အခန်း ၈၄

အခန်း ( ၈၄ ) – ဧကရီဘိသိတ်မြှောက်ခြင်းအခမ်းအနား

"ဒါဟာ ငါတို့ရဲ့ကိုယ်ခံပညာကလပ်ရဲ့ အတောက်ပဆုံး အခိုက်အတန့်ပဲ။ လူတိုင်း၊ ဓာတ်ပုံတွေ အများကြီး ရိုက်ကြရအောင်"

"ငါတို့ရဲ့ ပရိုမိုးရှင်းအတွက် ဖိုရမ်မှာ တင်ပေးမယ်။ နောက်နှစ်ဆို ငါတို့ကလပ်ရဲ့ အဖွဲ့ဝင်ဦးရေ သုံးဆယ်ကျော် သွားသင့်တယ်"

အရည်အချင်းပြည့်မီသောကလပ်ဥက္ကဋ္ဌတစ်ဦးအနေဖြင့် အဖွဲ့ဝင်စည်းရုံးရေးသည် သူမ ထည့်သွင်းစဉ်းစားရမည့် ကိစ္စ ဖြစ်သည်။

ဖုန့်ချင်းယီက "စည်းရုံးရေး မလုပ်ခင် ယုံကြည်ရတဲ့ကိုယ်ခံပညာဆရာအချို့ကို အရင်ရှာသင့်တယ်" ဟု အကြံပြုသည်။

"ဒါက အပျော်တမ်းကလပ်တစ်ခုပဲ ဖြစ်ပေမယ့် ငါတို့ တစ်ခုခု သင်ပေးဖို့ လိုသေးတယ်။ မဟုတ်ရင် လူတွေက အချိန်ဖြုန်းဖို့ ပိုက်ဆံပေးနေတာ မဟုတ်ဘူးလား။"

လော့နျူက အားပါးတရ သဘောတူသည်၊ "အစ်မပြောတာ မှန်တယ်လို့ ကျွန်မထင်တယ် အစ်မ။ ကျွန်မတို့ကလပ်က လက်ရှိကိုယ်ခံပညာဆရာက တကယ် အရည်အချင်း မပြည့်မှီဘူး"

လော့ချင်ယွီက ခေါင်းညိတ်ပြီး "နင်ပြောတာကို ငါ ထည့်သွင်းစဉ်းစားပြီး အမြန်ဆုံး သင့်တော်တဲ့ ဆရာတွေကို ရှာဖို့ ကြိုးစားမယ်။ ငါတို့ကလပ်ကို အမြန်ချဲ့ထွင်ဖို့ ကြိုးစားမယ်" ဟု ထောက်ခံသည်။

ကိုယ်ခံပညာပြိုင်ပွဲအပြီးတွင် ဖုန့်ချင်းယီသည် အမှတ် ( ၅၀၀ )ကို အောင်မြင်စွာ ရရှိခဲ့သည်။ လက်ကျန်အမှတ်ကို ကြည့်ရင်း ဖုန့်ချင်းယီသည် စိတ်အားထက်သန်နေခဲ့သည်။

သူမသည် ခဏတာ ဘာမှ မဝယ်ခဲ့ဘဲ ယခု သူမ၏ လက်ကျန်အမှတ်များသည် ( ၉,၂၃၀) မှတ် ရှိနေသည်။

အဆင့်နှစ်ဆိုင်ရှိ ကျန်ရှိသော ပစ္စည်းအားလုံးကို သူမ အလွယ်တကူ ဝယ်ယူနိုင်သည်။

သို့သော် သူမ၏ လက်ရှိ သင်ယူမှု တိုးတက်မှုသည် လိုက်မမီနိုင်ပေ။

အဆင့်မြင့်ဆိုင်များတွင် ဘာတွေရှိသည်ကို သူမ စိတ်ဝင်စားသော်လည်း ဖုန့်ချင်းယီသည် သူမကိုယ်သူမ ထိန်းချုပ်ခဲ့သည်။

သင်တန်းများ အလွန်အကျွံ ဝယ်ယူခြင်းသည် "ငါ အကုန်ဝယ်ပြီးပြီ၊ ဘယ်အချိန်မဆို လေ့လာနိုင်တယ်" ဟူသော စိတ်ဓာတ်ကို ဖြစ်ပေါ်စေပြီး သူမ၏ သင်ယူမှုစွမ်းရည်ကို ထိခိုက်စေလိမ့်မည်ဖြစ်သည်။

