အခန်း ၃၅၂

အခန်း (၃၅၂) - ခရီးလမ်း၏ ဖြစ်နိုင်ခြေရှိသော အဆုံးသတ် (၃)

ယင်ရုံ၏လက်ပေါ်တွင် နှင်းဆီဖြူများပေါ်လာပြီးနောက် ဓားပေါ်တွင် မီးတောက်ဖြူများ တောက်လောင်လာသည်ကို မြင်လိုက်ရသောအခါ သူမနှင့် အချိန်အတော်ကြာ တိုက်ခိုက်ခဲ့ပုံရသော လိုင်ရိုအပါအဝင် ထိုနေရာရှိလူအားလုံးမှာ သိသိသာသာပင် သတိရှိသွားကြလေသည်။

မီးတောက်များထွက်ပေါ်လာသည်နှင့် တစ်ပြိုင်နက် အပူချိန်မှာ ချက်ချင်း အတက်အကျဖြစ်သွား၏။

မည်သည့်သတ္တုကိုမဆို ထောပတ်ကဲ့သို့ အရည်ပျော်သွားစေနိုင်မည်ဟု ထင်ရသော စင်ကြယ်သည့် မီးတောက်ဖြူများကြောင့် အပူချိန်ကျဆင်းသွားခြင်းမှာ အလွန်ရယ်သွမ်းသွေးချင်စရာ ကောင်းနေပေသည်။

ကျိုးရီနှင့် ကျိုးလီချင်းတို့နှစ်ဦးလုံး၏ မျက်နှာများမှာ တင်းမာခက်ထန်နေကြသည်။

ကျိုးမျိုးနွယ်စုတွင် သဘာဝခန္ဓာကိုယ်ဖွဲ့စည်းပုံများကို လုံလောက်စွာ မြင်တွေ့ခဲ့ဖူး‌သောကြောင့် ယင်ရုံတွင် ကိုယ်ပိုင်သဘာဝခန္ဓာကိုယ် ဖွဲ့စည်းပုံတစ်ခု ရှိနေကြောင်းကို အလွယ်တကူ ခွဲခြားသိမြင်နိုင်လေသည်။

ယင်း၏အဓိပ္ပာယ်မှာ သူမ၏ ထူးချွန်ပြောင်မြောက်လှသော ဓားနှစ်လက်ကိုင်ကျွမ်းကျင်မှုများကို သတိထားရမည့်အပြင် ခန္ဓာကိုယ်ဖွဲ့စည်းပုံ၏ စွမ်းရည်များကိုပါ သတိထားရမည် ဖြစ်ပေ၏။

ထို့အပြင် အခြေအနေကိုကြည့်ရသလောက် ၎င်းမှာ ယုမေ၏ ခန္ဓာကိုယ်ဖွဲ့စည်းပုံကဲ့သို့ ထောက်ပံ့ရေးအမျိုးအစား မဟုတ်ဘဲ တိုက်ခိုက်ရေးအမျိုးအစား ဖြစ်နေပေသည်။

ယင်ရုံသည် အသက်ရှူထုတ်လိုက်တိုင်း ခပ်မှိန်မှိန်မြူခိုးများကို မှုတ်ထုတ်လိုက်ပြီး အသက်ရှူသွင်းလိုက်တိုင်း ထိုမြူခိုးများကို ပြန်လည်စုပ်ယူနေသဖြင့် သူမ၏အသက်ရှူသံမှာ အနည်းငယ် ပြင်းထန်လာလေသည်။

သူမ ရုတ်တရက် အသွင်ပြောင်းလဲနေစဉ်မှာပင် ဟယ်ရှန်း၏မြားတစ်စင်း ရောက်ရှိလာ၏။

သူမသည် မီးတောက်ဖြူများလွှမ်းခြုံထားသော ဓားတစ်လက်ဖြင့် ထိုမြားကို ပေါ့ပေါ့ပါးပါးပင် ရိုက်ချလိုက်သည်။

ထိုအခါ မြားမှာ ကြယ်ကလေးများကဲ့သို့ တောက်ပနေသော ကြည်လင်သည့် သလင်းကျောက်အစအနလေးများအဖြစ် ပေါက်ကွဲထွက်သွားပြီး နှင်းဆီရနံ့သင်းပျံ့နေသော မြူခိုးပါးပါးလေးများကို ချန်ရစ်ကာ ပျောက်ကွယ်သွားလေတော့သည်။

