကြာနက်ဂိုဏ်းနှင့် တိုက်ပွဲဖြစ်ပွားပြီးနောက်ပိုင်း အရင်းအမြစ်များ လိုအပ်လျက်ရှိချေသည်။

ထို့ကြောင့် ကျန်းရီနျန်သည် မိစ္ဆာသားရဲအမြုတေများ ကုန်ဆုံးသွားသောအခါ လင်းဖန်အား တာဝန်ပေးခန်းမသို့သွားရောက်၍ တာဝန်တစ်ခုခုယူရန် ညွှန်ကြားလိုက်လေသည်။

တာဝန်ပေးခန်းမ…

လင်းဖန် ရောက်ရှိလာသောအခါ ထိုနေရာသည် ပုံမှန်ထက် ပိုမိုစည်ကားနေသည်ကို တွေ့လိုက်ရသည်။

တောင်ထွတ်တိုင်းတွင် အရင်းအမြစ်များပြတ်လပ်နေသဖြင့် တပည့်အားလုံးမှာ တာဝန်များကို မဖြစ်မနေ ယူကြရပေသည်။

တာဝန်တံဆိပ်ပြားများ ချိတ်ဆွဲထားသော တာဝန်နံရံကို ကြည့်ရှုနေကြသည့် တပည့်များသည် လင်းဖန်ကိုမြင်လိုက်ရသောအခါ တိတ်ဆိတ်သွားကြလေသည်။

လင်းဖန်က စိတ်ဝင်စားစရာ တာဝန်တစ်ခု ရှိ၊မရှိ ကြည့်ရှုရန် ကြိုးစားလိုက်စဉ် သူတို့သည် လမ်းဖယ်ပေးကြသည်။

လင်းဖန်က တာဝန်တံဆိပ်ပြားများကို တစ်ခုချင်းစီ လိုက်လံကြည့်ရှုနေစဉ် တပည့်များ၏ အကြည့်များသည်လည်း သူ၏ မျက်လုံးများနှင့်အတူ လိုက်ပါလှုပ်ရှားနေကြသည်။

သူတို့သည် လင်းဖန်အနေဖြင့် အဖွဲ့လိုက်လုပ်ဆောင်ရမည့် တာဝန်တစ်ခုကို ရွေးချယ်ရန် မျှော်လင့်နေကြသည်။

လင်းဖန်နှင့်အတူ သွားရောက်ရပါက တာဝန်သည် အဆင်ပြေချောမွေ့လိမ့်မည်ဖြစ်ကြောင်း သူတို့ တွေးတောနေကြချေသည်။

သူတို့ထဲမှ အများစုမှာ ချီစုစည်းမှုအဆင့်တွင်သာ ရှိကြသေးသည်။

လင်းဖန်မှာမူ အမြုတေဖွဲ့စည်းခြင်းအဆင့်ရှိသော ပြိုင်ဘက်ကိုပင် အလွယ်တကူအနိုင်ယူခဲ့သည့် အခြေခံတည်ဆောက်ခြင်းအဆင့်ရှိသူ တစ်ဦး ဖြစ်ပေသည်။

၎င်းမှာ သူတို့ထဲမှ မည်သူမျှ မလုပ်ဆောင်နိုင်သော ရှားပါးသည့် စွမ်းဆောင်ရည်မျိုး ဖြစ်သည်။

လင်းဖန်သည် ခြေလှမ်းများကို ရပ်တန့်လိုက်ပြီး တာဝန်တံဆိပ်ပြားတစ်ခုကို ဖတ်ရှုလိုက်လေသည်။

၎င်းမှာ တစ်ဦးတည်း လုပ်ဆောင်ရမည့်တာဝန်ဖြစ်သည်ကို မြင်လိုက်ရသောအခါ သူတို့သည် ခေါင်းများကို ခါယမ်းလိုက်ကြပြီး စိတ်ထဲမှ ငြင်းဆန်လိုက်ကြသည်။

