အခန်း ၈၁၁

အခန်း (၈၁၁) - မြှားတစ်ချက်ဖြင့် ဝိညာဉ်ခန္ဓာကိုယ် ပြိုလဲခြင်း

အဆောင်လက်ဖွဲ့များ၏ ခိုင်မာလှသော အကာအကွယ်နှင့် ဝိုင်းရံတိုက်ခိုက်မှု အသာစီးရခြင်းတို့ကြောင့် ကူရှောက်ခွန်းနှင့် တာ့ယန် ကွမ်ကျားမင်းသမီး ရူမုန်တို့၏ စုပေါင်းတိုက်ခိုက် မှုကို မနည်း ထိန်းချုပ်ထားနိုင်ခဲ့လေသည်။

ကူရှောက်ခွန်း၏ ထိတ်လန့်ဖွယ် ကောင်းလှသော ခွန်အားက ရွှမ်လိပ် ပင်လယ် မျိုးနွယ်စုမှ မင်းသား ရွှမ်လျိုနှင့် အဆင့်လေး အထွတ်အထိပ် ကျွမ်းကျင်သူများကို အံ့အားသင့်သွားစေခဲ့၏။

“မင်းကို တစ်ချက်လောက် စမ်းသပ်ကြည့်ရအောင်...”

မင်းသား ရွှမ်လျို၏ မျက်လုံးများတွင် တိုက်ခိုက်လိုစိတ်များ တောက်လောင်လာသည်။ ကောင်းကင်နှင့် မြေကြီးကို တုန်ခါသွားစေလောက်အောင် ဟိန်းဟောက်လိုက်ပြီးနောက် သူသည် အရှည်ပေပေါင်း သုံးဆယ်ကျော် ရှိသော ဧရာမ ပင်လယ်လိပ်ကြီး အဖြစ် ပြောင်းလဲသွားလေသည်။

သူ၏ ပါးစပ်ကို ဟလိုက်ပြီး ရေနဂါး (၂၄) ကောင်ကို မှုတ်ထုတ်လိုက်ရာ ထိုရေနဂါးတို့မှာ လှောင်အိမ်တစ်ခုအလား ဖွဲ့စည်းသွားပြီး ကူရှောက်ခွန်းနှင့် ကွမ်ကျားမင်းသမီးတို့အပေါ်သို့ ဖိနှိပ်ကျဆင်းလာ၏။

သူ့ကိုယ်တိုင်မူ အင်မော်တယ် တောင်ကြီးတစ်ခုအလား ပုံစံပြောင်းလဲကာ သူ၏ ထူးခြားသော နတ်ဘုရား သိုင်းကျင့်စဉ်ကို ထုတ်ဖော်လိုက်သည်။ သူ၏ ခန္ဓာကိုယ်မှာ ရုတ်တရက် ဖောင်းကားလာပြီး နောက်ဆုံးတွင် ပေပေါင်းတစ်ရာကျော် ရှိသော ဧရာမ သားရဲကြီးအဖြစ် ရောက်ရှိသွားတော့၏။

သူ၏ လက်သည်းဖြင့် တစ်ချက်ဆွဲလိုက်ရုံမျှဖြင့် ဟင်းလင်းပြင်ပင် တုန်ခါသွားရလေသည်။

မင်းသား ရွှမ်လျို၏ စွမ်းအားမှာ တာ့ယန် နယ်ပယ်၏ အထွတ်အထိပ် အဆင့်သို့ နီးကပ်နေပြီ ဖြစ်ပေသည်။

ကူရှောက်ခွန်းက သူ၏ လက်နှစ်ဖက်ကို ပေါင်းစပ်လိုက်၏။ ကောင်းကင်ယံတွင် ရေခဲဖီးနစ်များ၏ အော်မြည်သံများ ထွက်ပေါ်လာပြီး အဆုံးမဲ့ ရေခဲနှင်းများဖြင့် ပတ်ဝန်းကျင်တစ်ခုလုံးကို ချက်ချင်းပင် အေးခဲသွားစေသည်။ သူ့အား ဖိနှိပ်ရန် လာသော ရေနဂါးများကိုလည်း ရေခဲအလွှာများဖြင့် လွှမ်းခြုံကာ အေးခဲသွားစေလေသည်။

သို့သော်လည်း သူ၏ လက်ဖဝါးဖြင့် မင်းသား ရွှမ်လျို၏ ခေါင်းကို တိုက်ရိုက် ရိုက်ခတ်လိုက်ချိန်၌ သူသည် လီပေါင်း တစ်ဆယ်ကျော်အထိ လွင့်ထွက်သွားရတော့၏။

