အခန်း ၁၀၄

အခန်း။ ၁၀၄

မန်းဒယ်လျန်တစ်ယောက် သူကိုယ်တိုင်လည်း အဆုံးသတ်သွားပြီဆိုတာကို ကောင်းကောင်းသိလိုက်ရသည်။

သူ့ဘေးတွင်ရှိသော ယန်ခိုင်လုံနှင့် ကန်ဂွေကျုံးတို့၏ မျက်နှာများမှာလည်း သွေးမရှိတော့သလို ဖြူဖျော့နေသည်။

ယန်ခိုင်လုံက စိတ်ထဲတွင် ကိုယ့်ကိုကိုယ် ပြန်လည်နှစ်သိမ့်နေသည်။

"ဒါနဲ့ ငါနဲ့ ဘာမှမဆိုင်ပါဘူး။ ငါ့လည်း ဘာမှဖြစ်လာမှာ မဟုတ်ပါဘူး။ အဆူခံရရုံလောက်ပဲ ဖြစ်မှာပါ။ ငါက ကျောင်းသားတွေအတွက်ပဲ တွေးပေးခဲ့တာလေ။ သူတို့ အမှတ်ကောင်းစေချင်တာပဲ။ ငါ့ကို ဘာမှမလုပ်နိုင်ပါဘူး..."

ကန်ဂွေကျုံးကလည်း "ငါနဲ့ ဘာမှမဆိုင်ပါဘူး။ ကင်မရာဖျက်တာလည်း သူတို့ပဲ။ ငါက ဘာမှမလုပ်ခဲ့ဘူး... ဘာမှ မဟုတ်တာပါ" ဟု တွေးကာ စိတ်သက်သာရာ ရှာနေကြသည်။

သူတို့ နှစ်ယောက်စလုံးမှာ ခြောက်ကပ်နေသော မျက်နှာများဖြင့် တုန်ရီနေကြသည်။

ထိုအချိန်တွင် ဂူချန်က မန်းဒယ်လျန်ကို စူးစိုက်ကြည့်ကာ "မန်းဒယ်လျန် အခုအချိန်မှာ ခင်ဗျား ကိုယ့်ကိုကိုယ် ခုခံချေပဖို့ ဘာများပြောချင်သေးလဲ" ဟု မေးလိုက်သည်။

မန်းဒယ်လျန်မှာ လုံးဝ တိတ်ဆိတ်သွားသည်။

ဂူချန်က အထောက်အထား ဗီဒီယိုဖိုင်တွေကို ထုတ်ပြပြီးပြီဟာ အခု ဘာကိုများ ထပ်ပြောစရာ လိုသေးလဲ။

သို့သော် သူ အသက်ရှင်ချင်သည့် ဇောဖြင့် နောက်ဆုံး အခွင့်အရေးကို အသုံးချရန် ကြိုးစားလိုက်သည်။

"ရှိတယ်"

မန်းဒယ်လျန်က အသံကို တိုးတိုးလေးဖြင့် ပြောလိုက်သည်။

"ကင်မရာမှတ်တမ်းကို ဖျက်ခိုင်းတာ ကျွန်တော်ပဲ ဒါပေမဲ့ အထောက်အထား ဖျက်ဆီးချင်လို့ မဟုတ်ပါဘူး။ ကျောင်းရဲ့ ဂုဏ်သိက္ခာ ကျဆင်းမှာ အပြင်လောကက ဒီအဖြစ်အပျက်ကို သိသွားမှာ စိုးရိမ်လို့သာ ဖျက်လိုက်တာပါ။ ဒါက ကျောင်းရဲ့ အောင်ချက်ရာခိုင်နှုန်းကို ကာကွယ်ဖို့အတွက်ပါ"

