အခန်း ၂၁၀၉

အပိုင်း ( 2109 ) ဘုရင်ခန္ဓာဖြင့် သိုင်းဧကရာဇ်ကို အနိုင်ယူခြင်း။

လုမင်၏ လက်ရှိရုပ်ခန္ဓာမှာ သန်မာလွန်းလှသည်။ သူ၏ ချီစွမ်းအင်က လည်ပတ်လာပြီး သွေးစွမ်းအင်မှာလည်း မီးဖိုကြီးတစ်ခုအလား ဖြစ်နေခဲ့၏။ သူ၏ ခန္ဓာကိုယ်ရှိ ကြွက်သားတိုင်းမှာ ပေါက်ကွဲထွက်လုမတတ် စွမ်းအင်များဖြင့် ပြည့်နှက်နေကြတော့သည်။

"ဂါး"

လုမင်၏ ခန္ဓာကိုယ် လှုပ်ရှားသွားခဲ့သည်။ သူ့ခန္ဓာကိုယ်ထဲမှ နဂါးတစ်ကောင်၏ ဟိန်းဟောက်သံကို ကြားလိုက်ရ၏။ သူ့ခန္ဓာကိုယ်ရှိ ချွေးပေါက်တိုင်းမှ စွမ်းအင် အရှိန်အဝါများမှာ မီးတောက်များအလား ပန်းထွက်လာသည်။ သူ့ခန္ဓာကိုယ်ကို လွှမ်းခြုံထားသော ထူးဆန်းသည့် ကျိန်စာစွမ်းအင်များမှာလည်း မီးခိုးငွေ့များအဖြစ်သို့ ပြောင်းလဲသွားခဲ့ပြီး တရှူးရှူးမြည်သံနှင့်အတူ ပျောက်ကွယ်သွားခဲ့ရတော့သည်။

"ဒါ ဘယ်လိုလုပ် ဖြစ်နိုင်မှာလဲ..."

ကျိန်စာနိယာမကို ထိန်းချုပ်ထားသော လူငယ်မှာ မျက်နှာပျက်သွားသည်။ သူသည် လုမင်ကို ရင်ဆိုင်ရန်အတွက် ကျိန်စာနိယာမကို ထပ်မံအသုံးပြုရန် ကြိုးစားလိုက်၏။

"ဆင်းသွားစမ်း..."

လုမင်က ငေါက်ငမ်းလိုက်ရင်း လက်သီးတစ်ချက် ထိုးနှက်လိုက်သည်။

ဤလက်သီးချက်မှာ သန့်စင်သော ရုပ်ပိုင်းဆိုင်ရာခွန်အားသက်သက်ဖြင့် ထိုးနှက်လိုက်သော လက်သီးချက် ဖြစ်သည်။ သို့သော်လည်း ဤလက်သီးချက်က ပင်လယ်ပြင်ထဲသို့ ဥက္ကာပျံတစ်လုံး ကျရောက်လာသည့်အလား ဖြစ်ခဲ့၏။ ဟင်းလင်းပြင်က ပင်လယ်ပြင်ရေလှိုင်းအလား ပေါက်ကွဲထွက်သွားခဲ့ပြီး အခြားတစ်ဖက်ရှိ လူဆီသို့ ဖိနှိပ်သွားမည့် စက်ဝိုင်းပုံစံ လှိုင်းဂယက်များကို ဖြစ်ပေါ်လာစေတော့သည်။

တစ်ဖက်မှလူမှာ ညည်းတွားလိုက်ရပြီး လွင့်ထွက်သွားခဲ့သည်။ သူသည် သွေးအမြောက်အမြား အန်ထုတ်လိုက်ရပြီး စင်မြင့်အပြင်ဘက်သို့ လွင့်စင်သွားခဲ့ရ၏။

ဤအရာမှာပင် လုမင်က သူ့ခွန်အားကို ထိန်းထားခဲ့ခြင်း ဖြစ်သည်။ သို့မဟုတ်ပါက တစ်ဖက်မှလူကို သတ်ဖြတ်မိသွားပေလိမ့်မည်။