မြားပေါက်ကွဲထွက်သွားသည်ကို မြင်သောအခါ ကျိုးရီမှာ စိုးရိမ်တကြီး တံတွေးမျိုချလိုက်မိသည်။

အကယ်၍သာ မြားမဟုတ်ဘဲ သူ့လက်များဖြစ်နေခဲ့လျှင် မည်သို့ဖြစ်သွားမည်နည်းဟု သူ မတွေးဘဲ မနေနိုင်ခဲ့ပေ။

သို့သော်လည်း သူသည် ယင်ရုံ၏ တိုက်ခိုက်နိုင်သော အကွာအဝေးအတွင်းသို့ ရောက်ရှိနေပြီဖြစ်ရာ အချိန်နှောင်းသွားချေပြီ။

သူသည် လှိုင်းပုတ်လက်သီးသိုင်းကို ချက်ချင်းထုတ်လိုက်ရာ လက်သီးများမှာ ရေကဲ့သို့ ချောမွေ့ပျော့ပြောင်းသွားပြီး ကြီးမားလှသော လှိုင်းလုံးကြီးတစ်ခု၏ ကြမ်းကြုတ်ရက်စက်မှုမျိုး ပါဝင်လာလေသည်။

ယင်ရုံက သူ့ထက် သေးငယ်နေသော်လည်း သူသည် အနည်းငယ်မျှ အားမနာဘဲ လက်သီးကို ပစ်သွင်းလိုက်၏။

ယင်ရုံသည် သူမ၏ ဓားရိုးဖြင့် ထိုလက်သီးကို ပေါ့ပေါ့ပါးပါးပင် ကာကွယ်လိုက်ရာ ပွတ်တိုက်မှုမှတစ်ဆင့် ဒေါင်ခနဲ အသံတစ်သံ ထွက်ပေါ်လာသည်။

ကျိုးရီမှာ သူ၏ညာဘက်လက်မောင်းဆီသို့ ရုတ်တရက် စူးရှသော နာကျင်မှုတစ်ခု တွားသွားတက်လာသည်ကို ခံစားလိုက်ရပြီး ထိုနာကျင်မှုနှင့်အတူ နာကျင်ခြင်းကို ဖြစ်ပေါ်စေသော ရေခဲစက်များပါဝင်သည့် ပူလောင်သော ခံစားမှုတစ်ခုကိုပါ ခံစားလိုက်ရလေသည်။

သူသည် လက်သီးကို အလျင်စလိုပြန်ရုပ်ရန် ကြိုးစားလိုက်သော်လည်း ထိုလက်မောင်းအတွင်းရှိ လှုပ်ရှားမှုများမှာ အနည်းငယ် နှေးကွေးလေးလံနေကြောင်း တွေ့လိုက်ရ၏။

ယင်းမှာ သာမန်မျက်စိဖြင့် သတိပြုမိနိုင်လောက်သည်အထိ နှေးကွေးခြင်းမရှိသော်လည်း ယင်ရုံအတွက် အခွင့်ကောင်းယူနိုင်ရန်မူ လုံလောက်ပေသည်။

သူမသည် ကျိုးရီ၏ ကာကွယ်မှုကင်းမဲ့နေသော ခန္ဓာကိုယ်ဆီသို့ ရွယ်ကာ အားလပ်နေသော ဓားကို အမြန်ဝှေ့ယမ်းလိုက်သည်။

သူမ၏ဓား ထိခတ်တော့မည့်ဆဲဆဲတွင် ကျိုးလီချင်းက လက်ဝါးသိုင်းဖြင့် ဓားကို ဘေးဘက်သို့ တွန်းဖယ်ရန် ကြိုးစားလိုက်လေသည်။

သူမ၏လက်ဝါးနှင့် ဓားတို့ ထိခတ်မိသောနေရာမှ လှိုင်းဂယက်ကဲ့သို့သော လှိုင်းတစ်ခုထွက်ပေါ်လာပြီး ကျယ်လောင်သော မြည်ဟည်းသံတစ်ခု ဖြစ်ပေါ်သွား၏။

