အခန်း ၅၀

အခန်း (၅၀) ဓားတစ်ချက်တည်းနဲ့ ဖြေရှင်းခြင်း

ရေကြောင်းကုန်သွယ်ရေးဂိုဏ်း ဌာနချုပ် တံခါးဝတွင်...

အထက်တန်းလွှာ စစ်သည် ဆယ်ယောက်ခန့်က ဌာနချုပ်၏ အဓိက တံခါးပေါက်ကို ရေတစက်မကျအောင် ဝိုင်းရံထားကြသည်။ ၎င်းမျှသာ မကသေးဘဲ ဌာနချုပ်၏ နောက်ဘက် တံခါးကိုလည်း အခြား စစ်သည် တစ်စုက ပိတ်ဆို့ထားကြပေသည်။

ထို့အပြင် ကျန်းချဲ့က ယန်ဂူခရိုင်သို့ ပြန်လည် ရောက်ရှိလာသည်နှင့် တစ်ပြိုင်နက် သူ ကြိုတင် စီစဉ်ထားသော အနောက်မြို့နယ် စစ်စခန်းမှ စစ်သည်များ အားလုံးလည်း လှုပ်ရှားလာခဲ့ကြသည်။ လူအင်အား နှစ်ရာခန့်က ဌာနချုပ် အရှေ့တွင် စုဝေးရောက်ရှိနေကြပြီး တစ်ချက် ကြည့်လိုက်ရုံဖြင့် ဖိအားများကို အပြည့်အဝ ခံစားရနိုင်ပေသည်။

တံခါးဝတွင်မူ ရေကြောင်းကုန်သွယ်ရေးဂိုဏ်းမှ လူတစ်ရာခန့်ကလည်း လက်နက်များကိုယ်စီ ကိုင်ဆောင်ကာ အစိုးရ စစ်သည်များနှင့် ထိပ်တိုက် ရင်ဆိုင်ရန် အသင့်အနေအထား ရှိနေကြသည်။

ချီဟွမ်းက အရှေ့ဆုံးတွင် ရပ်နေပြီး ကျန်းချဲ့က သူ၏ ဘေးတွင် ယှဉ်ရပ်နေကာ သူ့ကို တစ်ချက် ကြည့်ပြီးနောက် ခေါင်းညိတ်ပြလိုက်သည်။

ချီဟွမ်းက သဘောပေါက်သွားပြီး လက်ကို မြှောက်ကာ ပြင်းထန်စွာ ဝှေ့ယမ်းလိုက်သည်။

"တားဆီးရဲတဲ့သူ မှန်သမျှ... အကုန်သတ်..."

"ရပ်လိုက်ကြစမ်း..."

အခြေအနေများ ပေါက်ကွဲထွက်တော့မည့် အချိန်တွင် စုံထောက်ချုပ်ချန်က ထပ်မံ ထွက်ပေါ်လာပြန်သည်။ သူက စုံထောက် ဆယ်ယောက်ကျော်ကို ခေါ်ဆောင်ကာ လူအုပ်ကြီးကို ထိုးခွဲပြီး ကျန်းချဲ့တို့ နှစ်ယောက်ဆီသို့ စိုးရိမ်တကြီး ပြေးဝင်လာခဲ့သည်။ သူ၏ မျက်မှောင်များမှာလည်း အလွန် တွန့်ချိုးနေပေသည်။

သူ တကယ်ကို စဉ်းစား၍ မရနိုင်ပေ။ ကျန်းချဲ့က ရူးသွားတာများလား...

