အခန်း ၁၁၇

အပိုင်း(၁၁၇) အစွမ်းများအသီးသီး ပြသကြခြင်း

ချန်းရီက နောက်ထပ် တုံ့ပြန်မှုတစ်ခုခု ပြုလုပ်ရန် အချိန်မရလိုက်ပေ။

လူ့မျက်နှာရှစ်ခုထဲမှ ကလေးငယ်၏ မျက်နှာက ချန်းရီကို ရုတ်တရက် လှမ်းကြည့်လာပြီး ထိုကလေးမျက်နှာက ဟီးခနဲ ရယ်မောလိုက်ရာ ၎င်း၏ အပြုံးသည် အလွန်တရာ ဆိုးယုတ်ကောက်ကျစ်လှ၏။

ပြီးနောက် တုတ်ခိုင်လှသော ရေဘဝဲလက်တံကြီး တစ်ချောင်းက တိုက်ရိုက် ရိုက်ချလာသည်။

ယခုလေးတင် သူ၏ မျက်စိရှေ့ရှိ ရေဘဝဲကြီး၏ ပုံစံကြောင့် အံ့အားသင့်နေဆဲဖြစ်ရာ ဤကဲ့သို့ ရုတ်တရက် ရိုက်ချလာလိမ့်မည်ဟု မထင်မှတ်ထားခဲ့ပေ။

၎င်း၏ အမြန်နှုန်းမှာ အလွန်တရာ မြန်ဆန်လွန်းလှသည်။

"သွားစမ်း"

ချန်းရီ၏ မျက်နှာက အေးစက်သွားပြီးနောက် သူ၏ ခန္ဓာကိုယ်ပတ်လည်တွင် မီးခိုးငွေ့များ လိမ့်တက်လာကာ ၃၃ ပေကျော် ရှည်လျားသော ဝေလငါးကြီး တစ်ကောင်သည် မီးခိုးငွေ့များထဲမှ ရုန်းကန်ထွက်ပေါ်လာပြီး ရေဘဝဲကြီးဆီသို့ အပြင်းအထန် ပြေးဝင်သွားလေသည်။

အကယ်၍ ယခုအချိန်တွင် ထိုဝေလငါးကို သေချာကြည့်မည်ဆိုပါက ထိုဝေလငါးသည် ယခင်က သဲကန္တာရထဲတွင် မြင်တွေ့ခဲ့ရသော ကောင်းကင်ဝေလငါးကြီးနှင့် အလွန်တူကြောင်း တွေ့ရှိရပေလိမ့်မည်။

ထိုကောင်းကင်ဝေလငါးကြီးကို မြင်တွေ့ခဲ့ရသည့် နေ့မှစတင်၍ပင်။

ချန်းရီသည် ထိုကောင်းကင်ဝေလငါးကြီး၏ ပုံစံကို အလွန်နက်ရှိုင်းစွာ မှတ်မိနေခဲ့ပြီး ထို့ကြောင့်ပင် သူသည် ကွယ်ရာ၌ ဤဝေလငါးကြီးကို မရေမတွက်နိုင်အောင် အတုခိုး ပုံဖော်ခဲ့ဖူးသည်။

မီးခိုးငွေ့ ပုံဖော်ခြင်း၏ အဓိက အနှစ်သာရမှာ အတုခိုးခြင်းပင် ဖြစ်သည်။

မီးခိုးငွေ့ ပုံဖော်ခြင်း၏ အစွမ်းကို ကန့်သတ်ထားသော အဓိက အချက်နှစ်ချက် ရှိလေသည်။

ပထမအချက်မှာ အရာဝတ္ထုတစ်ခုအပေါ် နားလည်သဘောပေါက်မှု နက်ရှိုင်းလေလေ အတုခိုးရာတွင် ပိုမိုတူညီလေလေဖြစ်ပြီး အစွမ်းမှာလည်း မူလအရာနှင့် ပို၍နီးစပ်လေလေ ဖြစ်သည်။ ပုံဖော်မှု၏ လက်တွေ့ကျမှုသည် အနိမ့်ဆုံးအဆင့်ကို ဆုံးဖြတ်ပေးသည်။

