အခန်း ၇၇

အခန်း (၇၇)

ပရိသတ်များမှာ ဖန်ခယ်၏ တိုက်ရိုက်ထုတ်လွှင့်မှုဆီသို့ အပြေးအလွှား သွားကြည့်ကြရာ၊ သူမသည်လည်း အမှန်တကယ်ပင် လက်ဝှေ့ ထိုးနေသည်ကို တွေ့လိုက်ရသည်။ သူမသည် ရှန်ယို့ယောင်လောက် အရပ်မရှည်သော်လည်း ကိုယ်လုံးကိုယ်ပေါက်မှာမူ အလွန်ပင် ဆွဲဆောင်မှု ရှိလှသည်။ သူမ၏ လက်ဝှေ့ထိုးဟန်မှာလည်း လှပပြီး ကြည့်ကောင်းလှသည်။

[ဝိုး... တကယ့်ကို တော်ကြတာပဲ၊ နှစ်ယောက်လုံးက အတတ်ပညာရှင်တွေလိုပဲ။ လှုပ်ရှားမှုတွေက ရှန်ယို့ယောင်နဲ့ တော်တော် တူတာပဲနော်]

[ရှန်ယို့ယောင်က ပိုပြီး အားပါသလိုပဲ။ တကယ်တော့ သူတို့နှစ်ယောက်ရဲ့ လက်ဝှေ့ထိုးပုံကိုပဲ ကြည့်ရင်၊ စရိုက်ချင်း လုံးဝ မတူတဲ့သူတွေလို့တောင် ထင်ရမှာ မဟုတ်ဘူး]

[သူတို့နှစ်ယောက်သာ ပြိုင်ထိုးရင် ဘယ်သူ နိုင်မလဲ သိချင်လိုက်တာ။ ဒါနဲ့... လူကုံထံတွေရဲ့ ဝါသနာက လက်ဝှေ့ထိုးတာလားဟင်]

[မဟုတ်ပါဘူး... သူတို့ နှစ်ယောက်ကပဲ တိုက်ဆိုင်ပြီး ကြိုက်နေကြတာပါ။ ချန်ရွေ့နဲ့ ဟောက်ယွမ်ရွေ့ တို့ကျတော့ ပုံမှန်အတိုင်း ပြေးနေကြတာပဲလေ]

[လူကုံထံတွေရဲ့ ထူးခြားချက် တစ်ခုကတော့ အားကစား လုပ်ရတာကို အားလုံး ကြိုက်ကြတာပဲ]

[မဟုတ်ဘူး... သခင်လေးကတော့ မကြိုက်ဘူးလေ။ သူ အားကစားခန်းမက ထွက်လာကတည်းက ဟိုလျှောက် ဒီလျှောက် လုပ်နေတာ၊ အားကစားလုပ်မဲ့ ပုံစံ တစ်စက်မှ မရှိဘူး]

ဒါရိုက်တာသည် တုဇယ်ချန်းအား ထိုမေးခွန်းကို မေးမြန်းလိုက်ရာ၊ တုဇယ်ချန်းက ပြန်ပြောလိုက်သည်။

"အင်း... အရင်ကတော့ ကျွန်တော်လည်း လုပ်တာပေါ့။ ဒါပေမဲ့ အခုတော့ မရသေးဘူးလေ။ ဆရာဝန် မှာထားတဲ့အတိုင်း ပြန်လည်ထူထောင်ရေး လေ့ကျင့်ခန်းတွေပဲ လုပ်ရဦးမှာ။ နောက်ရက်အနည်းငယ်နေရင် သွားရတော့မယ်”

[သခင်လေးရဲ့ ဒဏ်ရာက မသက်သာသေးဘူးလား]

[အဲဒီလောက်အထိ မြန်မြန် ကောင်းဖို့ဆိုတာ မလွယ်ဘူးလေ။ အစက ဝှီးချဲနဲ့ နေရတာကို၊ အခုလိုမျိုး လမ်းလျှောက်နိုင်တာတင် အံ့ဖွယ်ပဲ]

