အခန်း ၇၉

အခန်း (၇၉)

တုဇယ်ချန်းတို့ အိပ်ရာဝင်ချိန်တွင်မူ အချိန် ၁၂ နာရီ ခြားနားနေသော ကနေဒါနိုင်ငံ၌ နံနက်ဦးယံ အချိန်သို့ ရောက်ရှိနေပြီ ဖြစ်သည်။ ထန်ရွှမ်သည် အပန်းဖြေ ထိုင်ခုံပေါ်တွင် အေးအေးဆေးဆေး လှဲလျောင်းရင်း tablet မှတစ်ဆင့် လွန်ခဲ့သော ရက်အနည်းငယ်အတွင်း ဖြစ်ပျက်ခဲ့သမျှကို ကြည့်ရှုနေသည်။ တုဇယ်ချန်း၏ ပြောင်းလဲလာသော အပြုအမူများကို မြင်တွေ့ရသောအခါ သူမ၏ မျက်နှာတွင် ကြည်နူးရိပ်များ လွှမ်းခြုံသွားပြီး ပြောလိုက်သည်။ "ဒီကောင်လေးလည်း နောက်ဆုံးတော့ လူကြီးဖြစ်လာပြီပဲ”

တိုက်ရိုက်ထုတ်လွှင့်မှုအတွင်းမှ ဖျက်လိုဖျက်ဆီး ပြောဆိုနေသူများကို ပြန်လည် တုံ့ပြန်ရန် ပြင်လိုက်စဉ်မှာပင် ဘေးခန်းရှိ လင်မယား နှစ်ဦး ထပ်မံ ရန်ဖြစ်သံကို ကြားလိုက်ရပြန်သည်။

"ရှန်တာ့ဟန် ရှင်နဲ့ ကျွန်မ ကွာရှင်းမယ်။ ကျွန်မ ဘာလို့ ဒီလောက်တောင် ကံဆိုးနေရတာလဲ၊ ဘဝဆက်တိုင်း ရှင့်ကို ရှောင်လို့ မရနိုင်တော့ဘူးလား "

"တခြား ဘာမဆို လိုက်လျောနိုင်ပေမဲ့ ဒီကိစ္စ တစ်ခုကိုတော့ ငါ လုံးဝ သဘောမတူနိုင်ဘူး”

ဇနီးဖြစ်သူက အေးစက်သော လေသံဖြင့် ပြောလိုက်သည်။ "ကောင်းပြီလေ။ ကျွန်မရဲ့ ယောင်ယောင်လေးကို ပြန်ပေးနိုင်ရင်တော့ ကျွန်မ ရှင့်ကို ကွာမှာ မဟုတ်ဘူး”

ခင်ပွန်းဖြစ်သူမှာမူ ရုတ်တရက် တိတ်ဆိတ်သွားတော့သည်။

ထန်ရွှမ်သည် တိတ်တဆိတ် သက်ပြင်းချလိုက်မိသည်။ ဘေးခန်းတွင် နေထိုင်သော ထိုလင်မယား နှစ်ဦးအနက် ဇနီးဖြစ်သူမှာ နိုင်ငံတကာ ရုပ်ရှင်ထူးချွန်ဆုရှင် တစ်ဦးဖြစ်ပြီး ခင်ပွန်းဖြစ်သူမှာမူ မိုမား စီးပွားရေးလုပ်ငန်းစုကြီး၏ တရုတ်လူမျိုး ရှန်မိသားစု မှ သားကြီး ဖြစ်သည်။ ဤသခင်လေးသည် ငယ်စဉ်ကတည်းက ထူးခြားသော ပါရမီ ရှိသော်လည်း စီးပွားရေးကို စိတ်မဝင်စားဘဲ လက်ဝှေ့ထိုးခြင်းကိုသာ ဝါသနာပါခဲ့သူ ဖြစ်သည်။ သူသည် လွန်ခဲ့သော နှစ်ပေါင်း ၂၀ က UFC လောက၏ မိုမား အာဏာရှင်ဟု ကျော်ကြားခဲ့သော ကမ္ဘာ့လက်ဝှေ့ချန်ပီယံ တစ်ဦးပင် ဖြစ်သည်။

အစပိုင်းတွင် ထိုနှစ်ဦးမှာ အသက် ၄၀-၅၀ အရွယ်အထိ အလွန် ချစ်ခင်ကြသည်ဟု ကြားဖူးသော်လည်း မကြာသေးခင်ကမှ သမီးဖြစ်သူ ပျောက်ဆုံးသွားသည့် ကိစ္စကြောင့် အကြီးအကျယ် ပြဿနာ တက်နေကြခြင်း ဖြစ်သည်။