ဒုတိယအချက်မှာ မူလအရာက ပိုမို အစွမ်းထက်လေလေ မီးခိုးငွေ့ ပုံဖော်မှုကလည်း ပိုမို အစွမ်းထက်လေလေ ဖြစ်သည်။ မူလအရာ၏ စွမ်းအားသည် အမြင့်ဆုံးအဆင့်ကို ဆုံးဖြတ်ပေးသည်။

ဥပမာအားဖြင့် ချန်းရီ အတုခိုးရာတွင် အတူဆုံးအရာမှာ ကြောင်လေးပင် ဖြစ်သည်။

သို့သော် ဝမ်းနည်းစရာကောင်းသည်မှာ ချန်းရီက ရာခိုင်နှုန်းပြည့် အတုခိုးနိုင်ခဲ့လျှင်ပင် ကြောင်လေးတစ်ကောင်၏ တိုက်ခိုက်နိုင်စွမ်းမှာ လုံးဝမရှိသလောက်ပင် ဖြစ်သည်။

ထို့ကြောင့် ချန်းရီက ကြောင်လေးကို ပုံဖော်ခြင်းသည် လေ့ကျင့်ရေးအတွက် နည်းလမ်းတစ်ခုအနေဖြင့်သာ အသုံးပြု၍ ရနိုင်သည်။

ချန်းရီ ပုံဖော်ထားသော ကောင်းကင်ဝေလငါးမှာ ပေ ၄၀ ကျော်ခန့်သာ ရှည်လျားပြီး အစစ်အမှန် ကောင်းကင်ဝေလငါးကြီးနှင့် နှိုင်းယှဉ်ပါက ကွာခြားချက်မှာ မိုးနှင့်မြေလိုပင် ဖြစ်သည်။

သို့သော် ဤအလျင်စလို အချိန်အတွင်း၌ ၎င်းသည် ချန်းရီ လုပ်ဆောင်နိုင်သည့် အမြင့်ဆုံး ကန့်သတ်ချက် ဖြစ်နေပြီ ဖြစ်သည်။

ထိုအချိန်က ရှုထောင့် အနေအထားကြောင့် ချန်းရီသည် ကောင်းကင်ဝေလငါးကြီး၏ ပြီးပြည့်စုံသော ပုံစံကို လုံးဝ မမြင်တွေ့ခဲ့ရပေ။

တကယ်တမ်းတွင်မူ ချန်းရီသည် အခြားသတ္တဝါ တစ်မျိုးကို ပုံဖော်ရာတွင် ပို၍ တူညီလေသည်။

ယခင်က သဲကန္တာရထဲတွင် သူတို့လူစု ပူးပေါင်း၍ လူမျက်နှာ ကင်းမြီးကောက် တစ်ကောင်ကို သတ်ဖြတ်ခဲ့ကြသည်။

လူမျက်နှာ ကင်းမြီးကောက်အပေါ် သူ၏ မှတ်သားထားမှုမှာ ပိုမို နက်ရှိုင်းသည်။

သူက လူမျက်နှာ ကင်းမြီးကောက်ကို ပုံမဖော်ဘဲ ကောင်းကင်ဝေလငါးကို ပုံဖော်ရသည့် အကြောင်းရင်းမှာကား။

ထိုအချိန်က ချန်းရီနှင့် လူမျက်နှာ ကင်းမြီးကောက်တို့ တိုက်ခိုက်ခဲ့စဉ်က လူမျက်နှာ ကင်းမြီးကောက်တွင် လေထဲ၌ ပျံသန်းနိုင်စွမ်း မရှိခဲ့ပေ။