မနက်စာ စားပြီးနောက် တုဇယ်ချန်းသည် ထန်မိသားစု ကုမ္ပဏီသို့ သွားကာ ရှယ်ယာရှင်များနှင့် ဆက်လက် အားပြိုင်ရပြန်သည်။ ဖန်ခယ်မှာမူ အေးဆေးနေသည်၊ တုဇယ်ချန်းက ရှယ်ယာရှင်များကို မစည်းရုံးနိုင်မချင်း သူမ ဘာမှ လုပ်၍ မရသေးပေ။

ချန်ရွေ့သည် သူတို့ နှစ်ဦး၏ လှုပ်ရှားမှုများကို ကြည့်ကာ ပြုံးလိုက်သည်။ သူမသည် ဟောက်ယွမ်ရွေ့ထံသို့ ဖုန်းဆက်လိုက်သည်။

"ဒီနေ့ ငါတို့တွေ ရန်သူရဲ့ အခြေအနေကို သွားပြီး စူးစမ်းကြည့်ရင် ဘယ်လိုလဲ”

ဟောက်ယွမ်ရွေ့က ပြန်ပြောလိုက်သည်။ "ဒါဆိုရင် ခွဲပြီး သွားကြတာပေါ့” သူသည် မနေ့ညက တစ်ညလုံး လေ့လာပြီးနောက် စတော့ရှယ်ယာများကို ရွေးချယ်ပြီးဖြစ်ရာ ယနေ့အတွက် လုပ်စရာ သိပ်မရှိပေ။

ထို့ကြောင့် ချန်ရွေ့သည် ထန်မိသားစု ကုမ္ပဏီသို့ သွားခဲ့ပြီး ဟောက်ယွမ်ရွေ့မှာမူ ဖန်ခယ်၏ အိမ်သို့ သွားခဲ့သည်။

ရှန်ယို့ယောင်သည် ထုံးစံအတိုင်း တုဇယ်ချန်းနှင့်အတူ အလုပ်သွားခဲ့သည်။ တုဇယ်ချန်းသည် ဖန်ခယ်၏ အစီအစဉ်ကို ကိုင်ကာ သူမအား တစ်စုံတစ်ခု တိုင်ပင်နေသည်။ ဒါသည် မနေ့ညက ပြောခဲ့သော သူမ၏ အကူအညီ လိုအပ်သည့် ကိစ္စပင် ဖြစ်ပေလိမ့်မည်။

ချန်ရွေ့ ရောက်လာချိန်တွင် ရှန်ယို့ယောင် ကိုယ်တိုင်ပင် တံခါးဖွင့်ပေးခဲ့သည်။ ချန်ရွေ့က သူမကို မြင်သောအခါ ပြုံး၍ ပြောလိုက်သည်။ "ခုနက လမ်းမှာ ပရိသတ်တွေ တင်ထားတဲ့ လက်ဝှေ့ဗီဒီယိုကို မြင်လိုက်ရတယ်။ နင် လက်ဝှေ့ထိုးတာ တော်တော် လန်းတာပဲနော်”

ရှန်ယို့ယောင်က ပြုံးလျက် ပြန်ပြောလိုက်သည်။ "ချီးကျူးတဲ့အတွက် ကျေးဇူးတင်ပါတယ်”

"ငါ ကြားတာတော့... တုသခင်လေးက သူငယ်ချင်းတွေနဲ့အတူ နင် လက်ဝှေ့ထိုးနေတာကို မြင်ပြီးမှ စိတ်လှုပ်ရှားသွားတာဆို" ချန်ရွေ့က စူးစမ်းသလို မေးလိုက်သည်။