ပင်လယ်လိပ်၏ လက်သည်းများမှာလည်း တစ်စိတ်တစ်ပိုင်း အေးခဲသွားသော်လည်း ရွှမ်လိပ် ပင်လယ် မျိုးနွယ်စု၏ ကာကွယ်ရေး စွမ်းအားမှာ လွန်စွာ တောင့်တင်းလှ၏။ ခဏအကြာတွင် ရေခဲများ ကွဲအက်သွားပြီး ပင်လယ်လိပ်မှာ မူလအတိုင်း ပြန်လည် ဖြစ်တည်သွားတော့သည်။

ကူရှောက်ခွန်း၏ မျက်လုံးထဲတွင် အံ့ဩမှု အရိပ်အယောင်များ ပေါ်လာသည်။

“သွေးမျိုးဆက် နတ်ဘုရား စွမ်းအားလား...”

သွေးမျိုးဆက် နတ်ဘုရား စွမ်းအား ပိုင်ဆိုင်ထားသော မိစ္ဆာသားရဲ တစ်ကောင်မှာ သူ၏ ဝိညာဉ်ခန္ဓာကိုယ် ထက် မည်သို့မျှ အားနည်းမည် မဟုတ်ပေ။

ပင်လယ်လိပ်ကြီး ထပ်မံ၍ အရှိန်ပြင်းစွာ ပြေးဝင်လာသည်ကို မြင်သောအခါ ကူရှောက်ခွန်း၏ မျက်နှာမှာ အေးစက်သွားသည်။ မိမိသည် တုံ့ဆိုင်းမနေတော့ဘဲ သူ၏ ခန္ဓာကိုယ်အတွင်းမှ တာအိုတံဆိပ်တစ်ခုကို နှိုးဆွလိုက်၏။

အခြားတစ်နေရာတွင်

ကွမ်ကျားမင်းသမီး၏ မျက်နှာမှာ အနည်းငယ် ပြောင်းလဲသွားသည်။ ကူရှောက်ခွန်း တစ်ချက်တည်းနှင့် လွင့်ထွက်သွားသည်ကို မြင်လိုက်ရသောအခါ သူမလည်း ကူရှောက်ခွန်းနည်းတူ သူ၏ ဖခင်ဖြစ်သူ ပါထျန်း မြို့စားကြီး ချန်ရစ်ခဲ့သော တာအိုတံဆိပ်ကို နှိုးဆွလိုက်တော့၏။

ရွှမ်လိပ် ပင်လယ် မျိုးနွယ်စုနှင့် အင်မော်တယ် တစ်သောင်း နန်းတော်တို့၏ တိုက်ပွဲမှာ ရွှမ်ဟွမ် တောင်ကြား တွင် ခရီးသွားနေသော ကျင့်ကြံသူများကို ထိတ်လန့်သွားစေခဲ့သည်။

“ဒီမှာ ဘာတွေ ဖြစ်နေတာလဲ...”

“အဲဒါ ရွှမ်လိပ် ပင်လယ် မျိုးနွယ်စု မဟုတ်လား။ ချန်ကု အင်မော်တယ် မြို့တော် ကို အခုတလောမှ ရောက်လာတဲ့ ရွှမ်လိပ် ပင်လယ် မျိုးနွယ်စုပဲမလား”

“သူတို့က ဘယ်သူတွေကို တိုက်ခိုက်နေတာလဲ။ အရမ်းတော်တာပဲ။ အဲဒီ လူငယ်နှစ်ယောက်က ဒီလောက် အင်အားကြီးတဲ့ ရွှမ်လိပ် ပင်လယ် မျိုးနွယ်စုရဲ့ ဝိုင်းရံတိုက်ခိုက်မှုကို ဒီလောက်အထိ ခံနိုင်ရည် ရှိနေတာပဲ”

“ဒုက္ခပါပဲ။ ရွှမ်လိပ် ပင်လယ် မျိုးနွယ်စုကြီးက ဘာလို့ ဒီလောက်တောင် ကြီးမားနေရတာလဲ”

ကျင့်ကြံသူများစွာမှာ အလွန် အံ့အားသင့်နေကြ၏။ တောင်ကြားထဲမှ တိုက်ပွဲသံများနှင့် ချီစွမ်းအား အတက်အကျများက ကောင်းကင်နှင့် မြေကြီးကို တုန်ခါသွားစေသည်။ အင်မော်တယ် အရှိန်အဝါနှင့် သားရဲတို့၏ ကြမ်းတမ်းမှုကြောင့် လူအများမှာ ကြောက်လန့်တကြား ဖြူဖျော့နေကြ၏။

