အခန်း ၈၅

အခန်း (၈၅)

ချန်ရွေ့ ထွက်ခွာသွားစဉ် သူမသည် တုဇယ်ချန်းကို တစ်ချက် လှည့်ကြည့်လိုက်သည်။ အထက်စီးမှ ဝင်ရောက်စွက်ဖက်ရန် မဖြစ်နိုင်တော့ပါက အောက်ခြေမှသာ စတင်ရပေမည်။ ယခုအချိန်အထိ သူမ၏ အစီအစဉ် တစ်ခုမှ အရာမထင်သဖြင့် ဖြုန်းတီးပစ်ရန် အချိန်မရှိတော့ပေ။

တုဇယ်ချန်းသည် လစ်လပ်သွားသော နေရာများတွင် လူသစ်များ အစားထိုးနိုင်ခဲ့သည်မှာ မှန်သော်လည်း အာဏာအကူးအပြောင်းကာလအတွင်း ဖြစ်ပေါ်တတ်သော ဖရိုဖရဲ အခြေအနေများမှာ မလွဲမသွေ ရှိနေဦးမည် ဖြစ်ရာ လှည့်ကွက်သုံးရန် အခွင့်အလမ်းများစွာ ရှိနေသေးသည်ဟု သူမ ယူဆလိုက်သည်။ သူမသည် တွေဝေမနေတော့ဘဲ ချန်မိသားစု ဌာနချုပ်သို့ အပြေးအလွှား သွားခဲ့တော့သည်။

ယခုအခါ သူမသည် အစီအစဉ် တိုက်ရိုက်ထုတ်လွှင့်မှုကိုပင် ဂရုမစိုက်နိုင်တော့ပေ။ ဤအစီအစဉ်ကို ပြုလုပ်ခဲ့မိသည်မှာ သူမအတွက် နောင်တရစရာပင် ဖြစ်လာခဲ့သည်။ ထန်မိသားစုတွင် ဤမျှအထိ မြန်မြန်ဆန်ဆန် ပြဿနာတက်လာလိမ့်မည်ဟု သူမ မထင်ထားခဲ့ဘဲ ဤကာလအတွင်း တုဇယ်ချန်းနှင့် ရင်းနှီးအောင် လုပ်ရန်သာ သူမ အာရုံစိုက်ခဲ့ခြင်း ဖြစ်သည်။ တုဇယ်ချန်းနှင့် ဖန်ခယ်တို့ဘက်မှ နုတ်ထွက်သွားမည်ကို စိုးရိမ်သဖြင့် စာချုပ်ချုပ်ဆိုစဉ်က လျော်ကြေးငွေကို အဆမတန် မြှင့်ထားခဲ့သော်လည်း ယခုမူ ထိုစာချုပ်က သူမကိုသာ ပြန်လည် ချုပ်နှောင်ထားသလို ဖြစ်နေတော့သည်။

ကင်မရာများရှေ့တွင် သူမ လုပ်ဆောင်သမျှမှာ များစွာ အဆင်မပြေလှပေ။ ကံကောင်းသည်မှာ သူမသည် လျှို့ဝှက်ချက်များကြောင့် အဝေးမှသာ ရိုက်ကူးရန် တောင်းဆိုထားသဖြင့် ပရိသတ်များမှာ သူမ တစ်နေကုန် အလုပ်များနေသည်ကိုသာ အဝေးမှ လှမ်းမြင်နေကြရခြင်း ဖြစ်သည်။

နောက်တစ်နေ့ အလုပ်တက်ပြီး မကြာမီမှာပင် #ရှန်ယို့ယောင်၏သူငယ်ချင်းမူးယစ်ဆေးသုံးစွဲ# ဟူသော ခေါင်းစဉ်မှာ ရုတ်တရက် ရေပန်းစားလာခဲ့သည်။

