အခန်း ၂၉၃

အပိုင်း(၂၉၃) မိသားစု(၄)ခုကို ဝိုင်းရံနှိမ်နင်းခြင်း၊ လှေငယ်လေးဖြင့် အလည်ရောက်လာခြင်း

ကျိမိသားစု၏ ဘိုးဘေးပိုင်နေအိမ်။

"နဝမမြောက် နန်းဆောင်သခင် သေသွားပြီ။ အချိန်-နေရာလွတ် ဓားသူတော်စင်ရဲ့လက်ချက် ဖြစ်နိုင်တယ်။"

"အင်း။ သူက ဧကရာဇ်ရဲ့ရည်ရွယ်ချက်အတွက် ကိုယ်ကျိုးစွန့်ခဲ့တာပါ၊ အဲဒီအတွက် ငါ ဂုဏ်ယူပါတယ်။ သူရဲ့ သေလုဆဲဆဲ တန်ပြန်တိုက်ခိုက်မှုမှာ သူက လီရွှမ်ကျင်းကို သူသေကိုယ်သေ တိုက်ခိုက်ခဲ့ပြီး ချူရှီရန်နဲ့ လီယဲ့တို့ကို ဒဏ်ရာ အပြင်းအထန်ရစေခဲ့ပါတယ်။ မိသားစု(၄)ခုရဲ့ မဏ္ဍိုင်င်(၉)ခုထဲမှာ (၃)ခုက ကျဆုံးသွားပြီ။ ဒီအခွင့်အရေးကို ဆုပ်ကိုင်ပြီးတော့ မိသားစု(၄)ခုကို အညံ့ခံလာအောင် ချက်ချင်း တပ်တွေ စေလွှတ်ရမယ်။"

"ဟုတ်ကဲ့ပါ။"

ဘိုးဘေးပိုင် နေအိမ်အတွင်းတွင် ငွေရောင်ခေါင်းလောင်းလေးတစ်ခု ဆွဲထားလေသည်။

ကံကြမ္မာမြို့တော်။

ကျိဝူရွှမ်က မျက်လုံးများကို ဖွင့်လိုက်ရာ ထိတ်လန့်တုန်လှုပ်မှုများ ကျန်ရှိနေဆဲပင်။ ကောင်းကင်စောင့်ကြည့်သူ၏ ပျောက်ကွယ်သွားသောပုံရိပ်ကို ကြည့်ရင်း သူ့ဘာသာ ရေရွတ်လိုက်သည်။

"နဝမမြောက်နန်းဆောင်သခင်က အနည်းဆုံးတော့ ကောင်းကင်ထောက်တိုင်နယ်ပယ် အလယ်အလတ် အဆင့်မှာရှိတယ်။ နတ်ဘုရားတာအိုကို ကျင့်ကြံပြီးတော့ နတ်ဘုရား(၁၀၈)ပါးရဲ့ သွန်သင်ချက်တွေကို နားလည် သဘောပေါက်ထားတယ်။ သူ့ရဲ့ စစ်မှန်တဲ့တိုက်ခိုက်ရေးခွန်အားက ငါ့ထက် မလျော့ဘူး။ မုန့်ချင်ကျိုးက သူ့ကို သတ်နိုင်ခဲ့တယ်ဆိုတော့..."

"ကောင်းကင်ထောက်တိုင်နယ်ပယ် ကျင့်ကြံသူ(၃)ယောက်ရဲ့ အကူအညီနဲ့ ဆိုရင်တောင် သူက ကောင်းကင်ထောက်တိုင်နယ်ပယ်ကို ဖောက်ထွင်းဝင်ရောက်သွားတာ ဖြစ်လောက်တယ်။"

"သူက တကယ်ပဲ ငါ့ကိုမီသွားပြီ။"

"မယုံနိုင်စရာပဲ။"

ကျိဝူရွှမ်က ဦးနှောက်ကို အတင်းအကျပ် စဉ်းစားခဲ့သော်လည်း သူတို့၏ နောက်ဆုံး တိုက်ရိုက် ထိပ်တိုက်ရင်ဆိုင်မှုကတည်းက လအနည်းငယ်သာ ကြာသေးသော်လည်း သူက နံနက်ခင်းအလင်းနယ်ပယ်ကို မနည်းဖောက်ထွင်းဝင်ရောက်ခဲ့ရပြီး ယခုအခါတွင် ကောင်းကင်ထောက်တိုင်နယ်ပယ်သို့ ဝင်ရောက်သွားမည်ဟု ဘယ်သောအခါမှ မမျှော်လင့်ထားခဲ့ပေ။