ကောင်းကင်ဝေလငါး တစ်ကောင်တည်းသာလျှင် ယခုအခြေအနေအတွက် အသင့်တော်ဆုံး ဖြစ်သည်။

ကောင်းကင်ဝေလငါးက ပုံစံပေါ်လာသည်နှင့် အစစ်အမှန် ဝေလငါးတစ်ကောင်ကဲ့သို့ အမြီးကို ညင်သာစွာ ယမ်းခါလိုက်ပြီး ထိုတုတ်ခိုင်သော လက်တံကြီးကို ကွင်းရှောင်ကာ ရေဘဝဲကြီး၏ ကိုယ်ထည်ဆီသို့ တိုက်ရိုက် ပြေးဝင်သွားလေသည်။

ချန်းရီကလည်း ဘေးဘက်သို့ အလျင်အမြန် ရှောင်တိမ်းလိုက်သည်။

ရေဘဝဲကြီး၏ လက်တံက လမ်းမပေါ်သို့ အပြင်းအထန် ရိုက်ချလိုက်ရာ ကောင်းမွန်နေသော လမ်းမကြီးသည် မျက်စိတစ်မှိတ်အတွင်းမှာပင် ရှည်လျားသော တွင်းကြီးတစ်ခု ဖြစ်သွားလေသည်။

တစ်ချိန်တည်းမှာပင် မီးခိုးငွေ့များဖြင့် ပုံဖော်ထားသော ဧရာမ ကောင်းကင်ဝေလငါးကြီးက ရေဘဝဲကြီး၏ ခန္ဓာကိုယ်ကို ဝင်တိုက်လိုက်သည်။

ရေဘဝဲကြီး၏ ခန္ဓာကိုယ်မှာ တိုက်မိသွားသဖြင့် ယိုင်ထွက်သွား၏။

လက်တံ အတော်များများက ကောင်းကင်ဝေလငါးဆီသို့ ပစ်မှတ် ပြောင်းလဲသွားကြသည်။

တုံ့ပြန်ရန် အချိန်ပင်မရလိုက်ဘဲ ပုံဖော်ထားသော ကောင်းကင်ဝေလငါးသည် လက်တံ အတော်များများ၏ တင်းကြပ်စွာ ရစ်ပတ်ခြင်းကို ခံလိုက်ရပြီး မည်မျှပင် ရုန်းကန်နေပါစေ အချည်းနှီးသာ ဖြစ်သွားလေသည်။

"ခွေးကောင်... ငါ့အစွမ်းကို ကြည့်ထား"

မီးခိုးငွေ့များကြားမှ ဒေါသတကြီး ဟိန်းဟောက်သံတစ်ခု ထွက်ပေါ်လာသည်။

မီးခိုးငွေ့များသည် ပြင်းထန်သော စွမ်းအားတစ်ခုကြောင့် ချက်ချင်း လွင့်စင်သွားပြီး လေဟာနယ်တစ်ခု ဖြစ်ပေါ်သွားလေသည်။

၎င်းမှာ ထယ်ရှီးပင် ဖြစ်သည်။

ယခုအချိန်တွင် ထယ်ရှီး၏ အရပ်အမြင့်မှာ ၁၃ ပေ နီးပါးခန့် ရှိနေပြီး သူ၏ တစ်ကိုယ်လုံးသည် ယခင်ကထက် များစွာ ပိုမို အစွမ်းထက်နေသကဲ့သို့ ခံစားရကာ သူ၏ ခေါင်းနှစ်လုံးမှာလည်း အလွန်တရာ ကြောက်မက်ဖွယ် ကောင်းနေ၏။