ချန်ရွေ့သည် ထိုသတင်းကို မြင်လိုက်ရချိန်တွင် ရင်ထဲ၌ ဝမ်းသာသွားရသည်။ သတင်းအကြောင်းအရာကို ဖတ်ကြည့်လိုက်ရာ ရှန်ယို့ယောင် အိမ်မှ ထွက်လာချိန်တွင် မျက်နှာမှာ ဖြူဖတ်ဖြူရော်ဖြစ်ပြီး အရိုးပေါ် အရေတင်နေသော အမျိုးသမီး တစ်ဦးက လမ်း၌ ကြားဖြတ် တားဆီးခဲ့ခြင်း ဖြစ်ကြောင်း သိရသည်။ ထိုအမျိုးသမီးမှာ အလွန်ပင် ဆင်းရဲနွမ်းပါးဟန် ရှိနေပြီး ရှန်ယို့ယောင်ရှေ့တွင် ဒူးထောက်ကာ ငွေချေးရန် တောင်းဆိုနေခြင်း ဖြစ်သည်။ သူမသည် ရှန်ယို့ယောင်၏ ငယ်သူငယ်ချင်း ဖြစ်ကြောင်းနှင့် ရှန်ယို့ယောင် အနုပညာကျောင်း တက်စဉ်က ငွေချေးပေးခဲ့သလို အလုပ်များလည်း ရှာပေးခဲ့ကြောင်း၊ မဟုတ်ပါက မိဘမဲ့ တစ်ဦးဖြစ်သော ရှန်ယို့ယောင်အနေဖြင့် ထိုမျှ ကြီးမားသော ကျောင်းလစာကို မည်သို့ ပေးနိုင်ပါ့မနည်းဟု ဟစ်အော် ပြောဆိုနေတော့သည်။

အွန်လိုင်းပေါ်တွင် ထိုသတင်းကြောင့် ထပ်မံ၍ ဆူညံသွားပြန်သည်။ ဤသည်မှာ အလုပ်ထွက်သွားသော အမှုဆောင်အရာရှိများက တုဇယ်ချန်း ကုမ္ပဏီကို အာရုံမစိုက်နိုင်အောင် တမင် ပြဿနာရှာခြင်း ဖြစ်သည်ဟု တွက်ဆသူများလည်း ရှိနေသည်။ အချို့ကမူ ထိုအမျိုးသမီး၏ ပုံစံကို ကြည့်ရုံနှင့် သိက္ခာရှိသော အမျိုးသမီး တစ်ဦး မဟုတ်မှန်း သိသာလှသဖြင့် ရှန်ယို့ယောင်နှင့် အမှန်တကယ် ပတ်သက်နေနိုင်ကြောင်း ပြောဆိုနေကြသည်။

နောက်ပိုင်းတွင် ထိုအမျိုးသမီးမှာ လူအများရှေ့မှာပင် ဆေးလွန်ကာ အခြေအနေ ဆိုးရွားသွားသဖြင့် ဆေးရုံသို့ အမြန် ပို့ဆောင်လိုက်ရသည်။

ဝမ်ကျန့်ဟွေးတို့ အဖွဲ့မှာ ရှန်ယို့ယောင်ကို အမြစ်ပြတ် သိက္ခာချရန်အတွက် ငွေအမြောက်အမြား အသုံးပြုထားသဖြင့် အွန်လိုင်းတွင် သူမအား ဆဲဆိုသံများမှာ နေရာအနှံ့ ပျံ့နှံ့သွားတော့သည်။ သူမ၏ သူငယ်ချင်းမှာ မူးယစ်ဆေး သုံးစွဲသူ ဖြစ်သလို အလုပ်မှာလည်း မသန့်ရှင်းသူ ဖြစ်နေမှတော့ သူမ ရှာပေးသော အလုပ်မှာလည်း မည်ကဲ့သို့သော အလုပ်မျိုး ဖြစ်မည်နည်းဟု လူအများက မေးခွန်းထုတ်လာကြသည်။

ရှန်ယို့ယောင်သည် အတိတ်က မည်ကဲ့သို့သော နည်းလမ်းများဖြင့် ငွေရှာခဲ့သနည်းဟူသော စွပ်စွဲချက်များမှာ အလွန်ပင် နားဝင်မချိုလှပေ။ မူးယစ်ဆေးနှင့် ပတ်သက်လာပါက မိမိကိုယ်တိုင် မဟုတ်လျှင်ပင် နာမည်ပျက်ရန်မှာ သေချာသဖြင့် တုဇယ်ချန်းမှာလည်း ယနေ့တွင် အလုပ်ကို အာရုံစိုက်နိုင်တော့မည် မဟုတ်ဟု အားလုံးက ယူဆလိုက်ကြသည်။