ဒီလိုမျိုး သမိုင်းမှာ မကြုံစဖူးပြိုင်ဖက်ကင်းတဲ့ ကျင့်ကြံမှုပါရမီက တကယ်ကို ကြောက်ရွံ့လေးစားဖို့ ကောင်းတယ်။

"ငါ သူ့ကို အစကတည်းက သတ်ပစ်မှရမယ်။"

"သူ့ကို ဒီလိုမျိုး ဆက်ပြီးတော့ ကြီးထွားလာခွင့် ပေးလို့မရဘူး။"

ကျိဝူရွှမ်က မတ်တတ်ရပ်ကာ ကံကြမ္မာမြို့တော်မှ ထွက်လာပြီး ကျိမိသားစု၏ အဓိကမြို့တော်ဆီသို့ လျှပ်တစ်ပြက် သွားလိုက်သည်။

သူက ဘိုးဘေး(၃)ဦးဖြစ်သော ကျိဝူမင်၊ ကျိခုံးကျိနှင့် ကျိရွှီခုံးတို့အပြင် ကျိမိသားစု၏ အဆင့်မြင့် အရာရှိများနှင့် ကောင်းကင်ထောက်တိုင်ဂိုဏ်းမှ ချေမှုန်းခံရသော ကျင့်ကြံသူ (၁၈)ဦးထံသို့ အသံလှိုင်း ပေးပို့လိုက်သည်။

ကျိဝူရွှမ်ကိုယ်တိုင်အပါအဝင် ကျိမိသားစု၏ အဓိကခန်းမတွင် ကောင်းကင်ထောက်တိုင်နယ်ပယ် ပုဂ္ဂိုလ် စုစုပေါင်း (၁၄)ဦး စုရုံးနေလေသည်။

"ဝူရွှမ်... ယွမ်ယန်နယ်ပယ်တိုက်ပွဲအတွက် ငါတို့ကို ဆင့်ခေါ်တာလား။" ဆံပင်ဖြူများနှင့် နက်ရှိုင်းသော မျက်လုံးများရှိသည့် ကျိရွှီခုံးက မေးလိုက်သည်။

အဓိကခန်းမတွင်။

စားပွဲရှည်တွင် လူများ ပြည့်နှက်နေပြီး အားလုံးမှာ အရပ်ရှည်ပြီး သန်မာကြလေသည်။

ဘေးဘက်တွင် ရိုသေစွာမတ်တတ်ရပ်နေသူများမှာ ကျိမိသားစု၏ အဆင့်မြင့် အရာရှိများ ဖြစ်ကြသည်။

ကျိဝူရွှမ်က အဓိကထိုင်ခုံတွင် မတ်မတ်ထိုင်ကာ လူအုပ်ကို အကဲခတ်ကြည့်ရှုပြီး နက်ရှိုင်းသော အသံဖြင့် ပြောလိုက်သည်။

"ဟုတ်တယ်။"

"မိသားစု(၅)ခုကြားက ငြိမ်းချမ်းရေးဆွေးနွေးပွဲတွေ အနှောင့်အယှက်ခံရပြီး ပျက်စီးသွားတယ်။ ဒါပေမဲ့ ကျုပ် ထွက်လာပြီးတော့ ယွမ်ယန်နယ်ပယ်မှာ တိုက်ပွဲတစ်ခု ဖြစ်ပွားခဲ့တယ်။ လီရွှမ်ကျင်း သေသွားတယ်။ လီယဲ့နဲ့ ချူရှီရန်တို့ ဒဏ်ရာအပြင်းအထန်ရသွားတယ်။ ဒါက ကောင်းကင်ကပေးတဲ့ အခွင့်အရေးပဲ။"