လုမင်က အလွယ်တကူပင် အနိုင်ရရှိသွားခဲ့သည်။

သို့ရာတွင်၊ လုမင်က တစ်ဖက်မှလူကို ချက်ချင်း အနိုင်ယူလိုက်နိုင်သော်လည်း ၎င်းမှာ လူအများအပြား၏ အာရုံစိုက်မှုကိုမူ များစွာ ဆွဲဆောင်နိုင်ခြင်း မရှိခဲ့ချေ။

ကျိန်စာနိယာမမှာ ဆန်းကြယ်ပြီး နက်နဲလှသည်ဟု ဆိုသော်လည်း ထိုလူငယ်က ဧကရာဇ်တစ်ပိုင်းအဆင့်မျှသာ ရှိသေးသည်။ ဤနေရာတွင် ရှိနေကြသော သိုင်းဧကရာဇ် ဖြစ်နေခဲ့ပြီဖြစ်သူ မည်သူမဆိုသည် သူ့ကို တိုက်ကွက်တစ်ကွက်တည်းဖြင့် သတ်ဖြတ်နိုင်စွမ်း ရှိကြသည်။

"ဟမ့်... မင်းက ဧကရာဇ်တစ်ပိုင်းတစ်ယောက်ကိုပဲ အနိုင်ရခဲ့တာပါ။ မင်း ငါနဲ့ ဆုံဖို့ကို တကယ်ပဲ မျှော်လင့်မိတယ်"

မုယန်က အေးစက်စွာ ပြုံးလိုက်သည်။ သူ့အကြည့်မှာလည်း ပိုမို၍ အေးစက်လာခဲ့၏။

သူသည် လုမင်နှင့် ဆုံတွေ့ခွင့်ရရန် အမှန်တကယ်ပင် မျှော်လင့်နေခဲ့ခြင်း ဖြစ်သည်။ ထိုသို့ဆိုပါက သူသည် လုမင်ကို သတ်ဖြတ်နိုင်မည်ဖြစ်ပြီး သူ၏ ယခင်အရှက်ရမှုများကို ဆေးကြောနိုင်လိမ့်မည်။

တိုက်ပွဲပြီးဆုံး‌ပြီး‌နောက်၊ လုမင်သည် သူ၏ကျောက်စင်မြင့်မှာ နောက်သို့ ပြန်လည်ရွေ့လျားသွားလိမ့်မည်ဟု ထင်မှတ်ထားခဲ့သည်။ သို့သော်၊ သူ၏ကျောက်စင်မြင့်မှာ နောက်သို့ ရွေ့လျားမသွားခဲ့ချေ။ ထို့ပြင် ၎င်းက ထပ်မံရွေ့လျားသွားခဲ့ပြီး အခြားသော ကျောက်စင်မြင့်တစ်ခုနှင့် သွားရောက်တိုက်မိသွားခဲ့ပြန်သည်။

ဆက်တိုက်တိုက်ပွဲများ...

လူအများက ခဏမျှ မင်သက်သွားကြပြီးနောက် သူတို့၏ မျက်နှာအမူအရာများ ပျက်ယွင်းသွားတော့သည်။

ဤအရာမှာ တစ်စုံတစ်ဦးက ဆက်တိုက် တိုက်ခိုက်နေရသည့် ပထမဆုံးအကြိမ် ဖြစ်သည်။ သူတို့အနေဖြင့် သတိမထားဘဲ မနေနိုင်ကြတော့ချေ။

ကျောက်စင်မြင့်များ၏ လှုပ်ရှားမှုများနှင့်အတူ မည်သည့်အရာမဆို ဖြစ်ပျက်သွားနိုင်ပုံ ရသည်။ သူတို့က နောက်ဆက်တွဲတိုက်ပွဲများအတွက် သူတို့၏ စွမ်းအင်များကို ထိန်းသိမ်းထားကြရမည်။ သို့မဟုတ်ပါက၊ အကယ်၍ သူတို့သာ ဆက်တိုက် တိုက်ခိုက်ရမည်ဆိုလျှင် အခြေအနေမကောင်း ဖြစ်သွားနိုင်သည်။

ဤတစ်ကြိမ်တွင် လုမင်၏ပြိုင်ဘက်မှာ ဆံပင်တိုတိုနှင့် လူငယ်တစ်ဦး ဖြစ်သည်။ သူသည် စူးရှသော မျက်ဝန်းများကို ပိုင်ဆိုင်ထားပြီး အလွန်ပင် ရဲရင့်ပြတ်သားပုံ ရ၏။