ချန်ရွေ့သည်လည်း ထိုအခွင့်အရေးကို အသုံးချကာ ချန်ကျီ တိုက်ရိုက်ထုတ်လွှင့်မှုမှ နည်းပညာ ကျွမ်းကျင်သူများကို ခေါ်ဆောင်၍ လန်ဟွေ့သို့ ရောက်ရှိလာခဲ့သည်။ သူမသည် ရှောင်ယောင် တိုက်ရိုက်ထုတ်လွှင့်မှု၏ ပင်မရင်းမြစ် ကုတ်များကို စစ်ဆေးရန် အတင်းအကျပ် တောင်းဆိုလေတော့သည်။

ရွမ်ဟုန်လန်က မျက်မှောင်ကြုတ်လျက် ပြောလိုက်သည်။ "ဒါက ကျုပ်တို့ရဲ့ ပူးပေါင်းဆောင်ရွက်မှု နယ်ပယ်ထဲမှာ မပါဝင်ပါဘူး”

ချန်ရွေ့က ပြောလိုက်သည်။ "ဥက္ကဋ္ဌတုက အခု လန်ဟွေ့ ကိစ္စတွေကို ကြည့်ဖို့ အချိန်မရှိဘူးလေ၊ အဲဒါကြောင့် ငါကပဲ ဦးဆောင်ပြီး လုပ်ပေးရမှာပေါ့။ အခု အစီအစဉ်က ရေပန်းစားနေတုန်းမှာတင် လုပ်ငန်းနှစ်ခုကို အမြန်ဆုံး ပေါင်းစပ်ရမယ်။ အစီအစဉ် ပြီးတာနဲ့ ငါတို့ဘက်က လုပ်ဆောင်ချက် အသစ်တွေကို ချက်ချင်း စတင်နိုင်အောင်လို့လေ”

ရွမ်ဟုန်လန်က ပြန်ပြောလိုက်သည်။ "စိတ်မကောင်းပါဘူး၊ ကျွန်တော် ဥက္ကဋ္ဌတု ဆီက ဘာညွှန်ကြားချက်မှ မရထားပါဘူး”

ချန်ရွေ့က စိတ်တိုဟန်ဖြင့် ပြောလိုက်သည်။ "ဒီပရောဂျက်ရဲ့ အထွေထွေ တာဝန်ခံက ငါပဲလေ။ စာချုပ်ထဲမှာလည်း နှစ်ဖက်လုံးက အစွမ်းကုန် ပူးပေါင်းဆောင်ရွက်ရမယ်လို့ သေချာ ရေးထားတာပဲ”

"ဒါဆိုရင် ကျွန်မတို့ဘက်ကလည်း ရှင့်တို့ရဲ့ အသုံးပြုသူ စာရင်းတွေ အားလုံးကို မျှဝေပေးဖို့ တောင်းဆိုမယ် ဆိုရင်ကော... ရမလား” ရှန်ယို့ယောင်၏ အသံမှာ အနောက်ဘက်မှ ထွက်ပေါ်လာခဲ့သည်။

ချန်ရွေ့သည် အံ့ဩတကြီး လှည့်ကြည့်ကာ မေးလိုက်သည်။

"နင်က ဘာလို့ ဒီမှာ ရှိနေတာလဲ”

ရှန်ယို့ယောင်က ပြန်ပြောလိုက်သည်။ "ကျွန်မက ဘာလို့ ဒီမှာ ရှိမနေရမှာလဲ။ မိန်းကလေးချန်ကသာ ဘာလို့ ဒီကို ရောက်နေတာလဲလို့ ကျွန်မက ပြန်မေးချင်တာပါ”

အဝေးမှ ရိုက်ကူးနေခြင်း ဖြစ်သဖြင့် သူတို့ ဘာပြောနေကြသည်ကို ပရိသတ်များ မသိရသော်လည်း နှစ်ဦးသား ထိပ်တိုက်ရင်ဆိုင်နေကြသည့် ပုံစံမှာမူ အထင်အရှားပင် ဖြစ်သည်။

