အခန်း ၂၆၃

🍋 Chapter 263

ကျောင်းအုပ်ကြီးရှုသည် လွန်ခဲ့သည့် ရက်များအတွင်း ဖြစ်ပျက်ခဲ့သော ဖြစ်ရပ်များကို ခေါင်းထဲ၌ လျင်မြန်စွာ စီရီတွက်ချက်ကြည့်လိုက်သည်။

သူနှင့် အခြားသော ကျောင်းကိုယ်စားလှယ်အဖွဲ့ ခေါင်းဆောင်များကို အစာအဆိပ်သင့်မှု ခံစားရစေခဲ့သည့် အရှေ့ပိုင်းကန်တင်းမှာ ခုန်းဖန် ကိုယ်တိုင် မိတ်ဆက်ပေးခဲ့သူတစ်ဦးမှ ကန်ထရိုက်ရရှိထားခြင်း ဖြစ်သည်။

အွန်လိုင်းပေါ်တွင် ပျံ့နှံ့နေသော အစားအသောက် ပို့ဆောင်ခ ကာကွယ်ခ တောင်းခံသည့် ကိစ္စရပ်မှာလည်း ထိုစဥ်က ခုန်းဖန်ကိုယ်တိုင် ဆုံးဖြတ်ခဲ့ခြင်း ဖြစ်သည်။

ထို့နောက်တွင် ဖြစ်ပွားခဲ့သော လုံခြုံရေးဝန်ထမ်းများနှင့် ကျောင်းသားများအကြား ရန်ပွဲမှာလည်း ကန်တင်းပြဿနာမှ မြစ်ဖျားခံခဲ့ခြင်းဖြစ်ရာ နောက်ဆုံးတွင် ခုန်းဖန်နှင့်သာ သက်ဆိုင်နေချေသည်။

ထို့ပြင် ကျိုးထျန်းဟူသော ကျောင်းသားတစ်ဦးကြောင့် ဤဖြစ်ရပ်က မရည်ရွယ်ဘဲ စတင်ခဲ့ခြင်းဖြစ်ပြီး ခုန်းဖန်သည်လည်း ထိုကျောင်းသားအား ကျောင်းသားသမဂ္ဂတွင် ရာထူးတစ်ခုရရှိရန် ညွှန်ကြားခဲ့သေးသည်။

ယခုမူ ရုတ်တရက်ဆိုသလို သူ၏ ဇနီးနှင့် သားဖြစ်သူတို့ ပြည်ပတွင် သုံးဖြုန်းနေသည့် အခြေအနေများ ဖွင့်ချခြင်း ခံလိုက်ရပြန်သည်။

ဤအရာမှာ အလွန်ပင် ထင်ရှားလွန်းလှရာ တစ်စုံတစ်ဦးက သူ့ကို ပစ်မှတ်ထားနေခြင်း သေချာလှပေသည်။

ကျောင်းအုပ်ကြီးရှုသည် သူ၏ နဖူးကို သုံးသပ်ကိုင်တွယ်ရင်း ဖုန်းကို စားပွဲပေါ်သို့ ချလိုက်တော့သည်။

‘ဒါဆိုရင် လွန်ခဲ့တဲ့ ရက်ပိုင်းက ကျောင်းမှာ ဖြစ်ပျက်ခဲ့တဲ့ ကိစ္စတွေရဲ့ နောက်ကွယ်မှာ တကယ်ပဲ ကြိုးကိုင်သူ တစ်ယောက် ရှိနေတာပေါ့’

‘ပြီးတော့ ဒီလူက အစွမ်းအစ အတော်လေး ထက်မြက်ပုံရတယ်၊ ဒီလောက်ကြီးမားတဲ့ ထောင်ချောက်ကြီးကို ဘာအသံမှ မထွက်စေဘဲ တိတ်တဆိတ် လုပ်ဆောင်သွားပြီး ခုန်းဖန်ကို လမ်းပိတ်မိအောင် လုပ်နိုင်ခဲ့တာပဲ’

