အခန်း ၂၆၆

အပိုင်း(၂၆၆) ဘိုးဘေးက အထူးဧည့်သည်ကို ဆင့်ခေါ်ခြင်း

"ရိုင်းလိုက်တာ။"

"အစေခံတစ်ယောက်က ဒီလို အဓိပ္ပာယ်မရှိတာတွေကို ပြောရဲတယ်ပေါ့။ လီတိုင်ယွမ်... မင်းရဲ့ခွေးကို သေချာကြိုးတပ်ထား။ မဟုတ်ရင် သတ်ပစ်မယ်။"

လီရှစ်က သူ၏ယပ်တောင်ကို ပိတ်ကာ အေးစက်စွာ အော်လိုက်သည်။

သူ စကားပြောနေစဉ်မှာပင် စုချင်ချိုးကို အမှတ်မထင်တွေ့လိုက်ရပြီး နှုတ်ခမ်းများပေါ်တွင် ရင်းနှီးသော အပြုံးတစ်ခု ပေါ်လာကာ ပြောလိုက်သည်။

"ဒါက လျှို့ဝှက်ဆန်းကြယ်တဲ့သခင်လေးရဲ့ အစေခံမလေး ဖြစ်ရမယ်။ မင်းရဲ့သခင်လေး ဘယ်မှာလဲ။ ဘာလို့ ငါတို့ဆီလာပြီး ဧည့်သည်အဖြစ်မနေတာလဲ။"

စုချင်ချိုးက အဝေးမှ ကောင်းကင်ကို တည့်တည့်ကြည့်ကာ တည်ငြိမ်စွာ ပြောလိုက်သည်။ "ရှင်က ကျွန်မကို တွေ့ဖို့ မထိုက်တန်ဘူး။"

ထိုစကားကိုကြားသောအခါ လီရှစ်၏မျက်လုံးတွင် မှုန်မှိုင်းသော အရောင်တစ်ခု ဖြတ်သန်းသွားသည်။

သူက သူတို့နှစ်ယောက်လုံး၏ အထင်သေးခြင်းကို ခံလိုက်ရသည်။

သူက အဆင့်အတန်းနိမ့်သော အနက်ရောင်ဝတ်လူငယ်ကိုတော့ ဆူပူရဲသော်လည်း ထိုအစေခံမလေးကို မဆူပူရဲပေ။

ကျိမိသားစုကိုပင် ကြောက်လန့်သွားအောင် လုပ်နိုင်သည့် လျှို့ဝှက်ဆန်းကြယ်သော သခင်လေးသည် သာမန်လူမဟုတ်ကြောင်း သေချာ၏။

လီရှစ်၏အမူအရာမှာ မပြောင်းလဲဘဲ ဆက်ပြောသည်။

"လီမိသားစုဆီ ဘာကိစ္စများ လာတာလဲဆိုတာ သိပါရစေ။ တကယ်လို့ မင်းမှာ လိုအပ်တာတစ်ခုခုရှိရင ငါ လီရှစ်နန်က ကူညီနိုင်ရင် သေချာပေါက် ကူညီပေးပါ့မယ်။"

သူက စုချင်ချိုးကို အထင်သေးသော်လည်း သူ၏အနောက်ရှိ သခင်လေးကိုတော့ လေးစားသည်။ အကယ်၍ သူသာ ထိုသူနှင့် ဆက်ဆံရေး တည်ဆောက်နိုင်ပါက မိသားစုခေါင်းဆောင်ရာထူးအတွက် အနာဂတ် တိုက်ပွဲတွင် အကူအညီတစ်ခု ပိုရလာမည် ဖြစ်သည်။

အရှက်ကွဲတာ နည်းနည်းလေးပါပဲ။ ငါ သည်းခံနိုင်တယ်။

"ရှင်နဲ့ ဘာမှမဆိုင်ဘူး။" စုချင်ချိုးက တိုတိုတုတ်တုတ် ပြန်ဖြေလိုက်သည်။

အနီးအနားတွင် စောင့်ကြည့်နေသော မျိုးနွယ်စုဝင်အချို့က လီရှစ်ကို ထူးဆန်းသော မျက်လုံးများဖြင့် ကြည့်လိုက်ကြသည်။

