အခန်း ၇၇

အခန်း (၇၇) စိတ်ဓာတ်ကို ရိုက်ချိုးခြင်း

"ပြောရမယ် ဆိုရင် ဒီပစ္စည်းက ငါနဲ့လည်း ပတ်သက်နေတယ်"

"ဘယ်လိုမျိုးလဲ"

"လွန်ခဲ့တဲ့ နှစ်ဝက်လောက်က တပ်မှူးချုပ်ကျူးက သတင်း ဘယ်ကရလဲ မသိဘူး ဖုန်းတပ်ဖွဲ့ အနီးအနားက သူဌေး တစ်ယောက်ဆီမှာ မြေကမ္ဘာ ကျောက်တုံး ရှိတယ်လို့ ကြားတယ် ဒါနဲ့ ငါနဲ့ တခြား တပ်မှူး တစ်ယောက်ကို လူနည်းနည်း ခေါ်ပြီး ဓားပြ ယောင်ဆောင်ကာ အဲဒီ သူဌေး အိမ်ကို သွားတိုက်ခိုင်းတယ်"

"တကယ်လည်း အဲဒီ အိမ်ရဲ့ ရတနာတိုက် ထဲကနေ ပစ္စည်းကို ရခဲ့တယ် အဲဒီတုန်းက ငါ ကိုယ်တိုင် တပ်မှူးချုပ်ကျူး ဆီကို သွားအပ်ခဲ့တာ"

လျိုကျစ်က အတိတ်ကို ပြန်လည် မြင်ယောင်နေသည့် မျက်နှာထားဖြင့် ထိုစဉ်က အဖြစ်အပျက်များကို အသေးစိတ် ရှင်းပြလိုက်သည်။

"ဒါဆိုရင် အဲဒီ မြေကမ္ဘာ ကျောက်တုံးကို တပ်မှူးချုပ်ကျူးက အမြဲတမ်း သူ့ကိုယ်ပေါ်မှာ သယ်ထားတာပေါ့"

အကယ်၍ ထိုသို့သာ ဆိုလျှင် ဤပစ္စည်းကို ရယူရန်အတွက် တစ်ဖက်လူကို သတ်ဖြတ်ရန်မှလွဲ၍ အခြား ရွေးချယ်စရာ မရှိတော့ပေ။

သို့သော် လျိုကျစ်က ခေါင်းယမ်းလိုက်ပြီး -

"မြေကမ္ဘာ ကျောက်တုံး ဆိုတာ မြေကမ္ဘာ စွမ်းအင်ကနေ ဖြစ်တည်လာတာ ဖြစ်ပြီး မြေကမ္ဘာ အရင်းအမြစ် စွမ်းအင်တွေ ပါဝင်တယ် သိုင်းပညာရှင်တွေရဲ့ ခန္ဓာကိုယ် သန့်စင်ဖို့ အတွက် အရမ်း အသုံးဝင်တယ် အထူးသဖြင့် သွေးကြောပွင့် အဆင့် သိုင်းသမားတွေ အတွက်ဆို ပိုပြီး အဖိုးတန်တဲ့ ရတနာ တစ်ခုပဲ"

"ဒါပေမဲ့ နေ့တိုင်း အဲဒါကို အသုံးပြုပြီး လေ့ကျင့်လို့ မရဘူး မဟုတ်ရင် အဲဒီထဲမှာ ပါတဲ့ မြေကမ္ဘာ အညစ်အကြေးတွေက သွေးကြောတွေကို ညစ်ညမ်းသွားစေလိမ့်မယ် အနည်းဆုံး ခုနစ်ရက် တစ်ခါလောက်ပဲ အသုံးပြုလို့ ရတယ် ဒါကြောင့် တပ်မှူးချုပ်ကျူး က အဲဒါကို နေ့တိုင်း ကိုယ်ပေါ်မှာ သယ်ထားမှာ မဟုတ်ဘူး"

ကျန်းချဲ့၏ မျက်လုံးများက တောက်ပသွားပြီး စားပွဲကို လက်ချောင်းများဖြင့် ခပ်ဖွဖွ ခေါက်ရင်း အချိန်အနည်းငယ် ကြာအောင် စဉ်းစားနေပြီးနောက် ပြောလိုက်သည်။

