အခန်း ၈၄
Vol. 6 Ch. 84
အခန်း (၈၄)
ထန်ရွှမ်မှာ လန့်သွားရသည်။ ဗီဒီယိုထဲတွင် တုဇယ်ချန်းက ရှန်ယို့ယောင်၏ နိုးခါစ အမူအရာလေးများကို ပြသနေခြင်း ဖြစ်သည်။
ယွဲ့ယာနင်သည် ဖန်သားပြင်ကို စိုက်ကြည့်ရင်း ရင်ထဲတွင် တုန်လှုပ်လာခဲ့သည်။ သူမသည် ဗီဒီယိုထဲမှ မိန်းကလေးကို သေချာ စိုက်ကြည့်နေမိသည်။ ကင်မရာ လွဲသွားချိန်တွင် သူမက ထန်ရွှမ်အား အလောတကြီး မေးလိုက်သည်။ "သူ့ရဲ့ တခြား ဗီဒီယိုတွေ ရှိသေးလားဟင်”
ထန်ရွှမ်က ခေါင်းညိတ်ပြလျက် ပြောလိုက်သည်။ "ရှိပါတယ်ရှင်”
ထို့နောက် ရှန်ယို့ယောင် ပါဝင်သော အခန်းများအားလုံးကို လိုက်လံ ရှာဖွေပြလိုက်သည်။ ယွဲ့ယာနင်သည် ကြည့်ရင်းနှင့်ပင် အသက်ရှူသံများ မြန်လာခဲ့ပြီး ရှန်ယို့ယောင် လက်ဝှေ့ထိုးနေသည့် အခန်းသို့ ရောက်ရှိချိန်တွင်မူ သူမသည် ထိုင်နေရာမှ ရုတ်တရက် ထရပ်ကာ ဘေးခန်းသို့ အော်ဟစ်လိုက်တော့သည်။ "ရှန်တာ့ဟန် မြန်မြန် လာခဲ့စမ်းပါဦး"
ထို့နောက် သူမသည် ထန်ရွှမ်ကို ကြည့်ကာ အသည်းအသန် မေးမြန်းလိုက်သည်။
"သူ့နာမည်က ဘယ်သူလဲ။ ဘယ်မှာ ရှိတာလဲ။ သူကလည်း အနုပညာရှင်လား”
ထန်ရွှမ်၏ စိတ်ထဲတွင် တစ်မျိုး ဖြစ်သွားရသည်။ ဤအမူအရာကို ကြည့်ရသည်မှာ ရှန်ယို့ယောင်သည် သူတို့၏ သမီး ဖြစ်နေ၍လား။
သို့သော် ရှန်ယို့ယောင်မှာ ငယ်စဉ်ကတည်းက မိဘမဲ့တစ်ဦး ဖြစ်သလို ထိုလင်မယားမှာ သမီး ပျောက်ဆုံးသွားသည်မှာ မကြာသေးသည့် ပုံစံမျိုး ဖြစ်နေသဖြင့် မဖြစ်နိုင်ဟု သူမ ထင်မိသည်။
နိုင်ငံတကာ မင်းသမီးကြီး တစ်ဦးနှင့်ကမ္ဘာ့လက်ဝှေ့ ချန်ပီယံ တစ်ဦး... ထို့ပြင် ရှန်မိသားစု ဆိုသည်မှာ အမေရိကန်ရှိ မိုမား စီးပွားရေးလုပ်ငန်းစုကြီးတွင် တစ်ဦးတည်းသော တရုတ်မိသားစု ဖြစ်ရာ ထန်မိသားစုထက်ပင် အင်အား ကြီးမားလှသည် မဟုတ်ပါလား။
