အခန်း ၈၂၂

အခန်း (၈၂၂) - သံသရာကပ်ဘေးနှင့် အင်မော်တယ် ဖြစ်တည်ခြင်း သိုင်းကျမ်း (၂)

အတောင်လေးဘက်ပါသော ရွှေပုစဉ်းရင်ကွဲကြီး၏ ရုပ်ပုံလွှာသည် စုယွီ၏ စိတ်ဝိညာဉ်ထက်ဝယ် အပြီးသတ် ပုံဖော်ဖြစ်တည်လာခဲ့သည့် ထိုလျှပ်တစ်ပြက်၌ပင်.. သူ၏ သိစိတ်ထဲသို့ ရွှေပုစဉ်းရင်ကွဲကျင့်စဉ်၏ နက်နဲဆန်းကြယ်လှသော လျှို့ဝှက်ချက် အသစ်တစ်ခုသည် ထပ်မံ၍ စီးဝင်လာခဲ့ပြန်ပြီပင်။ ၎င်းသည်ကား စိတ်ဝိညာဉ် တိုက်ခိုက်မှု အသစ်တစ်ခု၏ အမွေအနှစ်ပင် ဖြစ်ချေသည်။

'သံသရာကပ်ဘေး'..

တစ်ချက်မျှ ကြည့်ရုံမျှဖြင့်ပင် တစ်ဖက်လူအား အိမ်မက်ဆိုးများဖြင့် ပြည့်နှက်နေသည့် အနက်ရှိုင်းဆုံးသော သံသရာကပ်ဘေးကမ္ဘာကြီးထဲသို့ ထိုးဆင်းသက်ရောက်သွားစေနိုင်ပြီး မည်သို့မျှ ရုန်းမထွက်နိုင်တော့ဘဲ.. နောက်ဆုံးတွင် ဝိညာဉ်ပါ ချုပ်ငြိမ်းကာ ခန္ဓာကိုယ်ပျက်စီး၍ တာအို ကျရှုံးရသည့်အထိ အဆုံးသတ်သွားစေမည့် ကြောက်မက်ဖွယ် တိုက်ခိုက်မှု တစ်ခုပင် ဖြစ်ပါ၏။

စုယွီသည် မိမိ၏ စိတ်ဝိညာဉ်ပင်လယ်ပြင်ထဲ၌ ဖြစ်တည်လာသော ဤစိတ်ဝိညာဉ် တိုက်ခိုက်မှုအသစ်ကို ဆင်ခြင်ကြည့်ရင်း ရင်ထဲ၌ လွန်စွာ တုန်လှုပ်အံ့ဩမိတော့သည်။

ဤသိုင်းကွက်၏ ဖျက်ဆီးနိုင်စွမ်း စွမ်းအားက မည်မျှအထိ ပြင်းထန်မည်ကို အတိအကျ မသိရသေးသော်လည်း ၎င်း၏ ထူးဆန်းဆန်းပြားလွန်းမှုနှင့် ယုတ်မာကောက်ကျစ်လွန်းမှုကမူ ကြက်သီးထဖွယ်ရာ ကောင်းလှပေသည်။

တစ်ချက်မျှ ကြည့်ရုံမျှဖြင့် အနက်ရှိုင်းဆုံးသော အိမ်မက်ဆိုးသံသရာထဲသို့ ကျရောက်သွားစေနိုင်သည် မဟုတ်ပါလော။

နှလုံးသား နတ်ဆိုးဆိုသည်က ဘာလဲ။ ကျင့်ကြံသူတစ်ဦး၏ ရင်ဘတ်ထဲတွင် အကြောက်ရွံ့ဆုံးနှင့် ရင်ဆိုင်ရုံရအရှိဆုံးသော အရာများသာ ဖြစ်ပေသည်။ နက်နဲမြင့်မားသော ကျင့်ကြံမှုအဆင့်ရှိသည့် ကျင့်ကြံသူကြီးများသည် ခိုင်မာလွန်းသော စိတ်ဓာတ်ခွန်အားကို ပိုင်ဆိုင်ထားကြသဖြင့် ၎င်းတို့ကို ထိတ်လန့်တုန်လှုပ်သွားစေနိုင်မည့် အရာဟူသည်မှာ လောကဝယ် အလွန် ရှားပါးလှပေသည်။