ရှန်ယို့ယောင် ခေတ္တ တုံ့ဆိုင်းသွားစဉ် တစ်စုံတစ်ခုကို စဉ်းစားနေသော တုဇယ်ချန်းသည်လည်း မော့ကြည့်လိုက်သည်။ သူ အနည်းငယ် အံ့ဩသွားမိသည်။ ရှန်ယို့ယောင်သည် မြေအောက် လက်ဝှေ့ကွင်းတွင် ထိုးခဲ့သည့် ကိစ္စကို သူနှင့် သူငယ်ချင်း အနည်းငယ်မှလွဲလျှင် အခြားသူများ မသိရှိကြပေ။

ချန်ရွေ့ကမူ လျှို့ဝှက်ချက် တစ်ခုကို သိထားသည့်အလား ပြုံးကာ အရာရာကို သိရှိနေဟန်ဖြင့် ဆက်လက် ပြောဆိုလိုက်သည်။ "ဒါပေမဲ့ အမှန်အတိုင်း ပြောရရင် တကယ့်ကို လန်းတာပဲ။ ငါတောင်မှ စိတ်လှုပ်ရှားမိတယ် သိလား”

ရှန်ယို့ယောင်သည် ချန်ရွေ့၏ စရိုက်ကို သိထားသည်။ သူမသည် အကြောင်းမဲ့ စကားပြောမည့်သူ မဟုတ်ပေ။ သို့သော် သူမ၏ ရည်ရွယ်ချက်ကိုမူ ရှန်ယို့ယောင် မသိနိုင်သေးပေ။

တုဇယ်ချန်းသည်လည်း ရှန်ယို့ယောင်ကဲ့သို့ပင် ခံစားလိုက်ရပြီး သူမ ဘာကြောင့် ဤသို့ ပြောသနည်းဟူသော အဖြေကို ရှာမရ ဖြစ်နေတော့သည်။

ပရိသတ်များမှာမူ အကြီးအကျယ် ဆူညံသွားကြတော့သည်။ အကြောင်းမှာ အခြားတစ်ဖက်တွင်လည်း ဟောက်ယွမ်ရွေ့က ဖန်ခယ်အား ထိုကိစ္စကိုပင် မေးမြန်းနေသောကြောင့် ဖြစ်သည်။ "နင့်ရဲ့ ရည်းစားက တုသခင်လေးရဲ့ သူငယ်ချင်း ရှကျွင်းချီ ဆိုတာ ဟုတ်လား”

ဖန်ခယ်က ဖုံးကွယ်ခြင်း မရှိဘဲ ပွင့်ပွင့်လင်းလင်း ခေါင်းညိတ်ပြသည်။

"ဟုတ်တယ်လေ။ ဒါပေမဲ့ သူက နည်းနည်းတော့ မာနကြီးတယ်၊ ငါကပဲ ထပ်ပြီး လိုက်နေရဦးမှာပေါ့”

သူမ၏ လေသံမှာ မကျေမနပ် ဖြစ်ဟန် ရှိသော်လည်း မျက်နှာတွင်မူ ပျော်ရွှင်ရိပ်များ ရှိနေသဖြင့် သူတို့၏ ပတ်သက်မှုမှာ သေချာနေပြီ ဖြစ်ကြောင်း သိသာလှသည်။

[ရှကျွင်းချီ ဆိုတာ ကျီဖုန်း လုပ်ငန်းစုရဲ့ ဥက္ကဋ္ဌ မဟုတ်လား။ ဝိုး... သူက တုသခင်လေးနဲ့ သူငယ်ချင်းတွေ ဖြစ်နေတာကိုး]

"နင်တို့ လက်ဝှေ့ကွင်းမှာ ဆုံခဲ့ကြတာလား” ဟောက်ယွမ်ရွေ့က ပြုံး၍ မေးလိုက်သည်။

"ရှကျွင်းချီကလည်း လက်ဝှေ့ထိုးတာကို တော်တော် ဝါသနာပါတာပဲလေ”

