အခန်း ၂၅၈

အပိုင်း(၂၅၈) သဲလွန်စများကိုလိုက်၍ အခြေအနေကို ခွဲခြမ်းစိတ်ဖြာခြင်း

လေးရက်ကြာပြီးနောက်။

တောရိုင်းမြေမှ မိုင်သန်းဆယ်ချီ ဝေးကွာသော တိုက်ကြီးတစ်ခု၏ ကမ်းရိုးတန်းတွင်၊ လှိုင်းလုံးကြီးများက ကောင်းကင်ကို ရိုက်ခတ်နေပြီး နားကွဲမတတ် ဆူညံသံများနှင့်အတူ ပြင်းထန်သော မုန်တိုင်းတစ်ခု တိုက်ခတ်၍ နေလေသည်။

ကမ်းရိုးတန်းမြို့များမှ လူများမှာ ဤအရာကို အသားကျနေပြီဖြစ်ပြီး သူတို့၏ဘဝကို ပုံမှန်အတိုင်း ဆက်လက်ဖြတ်သန်းနေကြသည်။ သူတို့က အင်အားကြီး ပုဂ္ဂိုလ်တစ်ဦး ကျဆုံးသွားခြင်း၊ ကမ္ဘာငယ်လေးတစ်ခု ပြိုကွဲသွားခြင်း၊ သို့မဟုတ် လူသောင်းနှင့်ချီ တစ်ခဏချင်း သေဆုံးသွားခြင်းစသည့် သတင်းကြီးတစ်ခုကို ရုတ်တရက် ကြားလိုက်ရလျှင်ပင် လူများမှာ အလွန်ဆုံး မျက်လုံးများကို ပြူးကျယ်ကာ "အိုး" ဟု အော်လိုက်ရုံမျှသာ ရှိမည်ဖြစ်ပြီး ထို့နောက်တွင် မျက်လုံးလှန်ကာ အလုပ်များကို ဆက်လုပ်နေကြမည်သာ ဖြစ်သည်။

စားသောက်ဆိုင်အတွင်းတွင်။

မူးယစ်နေသော ပညာသင်တစ်ဦးက ပေါင်ကို စိတ်ပျက်လက်ပျက်ဖြင့် ရိုက်လိုက်သည်။ "ဒီမျိုးနွယ်စု(၅)ခုနဲ့ ဂိုဏ်း(၁၈)ခုက တိုင်းပြည်တစ်ဝန်းလုံးမှာ ပြဿနာတွေ ဖန်တီးခဲ့လို့ ကောင်းကင်ပြည်နယ်ရဲ့ တစ်ဝက်လောက်က နစ်မြုပ်လုနီးပါး ဖြစ်နေပြီ။ လူဘယ်လောက်တောင် သေသွားပြီလဲ။ ဘယ်လောက်တောင် ဝမ်းနည်းစရာကောင်းလိုက်သလဲ။ ဘယ်လောက်တောင် ဝမ်းနည်းစရာကောင်းလိုက်သလဲ။"

ထိုသူ၏ မျက်နှာချင်းဆိုင်တွင် ထိုင်နေသော ပညာသင်တစ်ဦးက နှုတ်ခမ်းတွင် ခါးသီးသော အပြုံးတစ်ခုဖြင့် ခေါင်းခါရင်း ပြောလိုက်သည်။

"ညီအစ်ကိုဝမ်... စကားကို မဆင်မခြင်မပြောပါနဲ့။ မဟုတ်ရင် ကိုယ့်ကိုယ်ကိုယ် ဒုက္ခရှာသလို ဖြစ်သွားမယ်။ မျိုးနွယ်စု(၅)ခုနဲ့ ဂိုဏ်း(၁၈)ခုထဲက အခုဆို (၅)ခုပဲ ကျန်တော့တယ်။ ကျန်တဲ့ (၁၈)ခုက လုံးဝ ဖျက်ဆီးခံလိုက်ရပြီ။"

