အခန်း ၂၉၂

🍋 Chapter 292

ဇွဲကောင်းလွန်းသည့် ပြိုင်ဘက်ကို ရင်ဆိုင်ရချိန်တွင် ဆန်းတို့စ်၏ အကြိမ်ကြိမ် ညှိနှိုင်းမှုများမှာ အချည်းနှီးသာ ဖြစ်ခဲ့ရသည်။

စကူရိုင်းတကဲဟီတို မှာ ရှင်းပြချက်များကို နားထောင်ရန် လုံးဝစိတ်မဝင်စားပေ။

သူမြင်သည့်အရာကိုသာ သူယုံကြည်သည်။

နောက်ဆုံးတွင် ဆန်းတို့စ်လည်း ဒေါသထွက်လာသည်။

"ဒါ ငါ့နယ်မြေပဲ! မင်း ငါ့ကို ဒီမှာ လာပြီး ရန်စရဲတယ်၊ ငါက မင်းကို ဘာမှမလုပ်ခဲ့ဘူး။ အခု မင်းကိုယ်တိုင်က သေကြောင်းကြံပြီး မှောင်မှ အပြင်ထွက်လည်ရင်း ဓားနဲ့ အထိုးခံရတာကို ငါတို့ကို လာအပြစ်တင်နေတာလား"

ထိုလူကမူ ဆန်းတို့စ်၏ စခန်းကို ဖျက်ဆီးပစ်ရန်အတွက် သူ့လူများကို စေလွှတ်မည်ဟု ထပ်ခါတလဲလဲ ခြိမ်းခြောက်နေသည်။

သူ့လုံခြုံရေးဝန်ထမ်းများမှာ မိုက်မဲသူများမဟုတ်ပေ။

ထိုနေရာသို့ သွားခြင်းသည် ကိုယ့်သေတွင်း ကိုယ်တူးခြင်းနှင့် အတူတူပင်ဖြစ်သည်။

ထို့ကြောင့် သူတို့မှာ ငြင်းဆန်ကြသည်။

သူတို့သည် ထိုကိစ္စကို ဂျပန်နိုင်ငံရှိ ရုံးချုပ်သို့သာ တိုင်ကြားလိုက်ရသည်။

စကူရိုင်းအီဟီကို မှာ ဟေးလုံကျန်း တွင် သူ့သားဖြစ်သူ အသက်အန္တရာယ်နှင့် ကြုံတွေ့ခဲ့ရကြောင်း ကြားသိလိုက်ရသည့်အခါ ချက်ချင်းပင် ဒေါသထွက်သွားသည်။

သူ့သားမှာ အရည်အချင်းမရှိသော်လည်း သူ၏ သားအရင်းဖြစ်သည်မှာ အမှန်ပင်။

စကူရိုင်းအီဟီကိုတွင် သားနှစ်ယောက်သာ ရှိသည်။ အကြီးဆုံးသား စကူရိုင်းဟီရိုတို မှာ အသက် ၄၀ ကျော်ပြီဖြစ်ပြီး ကုမ္ပဏီ၏ အဓိကမဏ္ဍိုင် ဖြစ်နေသည်။

စကူရိုင်းအီဟီကိုက အကြီးဆုံးသားသည်သာ သူ၏ စည်းစိမ်နှင့် ရာထူးကို ဆက်ခံမည်ဟု ပြတ်ပြတ်သားသား ပြောထားပြီးဖြစ်သည်။

စည်းကမ်းမရှိ၊ အလုပ်မလုပ်တတ်သည့် အငယ်ဆုံးသားမှာမူ အကြီးဆုံးအစ်ကို၏ အစောင့်ရှောက်ကို ခံယူထားသူဖြစ်သည်။

အရည်အချင်းမရှိသော်လည်း အိမ်တွင် အလွန်ပင် အလိုလိုက်ခံထားရသည်။ မိဘနှစ်ပါးရော အစ်ကိုဖြစ်သူပါ သူ့ကို အလွန်ပင် ချစ်မြတ်နိုးကြသည်။