သို့သော် ရက်ပေါင်းများစွာ ရန်ဖြစ်နေကြသည်ကို နားထောင်သော်လည်း သမီးဖြစ်သူမှာ သေဆုံးသွားခြင်းလား၊ အခိုးခံရခြင်းလား သို့မဟုတ် အကြောင်းမဲ့ ပျောက်ဆုံးသွားခြင်းလား ဆိုသည်ကိုမူ ထန်ရွှမ် သေချာ မသိရသေးပေ။

သူမ တွေးနေစဉ်မှာပင် ဘေးခန်းတံခါး ပွင့်သွားပြီး မိန်းမလှတစ်ဦးသည် မျက်လုံးများ နီရဲလျက် အပြင်သို့ ပြေးထွက်သွားသည်။ မကြာမီမှာပင် အရပ်ရှည်ရှည်နှင့် အမျိုးသား တစ်ဦးသည်လည်း သူမ၏ အနောက်မှ အပြေးအလွှား လိုက်ပါသွားတော့သည်။

ထန်ရွှမ်သည် ခေါင်းခါလျက် အကြည့်များကို ဖုန်းမျက်နှာပြင်ထံသို့ ပြန်လွှဲလိုက်သည်။ သူမ သားဖြစ်သူ၏ တကယ့် စစ်ပွဲကြီးမှာ ယခုမှ စတင်တော့မည် မဟုတ်ပါလား။

မှန်သည့်အတိုင်းပင်၊ နောက်တစ်နေ့၌ တုဇယ်ချန်းကဲ့သို့ပင် အကျပ်အတည်း ဆိုက်နေသော ဟောက်ယွမ်ရွေ့သည် လှပသော အောင်ပွဲတစ်ခုကို ရယူနိုင်ခဲ့သည်။

အဖြစ်မှန်ကို အချိန်မီ ရှင်းလင်းနိုင်ခဲ့သော်လည်း ယွမ်ရှန်း၏ ယုံကြည်မှုမှာ အကြီးအကျယ် ထိခိုက်ခဲ့ရပြီး၊ ဆိုင်ခွဲတိုင်းတွင် ဝယ်သူ မရှိသလောက်ပင် ဖြစ်နေခဲ့သည်။

ဟောက်ယွမ်ရွေ့ တစ်နေကုန် စိတ်ညစ်နေစဉ် ညနေပိုင်းတွင် ဇနီးဖြစ်သူ ကန်းရှီးလန်သည် တက်ကြွစွာဖြင့် သူ့ထံသို့ ရောက်လာခဲ့သည်။

သူမကို မြင်လိုက်ရချိန်တွင် ဟောက်ယွမ်ရွေ့၏ မျက်နှာတွင် အလိုအလျောက် အပြုံးတစ်ခု ပေါ်လာပြီး ပြောလိုက်သည်။ "မင်းမှာ နည်းလမ်း ရှိလိမ့်မယ်လို့ ငါ ယုံကြည်ပြီးသားပါ”

ကန်းရှီးလန်က ဂုဏ်ယူစွာဖြင့် မေးလိုက်သည်။ "ဒါပေါ့... ငါ ကိုယ်တိုင် ပါဝင်မှတော့ မအောင်မြင်တဲ့ ကိစ္စ ရှိလို့လား။ အမြန် ပြင်ဆင်ကြရအောင်”

ဟောက်ယွမ်ရွေ့နှင့် ကန်းရှီးလန်တို့သည် တစ်ညလုံး မအိပ်ဘဲ အလုပ်လုပ်ခဲ့ကြပြီး နောက်တစ်နေ့တွင် ယွမ်ရှန်း ဆိုင်ခွဲများ၌ ကြီးကြပ်မှု ဆုကြေး တစ်ခုကို သတ်မှတ်လိုက်သည်။ ၎င်းမှာ ယွမ်ရှန်း စူပါမားကတ်များအတွင်း၌ အတုအပ ပစ္စည်း သို့မဟုတ် သက်တမ်းကုန် ပစ္စည်း တစ်ခုခုကို ရှာဖွေတွေ့ရှိသူ မည်သည့် စားသုံးသူကိုမဆို ငွေသား ယွမ်တစ်ထောင် ချက်ချင်း ဆုချမည်ဟူ၍ ဖြစ်သည်။

ဤသတင်းသည် ယွမ်ရှန်း ပြဿနာတက်နေချိန်နှင့် တိုက်ဆိုင်နေသဖြင့် လူအများ၏ အာရုံစိုက်မှုကို ချက်ချင်း ရရှိခဲ့ပြီး၊ ထိုညမှာပင် ဆိုင်များအတွင်း၌ ဝယ်သူများဖြင့် ပြန်လည် စည်ကားလာတော့သည်။