"ဝုန်း"

မည်သည့် အပိုစကားမျှ မဆိုကြဘဲ တစ်ဖက်မှလူမှာ ကြောက်မက်ဖွယ်ရာ အရှိန်အဝါတစ်ခုကို တိုက်ရိုက် ထုတ်ဖော်လိုက်တော့သည်။ ထိုအရှိန်အဝါက ပြင်းထန်သော လေပြင်းတစ်ခုကို သယ်ဆောင်လာခဲ့ပြီး လုမင်ထံသို့ ဖိနှိပ်လာခဲ့သည်။

သိုင်းဧကရာဇ်...

တစ်ဖက်မှလူမှာ သိုင်းဧကရာဇ်တစ်ပါးဖြစ်ပြီး ဘုရင်ခန္ဓာပိုင်ရှင် သိုင်းဧကရာဇ်တစ်ပါးလည်း ဖြစ်ပေသည်။

မုယန်၏ မျက်ဝန်းများ တောက်ပသွားခဲ့သည်။ ဘုရင်ခန္ဓာရှိသော သိုင်းဧကရာဇ်တစ်ဦးက လုမင်၏ ခွန်အားကို အတိုင်းအတာတစ်ခုအထိ စမ်းသပ်နိုင်စွမ်း ရှိပေလိမ့်မည်။

မုယန်တစ်ဦးတည်းသာမကဘဲ တောင်ပိုင်းတိုက်ပွဲနယ်မြေမှ အချို့သော လူများမှာလည်း စိတ်လှုပ်ရှားသွားခဲ့ကြသည်။

လွန်ခဲ့သော နှစ်နှစ်ခန့်က လုမင်၏ တိုက်ခိုက်နိုင်စွမ်းမှာ အကြွင်းမဲ့ သန်မာခဲ့သည်။ သူသည် မုယန်ကို အနိုင်ယူနိုင်ခဲ့ပြီး မကောင်းဆိုးရွားတစ်ဦးအဖြစ် ခေါ်ဆိုခြင်း ခံခဲ့ရဖူး၏။ လူအများစုက ယခု နှစ်နှစ်အကြာတွင် သူ မည်သည့်နယ်ပယ်သို့ ရောက်ရှိနေခဲ့ပြီလဲဆိုသည်ကို သိရှိချင်နေခဲ့ကြခြင်း ဖြစ်သည်။

"ကမ္ဘာမြှုပ်နှံခြင်း... ငါ့အတွက် မြှုပ်နှံခံလိုက်စမ်း"

လူငယ်က စတင်လှုပ်ရှားလိုက်သည်။ သူ့ခန္ဓာကိုယ်မှာ အလျားလိုက် ရွေ့လျားသွားခဲ့၏။ ရွေ့လျားနေသည့် ဖြစ်စဉ်အတွင်းမှာပင် သူ၏ခန္ဓာကိုယ်က ကျောက်စင်မြင့်တစ်ခုအဖြစ်သို့ ပြောင်းလဲသွားသည့်အလား ဖြစ်နေခဲ့ပြီး လုမင်ကို ဖိနှိပ်လိုက်တော့သည်။

ဤကျောက်စင်မြင့်မှာ ဂူသင်္ချိုင်းမှ ကျောက်စာတိုင်တစ်ခုနှင့် အလွန်ဆင်တူသည်။

"ဒုန်း"

လုမင်က လက်သီးကို တင်းတင်းဆုပ်ပြီး ရှေ့သို့ ထိုးနှက်လိုက်သည်။ ၎င်းမှာ ဂူသင်္ချိုင်း ကျောက်စာတိုင်ထံသို့ ပြင်းထန်စွာ ရိုက်ခတ်သွားခဲ့၏။ ဂူသင်္ချိုင်းကျောက်စာတိုင်က တုန်ခါသွားခဲ့ပြီး လွင့်ထွက်သွားခဲ့ရကာ သူ၏ လူသားပုံစံအဖြစ်သို့ ပြန်လည်ပြောင်းလဲသွားတော့သည်။

"သတ်"