"ကျွန်တော် မှားတယ်ဆိုတာ ဝန်ခံပါတယ်။ ဒါပေမဲ့ သေတမ်းစာအကြောင်း ကျွန်တော် ဘာမှမသိဘူး။ ဘာအထောက်အထားမှလည်း မဖျက်ဆီးခဲ့ပါဘူး။ အဲဒီအချိန်က ၁၂၀ ကို မေ့လျော့ပြီး မခေါ်မိခဲ့တာပါ။ တခြားတစ်ယောက်ယောက် ခေါ်လိမ့်မယ်လို့ ထင်နေခဲ့တာ။ ဒီလောက်အထိ ဆိုးရွားသွားမယ်လို့ မထင်ခဲ့မိဘူး။ အချိန်မီ မခေါ်နိုင်ခဲ့တဲ့အတွက် တောင်းပန်ပါတယ်။ တန်ရှင်းရန်က ကိုယ့်ဘာသာ ခုန်ချသွားတာ ဘယ်သူမှ တွန်းချတာ မဟုတ်ဘူး။ ကျွန်တော် လုပ်ခဲ့တာတွေက ကျောင်းအတွက်ပဲ"

မန်းဒယ်လျန်မှာ ဉာဏ်ရည်ဉာဏ်သွေးရှိသူပီပီ ကိုယ့်ကိုကိုယ် ကာကွယ်ရန် နည်းလမ်းကို ရှာတွေ့သွားသည်။

"၁၂၀ ကို မခေါ်မိတာက ပေါ့ဆမှုသက်သက်ပဲ။ ဒါက လူသတ်မှု မဟုတ်ဘူး" ဟုသူ ယုံကြည်နေသည်။

ကင်မရာဖျက်ခြင်းမှာလည်း ကျောင်းဂုဏ်အတွက်သာဖြစ်ကြောင်း လူသတ်ခြင်း မဟုတ်ကြောင်း အတင်းအဓမ္မ ဆင်ခြေပေးနေခြင်းပင်။

သို့သော် သူ၏ ဤစကားများက တိုက်ရိုက်ထုတ်လွှင့်မှုကို ကြည့်ရှုနေသူများ၏ ဒေါသကို ပိုမိုမြင့်တက်သွားစေသည်။

လူသတ်သမားတစ်ယောက်ကဲ့သို့ ပြုမူခဲ့ပြီးမှ ယခုမူ ပေါ့ဆမှုသက်သက်ပါဟု အပြစ်လွှဲချနေသည့် သူ့လုပ်ရပ်ကို လူတိုင်းက ရွံရှာနေကြသည်။

[သောက်ကျိုးနည်း တစ်နှစ်လုံး အလောင်းအစား လုပ်ခဲ့တာပါလား။ အခုတော့ ပေါ့ဆမှုသက်သက်ပါတဲ့လား]

[ဒီလိုလူမျိုးကို တရားရုံးက အပြင်းထန်ဆုံး အပြစ်ပေးမှ ရမယ်]

[ဂူချန်... သူ့ကို ဘယ်လိုမှ ထွက်ပေါက် မပေးလိုက်ပါနဲ့]

တရားခွင်အတွင်းမှာပင် မန်းဒယ်လျန်၏ လိမ်ညာမှုများကြောင့် ပရိသတ်များမှာ မခံမရပ်နိုင် ဖြစ်နေကြသည်။

သူသည် ကိုယ့်ကိုကိုယ် အသက်ရှင်ရန် ကြိုးစားနေသော်လည်း သူ၏ ပြောစကားများက သူ၏ ရက်စက်မှုကို ပိုမို ပေါ်လွင်စေနေသည်။

[သောက်ကျိုးနည်း ဒီလူယုတ်မာက တာဝန်ကို လွှဲရှောင်နေတာပဲ]

[သူ တကယ်ပဲ သူ ဘာမှမဖြစ်တော့ဘူးလို့ ထင်နေတာလား]

[ဒါက အထောက်အထား ဖျက်ဆီးတာ မဟုတ်ဘူးလား ၁၂၀ ကို ဖုန်းမခေါ်ဘဲနေတာက အသက်ကယ်ဆယ်ရေးကို ရည်ရွယ်ချက်ရှိရှိ လျစ်လျူရှုပြီး အထောက်အထား ဖျက်ဆီးဖို့ အချိန်ဆွဲတာပဲ]