ဆုကြေးကို မျှော်ကိုး၍ လာရောက်ရှာဖွေသူများမှာ ပစ္စည်းများ၏ အရည်အသွေး ကောင်းမွန်သည်ကို တွေ့ရသောအခါ အပြန်တွင် ပစ္စည်းအချို့ကို ဝယ်ယူသွားကြသည်။ အချို့သော လူများကမူ ဤကဲ့သို့ ကြေညာရဲသည်မှာ မိမိကိုယ်မိမိ အကြွင်းမဲ့ ယုံကြည်မှု ရှိသောကြောင့် ဖြစ်ရမည်ဟု ယူဆကာ ပစ္စည်းများ၏ ရက်စွဲနှင့် လတ်ဆတ်မှုကို စစ်ဆေးကြည့်ပြီးနောက် စိတ်ချလက်ချဖြင့် ယွမ်ရှန်း၏ ပုံမှန်ဖောက်သည်များ ဖြစ်သွားကြတော့သည်။

ဤနည်းလမ်းမှာ ရိုးရှင်းသော်လည်း တကယ့်ကို ထိရောက်သော ပြည်သူ့ဆက်ဆံရေး စစ်ပွဲတစ်ခု ဖြစ်ခဲ့သည်။ တိုက်ရိုက်ထုတ်လွှင့်မှု၏ အရှိန်အဝါကြောင့်လည်း ယွမ်ရှန်း ၏ နာမည်ဂုဏ်သတင်းမှာ အရင်ကထက် ပိုမို မြင့်မားသွားခဲ့ရာ၊ ဟောက်ယွမ်ရွေ့သည် နောက်ထပ် ဆိုင်ခွဲသစ်များ ဖွင့်လှစ်ရန်ပင် စတင် ပြင်ဆင်နေပြီ ဖြစ်သည်။

[အဆင့်အတန်းတူသူချင်း လက်ထပ်တာက တကယ်ကို အဓိပ္ပာယ် ရှိတာပဲ။ ကန်းရှီးလန်လို အမျိုးသမီးမျိုးကမှ တကယ့် ခင်ပွန်းကို ကူညီနိုင်တဲ့ ဇနီးကောင်းပေါ့။]

[ဒီလို ယှဉ်ကြည့်လိုက်ရင် ရှန်ယို့ယောင်ကတော့ တကယ်ကို မပြည့်စုံဘူးပဲ။ တုသခင်လေး ဒီလောက် ခက်ခဲနေတာကို သူက ဘေးမှာ နေပေးရုံကလွဲလို့ ဘာမှ မလုပ်ပေးနိုင်ဘူး။ ချန်ရွေ့တောင်မှ အကြံဉာဏ်တွေ ပေးနိုင်သေးတယ်လေ။]

[တုသခင်လေးတော့ သွားပြီလို့ပဲ ငါ ထင်မိတယ်။]

ပရိသတ်များ၏ ခန့်မှန်းချက်များအတိုင်းပင် တုဇယ်ချန်း၏ အခြေအနေမှာ တိုးတက်မှု မရှိသည့်အပြင် ကြီးမားသော အကျပ်အတည်းတစ်ခုနှင့် ထပ်မံ ရင်ဆိုင်လိုက်ရသည်။

ရှန့်လန်ဝမ် ပရောဂျက်၏ အထွေထွေတာဝန်ခံ မန်နေဂျာကျန့်သည် တိုက်ရိုက်ထုတ်လွှင့်နေသည်ကိုပင် ဂရုမစိုက်ဘဲ ဥက္ကဋ္ဌရုံးခန်းသို့ တိုက်ရိုက် ဝင်ရောက်လာကာ တုဇယ်ချန်းထံ အလုပ်ထွက်စာ တင်လိုက်သည်။ "ဥက္ကဋ္ဌလေးတုက ကိုယ့်သဘောအတိုင်းပဲ ဇွတ်လုပ်နေမယ် ဆိုရင်တော့... ကျွန်တော် ဆက်ပြီး အဖော်မလုပ်နိုင်တော့ပါဘူး”

တုဇယ်ချန်းသည် ဤသို့ ဖြစ်လာမည်ကို မမျှော်လင့်ထားသည့်အလား မော့ကြည့်ကာ မေးလိုက်သည်။

"ဒါ ငါ့ကို ခြိမ်းခြောက်နေတာလား”

မန်နေဂျာကျန့်က ပင်ပန်းနွမ်းလျဟန်ဖြင့် ပြန်ပြောလိုက်သည်။ "မဟုတ်ပါဘူး... ကျွန်တော့်အနေနဲ့ ဒီလောက်ကြီးတဲ့ တာဝန်ကို မထမ်းဆောင်နိုင်တော့လို့ပါ”