ခေါင်းတစ်လုံးမှာ မျက်လုံးများ နီရဲနေပြီး ဆိုးယုတ်သော မျက်နှာထား ရှိနေသည်။

ထိုသူမှာ ခွန်ရှီး မဟုတ်လျှင် မည်သူ ဖြစ်နိုင်မည်နည်း။

အခြား ခေါင်းတစ်လုံးကမူ ရက်စက်သော မျက်နှာထားမျိုး လုပ်ရန် ကြိုးစားနေသော်လည်း မည်သို့ပင်လုပ်လုပ် အနည်းငယ် လိုအပ်နေသေးရာ ထိုသူမှာ အတုံးအအ ထယ်ရှီးပင် ဖြစ်ပေသည်။

ထယ်ရှီးက သူ၏ လက်နှစ်ဖက်ကို ပူးလိုက်ရာ သူ၏ လက်တံနှစ်ဖက်မှ ကြွက်သားများသည် ချက်ချင်းပင် အဆက်မပြတ် လှုပ်ရှားလာကြသည်။

ဘေးပတ်ဝန်းကျင်ရှိ လူများ၏ အံ့အားသင့်နေသော အကြည့်များအောက်တွင် ထယ်ရှီး၏ လက်တံနှစ်ဖက်သည် သွေးသားများဖြင့် ဖွဲ့စည်းထားသော ဧရာမ အမြောက်ကြီး တစ်လက်အဖြစ် ပြောင်းလဲသွားလေသည်။

ဤအစွမ်းမှာ တိုက်တန် လမ်းစဉ် အဆင့် (၂) ခေါင်းနှစ်လုံး လူ့ဘီလူးကြီး၏ အစွမ်းသစ်ပင် ဖြစ်သည်။

သွေးသား လက်နက်တပ်ဆင်ခြင်း။

ယခင်က ထယ်ရှီး ပြောပြဖူးသော်လည်း မြင်ကွင်းက ဤမျှ အံ့မခန်း ဖြစ်နေလိမ့်မည်ဟု မထင်မှတ်ထားခဲ့ပေ။

သွေးသားများဖြင့် ဖွဲ့စည်းထားသော အမြောက်ပြောင်းဝကြီးက ပြင်းထန်စွာ ရှူသွင်းလိုက်ရာ ချန်းရီသာ အချိန်မီ မထိန်းချုပ်နိုင်ခဲ့ပါက မီးခိုးငွေ့များပင်လျှင် အမြောက်ပြောင်းဝထဲသို့ စုပ်ယူခံရနိုင်ချေ ရှိလေသည်။

ပတ်ဝန်းကျင်တွင် လွင့်ဝဲနေသော နှင်းပွင့်များအားလုံးသည် အမြောက်ပြောင်းဝ၏ စုပ်ယူခြင်းကို ခံလိုက်ရပြီး မီးခိုးငွေ့များမှလွဲ၍ ကြီးမားသော လဟာပြင်နယ်မြေတစ်ခုကို ဖြစ်ပေါ်စေခဲ့သည်။

သွေးသား အမြောက်ကိုယ်ထည်ကြီးသည် ယခုအခါ ဗုံတစ်လုံးကဲ့သို့ ဖောင်းကားနေပြီး အန္တရာယ်နှင့် ကြုံတွေ့ရသောအခါ ခန္ဓာကိုယ်ကို ဖောင်းကားစေရန် ကြိုးစားနေသော ပူဖောင်းငါး တစ်ကောင်နှင့် တူနေ၏။

"အုန်း"

တုံးအိအိ မြည်ဟည်းသံတစ်ခုနှင့်အတူ အမြောက်ပြောင်းဝမှ အဖြူရောင် လေလှိုင်းတစ်ခု ပန်းထွက်လာကာ ပတ်ဝန်းကျင်ရှိ မီးခိုးငွေ့များနှင့် နှင်းပွင့်များကို လှုပ်ခါသွားစေသည်။

ရှင်းလင်းမြင်သာသော အမြောက်ဆန်တစ်ခုသည် ကောင်းကင်ပေါ်ရှိ ရေဘဝဲကြီးဆီသို့ တိုက်ရိုက် ပစ်ခတ်သွားလေသည်။

