အခန်း ၂၇၀

🍋 Chapter 270

မွန်းလွဲ ၅ နာရီ ၁၈ မိနစ်တွင် ပန်းခြင်းရာပေါင်းများစွာ ဝန်းရံထားသည့် ထျန်းရှီဟွေ့ ၏ အဝင်ဝ၌ ကျိုးထျန်းသည် လျိုမုယန်၊ ကျောက်ရှင်းတို့နှင့်အတူ ပင်မတံခါးကြီးဆီသို့ ဦးဆောင်ကာ လျှောက်လှမ်းလာခဲ့သည်။

သူနှင့် လျိုမုယန်တို့မှာ သဘာဝကျစွာပင် အလယ်ဗဟို၌ ရပ်နေကြ၏။

အနည်းငယ် နောက်ကျလုနီးပါးဖြစ်သဖြင့် ကျိုးထျန်း၏ အသာအယာ ခေါက်ခြင်းကို ခံလိုက်ရသော ကျောက်ရှင်းမှာမူ သူမ၏ ခေါင်းကို ပွတ်သပ်ရင်း လျိုမုယန်၏ ဘေးတွင် ရပ်နေသည်။

ကျိုးထျန်း၏ ဘေးတွင်မူ လတ်တလောမှ ရောက်ရှိလာသည့် ဝတုတ်လေး ရပ်နေသည်။

ထိုလူမှာ အတွင်းရေးမှူးကျန်းနှင့်အတူ ရောက်လာခြင်းဖြစ်ရာ ကျိုးထျန်းမှာ အံ့သြသွားရသည်။

အတွင်းရေးမှူးကျန်းမှာ အစိုးရအရာရှိတစ်ဦးဖြစ်ပြီး ဖွင့်ပွဲအခမ်းအနားသို့ တက်ရောက်ခြင်းက စည်းမျဉ်းများနှင့် ဆန့်ကျင်နေသဖြင့် သူက လူလုံးမပြဘဲ သီးသန့်အခန်းထဲ၌သာ ပုန်းနေခဲ့ခြင်း ဖြစ်သည်။

ထို့ပြင် ဥက္ကဋ္ဌဟုန်နှင့် ဥက္ကဋ္ဌဟန်တို့လည်း ထိုနေရာ၌ ရှိနေကြသည်။

ကျိုးထျန်းက ဒါရိုက်တာကျန်းကိုလည်း သူ့ဘေးသို့ အထူးဖိတ်ခေါ်ခဲ့သော်လည်း ဒါရိုက်တာကျန်းမှာ လူအုပ်၏ ထောင့်စွန်းတစ်နေရာ၌သာ ရပ်နေနိုင်သည်။

ကျိုးထျန်းနှင့်အတူ ရပ်နေသူများမှာ သူ၏ အရင်းနှီးဆုံး သူငယ်ချင်းများနှင့် စစ်မှန်သော လုပ်ငန်းရှင်ကြီးများ ဖြစ်ကြသဖြင့် အခြားသူများက မနာလိုသော မျက်လုံးများဖြင့် ကြည့်နေကြပြီး အထူးသဖြင့် အမျိုးသမီး အနုပညာရှင်များအားလုံးက ကျောက်ရှင်းကို မကျေမနပ် ကြည့်နေကြသည်။

သို့သော်လည်း လတ်တလောမှ အရိုက်ခံထားရသည့် ထိုလူအမလေးမှာမူ သူမကိုယ်သူမ အာရုံစိုက်ခံရခြင်း၌ ကျင့်သားရနေပြီဖြစ်ရာ မည်သည့်အရာကိုမျှ ခံစားရပုံမပေါ်ချေ။

ပျင်းရိဖွယ်ကောင်းသော နှုတ်ဆက်စကားများကို အနည်းငယ် ပြောကြားပြီးနောက် ကျိုးထျန်းသည် အနီရောင်ကြိုးတစ်ချောင်း၏ အစွန်းကို ဆွဲကိုင်လိုက်သည်။

