အခန်း ၇၂

အခန်း (၇၂) သူဌေးကြီးတို့၏ ဂုဏ်သိက္ခာ

"သူဌေးကြီးတို့၏ ဂုဏ်သိက္ခာ" အမည်ရှိ အစီအစဉ်မှာ ချမ်းသာကြွယ်ဝသူတို့၏ နေ့စဉ်ဘဝကို တိုက်ရိုက်လွှင့်ပြသသည့် ပွဲတစ်ခု ဖြစ်ပြီး သူတို့ ချမ်းသာရသည့် အကြောင်းရင်းကို လူအများ သိရှိစေရန် ရည်ရွယ်သည်။ အစီအစဉ်၏ ကြိုတင်ကြေညာချက် ထွက်လာသည်နှင့် လူထုကြားတွင် အုတ်အော်သောင်းနင်း ဖြစ်သွားခဲ့သည်။

အကြောင်းရင်းမှာ နှစ်ချက်ရှိသည်။ ပထမအချက်မှာ သာမန်ပြည်သူတို့သည် ချမ်းသာသော အသိုင်းအဝိုင်း၏ ဘဝများကို အမြဲပင် စပ်စုချင်ကြသဖြင့် သူတို့၏ နေ့စဉ်ဘဝကို စောင့်ကြည့်ရခြင်းမှာ စိတ်ဝင်စားစရာ ကောင်းနေခြင်း ဖြစ်သည်။ ဒုတိယအချက်မှာ အစီအစဉ်၏ ပုံစံကြောင့် ဖြစ်သည်။ လုံခြုံရေးနှင့် လျှို့ဝှက်ချက်များမှလွဲ၍ ကျန်သည့် အပိုင်းအားလုံးကို တိုက်ရိုက်ထုတ်လွှင့်ခြင်း ဖြစ်ရာ မည်သည့် ပြုပြင်မွမ်းမံမှုနှင့် တည်းဖြတ်မှုမျှ ပါဝင်မည် မဟုတ်သဖြင့် အစီအစဉ်၏ မှန်ကန်မှုကို အာမခံနိုင်ခြင်း ဖြစ်သည်။

ထို့ပြင် တုဇယ်ချန်း၏ အနုပညာလောကတွင် ရှိရင်းစွဲ နာမည်ကြီးမှုနှင့်အတူ အဆင့်အတန်းမြင့်မားသော အမွေဆက်ခံသူအဖြစ် ပေါ်ထွက်လာခြင်းကြောင့် သူ၏ ပရိသတ်များမှာ ရင်ခုန်စိတ်လှုပ်ရှားနေကြပြီး "သူဌေးကြီးတို့၏ ဂုဏ်သိက္ခာ" မှာ လူမှုကွန်ရက် သတင်းစာမျက်နှာများတွင် ထိပ်ဆုံးမှ နေရာယူလာခဲ့သည်။

သခင်လေးတုသည် အမွေဆက်ခံပြီးနောက် လူမြင်ကွင်းသို့ ထွက်လာတော့မည် မဟုတ်ဟု ထင်ထားသော်လည်း အခုတော့ ပုံစံသစ်ဖြင့် ပေါ်လာပြန်ပြီဟု လူအများက ပြောဆိုနေကြသည်။

သခင်လေးကို အရမ်းလွမ်းနေပြီဖြစ်သဖြင့် အမြန်ဆုံး ပြသပေးရန် တောင်းဆိုသံများလည်း ဆူညံနေသည်။

ကျစ်ရှင်းအုပ်စုမှ ချန်ရွေ့၊ ရိတျန့်အုပ်စုမှ ဟောက်ယွမ်ရွေ့နှင့် ဟူရှင်းနည်းပညာမှ ဖန်ခယ်တို့ကဲ့သို့ စစ်မှန်သော သူဌေးသားသမီးများကို ဖိတ်ခေါ်နိုင်ခြင်းမှာ အစီအစဉ်အဖွဲ့သားများ၏ စွမ်းဆောင်ရည် ကြီးမားပုံကို ဖော်ပြနေသည်။