လူအများမှာ ရွှမ်ဟွမ် တောင်ကြား မှ အလျင်အမြန်ပင် ထွက်ပြေးကြတော့သည်။ အချို့မှာမူ လုံခြုံသော နေရာတစ်ခုတွင် ပုန်းခိုရင်း အဝေးမှ ဆက်လက် ကြည့်ရှုနေကြ၏။

ဤအချိန်၊ ရွှမ်ဟွမ် တောင်ကြား မှ လီပေါင်းတစ်ရာ အကွာတွင် ရှိသော ပေပေါင်း ထောင်ချီ မြင့်မားသည့် တောင်ထွတ် တစ်ခု။

၎င်းအပေါ်၌ ရွှေရောင် နတ်ဘုရား အလင်းတန်းများဖြင့် တောက်ပနေသော မျက်လုံးပိုင်ရှင် တစ်ဦးက ဟင်းလင်းပြင်ကို ဖောက်ထွင်းကာ တိုက်ပွဲကို အကဲခတ်ကြည့်နေ၏။

စုယွီသည် အနည်းငယ် အံ့ဩသွားသည်။

“ရွှမ်လိပ် ပင်လယ် မျိုးနွယ်စုက အင်မော်တယ် တစ်သောင်း နန်းတော်က တာအိုသားတော် ကူရှောက်ခွန်း ကို တိုက်ခိုက်နေတာလား”

တိတ်ဆိတ်စွာ ကြည့်ရှုပြီးနောက် စုယွီသည် စိတ်ထဲမှ ရေရွတ်လိုက်၏။

‘ကံကြမ္မာ ဆိုတာကလည်း... အခွင့်သာရင် ကောင်းကင်နဲ့ မြေကြီးကပါ ပူးပေါင်း ကူညီတတ်ပေမဲ့ ကံကုန်ရင်တော့ သူရဲကောင်းတောင် လွတ်လပ်ခွင့် ဆုံးရှုံးရတတ်တာပါပဲ...’

သူ၏ ရွှေပုစဉ်းရင်ကွဲ မျက်လုံး မှတစ်ဆင့် ရွှမ်လိပ် ပင်လယ် မျိုးနွယ်စုနှင့် ကူရှောက်ခွန်းတို့၏ တိုက်ပွဲကို စုယွီ မြင်နေရသည်။ တိုက်ပွဲကြောင့် ရွှမ်ဟွမ် တောင်ကြား တစ်ဝက်ကျော် ပျက်စီးသွားခဲ့ပြီ ဖြစ်၏။

ကူရှောက်ခွန်းနှင့် ကွမ်ကျားမင်းသမီးတို့မှာ ဝိညာဉ်ခွဲထွက် ဓမ္မခန္ဓာကိုယ် တို့ကို အသုံးပြု၍ ရွှမ်လိပ် ပင်လယ် မျိုးနွယ်စုမှ လူများအားလုံးကို တွန်းလှန်နေသည်ကို မြင်သောအခါ စုယွီ၏ ကိုယ်ပွား က ခမ်းနားလှသော နတ်ဘုရား အလင်းတန်းကို ထုတ်လွှတ်လိုက်သည်။ မီးဖီးနစ် တစ်ကောင် ကမ္ဘာလောကထဲသို့ ပေါ်ထွက်လာသကဲ့သို့ နားကွဲမတတ် အော်မြည်သံတစ်ခု ထွက်ပေါ်လာ၏။

အလင်းတန်းများ လျော့ကျသွားသောအခါ လက်ထဲတွင် ကိုင်ဆောင်ထားသည့် အရာမှာ လေးတစ်လက် ဖြစ်နေသည်။

အဆင့်မြင့် မှော်ရတနာ - မီးဖီးနစ် ကောင်းကင်လေး။

စုယွီသည် သူ၏ ကောင်းကင် အင်မော်တယ် ခန္ဓာသန့်စင် ကျင့်စဉ် ကို အဆင့်ငါး အထိ ချိုးဖြတ်ပြီးနောက် ဖီးနစ်နန်းတော်၏ အပျက်အစီးများထဲမှ ရရှိခဲ့သော ဤရတနာကို ပြန်လည် သွန်းလုပ်ရန် ကြိုးစားခဲ့သည်။