ဖုန့်ချင်းယီသည် သူမ၏ အချိန်ကို ကောင်းစွာ စီမံနိုင်သည်ဟု ယုံကြည်ထားသော်လည်း တစ်ချိန်တည်းတွင် သင်တန်းများ အလွန်အကျွံတက်ခြင်းသည် ဖိအားများစွာကို ဖြစ်ပေါ်စေလိမ့်မည်ဖြစ်သည်။

တစ်ကြိမ်လျှင် ခြေတစ်လှမ်း၊ ဖြည်းဖြည်းချင်း သေချာစွာ လုပ်ဆောင်ခြင်းသည် အကောင်းဆုံး ဖြစ်သည်။ နောက်ဆုံးတော့ သူမမှာ အချိန်များစွာ ကျန်သေးသည်။

ကိုယ်ခံပညာပြိုင်ပွဲအပြီးတွင် ဖုန့်ချင်းယီသည် စာသင်ချိန်အတွင်း အလွန်ထူးဆန်းသော ဖြစ်ရပ်တစ်ခုကို သတိပြုမိခဲ့သည်။

သူမ၏ အတန်းဖော်များသည် ရက်စက်သော သားရဲတစ်ကောင်ကို ရင်ဆိုင်နေရသကဲ့သို့ သူမနှင့် ဝေးဝေးနေကြသည်။

ဖုန့်ချင်းယီသည် ဒါကို နားမလည်ပါ။ သူမက တကယ်ပဲ အဲ့လောက် ကြောက်စရာကောင်းနေတာလား။

သူမသည် ရှန်ဟန်ယွဲ့ အား အခြေအနေအကြောင်း မေးမြန်းရန် သွားခဲ့သော်လည်း ပုံမှန်အားဖြင့် အတင်းအဖျင်း ပြောတတ်သော ရှန်ဟန်ယွဲ့ ပင် ယခုတစ်ကြိမ်တွင် အံ့အားသင့်နေပုံရသည်။

"နင် အရမ်းချောနေတာကြောင့် ဖြစ်နိုင်တယ်။ နင်နဲ့ အတူရှိနေတဲ့အခါ သူတို့က နိမ့်ကျတယ်လို့ ခံစားရလို့ ဖြစ်မှာပေါ့"

ဖုန့်ချင်းယီ မျက်လုံးပြူးလိုက်သည်။ ဤရှင်းပြချက်သည် လုံးဝ မဆီလျော်ပါ။

ချွီကျင်းချိုးသည် သူတို့၏ စကားပြောဆိုမှုကို ကြားပြီး သူမ၏ ဖုန်းကို ဖုန့်ချင်းယီအား ပေးလိုက်သည်။

"ဒီစာကို နင်မြင်တာနဲ့ နားလည်သွားလိမ့်မယ်။ ဒါကို တရားဝင်ကျောင်းဖိုရမ်မှာ တင်ထားတာ"

ဖုန့်ချင်းယီက ဖုန်းဖွင့်ကြည့်လိုက်ရာ လော့ချင်ယွီ ရေးသားထားသော ကိုယ်ခံပညာကလပ်အတွက် ကြော်ငြာဆောင်းပါးတစ်ခု ဖြစ်နေသည်ကို တွေ့လိုက်ရသည်။

ဆောင်းပါးကိုယ်တိုင်က ပြဿနာမရှိပါ။ ကိုယ်ခံပညာလေ့ကျင့်ခြင်း၏ အကျိုးကျေးဇူးအချို့ကို စာရင်းပြုစုပြီး လူအများကို ကလပ်သို့ ဝင်ရောက်ရန် တိုက်တွန်းထားသည်။

သို့သော် အဆုံးတွင် လော့ချင်ယွီသည် ထိုအပန်းဖြေပြိုင်ပွဲတွင် သူမနှင့် လော့နျူတို့၏ စွမ်းဆောင်ရည်ကို ချဲ့ကားပြီး စကားအလှဆင်ထားခဲ့သည်။

သူမနှင့် လော့နျူတို့နှစ်ယောက်တည်းဖြင့် အဓိက တက္ကသိုလ်လေးခုကို လွှမ်းမိုးနိုင်ခဲ့ပြီး သူတို့၏ ခွန်အားသည် တုနှိုင်းမမှီနိုင်ကြောင်း ဆိုထားသည်။