သို့သော် ဝေဖန်တိုက်ခိုက်သူများလည်း ပေါ်လာခဲ့သည်။ သူဌေးကြီးများမှာ ပိုက်ဆံမလိုသဖြင့် ဤကဲ့သို့ အစီအစဉ်မျိုး ရိုက်ရန် မလိုကြောင်း၊ ၎င်းမှာ တုဇယ်ချန်းက ထန်မိသားစုကို ဆက်ခံပြီးနောက် ရှန်ယို့ယောင်က သူမ၏ တည်ရှိမှုကို ပြသချင်သဖြင့် တုဇယ်ချန်းအား ပါဝင်ခိုင်းခြင်း ဖြစ်နိုင်ကြောင်း အချို့က ယူဆနေကြသည်။ သူတို့မှာ ဇနီးမောင်နှံ ဖြစ်သဖြင့် အတူတူ ပေါ်လာမည်မှာ သေချာသည်ဟုလည်း ခန့်မှန်းနေကြသည်။

ထိုအမြင်ကို ထောက်ခံသူများလည်း ရှိနေသည်။ တုဇယ်ချန်း တစ်ယောက်တည်းဆိုလျှင် ပေါ်လွင်လွန်းသဖြင့် တခြားသူငယ်ချင်းများကိုပါ ဖိတ်ခေါ်ခိုင်းခြင်း ဖြစ်နိုင်သည်ဟု ဆိုကြသည်။

ရုပ်ရှင်ရုံတွင် တွေ့ရသော အမူအရာများအရ ရှန်ယို့ယောင်မှာ ကံကောင်းလွန်းသဖြင့် ကြွားဝါချင်နေခြင်း ဖြစ်မည်ဟုလည်း ကဲ့ရဲ့ကြသည်။

တုဇယ်ချန်းက သူမကို ရွေးချယ်ခဲ့ရသည့် အကြောင်းရင်းမှာလည်း စဉ်းစားစရာ ဖြစ်နေသည်။

သူမက မိမိ၏ ဂုဏ်ပုဒ်ကို ပြသချင်သော်လည်း ကျန်သောသူများမှာ စစ်မှန်သော မျိုးရိုးမြင့် သူဌေးသားသမီးများ ဖြစ်ကြသည်။ ဟောက်ယွမ်ရွေ့၏ ဇနီးမှာလည်း အဆင့်အတန်းတူညီသူ ဖြစ်ရာ ရှန်ယို့ယောင်အနေဖြင့် သူတပါးကို အတုခိုးရန် ကြိုးစားရင်း မိမိကိုယ်မိမိ အရှက်ခွဲသလို ဖြစ်လာကာ တုဇယ်ချန်းကိုပါ အရှက်ရစေမည်ကို စိုးရိမ်ကြောင်း ဝေဖန်နေကြသည်။

ထိုသူများသည် ရှန်ယို့ယောင်ကို ကိုယ်တိုင် မြင်တွေ့ဖူးသည့်အလား အမျိုးမျိုးသော စွပ်စွဲချက်များဖြင့် အပုပ်ချနေကြသည်။

ထိုသို့ ဝေဖန်မှုများ အရှိန်မြင့်နေစဉ်မှာပင် "သူဌေးကြီးတို့၏ ဂုဏ်သိက္ခာ" အစီအစဉ်ကို စတင် တိုက်ရိုက်လွှင့်ခဲ့သည်။

နံနက်ခင်း ငှက်ကလေးများ၏ တေးသံနှင့်အတူ ကင်မရာသည် အနက်ရောင် သံပန်းတံခါးကြီးမှ စတင်ကာ ဝင်ရောက်လာသည်။ လျှပ်စစ် ကားလေးပေါ်မှ ခေတ္တမျှ သွားပြီးနောက် ရှေးဟောင်းလက်ရာဖြင့် တည်ဆောက်ထားသော လေးထပ်ဗီလာကြီးကို မြင်တွေ့လိုက်ရသည်။ ဒါရိုက်တာနှင့် ကင်မရာအဖွဲ့သားများ ဆင်းလိုက်သည်နှင့် ဗီလာတံခါးကြီး ပွင့်လာကာ ဝတ်စုံပြည့် ဝတ်ဆင်ထားသော အိမ်တော်ထိန်းက ပြုံးရွှင်စွာ ကြိုဆိုလေသည်။

အိမ်တော်ထိန်းဆိုသည်ကို ပထမဆုံး မြင်ဖူးခြင်းဖြစ်ကြောင်းနှင့် ဗီလာကြီးမှာ ရှေးဟောင်းအငွေ့အသက်များဖြင့် ခန့်ညားလှကြောင်း ကြည့်ရှုသူများက မှတ်ချက်ပေးနေကြသည်။

