အခန်း ၁၀၆

အခန်း။ ၁၀၆

ယန်ခိုင်လုံက "ဒါဆိုရင် ကျွန်တော် ပြောစရာရှိတာတွေ အကုန်ပြောပြီးပြီ။ ရှေ့နေဂူက ကျွန်တော့်ကို တရားစွဲမှာလား ဒါမှမဟုတ် စုံစမ်းမှာလား ကျွန်တော်လည်း အကူအညီမဲ့နေပြီး နာကျင်ရပါတယ်။ ဒါပေမဲ့ ကျွန်တော် ဘာလုပ်ပေးနိုင်မှာလဲ" ဟု ပြောကာ အပြစ်ကင်းဟန်ဆောင်လျက် လက်နှစ်ဖက်ကို ဖြန့်လိုက်သည်။

ကန်ဂွေကျုံးကလည်း ကျောင်းအုပ်ကြီး ဖြစ်သည့်အတိုင်း "ကျွန်တော့်ကို မကြည့်ပါနဲ့။ ကျွန်တော် ဘာမှမသိဘူး။ ဒီအဖြစ်အပျက်က ကျွန်တော်နဲ့ ဘာဆိုင်လို့လဲ။ ကျွန်တော် ဘာလို့ တရားခံနေရာမှာ ထိုင်နေရတာလဲဆိုတာတောင် မသိဘူး။ ရှေ့နေဂူ ခင်ဗျား အမှုနိုင်ချင်တာကို နားလည်ပေမဲ့ တွေ့တဲ့သူတိုင်းကို လျှောက်စွဲလို့ မရဘူးလေ" ဟု ပြောသည်။

သူတို့နှစ်ဦးစလုံးမှာ အေးစက်စက်နှင့် တည်ငြိမ်နေကြသည်။

ဤဗီဒီယိုမှတ်တမ်း တစ်ခုတည်းဖြင့် ဂူချန် ဘာမှ သက်သေပြနိုင်လိမ့်မည် မဟုတ်ဘူးဟု သူတို့ ယုံကြည်နေကြသည်။

သူတို့က တည်ငြိမ်နေဆဲပင်။

ဂူချန်က ရယ်မောလိုက်ပြီး "တကယ်လား" ဟု မေးသည်။

"တရားသူကြီးမင်း ကျွန်တော် နောက်ထပ် အသေးစိတ် အချက်အလက်များကို တင်ပြခွင့်ပြုပါ" ဟု ဂူချန်က ပြောလိုက်သည်။

တရားသူကြီးက "ဆက်ပြောပါ တရားလိုရှေ့နေ" ဟု ခွင့်ပြုလိုက်သည်။

ဂူချန်က အားလုံးကို ကြည့်ကာ "ဒီနေ့ ကျွန်တော် လူတိုင်းကို အလွန်အရေးကြီးတဲ့ အချက်တစ်ခု ပြောပြမယ်။ တန်ရှင်းရန် သတ်သေသွားတာကို လူတိုင်း သိကြတယ်။ မန်းဒယ်လျန်တို့အဖွဲ့ ၁၂၀ ကို ချက်ချင်း မခေါ်ဘဲ ၂၅ မိနစ် နောက်ကျမှ အကြောင်းကြားခဲ့တာကိုလည်း သိကြတယ်။ ဒီကိစ္စကို စုံစမ်းဖို့အတွက် အဲဒီအချိန်က စစ်ဆေးပေးခဲ့တဲ့ ဆရာဝန်ဆီကို ကျွန်တော် သွားပြီး မေးမြန်းခဲ့တယ်" ဟု ပြောသည်။