ဆံပင်တိုနှင့် လူငယ်မှာ ဟိန်းဟောက်လိုက်သည်။ သူသည် လုမင်ထံသို့ တစ်ဖန် ပြေးဝင်လာပြီး တိုက်ခိုက်လိုက်၏။ ဤတစ်ကြိမ်တွင်၊ သူ့ခန္ဓာကိုယ်က တောက်ပလာပြီး သူ့ခန္ဓာကိုယ်မှ နက်မှောင်သော အလင်းတန်းတစ်ခု ဖြာထွက်လာသည်။

သူက သူ့လက်များကို ဝှေ့ယမ်းလိုက်ရာ ဂူသင်္ချိုင်းကျောက်စာတိုင် အပိုင်းအစများမှာ တစ်ခုပြီးတစ်ခု ပေါ်ပေါက်လာခဲ့ကြပြီး လုမင်ကို အစဉ်မပြတ် ဖိနှိပ်လိုက်တော့သည်။

"မြေကမ္ဘာ မြှုပ်နှံခြင်း နိယာမ"

လုမင်၏ နှုတ်ခမ်းထောင့်များ အနည်းငယ် ကွေးညွတ်သွားခဲ့သည်။ ယနေ့တွင် ဆန်းကြယ်သော နိယာမများစွာကို မြင်တွေ့ခဲ့ရ၏။

မြေကမ္ဘာမြှုပ်ခြင်းကမ္ဘာနိယာမမှာ အရာအားလုံးကို မြှုပ်နိုင်စွမ်းရှိပြီး သတ်ဖြတ်နိုင်စွမ်း မြင့်မား၏။ ၎င်း၏ စွမ်းအားက အလွန်ပင် တုန်လှုပ်စရာ ကောင်းပေသည်။

ဆံပင်တိုနှင့် လူငယ်က မြေကမ္ဘာမြှုပ်နှံခြင်း နိယာမကို အသုံးပြုကာ ဂူသင်္ချိုင်းကျောက်စာတိုင်တစ်ခုအဖြစ်သို့ ပြောင်းလဲသွားခဲ့ခြင်း ဖြစ်သည်။ သူသည် လုမင်ကို မြေမြှုပ်ပစ်ရန် ကြိုးစားလိုက်ခြင်း ဖြစ်၏။

ဆံပင်တိုနှင့် လူငယ်က သိုင်းဧကရာဇ်နယ်ပယ်သို့ ဝင်ရောက်ထားပြီး ဖြစ်သည်။ သူ၏ ခွန်အားက သိသိသာသာ တိုးတက်ခဲ့ပြီး ကျိန်စာနိယာမကို ထိန်းချုပ်ထားသော ပါရမီရှင်ထက် များစွာ ပို၍ သန်မာပေသည်။

လုမင်က သူလက်သီးကို ကျစ်ကျစ်ပါအောင် ဆုပ်လိုက်သည်။ သူက ရှေ့သို့ အဆက်မပြတ်ထိုးနှက်လိုက်ရာ လေထုထဲရှိ ဂူသင်္ချိုင်း ကျောက်စာတိုင်များအားလုံး‌ ပေါက်ကွဲသွားကြ၏။

အဆုံးတွင်၊ ဆံပင်တိုနှင့် လူငယ်၏ တိုက်ခိုက်မှုမှာ အထွတ်အထိပ်အဆင့်သို့ ရောက်ရှိသွားခဲ့သည်။ ကောင်းကင်ယံတွင် ကြီးမားသော ဂူသင်္ချိုင်းကျောက်စာတိုင်များ ပေါ်ပေါက်လာခဲ့ပြီး လုမင်ကို မြေမြှုပ်ပစ်ရန် ကြိုးစားလာတော့သည်။

ထိုစွမ်းအားက ကြောက်မက်ဖွယ်ရာ ကောင်းလွန်းသည်။ အကယ်၍ တူညီသောအဆင့်ရှိသည့် တစ်စုံတစ်ဦးသာ ထိုဂူသင်္ချိုင်း ကျောက်စာတိုင်များအတွင်း မြေမြှုပ်ခြင်း ခံလိုက်ရပါက သူတို့အနေဖြင့် ပြန်လည်ရုန်းထွက်နိုင်ရန် ခက်ခဲပေလိမ့်မည်။

"ဝုန်း"