သို့သော်လည်း သက်ရှိသတ္တဝါဟူ၍ ဖြစ်တည်လာခဲ့ပြီးနောက်တွင်.. လူတိုင်း၌ မိမိတို့ကိုယ်ပိုင် အကြောက်ရွံ့ဆုံးသော နှလုံးသား နတ်ဆိုးများ ရှိကြမည်သာဖြစ်ကြောင်း စုယွီ အခိုင်အမာ ယုံကြည်ထားမိ၏။

ကောင်းကင်တာအိုကြီးကဲ့သို့ လောဘ.. ဒေါသ.. မောဟ စိတ်ခံစားချက်များ ကင်းစင်နေပြီး လူသားဆန်မှု မရှိသည့် တည်ရှိမှုမျိုး မဟုတ်ခဲ့ပါက.. မည်သူမဆို ဤဘေးဒုက္ခနှင့် ကင်းလွတ်နိုင်မည် မဟုတ်ချေ။

အကယ်၍ တစ်ဖက်လူသည် မိမိ၏ ရင်ထဲမှ အနက်ရှိုင်းဆုံးသော အကြောက်တရား အိမ်မက်ဆိုးကြီးထဲတွင် ပိတ်မိကာ ဘယ်လိုမှ ရုန်းမထွက်နိုင်တော့ဘဲ.. နောက်ဆုံး၌ စိတ်ဝိညာဉ်ပါ ပြိုကွဲပျက်စီးသွားရမည်ဆိုပါက.. ဤစိတ်ဝိညာဉ် သိုင်းကွက်သည် အလွန်တရာကို ရက်စက်ကြမ်းကြုတ်လွန်းလှသည်ဟု စုယွီ ခံစားလိုက်ရတော့သည်။

အချိန်ကာလသည် တရွေ့ရွေ့နှင့် ကုန်လွန်နေခဲ့၏။

ကောင်းကင်နှင့်မြေကမ္ဘာ၏ အေးမြလှသော ဝိညာဉ်အငွေ့အသက်များ၏ ကူညီပံ့ပိုးမှုအောက်တွင် စုယွီ၏ စိတ်ဝိညာဉ်သည် တဖြည်းဖြည်းချင်း အသွင်ပြောင်းလဲလာ၏။ ရိပ်ခနဲဖြစ်နေသော ဝိညာဉ်ရိပ်အသွင်မှသည်.. တကယ့် ဒြပ်သားအစစ်အမှန်ကဲ့သို့ ထင်ထင်ရှားရှား ပုံပေါ်လာခဲ့ရလေသည်။

တစ်ချိန်တည်းမှာပင်.. ထိုထင်ရှားလှသော စိတ်ဝိညာဉ်ထံမှ ထွက်ပေါ်လာသည့် ဝိညာဉ်အရှိန်အဝါ အရှိန်အဝါသည်လည်း ပိုမို၍ ကြောက်မက်ဖွယ် ကောင်းလာ၏။

လဝက်ခန့် ကာလ ကြာမြင့်ပြီးနောက်တွင်..

စုယွီ၏ စိတ်ဝိညာဉ်အရှိန်အဝါသည် နောက်ဆုံးတွင် တည်ငြိမ်သွားသည်။

သူ့ခန္ဓာကိုယ်အတွင်းရှိ သိစိတ်ပင်လယ်၏ အနက်ရှိုင်းဆုံးသော ဗဟိုချက်ဆီသို့ ပြန်လည်ဝင်ရောက်ကာ အတောင်လေးဘက်ပါသော ရွှေပုစဉ်းရင်ကွဲကြီး