သူတို့အား အလကားနေရင်း မျှော်လင့်ချက် မပေးမိစေရန် ထန်ရွှမ်က သတိထား၍ ပြောလိုက်သည်။
"သူက မိဘမဲ့ တစ်ယောက်ပါရှင်။ အခု အသက် ၂၁ နှစ် ရှိပါပြီ၊ ကျွန်မရဲ့ ချွေးမလေးပါ”
ယွဲ့ယာနင်ကမူ ထိုအရာများကို ဂရုမစိုက်တော့ပေ။ သူတို့သည် ဤကမ္ဘာသို့ ရောက်ရှိလာချိန်တွင် အခြားသော ခန္ဓာကိုယ်များကို အစားထိုး ဝင်ရောက်ခဲ့ကြခြင်း ဖြစ်ရာ သမီးဖြစ်သူ ရောက်လာလျှင်လည်း မည်သည့် ခန္ဓာကိုယ်ထဲ ရောက်နေမည်နည်းဆိုသည်ကို ဘယ်သူမှ မသိနိုင်ပေ။ ရုပ်ရည်နှင့် အသက်မှာ အရေးမကြီးတော့ပေ။
သို့သော် မည်သို့ပင် ပြောင်းလဲသွားပါစေ၊ မိမိ၏ သမီးအရင်းကို သူမ သေချာပေါက် မှတ်မိသည်လေ။ ထိုမသိမသာ ထွက်ပေါ်လာသော အမူအရာလေးများနှင့် အကျင့်စရိုက်များမှာ သူမ၏ သမီးနှင့် တကယ့်ကို တူလွန်းလှသည်။ သူတို့ပင် ရောက်လာနိုင်မှတော့ သမီးဖြစ်သူကရော ဘာလို့ မရောက်လာနိုင်ရမှာလဲ။
ယွဲ့ယာနင်သည် တွေးရင်းနှင့် ပို၍ စိတ်လှုပ်ရှားလာကာ အနားသို့ ရောက်လာသော ခင်ပွန်းဖြစ်သူကို ပြောလိုက်သည်။ "ရှန်တာ့ဟန်... နင်လည်း မြန်မြန် ကြည့်စမ်းပါဦး"
တစ်ချိန်က မိုမား အာဏာရှင်ဟု ကျော်ကြားခဲ့သော အမျိုးသားကြီးမှာ အခုတော့ အစေခံတစ်ဦးပမာ အပြေးအလွှား ရောက်လာခဲ့သည်။ ယွဲ့ယာနင်က tablet ကို ကမ်းပေးလိုက်ပြီး ပြောလိုက်သည်။
"နင် ကြည့်လိုက်စမ်း”
ရှန်တာ့ဟန်၏ အကြည့်များသည် ဗီဒီယိုထဲမှ မိန်းကလေးထံသို့ ရောက်ရှိသွားသည်နှင့် မှင်တက်သွားတော့သည်။ သူမ လက်ဝှေ့ထိုးနေသည့် ပုံကို မြင်လိုက်ရချိန်တွင်မူ ဤသန်မာလှသော အမျိုးသားကြီး၏ မျက်ဝန်းထဲတွင် မျက်ရည်များ ဝေ့သီလာပြီး ထန်ရွှမ်အား အသည်းအသန် မေးမြန်းလိုက်သည်။
"သူ့နာမည်က ဘယ်သူလဲ။ သူ ဘယ်မှာလဲ”
ထန်ရွှမ်က တွန့်ဆုတ်စွာဖြင့် ပြန်ဖြေလိုက်သည်။ "သူ့နာမည်က ရှန်ယို့ယောင် ပါ..."