လုမင်၏ ခန္ဓာကိုယ်မှ ပိုမိုတုန်လှုပ်စရာကောင်းသော အရှိန်အဝါတစ်ခု ပေါက်ကွဲထွက်လာခဲ့သည်။ သေဆုံးခြင်းနိယာမက ပတ်ဝန်းကျင်သို့ ပျံ့နှံ့သွားခဲ့၏။

ဤအခြင်းအရာကြောင့် အခြားသော ပါရမီရှင်များ မျက်မှောင်ကျုံ့သွားကြတော့သည်။

ကောင်းကင်သားတော် တစ်ဦးချင်းစီတိုင်းက ရိုးရှင်းကြသူများ မဟုတ်ကြချေ။ သူတို့က ထိပ်ဆုံး ဆယ်ယောက်အတွင်းသို့ ဝင်ရောက်နိုင်ရန်အတွက် အလားအလာများကြသူများဖြစ်ကြသဖြင့် လူအများ အာရုံစိုက်ခြင်း ခံရရန် ထိုက်တန်သည်။

လုမင်၏ ခန္ဓာကိုယ်ပေါ်ရှိ သေခြင်းအရှိန်အဝါများမှာ ပိုမို ထူထပ်လာခဲ့သည်။ အဆုံးသတ်တွင်၊ ၎င်းက သူ့ကို ရစ်ပတ်ထားသည့် မြစ်ရှည်ကြီးတစ်စင်းအဖြစ်သို့ ပြောင်းလဲသွားတော့သည်။

"နိယာမက မြစ်တစ်စင်းအဖြစ် ဖော်ဆောင်တာ... သူက သိုင်းဧကရာဇ် ဖြစ်မလာသေးဘူးပဲ။ ဧကရာဇ်တစ်ပိုင်းအဆင့်ပဲ ရှိသေးတယ်"

လူအများက စိတ်အေးသွားဟန်ဖြင့် သက်ပြင်းအရှည်ကြီး ချလိုက်ကြလေသည်။

ဧကရာဇ်တစ်ပိုင်းတစ်ဦးကို ကြောက်ရွံ့စရာ မလိုချေ။ သူက နောက်ခံလူတစ်ဦးအဖြစ်သာ ရှိနေရန် ကံပါလာခဲ့ပုံရသည်။

"ဟားဟားဟား... အဲဒီကမ္ဘာငယ်လေးထဲမှာ နှစ်နှစ်လောက် နေခဲ့ပြီးတာတောင် သူက ဧကရာဇ်တစ်ပိုင်းအဆင့်ပဲ ရှိသေးတယ်။ သူက သာမန်ထက်ပိုသူတစ်ဦး ဖြစ်ပုံမရဘူး"

မုယန်က အူမြူးသွားပြီး လှောင်ပြောင်ပြောဆိုလိုက်သည်။

"ဟွန့်... သူက ကျင့်ကြံခြင်းအဆင့် နိမ့်နေသေးရင်တောင် နင့်ကို ရိုက်နှက်နိုင်တုန်းပဲ၊ လွန်ခဲ့တဲ့ နှစ်နှစ်က ဘာဖြစ်ခဲ့လဲဆိုတာ နင် မေ့သွားပြီလား"

လုရှန်းရှန်းက မကျေမနပ်ဖြစ်သွားပြီး ပြန်လည်လှောင်ပြောင်လိုက်၏။

သူသည် လုမင်ကို မမှတ်မိသေးသော်လည်း၊ လုမင်သည် လွန်ခဲ့သော နှစ်နှစ်က သူတို့ကို ကူညီပေးခဲ့ဖူးသည်။ ထို့ကြောင့် သူသည် လုမင်အပေါ် အမြင်ကောင်း ရှိနေခဲ့ပေသည်။ ထို့ကြောင့်ပင် မုယန်က လုမင်ကို လှောင်ပြောင်နေသည်ကို မြင်တွေ့ရသည့်အခါ သူကလည်း ပြန်လည်လှောင်ပြောင်လိုက်ခြင်း ဖြစ်သည်။

ထိုအကြောင်းများကို ပြန်အစဖော်ခံရသောအခါ မုယန်၏ မျက်နှာအမူအရာက မည်းမှောင်သွားခဲ့သည်။ သူက အံကြိတ်ပြီး ပြောလိုက်၏။