လွန်ခဲ့သော ရက်အနည်းငယ်ကမှ ဆိပ်ကမ်းတွင် ပြဿနာ အကြီးအကျယ် ရှာထားပြီး ယခုအခါ ရေကြောင်းကုန်သွယ်ရေးဂိုဏ်း ဌာနချုပ်ကိုပါ တိုက်ရိုက် ဝိုင်းရံရန် စစ်သည်များ ခေါ်လာရဲသည်။ နောက်ဆက်တွဲ ပြဿနာများကို လုံးဝ မကြောက်တော့ဘူးလား။

တပ်မှူးချုပ်ကျူးက နောက်ခံပေးထားသည် ဆိုလျှင်တောင်မှ ဒီလောက်အထိတော့ မမောက်မာသင့်ပေ။

ထို့ကြောင့် ဤတစ်ကြိမ်တွင်မူ သူက ကျန်းချဲ့နှင့် မျက်နှာချင်းဆိုင်ရန် ပြင်ဆင်ထားပြီး ဖြစ်သည်။ အကယ်၍ ကျန်းချဲ့က စတင် တိုက်ခိုက်မည် ဆိုပါက သူက သေချာပေါက် ဝင်ရောက် တားဆီးရမည်။ မဟုတ်လျှင် ရေကြောင်းကုန်သွယ်ရေးဂိုဏ်း ပျက်စီးသွားသည်က အသေးအဖွဲ ဖြစ်သော်လည်း ခရိုင်ဝန်ကျောက်က သူ ဘာမှ မလုပ်ကြောင်း သိသွားပါက သူ၏ အသက်အန္တရာယ်ပင် စိုးရိမ်ရပေမည်။

"တပ်မှူးကျန်း... မင်း လူတွေကို ခေါ်လာပြီး ဘာလုပ်မလို့လဲ..."

"ယန်ဂူခရိုင်ရဲ့ အဆိပ်အတောက် ဖြစ်နေတဲ့ ရေကြောင်းကုန်သွယ်ရေးဂိုဏ်းကို အမြစ်ဖြတ် ရှင်းလင်းပြီး ပြည်သူတွေအတွက် ငြိမ်းချမ်းတဲ့ ကောင်းကင်ကြီး တစ်ခု ဖန်တီးပေးမလို့လေ..."

ကျန်းချဲ့က သူ့ကို ကြည့်ကာ ပြုံးလိုက်သည်။

"ဒီလိုလုပ်ရင် နောက်ဆက်တွဲ ဘာတွေ ဖြစ်လာမလဲဆိုတာ မင်း သိရဲ့လား..."

စုံထောက်ချုပ်ချန်က လေးနက်သော အသံဖြင့် မေးလိုက်သည်။

"နောက်ဆက်တွဲ ပြဿနာတွေ အကုန်လုံး ငါ တာဝန်ယူတယ်... မင်းမှာ ကန့်ကွက်စရာ ရှိလို့လား..."

မြင်းပေါ်တွင် ထိုင်နေသော ချီဟွမ်းက အောက်သို့ ငုံ့ကြည့်ကာ စုံထောက်ချုပ်ချန်ကို အထင်သေးစွာဖြင့် မေးလိုက်သည်။

"ခင်ဗျားက..."

စုံထောက်ချုပ်ချန်က တစ်ဖက်လူ၏ ခန့်ညားသော အရှိန်အဝါနှင့် အနက်ရောင် သံချပ်ကာကို မြင်သောအခါ အနည်းငယ် တွန့်ဆုတ်သွားခဲ့သည်။

"မိတ်ဆက်ပေးဖို့ မေ့နေတာ... ဒီလူကြီးမင်းက ထိုက်အန်း မြို့တော် စစ်စခန်း၊ ဖုန်းတပ်ဖွဲ့ရဲ့ အုပ်ချုပ်ရေးတပ်မှူး ချီဟွမ်းပဲ... ဒီတစ်ခေါက် ရေကြောင်းကုန်သွယ်ရေးဂိုဏ်းကို အမြစ်ဖြတ် ရှင်းလင်းဖို့အတွက် တပ်မှူးချုပ်ကျူးက သူ့ကို အထူးတလည် အကူအညီ တောင်းထားတာ... စုံထောက်ချုပ်ချန်ကလည်း ငါတို့ကို ကူညီပေးမလို့ မဟုတ်လား..."