တုဇယ်ချန်း၏ လေသံမှာ အနည်းငယ် ပြေလျော့သွားပြီး သူ့အား ဖျောင်းဖျသည့် အသွင်ဖြင့် ပြောလိုက်သည်။ "အရာရာကို ငါ တာဝန်ယူပါ့မယ်လို့ ပြောထားသားနဲ့”

မန်နေဂျာကျန့်က ပို၍ပင် စိတ်ပျက်ဟန်ဖြင့် ပြောလိုက်သည်။ "ဥက္ကဋ္ဌလေး... ဒီကိစ္စရဲ့ နောက်ဆက်တွဲ ဆိုးကျိုးတွေကို မင်း သိရဲ့လား။ ဒီတာဝန်ဆိုတာ ခင်ဗျား တာဝန်ယူချင်တိုင်း ယူလို့ရတဲ့ အရာ မဟုတ်ဘူးလေ။ ဘယ်လိုနည်းနဲ့ တာဝန်ယူမှာလဲ”

ဒါသည် သူ့အား အပြစ်ဝန်ခံကာ ရာထူးမှ နုတ်ထွက်သွားအောင် တွန်းပို့နေခြင်းလား။ တုဇယ်ချန်းက သက်ပြင်းချလျက် မေးလိုက်သည်။

"ဒါဆို မန်နေဂျာကျန့်က အလုပ်ထွက်ဖို့ကို တကယ်ပဲ ဆုံးဖြတ်လိုက်ပြီပေါ့လေ"

မန်နေဂျာကျန့်မှာ ခေတ္တ ကြောင်သွားရသည်။ တုဇယ်ချန်းက တာဝန်ယူမည့် အကြောင်းကို ဆက်မပြောဘဲ သူ့ကိုသာ အကျပ်ရိုက်အောင် ပြန်မေးနေသောကြောင့် ဖြစ်သည်။ သူ ဆက်ပြီး မေးမြန်းနေပါကလည်း သူကပင် အနိုင်ကျင့်နေသကဲ့သို့ ဖြစ်နေမည် မဟုတ်ပါလား။

တုဇယ်ချန်း မည်မျှပင် အစွမ်းမရှိသူ ဖြစ်စေကာမူ သူသည် လူသိရှင်ကြား ရိုင်းစိုင်းသော အပြုအမူမျိုးကို မပြရဲပေ။ ထို့ပြင်... ရှယ်ယာရှင်များ၏ အစီအစဉ်ကို သတိရကာ တုဇယ်ချန်းသည် သူ့ကို လွှတ်ပေးရဲမည် မဟုတ်ဟု ယုံကြည်လျက် ခေါင်းညိတ်ပြလိုက်သည်။

"ဥက္ကဋ္ဌလေးက ခင်ဗျားသဘောအတိုင်းပဲ ဆက်လုပ်နေမယ် ဆိုရင်တော့ဗျာ”

တုဇယ်ချန်းက သက်ပြင်းကို အရှည်ကြီး ချလိုက်ပြီး ပင်ပန်းနွမ်းလျသော မျက်နှာထားဖြင့် ပြောလိုက်သည်။ "ကောင်းပြီလေ... ငါ သိပြီ။ အလုပ်ထွက်ဖို့ စာတင်လိုက်ပါတော့”

မန်နေဂျာကျန့်မှာ မှင်တက်သွားရသည်။ တုဇယ်ချန်းက ဤကဲ့သို့ ဆုံးဖြတ်လိမ့်မည်ဟု သူ ထင်မထားခဲ့ပေ။ သို့သော် သူကိုယ်တိုင်က လူအများရှေ့တွင် ပြတ်သားသော စကားများ ပြောဆိုထားခဲ့ပြီး ဖြစ်ရာ ယခုအခါ ပြန်လည် ရုပ်သိမ်းရန်မှာ မဖြစ်နိုင်တော့ပေ။

[ခြိမ်းခြောက်တာ မဟုတ်ဘူးလို့ ပြောပြီးတော့... သူ့မျက်နှာကို ကြည့်ဦး၊ ဟားဟားဟား။]

[ဇာတ်လမ်း အစအဆုံး မသိရင်တော့ ဒီအခန်းက တော်တော်လေး ကျေနပ်စရာ ကောင်းပါတယ်။ ဒါပေမဲ့ တုသခင်လေး လုပ်တာကတော့ လုံးဝ မမှန်ဘူးနော်။]

[လုပ်ငန်းစုကြီး တစ်ခုဆိုတာ လူတစ်ယောက်တည်းရဲ့ ကိစ္စမှ မဟုတ်တာ။ သူက ဘာလို့ ဒီလောက်အထိ ထင်ရာစိုင်းနေရတာလဲ။]