"အတိတ်က အတိတ်ပါပဲ၊ သူက နည်းနည်းသန်မာသေးတယ်ဆိုပေမဲ့ အခုချိန်မှာ ငါနဲ့ ဆုံမယ်ဆိုရင်တော့ သေခြင်းတရားပဲ သူ့ကို စောင့်ကြိုနေလိမ့်မယ်။ ငါ သူ့ကို သေချင်းဆိုးနဲ့ သေရစေမယ်"

"နောက်ပြီး တစ်လှမ်းစောသူက အမြဲတမ်း တစ်လှမ်းသာနေမှာပဲ။ ငါက သိုင်းဧကရာဇ် ဖြစ်နေပြီ၊ ဒါပေမဲ့ သူကတော့ ဧကရာဇ်တစ်ပိုင်းအဆင့်ပဲ ရှိသေးတယ်၊ သူ ဘယ်တော့မှ ငါ့ရဲ့ ပြိုင်ဘက် ဖြစ်လာမှာ မဟုတ်ဘူး"

မုယန်က ယုံကြည်ချက်အပြည့်ဖြင့် အေးစက်စွာ ပြုံးလိုက်သည်။

လုရှန်းရှန်းက အေးစက်စွာ နှာခေါင်းရှုံ့လိုက်သော်လည်း မည်သည့်စကားမျှ ထပ်မံမပြောတော့ချေ။

ဤအချိန်တွင် လုမင်နှင့် ဆံပင်တိုတို လူငယ်တို့မှာ တိုက်ပွဲကို ထပ်မံ၍ စတင်လိုက်ကြပြီ ဖြစ်သည်။

လုမင်က သေခြင်းနိယာမကို ထုတ်ဖော်လိုက်ရာ သူ၏တိုက်ပွဲစွမ်းရည်က များစွာ မြင့်တက်လာခဲ့သည်။

သူက သေခြင်းမျက်လုံးကို ထုတ်ဖော်လိုက်သည့်အခါ သူ၏မျက်ဝန်းများထဲမှ လက်နက်များ ပျံသန်းထွက်လာပြီး တစ်ဖက်မှလူ၏ ဂူသင်္ချိုင်းများကို ဖျက်ဆီးပစ်လိုက်၏။

"ဒုန်း..."

အဆုံးတွင်၊ လုမင်က နဂါးတစ်ကောင်အလား ရှေ့သို့ ပြေးဝင်သွားခဲ့ပြီး တစ်ဖက်မှလူ၏ ကာကွယ်ရေးများကို ချိုးဖျက်ကာ ဆံပင်တိုလူငယ်ကို စင်မြင့်အပြင်ဘက်သို့ လွင့်စင်သွားစေခဲ့တော့သည်။

လုမင်က ဤတိုက်ပွဲတွင် အနိုင်ရရှိသွားခဲ့ပြီ ဖြစ်သည်။

"နင်မြင်လိုက်ရဲ့လား၊ သူက သိုင်းဧကရာဇ် ဖြစ်မလာသေးရင်တောင် သိုင်းဧကရာဇ်တစ်ပါးကို အနိုင်ယူနိုင်သေးတယ်"

လုမင် အနိုင်ရသွားသည်ကို မြင်ရသည့်အခါ လုရှန်းရှန်းက ဝမ်းသာရွှင်မြူးသွားခဲ့သည်။ သူက မုယန်ကို လှောင်ပြောင်သရော်ဟန်ဖြင့် ကြည့်လိုက်၏။

"သိုင်းဧကရာဇ်တစ်ပါကို အနိုင်ယူတာပဲဟာကို၊ ဘာများ ထူးဆန်းနေလို့လဲ"

မုယန်က နှုတ်ခမ်းကိုမဲ့ပြီး ပြုံးလိုက်သည်။

သူက ထိုသို့ ပြောဆိုလိုက်သော်လည်း သူ၏နှလုံးသားထဲတွင်မူ လေးနက်မှု အရိပ်အယောင်တစ်ခု ရှိနေခဲ့ပြီ။

ဘုရင်ခန္ဓာပိုင်ရှင် သိုင်းဧကရာဇ်တစ်ပါးကို အနိုင်ယူနိုင်စွမ်း ရှိခြင်းက လုမင် မည်မျှအထိ ကြောက်မက်ဖွယ် ကောင်းသည်ကို သက်သေပြရန် လုံလောက်သည်။