သူတို့နှစ်ယောက် စကားမပြောရသေးမီ ကျန်းချဲ့က ကြားဖြတ်ကာ မိတ်ဆက်ပေးလိုက်သည်။

သူ ထင်သည့်အတိုင်းပင် ချီဟွမ်း၏ ရာထူးကို ကြားလိုက်ရသည်နှင့် စုံထောက်ချုပ်ချန်မှာ နေရာမှာတင် မှင်တက်သွားခဲ့သည်။

'ဖုန်းတပ်ဖွဲ့ရဲ့ အုပ်ချုပ်ရေးတပ်မှူး...'

'တပ်မှူးချုပ်ကျူးက ကိုယ်တိုင် ဖိတ်ခေါ်ထားတာ...'

'ဒါက ဘယ်လို အခြေအနေကြီးလဲ...'

"မင်းက ငါ အလုပ်လုပ်တာကို နှောင့်ယှက်ချင်နေတာလား..."

ချီဟွမ်း၏ လက်ထဲမှ ငွေရောင် လှံရှည်က တစ်ချက် လှုပ်ရှားသွားပြီး အေးစက်သော အလင်းရောင်များ ထွက်ပေါ်လာခဲ့သည်။

"စုံထောက်ချုပ်ချန်က သေချာပေါက် ငါတို့ကို ကူညီဖို့ လာတာပါ မဟုတ်လား..."

ကျန်းချဲ့က တစ်ဖက်လူကို ပြုံးစစဖြင့် ကြည့်ကာ မေးလိုက်သည်။

"ဟုတ်... ဟုတ်ပါတယ်..."

စုံထောက်ချုပ်ချန်၏ ရင်ထဲတွင် ထိတ်လန့်သွားပြီး ချက်ချင်း ခေါင်းငုံ့ကာ လမ်းဖယ်ပေးလိုက်သည်။

အာဏာရှိသော ခုနစ်ဆင့် အရာရှိ နှစ်ယောက်က ပူးပေါင်း လုပ်ဆောင်နေပြီ ဖြစ်ရာ သူ့အနေဖြင့် ဝင်ရောက် တားဆီးပိုင်ခွင့် မရှိပေ။ အကယ်၍ တစ်ဖက်လူက သူ့ကို အရင်သတ်ပြီးမှ အထက်ကို သတင်းပို့လိုက်မည်ဆိုပါက ခရိုင်ဝန်ကျောက်က သူ့အတွက် ဝင်ရောက် ဖြေရှင်းပေးမည် မဟုတ်ကြောင်း သူ ကောင်းစွာ သိရှိထားသဖြင့် ချက်ချင်း အလျှော့ပေးလိုက်ခြင်း ဖြစ်သည်။

ကျန်းချဲ့ကို ကြည့်သော သူ၏ အကြည့်များထဲတွင် ကျေးဇူးတင်မှု အနည်းငယ်ပင် ပါဝင်နေသေးသည်။

"ဘာအထောက်အထားမှ မရှိဘဲနဲ့... ခင်ဗျားတို့က လက်နက်ကိုင်ပြီး ပြဿနာ လာရှာတယ်ပေါ့... ဒီကမ္ဘာပေါ်မှာ အစိုးရရဲ့ ဥပဒေ ဆိုတာ မရှိတော့ဘူးလား..."

ရေကြောင်းကုန်သွယ်ရေးဂိုဏ်း အတွင်းမှ ခိုယွမ်ရှန်းက မျက်နှာထား တင်းမာစွာဖြင့် ဖြည်းညင်းစွာ ထွက်လာပြီး မြင်းပေါ်မှ ကျန်းချဲ့တို့ နှစ်ယောက်ကို စိုက်ကြည့်ရင်း မေးလိုက်သည်။

"ဒီလူက ရေကြောင်းကုန်သွယ်ရေးဂိုဏ်းရဲ့ ဂိုဏ်းချုပ်လား..."