ဤကြိုးသည် အပေါ်ဘက်ရှိ အနီရောင်ပိတ်စကြီးနှင့် ချိတ်ဆက်ထားခြင်း ဖြစ်သည်။

သူက အားပြင်းပြင်းဖြင့် တစ်ချက် ဆွဲလိုက်ရာ တံခါးဝအထက်တွင် အသစ်စက်စက် ဆိုင်းဘုတ်တစ်ခု ပေါ်လာတော့သည်။

"ထျန်းရှီဟွေ့ " ဟူသော စာလုံးကြီး သုံးလုံးက လူတိုင်း၏ မျက်စိရှေ့မှောက်သို့ ရောက်ရှိလာခဲ့သည်။

လူအုပ်ကြီးမှာ စိတ်လှုပ်ရှားသွားကြပြီး လူတိုင်းက လက်ခုပ်တီးကြရာ ထိုအသံက ဂျူးမားလမ်း တစ်ခုလုံးသို့ ပဲ့တင်ထပ်သွားတော့သည်။

ဂုဏ်ပြုစကားများက ကျိုးထျန်းကို ဝန်းရံထားသဖြင့် သူသည် ပန်းခင်းထဲ၌ ရောက်နေသကဲ့သို့ ခံစားလိုက်ရသည်။

ဤကဲ့သို့သော စည်ကားမှုက လမ်းသွားလမ်းလာ အားလုံးကို ဆွဲဆောင်နေတော့သည်။

ဂျူးမားလမ်းသည် မူလကပင် လူလတ်တန်းစားများဖြင့် ပြည့်နှက်နေသည့် စားသုံးသူများပြားသော လမ်းတစ်ခု ဖြစ်သည်။

၎င်းတွင် ဘားများ၊ အနောက်တိုင်း စားသောက်ဆိုင်များ၊ သီးသန့်မီးဖိုချောင်များနှင့် ရှေးဟောင်းပစ္စည်းဆိုင်များဖြင့် ပြည့်နှက်နေသည်။

ဤနေရာသို့ ငွေလာသုံးကြသူများသည် အလွန်မြင့်မားသော စီးပွားရေးအင်အားနှင့် ပြင်းပြသော စားသုံးလိုစိတ် ရှိကြသည်။

ငွေသုံးစွဲလိုသည့် ဤလူများအပြင် အနီးနားတွင် ဓာတ်ပုံရိုက်နေကြသည့် စုံတွဲများနှင့် ကမ္ဘာလှည့်ခရီးသွား အမြောက်အမြားကိုလည်း ရံဖန်ရံခါ တွေ့ရတတ်သည်။

ရှန်ဟိုင်းစတိုင်အဟောင်းအကြောင်း ပြောမည်ဆိုပါက ဤနေရာက ပြင်သစ်ရိုမန်းတစ်ဆန်မှုများဖြင့် ပြည့်နှက်နေသည့် အကောင်းဆုံးနေရာ ဖြစ်ပေလိမ့်မည်။

သူတို့ လာရောက်သည့် ရည်ရွယ်ချက်က မည်သို့ပင်ဖြစ်စေ ဤကြီးကျယ်ခမ်းနားသော မြင်ကွင်းကြောင့် ဆွဲဆောင်ခြင်း ခံလိုက်ရသည်။

အစပထမတွင် လူတစ်ဒါဇင်ခန့်သာ စုစုရုံးရုံးဖြင့် လျှောက်လာခဲ့ကြသည်။

နောက်ပိုင်းတွင်မူ ရာပေါင်းများစွာသော လူအုပ်ကြီးက ထျန်းရှီဟွေ့ ၏ အဝင်ဝကို ဝန်းရံထားခဲ့ကြသည်။

နောက်ဆုံးတွင်မူ ပရိသတ်များနှင့် သတင်းထောက်များ၏ အဆမတန်များပြားသော လူအုပ်ကြီးက ပင်မလမ်းမကြီးတစ်ခုလုံးကို လုံးဝ ပိတ်ဆို့သွားခဲ့သည်။

ဤနေရာတွင် ရုပ်ရှင်ပွဲတော်တစ်ခုထက်ပင် အနုပညာရှင်များ ပိုမိုများပြားနေကြောင်း သူတို့ ရှာဖွေတွေ့ရှိသွားကြသည်။