အဘိုးကြီးရှုသည် ဆက်လက်၍ စဥ်းစားနေမိသည်။

သူ ပိုမိုစဥ်းစားလေလေ၊ တစ်စုံတစ်ခုက ပုံမှန်မဟုတ်သကဲ့သို့ ခံစားရလေလေပင် ဖြစ်သည်။

‘တစ်ခုခုတော့ မဟုတ်သေးဘူး။ ဒီလူက ခုန်းဖန်ကို အသေတွန်းပို့ဖို့ ကြံစည်နေတာပဲ’

‘ဒီလို လှုပ်ရှားမှု အစီအစဥ်တွေ အားလုံးကို ပေါင်းစပ်ကြည့်ရင် ဒါက သေတွင်းထဲ ပို့မယ့် သေချက်ပဲ’

ဤအခိုက်အတန့်တွင် အဘိုးကြီးရှုသည် ပစ်မှတ်ထားခြင်း ခံနေရသူမှာ ခုန်းဖန်တစ်ဦးတည်း မဟုတ်ဘဲ ကျောင်းအကြီးအကဲ အားလုံး (အထူးသဖြင့် ကျောင်းအုပ်ကြီးများ) ဖြစ်နေကြောင်းကို ရိပ်မိလိုက်ပြီ ဖြစ်သည်။

‘အကယ်၍ ဒီလူက အစကတည်းက ခုန်းဖန်ရဲ့ ဇနီးနဲ့ သားဖြစ်သူတို့ရဲ့ အခြေအနေကို ဖွင့်ချခဲ့ရင် ငါတို့ရဲ့ ထုံးစံအတိုင်း ကိစ္စကို သေးအောင်လုပ်ပြီး တတ်နိုင်သလောက် ဖိနှိပ်ထားကြမှာပဲ’

‘ ဘာလို့လဲဆိုတော့ သူက ကျောင်းရဲ့ အမြင့်ဆုံး ခေါင်းဆောင်တစ်ယောက် ဖြစ်နေပြီး ကျောင်းရဲ့ ပုံရိပ်ကို ကိုယ်စားပြုနေလို့ပဲ’

‘ဒါ့အပြင် သူ့လို ဖြစ်ရပ်မျိုးတွေကလည်း အများကြီး ရှိနေတော့ ငါတို့တွေ သေချာပေါက် သူ့အတွက် အများပြည်သူ ဆက်ဆံရေး ကိစ္စတွေကို ကူညီပေးပြီး ပြဿနာကို ဖြေရှင်းပေးကြမှာပဲ’

‘ငါတို့အချင်းချင်းကြားမှာ သဘောထားကွဲလွဲမှုတွေ၊ မပြေလည်မှုတွေ ရှိနေရင်တောင် အများအကျိုးကို ရှေ့ရှုပြီး ဒီကိစ္စကို အရင် ဖြေရှင်းကြမှာ သေချာတယ်’

‘ဒီလိုဆိုရင် ခုန်းဖန်အနေနဲ့ ဒီမုန်တိုင်းကို ဘေးကင်းကင်းနဲ့ ဖြတ်ကျော်နိုင်မှာ ဖြစ်ပြီး အလွန်ဆုံးရှိ နှစ်အနည်းငယ်လောက် ငြိမ်နေရုံနဲ့တင် မုန်တိုင်းအပြီးမှာ သူ စီမံခန့်ခွဲမှု ရာထူးကို ဆက်ပြီး ဆုပ်ကိုင်ထားနိုင်ဦးမှာပဲ’

‘ဒါပေမဲ့ အခုတော့ ကွဲပြားသွားပြီ၊ လုံးဝကို ကွဲပြားသွားခဲ့ပြီ’