စာမလုပ်တတ်၊ အလုပ်မလုပ်တတ်၊ စီမံခန့်ခွဲမှု မညံ့ဖျင်းသော်လည်း ကျန်းမာရေးမှာမူ အလွန်ကောင်းသည်။

အသိဉာဏ်ဆီ ရောက်သွားရမည့် စွမ်းအင်များမှာ ကြွက်သားများဆီ ရောက်သွားသလားပင် ထင်ရသည်။

ထိုသို့ဖြစ်လေလေ မိသားစုက သူ့ကို ပို၍ ကာကွယ်လေလေဖြစ်သည်။

အငယ်ဆုံးဖြစ်၍ အရည်အချင်းမရှိသဖြင့် သူ ဘာမျှဖြစ်လာမည်မဟုတ်ကြောင်း မိဘများက နားလည်ထားကြသည်။

ထို့ကြောင့် အကြီးဆုံးသားကို ငယ်စဉ်ကတည်းက ညီဖြစ်သူကို အမြဲစောင့်ရှောက်ရန် သွန်သင်ထားသည်။

အစ်ကိုဖြစ်သူမှာလည်း အသက်ဆယ်နှစ်ကျော် ခြားနားသဖြင့် ဖခင်တစ်ယောက်သဖွယ် တာဝန်ယူကာ စောင့်ရှောက်လေ့ရှိသည်။

ထို့ကြောင့် စကူရိုင်းတကဲဟီတိုသည် မိုက်မဲသည့်အလုပ်များကို အကြိမ်ကြိမ် လုပ်ဆောင်နေခြင်းဖြစ်သည်။

ဂျပန်မှာဟု ထင်နေသဖြင့် မည်သို့ပင် ပြဿနာတက်တက် သူတစ်ပါးက ရှင်းပေးလိမ့်မည်ဟု ယုံကြည်နေသည်။

သို့သော် ဤနေရာမှာ ဟေးလုံကျန်းဖြစ်သည်။ ဆန်းတို့စ်တစ်ယောက်သာ ကျိုးထျန်း၏ အမိန့်ကြောင့် သူ့ကို မထိခြင်းဖြစ်သည်။

အခြားသော ဟေးလုံကျန်းမှ အခြားသူများမှာ သူ့ကို ဘယ်သူမှန်း သိမည်မဟုတ်ပေ။

သူတို့အတွက် 'အားရှိသူက အနိုင်ရသည်' ဟူသည့် တောတွင်းဥပဒေသာ ရှိသည်။

စကူရိုင်းအီဟီကိုသည် ဒေါသထွက်နေရင်းပင် စတင်တွေးတောသည်။

ဆယ်စုနှစ်များစွာ အတွေ့အကြုံရှိသည့် လုပ်ငန်းရှင်တစ်ယောက်ပီပီ၊ သူ့သား တိုက်ခိုက်ခံရခြင်းသည် ဓာတ်ခွဲခန်း သိမ်းပိုက်ရေးကိစ္စနှင့် ပတ်သက်နေကြောင်း သူချက်ချင်း သဘောပေါက်လိုက်သည်။

ဓာတ်ခွဲခန်းတွင် တန်ဖိုးရှိသည့် အရင်းအမြစ်များ၊ အချက်အလက်နှင့် နမူနာများစွာ ရှိသည်။

အဆင့်မြင့်စက်ကိရိယာများမှာ အရေးမကြီးပေ။

သူ လိုချင်ပါက အမေရိကန်မှ တိုက်ရိုက် ဝယ်ယူနိုင်သည်။

တရုတ်ပြည်ကဲ့သို့ အဆင့်မြင့်ပစ္စည်းများကို အမေရိကန်က ရောင်းချပေးမည်မဟုတ်သည့် အခြေအနေမျိုး မဟုတ်ပေ။

ထို့ကြောင့် ကျိုးထျန်းအတွက်မူ ထိုစက်ကိရိယာများမှာ တန်ဖိုးဖြတ်မရနိုင်ပေ။

မူလက စကူရိုင်းအီဟီကိုသည် စိတ်ဝင်စားမှု အနည်းငယ်သာ ရှိခဲ့သည်။

စကူရိုင်းအုပ်စုသည် မော်တော်ကား၊ ဓာတုဗေဒ၊ အိမ်သုံးဓာတုပစ္စည်း၊ အိမ်ခြံမြေ၊ ဆေးဝါးနှင့် စစ်ဘက်ဆိုင်ရာ စသည့် နယ်ပယ်ပေါင်းစုံတွင် ရင်းနှီးမြှုပ်နှံထားသည်။