သာမန်စီးပွားရေးလုပ်ငန်းများ ဆိုင်ဖွင့်လှစ်သည့်အခါတွင်မူ ပွဲစည်ကားစေရန်အတွက် တတိယတန်းစား အဆိုတော်အချို့ကိုသာ ငွေပေး၍ ဖျော်ဖြေခိုင်းလေ့ရှိသည်။

ပိုမိုခိုင်မာသော စီးပွားရေးလုပ်ငန်းများကမူ ထိပ်တန်းအနုပညာရှင်များကို မိနစ်ဖြင့် တွက်ချက်ကာ အဆမတန်များပြားသော ငွေကြေးများပေး၍ ဖျော်ဖြေခိုင်းတတ်ကြသည်။

ကျောက်ရှင်းသည် ဤကဲ့သို့သော ပွဲများသို့ မကြာခဏ တက်ရောက်လေ့ရှိသဖြင့် ငွေကြေးကို အလွန်လျင်မြန်စွာ ရှာဖွေနိုင်သည်။

အိမ်ခြံမြေဖွင့်ပွဲများနှင့် ကုန်တိုက်ဖွင့်ပွဲများသည် ကြီးမားသောအဖွဲ့အစည်းများအကြား ရေပန်းစားသည်။

အနုပညာရှင်များကို ပိုမိုဆွဲဆောင်နိုင်ရန်အတွက် ပိုင်ရှင်ကိုယ်တိုင်က ဖျော်ဖြေရေးလောကမှ ဖြစ်နေရန် လိုအပ်ပြီး သို့မဟုတ်ပါက အခြားအနုပညာရှင်များနှင့် ပူးတွဲပိုင်ဆိုင်သည့် ဆိုင်ဖြစ်ရပေမည်။

ဥပမာအားဖြင့် မကြာသေးမီနှစ်များအတွင်း အလွန်ရေပန်းစားလာခဲ့သည့် ဟော့ပေါ့ဆိုင်တစ်ဆိုင်တွင် ပိုင်ရှင်အချို့မှာ အနုပညာရှင်များကိုယ်တိုင် ဖြစ်ကြပြီး သူတို့တွင် အတော်အတန် သြဇာညောင်းကြသည်။

ထို့ကြောင့် ဤကဲ့သို့သော အနုပညာရှင်ပိုင်ဆိုင်သည့် ဆိုင်များ ဖွင့်လှစ်သည့်အခါတိုင်း အနုပညာရှင်ပေါင်း ဒါဇင်ချဲ့ ရှိနေတတ်ပြီး ရုပ်ရှင်ရိုက်ကူးရန်နှင့် အင်တာဗျူးရန်အတွက် အမျိုးမျိုးသော မီဒီယာများကို ကြိုတင်အကြောင်းကြားထားလေ့ရှိသည်။

သို့သော်လည်း အတွေ့အကြုံ အရင့်ကျက်ဆုံး သတင်းထောက်များနှင့် ပရိသတ်များသည်ပင် ဤစားသောက်ဆိုင်တွင် ကဲ့သို့သော မြင်ကွင်းမျိုးကို တစ်ခါမျှ မမြင်ဖူးကြချေ။

အမြန်တွက်ချက်ကြည့်လိုက်ရုံမျှဖြင့် အနည်းဆုံး လူသိများသော အနုပညာရှင် ၂၀၀ ခန့် ထိုနေရာတွင် စုဝေးနေကြောင်း သိနိုင်သည်။

ထိပ်တန်းကြယ်ပွင့်ကြီးများမှာ နည်းပါးသော်လည်း ဒုတိယတန်းစားနှင့် တတိယတန်းစား အနုပညာရှင်များ၏ အရေအတွက်မှာမူ အလကားပေးနေသကဲ့သို့ အလွန်အမင်း များပြားလှသည်။

သို့သော် သူတို့ကို အံ့သြဆုံးဖြစ်စေသည့်အရာမှာ အရေအတွက်တင်မဟုတ်ဘဲ သူတို့၏ အမူအရာ ဖြစ်သည်။