တစ်ကောင်အသွင်ဖြင့် ငြိမ်သက်စွာ ရပ်တည်နေတော့သည်။ ၎င်းထံမှ တောက်ပလှသော ရွှေရောင်ဝိညာဉ်အလင်းတန်းများသည် ကောင်းကင်နှင့်မြေပြင်တစ်ခုလုံးကို လွှမ်းခြုံထားလျက်ရှိရာ ဆန်းကြယ်လှသော ဝိညာဉ်ဘုံကမ္ဘာကြီးတစ်ခုပမာ ထင်မှတ်ရပေသည်။

ဤအချိန်တွင် စုယွီ၏ စိတ်ဝိညာဉ်သည် အနှစ်သာရပိုင်းဆိုင်ရာ ကြီးမားလှသော အပြောင်းအလဲတစ်ခုကို ကြုံတွေ့ခဲ့ရပြီ ဖြစ်၏။ စိတ်ဝိညာဉ်သည် စစ်မှန်သော ဒြပ်သားအဆင့်သို့ တက်လှမ်းသွားခဲ့ပြီဖြစ်ရာ ဝိညာဉ်ခွဲထွက် အဆင့်သို့ ရောက်ရှိနေသည့် အရှင်သခင်ကြီးတစ်ဦးနှင့်ပင် ယှဉ်နိုင်စွမ်း ရှိနေရုံမျှမက အဆုံးမဲ့သော စိတ်ဝိညာဉ်စွမ်းအားများနှင့် ကြီးမြတ်သော အရှိန်အဝါများကိုလည်း ပိုင်ဆိုင်သွားခဲ့ပြီ ဖြစ်ပါ၏။

ဤကဲ့သို့သော စိတ်ဝိညာဉ်စွမ်းအားမျိုးနှင့် ဆိုပါက.. စိတ်ဝိညာဉ် ကျင့်စဉ်များကို သီးသန့်ကျင့်ကြံထားခြင်း မရှိသည့် ဝိညာဉ်ခွဲထွက် အဆင့် ကျင့်ကြံသူတစ်ဦးနှင့် ရင်ဆိုင်ရလျှင်ပင်.. စုယွီအနေဖြင့် မိမိ၏ ဝိညာဉ်အရှိန်အဝါကို တစ်ချက်မျှ ထုတ်ဖော်ကြည့်ရုံမျှဖြင့်ပင် တစ်ဖက်လူအား ချက်ချင်း တုန်လှုပ်ခြောက်ခြားသွားစေနိုင်မည် ဖြစ်ပေသည်။

စုယွီသည် ရွှေပုစဉ်းရင်ကွဲကျင့်စဉ်၏ စွမ်းအားများကို ဖြည်းဖြည်းချင်း ပြန်လည်ရုပ်သိမ်းလိုက်သောအခါ သိစိတ်ထဲတွင် ရှိနေသော သူ၏ စိတ်ဝိညာဉ်သည် ယခင်အတိုင်း သူနှင့် တစ်ပုံစံတည်း တူညီလှသည့် ရွှေရောင်လူသားရုပ်ပုံလေးအသွင်သို့ ပြန်လည်ပြောင်းလဲသွားခဲ့လေသည်။

ဝ

“ဟူး...”

စုယွီသည် သက်ပြင်းတစ်ချက်ကို အသာအယာ ချလိုက်ရင်းမှ မျက်လုံးများကို ဖွင့်လိုက်၏။

မိမိ၏ သိစိတ်ပင်လယ်အတွင်း၌ တဟုန်းဟုန်း စီးဆင်းနေသည့် မုန်တိုင်းအလား စိတ်ဝိညာဉ်စွမ်းအားများကို ခံစားကြည့်ရင်း သူ၏ မျက်ဝန်းအစုံတွင် မချန်ထားနိုင်သော ဝမ်းမြောက်မှု အရိပ်အယောင်များ ထင်ဟပ်လာရ၏။

'ဒါက ပဏာမဝိညာဉ်အဆင့်ကို ရောက်သွားပြီးတဲ့နောက် ဖြစ်ပေါ်လာတဲ့ စိတ်ဝိညာဉ်အဆင့်အတန်းမျိုးလား...'