သို့သော် သူတို့မှာ အလွန်ပင် လျှို့ဝှက်စွာ လုပ်ကိုင်သည်။

နယ်ပယ်တစ်ခုစီတွင် ရှယ်ယာ ၁၀ ရာခိုင်နှုန်းထက် ပိုမယူဘဲ ဘယ်သောအခါမှ ကုမ္ပဏီတစ်ခုကို အပြည့်အဝ မချုပ်ကိုင်ခဲ့ပေ။

သူ၏ ကြီးမားသည့် ငွေကြေးအင်အားကြောင့် ပြည်တွင်းဈေးကွက်တစ်ခုလုံးကို တုန်လှုပ်စေနိုင်သော်လည်း သူကမူ အေးဆေးနေတတ်သည်။

ဆေးဝါးနှင့် ကျန်းမာရေးကဏ္ဍကို ဒုတိယ၊ တတိယတန်းစား ဖွံ့ဖြိုးရေးပန်းတိုင်အဖြစ်သာ သတ်မှတ်ထားသည်။

အဘယ်ကြောင့်ဆိုသော် ပြိုင်ဆိုင်မှု ပြင်းထန်ပြီး အမြတ်နည်းပါးသောကြောင့်ဖြစ်သည်။

ထို့ကြောင့် အရည်အချင်းမရှိသည့် စကူရိုင်းတကဲဟီတိုကိုသာ ဤအလုပ်ကို လွှဲပေးလိုက်ခြင်းဖြစ်သည်။

သို့သော် ယခုအခါတွင်မူ ထိုပစ်မှတ်၏ တန်ဖိုးမှာ သူထင်ထားသည်ထက် ပိုမိုမြင့်မားနေကြောင်း သူ သိလိုက်ရသည်။

၇၀ အရွယ်ရှိ အဖိုးအို၏ ရင်ထဲတွင် ပြိုင်ဆိုင်လိုစိတ်နှင့် မာနတို့ တောက်လောင်လာသည်။

ဂျပန်လူမျိုးများ၏ မာနမှာ အလွန်ကြီးမားသည်။

အထူးသဖြင့် ဂုဏ်သိက္ခာကို အသက်ထက်တန်ဖိုးထားသည့် လူကြီးပိုင်းများအတွက်ဖြစ်သည်။

"လူတစ်ယောက်ဟာ ဂုဏ်သိက္ခာအတွက် အသက်ရှင်ရတာ၊ အခု ငါ့သားကို လာထိတယ်ဆိုတာ ငါ့မျက်နှာကို လာရိုက်တာနဲ့ အတူတူပဲ" ဟု သူ တွေးလိုက်သည်။

၎င်းမှာ လက်ခံနိုင်စရာမရှိပေ။

သူ တိုက်ပွဲဝင်ရမည်!

ဓာတ်ခွဲခန်းကို သိမ်းပိုက်ရမည်!

ထိုအချိန်တွင် စကူရိုင်းအီဟီကို ဆုံးဖြတ်ချက် ချလိုက်သည်။

သူသည် ဝါရင့်လက်အောက်ငယ်သားတစ်ဦးကို စေလွှတ်ကာ သူ့သားကို ကုသရန် ဂျပန်သို့ ပြန်ခေါ်စေပြီး၊ တစ်ဖက်တွင်လည်း ကမ်းဘဲလ်နှင့် ညှိနှိုင်းကာ ဓာတ်ခွဲခန်းကို သိမ်းပိုက်ရန် စီစဉ်သည်။

ဆန်းတို့စ်မှာ ယခုအခါ ဤအခြေအနေနှင့် ရင်ဆိုင်နေရသည်။

ကျိုးထျန်းမှာ အဖြစ်အပျက်ကို ကြားလိုက်ရသည့်အခါ နဖူးကို လက်ဖြင့် ရိုက်၍ ခေါင်းခါလိုက်သည်။