"ကောင်းကင်ပြည်နယ် ပေါင်းစည်းရေးက နီးကပ်နေပြီ။ မိသားစု(၄)ခုကို ဝိုင်းရံပြီးတော့ ချေမှုန်းဖို့ ချက်ချင်း တပ်တွေစေလွှတ်ဖို့ ငါ ဆုံးဖြတ်လိုက်ပြီ။"

"လူကြီးမင်းတို့... ခေတ်အဆက်ဆက်အတွက် ကြီးကျယ်ခမ်းနားတဲ့ ရည်ရွယ်ချက်တစ်ခုကို မကြာခင် တည်ထောင်တော့မယ်။ အကယ်၍ အဲဒါသာ အောင်မြင်ရင် ခင်ဗျားတို့ အားလုံးက နဂါးနောက်ကိုလိုက်တဲ့ ဝန်ကြီးတွေ ဖြစ်လာလိမ့်မယ်။"

ကျိမိသားစု၏ တိုက်ရိုက်မျိုးဆက် အကြီးအကဲသုံးဦးက လေးနက်စွာ ခေါင်းညိတ်ပြီး တစ်ပြိုင်နက်တည်း ပြောလိုက်ကြသည်။ "မျှော်လင့်ချက်တွေနဲ့ ကိုက်ညီအောင် သေချာပေါက် ကြိုးစားပါ့မယ်။"

ကောင်းကင်ထောက်တိုင် (၁၀)ဦးသာလျှင် ခေါင်းလောင်းများကဲ့သို့ မတ်မတ်ထိုင်နေကြသော်လည်း ကြိုးဆွဲရုပ်သေးရုပ်များကဲ့သို့ စကားမပြောဘဲ တုံ့ပြန်ခြင်းလည်းမရှိဘဲ သေဆုံးနေသော မျက်လုံးများ ရှိနေသည်။

ထူးဆန်းသည်မှာ ကျိမိသားစုမှ အဆင့်မြင့်အရာရှိများ အားလုံးက ၎င်းကို လုံးဝ ဂရုမစိုက်ကြပုံရသည်။

ကျိဝူရွှမ်ကပင် သူတို့ကို လျစ်လျူရှုထားပြီး စိတ်ဓာတ်မြှင့်တင်ရေး စကားများကို ဆက်လက် ပြောဆိုနေလေသည်။

"အသေးအဖွဲစကားတွေ ပြောနေတာ လုံလောက်ပြီ။"

"နောက်တစ်ခုကတော့ ကျုပ်ရဲ့အစီအစဉ်အတိုင်း ဘိုးဘေး (၃)ယောက်စလုံးက မျိုးနွယ်စုတစ်ခုစီကို ရွေးချယ်ရမယ်။ ချူ၊ လင်း ဒါမှမဟုတ် လုံပေါ့။ တစ်ယောက်ချင်းစီက ကျိမိသားစုရဲ့ တိုက်ခိုက်ရေးအင်အား သုံးပုံတစ်ပုံကို ယူသွားရမယ်။ ဂိုဏ်း(၁၈)ခုက ကောင်းကင်ထောက်တိုင် ကျင့်ကြံသူ (၁၀)ယောက်အတွက်တော့ သူတို့ကို (၃)ယောက်ကနေ (၄)ယောက်အထိ အုပ်စုသုံးစုခွဲမယ်။ (၃)ယောက်ကို လင်းနဲ့လုံမိသားစုတွေကို ကိုင်တွယ်ဖို့ တာဝန်ပေးမယ်။ ပြီးတော့ (၄)ယောက်ကို အခက်ခဲဆုံး ချူမိသားစုကို ကိုင်တွယ်ဖို့ တာဝန်ပေးမယ်။"

"ကျုပ်ကတော့ ချင်လွမ်ထျန်းတစ်ခုလုံးကို ကိုယ်ပိုင်ခွန်အားနဲ့ ဖိနှိပ်ထားမယ်။ ဘယ်သူမှ ကျုပ်နောက် လိုက်စရာမလိုဘူး။"

ဘိုးဘေး (၃)ဦးစလုံးက လေးနက်စွာ ခေါင်းညိတ်လိုက်ကြသည်။

လီမိသားစုက အခက်အခဲများနှင့် ရင်ဆိုင်နေရပြီး အင်အားကြီးသော ခေါင်းဆောင်တစ်ဦးသာ ရှိသောကြောင့် ကိုင်တွယ်ရန် လွယ်ကူသည်ဟု မထင်လိုက်ပါနှင့်။

