အခန်း ၉၉

အခန်း။ ၉၉

တိုက်ရိုက်ထုတ်လွှင့်မှုကို ကြည့်ရှုနေသူများသာမက ရွှယ်ချင်းချင်းကိုယ်တိုင်လည်း ပြိုင်ဘက်ဘက်မှ ခန့်မှန်းထားသည်ထက် ပိုမိုအားကောင်းသည့် အင်အားစုကို မြင်လိုက်ရသောအခါ အံ့အားသင့်သွားသည်။

အထူးသဖြင့် ဖန်တရှေ့နေရုံးမှ ရွှေတံဆိပ်ရှေ့နေ ဝမ်ကျွင်းပါဝင်နေခြင်းက ဤအမှုကို ပိုမိုခက်ခဲသွားစေသည်။

သို့သော် ရွှယ်ချင်းချင်းသည် ဂူချန်ကို ယုံကြည်စွာဖြင့် အသင့်ပြင်ထားသည်။

တရားသူကြီး ရှန်ကျားရွှေရုံးခန်းမှ ဝင်ရောက်လာပြီးနောက် တရားခွင်ကို တရားဝင် စတင်ကြောင်း ကြေညာလိုက်သည်။

ရှန်ကျားရွှေက "ဒီအမှုက လွန်ခဲ့တဲ့တစ်နှစ်က တစ်ကြိမ် စစ်ဆေးပြီးသားပါ။ အောက်တိုဘာ ၁၃ ရက်နေ့မှာ တန်ရှင်းရန် အဆောက်အအုံပေါ်က ခုန်ချသေဆုံးခဲ့တဲ့အမှုကို စစ်ဆေးခဲ့ပြီး ကိုယ့်ကိုကိုယ် သတ်သေခြင်းအဖြစ် သတ်မှတ်ပြီး ကျောင်းဘက်က လူသားချင်းစာနာမှုအရ လျော်ကြေး ၃ သိန်းပေးဖို့ စီရင်ခဲ့ပြီးသားပါ။ အခု တရားလိုဘက်က အယူခံဝင်လာတာဆိုတော့ ဘာများ အကြောင်းအရာသစ်တွေ ရှိသေးလဲ" ဟု မေးလိုက်သည်။

တန်ကျန်းကောက ဂူချန်ကို ကြည့်လိုက်ရာ ဂူချန်က မတ်တတ်ရပ်ကာ "ရှိပါတယ် တရားသူကြီးမင်း ကျွန်တော့်မှာ တောင်းဆိုချက်အသစ်တွေ ရှိပါတယ်" ဟု ခိုင်မာစွာ ပြောလိုက်သည်။

ဤစကားကြောင့် တိုက်ရိုက်ထုတ်လွှင့်မှုကို ကြည့်ရှုသူများမှာ တက်ကြွလာကြသည်။

[လာပြီ အဲဒီလိုနဲ့ပဲ ဥပဒေမဲ့မိုက်ရူးရဲ ဂူချန်တစ်ယောက် အလုပ်စလုပ်ပြီ]

[ဒီတစ်ခါကော တရားခံ ၁၆ ယောက်လုံးကို ထောင်ထဲ ပို့လိုက်တော့မှာလား]

[ဂူချန်က တရားလိုရှေ့နေ ဖြစ်သွားပြီဆိုတော့ ပိုတောင် ဆိုးတော့မယ်ထင်တယ်]

ဂူချန်က တရားခွင်တစ်ခုလုံး၏ အာရုံစိုက်မှုကို ရယူလိုက်ပြီးနောက် တရားခံ ၁၆ ဦးကို ရည်ရွယ်ကာ အချက်အလက်များကို ချပြလိုက်သည်။

"ပထမအချက်အနေနဲ့ ယွမ်မြို့ အမှတ် ၃ အလယ်တန်းကျောင်းအုပ် မန်းဒယ်လျန်က ကျောင်းရဲ့ အောင်ချက်ရာခိုင်နှုန်းကို မြှင့်တင်ဖို့အတွက် ကျောင်းသားတွေကို မဆီလျော်တဲ့ နည်းလမ်းတွေနဲ့ စီမံခန့်ခွဲခဲ့ပါတယ်။ မနက် ၅ နာရီခွဲကတည်းက လေ့ကျင့်ခန်းလုပ်ခိုင်းခြင်း၊ နေ့လယ်စာစားချိန်ကို အနည်းဆုံးဖြစ်အောင် လျှော့ချခြင်း၊ အိမ်သာတက်ချိန်ကို ၅ မိနစ်နဲ့ ကန့်သတ်ခြင်းတို့ကြောင့် ကျောင်းသားတွေရဲ့ စိတ်ကျန်းမာရေးနဲ့ ရုပ်ပိုင်းဆိုင်ရာ ကျန်းမာရေးကို ပြင်းထန်စွာ ထိခိုက်စေခဲ့ပါတယ်။ ဒီဖိအားတွေကြောင့် ကျောင်းသားအများအပြား ဆေးရုံတက်ရတဲ့အထိ ဖြစ်ခဲ့ရပါတယ်..."