‘ရူးနေတဲ့သူတွေ၊ မိုက်မဲတဲ့သူတွေနဲ့တော့ မတွေ့ပါစေနဲ့။ အထူးသဖြင့် ရူးလည်းရူး၊ မိုက်လည်းမိုက်တဲ့သူတွေ’

‘ဒါ ငါ့အတွက် ပြဿနာ ထပ်ရှာနေတာပဲ မဟုတ်လား’

‘အဆင်ပြေနေတဲ့ကိစ္စကို၊ အခုတော့ အစွမ်းထက်တဲ့ ပြိုင်ဘက်တစ်ယောက် ပေါ်လာပြန်ပြီ။ ရယ်စရာကောင်းလိုက်တာ’

စကူရိုင်းမိသားစုနှင့် ငွေကြေးချင်း ယှဉ်ပြိုင်မည်ဆိုပါက သူတို့၏ လက်သည်းခွံတစ်ပိုင်းပင် ကိုယ့်ခေါင်းထက် ကြီးနေလိမ့်မည်ဖြစ်ကြောင်း သူ သိသည်။

ယှဉ်နိုင်မည် မဟုတ်ပေ။

ထို့ပြင် စကူရိုင်းမိသားစုက သူ့ကို ယှဉ်ပြိုင်လာခြင်းမှာ ကမ်းဘဲလ် လိုချင်သည့်အရာပင် ဖြစ်သည်။

၎င်းက ဝယ်ယူမည့်စျေးနှုန်းကို မြင့်တက်စေလိမ့်မည်။ ကမ်းဘဲလ်သာ သိလျှင် အလွန်ဝမ်းသာနေတော့မည်။

ဤကိစ္စမှာ အလွန်ခက်ခဲသည်။ လက်ရှိ သူလုပ်နိုင်သည့် တစ်ခုတည်းသောနည်းမှာ ပြတ်ပြတ်သားသား တုံ့ပြန်ပြီး စကူရိုင်းမိသားစုကို ဖယ်ရှားပစ်ရန်သာ ဖြစ်သည်။

သို့သော် ထိုသို့လုပ်ခြင်းမှာ အန္တရာယ်ကြီးသည်။

စကူရိုင်းမိသားစုက လက်တုံ့ပြန်ပြီး အခြားဒေသခံ စစ်ဘုရင်များနှင့် ပူးပေါင်းကာ ဆန်းတို့စ်ကို တိုက်ခိုက်လာပါက ဟေးလုံကျန်းရှိ သူ၏ အစီအစဉ်များ ထိခိုက်သွားနိုင်သည်။

ထိုအချက်များကို တွေးကြည့်လျှင် ပြင်းပြင်းထန်ထန် တုံ့ပြန်ခြင်းမှာ အကျိုးထက် အပြစ်များနိုင်သည်။

ဆန်းတို့စ်နှင့် ဖုန်းပြောပြီးနောက်တွင် သူသည် အနှိပ်ကုလားထိုင်ပေါ်၌ ထိုင်ကာ ထပ်ခါတလဲလဲ စဉ်းစားနေသည်။

‘ဒါမျိုးက အကြမ်းဖက်လို့ မရဘူး၊ ဉာဏ်သုံးရမယ်။ စကူရိုင်းမိသားစုကို လှည့်စားနိုင်မယ့် နည်းလမ်းကို ရှာရမယ်’

ကျိုးထျန်းသည် ဂျက်ဆီ အား စကူရိုင်းမိသားစုအကြောင်း စုံစမ်းခိုင်းပြီး၊ အထူးသဖြင့် မိသားစုခေါင်းဆောင်၏ အချက်အလက်များကို လေ့လာသည်။

ဆိုဒါသောက်လိုက်၊ စဉ်းစားလိုက်ဖြင့် သူ၏ စိတ်ထဲတွင် အကြမ်းဖျင်း အစီအစဉ်တစ်ခု ပေါ်လာသည်။

‘သူတို့က ငါနဲ့ ပြိုင်ချင်တယ်ဆိုတော့ စျေးတင်မှာပဲ။ အဲဒီတော့ ငါတို့လည်း စျေးကို ကောင်းကင်ထိ ရောက်အောင် တင်လိုက်မယ်!’