နောက်တစ်ဆက်တည်းတွင် လင်းဖန်က ထိုတာဝန်တံဆိပ်ပြားထံမှ အကြည့်လွှဲလိုက်သောအခါ သူတို့အားလုံးမှာ စုပေါင်း၍ သက်ပြင်းအကြီးကြီး ချလိုက်ကြလေသည်။

“ဟူး... သူက တစ်ဦးတည်းလုပ်ရမယ့်တာဝန်ကို ယူတော့မလို့ ထင်နေတာ...”

“အပြင်မှာ အခြေအနေတွေ တော်တော်လေး မငြိမ်မသက်ဖြစ်နေတယ်လို့ ကြားတယ်... သူနဲ့အတူ သွားရတာ အကောင်းဆုံးပဲ...”

“ငါ့ရဲ့ ဂိုဏ်းတူအစ်ကိုတစ်ယောက်ဆိုရင် သူသွားနှိမ်နင်းပေးခဲ့ရတဲ့ သူပုန်တွေကြောင့် ဒဏ်ရာပြင်းပြင်းထန်ထန် ရလာခဲ့တာ...”

သူတို့သည် အချင်းချင်း တိုးတိုးတိတ်တိတ် စကားပြောဆိုနေကြသည်။

နောက်ဆုံးတွင် လင်းဖန်သည် အဖွဲ့လိုက်လုပ်ဆောင်ရမည့် တာဝန်တစ်ခုကို စိတ်ဝင်စားသွားခဲ့ချေသည်။

လင်းဖန်သည် သူပုန်များကို နှိမ်နင်းရမည့် တာဝန်တံဆိပ်ပြားတစ်ခုကို ကြည့်ရှုနေသဖြင့် သူပုန်နှိမ်နင်းခြင်းအကြောင်း ပြောဆိုခဲ့သော တပည့်မှာ ကျိန်ဆဲလိုက်လေသည်။

လင်းဖန်သည် မြေပြင်အခြေအနေကို စုံစမ်းသိရှိလိုနေသည်။

ယီမျိုးနွယ်စုအား နှိမ်နင်းရမည့်အချက်က သူ့ကို ဆွဲဆောင်နေသည်။ ထိုမျိုးနွယ်စုသည် မိစ္ဆာသားရဲများကို ယဉ်ပါးအောင်မွေးမြူရာတွင် နာမည်ကျော်ကြားလှပေသည်။

သူသည် ဤအခွင့်အရေးကို အသုံးပြု၍ ကလဲ့စားချေအမှတ်အချို့ ရယူနိုင်ပေလိမ့်မည်။

ထိုတာဝန်သည် သုံးဦးပါဝင်သော အဖွဲ့တစ်ဖွဲ့လိုအပ်ပြီး ဆုလာဘ်မှာ စွမ်းဆောင်ရည်အမှတ် တစ်ရာ ဖြစ်ချေသည်။

လင်းဖန်သည် ဟိုမင်နှင့် ဟွမ်ယွမ်ခွန်းတို့ကို ခေါ်ယူရန် စဉ်းစားလိုက်သည်။

သူသည် တာဝန်တံဆိပ်ပြားကို ဖြုတ်ယူပြီးနောက် ကောင်တာထံသို့ လျှောက်လှမ်းသွားခဲ့လေသည်။

သူ လှမ်းလိုက်သော ခြေလှမ်းတိုင်းတွင် အားလုံး၏ အကြည့်များက လင်းဖန်ထံ၌သာ ရှိနေကြသည်။

ကောင်တာမှ တပည့်သည် လင်းဖန်အား ဦးညွှတ်ကာ ယဉ်ကျေးပျူငှာစွာ နှုတ်ဆက်လိုက်သည်။

“မင်္ဂလာပါ ဂိုဏ်းတူအစ်ကိုကြီး...”