မကြာမီမှာပင် တုဇယ်ချန်း ပေါ်လာမည့်အချိန်ကို လူတိုင်း မျှော်လင့်နေကြသည်။

တုဇယ်ချန်းမှာ လူအများ၏ မျှော်လင့်ချက်ကို အပျက်အစီး မခံပေ။ သူသည် သေသေသပ်သပ် ပြင်ဆင်ပြီး အပေါ်ထပ်မှ ဆင်းလာကာ ကင်မရာကို ကြည့်၍ နှုတ်ဆက်လိုက်သည်။

"ဟိုင်း... မတွေ့ရတာ ကြာပြီနော်”

ဒီလောက်အထိ စောစောထသလားဟု ဒါရိုက်တာက မေးမြန်းလိုက်သည်။

တုဇယ်ချန်းက မီးဖိုချောင်သို့ သွား၍ ပေါင်မုန့်ကင်ရင်း ပြန်ပြောလိုက်သည်။

"ဒီအိမ်မှာဆိုရင်တော့ ဒီလိုပါပဲ။ ကျွန်တော့်အဘိုးက အရမ်းစည်းကမ်းကြီးတော့ အိပ်ရာထနောက်ကျတာကို လုံးဝခွင့်မပြုဘူးလေ။ အပြင်မှာနေမှပဲ ကိုယ့်စိတ်ကြိုက် နေလို့ရတာ”

သူက ဆက်ပြောလိုက်သည်။ "ဒါပေမဲ့ အခုတော့ စည်းကမ်းရှိတာ၊ မရှိတာထက် စောစောမထရင် အချိန်က မလောက်တော့ဘူးလေ”

ထန်မိသားစုလုပ်ငန်းကို ဆက်ခံပြီးနောက် အရမ်းအလုပ်များသလားဟု ဒါရိုက်တာက မေးမြန်းလိုက်သည်။

တုဇယ်ချန်းက နောက်ပြောင်သလိုမျိုး ပြောလိုက်သည်။ "အရမ်းအလုပ်များတာပေါ့။ အရာရာကို အချိန်မီ သိအောင် လုပ်ရတယ်၊ မဟုတ်ရင်တော့ ထန်မိသားစုရဲ့ ရှယ်ယာတွေက ပြုတ်ကုန်တော့မှာလေ”

သခင်လေးတုမှာ တကယ်ပင် ပင်ပန်းနေပုံရကြောင်းနှင့် ရှယ်ယာရှင်များမှာ အဘယ်ကြောင့် ဤမျှအထိ လောနေကြသနည်းဟု ကြည့်ရှုသူအချို့က ကိုယ်ချင်းစာပေးကြသည်။

ဒီလောက်အထိ အလုပ်များနေပါလျက် အစီအစဉ်မှာ ဘာလို့ ပါဝင်ရသလဲဟု ဒါရိုက်တာက မေးမြန်းလိုက်သည်။

ရှန်ယို့ယောင်က တိုက်တွန်းလို့ ဖြစ်မည်ဖြစ်ကြောင်းနှင့် သူမသည် သခင်လေးကို မသနားဘဲ မိမိကောင်းစားရေးကိုသာ ကြည့်သူဖြစ်ကြောင်း ဝေဖန်သူများက ချက်ချင်းပင် ဝင်ရောက်ပြောဆိုကြသည်။

ရှန်ယို့ယောင်က မည်သည့်အရာကိုမျှ တုံ့ပြန်ခြင်း မရှိသော်လည်း သူမသည် ရုတ်တရက် ချမ်းသာလာသော အဆင့် ၁၈ မင်းသမီးလေး ဖြစ်ကြောင်း လူအများက အတည်ပေါက် ပြောဆိုနေကြသည်။

တုဇယ်ချန်းက သူမကို တွေ့ရန် ခြောက်နာရီကြာ သွားခဲ့ရသည်မှာ ရင်ခုန်စရာ ကောင်းသော်လည်း ထိုအချိန်က တုဇယ်ချန်းမှာ အလုပ်များနေချိန် ဖြစ်သဖြင့် သူမသည် သူ့အပေါ် မညှာတာကြောင်းလည်း ဆိုကြသည်။

တုဇယ်ချန်းသည် ကြည့်ရှုသူများ၏ မှတ်ချက်များကို မမြင်ရသော်လည်း သူကိုယ်တိုင်ပင် ထုတ်ဖော်ပြောလိုက်သည်။