ချီဟွမ်းက ခိုယွမ်ရှန်းကို လုံးဝ ဂရုမစိုက်ဘဲ ကျန်းချဲ့ဘက်သို့ လှည့်ကာ မေးလိုက်သည်။

"ဟုတ်ပါတယ်... ဒီလူပါပဲ..."

"အင်း..."

ချီဟွမ်းက ခပ်ပေါ့ပေါ့ပင် ပြန်ဖြေလိုက်သည်။

ကျန်းချဲ့က မြင်းကို ရှေ့သို့ အနည်းငယ် တိုးလိုက်ပြီး လက်တစ်ဖက်ကို ဝှေ့ယမ်းလိုက်ရာ စစ်သည်အချို့က အစောင့်မှူးရန်နှင့် ဆုန့်ကျိတို့ကို အရှေ့သို့ ခေါ်ဆောင်လာခဲ့သည်။

"ရေကြောင်းကုန်သွယ်ရေးဂိုဏ်းက ဝေါ့ဟူတောင်က ဓားပြတွေနဲ့ ပူးပေါင်းပြီး ငါ့ကို ချုံခိုတိုက်ခိုက်ဖို့ ကြံစည်ခဲ့တယ်... သက်သေ အထောက်အထား အကုန်လုံး ရှိတယ်... ခိုယွမ်ရှန်း မင်းမှာ ဘာငြင်းစရာ ရှိသေးလဲ..."

ကျန်းချဲ့က အေးစက်စက် နှာမှုတ်ကာ မေးလိုက်သည်။

"ဒီလူက ငါတို့ ဂိုဏ်းကနေ ထွက်သွားတာ ကြာပါပြီ... သူက ဓားပြတွေနဲ့ ပူးပေါင်းတယ်ဆိုတာ ရေကြောင်းကုန်သွယ်ရေးဂိုဏ်းနဲ့ လုံးဝ မသက်ဆိုင်ပါဘူး... ပြီးတော့... တကယ်လို့ အပြစ်ပေးမယ် ဆိုရင်တောင်... ခရိုင်ဝန်ကျောက် ကိုယ်တိုင် ပါဝင်တဲ့ တရားခွင်မှာ စစ်ဆေးရမှာပဲ... မင်းလို ဒုတိယတပ်မှူးလေး တစ်ယောက်က ဘာအာဏာရှိလို့ အခုလို တိုက်ရိုက် လာဖမ်းရတာလဲ..."

သူက အစောင့်မှူးရန်ကို အံကြိတ်ကာ တစ်ချက် ကြည့်လိုက်ပြီးနောက် ဆက်လက် ငြင်းဆိုနေပေသည်။ ခရိုင်ဝန်ကျောက်၏ လူများ ရောက်လာသည်အထိ အချိန်ဆွဲထားရန် မျှော်လင့်နေခြင်း ဖြစ်သည်။

ယခင်က ခရိုင်ဝန်ကျောက်ထံသို့ ပေးပို့ခဲ့သော ငွေကြေးများကြောင့် ခရိုင်ဝန်ကျောက်က ရေကြောင်းကုန်သွယ်ရေးဂိုဏ်းကို ကယ်တင်ရန် မည်သည့် တန်ဖိုးကိုမဆို ပေးဆပ်လိမ့်မည်ဟု သူ ယုံကြည်ထားပေသည်။

ကျန်းချဲ့နှင့် ချီဟွမ်းတို့က အချင်းချင်း ကြည့်ကာ ပြုံးလိုက်ကြသည်။

ဒီခိုယွမ်ရှန်းက တော်တော် ရိုးအတာပဲ...

သူတို့လို လူတွေရှေ့မှာ ဥပဒေအကြောင်း လာပြောနေတာက တကယ့်ကို ရယ်စရာ ကောင်းလွန်းတယ်။

"ဆူညံလိုက်တာ..."

"လူကြီးမင်းက ဘယ်ကလဲ ဆိုတာ မသိရသေးဘူး... ကျွန်တော်တို့ ရေကြောင်းကုန်သွယ်ရေးဂိုဏ်းက ဘာများ စော်ကားမိလို့လဲ..."