"မျိုးနွယ်စု(၅)ခုရဲ့ အင်အားက ပိုပိုပြီးတော့ အားကောင်းလာတယ်။ အထူးသဖြင့် ကျိမိသားစုပေါ့။ ကောင်းကင်ပြည်နယ်တစ်ခွင်လုံးမှာ သူတို့ရဲ့ သူလျှိုတွေ ရှိတယ်။ လွန်ခဲ့တဲ့ ရက်အနည်းငယ်က၊ နံနက်ခင်းအလင်းနယ်ပယ် ကျင့်ကြံသူတစ်ယောက်က သူ့အိမ်မှာ သူများတွေနဲ့ စကားပြောနေတုန်း ကျိမိသားစုရဲ့ ချီလင်သားတော် အကြောင်း မကောင်းပြောမိလို့တဲ့။ ဘာဖြစ်သွားလဲ သိလား။"

"သူ့ကို သူ့သားအရင်းက သတင်းပေးလိုက်တယ်။ ပြီးတော့ ကျိမိသားစုနဲ့ ပတ်သက်နေတဲ့ အင်အားစု တစ်စုက သူ့အိမ်ကို တိုက်ရိုက်ရောက်လာပြီး အဲဒီနံနက်ခင်းအလင်းနယ်ပယ် ကျင့်ကြံသူကို ဆွဲခေါ်သွားတယ်၊ မကြာခင်မှာ ကွပ်မျက်ခံရတော့မှာ။"

မူးယစ်နေသော ပညာသင်မှာ ချက်ချင်းပင် အမူးပြေသွားပြီး သူ၏မျက်လုံးများမှာ အတော်လေး ပိုမို ရှင်းလင်းသွားကာ အံ့သြနေရင်း အော်လိုက်သည်။ "တကယ်ကြီးလား။"

ပညာသင်က ခါးသီးစွာ ပြုံးလိုက်သည်။ "မင်း သိတာ အရမ်းနည်းလွန်းတယ်။ ဒီလိုကိစ္စမျိုးက အမြဲတမ်း ဖြစ်နေတာပဲ။ တကယ်လို့ ဒီနေရာက ဝေးလံခေါင်ဖျားတဲ့ ကမ်းရိုးတန်းမှာ မဟုတ်ဘဲ ကောင်းကင်ပြည်နယ်ရဲ့ အလယ်ဗဟိုမှာဆိုရင် မင်းက မျိုးနွယ်စု(၅)ခုအကြောင်း တစ်စက္ကန့်လောက် မကောင်းပြောမိတာနဲ့ နောက်တစ်စက္ကန့်မှာ မင်း ဆွဲခေါ်ခံရလိမ့်မယ်။"

ဘေးနားမှခုံတွင်။

စားသုံးသူနှစ်ဦးမှာ တိတ်ဆိတ်စွာ ထိုင်နေကြပြီး ဓားကိုင်ထားသော အစေခံမလေးက ဓားကို ဘေးသို့ ပစ်ချကာ ပန်းကန်လုံးကြီးတစ်လုံးကိုယူပြီး ထမင်းကို အားရပါးရ စားသောက်ရင်း တိုးညင်းစွာ ပြောလိုက်သည်။ "သခင်လေး... ပြောရမယ်ဆို ကောင်းကင်ပြည်နယ်မှာ အရသာရှိတဲ့အစားအစာ တော်တော်များများ ရှိတာပဲ။"

သူ၏ရှေ့တွင် အဖြူနှင့်အမည်း မှင်ပန်းချီကားများ ရေးထိုးထားသော အဖြူရောင် ဝတ်ရုံကို ဝတ်ထားပြီး သရဲမျက်နှာဖုံးတစ်ခုကို တပ်ဆင်ထားသည့် လူငယ်တစ်ဦး ထိုင်နေသည်။ သူက ဘာမှမစားဘဲ တည်ငြိမ်စွာ ပြုံးလျက် ပြောလိုက်သည်။ "ကြိုက်ရင် များများစားလေ။"