[တွေ့ကြပြီ... တွေ့ကြပြီ။]

[ချန်သခင်မလေးနဲ့ တုသခင်မလေးတို့ ထိပ်တိုက်တွေ့နေကြပြီ၊ ဘယ်သူ နိုင်မလဲဆိုတာ လောင်းကြေးထပ်ကြစို့။]

[ရှန်ယို့ယောင် နိုင်စေချင်ပေမဲ့ စရိုက်ချင်း ယှဉ်ရင်တော့ ချန်ရွေ့ကို သူ ယှဉ်နိုင်မှာ မဟုတ်ဘူး။ ရှန်ယို့ယောင်က စိတ်ထား နုနယ်လွန်းတယ်လေ၊ စီးပွားရေးမှာလည်း ကျွမ်းကျင်မှာ မဟုတ်ပါဘူး။]

ချန်ရွေ့သည် ရှန်ယို့ယောင်ကို အမှန်တကယ်ပင် မကြောက်ပေ။ သူမသည် ရှန်ယို့ယောင်မှာ တုဇယ်ချန်းက လန်ဟွေ့ကို စောင့်ရှောက်ရန် လွှတ်ထားသူ ဖြစ်ကြောင်း ရိပ်မိလိုက်သော်လည်း သူမအား တိုက်ခိုက်မည့်သူများမှာ အလွန်ပင် များပြားလှသည် မဟုတ်ပါလား။ ရှန်ယို့ယောင်အနေဖြင့် ဤနေရာတွင် စိတ်အေးလက်အေး ရှိနေနိုင်မလား ဆိုသည်မှာပင် စဉ်းစားစရာ ဖြစ်သည်။

ချန်ရွေ့က ပြောလိုက်သည်။

"ငါနဲ့ လန်ဟွေ့ကြားမှာ ပူးပေါင်းမှုတွေ ရှိနေတာပဲ၊ ငါ ဒီမှာ ရှိနေတာက ဘာဆန်းလို့လဲ။ တုသခင်မလေးကသာ ဒီကို ဘာလာလုပ်တာလဲ။ စီးပွားရေးအကြောင်း နင် ဘာမှ မသိဘူး မဟုတ်လား။ ပြီးတော့ နင့်သူငယ်ချင်း ကိစ္စကလည်း တော်တော် ဆိုးနေပုံရတယ်၊ အဲဒါကို သွားမရှင်းရင်ကော ဖြစ်ပါ့မလား”

သူမ စကားမဆုံးမီမှာပင် လန်ဟွေ့၏ တံခါးဝသို့ လူအုပ်ကြီး တစ်အုပ် ရောက်ရှိလာသည်။ အရပ်ရှည်ရှည်၊ ကိုယ်လုံးတောင့်တောင့်နှင့် ကြမ်းတမ်းသော ပုံစံရှိသော အမျိုးသား ၁၀ ဦးခန့် ဝင်လာကြရာ ရှေ့ဆုံးမှ ဦးဆောင်လာသူ၏ မျက်လုံးထောင့်တွင် ရှည်လျားသော အမာရွတ်ကြီး တစ်ခု ရှိနေသဖြင့် ကြည့်ရသည်မှာ အလွန်ပင် ကြောက်စရာ ကောင်းလှသည်။

အမာရွတ်နှင့် အမျိုးသားက ရှန်ယို့ယောင်ကို ကြည့်ကာ သိရက်နှင့်ပင် မေးလိုက်သည်။ "ရှန်ယို့ယောင် ဆိုတဲ့ အမျိုးသမီး ဒီမှာ ရှိသလား”