ခိုယွမ်ရှန်းက ခေါင်းမော့ကာ ချီဟွမ်းကို မေးလိုက်သည်။

ချီဟွမ်းက လုံးဝ ပြန်မဖြေဘဲ သူ၏ လက်ကိုသာ ဖြည်းညင်းစွာ မြှောက်လိုက်သည်။

"ရေကြောင်းကုန်သွယ်ရေးဂိုဏ်းက ဝေါ့ဟူတောင်က ဓားပြတွေနဲ့ ပူးပေါင်းပြီး အစိုးရကို ပုန်ကန်ဖို့ ကြိုးစားတယ်... သေဒဏ်ပေးရမယ့် အပြစ်ပဲ... ဒါပေမဲ့ ကောင်းကင်ကြီးက သက်ရှိတွေကို ချစ်ခင်တဲ့ သဘောထား ရှိတဲ့အတွက်... မသိဘဲ ပါဝင်မိသူတွေကို အပြစ်မယူဘူး... လက်နက်ချပြီး ဒူးထောက်တဲ့ သူတွေကို အသက်ချမ်းသာ ပေးမယ်... အစိုးရကို ပြန်လည် ခုခံတဲ့ သူတွေကို အကုန် သတ်ပြီး... မိသားစုဝင်တွေကိုပါ အပြစ်ပေးမယ်..."

ကျန်းချဲ့က အသံကျယ်ကြီးဖြင့် အော်ဟစ်လိုက်သည်။

"သတ်..."

ချီဟွမ်းကလည်း ချက်ချင်းပင် လေးနက်သော အသံဖြင့် အမိန့်ပေးလိုက်သည်။

နောက်တစ်စက္ကန့်တွင် မြားမိုးများက ရေကြောင်းကုန်သွယ်ရေးဂိုဏ်းမှ လူများဆီသို့ အဆက်မပြတ် ကျဆင်းလာတော့သည်။

ဂိုဏ်းသား အချို့က တွန့်ဆုတ်သွားကြပြီး လက်နက်များကို ပစ်ချကာ မြေကြီးပေါ်တွင် ဝပ်နေလိုက်ကြသည်။ သို့သော် အချို့သော ခေါင်းမာသူများကမူ အော်ဟစ်ကာ တိုက်ပွဲဝင်ရန် ပြင်ဆင်နေကြသည်။ ခိုယွမ်ရှန်းက လက်တစ်ဖက်ကို ဝှေ့ယမ်းကာ မြားတံအချို့ကို ကာကွယ်လိုက်ပြီးနောက် မျက်နှာ မည်းမှောင်စွာဖြင့် အော်ဟစ်လိုက်သည်။

"ဒီခွေးအရာရှိတွေရဲ့ စကားကို မယုံကြနဲ့... ဒီနေ့ ငါနဲ့အတူ သွေးလမ်းဖောက်ပြီး ထွက်ပြေးကြ... ဝေါ့ဟူတောင်ကို သွားပြီး ခိုလှုံကြမယ်... နောင်တစ်ချိန်ကျရင် ချမ်းသာကြွယ်ဝမှုတွေ အများကြီး ရလာလိမ့်မယ်..."

သူ၏ စကား အဆုံးတွင် ရေကြောင်းကုန်သွယ်ရေးဂိုဏ်း အတွင်းမှ လူရိပ်အချို့ ခုန်ထွက်လာကြသည်။ ၎င်းတို့မှာ ရေကြောင်းကုန်သွယ်ရေးဂိုဏ်း၏ ဂိုဏ်းခွဲမှူးများနှင့် ဒုတိယဂိုဏ်းချုပ်များ ဖြစ်ကြပြီး ထိုအထဲတွင် ကျန်းချဲ့၏ ရင်းနှီးသော မိတ်ဆွေဟောင်း ယွီကျုံးဖိန်လည်း ပါဝင်နေပေသည်။