ရှကျွင်းချီ အကြောင်း ပြောလိုက်ချိန်တွင် ဖန်ခယ်၏ ထက်မြက်သော ပုံစံမှာ အနည်းငယ် ပြေလျော့သွားပြီး အမျိုးသမီး တစ်ဦး၏ နူးညံ့မှုများ ပေါ်ပေါက်လာသည်။ သူမက ပြုံး၍ ပြန်ပြောလိုက်သည်။

"နင် ဘယ်သူ့ဆီက ကြားလာတာလဲ။ သူက အားကစားလုပ်ရတာကို လုံးဝ မကြိုက်ဘူးလေ”

"ဘယ်လိုဖြစ်လို့လဲ” ဟောက်ယွမ်ရွေ့က အံ့ဩဟန်ဖြင့် မေးလိုက်သည်။

"သူက လက်ဝှေ့ထိုးတာကို တော်တော် ဝါသနာပါတာလေ။ ငါ ကြားတာတော့ တုသခင်လေးက ရှန်ယို့ယောင်ကို ကြွေသွားတာက သူတို့ အတူတူ လက်ဝှေ့သွားကြည့်တုန်းကလို့ သိထားတာ။ ဒါမှမဟုတ် အဲဒီနောက်ပိုင်းမှပဲ သူက လက်ဝှေ့ကို စပြီး ကြိုက်လာတာလား”

[ငါ့မှာ ကြောက်စရာကောင်းတဲ့ အတွေးတစ်ခု ပေါ်လာပြီ...]

[ငါ ထင်နေတဲ့အတိုင်းများလား?]

[ရှကျွင်းချီကလည်း ရှန်ယို့ယောင်ကို ကြိုက်နေတာလား၊ ဖန်ခယ်က ကိုယ်ပွားလေးများလား]

[အချိန်တွေကို ပြန်တွက်ကြည့်ရအောင်။ ဖြစ်နိုင်ခြေ အများကြီး ရှိတယ်နော်။ တုသခင်လေးနဲ့ ရှကျွင်းချီတို့ အတူတူ ရှန်ယို့ယောင် လက်ဝှေ့ထိုးတာကို မြင်ပြီး နှစ်ယောက်လုံး ကြွေသွားကြတာ။ အမှန်အတိုင်း ပြောရရင် ငါလည်း မြင်ရင် ကြွေသွားမှာပဲ။ ဒါပေမဲ့ တုသခင်လေးက လက်ဦးမှု ယူပြီးတော့ ချက်ချင်း ဖွင့်ပြော၊ လက်မှတ်ထိုးလိုက်တာပေါ့။ ဒါက လှည့်ကွက်တစ်ခုများလား... ရှကျွင်းချီလည်း ရှန်ယို့ယောင်ကို ကြိုက်နေတာ သိသွားလို့ သူများထက် အရင် လက်ဦးမှု ယူလိုက်တာလား။ ရည်းစားဆိုရင် လမ်းခွဲလို့ ရသေးတယ်လေ၊ လက်ထပ်လိုက်ရင်တော့ လမ်းခွဲဖို့ ပိုခက်သွားပြီ မဟုတ်လား။ ဒါကြောင့်လည်း သူက ဒီလောက် မြန်မြန် လက်ထပ်လိုက်တာ ဖြစ်မှာပေါ့]

[ဒီနေ့ မနက် သူတို့ နှစ်ယောက် လက်ဝှေ့ထိုးတဲ့ ပုံစံကို ယှဉ်ကြည့်ဦး၊ တကယ့်ကို တူနေတာပဲ...]