"ကျွန်တော့်ကို အကူအညီ တစ်ခုလောက် ပေးနိုင်မလား"

"ပြောလေ"

"မြေကမ္ဘာ ကျောက်တုံးကို ကျွန်တော် မရမနေ ယူရမယ် တပ်မှူးချုပ်ကျူး လက်ထဲမှာ ရှိနေရင်တောင် လက်လျှော့လို့ မဖြစ်ဘူး တပ်မှူးချုပ်ကျူးကို နာရီအနည်းငယ်လောက် အာရုံလွှဲထားပေးဖို့ ဆရာ့ကို အကူအညီ တောင်းချင်တယ် ကျွန်တော် ကိုယ်တိုင် တပ်မှူးချုပ် အိမ်တော်ထဲကို ခိုးဝင်ပြီး သွားရှာမယ်"

ကျန်းချဲ့က လေးနက်သော အသံဖြင့် ပြောလိုက်သည်။

ယဇ်ပူဇော်စရာ ပစ္စည်း ရှိနေပြီ ဖြစ်ရာ အန္တရာယ် ရှိလျှင်တောင်မှ သူ မဖြစ်မနေ ယူရမည် ဖြစ်သည်။

"ဒါက..."

လျိုကျစ်၏ မျက်နှာပေါ်တွင် တွန့်ဆုတ်သွားသည့် အမူအရာများ ပေါ်ထွက်လာခဲ့သည်။ အကယ်၍ ကျန်းချဲ့၏ လက်ရှိ စွမ်းအားများကို သူ မသိရှိခဲ့ပါက သူ ဘယ်လောက်ပဲ ကျန်းချဲ့ကို သဘောကျနေပါစေ ကိုယ့်ကိုယ်ကိုယ် အန္တရာယ် ထဲသို့ ဆွဲသွင်းမည် မဟုတ်ပေ။

ထို့ကြောင့် သူက ကျန်းချဲ့ကို သတိပေးပြီးနောက် ဤကိစ္စမှ ရှောင်ထွက်ရန် စဉ်းစားခဲ့ခြင်း ဖြစ်သည်။

သို့သော် ယခုအခါ ကျန်းချဲ့၏ အလားအလာများက သူ ထင်ထားသည်ထက် အများကြီး ပိုမို ကြီးမားနေပေသည်။

ဒီအကူအညီကို မပေးရင် သံယောဇဉ်တွေ ပျက်သွားနိုင်တယ်...

ဒါပေမဲ့ ပြဿနာက ဒီအကူအညီက ပေးဖို့ သိပ်မလွယ်ဘူး... တစ်ခုခု မှားယွင်းသွားတာနဲ့ တပ်မှူးချုပ်ကျူးက ပထမဆုံး သံသယ ဝင်မှာက သူ့ကိုပဲလေ...

"တပ်မှူးချုပ်ကျူး ကို အာရုံလွှဲထားဖို့ ဆိုတာ လွယ်တဲ့ ကိစ္စတော့ မဟုတ်ဘူး"

"တပ်မှူးချုပ်ကျူးက ဆရာ့ကို ကျွန်တော့် လူယုံတွေကို လာဘ်ထိုးဖို့ ပြောထားတယ် မဟုတ်လား အဲဒီ အကြောင်းပြချက်ကိုပဲ သုံးလိုက်ပါ မွေးရာပါ ဝိညာဉ်စွမ်းအင် သတင်းကို ခိုယွမ်ရှန်း တစ်ယောက်တည်းသာ သိတယ် ဆိုတာကို စုံစမ်းသိရှိထားပြီလို့ ပြောလိုက်"

"ပြီးတော့ ကျွန်တော်က ခိုချင်းကို ဖမ်းဖို့ ဒီလောက် အားထုတ်နေတာက ခိုယွမ်ရှန်း ဆီက သတင်းရအောင် ခြိမ်းခြောက်ဖို့ ဆိုတာကိုလည်း ပြောပြလိုက်"

လူတွေကို တကယ် ယုံကြည်သွားစေနိုင်တာက အမှန်တရား အစစ်အမှန်ပဲ...