[ရှေးခေတ်က ဧကရာဇ်တွေတောင် အမတ်တွေရဲ့ စကားကို နားထောင်ရတာလေ။ ဘယ်သူ့စကားမှ နားမထောင်တဲ့သူကတော့ မင်းဆိုးမင်းညစ်ပဲ ဖြစ်ရမှာပေါ့။]

တိုက်ရိုက်ထုတ်လွှင့်မှု၏ တုံ့ပြန်ချက်များကို ကြည့်ခွင့်မရှိသော်လည်း ချန်ရွေ့သည် မိမိ၏ ရည်ရွယ်ချက်အတွက် ထန်မိသားစု၏ အခြေအနေကို အမြဲ စောင့်ကြည့်နေခဲ့သည်။ တုဇယ်ချန်း၏ မိုက်မဲသော လုပ်ရပ်ကို သိလိုက်ရသည်နှင့် သူမသည် ချက်ချင်းပင် ချန်ရှီး အဆောက်အဦသို့ ရောက်ရှိလာခဲ့သည်။ သူမသည် သူငယ်ချင်း တစ်ဦးပမာ စိုးရိမ်ဟန်ဆောင်ကာ အခြေအနေများကို စူးစမ်းနေတော့သည်။

သူမ ရောက်ရှိချိန်တွင် တုဇယ်ချန်းက မန်နေဂျာကျန့်၏ အလုပ်ထွက်စာပေါ်တွင် လက်မှတ်ထိုးရန် ပြင်နေသည်ကို တွေ့လိုက်ရသဖြင့် အမြန် တားဆီးလိုက်သည်။

"ဇယ်ချန်း... နင် ဒီလို မလုပ်သင့်ဘူး”

"ဒါက လူတစ်ယောက်ကို အလုပ်ထုတ်တဲ့ ကိစ္စတင် မဟုတ်ဘူးလေ။ မန်နေဂျာကျန့်က ထန်မိသားစုရဲ့ ကျေးဇူးရှင် တစ်ယောက်ပဲ။ နင် ဒီလို လုပ်လိုက်ရင် ကျန်တဲ့သူတွေပါ စိတ်ပျက်ကုန်ကြလိမ့်မယ်”

တုဇယ်ချန်းက သူမ၏ စကားကို နားမထောင်သည်ကို မြင်သောအခါ ချန်ရွေ့သည် ရှန်ယို့ယောင်ဘက်သို့ လှည့်ကာ တိုက်ခိုက်လေတော့သည်။

"ဇယ်ချန်းက နင့်စကားဆိုရင် နားထောင်တာပဲလေ၊ ဘာလို့ သူ့ကို မတားတာလဲ။ သူက ဒေါသထွက်နေလို့ စိတ်မတည်ငြိမ် ဖြစ်နေတာလေ၊ နင်က စိတ်ထားကောင်းပြီး အမြဲတမ်း တည်ငြိမ်နေတဲ့သူ ဆိုရင် ဘာလို့ သူ့ကို မဖျောင်းဖျတာလဲ”

"ဒါမှမဟုတ် နင်က သူ့ဘေးမှာ နေပေးရုံကလွဲလို့ ဘာမှ မလုပ်တတ်တာလား”

[ဟုတ်သားပဲ၊ သူက တုသခင်လေးဘေးမှာ နေပေးရုံကလွဲလို့ ဘာမှ မလုပ်တတ်ဘူးလေ။]

[အကြွင်းမဲ့ ထောက်ခံပေးတာက ကောင်းပါတယ်၊ ဒါပေမဲ့ မှားနေတဲ့ ကိစ္စကိုတော့ တားဆီးသင့်တာပေါ့။]

[ကြည့်ရတာ ရှန်ယို့ယောင်က တုဇယ်ချန်းကို အလိုလိုက်ပြီး ပျော်အောင်ပဲ ထားနိုင်တဲ့သူပေါ့။ အခုက မင်္ဂလာဦး အချိန်မို့လို့ သခင်လေးက သူ့ကို အလိုလိုက်နေတာ ဖြစ်ပေမဲ့ တစ်သက်လုံးတော့ ဒီလို ရှိနေမှာ မဟုတ်ဘူး။]

[ဟဲဟဲ... တစ်သက်လုံး ထားပါဦး၊ အခု အခြေအနေနဲ့ဆို တစ်နှစ်တောင် ခံပါ့မလား။ တုဇယ်ချန်းသာ ဒီဘေးဒုက္ခကို မကျော်ဖြတ်နိုင်ဘဲ ထန်မိသားစုရဲ့ အပြစ်သား ဖြစ်သွားရင် သူ့ကို ချစ်နိုင်ဦးမလား ကြည့်ရသေးတာပေါ့။]