ထိုအကြည့်များက "သူက မင်းကို ဒီလောက်တောင် အထင်သေးနေတာကို မျက်နှာချိုသွေးဖို့ ကြိုးစားနေတုန်းပဲ။ မင်းက မိန်းမဆန်တဲ့သူတင်မကဘူး။ နှိပ်စက်ခံရတာကို နှစ်သက်တဲ့သူ တစ်ယောက်ပဲ" ဟူ၍ ပြောနေသကဲ့သို့ ဖြစ်နေသည်။

လီရှစ်မှာ မျက်နှာပျက်သွားပြီး ဒေါသတကြီး ထွက်သွားရန် ပြင်လိုက်သည်။

ထိုအခြေအနေကို မြင်သောအခါ၊ လီရှောင်က ချက်ချင်းပင် အခြေအနေကို ပြေလည်အောင် လုပ်လိုက်သည်။ "ဧည့်သည်တော်... ကြိုဆိုပါတယ်။ ကျွန်တော့်သမီးက အံ့ဖွယ်နည်းနဲ့ အသက်ရှင်လျက် ပြန်လာနိုင်ခဲ့တာဆိုတော့ နှစ်ထပ်ကွမ်း အောင်ပွဲပါပဲ။ ဒီဧည့်သည်တော်ကို ဧည့်ခံဖို့ ခမ်းနားတဲ့ ပွဲကြီးတစ်ခု ကျင်းပဖို့ ကျွန်တော် ဆုံးဖြတ်လိုက်ပါတယ်..."

လီရှောင်က တွန့်ဆုတ်နေပြီးမှ ပြောလိုက်သည်။ "ဒီနတ်သမီးလေးရဲ့နာမည်ကို မမေးရသေးဘူးနော်"

"စုချင်အာပါ။" စုချင်ချိုး၏ အေးစက်သောအမူအရာမှာ အနည်းငယ် ပြေလျော့သွားပြီး သမ၏ သဘောထားကိုဖော်ပြရန် ခေါင်းကို အနည်းငယ် ညိတ်ပြလိုက်သည်။

"နတ်သမီးစု၊ ဒီနေ့ မင်းက လီမိသားစုရဲ့ အထူးဧည့်သည်တော်ပါ။"

လီရှောင်က အားရပါးရ ရယ်မောလိုက်ပြီး သူ၏စိတ်ခံစားချက်မှာ အလွန် ကောင်းမွန်နေလေသည်။

သမီးဖြစ်သူ အသက်အန္တရာယ်ကင်းပြီး မိသားစု ခေါင်းဆောင်နေရာလည်း လုံခြုံနေသည့်အပြင် လျှို့ဝှက်ဆန်းကြယ်သောသခင်လေး၏ အစေခံပါ ထပ်တိုးလာသဖြင့် သူ၏ကံကြမ္မာမှာ အမှန်တကယ်ကို ထူးခြားလှသည်။

"ကောင်းပြီလေ။"

စုချင်ချိုး ခေါင်းညိတ်လိုက်သည်။

ရုတ်တရက် လီရှောင်၏ ရယ်မောသံ ရပ်တန့်သွားသည်။ သူက သေချာစွာ နားထောင်လိုက်ပြီး သူကြားရသည့်အရာကို အကြိမ်ကြိမ် သဘောတူလိုက်သည်။

ထို့နောက် လီတိုင်ယွမ်နှင့် သူ့အနောက်ရှိ အနက်ရောင်ဝတ် လူငယ်ကို ကြည့်ကာ လေးနက်စွာ ပြောလိုက်သည်။

"ဘိုးဘေးက မင်းတို့နှစ်ယောက်ကို ဆင့်ခေါ်နေတယ်။ မြန်မြန်သွားကြ။"

