အခန်း ၂၉၈

အခန်း (၂၉၈) တောင်းပန်ပြီး တင်တောင်းစရိတ်သုံးဆ ပြန်ပေးရမယ်

ကံမကောင်းစွာဖြင့် ပိုင်ဟူဂိုဏ်းမှ လူနှစ်ယောက်မှာ လှုပ်ရှားရန်ပင် မဝံ့ရဲကြပေ။

သူတို့သည် လီလန်က ဝူပိုင်ရှန်းအား ရက်စက်စွာ ရိုက်နှက်နေသည်ကိုသာ ရပ်ကြည့်နေကြတော့သည်။

ဤအပြုအမူကို ကြည့်ခြင်းအားဖြင့် ထိုလူနှစ်ယောက်သည် ကျန်းချင်းလုံနှင့် သူ၏နောက်ကွယ်ရှိ ချင်းလုံဂိုဏ်းကို ကြောက်ရွံ့နေကြကြောင်း ထင်ရှားလှပေသည်။

ပိုင်ဟူဂိုဏ်းသည် အင်အားငယ်သည့်အဖွဲ့ မဟုတ်ဘဲ ဟေးရွှေမြို့နယ်တွင် လွှမ်းမိုးမှုအချို့ ရှိသော်လည်း ချင်းလုံဂိုဏ်းကိုမူ မည်သို့မျှ ယှဉ်ပြိုင်နိုင်စွမ်း မရှိကြပေ။

မည်သို့ပင်ဆိုစေကာမူ ချင်းလုံဂိုဏ်းသည် အရှေ့ပိုင်းပြည်နယ်သုံးခု၏ ဆေးဖက်ဝင်အပင်များ စီးပွားရေးကို တစ်ဦးတည်း မူပိုင်ခွင့်ရရှိထားခြင်း ဖြစ်သည်။

သူတို့သည် ဆေးဖက်ဝင်အပင် စီးပွားရေးကို တောင်ပိုင်းဈေးကွက်သို့ပင် တိုးချဲ့ထားကြသေး၏။

ဤအချက်တစ်ခုတည်းနှင့်ပင် ပိုင်ဟူဂိုဏ်းမှာ ယှဉ်ပြိုင်ရန် အဆင့်မရှိပေ။

ပိုင်ဟူဂိုဏ်း၏ ခေါင်းဆောင်နှစ်ယောက်သည် အသေကောင်များသဖွယ် ဟန်ဆောင်ကာ ဘေးသို့ပုန်းရှောင်၍ လီလန်က သူတို့၏ တတိယခေါင်းဆောင်အား ဒဏ်ရာများရကာ ဖူးရောင်လာသည်အထိ ရိုက်နှက်နေသည်ကိုသာ ကြည့်နေကြလေသည်။

အနည်းငယ်မျှပင် ဝင်ရောက်တားဆီးခြင်း မရှိကြပေ။

လီလန်သည်လည်း စိတ်ဝင်စားမှု လျော့ကျသွားပြီးနောက် ဝူပိုင်ရှန်းအား လုံကျန်းဟူထံ လွှဲပြောင်းပေးကာ တိရစ္ဆာန်ကုဆရာဝန်လုံကို သူ၏ ဒေါသများ ကောင်းစွာ ဖွင့်ထုတ်ခွင့် ပေးလိုက်တော့သည်။

လီလန်ကိုယ်တိုင်မူ ပိုင်ဟူဂိုဏ်း၏ ခေါင်းဆောင်နှစ်ယောက်ထံသို့ လျှောက်သွားလိုက်၏။

"အရက်သောက်ဖို့ မလိုပါဘူး... ငါတို့က အဲ့ဒီလောက် ရင်းနှီးတဲ့သူတွေမှ မဟုတ်တာ..."