ဤအဆင့်မြင့် မှော်ရတနာ ကောင်းကင်လေး ကို ထိန်းချုပ်နိုင်ရုံသာမက စုယွီသည် မီးဖီးနစ်၏ ဘဝကိုးခု ဟူသော မြှားပစ်နည်း နတ်ဘုရား စွမ်းအား ကိုလည်း ရရှိခဲ့သည်။

နှစ်ပေါင်းများစွာ လေ့လာပြီးနောက် စုယွီသည် ပထမဆုံး ဘဝ သုံးခု ကိုသာ အနည်းငယ် နားလည်ထား၏။

သူက မျက်လုံးများကို ခဏမျှ မှိတ်လိုက်ပြီးနောက် ပြန်ဖွင့်လိုက်၏။ သူ၏ မျက်လုံး အာရုံခံကျင့်စဉ် ကို အသုံးပြု၍ ကူရှောက်ခွန်းနှင့် ကွမ်ကျားမင်းသမီးတို့ကို ကြည့်လိုက်သည်။

ကူရှောက်ခွန်းနှင့် ကွမ်ကျားမင်းသမီးတို့မှာ ဝိညာဉ်ခွဲထွက် အဆင့်နှောင်းပိုင်း ချီစွမ်းအား အကာအကွယ်ဖြင့် ကာကွယ်ထားသည်။

သို့သော် ချီစွမ်းအား ဆိုသည်မှာ ဝိညာဉ်ခွဲထွက် နယ်ပယ်မှ ကျွမ်းကျင်သူ၏ စစ်မှန်သော ကိုယ်ပိုင်အစွမ်းနှင့် ယှဉ်လျှင် အများကြီး ကွာခြားပေသည်။

ဤအချိန်တွင် စုယွီ၏ ကိုယ်ပွား မှ အရှိန်အဝါများ တဟုန်းဟုန်း တက်လာပြီး သူ၏ စတုတ္ထအဆင့် အဆင့်မြင့် ကိုယ်ပွားမှာ တစ်လက်မချင်း ကွဲအက်လာတော့သည်။

သို့သော် ထိုအချိန်တွင် သူ၏ အရှိန်အဝါမှာ မူလဝိညာဉ် နယ်ပယ်ကိုပင် ကျော်လွန်သွားတော့၏။

“ဟွန်း...”

စုယွီ၏ ကိုယ်ပွားက လက်ထဲမှ မီးဖီးနစ် ကောင်းကင်လေး ကို မြှောက်လိုက်၏။ ရုပ်သေး၏ စွမ်းအား အားလုံးကို လက်ထဲမှ အဆင့်မြင့် မှော်ရတနာ ထံသို့ ပို့လွှတ်လိုက်သည်။ ရုပ်သေးမှာ တစ်စစီ ပြိုကွဲသွားတော့မည် ဖြစ်သော်လည်း သူဂရုမစိုက်။

“ကျွီ...”

အဆုံးမဲ့ မီးလျှံ စွမ်းအားများက မီးဖီးနစ် ကောင်းကင်လေး မှ ထွက်ပေါ်လာသည်။ ခရမ်းရောင်-အပြာရောင် မီးတောက်များက ကောင်းကင်ယံကို လောင်မြိုက်သွားစေပြီး ကြောက်မက်ဖွယ် ကောင်းသော ဖီးနစ်ငှက်ကြီးမှာ ကောင်းကင်နှင့် မြေကြီးကို တုန်ဟည်းသွားစေအောင် အော်မြည်လိုက်၏။

ဤ မီးလျှံ စွမ်းအား၏ ကြောက်စရာကောင်းမှုကြောင့် စုယွီ ရပ်နေသည့် တောင်ထွတ်ပေါ်ရှိ ကျောက်တုံးများနှင့် သစ်ပင်များပင် ပြာအဖြစ်သို့ ပြောင်းလဲသွားတော့သည်။

စုယွီ၏ ကိုယ်ပွား ပြာအဖြစ် ပျောက်ကွယ်သွားသည်နှင့် တစ်ပြိုင်နက် ဆွဲတင်ထားသည့် မီးဖီးနစ် ကောင်းကင်လေး မှ မြှားတစ်စင်းမှာ ရှေ့ရှိ ဟင်းလင်းပြင် အကွဲအအက်များဆီသို့ လျှပ်စီးပမာ ပစ်လွှတ်လိုက်တော့၏။

ဤမြှားတစ်စင်း ပစ်လွှတ်လိုက်ပြီးသည်နှင့် မီးဖီးနစ် ကောင်းကင်လေး မှာ ကောင်းကင်ယံမှ ပြုတ်ကျသွားတော့သည်။