အောင်မြင်ခဲ့သော တာဝန်များစွာနှင့် နွေဦးနှောင်းပိုင်း အမဲလိုက်ပွဲတွင် လင်းဖန်ပြုလုပ်ခဲ့သည့် အရာများကြောင့် ထိုတပည့်သည် သူ့အား ရန်စရန်အထိ မိုက်မဲခြင်း မရှိပေ။

ကောင်တာမှ တပည့်က ဆက်လက်ပြောကြားလိုက်လေသည်။

“ဒီတာဝန်က နောက်ထပ် အဖွဲ့ဝင်နှစ်ယောက် လိုအပ်ပါတယ်... ဒါကို စာရင်းသွင်းဖို့အတွက် သူတို့ကို ဒီကို ခေါ်လာရပါလိမ့်မယ်...”

“ဂိုဏ်းတူအစ်ကိုကြီး... ကျွန်တော့်ကို ရွေးပါ... ကျွန်တော်က ကျွမ်းကျင်ပြီး အစွမ်းလည်းအရမ်းထက်ပါတယ်...”

“သူ့စကားကို မယုံပါနဲ့... သူက ပြဿနာနဲ့ တွေ့ရင် အရင်ဆုံး ထွက်ပြေးမယ့်သူမျိုးပါ...”

“ကျွန်တော်က တခြားသူတွေထက် ပိုတော်ပါတယ်လို့ ကတိပေးရဲပါတယ်...”

တပည့်များသည် လင်းဖန်အား သူတို့ကို ထည့်သွင်းစဉ်းစားစေရန်အတွက် စကားပြောရင်း ရင်ဘတ်များကိုထုပြကာ ဆွဲဆောင်ရန် ကြိုးစားလာကြသည်။

လင်းဖန်ကမူ ခေါင်းကိုသာ ခါယမ်းလိုက်ပြီး သူတို့ကို လျစ်လျူရှုထားလိုက်သည်။

သူတို့သည် ဟိုမင်၊ ဟွမ်ယွမ်ခွန်းတို့နှင့်အတူ ဖြတ်သန်းခဲ့ရသော အတွေ့အကြုံများနှင့် ယှဉ်လျှင် ဘာမျှ မဟုတ်ချေ။

သူသည် ဓားတောင်ထွတ်သို့ ဆက်လက်သွားရောက်ကာ ဟိုမင်နှင့် ဟွမ်ယွမ်ခွန်းတို့ကို ရှာဖွေလိုက်လေသည်။

ဟိုမင်သည် မည်သည့်တုံ့ဆိုင်းမှုမျှမရှိဘဲ သဘောတူလိုက်သည်။

သို့သော်လည်း ဟွမ်ယွမ်ခွန်းမှာ ထိုနေရာ၌ ရှိမနေခဲ့ပေ။

ချင်းယန်ဇီသည် သူ့အား မြောက်ပိုင်းဒေသသို့ ကင်းထောက်ရန်အတွက် စေလွှတ်ထားခြင်းဖြစ်ပေသည်။

လင်းဖန် စဉ်းစားမိသည့် တစ်ဦးတည်းသော ကိုယ်စားလှယ်လောင်းမှာ ကျန်းရှီ ဖြစ်ပေသည်။

သမီးဖြစ်သူသည် တောင်ထွတ်သခင်၏တာဝန်များကို ကိုင်တွယ်ဖြေရှင်းရန် မလိုအပ်တော့သလို အစွမ်းအစ ရှိသူဖြစ်ချေသည်။

ခန္ဓာကိုယ်ကြံ့ခိုင်ရေးတောင်ထွတ်…

ပင်မခန်းမဆောင်အတွင်း၌…

ကျန်းရှီသည် ဘေးနားတွင် ချထားသော လေ့ကျင့်ရေးရုပ်သေးရုပ်တစ်ခုနှင့် ‘တိုက်ခိုက်လေ့ကျင့်’ နေချေသည်။