ယွဲ့ယာနင်၏ အသံမှာ တုန်ရီလျက် ပြောလိုက်သည်။ "နင် ဘာပြောလိုက်တာလဲ။ သူ့နာမည်က ရှန်ယို့ယောင် ဟုတ်လား။ ရှန်မိသားစုရဲ့ ရှန်၊ နူးညံ့တဲ့ ယို့ နဲ့ ကျောက်စိမ်းလို လှပတဲ့ ယောင် လားရှင်”
ထန်ရွှမ်က ခေါင်းညိတ်ပြလိုက်သည်။ တကယ်ကြီး သူတို့ သမီး ဖြစ်နေတာလား။
ယွဲ့ယာနင်က မေးလိုက်သည်။ "သူ ဘယ်မှာလဲ။ အခု ဘာလုပ်နေလဲဟင်”
ထန်ရွှမ်သည် မျက်တောင်လေးများ ခတ်ကာ ပြောလိုက်သည်။ "သူက ယန်မြို့မှာ ရှိပါတယ်၊ သရုပ်ဆောင် တစ်ယောက်ပေါ့”
ယွဲ့ယာနင် သည် ရုတ်တရက် တစ်စုံတစ်ခုကို သတိရသွားဟန်ဖြင့် မေးလိုက်သည်။ "သူက ရှင့်ရဲ့ ချွေးမလို့ ပြောတာလား။ သူက အခုမှ ၂၁ နှစ်ပဲ ရှိသေးတာ မဟုတ်ဘူးလား”
ရှန်ယုံနင်သည် မျက်မှောင်ကြုတ်လိုက်မိသည်။
သူတို့သည် ရှန်ယို့ယောင်ကို မိမိတို့၏ သမီးအဖြစ် အတည်ပြုထားသည့်အလား ပြုမူနေသဖြင့် ထန်ရွှမ်၏ စိတ်ထဲတွင် မလုံမလဲ ဖြစ်လာရသည်။ အကယ်၍သာ ဤအိမ်ထောင်ရေးသည် တုဇယ်ချန်း၏ တစ်ခါတရံ ထင်ရာစိုင်းတတ်သော စရိုက်ကြောင့် စတင်ခဲ့ခြင်းဖြစ်ကြောင်း သူတို့ သိသွားလျှင်...။
ထန်ရွှမ်သည် ချောင်းတစ်ချက် ဟန့်လိုက်ပြီး ပြောလိုက်သည်။
"ကျွန်မသားကလည်း အသက်သိပ်မကြီးသေးပါဘူး။ အဓိကကတော့ ယို့ယောင်ရဲ့ စိတ်ထားက အရမ်း ကောင်းလွန်းလို့ပါ။ ကျွန်မသားက သူ့ကို မြင်မြင်ချင်း ချစ်မိသွားတာ၊ ပေါင်းသင်းကြည့်တဲ့ အခါမှာလည်း ပိုပြီး သဘောကျလာတာနဲ့ သူကပဲ အပိုင်သတ်မှတ်လိုက်တော့တာပေါ့။ အဲဒါကြောင့်ပဲ အလောတကြီးနဲ့ လက်မှတ် သွားထိုးလိုက်ကြတာပါ”
မင်္ဂလာပွဲ ကိစ္စများကို ထပ်မံ မေးမြန်းလာပါက အနေရခက်မည် စိုးသဖြင့် ထန်ရွှမ်သည် လက်ဦးမှုယူကာ ဆက်ပြောလိုက်သည်။
"ကျွန်မသားက အခု ဒီအစီအစဉ်မှာ ပါဝင်နေတာကလည်း အဓိကအားဖြင့် သူမကို အံ့ဩစရာ လက်ဆောင်တစ်ခု ပေးချင်လို့ပါ။ လက်ထပ်ခွင့် တောင်းပြီးတာနဲ့ မင်္ဂလာဆောင်ဖို့ ကိစ္စတွေကို ချက်ချင်း စီစဉ်မှာပါ”
ပျောက်ဆုံးသွားသော သမီးလေးကို ပြန်တွေ့ရတော့မည်ဟူသော အသိကြောင့် ရှန်ယုံနင်သည်လည်း မကြုံစဖူး ထူးထူးခြားခြား စေ့စပ်တွေးတတ်လာခဲ့သည်။
"လက်ထပ်ခွင့်တောင် မတောင်းရသေးဘဲနဲ့ လက်မှတ် အရင် ထိုးလိုက်တာလား”
ယောက္ခမ ဖြစ်လာမည့်သူက သမက်ဖြစ်သူကို အမြဲ အလိုမကျဖြစ်တတ်သော ထိုစိတ်ဓာတ်ကို ထန်ရွှမ် နားလည်သည်။ အရင်ကလည်း သူမ၏ အဖေသည် သူမအား လာရောက် ပိုးပန်းသူတိုင်းကို အပြစ်ရှာခဲ့သည် မဟုတ်ပါလား။