[ဟောက်ယွမ်ရွေ့နဲ့ ကန်းသခင်မလေးတို့သာ မရှိရင် များစွာ မသိသာပေမဲ့၊ အခုလို ယှဉ်ကြည့်လိုက်တော့ ရှန်ယို့ယောင်က တကယ်ကို မယှဉ်နိုင်ဘူးပဲ။]

ရှန်ယို့ယောင်က ဒေါသထွက်နေသော ချန်ရွေ့ကို နားမလည်ဟန်ဖြင့် ကြည့်ကာ မေးလိုက်သည်။

"မိန်းကလေးချန်... ဒါက ကျွန်မတို့ ထန်မိသားစုရဲ့ ကိစ္စလေ။ ဇယ်ချန်းက ကျွန်မရဲ့ ခင်ပွန်းပါ၊ ရှင်က ဘာလို့ ကျွန်မထက် ပိုပြီး စိုးရိမ်နေရတာလဲ”

ချန်ရွေ့သည် သူမအား အသိဉာဏ် မရှိသူ တစ်ဦးပမာ ကြည့်ကာ ပြောလိုက်သည်။ "အခုက ဘယ်လို အခြေအနေ ရောက်နေပြီလဲ၊ နင်က ငါ့ကို ဒါတွေနဲ့ လာပြီး ရန်စနေသေးတာလား။ သူ ဒီလို လုပ်လိုက်လို့ ဘယ်လောက်အထိ ဆိုးကျိုးတွေ ဖြစ်လာမလဲဆိုတာ နင် သိရဲ့လား”

[သူ သိမှာ မဟုတ်ပါဘူး။]

[စကားမပြောနဲ့တော့၊ ချန်သခင်မလေးကတော့ ကျွဲပါးစောင်းတီးနေရသလိုပဲ။]

[ဒီလို ကြည့်ရင် လက်ထပ်တာဟာ အဆင့်အတန်းတူဖို့ တကယ် လိုတာပဲ။ ရှန်ယို့ယောင်လို လူမျိုးကတော့ စည်းစိမ်ရှိတဲ့ အချိန်ပဲ အတူနေလို့ ကောင်းမှာပါ။]

[ဒါနဲ့ တုသခင်လေးရဲ့ အဖေကော ဘယ်ရောက်နေလဲ။ သူက သခင်လေးကို အရမ်း ချစ်တာ မဟုတ်လား၊ ဒီလို အရေးကြီးတဲ့ အချိန်မှာ ဘာလို့ လာမကူတာလဲ။]

[ဟုတ်ပါပေ့၊ အဘိုးထန်က တုသခင်လေးကို ရှယ်ယာတွေ ပေးခဲ့တာ မှန်ပေမဲ့ ရှယ်ယာ ရှိတိုင်း စီမံခန့်ခွဲရမယ်လို့ မဆိုလိုဘူးလေ။ ဥက္ကဋ္ဌတုလို အတွေ့အကြုံ ရှိတဲ့သူကို အကူအညီ တောင်းလို့ ရတာပဲ။]

[အခုတော့ ကြည့်ရတာ တော်တော်လေး အနေရခက်စရာကြီး။]

[တုဇယ်ချန်း ထန်မိသားစုကို ဆက်ခံပြီးကတည်းက ဥက္ကဋ္ဌတု ပေါ်မလာတော့ဘူးနော်။ သူ့ရဲ့ သတင်းတွေက ယင်းဟောင် ကိစ္စတွေပဲ ရှိတော့တာ။]

[စဉ်းစားကြည့်ရင် ကြောက်စရာကြီးဗျ။]

[အဘိုးထန်က ဥက္ကဋ္ဌတုကို ကြိုတင် ကာကွယ်ထားခဲ့တာများလား။]

[အရင်က သတင်းတွေအရဆိုရင် ဥက္ကဋ္ဌတုမှာ တရားမဝင်သား ရှိတယ်ဆို... တုသခင်လေးရဲ့ ခြေထောက် ဒဏ်ရာကလည်း အဲဒီသားကြောင့်ဆိုပဲ...]

[အဲဒီလိုဆိုရင်တော့ ကာကွယ်တာက သဘာဝကျပါတယ်၊ ကျွန်တော်ဆိုရင်လည်း ကာကွယ်မှာပဲ။]

[အဘိုးထန်က ကာကွယ်တာ ထားပါဦး၊ ဥက္ကဋ္ဌတုက တုဇယ်ချန်းကို ချစ်တာတော့ အားလုံး အသိပဲလေ။ အခုလို အချိန်မှာတောင် အဖေ့ဆီ အကူအညီ မတောင်းဘဲ ကာကွယ်နေတာက... သူကိုယ်တိုင် အာဏာမက်ပြီး လူရာဝင်ချင်နေလို့များလား။]