‘ဒီနောက်ကွယ်က ကြိုးကိုင်သူက ငါတို့ကို ပြဿနာတွေ အများကြီး ပေးပြီးမှ ငါတို့တွေ ခေါင်းခဲနေတဲ့ အချိန်ကျမှ ခုန်းဖန်ရဲ့ စစ်မှန်တဲ့ မျက်နှာဖုံးကို ခွာချပြလိုက်တာ’

‘သူက ဓားငှားပြီး လူသတ်ဖို့ လုပ်နေတာပဲ’

‘ငါတို့တွေ အပြစ်ပုံချရမယ့် ဓားစာခံတစ်ယောက်ကို အသည်းအသန် လိုအပ်နေတဲ့ အချိန်မှာ သူက ခုန်းဖန်ကို ဓားစာခံအဖြစ် ဖန်တီးပေးလိုက်တာ’

‘သူက ဒီအရာအားလုံးကို ယုတ္တိရှိရှိ ပုံဖော်သွားတာပဲ၊ ဒါမှ ငါတို့တွေက တာဝန်ရှိမှု အားလုံးကို ခုန်းဖန်အပေါ် ပုံချနိုင်မှာ ဖြစ်ပြီး သူ့ကို အပြစ်အားလုံး ခံယူခိုင်းရမှာ’

‘ပြီးတော့ ငါတို့တွေမှာလည်း ဒီအဖြေကို လက်ခံဖို့ကလွဲလို့ အခြားရွေးချယ်စရာ မရှိဘူး။ ဘာလို့လဲဆိုတော့ ဒါက လက်ရှိ အခြေအနေမှာ အကောင်းဆုံး အဖြေဖြစ်နေလို့ပဲ’

‘ငါတို့ ခုန်းဖန်ကို တွန်းထုတ်လိုက်တာနဲ့ အထက်လူကြီးတွေ၊ ကျောင်းသားတွေနဲ့ အင်တာနက် အသုံးပြုသူတွေကို ကျေနပ်လောက်တဲ့ ရှင်းလင်းချက်တစ်ခု ပေးနိုင်လိမ့်မယ်’

‘ဒါ့အပြင် ခုန်းဖန်ရဲ့ ရာထူးကလည်း ဒီတစ်ကြိမ်မှာ အပြစ်ခံယူဖို့ လုံလောက်တဲ့ အဆင့်အတန်း ရှိနေတယ်’

‘အကယ်၍ သာမန် ဆရာတစ်ယောက် ဒါမှမဟုတ် ကျောင်းအကြီးအကဲ သေးသေးလေးသာ ဆိုရင် သူတို့မှာ အရည်အချင်း ပြည့်မီမှာ မဟုတ်ဘူး’

‘ဒုကျောင်းအုပ်ကြီးဖြစ်တဲ့ သူ့ကို စွန့်လွှတ်လိုက်မှသာ စောင့်ကြည့်နေတဲ့ လူထုကို တရားမျှတမှု ပြသနိုင်မှာ’

အဘိုးကြီးရှုသည် သူ၏ နားထင်များကို နှိပ်ရင်း အလွန်အမင်း ပင်ပန်းနွမ်းနယ်မှုကို ခံစားလိုက်ရသည်။

လွန်ခဲ့သည့် ရက်အနည်းငယ်အတွင်း အစည်းအဝေး အမျိုးမျိုး တက်ရောက်ခဲ့ရစဥ် သို့မဟုတ် အထက်လူကြီးများနှင့် ရင်ဆိုင်ခဲ့ရစဥ်ကပင် သူ ဤမျှအထိ စိတ်ရောကိုယ်ပါ မောပန်းခဲ့ခြင်း မရှိချေ။

ဤကဲ့သို့သော စိတ်ရောကိုယ်ပါ ပင်ပန်းနွမ်းနယ်မှု ခံစားချက်က သူ့အား လူသူကင်းဝေးရာ နေရာတစ်ခုသို့ သွားရောက် ပုန်းအောင်းနေချင်စိတ် ပေါက်လာစေပြီး ဤပြဿနာများကို ဆက်လက် မဖြေရှင်းချင်တော့ပေ။