ပမာဏအားဖြင့်မူ ယခင်ကထက် များစွာ တိုးပွားလာခြင်း မရှိသေးသော်လည်း အနှစ်သာရပိုင်းနှင့် အရည်အသွေးပိုင်းတွင်မူ ကောင်းကင်နှင့်မြေပြင်ပမာ ကွာခြားသွားခဲ့ရပြီပင်။

ယခုအခါတွင်မူ သူ၏ လက်ရှိ စိတ်ဝိညာဉ်စွမ်းအားထဲမှ တစ်စွန်းတစ်စလေးသည်ပင် ယခင်က ရှိခဲ့ဖူးသော စွမ်းအားအစုအပုံ တစ်ရာမကထက် ပိုမို၍ နက်နဲပြင်းထန်လှပေသည်။

ဤမျှလောက် မြင့်မားလှသော စိတ်ဝိညာဉ်စွမ်းအားမျိုးနှင့် ဆိုပါက.. အဆင့်နိမ့် အဆင့်ငါး ဝမ်ယင်း အဆောင်လက်ဖွဲ့စာရွက် တစ်ရာကျော်ခန့်ကို တစ်ပြိုင်နက်တည်း ထိန်းချုပ်အသုံးပြုရန်မှာပင် စုယွီအတွက် ဘာမျှ မခက်ခဲတော့ချေ။

၎င်းအပြင်..

အတောင်လေးဘက်ပါသော ရွှေပုစဉ်းရင်ကွဲကြီးအဖြစ်သို့ အသွင်ပြောင်းလဲသွားခဲ့ပြီးနောက် ရွှေပုစဉ်းရင်ကွဲကျင့်စဉ်၏ ဖျက်ဆီးနိုင်စွမ်း စွမ်းအားသည်လည်း တစ်ဆင့်ချင်းစီထက် အနှစ်သာရပိုင်းဆိုင်ရာ ကြီးမားစွာ တိုးတက်ပြောင်းလဲသွားခဲ့ကြောင်းကိုလည်း သူ ခံစားသိရှိလိုက်ရပေသည်။

အကယ်၍ ယခင်က ရွှေပုစဉ်းရင်ကွဲကျင့်စဉ်သည် အထွတ်အထိပ်အဆင့် စိတ်ဝိညာဉ် ကျင့်စဉ် တစ်ခုမျှသာ ဖြစ်ခဲ့ဖူးလျှင်.. ယခုအခါတွင်မူ..

၎င်းသည် သာမန် ကျင့်စဉ်များ၏ နယ်ပယ်ထက်ကို ကျော်လွန်သွားခဲ့ပြီ ဖြစ်ကြောင်း စုယွီ ခံစားလိုက်ရ၏။

ဤစိတ်ဝိညာဉ် သိုင်းကျင့်စဉ်သည် တကယ်ပဲ အင်မော်တယ် လောက နယ်ပယ်နှင့် ဆက်စပ်ပတ်သက်နေခဲ့ခြင်း ဖြစ်ပေမလား။

စုယွီသည် ရွှေပုစဉ်းရင်ကွဲကျင့်စဉ်မှ ဆန်းကြယ်စွာ ထွက်ပေါ်လာခဲ့သော မျက်ဝန်း လှုပ်ရှားကွက်များနှင့် 'သံသရာကပ်ဘေး' စိတ်ဝိညာဉ် သိုင်းကွက်များကို တွေးတောရင်း ရင်ထဲ၌ မရေမရာ ဖြစ်နေမိတော့သည်။ ဤသည်က ကျင့်စဉ်၏ ပဉ္စမမြောက်အလွှာမျှသာ ရှိသေးသော်လည်း မမျှော်လင့်ဘဲ ထူးခြားဆန်းပြယ်လှသော စိတ်ဝိညာဉ် သိုင်းကွက်ကြီး နှစ်ကွက်ကို မိမိဘာသာ ဖန်တီးဖြစ်ပေါ်လာစေနိုင်ခဲ့ပြီ ဖြစ်ချေသည်။