"လူငယ်တွေရဲ့ ကိစ္စဆိုတော့ ကျွန်မလည်း အသေးစိတ်တော့ မသိပါဘူး။ ဘာပဲဖြစ်ဖြစ် ကျွန်မကတော့ ဒီချွေးမလေးကို တော်တော် သဘောကျပါတယ်” ထန်ရွှမ်သည် ဤအန္တရာယ်ရှိသော စကားဝိုင်းကို ရှောင်လွှဲရန် ဆုံးဖြတ်လိုက်ပြီး တုဇယ်ချန်းနှင့် ရှန်ယို့ယောင်တို့၏ ကြည်နူးစရာ ဗီဒီယိုတစ်ခုကို ဖွင့်ပြလိုက်သည်။ "ကလေးနှစ်ယောက်ရဲ့ သံယောဇဉ်က တော်တော်လေး ကောင်းကြပါတယ်။ ရှင်တို့ ကြည့်ကြည့်ပါဦး”
သမီးလေးကို လွမ်းဆွတ်နေကြသော လင်မယား နှစ်ဦးသည် အခြားသော ကိစ္စများကို ဂရုမစိုက်နိုင်တော့ဘဲ ခေါင်းချင်းဆိုင်လျက် ဗီဒီယိုကို သေသေချာချာ ကြည့်နေကြတော့သည်။
သို့သော် သူဌေးကြီးတို့၏ ဂုဏ်သိက္ခာ အစီအစဉ်မှာ နာမည်ကြီးနေသဖြင့် ဖြတ်ညှပ်ကပ် ဗီဒီယိုများမှာ အလွန်ပင် များပြားလှသည်။ ဗီဒီယိုတစ်ခုပြီးနောက် နောက်တစ်ခုကို ဆက်ကြည့်နေစဉ် ယွဲ့ယာနင်သည် မမှန်ကန်သော အချက်တစ်ခုကို တွေ့ရှိသွားခဲ့သည်။
"ဒါ... တစ်ယောက်ယောက်က ငါတို့ ယောင်ယောင်လေးကို အနိုင်ကျင့်နေတာ မဟုတ်လား”
ရှန်ယုံနင်သည် ရှန်ယို့ယောင်ကဲ့သို့ပင် ရိုးသားသူ ဖြစ်ရာ သူသည် အခြားအရာများကို သတိမထားမိဘဲ တုဇယ်ချန်းကိုသာ စိုက်ကြည့်နေမိသည်။ အတိတ်ဘဝတွင် သူ၏ ပေါ့ဆမှုကြောင့် သမီးဖြစ်သူ၏ ဘဝမှာ နစ်နာခဲ့ရဖူးသည် မဟုတ်ပါလား။ ယခု သမီးလေးက ပြန်လည် ငယ်ရွယ်သွားပြီဖြစ်ရာ ဤတစ်ကြိမ်တွင်မူ သူ သေချာပေါက် ရွေးချယ်ပေးရပေမည်။ ထိုသို့ တွေးတောရင်း သူသည် ယွဲ့ယာနင်ကို ခိုးကြည့်လိုက်မိသည်။ ယောင်ယောင်လေးသာ ပြန်ကောင်းလာရင် မိန်းမလည်း ငါ့ကို အပြစ်တင်တော့မှာ မဟုတ်ဘူး...။
ယွဲ့ယာနင်ကမူ ရှန်ယုံနင်၏ အတွေးများကို သတိမထားမိပေ။ သူမ ယခု အလေးထားသည်မှာ သမီးဖြစ်သူ၏ နေထိုင်မှု ဘဝပင် ဖြစ်သည်။ သူမသည် အနုပညာလောကတွင် တစ်သက်လုံး ကျင်လည်ခဲ့သူ ဖြစ်ရာ ဗီဒီယိုထဲမှ လှည့်ကွက်များကို ချက်ချင်း သိမြင်လိုက်သည်။ သူမက မျက်နှာပျက်လျက် မေးလိုက်သည်။ "ဒါ... ချန်ရွေ့ ဆိုတဲ့ ကောင်မလေးလား"
ချန်ရွေ့သည် ဒေါသထွက်နေသော ရှန်မိသားစု ဇနီးမောင်နှံ၏ အကြည့်များအောက်သို့ ရောက်ရှိနေပြီမှန်း သူမ ကိုယ်တိုင် မသိရှိသေးပေ။ သူမသည် အပြင်လူတစ်ဦးဖြစ်ရာ ထန်မိသားစု ကုမ္ပဏီ၏ အတွင်းရေး ကိစ္စများကို အမှုဆောင်အရာရှိများကဲ့သို့ မသိရှိဘဲ အရာရှိ အမြောက်အမြား အလုပ်ထွက်သွားသဖြင့် တုဇယ်ချန်းမှာ လူအင်အား အသည်းအသန် လိုအပ်နေလိမ့်မည်ဟုသာ ယူဆထားသည်။ ထို့ကြောင့် သူမသည် လူသုံးဦးကို ခေါ်ဆောင်၍ ချန်ရှီး အဆောက်အဦသို့ ရောက်ရှိလာခဲ့သည်။
သူမသည် တုဇယ်ချန်းကို မြင်သည်နှင့် အားမလိုအားမရဟန်ဖြင့် ဆူပူလေတော့သည်။
"နင်က ဘာလို့ ဒီလောက်အထိ စိတ်လိုက်မာန်ပါ လုပ်ရတာလဲ။ သင့်တော်တဲ့ အမှုဆောင်အရာရှိတွေ ဆိုတာ ရှာရခက်တယ်လေ။ နင်ကတော့..."