[ဒါကတော့ လူသားသဘာဝပဲလေ၊ အာဏာသိမ်းချင်တဲ့ အိမ်ရှေ့မင်းသားကမှ တကယ့် အိမ်ရှေ့မင်းသားပေါ့။]

[ဒါပေမဲ့ ဘာမှမသိသေးတဲ့ အချိန်မှာတော့ တစ်ယောက်ယောက်ရဲ့ လမ်းညွှန်မှု လိုတာပေါ့။]

တုဇယ်ချန်းသည် အနုပညာလောကတွင် ကျင်လည်ခဲ့သူ ဖြစ်ရာ တိုက်ရိုက်ထုတ်လွှင့်မှုကို မကြည့်ရသော်လည်း ချန်ရွေ့နှင့် တုဟုန်ရိတို့ မိမိကို သိက္ခာချရန် ကြိုးစားမည့် အချိန်မှာ ယခုပင် ဖြစ်ကြောင်း သိရှိနေသည်။ ချန်ရွေ့၏ အခွင့်အရေးရှာတတ်ပုံနှင့် တုဟုန်ရိ၏ ကျွမ်းကျင်မှုများကို သူ ကောင်းစွာ သိသည်လေ။

သူတို့က မိမိကိုယ်မိမိ ဖော်ပြချင်နေမှတော့ သူကလည်း ကူညီပေးရုံသာ ရှိတော့သည်။

တုဇယ်ချန်းက ချန်ရွေ့ကို ကြည့်ကာ ပြောလိုက်သည်။

"ဒါ ငါတို့ ထန်မိသားစုရဲ့ ကိစ္စပါ။ ငါတို့က အခု အစီအစဉ် ရိုက်ကူးနေရင်းနဲ့ ပြိုင်ပွဲဝင်နေကြတာ မဟုတ်လား။ မင်းငါတို့ ကုမ္ပဏီကို နေ့တိုင်း လာနေဖို့ မလိုပါဘူး၊ တစ်လဆိုတဲ့ အချိန်က သိပ်မများဘူးနော်”

[ဟုတ်သားပဲ၊ တုသခင်လေး မပြောရင် သူတို့ ပြိုင်နေကြတာကို ငါ မေ့နေတော့မလို့။ အခု ကြည့်ရတာ သူက ချမ်းသာသူတို့၏ အရည်အချင်းကို ပြနေတာ မဟုတ်ဘဲ ချမ်းသာသူတို့၏ ပျက်စီးခြင်းကို ပြနေသလိုပဲ။]

ချန်ရွေ့က မျက်မှောင်ကြုတ်လျက် ပြောလိုက်သည်။ "ငါတို့က အနည်းဆုံးတော့ သူငယ်ချင်းတွေပဲလေ။ သူငယ်ချင်း တစ်ယောက်ရဲ့ အကြံကို နားထောင်ဖို့က အဲဒီလောက်တောင် ခက်ခဲနေလို့လား”

တုဇယ်ချန်းက သူမအား နားမလည်ဟန်ဖြင့် ကြည့်ကာ မေးလိုက်သည်။ "မင်း ပြောတာက အမြဲတမ်း မှန်နေမယ်လို့ ဘာလို့ ဒီလောက်အထိ ယုံကြည်နေရတာလဲ”

[သူ မှန်မမှန်တော့ မသိဘူး၊ ဒါပေမဲ့ တုသခင်လေး နင်ကတော့ မှားနေတာ သေချာတယ်။]

[တကယ်ကို စိတ်ပျက်ဖို့ ကောင်းလိုက်တာ၊ သူများစကားကို နည်းနည်းလောက် နားထောင်ရင် သေသွားမှာမို့လို့လား။]

ချန်ရွေ့က ပြောလိုက်သည်။ "ဒါက အထင်အရှားပဲလေ။ နင် မန်နေဂျာကျန့်ကို အတင်းထွက်ခိုင်းလိုက်တာက ခန့်ညားတယ် ထင်ရပေမဲ့ ကျန်တဲ့သူတွေကတော့ စိုးရိမ်ကုန်ကြမှာပေါ့။ သူတို့သာ နင့်ကို မကျေနပ်လို့ အားလုံး စုပေါင်းပြီး အလုပ်ထွက်လိုက်ကြရင်... ထန်မိသားစု လုပ်ငန်းကြီး တစ်ခုလုံး ပြိုလဲသွားလိမ့်မယ်။ အဲဒီအခါ နင်က ထန်မိသားစုရဲ့ အပြစ်သား ဖြစ်သွားလိမ့်မယ်”