ဂူချန်က ဆက်ပြောလိုက်သည်။

"သူက ကျောင်းသားတွေကို အဆင့်နိမ့်အတန်း၊ စမ်းသပ်ဆဲအတန်း၊ထိပ်တန်းအတန်း စသည်ဖြင့် ခွဲခြားထားပြီး အဆင့်နိမ့်တဲ့ ကျောင်းသားတွေကိုလည်း လူသိရှင်ကြား အရှက်ခွဲခြင်း၊ အတန်းထဲကနေ ထုတ်ပယ်ခြင်းတွေကို လုပ်ဆောင်ခဲ့ပါတယ်။ မိဘတွေက ဒူးထောက်ပြီး တောင်းပန်တဲ့အခါမှာတောင် ကလေးတွေကို ကျောင်းကနေ နှင်ထုတ်ခဲ့ပါတယ်။ ဒါက ကျောင်းသားတွေရဲ့ သိက္ခာကို စော်ကားတာပါ"

"ကျွန်တော့်ရဲ့ ပထမဆုံး တောင်းဆိုချက်ကတော့ မန်းဒယ်လျန်ရဲ့ လုပ်ရပ်တွေကို စုံစမ်းစစ်ဆေးပေးဖို့နဲ့ သူ့ကို ကျောင်းအုပ်ကြီးရာထူးကနေ ချက်ချင်းရပ်စဲပေးဖို့ပါ။ သူက အာဏာကို အလွဲသုံးစားလုပ်ပြီး ကျောင်းသားတွေကို နှင်ထုတ်ခြင်း၊ သိက္ခာချခြင်းတွေ လုပ်ဆောင်ခဲ့တဲ့အတွက် ဥပဒေအရ ပြင်းပြင်းထန်ထန် အရေးယူပေးဖို့ တောင်းဆိုပါတယ်"

ဂူချန်၏ တောင်းဆိုချက်များအားလုံးသည် ကျောင်းအုပ်ကြီး မန်းဒယ်လျန်ကိုသာ တိုက်ရိုက်ပစ်မှတ်ထားနေခြင်းပင်။

တရားခံဘက်မှ ရှေ့နေသုံးဦးပင် ဂူချန်၏ အဆိုပြုချက်များကြောင့် အံ့ဩသွားကြသည်။ တကယ်တမ်းတွင် ယွမ်မြို့ အမှတ် ၃ အလယ်တန်းကျောင်း၏ ၁၀၀% အောင်ချက်နောက်ကွယ်တွင် ဤမျှဆိုးရွားသော လုပ်ရပ်များ ရှိနေသလားဆိုသည်ကို သူတို့လည်း မသိရှိခဲ့ကြပေ။

မန်းဒယ်လျန်က ဒေါသတကြီးဖြင့် ပြန်လည်ချေပလိုက်သည်။

"ရှေ့နေဂူခင်ဗျား လျှောက်ပြောနေတာပဲ ကျွန်တော့် လုပ်ရပ်တွေအားလုံးက ကျောင်းရဲ့ အောင်ချက်အတွက်၊ ကျောင်းသားတွေရဲ့ ရလဒ်ကောင်းဖို့အတွက်ပဲ။ ကျောင်းသားတွေရဲ့ ကျန်းမာရေးကို ကျွန်တော်လောက် ဂရုစိုက်တဲ့သူ မရှိဘူး။ စည်းကမ်းတင်းကျပ်တာက ဘာဖြစ်လို့လဲ ကျောင်းသားဘဝမှာ ကြိုးစားရမှာပဲလေ"