ဤနည်းဖြင့် သူ ယခင်က ခိုချင်းကို လိုက်လံ ရှာဖွေ ဖမ်းဆီးခဲ့မှုများနှင့်လည်း အချိတ်အဆက် မိသွားမည် ဖြစ်သည်။

မည်သို့ပင် ဖြစ်စေ ခိုယွမ်ရှန်းကို သူက လျှို့ဝှက်စွာ ဖမ်းဆီးထားပြီး ဖြစ်ရာ တပ်မှူးချုပ်ကျူး အနေဖြင့် အမှန်တရား အချို့ကို သိရှိသွားလျှင်တောင်မှ ဘာမှ လုပ်နိုင်မည် မဟုတ်ပေ။ အရေးအကြီးဆုံးမှာ ဤကိစ္စကို ဝေါ့ဟူတောင်မှ လူများလည်း သိရှိထားပြီး ဖြစ်ရာ ဖုံးကွယ်ထား၍ မရတော့ပေ။

"မင်း ဘယ်တော့ စလုပ်မလဲ"

လျိုကျစ်က အချိန်အတော်ကြာ စဉ်းစားပြီးနောက် နောက်ဆုံးတွင် ဤကိစ္စကို သဘောတူလိုက်သည်။

"အမြန်ဆုံး လုပ်တာ အကောင်းဆုံးပဲ မနက်ဖြန် ည လုပ်မယ်"

ကျန်းချဲ့က မနက်ဖြန် ညတွင် တပ်မှူးချုပ် အိမ်တော်သို့ ခိုးဝင်ပြီး မြေကမ္ဘာ ကျောက်တုံးကို ရှာဖွေရန် ဆုံးဖြတ်လိုက်သည်။

"ကောင်းပြီ ငါ မင်းကို ကူညီမယ်"

လျိုကျစ်က သွားကြိတ်ကာ ခေါင်းညိတ်လိုက်သည်။

နောက်တစ်နေ့ အနောက်မြို့နယ် စစ်စခန်း၊ အချုပ်ခန်း...

အချိန်အတော်ကြာပြီးနောက် ကျန်းချဲ့က ဆုန့်ကျိကို ထပ်မံ လာရောက် တွေ့ဆုံခဲ့သည်။ ဆုန့်ကျိ ထံမှ အစိမ်းရောင်မိစ္ဆာ ခန္ဓာကိုယ်သန့်စင်ခြင်း ကျင့်စဉ်ကို ရရှိပြီးကတည်းက ကျန်းချဲ့က သူ့ကို လာမတွေ့တော့ပေ။ သေချာသည်မှာ သူ့ကို ညှဉ်းပန်းနှိပ်စက်ခြင်းလည်း မရှိခဲ့ပေ။

အနည်းဆုံးတော့ စားစရာ သောက်စရာ လုံလောက်စွာ ပေးထားခဲ့သည်။ သို့သော် လွတ်မြောက်ရန် အတွက်ကတော့ လတ်တလောတွင် လုံးဝ မဖြစ်နိုင်သေးပေ။

"ကျန်းချဲ့ မင်း ကတိပေးထားတယ်လေ အစိမ်းရောင်မိစ္ဆာ ကျင့်စဉ်ကို ပြောပြရင် ငါ့ကို လွှတ်ပေးမယ် ဆို"

ကျန်းချဲ့ကို မြင်သည်နှင့် တစ်ပြိုင်နက် ဆုန့်ကျိက ဒေါသတကြီးဖြင့် အော်ဟစ် မေးမြန်းလိုက်သည်။

"ငါ မင်းကို ဘယ်လို ကတိပေးခဲ့လဲ"

"ကျင့်စဉ်ကို ပေးရင် လွှတ်ပေးမယ်လို့ ပြောခဲ့တယ်လေ"

"မဟုတ်ဘူး မွေးရာပါ ဝိညာဉ်စွမ်းအင်ကို ရပြီးမှသာ မင်းကို လွှတ်ပေးမယ်လို့ ငါ ပြောခဲ့တာ မင်း စိတ်ချပါ ငါ ကျန်းချဲ့က အလုပ်လုပ်ရင် အမြဲတမ်း ကတိတည်ပါတယ်"

ကျန်းချဲ့က ပြုံးကာ ပြောလိုက်သည်။

သူ့နာမည်က ကျန်းချဲ့ လေ... 'ကျန်း' တစ်ယောက်တည်းမှ မဟုတ်တာ...