‘မင်းတို့ စကူရိုင်းအုပ်စုမှာ ပိုက်ဆံရှိတယ်မလား? အဲဒီတော့ မင်းတို့ရဲ့ အားသာချက်ကို သုံးပြီး ပိုက်ဆံအများကြီး သုံးလိုက်ကြစမ်း’

သူသည် ချက်ချင်းပင် ဆန်းတို့စ်ထံ အမိန့်ပေးလိုက်သည်။

စကူရိုင်းမိသားစု၏ လေလံစျေးနှုန်းထက် အမြဲ ၂၀ ရာခိုင်နှုန်း ပိုများအောင် တင်ရန် ပြောသည်။

ထို့ပြင် အလွန်ဒေါသထွက်နေသလို ဟန်ဆောင်ပြီး၊ ဘယ်သူ့ကိုမဆို ပြန်လည်ရင်ဆိုင်မည့် ပုံစံမျိုးကို ပြရန် ညွှန်ကြားသည်။

ထို့နောက် စကူရိုင်းမိသားစုကို အမြဲတစေ အနှောင့်အယှက်ပေးပြီး တိုက်ခိုက်ရန် လူများ စေလွှတ်ရမည်။

သို့သော် ယခင်ကနှင့် မတူပေ။

ရိုးရိုးခြိမ်းခြောက်ရုံတင် မဟုတ်တော့ဘဲ တစ်ယောက်တည်း မိလျှင် အပြင်းအထန် ရိုက်နှက်ရမည်။

အထူးသဖြင့် ညှိနှိုင်းရန် လာသည့် အကြီးတန်းမန်နေဂျာများကို ပစ်မှတ်ထားရမည်။

ရည်ရွယ်ချက်မှာ တစ်ခုတည်းဖြစ်သည်။

သူတို့ကို ဒေါသအလွန်ထွက်အောင် လုပ်ပြီး စိတ်ထိန်းမနိုင် ဖြစ်သွားစေရန်၊ ထိုအခါ သူတို့မှာ ဆင်ခြင်တုံတရားဖြင့် စဉ်းစားနိုင်တော့မည် မဟုတ်ပေ။

‘သူလုပ်ရမယ့် ပထမဆုံးခြေလှမ်းပဲ။ ဒီခြေလှမ်းကို သေချာလုပ်နိုင်ရင် ကျန်တာက ပိုလွယ်သွားလိမ့်မယ်’

‘ဒီ စကူရိုင်းအီဟီကိုက စိတ်တိုတတ်တယ်၊ စိန်ခေါ်မှုတွေကို တိုက်ရိုက်ရင်ဆိုင်ရတာ ကြိုက်တယ်။ သူက ရှေးရိုးဆွဲပေမဲ့ ပြတ်သားတယ်’

‘သူ့လိုလူက ကိုယ့်ကိုယ်ကိုယ် ယုံကြည်မှု အလွန်များတယ်။ အရာတစ်ခုအတွက် ပြိုင်ဆိုင်မှု များလေလေ သူက ပိုလိုချင်လေလေပဲ’

‘သူက ဝါရင့်လုပ်ငန်းရှင်ဆိုတော့ ငါ့နောက်ကို လိုက်လာပြီး ငွေကြေးစစ်ပွဲ ဆင်နွှဲဖို့ သေချာပေါက် လုပ်လာမှာပဲ’

ကျိုးထျန်းသည် သားဖြစ်သူ တိုက်ခိုက်ခံရပြီးနောက် ပြောင်းလဲသွားသည့် ထိုအဖိုးအို၏ ဗျူဟာကို ကြည့်၍ သူ၏ စိတ်နေစိတ်ထားကို ခန့်မှန်းမိလိုက်သည်။

‘ဒါဆိုရင်လည်း သူ့စိတ်ကို အသုံးချပြီး အနိုင်ယူရုံပေါ့’