ထိုနှစ်ယောက်က မုန့်ချင်ကျိုးနှင့် စုချင်ချိုးတို့ပင်။

သူတို့ ကောင်းကင်ပြည်နယ်ကို ရောက်သည်မှာ နာရီဝက်သာ ရှိသေးသည်။ အချိန်-နေရာလွတ် အတတ်ကြောင့် ခရီးစဉ်က မြန်ဆန်ခဲ့သော်လည်း ပင်လယ်ထဲတွင် လမ်းပျောက်လုနီးပါး ဖြစ်ခဲ့သည်။

အတော်လေး ဝေးသော်လည်း မုန့်ချင်ကျိုးက အလွန်ဆုံး တစ်ရက်အတွင်း ရောက်ရှိနိုင်၏။

"ကောင်းကင်ပြည်နယ်ရဲ့အခြေအနေက ထင်ထားတာထက် ပိုဆိုးနေတယ်။ အကောင်းမြင်စရာ မရှိဘူး။"

"မျိုးနွယ်စု(၅)ခုနဲ့ ဂိုဏ်း(၁၈)ခုက ရှေးခေတ်ကတည်းက ကောင်းကင်ပြည်နယ်မှာ မတ်မတ်ရပ်တည်ခဲ့ပြီး နှစ်ထောင်ချီကြာ တိုင်းပြည်တွေ တက်လာလိုက် ကျသွားလိုက် ဖြစ်နေတာကို လွှမ်းမိုးခဲ့ပြီးတော့ ပုံသေ အာဏာဖွဲ့စည်းပုံတစ်ခုကို ဖန်တီးခဲ့ကြတယ်။ ဒါပေမဲ့ ကောင်းကင်စောင့်ကြည့်သူရဲ့ အကူအညီနဲ့အတူ ကျိမိသားစုက စစ်ပွဲတစ်ခုကို စတင်ဖို့ ဦးဆောင်ခဲ့ပြီး ကောင်းကင်ပြည်နယ်မှာ ကာလကြာရှည် တည်ရှိနေခဲ့တဲ့ အခြေအနေကို ချိုးဖျက်ပစ်ခဲ့တယ်။"

"ကျိဝူရွှမ်ရဲ့ အင်အားက အခုတော့ တားဆီးလို့ မရတော့ဘူး။ ကျိမိသားစုရဲ့ စစ်စက်ယန္တရားကို ဘယ်သူမှ မခံနိုင်တော့ဘူး။ ကျန်တဲ့မိသားစု(၄)ခုက နွေးထွေးမှုအတွက် စုပေါင်းနေရုံပဲ တတ်နိုင်တော့တယ်..."

"ကောင်းကင်ကြည့်ဆောင်က မျိုးနွယ်စု(၅)ခုနဲ့ ဂိုဏ်း(၁၈)ခုထဲက ဘယ်ဟာမှ ဖြစ်နိုင်မှာမဟုတ်ဘူး။ အဲဒီလိုမှမဟုတ်ရင် သူတို့က ဝင်ပါရမှာပဲ၊ ဘေးထွက်နေလို့ ရမှာ မဟုတ်ဘူး။"

"ခက်တယ်။"

မုန့်ချင်ကျိုးက သူ့ဘာသာ တွေးတောရင်း ခေါင်းခါလိုက်သည်။

ထို့နောက် သူက ကမ်းရိုးတန်းမြို့များစွာကို လွှမ်းခြုံထားသော အချိန်-နေရာလွတ် ပိုင်နက်ကို ပြန်လည် ရုပ်သိမ်းလိုက်သည်။

နာရီဝက်ကြာ စုံစမ်းစစ်ဆေးပြီးနောက် သူက သတင်းအချက်အလက် များစွာကို သိရှိခဲ့ရသည်။ မှန်ပေသည်။ အချို့အရာများကို သူ ကြိုသိပြီးသားဖြစ်သော်လည်း အများစုကတော့ မူရင်းဝတ္ထုထဲ မပါဝင်သော သတင်းအချက်အလက်များပင်။