"အဲဒါဆို ဘယ်နှစ် ဘယ်လမှ ရမှာလဲ"

ဆုန့်ကျိက အေးစက်စက် နှာမှုတ်လိုက်သည်။

"ကြည့်ရတာ အပြင်မှာ ဘာတွေ ဖြစ်နေလဲ ဆိုတာကို မင်း မသိသေးဘူး ထင်တယ် အခု ရေကြောင်းကုန်သွယ်ရေးဂိုဏ်း လည်း ပျက်စီးသွားပြီ ခိုယွမ်ရှန်းကိုလည်း ငါ ဖမ်းထားပြီးပြီ မွေးရာပါ ဝိညာဉ်စွမ်းအင်ကို ရဖို့က အချိန်ပိုင်းပဲ လိုတော့တယ် မင်း လွတ်မြောက်ဖို့ အချိန်လည်း သိပ်မဝေးတော့ပါဘူး"

"ဟက်"

ဆုန့်ကျိက ကျန်းချဲ့၏ စကားများကို လုံးဝ မယုံကြည်ပေ။ ထို့အစား အေးစက်စက် ရယ်မောလိုက်ပြီး မေးလိုက်သည်။

"ပြောစမ်းပါဦး ဒီတစ်ခါ ငါ့ဆီကို လာတာ ဘာသတင်း ထပ်လိုချင်လို့လဲ"

"မင်းဆီမှာ ယင်ရှာ မိစ္ဆာစွမ်းအင် ရှိတဲ့ နေရာတွေရဲ့ သတင်း ရှိမယ် ထင်တယ် အဲဒါကို ပြောပြရင် မင်းကို ညှဉ်းပန်းနှိပ်စက်တာကနေ ကင်းလွတ်ခွင့် ပေးမယ် အနောက်ကျဆုံး တစ်လ အတွင်း မင်းကို အချုပ်ခန်းကနေ ငါ ကိုယ်တိုင် လွှတ်ပေးမယ်"

ကျန်းချဲ့က ဆက်လက် မြှူဆွယ်လိုက်သည်။

"အိပ်မက်သာ မက်နေလိုက်"

ဆုန့်ကျိက ချက်ချင်း ငြင်းဆိုလိုက်သည်။

"မင်းက ဒီလောက်တောင် ပြတ်ပြတ်သားသား ငြင်းနေတာ ဝေါ့ဟူတောင်က လူတွေ လာကယ်မယ်လို့ ထင်နေတုန်းပဲလား"

ကျန်းချဲ့က ပြန်မေးလိုက်သည်။

"ခေါင်းဆောင်ကြီးတွေက ဒီအတိုင်း လက်ပိုက် ကြည့်နေမှာ မဟုတ်ဘူး ကျန်းချဲ့ မင်း အသက်ရှင်ရမယ့် ရက်တွေ သိပ်မကျန်တော့ပါဘူး"

သို့သော် ကျန်းချဲ့က ပြုံးလိုက်ပြီး -

"မင်းက အစိမ်းရောင်မိစ္ဆာ ခန္ဓာကိုယ်သန့်စင်ခြင်း ကျင့်စဉ်ကို ခိုးသင်ထားရုံတင် မကဘူး မွေးရာပါ ဝိညာဉ်စွမ်းအင် လျှို့ဝှက်ချက်ကိုပါ ငါ့ကို ပြောပြလိုက်တယ် ဝေါ့ဟူတောင်က လူတွေက မင်းကို မသတ်ရင်တောင် ကံကောင်းလှပြီ မင်းက အပြင်ထွက်ဖို့ မျှော်လင့်နေသေးတယ်ပေါ့ ရယ်စရာပဲ"