သို့သော်လည်း သူတို့နှလုံးသားထဲတွင်တော့ သိကြသည်။

မိသားစု(၄)ခုက လူသားဧကရာဇ်ခေတ်အထိ နောက်ကြောင်းပြန်သွားနိုင်သော သမိုင်းကြောင်း ရှိသည်။ သူတို့သည် ဧကရာဇ်နန်းတော်၏ မဏ္ဍိုင်လေးခုမှ အမွေအနှစ်များစွာကို ဆက်ခံခဲ့ပြီး လျှို့ဝှက်လက်နက် များစွာကို ဖုံးကွယ်ထားကြသည်။ ကျိဝူရွှမ်က ချင်လွမ်ထျန်းကို တစ်ဦးတည်း နှိမ်နင်းရဲသည့်သတ္တိက သူ့တွင် လုံးဝ ကြီးမြတ်သောစိတ်ထားရှိကြောင်း ပြသနေသည်။

ကျိရွှီခုံးက အရင် စကားပြောလိုက်သည်။

"ချူမိသားစုကို ငါ့တာဝန်လိုက်။"

ထို့နောက် ကျိခုံးကျိက လုံမိသားစုကို ကိုင်တွယ်ရန် ရွေးချယ်ခဲ့ပြီးနောက် ကျိဝူမင်က လင်းမိသားစုကို ကိုင်တွယ်ရန် ရွေးချယ်ခဲ့သည်။

အစည်းအဝေး ရုတ်တရက် ပြီးဆုံးသွားလေသည်။

လူအုပ်ကြီးက စိတ်လှုပ်ရှားမှုနှင့် မျှော်လင့်ချက်များဖြင့် ပြည့်နှက်ကာ လူစုခွဲသွားကြပြီး တိုက်ပွဲအတွက် ပြင်ဆင်မှုများကို အလေးအနက် စတင်ခဲ့ကြသည်။

ကျိဝူရွှမ်က လူတိုင်းထွက်ခွာသွားသည်ကို ကြည့်ပြီး လက်ညှိုးဖြင့် စားပွဲကို ပုတ်ကာ၊ ဗလာကျင်းနေသော အဓိကခန်းမကြီးကို တစ်ချက် အကဲခတ်လိုက်ပြီး အနည်းငယ် မျက်မှောင်ကြုတ်ကာ အော်ပြောလိုက်သည်။

"ထွက်ခဲ့စမ်း။"

ပုံရိပ်တစ်ခုက အချိန်-နေရာလွတ်မြစ်ကို ဖြတ်ကျော်လာပြီး လေထဲမှ ပေါ်ထွက်လာကာ စားပွဲရှည်၏ အခြားတစ်ဖက်တွင် အေးအေးဆေးဆေး ထိုင်လိုက်လေသည်။

ကျိဝူရွှမ်က ထိုလူကို မြင်လိုက်ရသည့် အခိုက်အတန့်တွင် တိုက်ခိုက်ခြင်းကို မတားဆီးနိုင်လုနီးပါး ဖြစ်သွားသော်လည်း ချက်ချင်း တည်ငြိမ်သွားကာ စိတ်ခံစားမှုများကို ဖိနှိပ်ထားပြီး ပြောလိုက်သည်။

"မုန့်ချင်ကျိုး... ကျိမိသားစုကို တစ်ယောက်တည်း ကျူးကျော်ဝင်လာရဲလောက်အောင် မင်းက တကယ် သတ္တိရှိတာပဲ။"

"ဟီးဟီး။"

မုန့်ချင်ကျိုးက သရဲမျက်နှာဖုံးကို ချွတ်လိုက်ကာ သူ၏နှုတ်ခမ်းများပေါ်တွင် အပြုံးတစ်ခု ပေါ်လာပြီး ပြောလိုက်သည်။

"မိတ်ဆွေ... နေရာတွေ ပြောင်းသွားပြီ။ အရင်တုန်းက မင်းက တောရိုင်းမြေကို ကျူးကျော်ခဲ့ပြီးတော့ ငါက မင်းကို နေရာတိုင်းမှာ သတိထားနေခဲ့ရတာ။ အခုတော့ နေရာတွေ ပြောင်းသွားပြီ။ ဘယ်လို ခံစားရလဲ။ သိပ်မကောင်းဘူး မဟုတ်လား။"