[အမလေး... ဘယ်လိုတွေတောင် ရှုပ်ထွေးကုန်တာလဲ]

တိုက်ရိုက်ထုတ်လွှင့်မှုအတွင်း ရှိနေသူများမှာ အွန်လိုင်းမှ မှတ်ချက်များကို ကြည့်ခွင့် မရှိသဖြင့် တုဇယ်ချန်းနှင့် ဖန်ခယ်တို့မှာ ပရိသတ်များကြားတွင် ဆူညံနေသည်ကို မသိရှိကြပေ။

ချန်ရွေ့ကမူ အစပျိုးမှု လုပ်ပြီးနောက် စကားလမ်းကြောင်း ပြောင်းကာ တုဇယ်ချန်းအား မေးလိုက်သည်။

"ဒီနေ့ ရှယ်ယာရှင်တွေနဲ့ ဆွေးနွေးတာ ဘယ်လိုနေလဲ”

တုဇယ်ချန်းက ဘာမှ ပြန်မပြောပေ။ သူ၏ မျက်နှာထားကို ကြည့်ရုံနှင့် ရလဒ်မှာ များစွာ မကောင်းလှကြောင်း သိသာလှသည်။

ချန်ရွေ့က သက်ပြင်းချလျက် ပြောလိုက်သည်။ "ဘာလို့ ငါ သင်ပေးတဲ့ နည်းလမ်းတွေကို မစမ်းကြည့်တာလဲ”

ပရိသတ်များမှာလည်း တုဇယ်ချန်းနှင့် ရှယ်ယာရှင်များကြားမှ တင်းမာမှုကို ကြည့်ရင်း စိတ်မရှည် ဖြစ်လာကြသည်။ သူတို့ အလိုရှိသည်မှာ ငွေရှာသည့် နည်းလမ်းကောင်းများ သို့မဟုတ် ဥက္ကဋ္ဌ တစ်ဦး၏ အစွမ်းအစများကို မြင်တွေ့ချင်ခြင်းသာ ဖြစ်သည်။ ယခုကဲ့သို့ အရာရာ အကျပ်ရိုက်နေသည်ကို မကြည့်ချင်ကြတော့ပေ။

[ဘာလို့ ချန်သခင်မလေးရဲ့ စကားကို နားမထောင်တာလဲ။ သူက စေတနာနဲ့ အကြံပေးနေတာကို၊ ဘာလို့ လက်မခံရတာလဲ]

[မာနကြီးလို့ ဖြစ်မှာပေါ့၊ ဒါမှမဟုတ် ခေါင်းမာလို့လား။ သူများရဲ့ ညွှန်ကြားမှုကို မခံချင်တဲ့ စရိုက်မျိုးတွေ အပြင်မှာလည်း အများကြီး ရှိတာပဲလေ]

[ဖြစ်နိုင်တာပဲ။ သူက သူများအပေါ် အမြဲ အာဏာပြလာခဲ့တဲ့သူဆိုတော့၊ သူတစ်ပါးက သူ့ကို လာပြောတာကို လက်မခံနိုင်တာ ဖြစ်မှာပါ]

[ဒါပေမဲ့ အဲဒီလို ခေါင်းမာနေတာက အလုပ်တွေကို နှောင့်နှေးစေတယ်လေ။ ချန်ရွေ့နဲ့ ဟောက်ယွမ်ရွေ့ တို့ရဲ့ ပရောဂျက်ကတော့ အောင်မြင်နေပြီ။ ဘာလဲဆိုတာ မသိရသေးပေမဲ့၊ ချန်ရွေ့ ဒီနေ့ သွားပြီး ဆွေးနွေးတာတော့ တော်တော်လေး အဆင်ပြေပုံ ရတယ်]

[အခု ကြည့်ရတာတော့ ဟောက်ယွမ်ရွေ့ကမှ တကယ့် ဥက္ကဋ္ဌ ပုံစံပေါ့။ သူတို့ ပရောဂျက်က ရှရှီ က ကစားကွင်းနဲ့ ပတ်သက်နေပုံ ရတယ်။ ဒီနေ့ သူ အဲဒီကို သွားတော့ အမှုဆောင်ကြီးတွေ အားလုံးက ထွက်ကြိုကြတာ၊ တကယ့်ကို ခန့်ညားလိုက်တာ]

[ဟုတ်တာပေါ့၊ အဖွဲ့သားတွေ အားလုံးက စိတ်တူကိုယ်တူ ပူးပေါင်းလုပ်ဆောင်မှ တကယ့် အဖွဲ့အစည်း ဆိုတာမျိုးပေါ့]

[ဟူး... ဒီလို ယှဉ်ကြည့်လိုက်တော့၊ တုသခင်လေးက အနုပညာရှင်ပဲ ပြန်လုပ်တာ ပိုကောင်းမလားလို့ တွေးမိတယ်။ ဥက္ကဋ္ဌ လုပ်ဖို့ကျတော့ နည်းနည်းတော့...]