ပုံမှန်အားဖြင့် တစ်နေ့လျှင် ယွမ်သောင်းချီ သို့မဟုတ် သိန်းချီ ရှာဖွေနေကြသည့် ဤအနုပညာရှင်များသည် စားသောက်ဆိုင်တစ်ခု၏ ရှေ့တွင် စုပေါင်းထိုင်နေကြပြီး တန်းစီနေကြပုံရသည်။

မည်ကဲ့သို့သော နတ်သုဒ္ဓါ အစားအစာမျိုးက ဤမျှအထိ ဆွဲဆောင်နိုင်ပါသနည်း။ သူတို့ တွေးတော၍မရနိုင်ချေ။

ထို့ပြင် တစ်နာရီကျော်ကြာ စောင့်ဆိုင်းနေခဲ့ရသည့် ဤအနုပညာရှင်များသည် စိတ်ဆိုးဒေါသထွက်ပုံမပေါ်ဘဲ အပြန်အလှန် စိတ်လှုပ်ရှားစွာ စကားပြောဆိုနေကြသည်။

ပုံမှန်အားဖြင့် ဤလူများသည် မည်သည့်စားသောက်ဆိုင်တွင်မဆို တန်းစီရန် ငြင်းဆန်ကြမည်ဖြစ်ပြီး စောင့်ဆိုင်းရသည့် ဒုက္ခကို ရှောင်ရှားရန်အတွက် သူတို့၏ အဆင့်အတန်းကို အသုံးပြု၍ ဂျောက်ဂျက်လုပ်လေ့ရှိသည်။

အကယ်၍ စားသောက်ဆိုင်က သူတို့ကို မျက်နှာသာမပေးပါက သူတို့က သောင်းကျန်းကြပေလိမ့်မည်။

သို့သော် ယခုမူ သူတို့သည် ကျောင်းသားလေးများကဲ့သို့ အစီအရီ တန်းစီကာ အတွင်းသို့ ဝင်ရန် စောင့်ဆိုင်းနေကြသည်။

ဤမြင်ကွင်းက အစစ်အမှန်မဟုတ်သကဲ့သို့ ခံစားရစေသည်။

ဤလူများကို ရိုးရိုးတန်းတန်း စောင့်ခိုင်းမည်ဆိုပါက သူတို့ သေချာပေါက် စောင့်ချင်ကြမည်မဟုတ်ပေ။

လူတိုင်းတွင် ကိုယ်ပိုင်ဒေါသ ရှိကြပြီး နာမည်ကြီးအနုပညာရှင်များ ဖြစ်ကြသည်။

သို့သော် ကျိုးထျန်းက ဤအချက်ကို ကြိုတင်ခန့်မှန်းထားပြီးသား ဖြစ်သည်။

သူက ဒါရိုက်တာကျန်းအား အခြားအနုပညာရှင်များကို စိတ်ရှည်စွာ စောင့်ဆိုင်းရန်နှင့် သူတို့ အတွင်းသို့ ဝင်လာသည့်အခါ သူကိုယ်တိုင် ဝိုင်းတိုင်းသို့ လိုက်လံ၍ အရက်လိုက်တိုက်မည်ဖြစ်ကြောင်း အကြောင်းကြားခိုင်းခဲ့သည်။

ဤအချက်က အပြင်တွင် စောင့်ဆိုင်းနေသူများကို စိတ်လှုပ်ရှားစေသကဲ့သို့ ကြောက်ရွံ့မှုကိုလည်း ဖြစ်ပေါ်စေသည်။

သူတို့ စိတ်လှုပ်ရှားရသည့် အကြောင်းရင်းမှာ ဤမစ္စတာကျိုးနှင့်အတူ အရက်တစ်ခွက် သောက်ခွင့်ရရှိမည်ဖြစ်သောကြောင့် ဖြစ်သည်။

၎င်းက သူတို့ ဤနေရာသို့ လာရသည့် ရည်ရွယ်ချက်မဟုတ်ပါလား။

သို့သော် သူတို့သည် ထိုအချက်ကိုပင် ကြောက်ရွံ့နေကြပြန်သည်။

အကယ်၍ မည်သူမဆို ယခု ထွက်ခွာသွားဝံ့ပါက သူတို့သည် မှတ်သားခြင်း ခံရပေလိမ့်မည်။

မစ္စတာကျိုးက လူတိုင်းကို အရက်လိုက်တိုက်မည်ဟု ပြောထားပြီးသားဖြစ်ရာ သင်က ထွက်ခွာသွားဦးမည်ဆိုပါက ၎င်းမှာ ရိုသေမှုမရှိခြင်းဟု သတ်မှတ်ခံရပေလိမ့်မည်။