ထိုစကားကို ကြားသောအခါ ကျိဝူရွှမ်၏အမူအရာ အနည်းငယ် ညိုမည်းသွားလေသည်။

ချီးပဲ... ဒါက သိပ်မကောင်းတာ မဟုတ်ဘူး။ ပေါက်ကွဲတော့မလို ဖြစ်နေပြီ။ ဒီကောင်ရဲ့ ကျင့်ကြံမှု အမြန်နှုန်းက လူသားမဆန်ဘူး။ သူက ငါ့ကို ပေါင်းအိုးတစ်လုံးလို ဖြစ်အောင် လုပ်နေတာပဲ။

"မင်း ကောင်းကင်ထောက်တိုင်နယ်ပယ်ကို ရောက်သွားပြီလား။"

"မဟုတ်ဘူး။ ငါက နံနက်ခင်းအလင်းနယ်ပယ် အထွတ်အထိပ်မှာပဲ ရှိသေးတယ်။ ငါ့လိုမျိုး လူတစ်ယောက်အတွက် ကောင်းကင်ထောက်တိုင်နယ်ပယ်ကို ရောက်ဖို့က ဘယ်လောက်တောင် ခက်လိုက်မလဲ။ ငါ့ရဲ့အသိပညာက တိမ်ကောပြီးတော့ ပါရမီက သာမန်ပဲ။ ငါ့ရဲ့ ကျွမ်းကျင်မှုတွေကိုသွေးဖို့ အချိန်လိုတယ်။ မင်းလောက် ငါက ဘယ်လိုလုပ် ကြောက်စရာကောင်းနိုင်မှာလဲ။"

မုန့်ချင်ကျိုးက ခါးသီးသောမျက်နှာဖြင့် ခေါင်းခါလိုက်ပြီး အသံအနိမ့်အမြင့် အမျိုးမျိုးဖြင့် သက်ပြင်းချလိုက်သည်။

ကျိဝူရွှမ်သည် ထိုသူအား သေအောင်ရိုက်သတ်ချင်စိတ်ကို ထိန်းချုပ်လိုက်ပြီး ၎င်းက အတုအယောင် ခန္ဓာကိုယ်တစ်ခုသာဖြစ်ပြီး သတ်လိုက်လျှင် အကျိုးမရှိနိုင်ကြောင်းကို သတိရသွားက ထပ်မံထိန်းချုပ်လိုက်ပြီး ညိုမည်းနေသော မျက်နှာဖြင့် ပြောလိုက်သည်။

"နဝမမြောက် နန်းဆောင်သခင်ကို မင်း သတ်ခဲ့တယ်ဆိုတာ ငါ မသိဘူးလို့ မထင်နဲ့။ မင်းသာ ကောင်းကင်ထောက်တိုင်နယ်ပယ်ကို မရောက်သေးဘူးဆိုရင် ဘယ်လိုလုပ် ဒီလိုလုပ်နိုင်မှာလဲ။"

"အမှန်အတိုင်းပြောရရင် ငါ ကံကောင်းသွားတာပါ။ မိသားစု(၃)ခုရဲ့ ခေါင်းဆောင်တွေက တစ်ယောက်ပြီး တစ်ယောက် အသေအလဲတိုက်ခိုက်ခဲ့ကြတယ်။ ချူရှီရန်က သူ့ရဲ့ သေစေနိုင်တဲ့အားနည်းချက်ကို ထိုးထွင်းသိမြင်ခြင်း ပညာရပ်ကိုတောင် သုံးခဲ့ပြီးတော့ လီရွှမ်ကျင်းက ငါ့ဓားတစ်ချက်တည်းနဲ့ ခေါင်းမဖြတ်ခင် နဝမမြောက်နန်းဆောင်သခင်ကို ပြင်းပြင်းထန်ထန် ဒဏ်ရာရစေဖို့ သူ့မိသားစုရဲ့ လျှို့ဝှက်လက်နက်ကိုတောင် သုံးခဲ့တာ။"

"တကယ်လား။"