တောရိုင်းမြေဆိုသည်မှာ အရွယ်အစားအမျိုးမျိုးရှိသော တိုင်းပြည်ပေါင်းရာနှင့်ချီ ဒါမှမဟုတ် ထောင်နှင့်ချီရှိသော ကသောင်းကနင်း စစ်မြေပြင်တစ်ခုပင်။ အကယ်၍ လူအုပ်ထဲကို အုတ်ခဲတစ်လုံး ပစ်ထည့်လိုက်လျှင် ဝန်ကြီးတချို့ သို့မဟုတ် ဧကရာဇ်တချို့ကို ရှာတွေ့နိုင်၏။ အတိုချုပ်ပြောရလျှင် ရှုပ်ထွေးသော နေရာတစ်ခုပင်။

ကောင်းကင်ပြည်နယ်တွင်တော့ အခြေအနေများက ပုံသေပင်။ မျိုးနွယ်စု(၅)ခုနဲ့ ဂိုဏ်း(၁၈)ခုက မြေရှင်ပဒေသရာဇ်များကဲ့သို့ ဖြစ်သည်။ ကောင်းကင်ပြည်နယ်၏ကို ခွဲဝေပြီး ထိန်းချုပ်ထားသည်။ မည်သူမဆို ဘုရင် သို့မဟုတ် အာဏာရှင်ဟု မဆင်မခြင် ကြေညာရဲလျှင် မျိုးနွယ်စု(၅)ခုနဲ့ ဂိုဏ်း(၁၈)ခု၏ တစ်ခဏချင်း ဝါးမျိုခြင်းကို ခံရပေလိမ့်မည်။

ပါရမီ သို့မှမဟုတ် စွမ်းရည် အနည်းငယ်ရှိသော ကျင့်ကြံသူတိုင်းက ဥပဒေမဲ့ သူပုန်တစ်ယောက် ဖြစ်သွားမည်လား၊ မျိုးနွယ်စု(၅)ခုနှင့် ဂိုဏ်း(၁၈)ခုထဲမှ တစ်ခုခုတွင် ဝင်ရောက်ပူးပေါင်းမလား ဟူ၍ပင် ရှိသည်။ သို့မဟုတ်ပါက သေလမ်းရှာနေခြင်းပင်။

ကောင်းကင်ပြည်နယ်က ရပ်တန့်နေသော်လည်း တည်ငြိမ်သော အခြေအနေကြောင့် မကြာသေးမီ နှစ်တွေအတွင်း အလွန်လျင်မြန်သော ဖွံ့ဖြိုးတိုးတက်မှုများကို တွေ့ကြုံခဲ့ရသည်။

ယခင်ကဆိုလျှင် နံနက်ခင်းအလင်းနယ်ပယ် ကျင့်ကြံသူတစ်ယောက် သေဆုံးခြင်းက မျိုးနွယ်စု(၅)ခုနှင့် ဂိုဏ်း(၁၈)ခု၏ စုပေါင်းအာရုံစိုက်မှုကို ဆွဲဆောင်နိုင်သော အဓိကဖြစ်ရပ်တစ်ခုပင်။

ထို့ကြောင့် တောရိုင်းမြေ၏ဖွံ့ဖြိုးတိုးတက်မှုမှာ ကောင်းကင်ပြည်နယ်ထက် နောက်ကျနေခြင်း ဖြစ်သည်။

မည်သို့ဆိုစေ တောရိုင်းမြေက အမြဲတမ်း စစ်ဖြစ်နေသည် မဟုတ်ပါလား။ တိုင်းပြည်အားလုံးက မဆင်မခြင် လုပ်တတ်သော ပျားဖွတ်ဝက်ဝံများလိုပင်။ သတ်မလား အသတ်ခံမလားပင် ရှိလေသည်။ တံခါးကို သော့ခတ်ထားပြီး မည်သူမှ ထွက်၍မရပေ။