သို့သော်လည်း ဓားသွားမှာ တစ်ချက်မျှ မလှုပ်ရှားသွားပေ။

သို့တိုင် သူမ၏ တိုက်ခိုက်မှုက ဓားကို မီလီစက္ကန့်အနည်းငယ်ခန့် ရပ်တန့်သွားစေခဲ့ရာ ကျိုးရီ နောက်သို့ခုန်ဆုတ်ရန်အတွက် လုံလောက်သွားပြီး ထိုတိုက်ခိုက်မှုမှ လက်မဝက်ခန့်အကွာတွင် လွဲချော်သွားခဲ့သည်။

သူ၏ စုတ်ပြဲနေသော ဝတ်ရုံပေါ်တွင် ချောမွေ့သော ဓားရာတစ်ခု ထွက်ပေါ်လာပြီး ရင်ဘတ်တစ်စိတ်တစ်ပိုင်း၌ ချက်ချင်း ပြန်ကျက်သွားသော တိမ်ယောင်ယောင်ဒဏ်ရာတစ်ခု ရရှိသွားလေသည်။

ကျိုးရီအား တိုက်ခိုက်မှု လွဲချော်သွားပြီးနောက် ယင်ရုံက ဓားကို ဘေးဘက်သို့ ချက်ချင်း ဝှေ့ယမ်းလိုက်သောကြောင့် ကျိုးလီချင်းမှာ ဘေးဘက်သို့ လွင့်စင်သွား၏။

ကျိုးလီချင်းသည် ထိုဓားချက်ကြောင့် အရိုးများ ကျိုးအက်သွားသကဲ့သို့ ခံစားလိုက်ရသဖြင့် အံကိုတင်းတင်းကြိတ်ထားလိုက်သည်။

ကျိုးရီက ဘေးဘက်သို့ ကျွမ်းကျင်စွာ ရှောင်တိမ်းသွားသောကြောင့် ကျိုးရီ၏ အနောက်တွင်ရှိနေသော ယုမေက ယင်ရုံအား ဓားဖြင့် ချက်ချင်း ခုတ်ချလိုက်လေသည်။

ထိုသို့ဖြင့် ယင်ရုံကို အငိုက်ဖမ်းနိုင်ရန် မျှော်လင့်နေကြသော်လည်း ယင်ရုံက ကြိုတင်မျှော်လင့်ထားသည့်အလား မျက်နှာပေါ်တွင် လှောင်ပြုံးတစ်ခုဖြင့် ဘေးဘက်သို့ ခြေလှမ်းရွှေ့လိုက်သည်။

ထို့နောက် ယုမေ၏ ဝှေ့ယမ်းနေသော လက်မောင်းကို ခြေထောက်ဖြင့် ကန်ချလိုက်ရာ ယုမေ၏ လက်မောင်းမှာ ကျိုးလုနီးပါးဖြစ်သွားရုံသာမက လက်ထဲရှိဓားပါ လွတ်ကျသွားလေတော့သည်။

ကျိုးရီ၊ ကျိုးလီချင်းနှင့် ယုမေတို့ သုံးယောက်မှာ တိုက်ပွဲအစသာ ရှိသေးချိန်တွင် ယင်ရုံမှာ သူတို့အား အားစိုက်ထုတ်စရာမလိုဘဲ တားဆီးနိုင်လိုက်သည်ကို မယုံနိုင်ဖြစ်နေကြသည်။

"ငါ သတိထားခဲ့ရတာ အလကားဖြစ်သွားပုံပဲ။ မင်းတို့ တစ်ချက်လောက်ကြည့်သင့်တယ်လို့ ငါ ထင်တယ်"

ယင်ရုံက တည်ငြိမ်စွာပြောလိုက်ပြီး မလိုမုန်းထားသော အပြုံးတစ်ခုနှင့်အတူ သူတို့ဆီသို့ ပြေးဝင်သွားလေသည်။

ကျိုးရီနှင့် ယုမေတို့သည် မဆုတ်ခွာလိုသော်လည်း ကြောက်ရွံ့မှုကြောင့် နောက်သို့ ခြေတစ်လှမ်းဆုတ်လိုက်မိကြသည်။