တိုက်ပွဲ စတင်သွားသည်နှင့် တစ်ပြိုင်နက် စိတ်လှုပ်ရှားနေသော ချီဟွမ်းက သူ၏ လက်ထဲမှ ငွေရောင် လှံရှည်ကို ပြင်းထန်စွာ ပစ်လွှတ်လိုက်ရာ ရေကြောင်းကုန်သွယ်ရေးဂိုဏ်းသား အများအပြားကို ဖောက်ဝင်သွားခဲ့သည်။ သူက မြင်းပေါ်မှ ခုန်ဆင်းလိုက်ပြီး ငွေရောင် လှံရှည်ကို ပြန်လည် ဆွဲယူကာ ခိုယွမ်ရှန်းဆီသို့ တည့်တည့် ချိန်ရွယ်လိုက်သည်။

ကျန်းချဲ့လည်း အားလပ်မနေပေ။ သူ၏ စိတ်ထဲမှ အမိန့်ပေးလိုက်သည်နှင့် သူ၏ မျက်ဝန်းအောက်ခြေတွင် သွေးရောင်များ ဖုံးလွှမ်းသွားခဲ့သည်။

ကြမ္မာသုံးပါး ထိတ်လန့်ဖွယ် ဓားသိုင်း၏ ပထမဆုံးအဆင့်... သတ်ဖြတ်ခြင်း...

ထိုအချိန်တွင် ကျန်းချဲ့ အနေဖြင့် ခန္ဓာကိုယ်အတွင်းမှ သွေးချီစွမ်းအင်များ ချက်ချင်း ဆူပွက်လာပြီး ကြီးမားသော စွမ်းအားများက လှိုင်းလုံးကြီးများကဲ့သို့ ထွက်ပေါ်လာကြောင်း ခံစားလိုက်ရသည်။ အတွင်းအားများက အဆက်မပြတ် ထွက်ပေါ်လာပြီး ထိန်းချုပ်၍ မရအောင်ပင် ဖြစ်နေပေသည်။

အကုန်လုံးကို ပေါက်ကွဲပစ်ရမယ်...

သတ်ဖြတ်ရမယ်...

"ကျန်းချဲ့... သေစမ်း..."

ယွီကျုံးဖိန်က ပထမဆုံး စတင် လှုပ်ရှားလိုက်ပြီး ကျန်းချဲ့ကို တိုက်ရိုက် ပစ်မှတ်ထားလိုက်သည်။ သူက မြေကြီးကို ဆောင့်နင်းကာ လေထဲသို့ ခုန်တက်သွားပြီး လက်ထဲမှ တောင်ခွဲဓားမကြီးဖြင့် အပေါ်မှနေ၍ အားကုန် ခုတ်ပိုင်းချလိုက်သည်။ သူ၏ တိုက်ခိုက်မှုက အလွန် ပြင်းထန်ပြီး ကြောက်မက်ဖွယ် ကောင်းလှပေသည်။

နောက်တစ်စက္ကန့်တွင် ကျန်းချဲ့က မြင်းကျောကို ပြင်းထန်စွာ နင်းလိုက်ရာ မြင်းကြီးမှာ ခြေထောက်များ ခွေယိုင်သွားပြီး မြေကြီးပေါ်သို့ လဲကျသွားခဲ့သည်။

သူကမူ ရှေ့သို့ တည့်တည့် တိုးဝင်သွားပြီး လက်နှစ်ဖက်ဖြင့် ဓားကို ကိုင်ဆောင်ကာ ကိုယ်တွင်းရှိ အတွင်းအား အားလုံးကို ပေါက်ကွဲထုတ်လွှတ်ပြီး အပေါ်သို့ စောင်းကာ ခုတ်ပိုင်းလိုက်သည်။

'ရွှပ်...'