ရေဘဝဲကြီးက အန္တရာယ်ကို အာရုံခံမိသွားပြီး အမြောက်ဆန်ကို ကာကွယ်ရန် လက်တံတစ်ချောင်းကို အမြန် ဖြည်ချလိုက်သည်။

"ဝုန်း"

နှစ်ခု ရိုက်ခတ်သွားသောအခါ ကျယ်လောင်သော ပေါက်ကွဲသံကြီး ထွက်ပေါ်လာသည်။

ဧရာမ လက်တံကြီး တစ်ချောင်းသည် တိုက်ရိုက် ပြတ်ထွက်သွားပြီး ကောင်းကင်ပေါ်မှ ပြုတ်ကျလာလေသည်။

ချန်းရီ ဝမ်းသာသွားမည့် အချိန်လေးမှာပင်။

ပြတ်ထွက်သွားသော ထိုလက်တံကြီးသည် သာမန်မျက်စိဖြင့် မြင်နိုင်သော အမြန်နှုန်းဖြင့် လျင်မြန်စွာ ပြန်လည် ထွက်ပေါ်လာသည်ကို မြင်လိုက်ရသည်။

"ဒါက... တောက်"

ချန်းရီမှာ ဆဲဆိုချင်စိတ်သာ ပေါက်သွားတော့သည်။

ဤ ကုစားနိုင်စွမ်းက...

တိုက်တန် လမ်းစဉ်၏ ပြန်လည်ကောင်းမွန်နိုင်စွမ်းသည် ဤရေဘဝဲကြီး၏ ရှေ့တွင် ငချွတ်လေး တစ်ယောက်နှင့်သာ တူလေတော့သည်။

"ချန်းရီ... သတိထား"

ဘေးနားမှ ပန်းရောင်ဆံပင်နှင့် ကောင်မလေး၏ လန့်အော်သံ ထွက်ပေါ်လာသည်။

ချန်းရီသည် သူ၏ဆီသို့ လက်တံတစ်ချောင်း ခိုးကြောင်ခိုးဝှက်ဖြင့် တိုးဝင်လာသည်ကို စောစောကတည်းက သတိထားမိခဲ့ပြီး ဖြစ်သည်။

ဤလက်တံသည် မီးခိုးငွေ့များကြားမှ ခိုးကြောင်ခိုးဝှက် ဖြတ်သန်းလာပြီး လက်တံကြောင့် ဖြစ်ပေါ်လာသော လေစီးကြောင်းက မီးခိုးငွေ့များကို အနည်းငယ် ဖယ်ရှားသွားစေကာ ၎င်း၏ ပစ်မှတ်မှာ သူပင် ဖြစ်လေသည်။

မီးခိုးငွေ့များ၏ အဝန်းအဝိုင်း အတွင်း၌ မည်သူမျှ သူ့ကို ခိုးကြောင်ခိုးဝှက် တိုက်ခိုက်နိုင်မည် မဟုတ်ပေ၊ ထူးဆန်းသောအရာပင်လျှင် လုပ်ဆောင်နိုင်မည် မဟုတ်ချေ။

ချန်းရီ၏ နှာခေါင်းနှင့် ပါးစပ်ကြားမှ အဆုံးအစမရှိသော မီးခိုးငွေ့များ မှုတ်ထုတ်လိုက်သည်။

သူ၏ ခန္ဓာကိုယ်က နောက်သို့ ဆုတ်သွားပြီး ထယ်ရှီး၏ ကျောဘက်တွင် ပုန်းအောင်းကာ သူ၏ ပုံရိပ်ကို ဖျောက်ထားလိုက်သည်။

လက်တံက ထယ်ရှီးဆီသို့ တိုက်ရိုက် တိုးဝင်လာလေသည်။

"ခွေးကောင်... မင်းကများ"