လီလန်သည် ဒုတိယခေါင်းဆောင်ပိုင်အား ငြင်းပယ်လိုက်လေသည်။

ဒုတိယခေါင်းဆောင်ပိုင်၏ အကြံအစည်သေးသေးလေးကို သူ တစ်ချက်တည်းနှင့်ပင် မြင်လိုက်ရုံဖြင့် သိနေလေသည်။

သူက အပြစ်ပေးသည့်အနေဖြင့် အရက်သုံးခွက်သောက်မည့် အကြောင်းပြချက်ကို အသုံးပြု၍ ဤကိစ္စကို ပြီးစီးသွားစေရန် လိုလားနေခြင်း ဖြစ်သည်။

*ဟဲဟဲ…

ပိုင်ဟူဂိုဏ်း၏ ဤဒုတိယခေါင်းဆောင်မှာ အကြံအစည်ကောင်းလေးတစ်ခု ရှိနေပေသည်။

သို့သော်လည်း ကံမကောင်းစွာဖြင့် ဤကိစ္စကို အရက်တစ်ခွက်ဖြင့် ဖြေရှင်း၍ မရနိုင်ပေ။

လီလန်သည် ခေါင်းခါလိုက်၏။ ပိုင်ဟူဂိုဏ်းမှ ထိုနှစ်ယောက်သည် သူတို့၏ အမှားကို ဝန်ခံရာတွင် သင့်တင့်လျောက်ပတ်သော သဘောထား ရှိကြသော်လည်း ဤသည်မှာ ကျန်းချင်းလုံ ရှိနေသောကြောင့်သာဖြစ်ကြောင်းကို လီလန် ကောင်းစွာ သိရှိထားလေသည်။

အကယ်၍ ကျန်းချင်းလုံသာ ဤနေရာ၌ မရှိပါက ပိုင်ညီအစ်ကိုနှစ်ယောက်သည် လုံးဝ ကွဲပြားခြားနားသော သဘောထားမျိုး ရှိနေမည်မှာ သေချာလှသည်။

သူတို့ သုံးယောက်ကို ဝိုင်းဝန်းတိုက်ခိုက်ရန် ညီအစ်ကိုများစွာကို ခေါ်ယူလာနိုင်ခြေ အလွန်ပင် ရှိလေသည်။

လူမိုက်ဂိုဏ်းခေါင်းဆောင် ဖြစ်လာနိုင်သူတိုင်း၏ လက်ထဲတွင် လှည့်ကွက်အချို့ ရှိနေမည်မှာ အမှန်ပင် ဖြစ်သည်။

လီလန်က သူတို့၏ ဖိတ်ကြားချက်ကို ငြင်းပယ်လိုက်သည်ကို မြင်သောအခါ ခေါင်းဆောင်ပိုင်သည် ဒေါသထွက်ခြင်းမရှိဘဲ ဘေးနားမှ တဟီးဟီး ရယ်မောလိုက်လေသည်။

"အဖွဲ့ခေါင်းဆောင်လီ... ဒီကိစ္စမှာ တတိယခေါင်းဆောင်ဝူလုပ်ခဲ့တာ အမှားဆိုတာ အမှန်ပါပဲ... ဒီလိုလုပ်ရင်ရော ဘယ်လိုလဲ... တတိယခေါင်းဆောင်ဝူကို ခင်ဗျားဆီ တောင်းပန်ခိုင်းပြီး တင်တောင်းစရိတ် ယွမ်တစ်ရာကို ခင်ဗျားဆီ ပြန်ပေးခိုင်းလိုက်မယ်လေ... ဘယ်လိုသဘောရလဲ..."

ခေါင်းဆောင်ပိုင်က အကြံပြုချက်တစ်ခု ပေးလိုက်သည်။

ထိုစကားကို ကြားသောအခါ လီလန်က ခေါင်းခါ၍သာ တုံ့ပြန်လိုက်၏။

"ကျွန်တော် ပြောပြီးပြီလေ... ကျွန်တော်က ကျွန်တော့် သူငယ်ချင်းအတွက် တရားမျှတမှုရဖို့ လာခဲ့တာပါ..."