လွန်ခဲ့သော ရက်အနည်းငယ်ကမှ သူနှင့် အင်အား မတိမ်းမယိမ်း ရှိခဲ့သော ယွီကျုံးဖိန်၏ ခန္ဓာကိုယ်မှာ ချက်ချင်းပင် နှစ်ပိုင်း ပြတ်သွားခဲ့သည်။ ဗိုက်ပေါက်ထွက်သွားပြီး သွေးများနှင့် ကလီစာများက လေထဲတွင် ပြန့်ကျဲသွားခဲ့သည်။

'ဘန်း...'

ကျန်းချဲ့က ညာဘက် ခြေထောက်ဖြင့် ယွီကျုံးဖိန်၏ ခန္ဓာကိုယ် အောက်ပိုင်းကို ပြင်းထန်စွာ ကန်ထုတ်လိုက်ရာ တိုက်တိုက်ဆိုင်ဆိုင်ပင် အဘိုးအို တစ်ယောက်၏ အပေါ်သို့ သွားရောက် ကျရောက်သွားခဲ့သည်။

ယွီကျုံးဖိန်၏ အပေါ်ပိုင်း ခန္ဓာကိုယ်မှာမူ မြေကြီးပေါ်သို့ ကျသွားပြီး သွေးများ အဆက်မပြတ် ပန်းထွက်နေပေသည်။ သူက ခေါင်းမော့ကြည့်လိုက်ရာ သူ၏ အမြင်အာရုံများက တဖြည်းဖြည်း ဝေဝါးလာပြီး နောက်ဆုံးတွင် သူ၏ စိတ်ထဲ၌ အတွေးတစ်ခုတည်းသာ ကျန်ရှိတော့သည်။

'ကျန်းချဲ့ရဲ့ ဓားက တကယ်ကို မြန်ပြီး ရက်စက်လွန်းတယ်...'

"ဟိုက်..."

မျက်စိတစ်မှိတ် အတွင်းမှာပင် နှစ်ဖက်စလုံး တိုက်ပွဲ ဖြစ်ပွားသွားသည်ကို ကြည့်ရင်း စုံထောက်ချုပ်ချန်က လေအေး တစ်ချက်ကို ရှူသွင်းလိုက်မိသည်။ အခြေအနေများက အလွန် ခက်ခဲနေကြောင်း သူ ခံစားလိုက်ရသည်။ သူ၏ ဘေးရှိ စုံထောက် တစ်ယောက်က မျက်ရိပ်ပြကာ မေးလိုက်သည်။

"အစ်ကိုကြီး... ကျွန်တော်တို့ ဘယ်ဘက်က ကူရမလဲ..."

စုံထောက်ချုပ်ချန်က ထိုသူကို ပြူးကြည့်လိုက်သည်။

'ဘယ်ဘက်က အသာစီး ရနေလဲ ဆိုတာ မမြင်ဘူးလား...'

'သေချာပေါက် နိုင်တဲ့ဘက်ကနေ ကူရမှာပေါ့...'

ထို့နောက် သူက သွားကြိတ်ကာ ဓားကို ဆွဲထုတ်ပြီး ရှေ့သို့ ညွှန်ပြလိုက်သည်။

"ရေကြောင်းကုန်သွယ်ရေးဂိုဏ်းက ပုန်ကန်ဖို့ ကြိုးစားနေတယ်... ဒီနေ့ ငါနဲ့အတူ ဝင်ပြီး တိုက်ခိုက်ကြစမ်း..."

"သတ်..."

"သတ်..."

"သတ်..."

အော်ဟစ်သံများ အဆက်မပြတ် ထွက်ပေါ်လာပြီး မြားမိုးများလည်း အဆက်မပြတ် ကျဆင်းနေပေသည်။ မျက်စိတစ်မှိတ် အတွင်းမှာပင် ဤနေရာမှာ သွေးထွက်သံယို အများဆုံး ဖြစ်ပွားရာ သားသတ်ရုံကြီး တစ်ခုအဖြစ် ပြောင်းလဲသွားခဲ့တော့သည်။