ထို့ပြင် မစ္စတာဟန်သည်လည်း အတွင်း၌ ထမင်းစားနေကြောင်း သူတို့ သိကြသည်။

တစ်စုံတစ်ယောက်က သူ ရောက်ရှိလာသည်ကို မြင်တွေ့ခဲ့ရသည်။

"လုပ်ငန်းခွင်ရဲ့ ဘုရင်ကြီး" အတွင်း၌ ရှိနေသည်ဖြစ်ရာ မည်သူက ရိုသေမှုမရှိဘဲ နေရဲပါမည်နည်း။

ထို့အပြင် မစ္စတာဟန်ကဲ့သို့သော အခြား အရေးကြီးသည့် ပုဂ္ဂိုလ်ကြီးများစွာလည်း အတွင်း၌ ရှိနေကြသည်မှာ သေချာသည်။

သူတို့သည် ဘောင်းဘီထဲ ဆီးထွက်မတတ် ဖြစ်နေလျှင်ပင် ထွက်ခွာသွားရဲကြမည် မဟုတ်ချေ။

ဖျော်ဖြေရေးလောကဟူသည် အာဏာရှိသူများကို ဖားကြပြီး အချင်းချင်း တိုက်ခိုက်ကြသည့် စည်းစိမ်နှင့် နာမည်ဂုဏ်သတင်းကြီးသော နေရာတစ်ခု ဖြစ်သည်။

အကယ်၍ မည်သူမဆို ထွက်ခွာသွားဝံ့ပါက ကောလာဟလများ ချက်ချင်း ထွက်ပေါ်လာမည်ဖြစ်ပြီး ဥက္ကဋ္ဌကျိုး၏ နားထဲသို့ ရောက်ရှိသွားပါက အခြေအနေက အလွန်ဆိုးရွားသွားပေလိမ့်မည်။

သူတို့သည် ကျိုးထျန်းနှင့် တစ်ခါမျှ မဆုံဖူးကြသဖြင့် သူတို့၏ ယခင်အတွေ့အကြုံများနှင့် ကြားဖူးနားဝရှိမှုများအပေါ် အခြေခံ၍သာ သူ၏ စရိုက်နှင့် ပုံစံကို ခန့်မှန်းနိုင်ကြသည်။

ကျိုးထျန်းကို နောက်ဆုံး စော်ကားခဲ့သည့်လူမှာ ယခုအခါ ဒုက္ခိတဖြစ်သွားပြီး ဆေးရုံတွင် ရှိနေကာ အဆုံးမရှိသော ထောင်ဒဏ်ကို ရင်ဆိုင်နေရကြောင်းသာ သူတို့ သိကြသည်။

ထိုကဲ့သို့သော သွေးစွန်းနေသည့် ဆိုင်းဘုတ်ကြီး ရှိနေသည်ဖြစ်ရာ မည်သူက သူ့ကို စော်ကားရဲပါမည်နည်း။

ကျိုးထျန်းကိုယ်တိုင်ပင်လျှင် သူ၏ပုံရိပ်မှာ ယခုအခါ ငရဲမင်းထက် အနည်းငယ်မျှသာ ပို၍ ကြည့်ကောင်းတော့ကြောင်း သတိမထားမိပေ။

သို့သော် ငရဲမင်းပင်ဖြစ်စေ နတ်ဘုရားတစ်ပါးဖြစ်ရာ ဤလူများသည် အမွှေးတိုင်ထွန်း၍ ဆုတောင်းရန်အတွက် သူ့ထံသို့ စုပြုံလာကြဆဲပင်။