လီတိုင်ယွမ် အနည်းငယ် နားမလည်နိုင် ဖြစ်သွားသည်။

ဘိုးဘေးက ငါ့ကို ဘာလို့ ဆင့်ခေါ်တာလဲ။

သူ၏ အမူအရာမှာ မပြောင်းလဲဘဲ ပြောလိုက်သည်။ "ကောင်းပါပြီ။ အခုချက်ချင်း သွားပါ့မယ်။"

အကောင်းဆုံးပဲ။

ဘိုးဘေးလီရွှမ်ကျင်းက ကောင်းကင်ကြည့်ဆောင်ရဲ့ ဒသမမြောက် နန်းဆောင်သခင်ဖြစ်ပြီးတော့ သူက မှတ်ဉာဏ် မပျောက်ဆုံးသေးဘူး။

သူက "ယွမ်"ကို သေချာပေါက် ခွဲခြားနိုင်ပြီးတော့ ကောင်းကင်ကြည့်ဆောင်ရဲ့ သခင်လေး ဟုတ်မဟုတ် ဆိုတာကို ဆုံးဖြတ်နိုင်လိမ့်မယ်။ တကယ်လို့ သူက အတုအယောင်ဆိုရင် သူ့ကို နေရာမှာတင် ဖမ်းဆီးပြီး သတ်ပစ်လိမ့်မယ်။ တကယ်လို့ သူက အစစ်အမှန်ဆိုရင် သူ့ရဲ့အမိန့်တွေကို လိုက်နာလိမ့်မယ်။

မှတ်ဉာဏ် မပျောက်ဆုံးခင်တွင် လီတိုင်ယွမ်က အနာဂတ်လူသားဧကရာဇ်ကို ကူညီရန် ကိုယ့်ကိုယ်ကိုယ် ညွှန်ကြားချက် ပေးခဲ့သည်။ သို့သော် ယခုတော့ သခင်လေးနှစ်ယောက် ဖြစ်နေရာ ညွှန်ကြားချက်များက ရှုပ်ထွေးသွားလေပြီ။

သူက အတုအယောင်ကို ဖော်ထုတ်ပြီး အတွင်းစိတ်ညွှန်ကြားချက်များကို ပုံမှန်အခြေအနေသို့ ပြန်လည် ရောက်ရှိစေရန် အရေးတကြီး လိုအပ်နေသည်။ မဟုတ်ပါက သူ၏အစီအစဉ် နောက်တစ်ဆင့်ကို ဆက်လက်၍ လုပ်ဆောင်နိုင်မည် မဟုတ်ပေ။

"ယွမ်... သွားကြစို့။"

လီတိုင်ယွမ်က မုန့်ချင်ကျိုးကိုခေါ်လိုက်ပြီး ရှေ့မှ လမ်းပြသွားလေသည်။

လီယွမ်ခုံးနှင့် သူ၏မြေး လီရှစ်တို့သည် သူတို့နှစ်ဦး ဘိုးဘေးများ တံခါးပိတ်ကျင့်ကြံနေသော ကမ္ဘာငယ်လေးဆီသို့ လျှောက်သွားသည်ကို ကြည့်နေကြသည်။ သူတို့ တစ်ယောက်ကိုတစ်ယောက် အချင်းချင်း ကြည့်လိုက်ကြပြီး မျက်လုံးများ တောက်ပသွားသည်။

အဆိုးတွေထဲက အကောင်းတစ်ခု ဖြစ်ပါစေလို့ပဲ မျှော်လင့်တယ်။

ဘိုးဘေးက လီတိုင်ယွမ်ကို မိသားစုခေါင်းဆောင်အဖြစ် ဆက်ခံခွင့်ကနေ တိုက်ရိုက်ရုပ်သိမ်းလိုက်ရင် အကောင်းဆုံးပဲ။

"သူတို့ကို ဂရုမစိုက်နဲ့။ ငါ ချက်ချင်း ပွဲတစ်ပွဲ ပြင်ဆင်ခိုင်းလိုက်မယ်။ ပြီးတော့ ငါ့ရဲ့ တန်ဖိုးကြီးဝိုင်ကို ထုတ်လာခဲ့မယ်။ နတ်သမီးစု... ကျေးဇူးပြုပြီး" လီယွမ်ခုံးက ပြုံးလျက် ပြောလိုက်သည်။