ပရိသတ်များက ဟောက်ယွမ်ရွေ့နှင့် တုဇယ်ချန်းကို အဘက်ဘက်မှ နှိုင်းယှဉ်ကာ တုဇယ်ချန်းအား နှိမ်ချနေစဉ်မှာပင် ဟောက်ယွမ်ရွေ့ ကိုယ်တိုင် တည်ထောင်ထားသော ယွမ်ရှန်းတွင် ပြဿနာတစ်ခု ရုတ်တရက် ပေါ်ပေါက်လာခဲ့သည်။

ထိုစဉ်က ဟောက်ယွမ်ရွေ့သည် ကစားကွင်း တာဝန်ခံနှင့် စကားပြောနေစဉ် ဖုန်းဝင်လာသဖြင့် ကိုင်လိုက်ရာ မျက်နှာမှာ ချက်ချင်းပင် ပျက်ယွင်းသွားတော့သည်။ လူတိုင်းက ဘာဖြစ်သနည်းဟု စူးစမ်းနေစဉ်မှာပင် သတင်းမီဒီယာများ၌ သတင်းတစ်ခု တက်လာခဲ့သည်။

" 'ယွမ်ရှန်း' တွင် သက်တမ်းကုန်ပြီး ပုပ်သိုးနေသော စားသောက်ကုန်များကြောင့် စားသုံးသူများ အစာဆိပ်သင့်မှု ဖြစ်ပွား”

ယွမ်ရှန်းဆိုသည်မှာ ဟောက်ယွမ်ရွေ့ ကိုယ်တိုင် တည်ထောင်ထားသော လတ်ဆတ်သော စားသောက်ကုန် အရောင်းဆိုင်ခွဲများ ဖြစ်သည်။ လတ်ဆတ်မှု၊ ဘေးကင်းမှုနှင့် ကျန်းမာရေးကို အဓိက ဦးစားပေးသည်ဟု ကြေညာထားပြီး လက်ရှိတွင် ယန်မြို့၌ ဆိုင်ခွဲ ၁၅ ဆိုင် ဖွင့်လှစ်ထားပြီး ဖြစ်သည်။ ယခုအခါ စားသုံးသူတစ်ဦးမှာ ဗိုက်နာသဖြင့် ဆေးစစ်ချက် မှတ်တမ်းကို ကိုင်ဆောင်ကာ ဆိုင်တွင် ပြဿနာ လာရှာနေခြင်း ဖြစ်သည်။

အစီအစဉ်အဖွဲ့မှ လူများက ဤသည်မှာ ကုမ္ပဏီ၏ လျှို့ဝှက်ချက် ဖြစ်သဖြင့် ကင်မရာကို ပိတ်ရမလားဟု စဉ်းစားနေစဉ် ဟောက်ယွမ်ရွေ့သည် မိမိကိုယ်မိမိ ယုံကြည်မှု ရှိလွန်းသဖြင့် ကင်မရာကို မရှောင်ဘဲ တာဝန်ခံ၏ ဖုန်းကို လူအများရှေ့တွင် ကိုင်လိုက်လေသည်။

"ဥက္ကဋ္ဌဟောက်... သတင်း ထွက်လာတာနဲ့ စားသုံးသူ အားလုံး ဆိုင်ထဲကနေ ပြန်ထွက်သွားကြပြီဗျ”