သို့သော်လည်း သူသည် လုမင်ကို အနိုင်ယူနိုင်ဆဲ ဖြစ်သည်ဟု ယုံကြည်ချက် ရှိနေသေးသည်။

ကောင်းကင်သားတော် သိုင်းဧကရာဇ်တစ်ပါးနှင့် ဘုရင်ခန္ဓာပိုင်ရှင် သိုင်းဧကရာဇ်တို့အကြားတွင် ကြီးမားသော ကွာဟချက်တစ်ခု ရှိနေဆဲ ဖြစ်သည်။

ဤတိုက်ပွဲ ပြီးဆုံးသွားပြီးနောက် လုမင်၏ ကျောက်စင်မြင့်မှာ နောက်သို့ ပြန်လည်ရွေ့လျားသွားခဲ့လေသည်။

တိုက်ပွဲများမှာမူ ဆက်လက်ဖြစ်ပွားနေခဲ့၏။

မျက်စိတစ်မှိတ်အတွင်းမှာပင် နောက်ထပ် နေ့တစ်နေ့ ကုန်ဆုံးသွားခဲ့သည်။

ယခုအခါ မူလက ရှိနေခဲ့သော ကျောက်စင်မြင့် သုံးရာ့နှစ်ဆယ်၏ ထက်ဝက်ခန့်သာ ကျန်ရှိတော့သည်။ ပါဝင်ယှဉ်ပြိုင်သူများ၏ ထက်ဝက်ခန့်မှာ ပြုတ်သွားခဲ့ကြပြီ ဖြစ်သည်။

ဤအချိန်တွင် လော့ရှန်းက ကြောက်မက်ဖွယ်ကောင်းသော ပြိုင်ဘက်တစ်ဦးနှင့် ရင်ဆိုင်လိုက်ရသည်။

လော့ရှန်းမှာ သိုင်းဧကရာဇ်တစ်ဦး ဖြစ်လာခဲ့ပြီ ဖြစ်သော်လည်း သူ၏ပြိုင်ဘက်က သိုင်းဧကရာဇ်တစ်ဦး ဖြစ်နေခဲ့၏။ ထို့ပြင် ၎င်းက ကောင်းကင်သားတော်တစ်ဦးလည်း ဖြစ်နေသေးသည်။

ဤတိုက်ပွဲမှာတော့ အထူးမြင်ကွင်းများ မရှိတော့ပါ။

လော့ရှန်းက အစွမ်းကုန် ကြိုးစားခဲ့ပြီး အလျင်နှုန်းနိယာမကို အထွတ်အထိပ်အထိ ထုတ်ဖော်ခဲ့သော်လည်း ၎င်းမှာ အသုံးမဝင်ခဲ့ချေ။ သူ၏ပြိုင်ဘက်မှာ အကြွင်းမဲ့ခွန်အားဖြင့် အလျင်နိယာမကို တိုက်ရိုက် ချိုးဖျက်ပစ်လိုက်ပြီး လော့ရှန်းကို ကြီးစိုးသော နည်းလမ်းဖြင့် အနိုင်ယူခဲ့သည်။

သို့သော်လည်း သူ၏ပြိုင်ဘက်မှာ လော့ရှန်းနှင့် မည်သည့် ရန်ငြိုးမျှ ရှိမနေခဲ့ချေ။ ထို့ကြောင့် သူသည် လော့ရှန်းကို ဒဏ်ရာရရုံမျှသာ ပြုလုပ်ခဲ့ပြီး သတ်ဖြတ်ခြင်း မပြုခဲ့ပါ။

သို့ရာတွင်၊ နောက်ဆက်တွဲ တိုက်ပွဲများက ပို‌၍ပင် ကြမ်းတမ်းလာခဲ့သည်။

အကြောင်းမူ၊ ယခုအခါ ဧကရာဇ်တစ်ပိုင်းအဆင့် ကျင့်ကြံမှုရှိသူ အားလုံးနီးပါးက ဖယ်ထုတ်ခံခဲ့ရပြီး သိုင်းဧကရာဇ်များသာ ကျန်ရှိကြ‌တော့သောကြောင့်ပင်။