အကယ်၍ သူသည် နောက်ထပ်တစ်ဆင့် ထပ်မံ၍ အဆင့်ချိုးဖြတ် တက်လှမ်းနိုင်ခဲ့မည်ဆိုပါက.. မည်မျှအထိ ကြောက်မက်ဖွယ်ကောင်းသော နယ်ပယ်သို့ ရောက်ရှိသွားနိုင်မည်နည်း။

သူသည် မိမိ၏ ကျွမ်းကျင်မှုစွမ်းရည်စာမျက်နှာကို အသာအယာ ကြည့်လိုက်မိ၏။

ကျင့်ကြံမှုအဆင့် - မူလဝိဉာဉ် အဆင့် သတ္တမအလွှာ။

သက်တမ်း - (၄၁၁) နှစ် / (၄၅၈၈) နှစ်။

ကျင့်စဉ်များ - ဓာတ်ကြီးငါးပါးကျင့်စဉ် (မူလဝိဉာဉ် အဆင့် သတ္တမအလွှာ.. ကျွမ်းကျင်မှု ၈၄.၁၁%)... ကောင်းကင်အင်မော်တယ် ခန္ဓာ သန့်စင် ကျင့်စဉ် (ပဉ္စမအလွှာ.. ကျွမ်းကျင်မှု ၇.၈၁%)... သွေးဝေလငါး လမင်းမျို ကျင့်စဉ် (ပဉ္စမအလွှာ.. ကျွမ်းကျင်မှု ၁၀%)...အထက်ဘုံ သန့်စင်သော မူလတာအိုနိယာမ (ပြီးပြည့်စုံခြင်း)... ရွှေပုစဉ်းရင်ကွဲကျင့်စဉ် (ပဉ္စမအလွှာ.. ကျွမ်းကျင်မှု ၀.၀၁%)... ကန်းကျင်း ကောင်းကင်ဓား ကျင့်စဉ် (ပဉ္စမအလွှာ.. ကျွမ်းကျင်မှု ၅.၈၇%)။

မှော်အတတ်များ - သစ်သားနွယ်ပင် မန္တန် (ပြီးပြည့်စုံခြင်း)... ယင်ယန်လွတ်မြောက်ခြင်းနည်းစနစ် (ပြီးပြည့်စုံခြင်း)... ကောင်းကင်ပိုင်းဖြတ် နတ်ဘုရား ကျင့်စဉ် (ပြီးပြည့်စုံခြင်း)... ပုစဉ်းပိုးတုံးလုံး အချိန်တာအို (ပြီးပြည့်စုံခြင်း)... ဟင်းလင်းပြင် ခွဲထွက်ခြင်းနည်းစနစ် (အနည်းငယ်ကျွမ်းကျင်.. ကျွမ်းကျင်မှု ၉၆.၆၄%)... နတ်ဘုရား အသွင်ပြောင်းလဲခြင်း ကျင့်စဉ် (စတုတ္ထအလွှာ.. ကျွမ်းကျင်မှု ၉၈.၁၆%)... မီးဖီးနစ် ကောင်းကင်ကျင့်စဉ် (ကျွမ်းကျင်မှု ၃၃.၄၂%)။

“သက်တမ်းက နောက်ထပ် ငါးရာနီးပါးလောက် တိုးလာခဲ့တာပဲ...”