လက်သီးချက်တိုင်းက ထိုရုပ်သေးရုပ်ကို လင်းထိန်သွားစေသည်။

ထိုးနှက်ချက် ပိုမိုပြင်းထန်လေလေ ပိုမိုတောက်ပစွာ လင်းလက်လာလေလေ ဖြစ်သည်။

လင်းဖန်သည် ပင်မခန်းမဆောင်အတွင်းသို့ ဝင်ရောက်ပြီးနောက် ဦးညွှတ်ကာ နှုတ်ဆက်လိုက်လေသည်။

“မင်္ဂလာပါ ဂိုဏ်းတူအစ်မကြီး...”

သူက ဆက်လက်၍ သူ၏ ရည်ရွယ်ချက်ကို ပြောပြလိုက်သည်။

“ကျွန်တော် အကူအညီတစ်ခုတောင်းချင်လို့ပါ... ကျွန်တော်တို့နဲ့အတူ တာဝန်တစ်ခုသွားဖို့ အဖွဲ့ထဲ ဝင်ပေးနိုင်မလား...”

ကျန်းရှီက ပြန်မပြောဘဲ သူမ လုပ်ဆောင်နေသည်ကိုသာ ဆက်လက်လုပ်ဆောင်နေသည်။

လင်းဖန်သည် ကောင်းသောရည်ရွယ်ချက် ရှိလိမ့်မည်မဟုတ်ကြောင်း သူမ တွေးတောနေသည်။

သူမအနေဖြင့် တစ်ကြိမ်တစ်ခါမျှ ဒဏ်ရာမရဘဲ လွတ်မြောက်ခဲ့ဖူးခြင်းမရှိပေ။

ကျန်းရီနျန်၏အသံသည် သူမ၏ စိတ်အာရုံထဲသို့ ရောက်ရှိလာသောအခါ သူမ၏လက်သီးမှာ လေထဲ၌ တန့်သွားခဲ့လေသည်။

‘ရှီအာ... လမ်းခရီးမှာ သူ့ကို သွားပြီး ကာကွယ်ပေးလိုက်ပါ... ငါတို့အနေနဲ့ ဒီလို ပါရမီရှင်မျိုးကို ဆုံးရှုံးလို့ မဖြစ်ဘူး...’

ယခုအခါ သူ၏ ကိုယ်ပိုင်သမီးဖြစ်သူသည်ပင် လင်းဖန်ကို မယှဉ်နိုင်တော့သဖြင့် သူမသည် စိတ်ကောက်ကာ တိတ်တဆိတ် တွေးတောလိုက်သည်။

‘အခုတော့ သမီးအရင်းကတောင် လင်းဖန်ကို မမီတော့ဘူးပေါ့...’

သို့သော်လည်း သူမအနေဖြင့် တွေးတောရုံသာ တတ်နိုင်ပေသည်။

အကယ်၍ ကျန်းရီနျန်သာ တတ်နိုင်ပါက သူကိုယ်တိုင်ပင် လင်းဖန်နှင့်အတူ တာဝန်သွားရောက် ထမ်းဆောင်ချင်နေပေလိမ့်မည်။

နောက်တစ်ဆက်တည်းတွင် သူမသည် လင်းဖန်ဘက်သို့ လှည့်ကာ ပြောလိုက်လေသည်။

“ရပါတယ်... ပြဿနာမရှိဘူး... တစ်စုံတစ်ယောက်ကြောင့်သာ မဟုတ်ရင် ကျွန်မ သဘောတူမှာ မဟုတ်ဘူး...”

ကျန်းရီနျန်သည်လည်း ကျေနပ်စွာဖြင့် ခေါင်းညိတ်လိုက်လေသည်။

လင်းဖန်က နားလည်မှုလွဲသွားပြီး သူမကိုယ်သူမ ရည်ညွှန်းသည် ထင်မှတ်ကာ မေးလိုက်သည်။

“တစ်စုံတစ်ယောက်လား... ယုန်မိန်းကလေးကို ပြောတာလား...”