စုချင်ချိုးက ဧကရာဇ်ထွက်သွားသည်ကို မျက်လုံးထောင့်မှ ကြည့်နေခဲ့ပြီး သူ၏ အမြဲတမ်း အေးစက်ပြီး ခပ်တန်းတန်းမျက်နှာမှာ ရုတ်တရက် အက်ကွဲလာလေသည်။

ငါ ဘာလုပ်ရမလဲ။ လူတွေ အများကြီးပဲ။

ငါက အာရုံစိုက်ခံရတဲ့အလယ်ဗဟိုလို ခံစားရတယ်။ သခင်လည်း အနားမှာ မရှိဘူး။ ငါ အတော်လေး စိုးရိမ်နေတယ်။

"နတ်သမီး။" တစ်ဖက်လူက သူ့ကို လျစ်လျူရှုထားသည်ကို မြင်သောအခါ လီယွမ်ခုံးက နတ်သမီးစုသည် သူ၏မြေးဖြစ်သူကို ဆုံးမနေပြီး မိသားစုအကြီးအကဲကို အခက်တွေ့အောင် လုပ်မည်ဟု ထင်သွားသည်။ လျစ်လျူရှုခံရရန် သူ ပြင်ဆင်ထားပြီးသား ဖြစ်သည်။

မည်သူက သိလိမ့်မည်နည်း။

စုချင်ချိုး၏ဦးနှောက်မှာ တစ်ခဏမျှ အေးခဲသွားသကဲ့သို့ ဖြစ်သွားပြီ တွေဝေစွာ ခေါင်းညိတ်ကာ ပြောလိုက်သည်။ "ကောင်းပြီ၊ သွားစားကြတာပေါ့…"

ထိုစကားကို ကြားသောအခါ လီယွမ်ခုံး၏မျက်လုံးများ တောက်ပသွားပြီး လီရှောင်ကို အောင်နိုင်သူ တစ်ယောက်လို စူးရဲစွာ ကြည့်လိုက်သည်။

ဟေ့။ ငတုံးအဘိုးကြီး။ လူကို ငါ ခေါ်သွားပြီ။ မင်းရဲ့အစေခံနဲ့ မင်းသမီးအတွက် ပြင်ဆင်ထားတဲ့ ညစာကို မင်းပဲ ထားခဲ့လိုက်တော့။

လီရှောင်လည်း အနည်းငယ် ရှုပ်ထွေးသွားပြီး သူ၏မျက်လုံးများ ပြူးကျယ်သွားသည်။

ဘာတွေ ဖြစ်နေတာလဲ။ ဒီနတ်သမီးစုကို ငါ့သမီးက အိမ်ကိုဖိတ်ခေါ်လာတာ မဟုတ်ဘူးလား။ သူက ဘာလို့ ဒီလူယုတ်မာကြီး လီယွမ်ခုံးနဲ့ ပြန်သွားရပ်နေတာလဲ။ ဒီလူယုတ်မာကြီးနဲ့ ငါနဲ့မတည့်ဘူးဆိုတာ သူ မမြင်ဘူးလား။

"ဟေး... ခေါင်းဆောင်လီ... အဲဒီမှာ ဘာရပ်လုပ်နေတာလဲ။ အတူတူ သွားစားကြတာပေါ့။" စုချင်ချိုးက လှည့်ကြည့်လိုက်ရာ လီရှောင် အနေခက်စွာ ရပ်နေသည်ကို မြင်လိုက်ရသဖြင့် နားမလည်စွာ မေးလိုက်သည်။

လီယွမ်ခုံးက ချက်ချင်းပင် ပြောလိုက်သည်။ "နတ်သမီး... သူ့အတွက် စိတ်မပူပါနဲ့။ မိသားစု ခေါင်းဆောင်က သူ့ရဲ့သမီးလေးနဲ့ အဲဒီနောက်လိုက်ကို စောင့်နေတာ။ သူက မင်းကို ဂရုစိုက်နိုင်မှာ မဟုတ်ဘူး။"