ယနေ့တွင် အဆင့်မြင့်ကျင့်ကြံသူတစ်ယောက် မွေးဖွားလာသော်လည်း မနက်ဖြန်တွင် သူ့ရန်သူများက တံခါးလာခေါက်ပြီး သူ့ကို သတ်သွားနိုင်၏။ တဖြည်းဖြည်းနှင့် သဘာဝအတိုင်း ကောင်းကင်ပြည်နယ်ထက် နိမ့်ကျသွားလိမ့်မည်။

ထိုအချက်ကို တွေးပြီးနောက်။

မုန့်ချင်ကျိုးက ဖြည်းဖြည်းချင်း သက်ပြင်းချလိုက်သည်။

တုန်းဖန်လျူလီက အဘယ်ကြောင့် အသက်ကို စတေးပြီး တောရိုင်းမြေကို ပေါင်းစည်းရန် ဤမျှ အဓိဋ္ဌာန်ချထားသနည်းဆိုသည်ကို သူ အနည်းငယ် နားလည်သွား၏။

ငါ့ဇနီးက အမြော်အမြင်ရှိတယ်။ သူက အခြေအနေကို ကောင်းကောင်းမြင်ခဲ့တာ ကြာပြီ။ တောရိုင်းမြေက ဆက်ပြီးတော့ ကသောင်းကနင်း ဖြစ်နေမယ်ဆိုရင် အစောပိုင်း ဒါမှမဟုတ် နောက်ပိုင်းမှာ ကောင်းကင်ပြည်နယ်ရဲ့ လုံးဝဝါးမျိုခြင်းကို ခံရမှာ သေချာတယ်။

အဲဒီအချိန်ကျရင် တောရိုင်းမြေက သန်းရာချီတဲ့သတ္တဝါတွေဟာ ကောင်းကင်ပြည်နယ်က မွန်မြတ်တဲ့ လူတွေကိုသာ အစေခံရတဲ့ အဆင့်နိမ့်လူမျိုးစုအဖြစ် လျှော့ချခံရလိမ့်မယ်။

ငါ့ဇနီးမှာ ကြီးမားတဲ့စံပြတွေနဲ့ ရည်မှန်းချက်တွေ ရှိတယ်။

စိတ်အေးစရာပဲ...

သို့သော် ခဏအကြာတွင် မုန့်ချင်ကျိုးက ကောင်းကင်ကြည့်ဆောင်၏ တည်နေရာကိုဩဒိနိတ်များကို စုံစမ်းစစ်ဆေးရန် မည်သည့်နေရာက စရမည်ကို စတင်စဉ်းစားလေတော့သည်။

ထိုခွေးမသားများကို မဖော်ထုတ်နိုင်သရွေ့ သူ ငြိမ်းချမ်းစွာ အိပ်နိုင်မည် မဟုတ်ပေ။

အကယ်၍ သူတို့က ပွင့်ပွင့်လင်းလင်းနှင့် မျှမျှတတ ယှဉ်ပြိုင်မည်ဆိုလျှင် မုန့်ချင်ကျိုးက ဂရုစိုက်မည် မဟုတ်ပေ။ သို့သော် ပြဿနာမှာ ထိုသူများက လျှို့ဝှက်စွာ ပြဿနာရှာရသည်ကို ပိုသဘောကျနေခြင်းပင်။

သူတို့က ကမ္ဘာနှစ်ခု ပေါင်းစည်းရေးကို ရှေ့တိုးရန် လူသားဧကရာဇ် တစ်ယောက်ကို ရုတ်တရက် ဖန်တီးခဲ့သည်။ ထို့နောက်တွင် နတ်ဘုရားများ ပြန်လည်ရှင်သန်လာအောင် ဖန်တီးခဲ့၏။ ဤအတိုင်း ဆက်သွားနေလျှင် သူတို့က နောက်ထပ် မည်သည့်ပြဿနာများ ဖန်တီးဦးမည်ကို မည်သူသိနိုင်မည်နည်း။