“ယုန်မိန်းကလေးလား... လုံးဝ မဟုတ်ဘူး...”

ကျန်းရှီက ရှင်းပြရန်ကြိုးစားလိုက်သော်လည်း ပိုမိုဆိုးရွားသွားစေနိုင်သည်ကို သတိပြုမိသဖြင့် ရပ်တန့်လိုက်သည်။ သူမသည် သူ့အား အခြားအတွေးများ မဝင်စေချင်ပေ။

ထို့နောက် လင်းဖန်သည် ဟိုမင်၊ ကျန်းရှီတို့နှင့်အတူ တာဝန်ပေးခန်းမသို့ ပြန်လည်သွားရောက်ခဲ့လေသည်။

အခြားတပည့်များသည် လင်းဖန်က အခြားလူနှစ်ဦးနှင့်အတူ ပြန်လည်ရောက်ရှိလာသည်ကို မြင်သောအခါ စိတ်ပျက်သွားကြလေသည်။

ကောင်တာမှတပည့်သည် သူတို့အား တာဝန်၏ အသေးစိတ်အချက်အလက်များကို ရှင်းလင်းပြောကြားပေးလေသည်။

ယီမျိုးနွယ်စုသည် ပုန်ကန်ခဲ့ကြပြီး ကွေ့အန်းရွာကို တိုက်ခိုက်ခဲ့ကြသည်။

သူတို့သည် ထိုနေရာရှိ အရာရှိများကိုကူညီ၍ ပုန်ကန်မှုကို နှိမ်နင်းပေးရမည် ဖြစ်ပေသည်။

ယီမျိုးနွယ်စုနှင့် ၎င်းတို့၏ ယဉ်ပါးအောင်မွေးမြူထားသော သားရဲများသည် ကြီးမားသောအန္တရာယ်ကို ဖြစ်စေနိုင်သဖြင့် ဤတာဝန်ကို အန္တရာယ်အလွန်များသော တာဝန်အဖြစ် သတ်မှတ်ထားချေသည်။

သူ ရှင်းပြပြီးသွားသောအခါ သူတို့အနေဖြင့် ဆက်လက်လုပ်ဆောင်ရန် ဆန္ဒရှိမရှိ မေးမြန်းလိုက်သည်။

သူတို့သုံးဦးသည် တာဝန်တံဆိပ်ပြားပေါ်တွင် သူတို့၏ လက်ဝါးများကို ရိုက်နှိပ်လိုက်ရင်း ပြတ်သားစွာ ပြောလိုက်ကြလေသည်။

“အင်း... ငါတို့ လုပ်မယ်...”

၎င်းမှာ သူတို့၏ ပူးပေါင်းဆောင်ရွက်မှုအတွက် အစပြုမှုအသစ်တစ်ခု ဖြစ်ပေသည်။

နောက်တစ်နေ့…

လင်းဖန်သည် လိုအပ်သမျှအရာအားလုံး ရှိ၊မရှိ သေချာစွာစစ်ဆေးပြီးနောက် သစ်သားအိမ်လေးထဲမှ ထွက်ခွာခဲ့လေသည်။

သူ၏ ဖားပြုတ်ရုပ်တုငယ်ထဲတွင် ယခုအခါ ကျန်းရီနျန်ပေးထားသော ဆေးလုံးများဖြင့် ပြည့်နှက်နေပြီ ဖြစ်သည်။

အရာအားလုံးပြည့်စုံကြောင်း အတည်ပြုပြီးနောက် သူသည် ဟိုမင်၊ ကျန်းရှီတို့နှင့် တွေ့ဆုံရန်အတွက် စတင်ထွက်ခွာခဲ့ချေသည်။