"တောင်းပန်ချင်ရင် ကျွန်တော့် သူငယ်ချင်းကိုသာ တောင်းပန်လိုက်ပါ..."

"တင်တောင်းစရိတ်ကိစ္စနဲ့ ပတ်သက်ပြီး ယွမ်တစ်ရာ ပြန်ပေးရုံနဲ့ မလုံလောက်ဘူး... အနည်းဆုံး သုံးဆလောက်တော့ ရှိသင့်တယ်..."

လီလန်သည် လက်သုံးချောင်း ထောင်ပြလိုက်လေသည်။

ထိုအရာကို မြင်လိုက်ရသောအခါ ခေါင်းဆောင်ပိုင်၏ မျက်နှာအမူအရာမှာ ချက်ချင်းပင် ပြောင်းလဲသွားတော့သည်။

ယွမ်တစ်ရာ၏ သုံးဆဆိုလျှင် ယွမ်သုံးရာ ဖြစ်သွားမည် မဟုတ်ပါလော။

တင်တောင်းစရိတ်အဖြစ် ယွမ်တစ်ရာသာ ပေးခဲ့ရသော်လည်း ယွမ်သုံးရာ ပြန်ပေးရမည်တဲ့လား။

*မင်းကတော့…*

"ဟားဟားဟား... အဖွဲ့ခေါင်းဆောင်လီ... မင်းကတော့..."

သူတို့ဘေးနားမှ ကျန်းချင်းလုံသည် အားရပါးရ ရယ်မောလိုက်လေသည်။

ယွမ်တစ်ရာ တင်တောင်းစရိတ်ကို သုံးဆပွားလိုက်၍ ယွမ်သုံးရာ ဖြစ်သွားခြင်းက ပို၍ သင့်တော်လှပေသည်။

ထိုလူလိမ်ကောင်များ ဤတစ်ကြိမ်တွင် အကြီးအကျယ် သွေးထွက်သံယို ဖြစ်သွားစေရန် ထိုက်တန်ပေသည်။

ဒုတိယခေါင်းဆောင်ပိုင်သည် ခေါင်းဆောင်ပိုင်အား သဘောတူညီသည့် အကြည့်ဖြင့် ကြည့်လိုက်၏။

"ကောင်းပါပြီ... ဒါဆိုရင် တင်တောင်းစရိတ်ကို သုံးဆ ပြန်ပေးပါ့မယ်..."

ခေါင်းဆောင်ပိုင်သည် သဘောတူညီစွာဖြင့် ခေါင်းညိတ်လိုက်လေသည်။

မည်သို့ပင်ဆိုစေကာမူ ဤငွေကို တတိယခေါင်းဆောင်ဝူထံမှသာ ရယူမည်ဖြစ်ပြီး သူတို့ ညီအစ်ကိုနှစ်ယောက်က ထုတ်ပေးမည် မဟုတ်သောကြောင့် ဤကိစ္စမှာ သူတို့နှင့် မသက်ဆိုင်ပေ။

"လောင်စန်း... မင်း ကြားလား..."

"ဟိုကောင်လေးကို... အဲ တိရစ္ဆာန်ကုဆရာဝန်လုံကို တောင်းပန်ပြီး ယွမ်သုံးရာ ပြန်ပေးလိုက်ရင် ဒီကိစ္စ ပြီးသွားလိမ့်မယ်..."

ခေါင်းဆောင်ပိုင်သည် ဝူပိုင်ရှန်းအား တင်းမာစွာ ပြောလိုက်လေသည်။

ဝူပိုင်ရှန်းမှာ လုံကျန်းဟူ၏ ရိုက်နှက်မှုကြောင့် ခေါင်းများကွဲကာ သွေးများထွက်နေပြီး သူ၏မျက်နှာမှာလည်း ဖူးရောင်နေကာ ခေါင်းကိုပိုက်၍ ပြေးလွှားရင်း မရပ်မနား အော်ဟစ်နေတော့သည်။

ခေါင်းဆောင်ပိုင်၏ စကားကို ကြားလိုက်ရချိန်တွင် သူသည် ချက်ချင်းပင် လန့်ဖျပ်သွားလေသည်။

"ဘာ... ဟိုတိရစ္ဆာန်ကုဆရာဝန်ကောင်လေးကို ယွမ်သုံးရာ ပေးရမယ် ဟုတ်လား..."