"မျိုးနွယ်စု(၅)ခုနဲ့ ဂိုဏ်း(၁၈)ခုထဲက ဂိုဏ်း(၁၈)ခုက လုံးဝဖျက်ဆီးခံလိုက်ရပြီ။"

"စစ်ပွဲမှာသေဆုံးသွားတဲ့ နံနက်ခင်းအလင်းနယ်ပယ် ကျင့်ကြံသူ အရေအတွက်ကိုတော့ ရေတွက်လို့ မရနိုင်ဘူး။ ဒါပေမဲ့ ဂိုဏ်း(၁၈)ခုက ကောင်းကင်ထောက်တိုင်နယ်ပယ် ကျင့်ကြံသူအားလုံးက ကျိမိသားစုကို အညံ့ခံလိုက်ကြတယ်။ သူတို့တွေ ဆယ်ယောက်လောက် ရှိတယ်။ အင်း... ဂိုဏ်းတိုင်းမှာ ကောင်းကင်ထောက်တိုင် ကျင့်ကြံသူတွေ အုပ်ချုပ်နေတာတော့ မဟုတ်ဘူး။ တချို့က အသက်ကြီးလို့ သေသွားကြပြီးတော့ သူတို့ရဲ့ သားစဉ်မြေးဆက်တွေမှာ ဆက်ခံမယ့်သူမရှိလို့ မျိုးဆက် ပြတ်သွားတာမျိုးလည်း ရှိတယ်။"

"ကျိမိသားစုမှာ ရှိပြီးသား ကောင်းကင်ထောက်တိုင် ဘိုးဘေးသုံးယောက်ရယ်၊ ကျိဝူရွှမ်ကိုယ်တိုင်ရယ်ကို ပေါင်းလိုက်ရင် အပေါ်ယံမှာတင် ကောင်းကင်ထောက်တိုင် (၁၄)ယောက် ရှိနေတယ်။။"

"မဖျက်ဆီးခံရသေးတဲ့ ကျန်တဲ့မိသားစု(၄)ခုကတော့ မဏ္ဍိုင်နှစ်ခုရှိတဲ့ လုံမိသားစု၊ မဏ္ဍိုင်နှစ်ခုရှိတဲ့ လီမိသားစု၊ မဏ္ဍိုင်သုံးခုရှိတဲ့ ချူမိသားစုနဲ့ မဏ္ဍိုင်နှစ်ခုရှိတဲ့ လင်းသားစု။ စုစုပေါင်း (၉)ယောက်ရှိတယ်။"

"(၉)ယောက်နဲ့ (၁၄)ယောက်။ ကောင်းကင်ကြည့်ဆောင်က လျှို့ဝှက်ပြီး ကူညီပေးနေမယ်ဆိုရင် ကျန်တဲ့ မျိုးနွယ်စု(၄)ခုက သိပ်ကြာကြာ တောင့်ခံနိုင်မှာ မဟုတ်ဘူး။"

မုန့်ချင်ကျိုး မျက်မှောင်ကြုတ်သွားသည်။

လုပ်ငန်းစဉ်က အရမ်းမြန်လွန်းနေတယ်။

ကျိမိသားစုက ဘယ်လောက်ပဲ အင်အားကြီးပါစေ သူတို့မိသားစုတစ်ခုတည်းနဲ့ ကောင်းကင်ပြည်နယ် တစ်ခုလုံးကို ဖြုတ်ချနိုင်မှာ မဟုတ်ဘူးလို့ ငါ ထင်ခဲ့တာ။