"ဆရာဝန်ရဲ့ ကောက်ချက်အရ တန်ရှင်းရန်က သွေးလွန်ပြီး သေဆုံးသွားတာပါ။ ဦးခေါင်းနဲ့ တခြားနေရာတွေမှာ ထိခိုက်ဒဏ်ရာ မရှိဘူး။ အကယ်၍ ၁၂၀ ကိုသာ အချိန်မီ ခေါ်ခဲ့မယ်ဆိုရင် သူမ အသက်ရှင်နိုင်ပါသေးတယ်။ ဒါက ကျွန်တော် ဆရာဝန်နဲ့ အင်တာဗျူးခဲ့တဲ့ ဗီဒီယိုဖိုင်ပါ။ ဆရာဝန်က ဒီနေ့ အလုပ်များနေလို့ တရားရုံးကို သက်သေအဖြစ် မခေါ်လာနိုင်ခဲ့တာပါ"

ပရိသတ်များမှာ ဗီဒီယိုကို ကြည့်ပြီးနောက် စိတ်မကောင်းဖြစ်ကာ ရင်ထဲ နာကျင်နေကြသည်။

"တကယ်ကို ရင်ကွဲစရာပဲ။ တစ်ယောက်ယောက်သာ ၁၂၀ ကို ခေါ်ခဲ့ရင် တန်ရှင်းရန် မသေတော့ဘူး"

"တကယ်ပါပဲ ဘယ်သူမှ ဖုန်းမခေါ်ကြဘူးဆိုတာ ယုံတောင် မယုံနိုင်ဘူး"

"ယန်ခိုင်လုံနဲ့ မန်းဒယ်လျန်တို့မှာ တာဝန်ရှိတာ သေချာတယ်။ မန်းဒယ်လျန်ရဲ့ စကားတွေက တာဝန်မဲ့လွန်းတယ်"

ဂူချန်က ဆက်ပြောသည်။

"ဒီအထိတော့ လူတိုင်းက တန်ရှင်းရန် သေဆုံးပြီးနောက်ပိုင်း ဘာတွေဖြစ်ခဲ့လဲဆိုတာ မြင်ခဲ့ကြရပြီ။ သူတို့ တာဝန်တွေကို ဘယ်လို ရှောင်လွှဲကြသလဲဆိုတာလည်း တွေ့ခဲ့ကြရတယ်။ အခုတော့ တန်ရှင်းရန် ဘာလို့ သတ်သေသွားရတာလဲ။ ဘာက သူမကို ဒီလမ်းဆီကို တွန်းပို့လိုက်တာလဲဆိုတာ ကျွန်တော် ပြပါမယ်။ အဲဒါကို မပြခင်မှာ မန်းဒယ်လျန်ရဲ့ ကျောင်းအတွင်းက လင်းယုန်စီမံချက်ဆိုတာကို မိတ်ဆက်ပေးပါရစေ"

မကြာမီမှာပင် လူတိုင်းသည် မျက်နှာပြင်ကြီးပေါ်ရှိ ဗီဒီယိုကို စတင်ကြည့်ရှုကြသည်။

မန်းဒယ်လျန်၏ လင်းယုန်စီမံချက်ဆိုသည်မှာ အလွန်ရိုးရှင်းသည်။

ကျောင်းရှိ လူတိုင်းသည် အောင်ချက်ရာနှုန်းပြည့် ဖြစ်ရမည်။

ထိုသို့ဖြစ်လျှင် ယွမ်မြို့ အမှတ် ၃ အလယ်တန်းကျောင်းသည် ထူးချွန်သော ကျောင်းဖြစ်လာမည်ပင်။

ဤစီမံချက်အတွက် ကျောင်းသားများသည် နံနက် ၅:၃၀ နာရီတွင် ကျောင်းစတက်ရမည်။ နေ့လယ်စာစားချိန်ဟူ၍ သီးသန့်မရှိသလို အစာစားချိန်တွင်လည်း စာကျက်ရမည်။