"ကျွန်တော့်ဇနီးက တိုက်တွန်းလို့ ဒီအစီအစဉ်မှာ ပါဝင်တာလို့ တချို့က ပြောနေကြတယ်၊ တကယ်တော့ ဒါဟာ ကျွန်တော့်ရဲ့ ဆုံးဖြတ်ချက် မဟုတ်သလို သူမရဲ့ ဆုံးဖြတ်ချက်လည်း မဟုတ်ပါဘူး။ ကျစ်ရှင်းအုပ်စုက ချန်ရွေ့က အဆိုပြုခဲ့တာပါ”

သူက ဆက်ပြောလိုက်သည်။ "သူမက ဘာကြောင့် ဒီအစီအစဉ်ကို စီစဉ်ခဲ့သလဲဆိုတာကိုတော့ ခဏနေရင် သူမကိုပဲ မေးကြည့်လိုက်ကြပါတော့”

"ကျွန်တော် ပါဝင်ရတဲ့ အကြောင်းရင်းကတော့ ရိုးရှင်းပါတယ်၊ ကြော်ငြာချင်လို့လေ" သူက ပွင့်လင်းစွာ ပြောလိုက်သည်။

"'ရှောင်းယောင် Live' ဆိုတာ ကျွန်တော်တို့ လန်ဟွေ့က နောက်ဆုံး ထုတ်လုပ်ထားတဲ့ Live ပလက်ဖောင်း ဖြစ်ပါတယ်။ အခု ထုတ်လွှင့်နေတဲ့ လုပ်ဆောင်ချက်အသစ်တွေကိုလည်း အားပေးကြပါဦး”

ပြောပြီးနောက် သူက ကင်မရာကို ကြည့်ကာ ပြုံးလျက် ဆိုသည်။ "သူဌေးကြီးတွေရဲ့ အကြီးမားဆုံး ဂုဏ်သိက္ခာကတော့ အမြဲတမ်း ပိုက်ဆံရှာဖို့ စဉ်းစားနေတာပဲလေ။ ဒါကြောင့် ခင်ဗျားတို့က ဘာလို့ အင်တာနက်မှာပဲ ဝေဖန်နေရသလဲ သိလား။ ဘာလို့လဲဆိုတော့ ခင်ဗျားတို့က အများကြီး တွေးနေပြီး အကြံအစည်တွေပဲ ထုတ်နေကြလို့လေ”

သခင်လေးတုက လူအများကို သူတို့ ဘာကြောင့် ဆင်းရဲသလဲဆိုသည်ကို သွယ်ဝိုက်၍ ပြောလိုက်ခြင်း ဖြစ်ကြောင်းနှင့် သူ၏ ပွင့်လင်းသော စရိုက်ကို သဘောကျကြောင်း လူအများက မှတ်ချက်ပေးကြသည်။

တုဇယ်ချန်းက ကြော်ငြာခြင်းကို ဆက်လက်လုပ်ဆောင်လိုက်သည်။ "ဒါ့အပြင် ရှယ်ယာရှင်တွေအနေနဲ့လည်း ကျွန်တော့်အပေါ် ယုံကြည်မှု ရှိပေးကြပါ။ ကျွန်တော်က အခုမှ စတာဆိုပေမဲ့ ကျွန်တော့်အဘိုးက အခြေခံကောင်းတွေ ချပေးထားခဲ့ပြီးသားပါ။ ကုမ္ပဏီရဲ့ အလုပ်တွေက မဆိုးပါဘူး၊ အခုလို ဈေးတွေ ကျနေတာက ခင်ဗျားတို့အတွက်ပဲ ဆုံးရှုံးမှု ဖြစ်ပါလိမ့်မယ်”

တုဇယ်ချန်းသည် ထမင်းစားပွဲတွင် ထိုင်လိုက်ပြီး ဒါရိုက်တာက သူ၏ နံနက်စာကို အနီးကပ် ရိုက်ကူးပြသည်။ ၎င်းမှာ သာမန် ဆန်းဒဝစ်နှင့် နွားနို့သာ ဖြစ်သည်။

သခင်လေးတုက အနောက်တိုင်းစာကို ကြိုက်သလားဟု ဒါရိုက်တာက မေးမြန်းလိုက်သည်။

တုဇယ်ချန်းက ပြန်ဖြေသည်။ "အဆင်ပြေပါတယ်။ ဒီနေ့ကတော့ အနောက်တိုင်းစာ ဖြစ်နေတာပေါ့၊ တကယ်တော့ ကျွန်တော်က တရုတ်စာကို ပိုကြိုက်ပါတယ်”