ဤအကြောင်းအရာကို ဖတ်ရှုပြီး ဖုန့်ချင်းယီသည် မဆီလျော်ဘူးဟု ယူဆခဲ့သည်။ ဘယ်သူက တကယ် ယုံကြည်မှာလဲ။

"ဒါဆို သူတို့က ဒါကိုမြင်ပြီး ငါ့ကို ကိုယ်ခံပညာရှင်လို့ ထင်လို့ ဝေးဝေးနေကြတာလား။"

ချွီကျင်းချိုး : "အောက်မှာ ဆောင်းပါးရေးထားတာနဲ့ ကိုက်ညီတဲ့ ကြည်တောက်ရှင်းဓာတ်ပုံတွေ ရှိတယ်။ လူတွေ ယုံကြည်တာ မဆန်းပါဘူး"

"ရိုးရိုးသားသားပြောရရင် ဒါကို မြင်တော့ ငါလည်း အရမ်း အံ့သြသွားတယ်"

သူတို့အားလုံး တက္ကသိုလ်ကျောင်းသားများဖြစ်ကြသော်လည်း အမှန်နှင့် အမှားကို ခွဲခြားနိုင်စွမ်း မရှိကြပေ။ သင် မြင်သောအရာသည် အမြဲတမ်း အမှန် မဟုတ်ပါ။

"သူ လုံးဝ ချဲ့ကားပြောနေတာ။ ဒါက အတုအယောင်ဆိုတာ သေချာနေတာပဲ။"

ချွီကျင်းချိုး : "နင်က အမြဲတမ်း နူးညံ့သိမ်မွေ့ပြီး အားနည်းတဲ့ ပုံရိပ်ကို ပြခဲ့တာလေ။ ရုတ်တရက် ကိုယ်ခံပညာရှင် ဖြစ်လာတာကို လူတွေက အစပိုင်းမှာ လက်ခံဖို့ ခက်ခဲလိမ့်မယ်"

ဖုန့်ချင်းယီသည် စိတ်ပျက်သွားသော်လည်း လွှတ်ထားရန် ဆုံးဖြတ်ခဲ့သည်။ ၎င်းသည် သူမကို ဘာမှ ထိခိုက်စေမည် မဟုတ်ပေ။

ရှန်ကျင်းရှိ စစ်သူကြီး၏ အိမ်တော်၌။

ချင်ယွီချွမ်သည် နံနက်ပိုင်း တရားရုံးပြီးနောက် မျက်နှာညိုးငယ်စွာ အိမ်ပြန်ရောက်လာခဲ့သည်။

ချင်ယွီချွမ်သည် ရေကန်ဘေးတွင် ရပ်နေသည်ကို မြင်သော ရွှမ်းယွမ်ရှီက ပိုင်ဝေအား အပေါ်အင်္ကျီ ယူလာခိုင်းလိုက်သည်။

"ယွီချွမ်၊ ဘာဖြစ်ခဲ့တာလဲ။"

ရွှမ်းယွမ်ရှီ၏ အသံကို ကြားသော ချင်ယွီချွမ်က "ဘာမှ မဟုတ်ပါဘူး အမေ။ စိတ်ပူစရာ မလိုဘူး" ဟု ပြန်ဖြေသည်။

"ဒီလောက် မျက်မှောင်ကြုတ်နေတာ ဘာမှ မဟုတ်ဘူးလို့ ဘယ်လိုပြောနိုင်မလဲ။" ရွှမ်းယွမ်ရှီသည် သူမ၏ သားဖြစ်သူအကြောင်းကို ကောင်းစွာ သိသည်။

"တော်ဝင်ကိုယ်လုပ်တော်ယန် ကိုယ်ဝန်ရှိနေတယ်။ အရှင်မင်းကြီးက သုံးရက်အတွင်း သူမကို ဧကရီအဖြစ် တင်မြှောက်ဖို့ အခမ်းအနား ကျင်းပဖို့ ဆုံးဖြတ်လိုက်ပြီ"

ချင်ယွီချွမ်သည် ရှင်းကျန်းတောင်ပိုင်းရေးရာတွင် တော်ဝင်ကိုယ်လုပ်တော်ယန်က မည်သည့်အခန်းကဏ္ဍမှ ပါဝင်ခဲ့သည်ကို မဖော်ထုတ်နိုင်သေးသော်လည်း သူမသည် ရိုးရှင်းသူ မဟုတ်ဟု ခံစားနေရသည်။