ထိုသို့ပြောပြီးနောက် လီယွမ်ခုံးက မျက်နှာပေါ် မကျေနပ်မှု အရိပ်အယောင်တစ်ခုခုကို မြင်ရလိုမြင်ငြား မျှော်လင့်ချက်အပြည့်ဖြင့် ကြည့်လိုက်သည်။

သို့သော် မကြာမီမှာပင် စုချင်ချိုးက အမူအရာ မပြောင်းလဲဘဲ ခေါင်းညိတ်လိုက်သည်။

"အိုး။ အဲဒါက ဟုတ်ပါတယ်။"

ဧကရာဇ်က ငါ့ထက်ပိုအရေးကြီးတာ အသေအချာပဲ။ ဒါက ပုံမှန်ပဲလေ။ နားလည်ပေးနိုင်ပါတယ်။

"ဒါနဲ့... ရှင်ပြောတဲ့ အဲဒီတန်ဖိုးကြီးဝိုင်က ဘယ်လောက် အရည်အသွေးကောင်းလဲ။" စုချင်ချိုးက လှည့်ကာ မေးလိုက်သည်။

"နတ်ဘုရားထုတ်ကုန်တစ်ခုပါ..."

"အရက်ပါဝင်မှုက လုံလောက်ရဲ့လား။ လွယ်လွယ် မူးစေနိုင်လား။ ထားလိုက်ပါတော့။ သခင်လေးက မိန်းကလေးတွေ အပြင်မှာ အရက်မသောက်ရဘူးလို့ အမိန့်ပေးထားတယ်။ ဒါကြောင့် အရက် မပြင်ထားပါနဲ့။ အစားအစာတွေပဲ ပိုယူလာခဲ့ပါ။"

"ကောင်းပါပြီ..."

လီယွမ်ခုံးက ကျေနပ်မှုအရိပ်အယောင်ပင် ပါဝင်နေသည့် စုချင်ချိုး၏အမူအရာကို ငေးကြည့်ရင်း လုံးဝ နားမလည်နိုင် ဖြစ်သွားသည်။

ဘာတွေ ဖြစ်နေတာလဲ။

ဒါက သာမန်လူတွေနားမလည်နိုင်တဲ့ ပုန်းအောင်းနေတဲ့ ပညာရှိတစ်ယောက်ရဲ့ စိတ်ဓာတ်များလား။

အတွေးနက်သော အဘိုးအိုနှစ်ဦးဖြစ်သည့် လီရှောင်နှင့် လီယွမ်ခုံးတို့က ကြိုတင်ယူဆချက်များ ရှိနေကြပြီး စုချင်ချိုးကို အလွန်အဆင့်မြင့်သော သတ္တဝါတစ်ဦးအဖြစ် စိတ်ကူးယဉ်ထားကြသည်။ တစ်ခဏမျှ သူတို့သည် သူ့ကို နားမလည်နိုင်ဖြစ်ကာ တိတ်တဆိတ် သတိထားနေကြပြီး လျှို့ဝှက်ဆန်းကြယ် သခင်လေး၏ အစေခံပီသစွာ သူ၏အတွေးများကို ခန့်မှန်းရန် မဖြစ်နိုင်ကြောင်း တွေးနေကြသည်။

လီရှစ်က အေးစက်စွာနေပြီး သူ့ကို လုံးဝလျစ်လျူရှုကာ ဘေးသို့တစ်ချက်ကြည့်ပြီးနောက် ပခုံးတွန့်ကာ လှောင်ပြောင်လိုက်သည်။