သူဌေးကြီးများ၏ နံနက်စာမှာ အများကြီး ပြင်ဆင်ထားမည်ဟု ထင်ထားကြောင်း လူအများက ဆိုကြသည်။

တုဇယ်ချန်းက ရှင်းပြလိုက်သည်။

"တခြားအိမ်တွေတော့ မသိဘူး၊ ကျွန်တော့်အိမ်မှာတော့ အလေအလွင့် မရှိစေရဘူး။ စားနိုင်သလောက်ပဲ ပြင်ဆင်တယ်၊ ဧည့်သည်လာမှပဲ အများကြီး ပြင်တာပါ”

ပြောပြီးနောက် တုဇယ်ချန်းသည် အစာစားနေသဖြင့် စကားမပြောတော့ပေ။ သူ၏ စားသောက်ပုံမှာ အဆင့်အတန်းရှိလှသည်။

အိမ်တော်ထိန်းက ထိုအချိန်တွင် ဗီလာကြီးကို လိုက်လံပြသပေးသည်။ ဗီလာကြီးမှာ တုအဘိုး ငယ်စဉ်က ဝယ်ယူခဲ့ခြင်းဖြစ်ပြီး ရှေးဟောင်းအငွေ့အသက်များဖြင့် ခန့်ညားလှသဖြင့် ကြည့်ရှုသူများက အံ့သြနေကြသည်။ တုဇယ်ချန်း ထမင်းစားပြီးချိန်တွင် ပထမထပ်ကို ပြသပြီးသွားခဲ့ပြီ ဖြစ်သည်။

တုဇယ်ချန်းက ထရပ်လိုက်ကာ ပြောလိုက်သည်။ "ကျန်တာတွေကိုတော့ နောက်မှပဲ ကြည့်ကြတာပေါ့။ အခုတော့ နောက်ဖေးက ပန်းခြံကို သွားရအောင်၊ ဒီနေ့ ဧည့်သည်တွေကို အဲဒီမှာပဲ ကြိုဆိုမှာပါ”

ကင်မရာသည် အိမ်ထဲမှ ထွက်လာကာ နောက်ဖေးပန်းခြံသို့ ဦးတည်သွားသည်။ ပန်းခြံအလယ်တွင် ဖန်လုံအိမ်ဖြင့် ပြုလုပ်ထားသော လှပသည့် ပန်းစိုက်ခန်းလေး ရှိနေသည်။

တုဇယ်ချန်းသည် ပန်းစိုက်ခန်းထဲသို့ ဝင်လိုက်သည်။ ထိုအခန်းမှာ ဖန်သားပြင်များဖြင့် ဝန်းရံထားပြီး ပန်းပင်များ၊ ဆိုဖာများနှင့် စာအုပ်စင်များဖြင့် သပ်ရပ်လှသည်။ မတ်လ၏ နေရောင်ခြည်မှာ မပြင်းထန်လှသဖြင့် ထိုနေရာတွင် စကားပြောရခြင်းမှာ အလွန်ပင် သက်သောင့်သက်သာ ရှိလှသည်။

ဒါဆိုရင် ဒီနေရာကို သခင်လေးက ပြင်ဆင်တာလား၊ ဇနီးသည်က ပြင်ဆင်တာလားဟု ဒါရိုက်တာက မေးမြန်းလိုက်သည်။

ရှန်ယို့ယောင်၏ အရိပ်အယောင်ကို မတွေ့ရသဖြင့် ၎င်းမှာ တုဇယ်ချန်း၏ လက်ရာသာ ဖြစ်မည်ဟု လူအချို့က ယူဆကြသည်။

တုဇယ်ချန်းက ပြုံး၍ ပြန်ပြောလိုက်သည်။

"ကျွန်တော် ပြင်ဆင်တာပါ။ ယို့ယောင် ရှိရင်တော့ သူမကပဲ ပြင်ဆင်တာပေါ့။ သူမက ဒီလိုအရာတွေကို အရမ်းကြိုက်သလို ကျွမ်းလည်း ကျွမ်းကျင်တယ်လေ။ သူမ လုပ်ရင်တော့ ပိုပြီး ကောင်းမှာပါ”