သူမသည် ပြောဆိုရင်း သူမ၏ အနောက်မှ လူသုံးဦးကို မိတ်ဆက်ပေးလိုက်သည်။ "ဒါတွေက ငါ အခက်အခဲကြားက ရှာပေးထားတဲ့ အမှုဆောင်အရာရှိတွေ။ အရည်အချင်းကတော့ ပြောစရာ မလိုပါဘူး။ စွမ်းအင်၊ အိမ်ခြံမြေနဲ့ ဆေးဘက်ဆိုင်ရာ နယ်ပယ်တွေမှာ အတွေ့အကြုံ အများကြီး ရှိကြတာဆိုတော့ အခုလောလောဆယ် နင့်ကို ကူညီပေးနိုင်လိမ့်မယ်”
တုဇယ်ချန်းက သူမကို ပြုံးစိစိဖြင့် ကြည့်ကာ ပြောလိုက်သည်။
"ခင်ဗျားတို့ ချန်မိသားစုက နည်းပညာနဲ့ စတင်ခဲ့တာလေ၊ ကျွန်တော်တို့ ထန်မိသားစုနဲ့ လုပ်ငန်းချင်း ထပ်နေတာလည်း မရှိဘူး။ ဒီလို နယ်ပယ်တွေအတွက် လူသုံးယောက်တောင် ရှာပေးနိုင်တာကတော့... တကယ်ကို ကျေးဇူးတင်စရာပါပဲ။ ဒါနဲ့... သူတို့ရဲ့ လစာကို ဘယ်သူက ပေးမှာလဲဟင်”
ချန်ရွေ့သည် သူ၏ တုံ့ပြန်မှုကြောင့် ခေတ္တမျှ ကြောင်သွားရသည်။ အခုလို အရေးကြီးသည့် အချိန်တွင် မိမိက လူတော်များကို ရှာပေးပါက သူသည် အလွန်အမင်း ကျေးဇူးတင်ရမည် မဟုတ်ပါလား။ အခုတော့ ပုံစံက တစ်မျိုး ဖြစ်နေသည်။ သူ ငါ့ရဲ့ အကြံကို ရိပ်မိသွားတာလား...။
ချန်ရွေ့က ပြောလိုက်သည်။ "ခဏတဖြုတ် ငှားပေးတာပဲလေ။ ဒါတွေက ငါတို့ ကုမ္ပဏီက လူတော်တွေမို့လို့၊ နင့်ကို အပြီးပေးဖို့တော့ နှမြောတာပေါ့”
တုဇယ်ချန်းက မေးလိုက်သည်။
"ခဏတဖြုတ်လား။ ခင်ဗျားက တကယ်ပဲ သဘောထားကြီးတာပဲ။ ဒါဆို သူတို့ လစာကို ဘယ်သူက ပေးမှာလဲ... ချန်မိသားစုလား၊ ထန်မိသားစုလား၊ ဒါမှမဟုတ် နှစ်ဖက်လုံးက ပေးရမှာလား”
ချန်ရွေ့ ရင်ထဲ ထိတ်ခနဲ ဖြစ်သွားပြီး မေးလိုက်သည်။ "ရှင် ဘာကို ဆိုလိုတာလဲ”
တုဇယ်ချန်းက ရယ်မောလျက် ပြောလိုက်သည်။ "ကျေးဇူးတင်တယ်လို့ ပြောတာပါ။ ဒါပေမဲ့ ခင်ဗျားရဲ့ စေတနာတွေကိုတော့ ကျုပ် လက်မခံနိုင်တော့ဘူး ထင်တယ်”
စွမ်းအင်၊ အိမ်ခြံမြေ၊ ဆေးဘက်ဆိုင်ရာ... ဤချန်မိသားစု သခင်မလေး၏ အကြံကတော့ တကယ့်ကို မသေးလှဘူးပဲ။