‘ငါ ဘာဆက်လုပ်သင့်လဲ’

သူက စားပွဲအောက်မှ စီကရက်တစ်ဘူးကို ထုတ်ယူကာ တစ်လိပ် နှိုက်လိုက်သည်။

မီးညှိရန် ပြင်ဆင်လိုက်စဥ်မှာပင် သူသည် အလိုအလျောက် စာကြည့်ခန်း တံခါးဝဆီသို့ လှမ်းကြည့်မိသွားသည်။

သူသည် မိမိကိုယ်ကိုယ် (အထူးသဖြင့် ဇနီးနှင့် သမီးဖြစ်သူ ရှေ့မှောက်တွင်) ဆေးလိပ်ပြတ်သွားပြီဟု အမြဲတမ်း ပြောဆိုလေ့ရှိသည်။

သို့သော် သူ၏ ရုံးခန်းအတွင်း သို့မဟုတ် စာကြည့်ခန်းရှိ စားပွဲအောက်များတွင်မူ ဆေးလိပ်အချို့ကို အမြဲတမ်း ဝှက်ထားလေ့ရှိသည်။

သူက ပြတင်းပေါက်ကို ဖွင့်လိုက်ပြီးနောက် သူ၏ အင်္ကျီကိုပင် ချွတ်လိုက်ကာ လျှော်တော့မည့် အဖြူရောင် အတွင်းခံအင်္ကျီတစ်ထည်ကိုသာ ဝတ်ဆင်ထားလိုက်သည်။

ဤသည်မှာ သူ၏ ဇနီးဖြစ်သူက အင်္ကျီမှ ဆေးလိပ်နံ့ကို ရရှိမသွားစေရန် ဖြစ်သည်။

ငါးမိနစ်ခန့် ဝေခွဲမရ ဖြစ်နေပြီးနောက်တွင် ကျောင်းအုပ်ကြီးရှုသည် ရုတ်တရက် လှည့်ပြန်လာပြီး စားပွဲပေါ်မှ ဖုန်းကို ကောက်ကိုင်လိုက်တော့သည်။

"ရှောင်ဟွမ်၊ မနက်ဖြန် ကျောင်းကို ရောက်တာနဲ့ ပထမဆုံး လုပ်ရမယ့် အလုပ်က လွန်ခဲ့တဲ့ အစည်းအဝေးကို တက်ရောက်ခဲ့တဲ့ ကျောင်းအကြီးအကဲ အားလုံးကို အကြောင်းကြားဖို့ပဲ’

‘ အရင်တစ်ခေါက်က အစည်းအဝေးခန်းမှာပဲ၊ ငါတို့တွေ အတူတူ အရေးပေါ် အစည်းအဝေး လုပ်ကြမယ်"

"ဪ... ပြီးတော့ ဒုကျောင်းအုပ်ခုန်းကိုတော့ ဖုန်းမဆက်နဲ့ဦး။ ဒါကို သူ့ဆီကနေ လျှို့ဝှက်ထားဖို့ သတိရပါ၊ နားလည်လား"

သူသည် မိမိ၏ လက်ထောက်ထံသို့ ဖုန်းခေါ်ဆိုကာ မနက်ဖြန်အတွက် အလုပ်များကို စီစဥ်လိုက်သည်။

သူ၏ စိတ်ထဲတွင်မူ ပြတ်သားသော ဆုံးဖြတ်ချက်ကို ချမှတ်လိုက်ပြီ ဖြစ်သည်။

‘အဆုံးသတ်မှာတော့... ဒီနောက်ကွယ်က ကြိုးကိုင်သူက ဘယ်သူပဲဖြစ်ဖြစ်၊ ကိစ္စတွေကို ဖြစ်အောင်လုပ်ခဲ့တာကတော့ ခင်ဗျားပဲ ခုန်းဖန်။ အခု ခင်ဗျား အပြစ်ခံယူရမှာက တရားမျှတပါတယ်’