တုဇယ်ချန်းသည် ရုတ်တရက် စိတ်လက်ပေါ့ပါးစွာဖြင့် ထိုင်ခုံကို မှီလိုက်ပြီး သူမအား လှောင်ပြုံး ပြုံးပြလျက် ပြောလိုက်သည်။ "မင်းက သူတို့ရဲ့ အစီအစဉ်တွေကို တော်တော်လေး သိနေပါလား”

[ဟင်… ဒီစကားက တစ်မျိုးပဲနော်။]

ပရိသတ်များမှာမူ အဖြစ်မှန်ကို မသိရှိကြသဖြင့် ထိုခံစားချက်မှာ ခဏတာသာ ဖြစ်ပြီး တုဇယ်ချန်းကို ဆဲဆိုသည့် အသံများဖြင့် ပြန်လည် ဖုံးလွှမ်းသွားတော့သည်။

ချန်ရွေ့ ရင်ထဲ ထိတ်ခနဲ ဖြစ်သွားသော်လည်း အပြင်ပန်းတွင်မူ တည်ငြိမ်စွာ ပြောလိုက်သည်။ "ငါက အရှိကို အရှိအတိုင်း ပြောတာပါ။ မယုံရင် စောင့်ကြည့်နေလိုက်”

တုဇယ်ချန်းက ပြုံး၍ ပြောလိုက်သည်။ "ငါ တကယ် မယုံဘူး။ သူတို့မှာ အစွမ်းရှိရင် အားလုံး စုပေါင်းပြီး အလုပ်ထွက်စာ လာတင်ခိုင်းလိုက်လေ”

တုဟုန်ရိနှင့် ဝမ်ကျန့်ဟွေးတို့သည် တုဇယ်ချန်း၏ မောက်မာသော စကားများကို ကြားလိုက်ရချိန်တွင် ဝမ်းသာအားရ ဖြစ်သွားကြသည်။ ဒါသည် သူကိုယ်တိုင် သေတွင်းတူးနေခြင်း မဟုတ်ပါလား။

ချန်ရွေ့သည် တုဇယ်ချန်း၏ ရန်စနေသော ပုံစံကို ကြည့်ကာ မျက်မှောင်ကြုတ်လိုက်မိပြီး သူ့အပေါ် စိတ်ပျက်အားလျော့မှုများ ခံစားလိုက်ရသည်။ အမှုဆောင် တစ်ယောက် အလုပ်ထွက်တာနဲ့တင် သူ ကြောက်သွားလိမ့်မည်ဟု သူမ ထင်မှတ်ခဲ့သော်လည်း သူက ဤမျှအထိ ကလေးဆန်လိမ့်မည်ဟု မထင်ထားခဲ့ပေ။

အမှုဆောင်များကို အသစ်လဲလှယ်ခြင်းမှာ အာဏာပြန်ရရန် အကောင်းဆုံး နည်းလမ်း ဖြစ်သော်လည်း ကြိုတင် ပြင်ဆင်မှု မရှိသေးဘဲ အားလုံး အလုပ်ထွက်သွားပါက ထန်မိသားစုအတွက် အကြီးအကျယ် ထိုးနှက်ချက် ဖြစ်သွားပေလိမ့်မည်။ ထိုအချိန်ကျမှ အလျှော့ပေးပါက သူသည် အခြားသူများ၏ စိတ်ကြိုက် ခြယ်လှယ်ခြင်းကိုသာ ခံရတော့မည် ဖြစ်သည်။

ချန်ရွေ့သည် တုဇယ်ချန်းကို ကြည့်ကာ ကင်မရာ ရှိနေသည်ကိုပင် ဂရုမစိုက်နိုင်တော့ဘဲ စိတ်ပျက်လက်ပျက် အမူအရာဖြင့် ပြောလိုက်သည်။ "နင် နောင်တ ရလိမ့်မယ်။ အဲဒီအချိန်ကျမှ ငါ့စကားရဲ့ အဓိပ္ပာယ်ကို နင် သိလာမှာပါ”

ပြောပြီးသည်နှင့် သူမသည် လှည့်ထွက်သွားတော့သည်။ သူမ၏ စိတ်ထဲတွင်မူ ဒုတိယ အစီအစဉ်ကို စတင် ပြင်ဆင်နေပြီ ဖြစ်သည်။ အကယ်၍ တုဇယ်ချန်းက ဇွတ်လုပ်နေပြီး ထန်မိသားစု ပျက်စီးတော့မည် ဆိုပါက ချန်မိသားစုအနေဖြင့်လည်း လက်တွဲဖြုတ်ကာ ဝါးမျိုရန် ကြိုးစားရပေလိမ့်မည်။ ထန်မိသားစုကတော့ ပျက်စီးမှာ သေချာနေပြီ ဆိုတော့ သူတို့မိသားစုက ဘာလို့ အမြတ်မထုတ်ရမှာလဲ။

…