ရွှမ်းယွမ်ရှန့်၏ သူမကို ဧကရီအဖြစ် အလျင်အမြန် တင်မြှောက်ခြင်းသည် ပြဿနာများ ဖြစ်ပေါ်စေနိုင်သည်။

ရွှမ်းယွမ်ရှီသည် တစ်သက်လုံး ရှန်ကျင်းတွင် နေထိုင်ခဲ့ပြီး ပွဲတော်များတွင် နန်းတွင်းပွဲများ တက်ရောက်ခဲ့သောကြောင့် တော်ဝင်ကိုယ်လုပ်တော်ယန်အကြောင်း အနည်းငယ် နားလည်ခဲ့သည်။

ချင်ယွီချွမ်၏ စကားများကို ကြားပြီးနောက် သူမက ဖြည်းညင်းစွာ မေးသည် "တော်ဝင်ကိုယ်လုပ်တော်ယန်က တစ်ခုခု မှားနေတာလား။"

"သူမက ရှင်းကျန်းတောင်ပိုင်းသူလေ။"

ရှန်ကျင်း၏ အခြေအနေနှင့် နိုင်ငံအမျိုးမျိုးကြား ဆက်ဆံရေးကို အနည်းငယ် နားလည်ထားသော ရွှမ်းယွမ်ရှီသည် ဤအရာကို ကြားသည်နှင့် "အမေက အရှင်မင်းကြီးရဲ့ အဒေါ်ဆိုတော့ အမေ နန်းတော်ကို သွားပြီး သူ့ကို တိုက်တွန်းလိုက်မယ်" ဟု အလျင်အမြန် ပြောသည်။

ချွင်ယွီချွမ် : "အမေ၊ တချို့အရာတွေကို ကျွန်တော်တို့ တားဆီးလို့ မရဘူး။ သူ ဆုံးဖြတ်ပြီးပြီဆိုမှတော့ ဖြစ်လာမယ့် အကျိုးဆက်ကို သူကိုယ်တိုင် ခံယူရမှာပဲ မဟုတ်ဘူးလား။"

ရွှမ်းယွမ်ရှီက အံ့အားသင့်သွားပြီး ခဏကြာမှ သူမက "မင်းပြောတာမှန်တယ် ယွီချွမ်။ ဒီဘဝမှာ ငါ များများ မတောင်းဆိုဘူး၊ မင်း ဘေးကင်းနေဖို့ပဲ လိုအပ်တယ်" ဟု ပြောသည်။

"ထျန်းချီနဲ့ ရှင်းကျန်းတောင်ပိုင်းကြား စစ်ပွဲပြီးရင် အမေ ကျွန်တော်နဲ့အတူ ရှန်ကျင်းက ထွက်သွားဖို့ ဆန္ဒရှိလား။" ချင်ယွီချွမ်က အကြောင်းအရာကို ပြောင်းလိုက်သည်။

ရွှမ်းယွမ်ရှီက "ရှန်ကျင်းက စည်ပင်သာယာပေမယ့် ဒီလောက် အကြာကြီးနေလာတော့ ငါ ငြီးငွေ့လာပြီ" ဟု ပြောသည်။

"ယွီချွမ်၊ မင်း ဆုံးဖြတ်ပြီးပြီဆိုတော့ မင်းရဲ့ ဆုံးဖြတ်ချက်ကို ငါ လေးစားတယ်။ မင်းက မင်းအဖေထက် ပိုပြီး ပညာရှိတယ်"

ချင်ယွီချွမ်သည် သူ့ရှေ့ရှိ ညှိုးနွမ်းနေသော ကြာပန်းကို ကြည့်လိုက်ပြီး "အမေ အပြင်မှာ လေပြင်းတယ်။ အမေက ကျန်းမာရေး မကောင်းဘူး၊ ကျေးဇူးပြုပြီး အခန်းထဲ ပြန်ပြီး အနားယူပါ" ဟု ပြောသည်။

ရွှမ်းယွမ်ရှီ : "ဒီလောက် အကြာကြီး အနားယူပြီးနောက် ငါ အများကြီး သက်သာလာပြီ။ ယွီချွမ်၊ မင်း ငါ့ကို စိတ်ပူစရာ မလိုဘူး"

"မင်းရဲ့ လုပ်ရပ်တွေမှာ အမြဲတမ်း သတိဝီရိယရှိတာ ငါ သိတယ်၊ ဒါပေမဲ့ မင်း အရမ်းသတိလက်လွတ် မနေနဲ့။ အခု ရှန်ကျင်းမှာ မင်းကို ဘယ်သူမှ လက်လွတ်စပယ် ထိရဲမှာ မဟုတ်ဘူး"