သူ စကားပြောနေစဉ် သူ၏ မျက်လုံးတစ်ဖက်မှာ ဖူးရောင်နေပြီး နှာခေါင်းမှ သွေးများ ယိုစီးကျနေကာ ဝဖြိုးသောမျက်နှာမှာ ဝက်ခေါင်းတစ်လုံးကဲ့သို့ ဖူးရောင်နေသဖြင့် အလွန်တရာ သနားစရာကောင်းလှပေသည်။

"ဘာလဲ... မင်း သဘောမတူဘူးလား..."

ဒုတိယခေါင်းဆောင်ပိုင်က အေးစက်စွာ ပြောလိုက်၏။

ပိုင်ဟူဂိုဏ်းတွင် ခေါင်းဆောင်ပိုင်မှာ အကြီးအကဲဖြစ်ပုံပေါ်သော်လည်း တကယ့် ကျောရိုးနှင့် ဗျူဟာမှူးမှာ ဒုတိယခေါင်းဆောင်ပိုင်သာ ဖြစ်လေသည်။

ဒုတိယခေါင်းဆောင်ပိုင်၏ နည်းလမ်းများကြောင့်သာ ပိုင်ဟူဂိုဏ်းသည် ညီအစ်ကိုနှစ်ယောက်တည်းမှ လူခုနစ်ဆယ် ရှစ်ဆယ်ခန့်ရှိသော ဂိုဏ်းတစ်ခုအဖြစ်သို့ တဖြည်းဖြည်း ကြီးထွားလာခဲ့ခြင်း ဖြစ်သည်။

ပိုင်ဟူဂိုဏ်းအတွင်း၌ ဝူပိုင်ရှန်း အကြောက်ရဆုံးသူမှာ ဒုတိယခေါင်းဆောင်ပိုင်ပင် ဖြစ်လေသည်။

"ဒုတိယအစ်ကို... ကျွန်တော်က ဘယ်ဝံ့ရဲပါ့မလဲ..."

ဝူပိုင်ရှန်းသည် လုံကျန်းဟူအား မကျေမနပ်ဖြင့် တစ်ချက် ကြည့်လိုက်ပြီးနောက် အံကြိတ်ကာ ခေါင်းကို အတင်းအကျပ် ညိတ်လိုက်တော့သည်။

သူသည် မလိုလားစွာဖြင့်ပင် ပြောလိုက်၏။

"သုံးရာဆိုလည်း သုံးရာပေါ့... ကျွန်တော် ပိုက်ဆံပြန်ပေးပါ့မယ်..."

"ဒါဆိုရင်လည်း ပေးလေ..."

လီလန်သည် သူ၏ နှုတ်ခမ်းစွန်းတွင် အပြုံးဖျော့ဖျော့လေးတစ်ခု ချိတ်ဆွဲလျက် သူ့ကို ကြည့်လိုက်လေသည်။

"ဒါက..."

ဝူပိုင်ရှန်းမှာ တွေဝေသွားတော့သည်။

"ဘာလဲ... မင်းလို ကောင်လေးက စကားကို ပြန်ရုပ်သိမ်းချင်နေတာလား..."

ကျန်းချင်းလုံသည် ဝူပိုင်ရှန်းအား စိုက်ကြည့်လိုက်၏။

"မဟုတ်ပါဘူး... မဟုတ်ပါဘူး..."

"မဝံ့ရဲပါဘူး... မဝံ့ရဲပါဘူး..."