သို့သော် ဆုန့်ကျိက အေးစက်စက် ရယ်မောလိုက်သည်။ မွေးရာပါ ဝိညာဉ်စွမ်းအင် ကိစ္စကို သူ ကိုယ်တိုင်လည်း သေချာ မသိခဲ့ပေ။ ခိုယွမ်ရှန်း ထံတွင် တကယ်ပဲ သဲလွန်စ ရှိသည်ဟု မယုံကြည်သဖြင့် အပေးအယူ အဖြစ် ပြောပြခဲ့ခြင်း ဖြစ်သည်။

အစိမ်းရောင်မိစ္ဆာ ခန္ဓာကိုယ်သန့်စင်ခြင်း ကျင့်စဉ်နှင့် ပတ်သက်၍ သူ ပြောပြခဲ့သည်များမှာ အမှားအမှန် ရောနှောနေပြီး ကျန်းချဲ့ကို ဒုက္ခရောက်စေရန် ရည်ရွယ်ခဲ့ခြင်း ဖြစ်သည်။ သူ၏ ခြိမ်းခြောက်စကားများကို ဘယ်လိုလုပ်ပြီး ယုံကြည်နိုင်မည်နည်း။

ကျန်းချဲ့ကလည်း သူ၏ ယုံကြည်မှု အရင်းအမြစ်ကို ကောင်းစွာ သဘောပေါက်နေသဖြင့် စကားဆက်မပြောတော့ဘဲ ညာဘက် လက်မောင်းကို တစ်ချက် လှုပ်ရှားကာ သွေးချီများကို လည်ပတ်စေလိုက်သည်။ လက်မောင်း တစ်ခုလုံး အမည်းရောင် သန်းနေသော အစိမ်းရောင်များဖြင့် ဖုံးလွှမ်းသွားပြီး လေ့ကျင့်မှု အောင်မြင်နေပြီ ဖြစ်ကြောင်း အပြည့်အဝ ပြသလိုက်သည်။

"ဒါကို ကြည့်လိုက် ဘာလဲ ဆိုတာကို"

"မ... မဖြစ်နိုင်ဘူး... မင်း... မင်းက ဘယ်လိုလုပ်ပြီး... မင်းက ဘယ်လိုလုပ်ပြီး တကယ် လေ့ကျင့် အောင်မြင်သွားတာလဲ..."

ကျန်းချဲ့၏ လက်မောင်း အခြေအနေကို မြင်လိုက်ရသောအခါ ဆုန့်ကျိ၏ မျက်လုံးများ ပြူးကျယ်သွားပြီး လုံးဝ မယုံကြည်နိုင်အောင် ဖြစ်သွားခဲ့သည်။ ကမ္ဘာကြီး ပြိုကျသွားသကဲ့သို့ ခံစားလိုက်ရသည်။ သူ ပေးခဲ့သော ကျင့်စဉ်က အတု ဖြစ်သည်။

အကယ်၍ လေ့ကျင့်မည် ဆိုပါက မိစ္ဆာစွမ်းအင် နှလုံးသားသို့ ဝင်ရောက်ပြီး သေချာပေါက် သေဆုံးရမည် ဖြစ်သည်။

ဒါပေမဲ့...

ဒါက...

ကျန်းချဲ့က သူ့ကို လှည့်စားနေခြင်း ဆိုသည်မှာလည်း လုံးဝ မဖြစ်နိုင်ပေ။ သူက အစိမ်းရောင်မိစ္ဆာ ခန္ဓာကိုယ်သန့်စင်ခြင်း ကျင့်စဉ်ကို နှစ်ပေါင်းများစွာ လေ့ကျင့်ခဲ့သူ ဖြစ်ရာ ကျန်းချဲ့မှာ လေ့ကျင့်မှု အောင်မြင်နေရုံသာမက သူ့ထက်ပင် ပိုမို နက်ရှိုင်းနေကြောင်း တစ်ချက်ကြည့်ရုံဖြင့် သိနိုင်ပေသည်။

"အဲဒါက မင်း သိစရာ မလိုတဲ့ ကိစ္စပဲ ငါ့ရဲ့ ဒီကျင့်စဉ်ကို ပြလိုက်ရုံနဲ့ ဝေါ့ဟူတောင်က လူတွေက သေချာပေါက် ယုံကြည်သွားလိမ့်မယ် ပြီးတော့ ဒီဓားကို ထပ်ကြည့်လိုက်ဦး ရင်းနှီးသလို ရှိလား"

ဆုန့်ကျိ၏ ပါးစပ်ကို ဖွင့်နိုင်ရန်အတွက် ကျန်းချဲ့က ဟော့ရှောက်စန်း၏ ဓားကိုပါ ထုတ်ပြလိုက်သည်။

"ချစ်ရှင်း... ဒါက ချစ်ရှင်းဓားပဲ..."