ရှန်ယို့ယောင်၏ အနောက်မှ သက်တော်စောင့် နှစ်ဦးမှာ ချက်ချင်းပင် ရှေ့သို့ တိုးကာ သူမကို ကာကွယ်ပေးလိုက်ကြသည်။ တိုက်ရိုက်ထုတ်လွှင့်နေစဉ် ဖြစ်သဖြင့် တုဟုန်ရိတို့ အဖွဲ့မှာ အလွန်အမင်း မလုပ်ရဲကြသော်လည်း တုဇယ်ချန်းသည် ဘေးကင်းစေရန်အတွက် သူမအတွက် ထိပ်တန်း သက်တော်စောင့် နှစ်ဦးကို စီစဉ်ပေးထားခြင်း ဖြစ်သည်။

ချန်ရွေ့က ထိုမြင်ကွင်းကို မြင်သောအခါကင်မရာကို အနားသို့ တိုးရန် အချက်ပြလိုက်သည်။ ဤအစီအစဉ်တွင် သူမကိုယ်တိုင် ပါဝင်နေသဖြင့် ဒါရိုက်တာမှာ သူမ၏ အချက်ပြမှုကို ချက်ချင်း နားလည်လိုက်ပြီး ကင်မရာနှင့် အသံဖမ်းစက်များကို အသင့် ပြင်လိုက်တော့သည်။

အမာရွတ်နှင့် အမျိုးသားက ရှန်ယို့ယောင် ရှေ့မှ သက်တော်စောင့် နှစ်ဦးကို ကြည့်ကာ လှောင်ရယ်လိုက်သည်။ သူသည် ရှန်ယို့ယောင်ကို အထင်သေးသော အကြည့်ဖြင့် စိုက်ကြည့်နေပြီး သူ၏ အနောက်မှ လူများကလည်း ယုတ်မာသော အပြုံးများဖြင့် ကြည့်နေကြရာ ဗီလိန်တစ်ဦး၏ အရှိန်အဝါနှင့် ဖိအားများကို ပေးစွမ်းနေတော့သည်။

အကယ်၍သာ သာမန် အမျိုးသမီး တစ်ဦး ဖြစ်ခဲ့ပါက ထိတ်လန့်သွားပေလိမ့်မည်။ သို့သော် သူတို့ ရင်ဆိုင်နေရသူမှာ ရှန်ယို့ယောင် ဖြစ်သည်။ စီးပွားရေး စီမံခန့်ခွဲမှုတွင် သူမ အခက်တွေ့နိုင်သော်လည်း ကြမ်းတမ်းမှုနှင့် ပတ်သက်လာပါက သူမအဖေထက် ပို၍ ကြောက်စရာကောင်းသော လူကို သူမ တစ်ခါမှ မမြင်ဖူးခဲ့ပေ။

သူမသည် မျက်နှာတစ်ချက် မပျက်ဘဲ တည်ငြိမ်စွာ မေးလိုက်သည်။ "ရှင်တို့က ဘယ်သူတွေလဲ။ ကျွန်မကို ဘာလို့လာရှာတာလဲ”

အမာရွတ်နှင့် အမျိုးသားက မောက်မာစွာ ပြောလိုက်သည်။

"ကျုပ်တို့က ဝမ်လီကျွမ်းရဲ့ သူငယ်ချင်းတွေပဲ။ သူ ကျုပ်တို့ဆီကနေ ငွေတွေ အများကြီး ချေးထားတာလေ။ အခု သူ ဆေးရုံတက်နေရတော့ ငွေပြန်မဆပ်နိုင်ဘူးပေါ့။ ဒါပေမဲ့ သူကတော့ သူ့ရဲ့ အကြွေးတွေကို မင်းက ဆပ်ပေးလိမ့်မယ်လို့ ပြောတယ်၊ အဲဒါကြောင့် မင်းကို လာရှာတာပဲ”

ရှန်ယို့ယောင်က အေးစက်စွာ ပြောလိုက်သည်။ "ကျွန်မ ဝမ်လီကျွမ်း ဆိုတဲ့သူကို မသိပါဘူး၊ သူ့ရဲ့ အကြွေးတွေကို ဆပ်ပေးဖို့လည်း တာဝန် မရှိဘူး။ အခုချက်ချင်း ထွက်သွားကြပါ”