"ဒါပေမဲ့ ဒီတင်တောင်းစရိတ်က ကျွန်တော်နဲ့ ဘာမှမဆိုင်ပါဘူး... ကျွန်တော် တစ်ပြားမှ မယူထားပါဘူး... အားလုံးက ကျွန်တော့် ဝမ်းကွဲညီမ လက်ထဲမှာပါ..."

ဝူပိုင်ရှန်းသည် အလွန်ပင် ရိုးသားစွာ ပြောဆိုလိုက်လေသည်။ ပိုင်ညီအစ်ကိုနှစ်ယောက်သည်လည်း ဤသည်မှာ အဓိပ္ပာယ်ရှိသည်ဟု တွေးလိုက်ကြ၏။

သူက ငွေကို မယူထားသောကြောင့် ထိုငွေကို ပေးချေရန် သူ့တာဝန် မဟုတ်ပေ။

"အဖွဲ့ခေါင်းဆောင်လီ... ဒီပိုက်ဆံကိစ္စနဲ့ ပတ်သက်ပြီး ယန်ကို သွားရှာသင့်သလား..."

ခေါင်းဆောင်ပိုင် စကားပင် မဆုံးသေးခင်မှာပင် လီလန်က လှောင်ပြုံး ပြုံးလိုက်လေသည်။

"ဝူပိုင်ရှန်း... မင်း ဒီပိုက်ဆံကို မယူထားဘူးလို့ ပြောရဲသလား..."

"ယန်တုံ့ပင်းက သူမ နောက်ကွယ်မှာ ကျောထောက်နောက်ခံပြုပေးနေတဲ့ မင်းသာ မရှိဘူးဆိုရင် အဲ့ဒီလောက် ရိုင်းစိုင်းရဲပါ့မလား..."

"အဲ့ဒီမိန်းမက အဲ့လောက်မောက်မာနေတာ နောက်ကွယ်မှာ မင်းနဲ့ ဘာမှမသက်ဆိုင်ဘူးလို့ မင်း ပြောရဲသလား..."

လီလန်သည် မေးခွန်းသုံးခုကို ဆက်တိုက်မေးလိုက်ပြီး ဝူပိုင်ရှန်းအား ပြင်းထန်စွာ ဆူပူကြိမ်းမောင်းလိုက်လေသည်။

ဤစကားများကို ကြားသောအခါ ကျန်းချင်းလုံသည် လီလန်အား အလွန်အံ့ဩစွာဖြင့် ကြည့်လိုက်တော့သည်။

ဤအဖွဲ့ခေါင်းဆောင်လီသည် အရည်အချင်းရှိလှပေသည်။

တစ်ကြိမ်တည်းသော ရင်ဆိုင်မှုမှာပင် သူက အခြေအနေကို ရှင်းလင်းသွားစေပြီး ယန်တုံ့ပင်းတစ်ယောက် အိမ်ထောင်ရေးလိမ်လည်မှု ကျူးလွန်ရဲသည့် အကြောင်းရင်းကို ရှာဖွေတွေ့ရှိခဲ့ခြင်း ဖြစ်သည်။

အကြောင်းရင်းမှာ ပိုင်ဟူဂိုဏ်း၏ တတိယခေါင်းဆောင်ဖြစ်သော သူမ၏ ဝမ်းကွဲအစ်ကိုက သူမကို ကျောထောက်နောက်ခံပြုပေးကာ အားပေးအားမြှောက်ပြုနေသောကြောင့် သူမအနေဖြင့် ဤမျှ ရိုင်းစိုင်းရဲခြင်း ဖြစ်လေသည်။

တူရာတူရာ ပေါင်းကြစမြဲပင်။

ယန်တုံ့ပင်းက အိမ်ထောင်ရေးနှင့် ငွေကြေးလိမ်လည်ရန် ဝံ့ရဲနေခြင်းမှာ ဝူပိုင်ရှန်းက သူမ၏ နောက်ကွယ်မှနေ၍ အကြံဉာဏ်များ ပေးနေခြင်းကြောင့်သာ ဖြစ်ပေမည်။