မထင်မှတ်ဘဲ ကောင်းကင်ပြည်နယ်ကို ရောက်ရောက်ချင်း ဂိုဏ်း(၁၈)ခုလုံး ဖျက်ဆီးခံလိုက်ရတယ်ဆိုတဲ့ ကြောက်မက်ဖွယ်သတင်းကို ကြားလိုက်ရတယ်။

"အဲဒီလိုမျိုး မဖြစ်သင့်ဘူး။ ကျိဝူရွှမ်က ဘယ်လောက်ပဲ အင်အားကြီးပါစေ။ သူ တစ်ယောက်တည်းနဲ့ ဂိုဏ်း(၁၈)ခုလုံးကို ချေမှုန်းဖို့ဆိုတာ မဖြစ်နိုင်ဘူး။ အဲဒါက ဂိုဏ်း(၁၈)ခုဆိုတာကို အရမ်းအမှိုက်ကျလွန်းတယ်လို့ ထင်ရအောင် လုပ်နေတာမဟုတ်ဘူးလား။"

"ဧကန္တ..."

မုန့်ချင်ကျိုးက မေးစေ့ကိုပွတ်သပ်ကာ ဆက်လက်ခန့်မှန်းရင်း တိတ်တဆိတ် တွေးလိုက်သည်။

"ကောင်းကင်ကြည့်ဆောင်က ကောင်းကင်တာအိုရဲ့ စောင့်ကြည့်မှုကနေ ရှောင်လွှဲဖို့ ဟာကွက်တစ်ခုခုကို အသုံးချပြီးတော့ နိုးတဝက် အိပ်တဝက်နဲ့ အမိန့်တွေကို စက်ရုပ်လိုပဲ အကောင်အထည်ဖော်နိုင်တဲ့သူကို ကျိဝူရွှမ်ဆီကူညီဖို့ စေလွှတ်ခဲ့တာမဟုတ်ရင် ဒါက လုံးဝ မဖြစ်နိုင်ဘူး။"

ကောင်းကင်ထောက်တိုင်နယ်ပယ်ကို ရောက်နိုင်တဲ့ ကျင့်ကြံသူ ဘယ်နှစ်ယောက်ကများ ကိုင်တွယ်ရ လွယ်ကူလို့လဲ။

တောရိုင်းမြေက အတ္တကင်းမဲ့ဗုဒ္ဓကိုပဲ ကြည့်လေ။ သူ့ရဲ့စိတ်၊ ပါရမီနဲ့ ခွန်အားတွေ အားလုံးက ထိပ်တန်း အဆင့်တွေချည်းပဲ။ သူက ကောင်းကင်တာအိုကိုတောင် ထိဖို့ ရဲဝံ့သေးတယ်။ သူက တကယ့်ကို အင်အားကြီးတယ်။

ပြီးတော့၊ ကျိမိသားစုက ဂိုဏ်း(၁၈)ခုလုံးကို ချေမှုန်းပစ်ခဲ့တာတောင် အဲဒီကြီးမြတ်တဲ့ ဘိုးဘေးတွေထဲက တစ်ယောက်မှ အသက်ကို စတေးပြီး တိုက်ခိုက်ဖို့သတ္တိမပြဘဲ အညံ့ခံပြီး လက်နက်ချခဲ့တယ်ပေါ့။

ကောင်းကင်ကြည့်ဆောင်က သူ့ကို မကူညီခဲ့ဘူးဆိုတာကို ငါ လုံးဝ မယုံဘူး။

"ငါတို့ ကျိမိသားစုကို အာရုံစိုက်ဖို့ လိုအပ်နေသေးတယ်ထင်တယ်။"

"ကောင်းကင်ကြည့်ဆောင်က အဖွဲ့ဝင်တချို့ကို ခွဲခြားသတ်မှတ်ပြီးတော့ သဲလွန်စတွေနောက်ကိုလိုက်ပြီး ကောင်းကင်ကြည့်ဆောင်ရဲ့ ဌာနချုပ်ကို ရှာတွေ့နိုင်မှာပဲ။”

…