ညအချိန် ရောက်ရှိလာပြီ ဖြစ်သည်။

ချင်လွမ်ထျန်းရှိ လီမိသားစု၏ နေအိမ်မှာ လင်းထိန်နေ၏။

လီတိုင်ယွမ် ဘေးကင်းစွာ ပြန်ရောက်လာပြီး လျှို့ဝှက်ဆန်းကြယ်သော သခင်လေး၏ အစေခံမလေးကို ခေါ်လာကြောင်း မျိုးနွယ်စုဝင်များ ကြားသိရပြီးနောက် လီယွမ်ခုံးနှင့် သူ၏မြေး လီရှစ်တို့က အစေခံမလေးကို ပွဲတော်သို့ အောင်မြင်စွာ ဖိတ်ကြားနိုင်ခဲ့ကြောင်း ကြားသိရသောအခါ အားလုံးက လက်ဆောင်များ ပေးရန် အပြေးအလွှား ရောက်ရှိလာကြသည်။

"အိုး... ရှင်တို့က အရမ်း သဘောကောင်းတာပဲ။"

နတ်ဘုရား ပါဝင်ပစ္စည်းများဖြင့် ပြုလုပ်ထားသော ဟင်းပွဲများ အပြည့်ရှိသည့် စားပွဲကြီးကို စုချင်ချိုး ကြည့်လိုက်သောအခါ ခံတွင်းမြိန်လာပြီး ချက်ချင်းပင် ပန်းကန်တစ်ခုကို ယူကာ ပြသလိုက်သည်။

ဒီအချိန်အတွင်းမှာ လီမိသားစုဝင် အများအပြားလည်း လက်ဆောင်တွေ ပေးဖို့ ရောက်လာကြသည်။

စုချင်ချိုးက ၎င်းတို့အားလုံးကို တုံ့ဆိုင်းမနေဘဲလက်ခံလိုက်ရာ လက်ဆောင်ဗူးများမှာ သူ၏ ခြေရင်းတွင် ပုံလာလေသည်။ ဘူးအသစ်တစ်ခုကို ဖွင့်လိုက်သောအခါ အတွင်းတွင် ကောင်းကင်အဆင့် သားရဲဥတစ်လုံးကို တွေ့လိုက်ရသည်။ သူ၏ လှပသောမျက်လုံးများ တောက်ပသွားပြီး ၎င်းကို သိုလှောင်လက်စွပ်ထဲသို့ ချက်ချင်း ထည့်လိုက်ကာ ရူးကြောင်ကြောင် ပြုံးလိုက်သည်-

"အများကြီး ကျေးဇူးတင်ပါတယ် (๑＞◡＜๑)။"

"ရှင်တို့က အရမ်း လူကောင်းတွေပဲ။ (๑•̀ㅂ•́)و✧"

စုချင်ချိုး၏ ရူးကြောင်ကြောင်အပြုံးကို မြင်လိုက်ရာ လက်ဆောင်များပေးပြီးခါစ လီမိသားစုဝင်များ၏ ပျော်ရွှင်မှုမှာ ရုတ်တရက် ထိုးကျသွားလေ၏။

သူတို့အားလုံး လီယွမ်ခုံးနှင့် သူ၏မြေး လီရှစ်တို့ကို မပြောပြနိုင်သော သံသယများဖြင့် ကြည့်လိုက်သည်။

တချို့လူများက ကောလာဟလတွေနှင့် ပတ်သက်ပြီး တိုက်ရိုက် မေးမြန်းကြသည်။

"အကြီးအကဲ... ဒီလူက လျှို့ဝှက်ဆန်းကြယ်တဲ့သခင်လေးရဲ့ အစေခံဆိုတာ သေချာရဲ့လား။"

လီယွမ်ခုံးက စားပွဲ၏အစွန်းတွင် ထိုင်လျက် တိတ်ဆိတ်နေသည်။ သူက တူကိုချထားပြီး ပါးစပ်မှ ဆီများယိုကျနေသော စုချင်ချိုး၏ စားသောက်နေပုံကို စောင့်ကြည့်နေလေသည်။

လီရှစ်က လှောင်ပြောင်လိုက်ပြီး သူ၏မျက်လုံးများတွင် အထင်သေးမှုများ ပြည့်နှက်နေ၏။

ရိုင်းလိုက်တာ။

...