တုဇယ်ချန်းက ပြုံးလျက် ဆက်ပြောလိုက်သည်။ "ဒီရက်ပိုင်းအတွင်း လူအတော်များများက ဒီရာထူးတွေအတွက် ကျွန်တော့်ကို လူတွေ လာပြီး ညွှန်းကြတယ်လေ။ အဲဒါကြောင့် အခု အဲဒီ ရာထူး သုံးခုလုံးမှာ လူတွေ ရှိနေပြီဗျ”
ချန်ရွေ့သည် ဘာဖြစ်ကုန်သလဲဆိုသည်ကို တွေးမရ ဖြစ်နေစဉ် ထိုရာထူးများတွင် လူရှိနေပြီဟူသော စကားကြောင့် အလောတကြီး မေးလိုက်သည်။ "ဘယ်သူက ညွှန်းပေးတာလဲ”
တုဇယ်ချန်းက ရယ်မောလျက် ပြောလိုက်သည်။ "ကျွန်တော့်အဘိုးလေဗျာ။ သူ့ကိုတော့ ခင်ဗျားထက် ပိုပြီး ယုံကြည်လို့ ရမယ် မဟုတ်လား”
[ချန်ရွေ့က ကူညီဖို့ လာတာ မဟုတ်ဘူးလား။ တုဇယ်ချန်းမှာ လူလိုနေတာလေ၊ အခုလို လူသုံးယောက် ရောက်လာတာက အခက်အခဲကို ဖြေရှင်းပေးနိုင်မှာပဲကို။ ဒါပေမဲ့ ကြည့်ရတာ တစ်မျိုးကြီးပဲ။]
[ငါလည်း အဲဒီလို ခံစားရတယ်။ ဒါပေမဲ့ ငါတို့က ဆင်းရဲသားတွေဆိုတော့ ဘာမှ နားမလည်ပါဘူး၊ မမေးရဲဘူး။]
[ကူညီတာလား။ ဟဲဟဲ... အခွင့်အရေးကို အသုံးချပြီး လုယူဖို့ လာတာ သိသာတယ်နော်။ အမှုဆောင်အရာရှိ တစ်ယောက်ကို အထဲ ထည့်ထားနိုင်တာက ချန်မိသားစုအတွက် အကျိုးအမြတ်တွေ အများကြီး ရှိတာလေ။ စွမ်းအင်၊ အိမ်ခြံမြေနဲ့ ဆေးဘက်ဆိုင်ရာ ဆိုတာ ထန်မိသားစုရဲ့ အဓိက လုပ်ငန်းတွေလေ။ ချန်သခင်မလေးရဲ့ အကြံကတော့ တကယ်ကို မသေးဘူးပဲ။]
[အကြံကြီးတာ သူတစ်ယောက်တည်းမှ မဟုတ်တာ။ တုသခင်လေး ပြောတာ မကြားဘူးလား၊ လူအများကြီးက ညွှန်းနေကြတာတဲ့။]
[ဘုရားရေ... ချန်မိသားစု သခင်မလေးက တကယ်ကို ကြောက်စရာကောင်းတာပဲ။]
[ကြောက်စရာကောင်းတာထက် စက်ဆုပ်စရာ ပိုကောင်းတယ်။ အရင်တုန်းကတော့ သူငယ်ချင်းအတွက် စိုးရိမ်နေတဲ့ ပုံစံမျိုး ဖမ်းပြပြီးတော့ အခု အကျပ်အတည်း ဆိုက်နေတာကို မြင်တော့မှ နင်းချဖို့ အသည်းအသန် ကြိုးစားနေတာလေ။ တစ်ဖက်လူ ဒုက္ခမရောက်မှာကို သူက စိုးရိမ်နေတာ မဟုတ်လား။]