[မန်းဒယ်လျန်က တကယ်ကို ရွံစရာကောင်းတယ် သူက လူသတ်သမားပဲ၊ ဒါပေမဲ့ ဝန်မခံရဲဘူး]

ထိုအချိန်မှာ တန်ကျန်းကောက မန်းဒယ်လျန်ကို ဒေါသတကြီး ကြည့်ပြီး ပြောလိုက်သည်။

"မန်းဒယ်လျန်၊ စောင့်ကြည့်မှတ်တမ်းတွေကို ဖျက်ဆီးတာက အထောက်အထား ဖျက်ဆီးတာပဲ ၁၂၀ ကို ဖုန်းမခေါ်တာက သေလုမြောပါးဖြစ်နေတဲ့သူကို လျစ်လျူရှုတာပဲ"

တန်ကျန်းကောမှာ စိတ်ခံစားချက် အလွန်အမင်း ပြင်းထန်နေပြီဖြစ်သည်။

ဂူချန်က တန်ကျန်းကော၏ ပခုံးကို ပုတ်ပေးလိုက်သည်။

မန်းဒယ်လျန်က ရယ်မောလျက် "ဟားဟားဟား တရားသူကြီးမင်းခင်ဗျား ကျွန်တော် မေးချင်တာက ကျွန်တော် စောင့်ကြည့်မှတ်တမ်းတွေကို ဖျက်ခဲ့တာမှန်တယ်။ ဒါပေမဲ့ ဘယ်အထောက်အထားကို ဖျက်ဆီးခဲ့တာလဲလို့ မေးပါရစေ တန်ရှင်းရန်က ကိုယ့်ကိုကိုယ် သတ်သေတာပဲလေ ဟုတ်တယ်မလား။ သူ့ကို ဘယ်သူကများ တွန်းချလိုက်လို့လဲ။ ကျွန်တော် တွန်းချလိုက်တာလား ဘယ်အထောက်အထားကို ဖျက်ဆီးမိတာလဲ ကျွန်တော် မသိဘူး ကျွန်တော် မှားတယ်ဆိုတာ ဝန်ခံပေမဲ့ ဘယ်အထောက်အထားကို ဖျက်ဆီးခဲ့တာလဲလို့ မေးနေတာပါ"

"၁၂၀ ကို ဖုန်းမခေါ်တာက ဘာလို့များ သေလုမြောပါးလူကို လျစ်လျူရှုရာ ရောက်တာလဲ ခင်ဗျားတို့ ကျွန်တော့်ကို ဘယ်ပုဒ်မနဲ့ စွဲချက်တင်ချင်တာလဲ တန်ရှင်းရန် သေဆုံးသွားတဲ့အတွက် ကျွန်တော် အလွန်ဝမ်းနည်းပါတယ်။ ဒါပေမဲ့ ကျွန်တော်နဲ့ ဘာဆိုင်လို့လဲ အဲဒီမှာ ဆရာတွေ အများကြီးပဲ လူတွေ အများကြီးပဲ... ဘယ်သူမှလည်း ရဲကို ဖုန်းမခေါ်ကြဘူး။ ခင်ဗျားတို့က အဲဒီ လူတစ်ထောင် နှစ်ထောင်လုံးကို သေလုမြောပါးလူကို လျစ်လျူရှုမှုနဲ့ တရားစွဲမှာလား ဟုတ်တယ်မလား"

"ကျွန်တော့် ရှေ့နေတွေ ထွက်သွားတာ ဘာဖြစ်လဲ ကျွန်တော် ဘယ်ဥပဒေကို ဖောက်ဖျက်မိလို့လဲ ဒီကိစ္စနဲ့ ပတ်သက်ပြီး ကျွန်တော့်မှာ ရှင်းပြစရာ ဘာမှမရှိဘူး။ တန်ရှင်းရန်က စိတ်ပိုင်းဆိုင်ရာ အားနည်းလွန်းလို့ ကိုယ့်ကိုကိုယ် သတ်သေသွားတာကို အခုတော့ တာဝန်ရှောင်ဖို့ ကြိုးစားနေတာပဲ။ ဟားဟားဟားဟား"

မန်းဒယ်လျန်က လှောင်ပြောင်လိုက်သည်။

မန်းဒယ်လျန်သည် ယခုအခါ ဘာကိုမှ မကြောက်တော့ပေ။

ငါ့အတွက် အဆိုးဆုံး ဖြစ်လာရင်တောင် ရာထူးအပြောင်းအရွှေ့ ခံရရုံလောက်ပဲ ရှိမှာပါ...