ခေါင်းဆောင်ပိုင်၏ မျက်နှာမှာ အရှက်ရသွားပုံပေါ်လေသည်။

စောစောက တတိယခေါင်းဆောင်ဝူ၏ စကားများမှာ အဓိပ္ပာယ်ရှိသည်ဟု သူ တွေးထင်ခဲ့မိသော်လည်း အဖွဲ့ခေါင်းဆောင်လီက ထိုသို့ ပြောလိုက်ပြီးနောက်တွင်မူ ဝူပိုင်ရှန်း၏ လှည့်စားခြင်းကို ခံလိုက်ရသကဲ့သို့ ခံစားလိုက်ရပြီး သူ၏ မျက်နှာအိုကြီးမှာ နီရဲသွားတော့သည်။

*ဝူပိုင်ရှန်း... ဝူပိုင်ရှန်း...

ဒီလိုအချိန်မျိုးမှာတောင် မင်းက ဆင်ခြေပေးပြီး ဉာဏ်များဖို့ ကြိုးစားနေသေးတယ်ပေါ့လေ။

အကယ်၍ မင်းသာ အချိန်မီ အမှားကို ဝန်မခံဘူးဆိုရင် ဒီနေ့ မင်းရဲ့ အစ်ကိုကြီးနဲ့ ဒုတိယအစ်ကိုတို့က မင်းကို ကာကွယ်ပေးနိုင်မှာ မဟုတ်ဘူးကွ*

"ဝူပိုင်ရှန်း... အဖွဲ့ခေါင်းဆောင်လီ ပြောတာကို မင်း ဘာလို့ နားမထောင်တာလဲ... မြန်မြန် ပိုက်ဆံထုတ်ပေးလိုက်စမ်း..."

ဒုတိယခေါင်းဆောင်ပိုင်သည် ခေါင်းဆောင်ပိုင်ထက် ပို၍ လျင်မြန်စွာပင် စားပွဲကို ရိုက်ကာ ဝုန်းခနဲ မတ်တတ်ရပ်လိုက်လေသည်။

ကျန်းချင်းလုံနှင့် သူ၏ ညီအစ်ကိုနှစ်ယောက်ကိုလည်း သူ မရန်စဝံ့သကဲ့သို့ အဖွဲ့ခေါင်းဆောင်လီကိုလည်း သူ မရန်စရဲပေ။

ယခုအတွက် တစ်ခုတည်းသော ဖြေရှင်းနည်းမှာ တတိယခေါင်းဆောင်ဝူကို စတေးပစ်ရန်ပင် ဖြစ်တော့သည်။

မည်သို့ပင်ဆိုစေကာမူ ပိုင်ဟူဂိုဏ်းမှာ သူတို့ ညီအစ်ကိုနှစ်ယောက် ပိုင်ဆိုင်ခြင်းဖြစ်ရာ မည်သူမဆို တတိယခေါင်းဆောင် ဖြစ်လာနိုင်ပေသည်။

ဝူပိုင်ရှန်းဖြစ်နိုင်သကဲ့သို့ ဝမ်ပိုင်ရှန်း ဖြစ်နိုင်သည်၊ ချန်ပိုင်ရှန်း၊ လီပိုင်ရှန်း၊ ကျန်းပိုင်ရှန်း... အားလုံး ဖြစ်နိုင်လေသည်။

သူတို့သာ ဆန္ဒရှိပါက နောက်ထပ် အနည်းငယ်မျှ ထောက်ပံ့ပေးရန်မှာ ပြဿနာ မဟုတ်ပေ။

ဝူပိုင်ရှန်းသည် အပြစ်ရှိသလို ခံစားလိုက်ရလေသည်။

သူသည် ယခုလေးတင် ကံကောင်းခဲ့သော်လည်း သူ၏ အတွေးများကို အဖွဲ့ခေါင်းဆောင်လီက မြင်သွားလိမ့်မည်ဟု မမျှော်လင့်ခဲ့ပေ။

"ဟူး..."