‘ငါတို့တွေ နောက်ကွယ်က ကြိုးကိုင်သူရဲ့ အလိုအတိုင်း လိုက်ပါ ဆောင်ရွက်ပေးနေရတာကတော့ ငါ့ကို အတော်လေး မကျေမနပ် ဖြစ်စေတယ်။ လုံးဝ အသုံးချခံလိုက်ရတာတောင် ရန်သူက ဘယ်မှာလဲဆိုတာ အခုထိ မသိသေးဘူး’

‘ဒါပေမဲ့ ရလဒ်ကတော့ အတူတူပါပဲ။ အကယ်၍ ငါတို့တွေ ခုန်းဖန်ကို ဆက်ပြီး ကာကွယ်ပေးနေရင် သူတို့တွေဆီမှာ အခြား နည်းဗျူဟာတွေ ရှိနေဦးမှာပဲ’

‘အခု အခြေအနေမှာ ပူးပေါင်းဆောင်ရွက်လိုက်ပြီး ဒီဖြစ်ရပ်တွဲတွေကို အမြန်ဆုံး ဖြေရှင်းလိုက်တာက ပိုကောင်းပါတယ်’

ကျောင်းအုပ်ကြီးရှုသည် မိမိ၏ မသိစိတ်ကို ဆန့်ကျင်၍ လုပ်ဆောင်နေခြင်း မဟုတ်ချေ။

သူသည် ခုန်းဖန်ကဲ့သို့ ငွေကြေးရှာဖွေရာတွင် ရက်စက်ကြမ်းကြုတ်သူတစ်ဦး မဟုတ်ပေ။

သူသည် ယခုထက်တိုင် သာမန် အိပ်ခန်းနှစ်ခန်းပါ တိုက်ခန်းတစ်ခုတွင်သာ နေထိုင်ဆဲဖြစ်ပြီး သူ၏ ကားမှာလည်း ယွမ် နှစ်သိန်းကျော်သာ တန်ဖိုးရှိသော ပြည်တွင်းဖြစ် အမျိုးအစားတစ်ခုသာ ဖြစ်သည်။

သဘာဝကျစွာပင် သူသည် မိမိ၏ သားသမီးများကို အကူအညီအနည်းငယ် ပေးအပ်လိမ့်မည် ဖြစ်သည်။

အဆုံးသတ်တွင် ယခုခေတ်၌ ကိုယ်ပိုင် စီးပွားရေး စတင်ရန်မှာ မလွယ်ကူလှချေ။

သို့သော် ဤအရာအားလုံးမှာ ယုတ္တိရှိသော စည်းကမ်းဘောင်များနှင့် ဥပဒေအတွင်း၌သာ ဖြစ်သဖြင့် မည်သူမျှ အပြစ်ရှာ၍ မရနိုင်ချေ။

ဤအချက်မှာ သူ ခုန်းဖန်ထက် ပိုမို ကောင်းမွန်သောအချက် ဖြစ်သည်။

သူသည် ငွေကြေးများ၏ ဖျက်ဆီးခြင်းကို မခံရဘဲ ပညာရေးသမားတစ်ဦးအဖြစ် အစဥ်အမြဲ ရပ်တည်ခဲ့သည်။

‘နောက်ကွယ်က ကြိုးကိုင်သူက ဘယ်သူပဲဖြစ်ဖြစ်၊ ငါ သူ့ကို သေချာပေါက် စုံစမ်း ဖော်ထုတ်မယ်။ ဤကဲ့သို့သော ဖြစ်ရပ်မျိုး ဒုတိယအကြိမ် ထပ်ပြီး ဖြစ်ပျက်ခွင့် မပေးနိုင်ဘူး’