ဒါပေမဲ့ တကယ်ပဲ ထောင်ကျသွားနိုင်လောက်တဲ့အထိ ဖြစ်သွားနိုင်ပါ့မလား...

သူ ဂူချန်ကို အစက နည်းနည်းကြောက်ခဲ့သော်လည်း အခုတော့ သူ ဘာမှမပူတော့ပေ။

ထိုစဉ် ထိုအထဲမှာရှိနေသူ အားလုံးက မန်းဒယ်လျန်ကို ကြည့်ရင်း အလွန်အမင်း ဒေါသထွက်နေကြသည်။

"အဆင်မပြေဘူး။ ဒီအမှုက တကယ်ကို ခက်ခဲတယ်။ ဂူချန်မှာ စောင့်ကြည့်မှတ်တမ်းနဲ့ အဲဒီတုန်းက ဘာဖြစ်ခဲ့လဲဆိုတဲ့ အထောက်အထားတွေ ရှိပြီး အချိန်တွေကိုလည်း သိနေပေမဲ့ မန်းဒယ်လျန်က ဒီပုံစံအတိုင်းဆို ဘယ်ဥပဒေကိုမှ ချိုးဖောက်မိမှာ မဟုတ်ဘူး"

"တကယ်လို့ တန်ရှင်းရန်ကို တစ်ယောက်ယောက်က တွန်းချလိုက်ပြီး မန်းဒယ်လျန်က မှတ်တမ်းကို ဖျက်လိုက်ရင် မန်းဒယ်လျန်က ရာဇဝတ်မှု မြောက်လိမ့်မယ်။ ဒါပေမဲ့ အခုက တန်ရှင်းရန်က ကိုယ့်ကိုကိုယ် သတ်သေတာဆိုတော့ သူ ဘာအချက်အလက်ကိုမှ ဖုံးကွယ်ထားတာ မဟုတ်တဲ့အတွက် မန်းဒယ်လျန်ပြောတာက ဥပဒေနဲ့ ကိုက်ညီနေပြီး သူ ဥပဒေကို မချိုးဖောက်မိဘူး ဖြစ်နေတယ်"

"၁၂၀ ကို ဖုန်းမခေါ်တာကလည်း ဥပဒေနဲ့ မညီဘူးလို့ ပြောလို့မရဘူး။ ဒါက ကိုယ်ကျင့်တရားအရ ဝေဖန်ရုံလောက်ပဲ ရမယ်။ သူက သူ မေ့သွားတာလို့ ပြောလိုက်ရင် ပြီးတာပဲ။ ကျွန်တော်တို့က အဲဒီနေရာမှာ ရှိနေတဲ့သူ အကုန်လုံးကို ဖမ်းပြီး ထောင်ချလို့ မရဘူးလေ။ အများဆုံးကတော့ ကျောင်းရဲ့ တာဝန်ပဲ ဖြစ်ပြီး လျော်ကြေးငွေ နည်းနည်း ပေးရုံပဲ... ပြီးတော့ လျော်ကြေးကိစ္စကလည်း ပြီးသွားပြီဆိုတော့ ဂူချန်အတွက် ဒီအမှုက လွယ်မှာ မဟုတ်ဘူး"

ဘေးက ရှီကလည်း "ဂူချန်က အရမ်း အလျင်စလို လုပ်လွန်းတယ်။ ဒီအတိုင်းဆိုရင် ဒီအမှုက ရှုံးတော့မှာပဲ... ဒါ ဂူချန်ရဲ့ ဥပဒေပညာ စွမ်းရည်လား ကျွန်တော်တော့ ဘာမှ ထူးခြားတာ မမြင်မိပါဘူး" ဟု ပြောသည်။