သွေးသား အမြောက်ကြီးသည် အလျင်အမြန် ပျောက်ကွယ်သွားပြီး ညာဘက်လက်က ဧရာမ ပုဆိန်ကြီး တစ်လက်အဖြစ် တိုက်ရိုက် ပြောင်းလဲသွားကာ ဝင်ရောက်လာသော လက်တံကို ပြင်းထန်စွာ ခုတ်ချလိုက်လေသည်။

ဧရာမ ပုဆိန်ကြီးက ထိုလက်တံကို အပြည့်အဝ ပြတ်တောက်သွားအောင် မလုပ်နိုင်ခဲ့ဘဲ ၎င်း၏ အပေါ်တွင် ကြောက်မက်ဖွယ်ကောင်းသော ဒဏ်ရာတစ်ခုကိုသာ ချန်ရစ်ခဲ့သည်။

ထိုဒဏ်ရာသည် မျက်စိတစ်မှိတ်အတွင်းမှာပင် မူလအတိုင်း ပြန်လည် ကောင်းမွန်သွားလေသည်။

ယခုလေးတင် လေအမြောက်ဆန် တစ်ချက်က လက်တံတစ်ချောင်းကို တိုက်ရိုက် ပြတ်ထွက်သွားစေနိုင်ခဲ့ရာ လေအမြောက်၏ ဖျက်ဆီးနိုင်စွမ်းသည် အလွန်တရာ ကြောက်မက်ဖွယ် ကောင်းကြောင်း သိသာလှပေသည်။

"ဓားပျံပညာရပ်... သွားစမ်း"

ပန်းရောင်ဆံပင်နှင့် ကောင်မလေးက ခြေလှမ်းကို ဖွဖွလေး နင်းလိုက်ပြီး မီးခိုးငွေ့များ၏ အစွန်းတွင် ရပ်ကာ သူမ၏ ခါးမှ ပျံသန်းနေသော ဓားသည် လျင်မြန်စွာ ထွက်ပေါ်လာပြီး ကောင်းကင်ပေါ်ရှိ ရေဘဝဲကြီးဆီသို့ တိုက်ရိုက် ဝင်ရောက် သတ်ဖြတ်လေသည်။

ဓားရှည်သည် သွက်လက်သော ရေထဲမှငါး တစ်ကောင်ကဲ့သို့ လက်တံရှစ်ချောင်းကြားတွင် ဖြတ်သန်းသွားလာကာ လူမျက်နှာရှစ်ခုထဲမှ ကလေးငယ်၏ မျက်နှာဆီသို့ တိုက်ရိုက် ပြေးဝင်သွားသည်။

ပန်းရောင်ဆံပင်နှင့် ကောင်မလေး၏ ရည်ရွယ်ချက်ကို ရိပ်မိသွားသကဲ့သို့ လက်တံနှစ်ချောင်းက ထိုသရဲမျက်နှာကို အသေအလဲ ကာကွယ်ထားကြသည်။

တစ်ခဏတာမျှ ဓားရှည်သည် လုံးဝ အရာမထင်ခဲ့ပေ။

ဤအချိန်မှာပင် သွက်လက်သော မျောက်တစ်ကောင်ကဲ့သို့ လက်တံများကြားတွင် ခုန်ပျံလွှားနေသော လူရိပ်တစ်ခုကို တွေ့လိုက်ရသည်။

၎င်းမှာ တင်းတုံ ပင် ဖြစ်သည်။

ဤအမျိုးသမီး၏ ခန္ဓာကိုယ် သွက်လက်မှုသည် သာမန်လူများနှင့် လုံးဝ နှိုင်းယှဉ်၍ မရနိုင်ပေ။

ဤအမျိုးသမီး၏ သေးသွယ်သော ခန္ဓာကိုယ်လေးသည် လက်တံအသီးသီးကြားတွင် အားယူကာ ရေဘဝဲကြီး၏ ခေါင်းဆီသို့ တိုက်ရိုက် ပြေးဝင်သွားသည်ကို မြင်လိုက်ရသည်။