ဤအချက်က ယခုကဲ့သို့ ထူးဆန်းသော မြင်ကွင်းကို ဖြစ်ပေါ်စေခဲ့ခြင်း ဖြစ်သည်။

ဤလူများသည် စိတ်အနှောင့်အယှက်ဖြစ်ပုံမပေါ်ဘဲ ဆန့်ကျင်ဘက်အနေဖြင့် သူတို့မှာ အလွန်ကြီးမားသော ကံကောင်းခြင်းကို ရရှိထားသကဲ့သို့ မျက်နှာများတွင် အပြုံးများဖြင့် ပြည့်နှက်နေကြသည်။

"Planetary Home" ရုပ်ရှင်သည် ရုံဝင်ငွေ ယွမ် ၁.၈ ဘီလီယံကျော် သွားခဲ့လေပြီ။ ၎င်းက လလယ်ပိုင်းမျှသာ ရှိသေးသဖြင့် ပိုမိုမြင့်တက်သွားရန် အလားအလာ ရှိနေသည်။

သူတို့သည် ကျိုးထျန်းနှင့် ဟွမ်ရှီ ရုပ်ရှင်ထုတ်လုပ်ရေး တို့အကြားမှ ရုံဝင်ငွေ ခွဲဝေမှု သဘောတူညီချက်ကို မသိကြဘဲ သာမန်အတွေးအခေါ်အပေါ် အခြေခံ၍သာ ခန့်မှန်းနေကြခြင်း ဖြစ်သည်။

နောက်ဆုံး ရုံဝင်ငွေ ဘီလီယံ ၂ အပေါ် အခြေခံ၍ ကြည့်လျှင် ဟွမ်ရှီ ရုပ်ရှင်ထုတ်လုပ်ရေးသည် ကုန်ကျစရိတ်များကို နုတ်ပြီးနောက်တွင်ပင် ယွမ် သန်း ၂၀၀ ခန့် အမြတ်ထွက်နိုင်ဆဲဖြစ်ပြီး ရုံဝင်ငွေမှာ ဘီလီယံ ၂ တွင် ရပ်တန့်သွားမည်မဟုတ်ကြောင်း ထင်ရှားသည်။

ရုပ်ရှင်တစ်ကားတည်းမှ သန်းပေါင်းများစွာသော ဝင်ငွေများ။

ဤကဲ့သို့သော ကြီးမားသော ပြန်လည်ရရှိမှုမှာ ပြင်ပလူများအတွက်မူ ကျောက်ရှင်း၏ အောင်မြင်မှုသက်သက်ဟုသာ ထင်ရသည်။

သူမ၏ ခန္ဓာကိုယ်ကို ဤမျှလောက်များပြားသော ရင်းနှီးမြှုပ်နှံမှုနှင့် လဲလှယ်ခြင်းက မည်သို့ပင်ကြည့်စေ တန်ဖိုးရှိလှပေသည်။

မိမိကိုယ်ကို ပေးအပ်လိုသော်လည်း သွားစရာနေရာမရှိသည့် မင်းသမီးများစွာ ရှိနေကြသည်။

အဆုံးသတ်တွင် ဒါရိုက်တာများနှင့် ရင်းနှီးမြှုပ်နှံသူများမှာ အလွန်နည်းပါးလှပြီး သူတို့အားလုံးမှာ မျှဝေရန်အတွက် အလွန်အမင်း "အလုပ်များ" နေကြသောကြောင့် ဖြစ်သည်။

တစ်ချိန်တည်းမှာပင် စည်ကားနေသော ထျန်းရှီဟွေ့ ၏ မျက်နှာချင်းဆိုင် လမ်းမ တစ်ဖက်တွင်မူ အရပ်ရှည်ရှည် ပိန်ပိန်နှင့် အမျိုးသားတစ်ဦးသည် အယ်လ်ဖတ် ကားပေါ်မှ ဆင်းလာခဲ့သည်။

သူက အသစ်ဖွင့်လှစ်ထားသည့် စားသောက်ဆိုင်ကို လှောင်ပြုံးဖြင့် ကြည့်လိုက်သည်။

သူ့နှုတ်ခမ်းဖျားတွင် အထင်သေးသော အမူအရာအချို့ ပေါ်လာပြီးနောက် ထျန်းရှီဟွေ့ ၏ အဝင်ဝဆီသို့ ယိမ်းထိုးကာ လျှောက်လှမ်းလာခဲ့သည်။