စုယွီသည် မိမိဘာသာ တိုးတိုးလေး ရေရွတ်လိုက်မိ၏။

ဤတစ်ကြိမ်တွင် စိတ်ဝိညာဉ်စွမ်းအားများ တိုးတက်မြင့်မားလာမှုသည် သူ၏ ကျန်ရှိသော သက်တမ်းကို အဆမတန် မြင့်တက်သွားစေခဲ့ပြီး အားလုံးစုစုပေါင်း လေးထောင်ကျော်အထိပင် ဖြစ်ပေါ်လာစေခဲ့ခြင်း ဖြစ်ပါ၏။

ဤမျှလောက်ဆိုလျှင်မူ.. သူ၏ သက်တမ်းသည် ပကတိ ဟင်းလင်းပြင်အဆင့် တာအိုသခင်ကြီး တစ်ဦးထက်ပင် များစွာ ပိုမိုရှည်လျားနေခဲ့ပြီ ဖြစ်ချေသည်။

အရာအားလုံးကို သေသေချာချာ ပြင်ဆင်ပြီးသွားခဲ့ပြီးနောက်တွင်..

စုယွီ တစ်ယောက် လွန်စွာ စိတ်ကျေနပ်သွားပါသည်။

နောက်တစ်နေ့ နံနက်ခင်းသို့ ရောက်သောအခါတွင်မူ မိမိ၏ ကိုယ်ပွားရုပ်သေးကို ပြန်လည်ရုပ်သိမ်းလျက် လင်းလုံ အဆောင်လက်ဖွဲ့ စံအိမ်ဆီသို့ ပုံမှန်အတိုင်း အလုပ်လုပ်ရန် ထွက်ခွာခဲ့တော့သည်။

သူသည် အလုပ်ဆင်းပြီးသွားခဲ့ပါက အသစ်ရရှိထားသော စိတ်ဝိညာဉ် သိုင်းကွက်သစ်များကို စမ်းသပ်ကြည့်နိုင်ရန်အတွက် ထျန်းလန် မှော်ခန်းမဆောင်ကြီးဆီသို့ သွားရောက်ရန် စိတ်ကူးထားခဲ့ခြင်းပါ။

သို့သော်လည်း.. သူ လင်းလုံ အဆောင်လက်ဖွဲ့ စံအိမ်ဆီသို့ ရောက်ရှိပြီး သိပ်မကြာခင်မှာပင်.. လူရိပ်အချို့သည် ဆိုင်အတွင်းသို့ ရုတ်ချည်း ဝင်ရောက်လာခဲ့ကြလေသည်။ ၎င်းတို့အနက် ရှေ့ဆုံးမှ ဦးဆောင်လာသူကား.. ထူးခြားလှသော အရှိန်အဝါများနှင့် တန်ဖိုးကြီး ဝတ်စုံ ဆင်မြန်းထားသည့် လူငယ်တစ်ဦးပင်။

ထိုလူငယ်သည် ဆိုင်တာဝန်ခံကို ချက်ချင်း ဆင့်ခေါ်လိုက်ပြီးနောက် စုယွီ.. အဆောင်လက်ဖွဲ့ဆရာကြီး ထူနှင့် အဆောင်လက်ဖွဲ့ဆရာကြီး ယွီတို့ကိုပါ တစ်ပါတည်း ခေါ်ခိုင်းလိုက်ပြီးနောက်.. လူအုပ်ကြီးအား အေးစက်စက် မျက်ဝန်းများဖြင့် ကြည့်လျက် မောက်မာစွာ ဆိုလိုက်တော့သည်။

“ငါ့နာမည်က ကုန်းစွန်းဟုန်ရှန်း.. ကုန်းစွန်းဇီယန်ရဲ့ အစ်ကိုကြီးပဲ.. ဒီနေ့ကစပြီး ဒီလင်းလုံ အဆောင်လက်ဖွဲ့ စံအိမ်ကို ငါကိုယ်တိုင် လွှဲပြောင်းထိန်းချုပ်သွားမယ်”

ဆိုင်တာဝန်ခံသည် တစ်စုံတစ်ခုကို ပြောရန် တွန့်ဆုတ်နေခဲ့သော်လည်း.. နောက်ဆုံးတွင်မူ သက်ပြင်းတစ်ချက်ကိုသာ အသာအယာချလိုက်ရင်း ခေါင်းငုံ့လျက် တုံ့ပြန်လိုက်ရလေသည်။

“ဒီလက်အောက်ငယ်သား သခင်လေးရဲ့ အမိန့်ကို နာခံပါ့မယ်...”