အဘိုးကြီးရှု၏ မျက်လုံးများမှာ သားကောင်ကို ဖမ်းယူရန် အသင့်ဖြစ်နေသော သိန်းငှက်တစ်ကောင်ကဲ့သို့ စွဲမြဲ ထက်မြက်သွားခဲ့သည်။

ကံမကောင်းစွာဖြင့် ကျိုးထျန်းမှာ ယုန်ငယ်တစ်ကောင် မဟုတ်ရာ အလွယ်တကူ ဖမ်းဆီးခြင်း ခံရမည် မဟုတ်ချေ။

သူသည် ထျန်းချိုင် နည်းပညာကုမ္ပဏီ၏ အစီရင်ခံစာများကို တည်ငြိမ်စွာ ကြည့်ရှုနေခဲ့ပြီး "Planetary Home" ရုပ်ရှင်၏ ရုံဝင်ငွေ အခြေအနေကို စုံစမ်းရန်အတွက် ဟွမ်ရှီ ရုပ်ရှင်ထုတ်လုပ်ရေးမှ တာဝန်ရှိသူထံသို့ပင် အချိန်ပေး၍ ဆက်သွယ်ခဲ့သေးသည်။

နှစ်ခုစလုံးမှာ အလွန်ပင် အလားအလာ ကောင်းမွန်လှသည်။

"Despair World" ဂိမ်းမှ ဝင်ငွေများမှာ ဆက်တိုက် မြင့်တက်နေဆဲဖြစ်ပြီး မည်သည့် အကန့်အသတ် အတားအဆီးမျိုးမျှ ရှိမနေချေ။

"Planetary Home" ရုပ်ရှင်၏ ရုံဝင်ငွေမှာမူ ယွမ်သန်း ၈၀၀ ကို ကျော်လွန်သွားခဲ့ပြီ ဖြစ်ပြီး ရုံဝင်ငွေ မျဉ်းကွေးမှာ ဆက်လက် မြင့်တက်နေဆဲ ဖြစ်သည်။

ရုပ်ရှင်ရုံများတွင် ပြသသည့် အချိုးအစားမှာလည်း သိသိသာသာ တိုးတက်လာခဲ့သဖြင့် တစ်ချိန်တည်းတွင် ရုံတင်ခဲ့သော အခြားသော ရုပ်ရှင်အချို့ကိုပင် ရုပ်သိမ်းသွားရလုနီးပါး ဖိအားပေးနိုင်ခဲ့သည်။

ဤစီမံကိန်း နှစ်ခုစလုံးက သူ့အား ကြီးမားသော အထောက်အပံ့ကို ပေးစွမ်းနိုင်မည် ဖြစ်သည်။

သူသည် ဆန်းတို့စ်ကို ကူညီရန်အတွက် ရန်ပုံငွေများကို အရေးတကြီး လိုအပ်နေခြင်း ဖြစ်သည်။

ကမ်းဘဲလ် ဓါတ်ခွဲခန်းကို ပိုင်ဆိုင်လိုသည့် သူ၏ ဆန္ဒက သိသိသာသာ တိုးပွားလာသည်နှင့်အမျှ ဆန်းတို့စ်၏ စစ်ရေး အသုံးစရိတ်မှာလည်း လျင်မြန်စွာပင် မြင့်တက်လာခဲ့သည်။

စစ်ပွဲဟူသည်မှာ ကလေးကစားစရာ မဟုတ်ရာ စစ်မှန်သော ငွေကြေးများကို အသုံးပြု၍ ပေးဆပ်ရခြင်း ဖြစ်သည်။

ငွေကြေးဆိုင်ရာ ကိစ္စရပ်များကို စိုးရိမ်ပူပန်နေရုံသာမက စားဖိုမှူးကြီး ဟွမ်လုံကလည်း သတင်းကောင်းအချို့ကို ယူဆောင်လာခဲ့သည်။