ဝူပိုင်ရှန်းက သက်ပြင်းချလိုက်၏။

"ဒါက ဝဋ်လည်တာပဲ... ဝဋ်လည်တာပဲ..."

သူသည် မူလက သူ၏ ဝမ်းကွဲညီမ ယန်တုံ့ပင်း၏ အိမ်ထောင်ရေးနှင့် တင်တောင်းစရိတ် လိမ်လည်မှုကို အားပေးထောက်ခံခဲ့ခြင်း မရှိသော်လည်း သူမမှာ သူ၏တစ်ဦးတည်းသော ဝမ်းကွဲညီမဖြစ်ပြီး သွေးက ရေထက် ပြစ်သောကြောင့် သူမကို မငြင်းဆန်နိုင်ခဲ့ပေ။

သူမ၏ အစ်ကိုဝမ်းကွဲ တစ်ယောက်အနေဖြင့် သူ၏ ညီမလေးက အန်းဟွေးထုံလင် (ရှန်တုန်း ဟယ်ကျဲဆိုသည်မှာ မည်သူမည်ဝါဖြစ်ကြောင်း လိမ်လည်ထားခြင်းသာဖြစ်ပြီး ယန်တုံ့ပင်း၏ မျိုးရိုးဇာတိမှာ အန်းဟွေး ထုံလင်ဖြစ်သည်) မှနေ၍ အရှေ့မြောက်ပိုင်းသို့ သူ့ကို အားကိုးရန် အဝေးကြီးမှ လာရောက်သောအခါ သူမကို သူ မည်သို့ အလိုမလိုက်ဘဲ နေနိုင်မည်နည်း။

သို့သော်လည်း သူမကို အလိုလိုက်ခဲ့မိသောကြောင့်... ဟူး... ပြဿနာများ ပေါ်လာခဲ့တော့သည်။

လုံကျန်းဟူဆိုသော ထိုတိရစ္ဆာန်ကုဆရာဝန်လေးမှာ ပထမဆုံးလူ မဟုတ်ပေ။ သူက ပဉ္စမမြောက်လူ ဖြစ်လေသည်။

သို့သော်လည်း ယခင်က ကံဆိုးသူ လေးယောက်ကို သူက ဂိုဏ်း၏ ဩဇာတိက္ကမကို အသုံးပြု၍ ဖြေရှင်းခဲ့ပြီး အနည်းငယ် ခြိမ်းခြောက်လိုက်ရုံဖြင့် လုံလောက်ခဲ့လေသည်။

သာမန်ပြည်သူများက လူမိုက်ဂိုဏ်းကို မည်သို့လျှင် တိုက်ခိုက်ဝံ့မည်နည်း။ သူတို့တွင် ထိုသတ္တိများ မည်သည့်နေရာမှ ရလာမည်နည်း။

လူအနည်းငယ်ကို သူတို့အိမ်များသို့ ခေါ်သွားကာ ခြောက်လှန့်လိုက်ရုံဖြင့် သူတို့သည် ချက်ချင်းပင် အမြီးကုပ်ကာ ပုန်းအောင်းသွားကြပြီး သူ၏ ဝမ်းကွဲညီမအား ဘယ်သောအခါမှ ထပ်မံနှောင့်ယှက်ခြင်း မရှိကြတော့ပေ။

သို့သော်လည်း ယနေ့တွင်မူ မည်သူက မျှော်လင့်ထားခဲ့မည်နည်း။

ထိုပဉ္စမမြောက် ကောင်လေး၏ နောက်ကွယ်တွင် ဤနတ်ဘုရားကြီး နှစ်ပါး ရပ်တည်နေလိမ့်မည်ဟူ၍ပင်။