ခုန်ပျံမှု တစ်ချက်တည်းဖြင့် ဤအမျိုးသမီးသည် ရေဘဝဲကြီး၏ ခေါင်းပေါ်သို့ တိုက်ရိုက် ရောက်ရှိသွားလေသည်။

အမျိုးသမီး၏ ခြေတံရှည်များက အမြင့်သို့ မြှောက်တက်သွားပြီး အောက်သို့ ကျဆင်းလာချိန်တွင် ပြင်းထန်သော ခြေလှမ်းမြင့် ခုတ်ချမှုတစ်ခု ပေါ်ထွက်လာခဲ့ပြီ ဖြစ်သည်။

ချန်းရီသည် ထိုအမျိုးသမီး၏ ခြေတံရှည်က လေထဲတွင် အလွန်လှပသော မျဉ်းကွေးတစ်ခုကို ရေးဆွဲသွားသည်ကို မြင်လိုက်ရသည်။

ပတ်ဝန်းကျင်ရှိ နှင်းပွင့်ကြီးများကို ရေနွေးငွေ့များအဖြစ် ပြောင်းလဲပစ်လိုက်ပြီး အလွန်မြန်ဆန်သော အမြန်နှုန်းကြောင့် ဖြစ်ပေါ်လာသည့် အဖြူရောင် လေလှိုင်းတစ်ခုနှင့်အတူ ရေဘဝဲကြီး၏ ကလေးငယ်မျက်နှာဆီသို့ ပြင်းထန်စွာ ခုတ်ချလိုက်လေသည်။

အမျိုးသမီး၏ လှုပ်ရှားမှုအောက်တွင် ကလေးငယ်၏ မျက်နှာသည် တိုက်ရိုက် ရိုက်ချခံလိုက်ရသဖြင့် ချိုင့်ဝင်သွားလေတော့သည်။

"အား"

သနားစရာကောင်းသော အော်ဟစ်သံများကြားတွင်။

တင်းတုံသည် ကိုယ်ကို လှည့်ကာ မြေပြင်ပေါ်သို့ တိုက်ရိုက် ကျဆင်းလာခဲ့သည်။

ပတ်ဝန်းကျင်ရှိ မီးခိုးငွေ့များသည် အလျင်အမြန် လိမ့်တက်လာပြီး အမျိုးသမီး၏ ပုံရိပ်ကို လွှမ်းခြုံသွားလေသည်။

နောက်မှ လိုက်ပါလာသော လက်တံ အတော်များများသည် လွဲချော်သွားပြီး ပတ်ဝန်းကျင်ရှိ ကွန်ကရစ် ကြမ်းပြင်နှင့် သစ်ပင်စိုက်ခင်းများကို ကြေမွသွားအောင် ရိုက်ချလိုက်ကြသည်။

"ဝါး... ဝါး... ဝါး..."

ကလေးငယ်သည် ဤပြင်းထန်သော ရိုက်ချက်ကြောင့် ခေါင်းများ မူးနောက်သွားပြီး မျက်နှာတစ်ခုလုံး သွေးများဖြင့် ပြည့်နှက်နေကာ မျက်ခုံးနှစ်ခုကြားတွင် သေးသွယ်သော ဖိနပ်ရာလေးတစ်ခု ရှိနေလေသည်။

ချန်းရီ၏ ရင်ထဲမှာ ကြည့်နေရင်းနှင့်ပင် လေးလံသွားလေသည်။

"ဒီလိုတောင် မသေသေးဘူးလားဟ"

"ဝါး... ဝါး... ကိုကြီး... မမ... ဖေဖေ... မေမေ... ဖိုးဖိုး... ဖွားဖွား... သားကို... သားကို သူတို့ အနိုင်ကျင့်ကြတယ်"

ဆက်ရန်...