"မင်း လုပ်ချင်တာ လုပ်၊ မင်း မလုပ်ချင်တာကို သဘောတူဖို့ ကိုယ့်ကိုယ်ကိုယ် ဖိအားမပေးနဲ့"

"သူက ဧကရာဇ်ဖြစ်ပြီး မင်းက သူ့ရဲ့ လက်အောက်ခံဖြစ်ပေမယ့် သူက မင်း မရှိရင် ဘာမှ မပြီးမြောက်နိုင်ဘူး"

"ချင်မိသားစုဟာ ဒီတိုင်းပြည်အတွက် လုံလောက်တာထက် ပိုပြီး လုပ်ဆောင်ခဲ့ပြီးပြီ"

ချင်ယွီချွမ်၏ အထင်အမြင်တွင် ရွှမ်းယွမ်ရှီသည် အမြဲလိုလို နူးညံ့သိမ်မွေ့၊ အကျင့်သီလကောင်းမွန်၊ ဂုဏ်သိက္ခာရှိပြီး ရက်ရောသူ ဖြစ်သည်။

ဤစကားများသည် သူမ ပြောမည့်စကားများနှင့် မတူသော်လည်း ယခု သူသည် ၎င်းတို့ကို သူကိုယ်တိုင် နားဖြင့် ဆတ်ဆတ်ကြားခဲ့ရသည်။

"အမေ၊ ကျွန်တော့်အတွက် စိတ်မပူနဲ့။ ကျွန်တော် အားလုံး နားလည်ပါတယ်"

နန်းတက်ပြီးကတည်းက ရွှမ်းယွမ်ရှန့်ထံတွင် မိဖုရားများစွာ ရှိသော်လည်း ဧကရီရာထူးမှာ လစ်လပ်နေဆဲ ဖြစ်သည်။

မုရုံယန် ကိုယ်ဝန်ရှိမှန်းသိပြီးနောက် ရွှမ်းယွမ်ရှန့်သည် အလွန်ဝမ်းမြောက်ဝမ်းသာဖြစ်ပြီး သူမကို ဧကရီအဖြစ် တင်မြှောက်ရန် ချက်ချင်း အမိန့်တော် ထုတ်ပြန်ခဲ့သည်။

နန်းတွင်းဝန်ကြီးများသည် ဤကိစ္စနှင့် ပတ်သက်၍ အဆုံးမရှိ ငြင်းခုံကြသော်လည်း ရွှမ်းယွမ်ရှန့်သည် စကားတစ်ခွန်းဖြင့် ၎င်းတို့ကို တိတ်ဆိတ်စေခဲ့သည်: "ဒါဟာ ငါ့ရဲ့ မိသားစုရေးရာဖြစ်ပြီး ဘယ်သူ့ကိုမှ ဝင်ရောက်စွက်ဖက်ခွင့် မပြုဘူး"

ဧကရီအဖြစ် ဘိသိက်မြှောက်အခမ်းအနားသည် အလွန်ခမ်းနားထည်ဝါခဲ့သည်။ ရွှမ်းယွမ်ရှန့်သည် မုရုံယန်နှင့်အတူ ရွှမ်ကျန်းခန်းမတွင် နန်းတွင်းအရာရှိများ၏ အရိုအသေပေးခြင်းကို ခံယူခဲ့သည်။

မုရုံယန်သည် အောက်တွင် ဒူးထောက်နေသော ဝန်ကြီးများ၏ တန်းစီနေသည်ကို ကြည့်ကာ သူမ၏ အပြုံးသည် တောက်ပနေသည်။

သူတို့ သူမကို သဘောမတူသည်ဖြစ်စေ၊ မနှစ်သက်သည်ဖြစ်စေ ဒါက ဘာအရေးလဲ။ နောက်ဆုံးတွင် သူတို့သည် ဒူးထောက်၍ သူမအား ဦးညွှတ်ရမည်ဖြစ်သည်။

သူမသည် ရွှမ်းယွမ်ရှန့်ကို ထိန်းချုပ်ပြီး သူ့အား မင်းသားလေး တစ်ပါး မွေးဖွားပေးနိုင်သရွေ့ ထျန်းချီသည် အနှေးနှင့်အမြန်ဆိုသလို သူမ၏ လက်ထဲသို့ ရောက်လာလိမ့်မည်။

***