[အရင်က ဘယ်သူကများ သူ့ကို လက်ထပ်ဖို့ သင့်တော်တယ်လို့ ပြောခဲ့တာလဲ။ သူ့လို မိန်းမမျိုးနဲ့ လက်ထပ်ရင်တော့ အမြဲ ထိတ်လန့်နေရမှာပဲ။ ချမ်းသာတဲ့ အချိန်ကျရင် မင်းကို ချုပ်ကိုင်ထားမယ်၊ ဒုက္ခရောက်တဲ့ အချိန်ကျရင်တော့ တခြားလူတွေ ဘာမှ မလုပ်ခင်မှာ သူကပဲ မင်းရဲ့ နောက်ဆုံး အစွမ်းအစတွေကို အကုန် စုပ်ယူသွားလိမ့်မယ်။]
[အရင်ကတော့ သတိမထားမိခဲ့ဘူး၊ အခုလို ကိစ္စတွေ ကြုံလာမှ ရှန်ယို့ယောင်ရဲ့ တန်ဖိုးကို သိရတော့တယ်။ သူကတော့ အစအဆုံး... ချမ်းသာသည်ဖြစ်စေ၊ ဒုက္ခရောက်သည်ဖြစ်စေ၊ သူ့ရဲ့ သဘောထားက ဘယ်တော့မှ မပြောင်းလဲဘူးလေ။]
[အင်း... သခင်လေး ပြောခဲ့တဲ့ စိတ်အေးချမ်းမှု ဆိုတာကို အခုမှ နားလည်တော့တယ်။ ဘေးက ကြည့်ရင်တော့ သိသာတဲ့ အရာမျိုး မဟုတ်ပေမဲ့ တကယ့် အရေးကြီးတဲ့ အချိန်ကျရင်တော့ သူ့ရဲ့ တန်ဖိုးက အစားထိုးလို့ မရဘူးလေ။]
[လေနဲ့ အတူတူပါပဲ၊ ပုံမှန်ဆိုရင်တော့ တန်ဖိုးကို မသိကြပေမဲ့ အသက်လုရတဲ့ အချိန်ကျမှ မရှိရင် မဖြစ်မှန်း သိလာရတာမျိုးပေါ့။]
ချန်ရွေ့သည် တုဇယ်ချန်း၏ စကားများကြောင့် မည်သို့မျှ ပြန်လည် မချေပနိုင်ဘဲ ရှိနေရသည်။ သူမ၏ အကြံအစည်များ အားလုံးမှာ အခြေအနေကို အသုံးချ၍ လှည့်ဖြားရန် ကြံစည်ခဲ့ခြင်း ဖြစ်သည်။ တုဇယ်ချန်း အားကိုးရာမဲ့ ဖြစ်နေချိန်တွင် မိမိကိုသာ အားကိုးရလိမ့်မည်ဟု သူမ ယူဆခဲ့သည်။ သူမ၏ ကူညီမှုအတွက်လည်း သူက အလွန်အမင်း ကျေးဇူးတင်လိမ့်မည်ဟု ထင်မှတ်ခဲ့သည်။
သို့သော် တုဇယ်ချန်းက သူမကို အားကိုးရန် စိတ်မကူးသည့်အပြင် သူမ၏ကမ်းလှမ်းချက်များကိုပါ ငြင်းပယ်လိုက်သည့် အခါတွင်မူ သူမတွင် မည်သည့် နည်းလမ်းမှ မရှိတော့ပေ။
ယခုလည်း တုဇယ်ချန်းက သူမကို ပြုံးစိစိဖြင့် ကြည့်ကာ၊ သူမ၏ အကြံကို ကြိုသိနေသည့်အလား ပြောလိုက်သည်။ "ဘာပဲဖြစ်ဖြစ်... ခင်ဗျားရဲ့ စေတနာအတွက်တော့ ကျေးဇူးတင်ပါတယ်ဗျာ”
နောက်ဆုံးတွင် ချန်ရွေ့သည် သူမ သေချာ ပြင်ဆင်လာခဲ့သော လူသုံးဦးကို ခေါ်ဆောင်၍ အရှက်တကွဲဖြင့်သာ ပြန်လှည့်ခဲ့ရလေတော့သည်။
…