တာဝန်ခံ၏ အသံမှာ အလွန်ပင် စိုးရိမ်နေပုံ ရသည်။ စားသောက်ကုန် ဆိုသည်မှာ အခြားသော ပစ္စည်းများကဲ့သို့ သိုလှောင်ထား၍ မရပေ။ ယွမ်ရှန်း၏ ပစ္စည်းအများစုမှာ နေ့ချင်းသွင်း နေ့ချင်းရောင်း ဖြစ်သဖြင့် အကယ်၍ ဝယ်သူ မရှိပါက ပစ္စည်း တစ်ဝက်ကျော်မှာ အလဟဿ ဖြစ်သွားပေလိမ့်မည်။ ဆိုင်တစ်ဆိုင်တည်း မဟုတ်ဘဲ ၁၅ ဆိုင်လုံးတွင် ထိုသို့ ဖြစ်နေပါက ဆုံးရှုံးမှုမှာ အလွန်ပင် ကြီးမားလှသည်။

ထို့ပြင် စားသောက်ကုန် လုပ်ငန်းမှာ လည်ပတ်မှု မြန်ဆန်လှသဖြင့် နောက်တစ်နေ့အတွက် ပစ္စည်းဝယ်ယူရန် ယမန်နေ့က ရောင်းရငွေကိုသာ အားကိုးနေရခြင်း ဖြစ်သည်။ ယခုကဲ့သို့ ဆုံးရှုံးမှု ကြုံတွေ့ရပါက နောက်ထပ် ပစ္စည်းဝယ်ရန် ငွေကြေး အခက်အခဲပါ ကြုံတွေ့လာရတော့မည် ဖြစ်သည်။

ကြောက်ရသည့်အရာမှာ အမှန်တကယ်ပင် ဖြစ်လာတော့သည်။ တစ်ဖက်မှ တာဝန်ခံသည် အောက်ခြေမှ တင်ပြချက်များကို နားထောင်ပြီးနောက် ဆက်လက်၍ တင်ပြလာပြန်သည်။

"ကုန်ပစ္စည်းပေးသွင်းသူ အချို့ကလည်း ကုန်ဖိုးငွေတွေ ပေးချေဖို့ ဖုန်းဆက်ပြီး လာတောင်းနေကြပြီဗျ..."

ဟောက်ယွမ်ရွေ့က ပြောလိုက်သည်။ "အရင်ဆုံး အရန်ရန်ပုံငွေကို ထုတ်သုံးလိုက်ပါ”

တာဝန်ခံက ပြန်ပြောလိုက်သည်။ "ကျွန်တော်တို့ရဲ့ အရန်ရန်ပုံငွေက ဆိုင်ခွဲ သုံးဆိုင်လောက်မှာ ပြဿနာတက်ရင် သုံးဖို့အတွက်ပဲ ပြင်ထားတာလေ။ အခု ဆိုင်ခွဲ ၁၅ ဆိုင်လုံး ဆိုရင်တော့..."

ဟောက်ယွမ်ရွေ့သည် မျက်မှောင်ကို တင်းကျပ်စွာ ကြုတ်လိုက်မိသည်။

"အရင်ဆုံး ငွေအချို့ကို အပိုင်းလိုက် ခွဲပေးလိုက်ပါ၊ သူတို့ကို နှစ်ရက်လောက် အချိန်တိုးပေးဖို့ ပြောလိုက်။ မနက်ဖြန်လည်း ပစ္စည်းတွေ ဆက်သွင်းခိုင်း၊ ဒါပေမဲ့ အရေအတွက်ကိုတော့ သုံးပုံတစ်ပုံလောက်အထိ လျှော့ချလိုက်။ ကျန်တာကိုတော့ ငါ ကိုယ်တိုင် လာကြည့်ပြီးမှ ဆုံးဖြတ်မယ်”

ဟောက်ယွမ်ရွေ့ ဖုန်းချလိုက်သည်နှင့် ဇနီးဖြစ်သူ ကန်းရှီးလန်ထံမှ ဖုန်းဝင်လာခဲ့သည်။

…