အမျိုးသားက ပြောလိုက်သည်။ "သူ ပြောတာတော့ အဲဒီလို မဟုတ်ဘူးနော်။ သူ့လက်ထဲမှာ မင်းရဲ့ လျှို့ဝှက်ချက်တွေ အများကြီး ရှိနေတာလေ၊ ကျုပ်တို့လည်း အကုန် မြင်ပြီးသား။ မင်းအတွက် ပြဿနာ မဖြစ်စေချင်ရင်တော့ အကြွေးကို မြန်မြန် ဆပ်လိုက်တာ ပိုကောင်းလိမ့်မယ်”

[ဝေါ့... ရှန်ယို့ယောင်က တကယ်ပဲ ခန္ဓာကိုယ်ရင်းပြီး ကျောင်းတက်ခဲ့တာလား?]

ထိုအမျိုးသား၏ စကားများမှာ အလွန်ပင် ရိုင်းစိုင်းလှသော်လည်း မန်နေဂျာ ကျူးယန်လင်း ဘက်မှလည်း အခြေအနေကို စတင် ထိန်းချုပ်နေပြီဖြစ်ရာ ဖျက်လိုဖျက်ဆီး အဖွဲ့များ၏ အရှိန်အဝါမှာ တဖြည်းဖြည်း လျော့နည်းလာခဲ့သည်။

[အခုလို အရေးကြီးတဲ့ အချိန်မှာ ဒါကို ယုံတဲ့သူကတော့ ငတုံးပဲ။ တုဇယ်ချန်းကို ဒုက္ခပေးချင်တဲ့ ကျေးဇူးကန်းတဲ့ လူတစ်စုရဲ့ လက်ချက်ဆိုတာ သိသာနေတာပဲ။]

[သတင်းတွေ ထွက်လာတာလည်း မြန်လွန်းသလို စွပ်စွဲချက်တွေကလည်း အခြေအမြစ် မရှိဘူး။ ဒါတွေဟာ စနစ်တကျ လုပ်ထားတဲ့ ဝါဒဖြန့်မှုတွေပဲ။]

[ဟုတ်တယ်၊ ငါတို့လည်း လူကြီးဖြစ်နေပြီလေ၊ ငါတို့ကို ငတုံးလို့ မမှတ်နဲ့။]

[ဝါဒဖြန့်သူတွေ ထွက်သွားကြစမ်း။]

[ဒါနဲ့... ဒီလိုမျိုး ခြိမ်းခြောက်နေတာကို ရဲတိုင်လို့ ရတယ် မဟုတ်လား။]

[ဟုတ်တယ်... ရဲတိုင်ကြစို့၊ တုသခင်လေးကို ငါတို့ အတူတူ ကာကွယ်ပေးရမယ်။]

[ငါတို့ ကူညီပေးနိုင်တဲ့ နေရာ ရောက်လာပြီဟေ့။]

ဝမ်ကျန့်ဟွေးသည် ကွန်ပျူတာကို ဖွင့်ကာ ပရိသတ်များ၏ မှတ်ချက်များကို မြင်လိုက်ရချိန်တွင် ဒေါသထွက်သွားတော့သည်။ သူတို့သည် တုဇယ်ချန်းကို ရှောင်လွှဲကာ ရှန်ယို့ယောင်ကို လာရောက် ပြဿနာရှာခြင်းမှာ ပရိသတ်များ မသိစေဘဲ ကြမ်းတမ်းသော နည်းလမ်းများကို သုံးရန် ဖြစ်သည်။ သို့သော် ချန်ရွေ့ကမူ ရှန်ယို့ယောင်ကို အရှက်ခွဲလိုစိတ် တစ်ခုတည်းနှင့် ကင်မရာများကို အနားသို့ တိုးခိုင်းလိုက်သဖြင့် သူတို့၏ အစီအစဉ်ကြီးမှာ ပျက်စီးလုနီးပါး ဖြစ်သွားခဲ့ရပြီ။

ပရိသတ်တစ်ဦးက ရေးသားထားသည်။ [ရဲတိုင်ထားပြီးပြီ၊ ရှန်ယို့ယောင်ရေ... ဆယ်မိနစ်လောက်တော့ အားတင်းထားဦးနော်။]