ဂျူးမားလမ်းရှိ ဗီလာမှာ အပြည့်အဝ ပြင်ဆင်ပြီးစီးသွားခဲ့ပြီ ဖြစ်ပြီး မီးဖိုချောင်သုံး ပစ္စည်းများ၊ မီးဖိုများနှင့် လေဝင်လေထွက် စနစ်များ အားလုံးကို တပ်ဆင်ပြီးစီးသွားခဲ့ပြီ ဖြစ်သည်။

ဤအရာအားလုံးမှာ Baoge စားသောက်ဆိုင်မှ ပါးနပ်သော မန်နေဂျာကြောင့် ဖြစ်ပေသည်။

ခေါ်ယူပြီးနောက်တွင် ချက်ချင်းပင် အသုံးဝင်ကြောင်း သက်သေပြနိုင်ခဲ့သည်။

သူသည် စားသောက်ဆိုင်၏ အပြင်အဆင်မှစ၍ အလှဆင်ခြင်း လုပ်ငန်းအားလုံးကို ကိုယ်တိုင် ကြီးကြပ်ခဲ့သည်။

ထို့ပြင် သူ၏ ကိုယ်ပိုင် အဆက်အသွယ် လမ်းကြောင်းများမှတစ်ဆင့် မကြာသေးမီက ပိတ်သိမ်းသွားခဲ့သော အဆင့်မြင့် စားသောက်ဆိုင်အချို့မှ စားပွဲများ၊ ကုလားထိုင်များနှင့် မီးဖိုချောင်သုံး ပစ္စည်းများကို ရယူပေးခဲ့သဖြင့် သူ့အတွက် ငွေကြေးအမြောက်အမြားကို သက်သာစေခဲ့သည်။

ကျိုးထျန်းသည် ထိုလူအနေဖြင့် ကြားထဲမှ ကော်မရှင်အချို့ကို ရယူသွားနိုင်ကြောင်း သိရှိသော်လည်း မသိချင်ယောင်ဆောင်၍ မျက်စိမှိတ်ပေးထားခဲ့သည်။

အလွန်အမင်း သန့်ရှင်းလွန်းလျှင်လည်း အဆင်မပြေလှချေ။

အလုပ်ကိစ္စများ အဆင်ပြေချောမွေ့နေသရွေ့ ငွေကြေးအနည်းငယ် ပိုမိုသုံးစွဲရခြင်းကို လက်ခံနိုင်ဖွယ် ရှိသည်။

နောက်ဆုံးတွင် မည်သည့် မန်နေဂျာကမဆို ကြားဖြတ် ကော်မရှင် ဖြတ်တောက်လေ့ရှိသည် မဟုတ်ပါလား။

ရှေးစကားပုံတစ်ခု ရှိသည် မဟုတ်ပါလား၊

"စားဖိုမှူးက မခိုးရင် စားသောက်ဆိုင်က အမြတ်မကျန်ဘူး" ဟုပင်။

စားသောက်ဆိုင် လုပ်ငန်းတွင် လုပ်ကိုင်ရခြင်းမှာ ဤကဲ့သို့သော သေးငယ်သည့် ပရိယာယ်များကို သည်းခံရလေ့ ရှိသည်။

ဤလူမှ အလုပ်ကို အကောင်းဆုံး ဆောင်ရွက်ပေးနိုင်သရွေ့ အရာအားလုံးက အဆင်ပြေလှသည်။

သူ၏ ပြောကြားချက်အရ စားသောက်ဆိုင်ကို လာမည့် အပတ်ကုန်တွင် ဖွင့်လှစ်နိုင်မည် ဖြစ်ရာ ကြီးကျယ်ခမ်းနားသော ဖွင့်ပွဲ အခမ်းအနားတစ်ခုကို ပြင်ဆင်ရမည်။