"မင်းတို့ ဘာလုပ်နေကြတာလဲ။ မင်းတို့ရဲ့ ဒဏ်ရာတွေက ဟန်ပြသက်သက်လား"

ဟယ်ရှန်းက ရူးသွပ်စွာ ဟိန်းဟောက်လိုက်ပြီး ယင်ရုံဆီသို့ ပုဆိန်ဖြင့် ပြေးဝင်သွား၏။

သူဟည် ကြောက်ရွံ့မှုကင်းသည့်ဟန် ရှိနေသော်လည်း ယင်ရုံက ဓားနှစ်လက်ကို ရိုးရှင်းစွာ ကြက်ခြေခတ်လိုက်ခြင်းဖြင့် ပုဆိန်ကို ရပ်တန့်သွားစေခဲ့သည်။

သူမအတွက် ရိုးရှင်းသည်ဟု ထင်ရသော်လည်း ဟယ်ရှန်း၏ လက်များတွင်မူ သွေးကြောများ ဖောင်းကြွလာပြီး ပုဆိန်မလွတ်ကျစေရန် အသည်းအသန် ဆုပ်ကိုင်ထားရသဖြင့် လက်များပေါ်တွင် စုတ်ပြဲရာသေးသေးလေးများပင် ထွက်ပေါ်လာလေသည်။

လွဲချော်သွားခြင်းများ၊ ပေါ့ပေါ့ပါးပါး ပုတ်ထုတ်ခံရခြင်းများ ရှိသော်လည်း ဟယ်ရှန်းသည် မကြောက်မရွံ့ဘဲ နောက်ထပ်တိုက်ခိုက်မှုများဖြင့် ထပ်မံ ဖိအားပေးလိုက်သည်။

သူ၏ လှုပ်ရှားမှုများမှာ သူ၏ မြားများကဲ့သို့ပင် တိကျမြန်ဆန်ပြီး ရက်စက်လှပေသည်။

သို့ရာတွင် ယင်ရုံ၏ ရှေ့၌မူ ထိုတိုက်ခိုက်မှုများမှာ လုံးဝ အန္တရာယ်မရှိသကဲ့သို့ ဖြစ်သွားပြီး သူမ၏ အလွယ်တကူ ဖြေရှင်းနိုင်စွမ်းမှာ အံ့မခန်းပင်။

နေရာအပြောင်းအလဲဖြစ်သွားသောကြောင့် ဟယ်ရှန်းအပေါ် အလှည့်အပြောင်းဖြစ်သွားပြီး သူသည် သူမ၏ တိုက်ခိုက်မှုများကို ခံယူရမည့် နေရာသို့ ရောက်ရှိသွား၏။

ဟယ်ရှန်းကမူ ယင်ရုံနှင့်မတူဘဲ သူမ၏တိုက်ခိုက်မှုကို အလွယ်တကူ မကိုင်တွယ်နိုင်ခဲ့ပေ။

သူ၏ လက်မောင်းများပေါ်တွင် ဓားခုတ်ရာများ စတင်ထွက်ပေါ်လာပြီး စက္ကန့်နှင့်အမျှ များပြားလာသော်လည်း ထိုသို့ဖြစ်နေသည့်တိုင် အနည်းငယ်မျှ တွန့်ဆုတ်သွားခြင်း မရှိချေ။

"ထွက်သွားစမ်း၊ သတ္တိခဲလေး"

ယင်ရုံက ပြောလိုက်ရင်း ဟယ်ရှန်း၏ ပခုံးများကို ခုတ်ဖြတ်ရန် ရည်ရွယ်ကာ ဓားဖြင့် အောက်သို့ ခုတ်ချလိုက်သည်။

ဟယ်ရှန်း၏ မျက်လုံးများထဲတွင် ရက်စက်သော အရိပ်အယောင်တစ်ခု ရှိနေပြီး ရှောင်တိမ်းရန် ကြိုးစားခြင်းမရှိဘဲ သူမ၏ ဝမ်းဗိုက်ကို ရည်ရွယ်ကာ ပုဆိန်ကို ဘေးဘက်သို့ လွှဲခုတ်လိုက်ရင်း ဒဏ်ရာချင်းဖလှယ်ရန် ကြံရွယ်နေလေသည်။