"ငါက မင်းကို ဘာဖြစ်လို့ လိမ်ရမှာလဲ။ ကတိတစ်ခု ထားရအောင်။ တကယ်လို့ ငါက ကောင်းကင်ထေက်တိုင်နယ်ပယ်ကို ဖောက်ထွင်းဝင်ရောက်ပြီးပြီဆိုရင် မိုးကြိုးငါးချက် ပစ်ခံရပြီးတော့ သေပြီးရင် ဘယ်တော့မှ လူပြန်မဝင်စားရပါစေနဲ့။ ဘယ်လိုလဲ။"

ကျိဝူရွှမ် တိတ်ဆိတ်သွားပြီး အနည်းငယ် သံသယဝင်နေဆဲပင်။

သူ့စကားတွေနဲ့ လုပ်ရပ်တွေကိုကြည့်ရရင် ဟန်ဆောင်နေတဲ့ပုံ မပေါ်ဘူး။ သူက တကယ်ပဲ ကောင်းကင်ထောက်တိုင်နယ်ပယ်ကို မရောက်သေးဘူးလား။ ဒါက မယုံနိုင်စရာပဲ။

"အဲဒီလိုဆိုရင် မင်းကို မဖိတ်ခေါ်ဘဲ ဘာလာလုပ်တာလဲ။"

"ငါ့ကို သတိရလို့ အဝေးကြီးကနေလာခဲ့တာလို့ မပြောနဲ့နော်။" ကျိဝူရွှမ်က လှောင်ပြောင်လိုက်သည်။

ထိုစကားကို ကြားသောအခါ မုန့်ချင်ကျိုးက ကျောရိုးတစ်လျှောက် စိမ့်တက်သွားသည်ကို ခံစားလိုက်ရပြီး ရွံရှာစွာဖြင့် ဆဲဆိုလိုက်သည်။

"လဗြွတ်ကို သတိရ…"

"ငါ့ကို ရွံအောင်လုပ်နေတာကို တော်လိုက်တော့။ ပြီးခဲ့တဲ့တစ်ခေါက် ယွမ်ယန်နယ်ပယ်မှာတုန်းက ငါ့အစေခံရှေ့မှာ မင်း အဲဒီစကားတွေ ပြောခဲ့တုန်းက မင်းနဲ့ငါ စာရင်းမရှင်းရသေးဘူးနော်။"

ကျိဝူရွှမ်၏ခေါင်းပေါ်တွင် မေးခွန်းအမှတ်အသား (၃)ခု ပေါ်လာလေသည်။

ငါ ဘာပြောခဲ့လို့လဲ။

မုန့်ချင်ကျိုးက မတ်တတ်ရပ်ကာ တစ်ခုခုကို စုံစမ်းစစ်ဆေးနေသည့်အလား လက်ကိုနောက်ပစ်ပြီး ပေါ့ပေါ့ပါးပါး လမ်းလျှောက်နေရင်း လှည့်ကာ မေးလိုက်သည်။

"အိုး။ ဟုတ်သားပဲ။"

"ကျိမိသားစုကို အဓိကအကိုင်းအခက်နဲ့ ဒုတိယအကိုင်းအခက်ဆိုပြီးတော့ ခွဲခြားထားတယ်လို့ ငါ ကြားဖူးတယ်။ အဓိကအကိုင်းအခက်ဆီသွားမယ့် လမ်းကို ပြပေးနိုင်မလား။ သွားကြည့်ချင်လို့ပါ။"

ဘုန်း…

ကျိဝူရွှမ်က ဆက်လက် သည်းမခံနိုင်တော့ပေ။ သူက စားပွဲရှည်ကို လက်တစ်ဖက်တည်းဖြင့် မြေမှုန့်ဖြစ်သွားအောင် ရိုက်ချလိုက်ပြီး ဟိန်းဟောက်လိုက်သည်။

"မုန့်ချင်ကျိုး။ မင်း မလွန်လာနဲ့။"

"ဟေး... မင်းက စိတ်မရှည်ဖြစ်နေတာပဲ။" မုန့်ချင်ကျိုးက တိုက်ကြီးအသစ်တစ်ခု တွေ့လိုက်သည့်အလား သိချင်စိတ်ဖြင့် မေးလိုက်သည်။ "တကယ်ပဲ အဓိကအကိုင်းအခက်နဲ့ ဒုတိယအကိုင်းအခက်ဆိုတာ ရှိတာလား။"