သို့သော် ရိုက်ကွင်းပေါ်ရှိ လူများမှာမူ အပြင်လောကမှ အခြေအနေများကို မသိရှိကြပေ။ အမာရွတ်နှင့် အမျိုးသားမှာမူ ဆက်လက်၍ မောက်မာစွာ ခြိမ်းခြောက်နေဆဲ ဖြစ်သည်။

"ကျုပ်တို့က သေချာ စုံစမ်းပြီးသား။ မင်းရဲ့ အတိတ်အကြောင်းတွေကို ကျုပ်တို့ အကုန်သိတယ်၊ ဘယ်ယောကျ်ားတွေနဲ့ အိပ်ခဲ့လဲဆိုတာကအစ မှတ်တမ်းတွေ ရှိနေတုန်းပဲ... ဟေ့ မိန်းကလေး၊ ဖုန်းဆက်ဖို့ ကြိုးစားမနေနဲ့တော့၊ မင်း ဖုန်းဆက်လို့ ရသွားရင် ငါ့ကို ရှုံးတယ်လို့သာ သတ်မှတ်လိုက်..."

ဧည့်ကြို မိန်းကလေးသည် ဖုန်းကို ထုတ်ကြည့်လိုက်မှ လိုင်းများ လုံးဝ မရှိတော့သည်ကို သတိထားမိလိုက်သည်။ သူတို့သည် လိုင်းဖြတ်စက်ကိုပါ ယူဆောင်လာခဲ့ကြခြင်း ဖြစ်သည်။

အမာရွတ်နှင့် အမျိုးသားက သူတို့၏ ပျာယာခတ်နေသော ပုံစံကို ကြည့်ကာ ရှန်ယို့ယောင်အား ပြောလိုက်သည်။ "ပြဿနာ မတက်ချင်ရင်တော့ အကြွေးဆပ်မလား၊ ဒါမှမဟုတ် ကျုပ်တို့နဲ့အတူ လိုက်ခဲ့မလား... တစ်ခုခု ရွေးလိုက်"

သူ့စကားအဆုံးတွင် သူ၏ အနောက်မှ လူများမှာ ရှေ့သို့ တစ်ပြိုင်နက်တည်း တိုးလာကြပြီး ရှန်ယို့ယောင် ရှေ့မှ သက်တော်စောင့်များကလည်း ရင်ဆိုင်ရန် ပြင်လိုက်ကြသည်။ သို့သော် သူတို့ မလှုပ်ရှားမီမှာပင် တံခါးဝမှ အေးစက်သော အသံတစ်ခု ထွက်ပေါ်လာခဲ့သည်။ "သူက မလိုက်ဘူးဆိုရင်ကော"

အမာရွတ်နှင့် အမျိုးသားက ကုမ္ပဏီမှ အခြားတစ်ဦးက ပြောသည်ဟု ယူဆကာ လှည့်မကြည့်ဘဲ ရှန်ယို့ယောင်ကို စိုက်ကြည့်လျက် ရယ်မောပြောဆိုလိုက်သည်။ "မလိုက်ဘူး ဟုတ်လား။ အဲဒါကတော့ မင်း သဘောနဲ့ လုပ်လို့ မရဘူးလေ”

"အစ်... အစ်ကိုကြီး..."

သူ့အနောက်မှ သူ့ ညီအစ်ကို တစ်ဦး၏ စကားသံမှာ လမ်းခုလတ်မှာတင် ရပ်တန့်သွားသည်။

အမာရွတ်နှင့် အမျိုးသားသည် နားမလည်စွာဖြင့် လှည့်ကြည့်လိုက်ရာ မည်သူမှန်း မမြင်ရသေးမီမှာပင် သက်တော်စောင့် နှစ်ဦး၏ ဖိသိပ်ခြင်းကို ခံလိုက်ရပြီး လက်များက အနောက်သို့ အတင်းအကျပ် လိမ်ချိုးခံရကာ ကြမ်းပြင်ပေါ်သို့ ဝပ်ဆင်းသွားရတော့သည်။ သူသည် ခဏချင်းမှာပင် မောက်မာသော ပုံစံမှ အားငယ်သော ပုံစံသို့ ပြောင်းလဲသွားခဲ့ရသည်။

…