အိမ်သာသွားရန် အကြိမ်ရေနှင့် အချိန်ကိုပါ တင်းကျပ်စွာ ကန့်သတ်ထားသည်။

ဆံပင်ပုံစံအထိ စည်းကမ်းချက်များ ရှိသည်။ ကန်တင်းကိုလည်း ယောက်ျားလေးနှင့် မိန်းကလေး ဟူ၍ သီးသန့် ခွဲခြားထားသည်။

လင်းယုန်စီမံချက်ကို အောင်မြင်အောင် လုပ်ဆောင်နိုင်သည့် ဆရာ၊ ဆရာမတိုင်းကို မန်းဒယ်လျန်က ဆုချီးမြှင့်သည်။

ထိုသို့သော ဆုလာဘ်များကြောင့် ဆရာအားလုံးသည် စီမံချက်ပန်းတိုင်သို့ ရောက်ရှိရန် အပြင်းအထန် ကြိုးပမ်းကြသည်။

ဤအခြေအနေသည် ကျောင်းသားများအတွက်မူ မခံမရပ်နိုင်သော ဖိအားများအောက်သို့ ရောက်ရှိသွားစေသည်။

အိမ်စာများမှာ များပြားလှပြီး ကျောင်းချိန်ပြင်ပ ဖိအားများမှာလည်း အလွန်ကြီးမားသည်။ အိမ်စာတစ်စုံတစ်ရာ မပြီးမြောက်ပါက ပြင်းထန်သော ဝေဖန်မှုများနှင့် အပြစ်ပေးမှုများကို ရင်ဆိုင်ရသည်။

ဤကျောင်း၏ ပတ်ဝန်းကျင်မှာ စစ်ရေးအရ စီမံခန့်ခွဲမှုထက်ပင် ပိုမိုတင်းကျပ်နေသည်။

ဂူချန်က "ဒီစီမံချက်အောက်မှာ ယွမ်မြို့ အမှတ် ၃ အလယ်တန်းကျောင်းရဲ့ သင်ကြားရေးပုံစံဟာ သိသိသာသာ ပြောင်းလဲသွားတယ်။ အောင်ချက် ရာနှုန်းပြည့်ဖြစ်ဖို့အတွက် ကျောင်းသားတိုင်းက စာကို အသက်နဲ့ရင်းပြီး ကြိုးစားခဲ့ကြရတယ်။ ဒါပေမဲ့ တစ်ခုခုတော့ မှားယွင်းနေခဲ့တယ်" ဟု ပြောလိုက်သည်။

ထို့နောက် ဂူချန်သည် ယန်ခိုင်လုံနှင့် ပတ်သက်သည့် ဗီဒီယိုဖိုင်တစ်ခုကို လူတိုင်းမြင်အောင် ပြသလိုက်သည်။

ထိုဗီဒီယိုသည် ဂူချန်နှင့်အတူ ရှူချင်းချင်း ပထမဆုံးအကြိမ် ကျောင်းသို့ ရောက်ရှိစဉ်က ရိုက်ကူးထားခြင်းပင်။

ဗီဒီယိုထဲတွင် ယန်ခိုင်လုံ၏ စစ်မှန်သော ရုပ်သွင်ကို လူတိုင်း ရှင်းရှင်းလင်းလင်း မြင်တွေ့လိုက်ရသည်။

ပန်းတိုင်သို့ ရောက်ရှိရေးအတွက် သူသည် မည်သည့်နည်းလမ်းကိုမဆို သုံးစွဲရန် နောက်တွန့်မည်မဟုတ်ပေ။