ကျိဝူရွှမ်က ဒေါသကို ချက်ချင်းပင် ဖိနှိပ်ထားလိုက်ပြီး တိတ်ဆိတ်စွာ နေလိုက်ရာ လိပ်နင်ကျာ တစ်ကောင်အဖြစ် ပြောင်းလဲလုနီးပါး ဖြစ်သွားလေသည်။

မုန့်ချင်ကျိုးက သတင်းအချက်အလက် စုဆောင်းရန် ရောက်လာကြောင်း သူ သဘောပေါက်သွားသည်။ ထို့ကြောင့် သဲလွန်စ မပေးမိစေရန် မည်သို့ စိတ်ခံစားချက်မှ မပြနိုင်ပေ။

စိတ်ခံစားမှုအရ တုံ့ပြန်သည်မျိုး မရှိလျှင် သူက လှည့်ကွက်များ မည်မျှသုံးသုံး အသုံးဝင်သော သတင်းအချက်အလက် တစ်ခုလေးပင် ရှာတွေ့နိုင်မည် မဟုတ်ပေ။

"ပျင်းစရာကြီး။"

"ကောင်းပြီလေ။ ဒါဆိုလည်း ငါ ဘာမှ မပြောတော့ဘူး။ ငါက တောရိုင်းမြေကနေ ဧည့်သည် တစ်ယောက်အနေနဲ့ ဒီအထိလာခဲ့တာ။ အနာဂတ်လူသားဧကရာဇ်နဲ့ အိမ်ရှင်တစ်ယောက်အနေနဲ့ ငါ့ကို ကျိမိသားစုရဲ့နေအိမ်မှာ နှစ်ရက်လောက် တည်းခိုဖို့ ဖိတ်ခေါ်တာက ယုတ္တိမတန်တာတော့ မဟုတ်ပါဘူးနော်။"

"မရဘူး။ တတ်နိုင်သမျှ ဝေးဝေးကို ထွက်သွား။"

"မင်းက ငတုံးလား။ ငါ့ရဲ့ အတုအယောင်ခန္ဓာကိုယ်က အမှောင်ထဲမှာ ပြဿနာရှာနေမယ့်အစား မင်းရဲ့နှာခေါင်းအောက်မှာ ရှိနေတာက ပိုမကောင်းဘူးလား။ ပြီးတော့လည်း မင်းက ငါ့ကို တကယ်ပဲ နှင်ထုတ်ဖို့ ကြိုးစားနေတာလား။ ကောင်းပြီလေ။ ငါ သွားမယ်။ ကျိမိသားစုရဲ့ ထိပ်တန်းအဖွဲ့ဝင်တွေ အားလုံးကို ငါ တိတ်တဆိတ် လုပ်ကြံသတ်ဖြတ်ပြီးတော့ မင်းကို တပ်ဖွဲ့မရှိတဲ့ တပ်မှူးတစ်ယောက်အဖြစ် ထားခဲ့မယ်။"

မုန့်ချင်ကျိုးက စကားပြောပြီးနောက် ထွက်သွားရန် ပြင်လိုက်သည်။

ထိုစကားကို ကြားသောအခါ ကျိဝူရွှမ်က နှလုံးရောဂါရတော့မည့်အလား ခံစားလိုက်ရသည်။ သူမက ရင်ဘတ်ကို ဖိကိုင်ထားကာ အလျင်စလို အော်လိုက်သည်။

"နေဦး..."

"မင်းက ဧည့်သည်ဆိုတော့လည်း ငါက ကောင်းကောင်းမွန်မွန် ဆက်ဆံရမှာပေါ့။ မင်း... ကျိမိသားစုရဲ့ နေအိမ်မှာ တည်းလို့ရပါတယ်။"

မုန့်ချင်ကျိုးက ချက်ချင်းပင် ဝမ်းသာအားရ ပြုံးလိုက်ပြီး ပြောလိုက်သည်။ "ဟေး... ငါ့တူလေး။ မင်း ငါနဲ့ မခွဲနိုင်ဘူးဆိုတာ သိသားပဲ…"

…