"ကျွန်တော် ကျောင်းသားတွေကို နှင်ထုတ်တယ်။ အပြစ်ပေးတယ်ဆိုတဲ့ ခင်ဗျားရဲ့ စွပ်စွဲချက်အတွက် အထောက်အထားရှိလား ကျွန်တော် ဘယ်တုန်းက ကျောင်းသားတွေကို နှင်ထုတ်ဖူးလို့လဲ စည်းကမ်းဖောက်ဖျက်တဲ့သူအနည်းငယ်ကလွဲရင် ကျန်တဲ့သူတွေကို ကျွန်တော် ဘယ်တုန်းက နှင်ထုတ်ခဲ့လို့လဲ။ အထောက်အထားမရှိဘဲ ပြောနေတာဆိုရင် ခင်ဗျားကို ဂုဏ်သိက္ခာညှိုးနွမ်းစေမှုနဲ့ တရားပြန်စွဲမယ်"

တစ်နိုင်ငံလုံးရှိ အင်တာနက်အသုံးပြုသူများမှာ ဂူချန်ကို စောင့်ကြည့်နေကြသည်။

တရားခွင်တွင် အရေးအကြီးဆုံးမှာ အထောက်အထားပင်။

ဂူချန်က တည်ငြိမ်စွာပင် "ပြီးခဲ့တဲ့ ၃ နှစ်အတွင်း ဒီကျောင်းက ကျောင်းသား ၁၈ ဦးကို ကျောင်းထွက်ခိုင်းခဲ့ပါတယ်။ သူတို့ကို စည်းကမ်းဖောက်ဖျက်တယ်ဆိုတဲ့ ခေါင်းစဉ်နဲ့ ထုတ်ပယ်ခဲ့တာပေမဲ့ တကယ်တမ်းမှာ သူတို့ ဘာစည်းကမ်းမှ မဖောက်ဖျက်ခဲ့ပါဘူး။ သူတို့အားလုံးမှာ တူညီတဲ့အချက်တစ်ခု ရှိတယ်။ အဲဒါကတော့ စာမတော်လို့ အဆင့်မတက်နိုင်တော့တဲ့အခါ ကျောင်းကနေ အတင်းအဓမ္မ ထုတ်ပယ်ခံရတာပဲ"

"မိဘတွေ ပြဿနာမရှာအောင် သူတို့ကို ယွမ်မြို့ အမှတ် ၁၈ အလယ်တန်းကျောင်းလို သာမန်ကျောင်းမျိုးကို ပြောင်းခိုင်းခဲ့တယ်။ ပြဿနာရှာတဲ့ မိဘတွေကိုလည်း ပိုက်ဆံအနည်းငယ်ပေးပြီး တခြားကျောင်းမှာ ပြန်တက်ခိုင်းတာမျိုး လုပ်ခဲ့တယ်။ အထူးသဖြင့် နေမကောင်းဖြစ်လို့ ကျောင်းတစ်နှစ် နားလိုက်ရတဲ့ ကျောင်းသားတစ်ဦးကိုတောင် ကျောင်းကနေ အတင်းနှင်ထုတ်ခဲ့တယ်။ မိဘတွေက ခင်ဗျားရှေ့မှာ ဒူးထောက်တောင်းပန်တဲ့အခါမှာတောင် ခင်ဗျားက သူ့ကို လူအများရှေ့မှာ အရှက်ခွဲပြီး ကျောင်းက ထွက်သွားအောင် လုပ်ခဲ့တာပဲ။ နောက်ဆုံးတော့ ခင်ဗျားရဲ့ မရိုးသားတဲ့ ဖိအားပေးမှုတွေကြောင့် အဲဒီကျောင်းသားလေး အဆုံးစီရင်သွားခဲ့ရတယ်"

မန်းဒယ်လျန်မှာ တုန်လှုပ်သွားသည်။

ဂူချန်က ဤအမှုကိစ္စကို ဖော်ထုတ်နိုင်လိမ့်မည်ဟု သူ မထင်မှတ်ထားခဲ့ပေ။

အထောက်အထားမရှိဘူးဟု သူ ယုံကြည်နေသော်လည်း ဂူချန်၏ အပြောအဆိုမှာ အလွန်ယုံကြည်မှု ရှိနေသည်။

အကယ်၍သာ ဂူချန်က အထောက်အထားပြနိုင်ပါက သူ၏ အနာဂတ်အစီအစဉ်များအားလုံး ပျက်စီးသွားပေတော့မည်။

မန်းဒယ်လျန်က "ခင်ဗျား လျှောက်ပြောနေတာပဲ အထောက်အထား ဘယ်မှာလဲ" ဟု အော်ဟစ်ကာ မေးလိုက်သည်။