အိမ်စာမပြီးသူများ၊ စာမေးပွဲ ရလဒ်မကောင်းသူများအား ယန်ခိုင်လုံ ဆက်ဆံပုံမှာ

"မင်း အဖေ သေတာမှ မဟုတ်တာ ကျောင်းကို အမြန်လာခဲ့စမ်း။ စာမေးပွဲမှာ အမှတ်မကောင်းရင် ငါတို့အတန်း၊ ငါတို့ကျောင်းရဲ့ အောင်ချက် ရာခိုင်နှုန်းကို ဘယ်လောက်ထိခိုက်မလဲဆိုတာ မင်းမသိဘူးလား ကောင်းတဲ့ အထက်တန်းကျောင်းကို မတက်နိုင်ရင် မင်းအဖေလိုပဲ တစ်သက်လုံး ဆိုင်ကယ်အိုကြီးနဲ့ပဲ ပတ်နေရလိမ့်မယ်။ မင်းမိဘတွေလိုပဲ အသုံးမကျတဲ့ဘဝနဲ့ နေသွားရလိမ့်မယ်။ မင်းတစ်ယောက်တည်းကြောင့် ငါ့အတန်းရဲ့ အောင်ချက် ရာခိုင်နှုန်းကို မထိခိုက်စေချင်ဘူး။ အတန်းထဲမှာ ၅၂ ယောက်ရှိတာ ဘာလို့ မင်းတစ်ယောက်တည်း နောက်ဆုံး ဖြစ်နေရတာလဲ"

"မလာနိုင်ဘူးပေါ့ အရိုးကျိုးလို့ မလာနိုင်တာ အစစ်လား၊ လိမ်တာလား မလာနိုင်ရင် လာမနေနဲ့တော့။ နောက်နေ့တွေမှာလည်း မလာနဲ့ အိမ်မှာပဲ စာကျက်နေလိုက်။ ရက်အနည်းငယ်ကြာရင် ကျောင်းထွက်ခွင့် ပြုလိုက်မယ်။ မင်းတစ်ယောက်တည်းကြောင့် ငါတို့အတန်းရဲ့ အောင်ချက် ရာခိုင်နှုန်းကို မထိခိုက်စေချင်ဘူး"

ဗီဒီယိုထဲတွင် ကျောင်းသားတစ်ဦးကို ယန်ခိုင်လုံက ကန်ကျောက်နေပုံနှင့် ကျောင်းသားမှာ ပြန်လည်ခုခံရန်ပင် မရဲဘဲ ကြောက်ရွံ့နေပုံတို့ကို ကြည့်ရှုသူအားလုံး မြင်တွေ့လိုက်ရသည်။ တိုက်ရိုက်ထုတ်လွှင့်မှုကို ကြည့်ရှုနေသူများမှာ ဒေါသထွက်လွန်း၍ မခံမရပ်နိုင် ဖြစ်ကြသည်။

[သောက်ကျိုးနည်း ယန်ခိုင်လုံ စာမေးပွဲ နည်းနည်း ကျတာနဲ့ ဒီလောက်တောင် လုပ်စရာ လိုလို့လား]

[ကျောင်းသားကို ကန်တယ်ပေါ့လေ သူက လူမိုက်လား ဆရာလား]

[ဒီကလေးက သနားဖို့ကောင်းလိုက်တာ ပြန်လည်း မခုခံရဲဘူး။ ခုခံလိုက်ရင် နောက်တစ်ချက် ထပ်ကန်မှာကို ကြောက်နေတာ]

[ယန်ခိုင်လုံကို ထောင်ချမှ ရမယ်။ အခုချက်ချင်း ဖမ်းလိုက်ကြစမ်း]

ဤဗီဒီယိုဖိုင်များသည် ကျောင်းသားများအပေါ် ဖိအားပေးမှု၊ စိတ်ပိုင်းဆိုင်ရာ နှိပ်စက်မှုများနှင့် ပတ်သက်၍ အထင်အရှား သက်သေပြနေသည်။

တန်ရှင်းရန် သေဆုံးရခြင်းမှာ သူမ၏ စိတ်ပိုင်းဆိုင်ရာ အားနည်းမှုတစ်ခုတည်းကြောင့် မဟုတ်ဘဲ ဤကဲ့သို့သော ဖိနှိပ်မှုများကြောင့် ဖြစ်ကြောင်း လူတိုင်း နားလည်လာကြသည်။