ဇနီးသည်က အိမ်မှာ မရှိဘူးလားဟု ဒါရိုက်တာက မေးမြန်းလိုက်သည်။

တုဇယ်ချန်းက စိတ်ပျက်ဟန်ဖြင့် ပြောလိုက်သည်။ "မရှိဘူး။ သူမက အလုပ် အရမ်းများတာလေ၊ ဒီနှစ် နှစ်သစ်ကူးမှာတောင် နှစ်ရက်ပဲ နားရတယ်"

သခင်လေးမှာ လွမ်းဆွတ်နေပုံရကြောင်းနှင့် ရှန်ယို့ယောင်က အလုပ်မလုပ်ဘူးဟု ပြောသူများကိုလည်း လူအချို့က ပြန်လည် ဝေဖန်ကြသည်။

သူမရဲ့ အလုပ်က အရမ်းများသလားဟု ဒါရိုက်တာက မေးမြန်းလိုက်သည်။

တုဇယ်ချန်းက ပြန်ပြောလိုက်သည်။

"အရမ်းများတယ်။ အခုရိုက်နေတဲ့ ကားပြီးတာနဲ့ နောက်ထပ် ကားတစ်ကားက အဆင်သင့်ပဲလေ။ အဲဒါက ရှေးဟောင်းဇာတ်လမ်းမို့လို့ အားလုံးလည်း အားပေးကြပါဦး။ သူမရဲ့ သရုပ်ဆောင်ချက်က တကယ် ကောင်းပါတယ်။ တိုက်ခိုက်ရေးမယ်လေးကို ကြည့်ပြီးကြပြီလား၊ အဲဒါက သူမရဲ့ ပထမဆုံး လက်ရာပဲ၊ တကယ် တော်တယ် မဟုတ်လား”

သခင်လေးတုသည် ရှန်ယို့ယောင်အကြောင်း ပြောသည့်အခါ မျက်လုံးများ အရောင်တောက်လာပြီး စကားလည်း ပိုများလာသည်ကို လူအများက သတိထားမိကြသည်။

တုဇယ်ချန်းက ဆက်ပြောလိုက်သည်။

"သူမရဲ့ ရိုက်ကူးရေးက ဒီနေ့ ပြီးမှာဆိုတော့ အလုပ်တွေ ပြီးတာနဲ့ သွားကြိုရမယ်”

ဝေဖန်သူများကမူ ၎င်းမှာ ကြော်ငြာရန်အတွက် တမင်စီစဉ်ထားခြင်း ဖြစ်နိုင်ကြောင်းနှင့် တုဇယ်ချန်းမှာ အလုပ်များနေပါလျက် သွားကြိုခိုင်းခြင်းမှာ ရှန်ယို့ယောင်က သူ့အပေါ် မညှာတာခြင်း ဖြစ်ကြောင်း ထပ်မံ ပြောဆိုကြသည်။

ဒါရိုက်တာက ဆက်လက် မေးမြန်းလိုက်သည်။ "မင်း ဒီနေ့ အလုပ်မများဘူးလား”

တုဇယ်ချန်းက ပြန်ပြောလိုက်သည်။ "ဒီမှာ အစီအစဉ် ရိုက်နေတာလေ။ ဒီနေ့တော့ တခြား ဧည့်သည် သုံးယောက်ကို ကြိုဆိုပြီးရင် ယို့ယောင်ကို သွားကြိုမယ်။ တစ်လခွဲလောက် ဆက်တိုက် အလုပ်လုပ်ခဲ့ရတာဆိုတော့ ဒီနေ့တော့ ကိုယ့်ကိုယ်ကိုယ် အနားပေးပြီး အားပြန်ဖြည့်ရမှာပေါ့”

ပုံမှန်ဆိုရင် ဘယ်လို အနားယူတတ်သလဲဟု ဒါရိုက်တာက မေးမြန်းလိုက်သည်။

တုဇယ်ချန်းက ပြန်ဖြေသည်။

"အရင်ကဆိုရင်တော့ သူငယ်ချင်းတွေနဲ့ ဆုံတယ်၊ ဂိမ်းဆော့တယ်ပေါ့။ အခုတော့ ကျွန်တော့်ဇနီးကိုပဲ ရှာတာ။ သူမနဲ့ အတူရှိနေရင် စိတ်အေးချမ်းတယ်လေ။ နောက်ကျရင် ခင်ဗျားတို့ သိလာပါလိမ့်မယ်၊ သူမက လူကို တကယ်ပဲ စိတ်အေးချမ်းစေတဲ့သူပါ”

…