ယင်ရုံသည် သူ၏ လုပ်ရပ်များအပေါ် မထီမဲ့မြင်စွာ နှာခေါင်းရှုံ့လိုက်ပြီး သူ၏ တိုက်ခိုက်မှုအား ရှောင်မည့် အရိပ်အယောင်ကိုပင် မပြခဲ့ပေ။

သို့ရာတွင် သူမ၏ဓား ထိခတ်မိသည်နှင့် တစ်ပြိုင်နက် သူမ မျှော်လင့်ထားသော ချောမွေ့သည့် ခုတ်ပိုင်းမှုသည် မာကျောသော အရာတစ်ခုနှင့် ထိခတ်မိသွားချိန်တွင်မူ သူမ၏ မျက်ဆန်များ တောင့်တင်းသွားလေတော့သည်။

သူမ အနီးကပ် ကြည့်လိုက်သောအခါမှသာ ဟယ်ရှန်း၏ သားရဲသားရေဝတ်ရုံအောက်ရှိ ပခုံးများပေါ်တွင် ပုံမှန်မဟုတ်သော ဖောင်းကြွမှုတစ်ခုကို သတိပြုမိလိုက်၏။

ဟယ်ရှန်းသည် လွှဲခုတ်မှုအား ပိုမိုပြင်းထန်လာစေရန် ထိုခဏတာ အမှားအယွင်းကို အခွင့်ကောင်းယူလိုက်သည်။

ယင်ရုံသည် လျင်မြန်စွာ တုံ့ပြန်လိုက်ပြီး ပုဆိန်ကို သူမ၏ တံတောင်ဆစ်နှင့် ပေါင်ကြားတွင် ဖိညှပ်ထားလိုက်လေသည်။

ယင်းက သူမကို ထက်ပိုင်းပြတ်မသွားစေရန် ကာကွယ်ပေးနိုင်ခဲ့သော်လည်း ၎င်းမှဖန်တီးလိုက်သော အင်အားက သူမအား ဟန်ချက်ပျက်ကာ ခြေလှမ်းအနည်းငယ်ခန့် ယိမ်းယိုင်သွားစေရန် စွမ်းဆောင်နိုင်ခဲ့သည်။

"တွေ့လား၊ သူ့ကို အနိုင်ယူလို့ရတယ်"

ဟယ်ရှန်းသည် နောက်ထပ်တိုက်ခိုက်မှုတစ်ခုအတွက် ပြင်ဆင်ရင်း မာနတထောင်ထောင်ဖြင့် ပြောလိုက်၏။

မျက်လုံးများထဲတွင် မျှော်လင့်ချက်ကင်းမဲ့မှုနှင့် ကိုယ့်ကိုယ်ကိုယ် သံသယဝင်မှုများရှိနေသော ကျိုးရီနှင့် အခြားသူများမှာ ဟယ်ရှန်း၏ ပြသမှုကြောင့် တိုက်ခိုက်လိုစိတ်များ ပြန်လည်တောက်လောင်လာခဲ့သည်။

'ငါ ဒီလောက်အလွယ်တကူ ယိမ်းယိုင်သွားရတဲ့အထိ အားနည်းနေတုန်းပဲဆိုတာ မယုံနိုင်စရာပဲ'

ကျိုးရီက နောင်တရနေသော အပြုံးတစ်ခုဖြင့် တွေးလိုက်လေသည်။

"ကျေးဇူးပဲ ဟယ်ရှန်း၊ မင်းကို အကြွေးတင်သွားပြီ"

ကျိုးရီက ဆက်ပြောလိုက်သည်။

"ငါ သူ့ကို တားထားမယ်။ မင်းတို့ဆီမှာရှိတဲ့ တိုက်ကွက်မှန်သမျှကို သုံးကြ။ ငါကြားညပ်သွားမှာကို စိတ်မပူနဲ့"

လိုင်ရိုက ပြောလိုက်ပြီးနောက် ယင်ရုံဆီသို့ အလျင်အမြန် ပြေးဝင်သွားလေတော့သည်။