ဆုန့်ကျိက ယနေ့တွင် တုန်လှုပ်စရာများ အဆက်မပြတ် ကြုံတွေ့နေရပြီး ဤအရာများကို လုံးဝ လက်မခံနိုင်အောင် ဖြစ်နေပေသည်။ သို့သော် တတိယ ခေါင်းဆောင်၏ ချစ်ရှင်းဓားက သူ၏ မျက်စိရှေ့တွင် ရှင်းလင်းစွာ ရှိနေသဖြင့် သူ လုံးဝ အထင်မမှားနိုင်ပေ။

"လွန်ခဲ့တဲ့ ရက်အနည်းငယ်က ငါနဲ့ တပ်မှူးချုပ်ကျူးတို့ ပူးပေါင်းပြီး မင်းတို့ရဲ့ ခေါင်းဆောင် ဟော့ နဲ့ တိုက်ခိုက်ခဲ့ကြတယ် ဒါက စစ်ပွဲက ရလာတဲ့ ရတနာပဲ သူကလည်း ငါ့ကိုယ်ပေါ်က အစိမ်းရောင်မိစ္ဆာ ကျင့်စဉ်ကို ကိုယ်တိုင် တွေ့သွားတယ် ဝေါ့ဟူတောင်က သစ္စာဖောက် တစ်ယောက်ကို ဘယ်လို အပြစ်ပေးမလဲ ဆိုတာ မင်း မှန်းကြည့်လိုက်"

ကျန်းချဲ့က တစ်လှမ်းချင်း တိုးကပ်လာပြီး ဤစကားများက သံတူရွင်းကြီး တစ်ခုလို ဆုန့်ကျိ၏ နှလုံးသားကို ဆွဲဆုတ်လိုက်သကဲ့သို့ ဖြစ်သွားစေခဲ့သည်။

"မ... မဟုတ်ဘူး... ဒါ... မင်း..."

ဆုန့်ကျိမှာ ယခုအခါ စကားများပင် ထစ်ငေါ့နေပြီး မျက်စိတစ်မှိတ် အတွင်းမှာပင် သစ္စာဖောက် တစ်ယောက် ဖြစ်သွားရခြင်းကို လုံးဝ လက်မခံနိုင်အောင် ဖြစ်နေပေသည်။ ထို့ထက် ပို၍ လက်မခံနိုင်သည်မှာ ကျန်းချဲ့က အစိမ်းရောင်မိစ္ဆာ ကျင့်စဉ်ကို လေ့ကျင့် အောင်မြင်သွားခြင်းပင် ဖြစ်သည်။

"အမှန်တရားကို လက်ခံလိုက်ပါတော့ မင်းရဲ့ အခု လက်ရှိ အခြေအနေ အရ ဖြေရှင်းချက် ပေးရင်တောင် ဘယ်သူမှ ယုံမှာ မဟုတ်ဘူး ငါ့အတွက် အလုပ်လုပ်ပေးပြီး အစိုးရ အရာရှိ နေရာလေး တစ်ခု ရအောင် ယူလိုက်တာက ပိုကောင်းပါတယ် နောင်ကျရင် ကိုယ့်မိသားစု အတွက်လည်း ဂုဏ်ယူစရာ ဖြစ်လာနိုင်တယ်လေ အရင်တုန်းကလို တောင်ပေါ်မှာ ပုန်းပြီး ဓားပြ လုပ်နေရတာထက် အများကြီး ပိုကောင်းပါတယ်"

ကျန်းချဲ့က ဆုန့်ကျိ၏ ပခုံးကို ပုတ်ကာ သွေးဆောင် ဖျားယောင်းလိုက်သည်။