ကုန်းစွန်းဟုန်ရှန်း၏ နှုတ်ခမ်းထောင့်များက အနည်းငယ် တွန့်ကွေးသွားခဲ့ပြီး အေးစက်လှသော အပြုံးတစ်ခုနှင့်အတူ ဆိုင်တာဝန်ခံအား တစ်ချက် ကြည့်လိုက်ပြီးနောက်.. သူ၏ အကြည့်များက ဆိုင်တာဝန်ခံ၏ အနောက်တွင် ရပ်နေသော စုယွီထံသို့ ကျရောက်သွားခဲ့ကာ မေးမြန်းလိုက်တော့၏။

“မင်းက.. ဝမ်ယင်း အဆောင်လက်ဖွဲ့စာရွက်တွေကို ဖန်တီးခဲ့တဲ့ အနောက်ကွယ်က အဆောင်လက်ဖွဲ့ဆရာ ဆိုတာလား...”

စုယွီသည် ချက်ချင်းဆိုသလို ထိတ်လန့်တုန်လှုပ်သွားသည့် အမူအရာမျိုးကို ဖော်ပြလိုက်ရင်း ခေါင်းကို ငုံ့လျက် ပြန်လည်ဖြေကြားလိုက်သည်။

“ဟုတ်ပါတယ် သခင်လေး...”

ကုန်းစွန်းဟုန်ရှန်းက နှာခေါင်းတစ်ချက် ရှုံ့လိုက်ရင်းမှ မောက်မာစော်ကားစွာဖြင့် အမိန့်ပေးလိုက်တော့၏။

“ဝမ်ယင်း အဆောင်လက်ဖွဲ့စာရွက်တွေရဲ့ သိုင်းအမွေအနှစ် ကျင့်စဉ်ကို အခုချက်ချင်း ထုတ်ပေးစမ်း...”

စုယွီသည် ခေါင်းကို ဖြည်းဖြည်းချင်း မော့လိုက်ရင်းမှ ဘာမျှ နားမလည်နိုင်သည့် အမူအရာမျိုးဖြင့် ထိုလူငယ်အား ကြည့်လိုက်မိသည်။

'ဘာလဲ...'

သို့သော်လည်း နောက်ထပ် လျှပ်တစ်ပြက်အတွင်းမှာပင်.. ကုန်းစွန်းဟုန်ရှန်း၏ လက်ဝါးချက်တစ်ချက်သည် စုယွီ၏ ပါးပြင်ထံသို့ ဒေါသတကြီးဖြင့် ပြင်းထန်စွာ ဝှေ့ယမ်းရိုက်ခတ်လာခဲ့ပြီး အော်ဟစ်လိုက်တော့၏။

“မင်းက ဘာကို ကြည့်နေတာလဲ.. မကျေနပ်လို့လား...”

“ဝုန်း”

သို့သော်လည်း ကုန်းစွန်းဟုန်ရှန်း၏ လက်ဝါးရိုက်ချက်သည် စုယွီ၏ ခန္ဓာကိုယ်ပေါ်သို့ ကျရောက်သွားခဲ့သည့် ထိုစက္ကန့်ပိုင်းအတွင်း၌ပင်.. ထိုနေရာတွင် ရှိနေသော စုယွီ၏ ပုံရိပ်သည် ရုတ်ချည်းဆိုသလို စက္ကန့်ပိုင်းအတွင်း အဆောင်လက်ဖွဲ့စက္ကူရုပ် တစ်ခုအသွင်သို့ ပြောင်းလဲသွားခဲ့၏။

၎င်းက လွင့်ပျံထွက်သွားခဲ့ကာ.. လေထုအလယ်၌ပင် ပြာအဖြစ်သို့ တောက်လောင်ပျက်စီးလျက် လုံးဝ ပျောက်ကွယ်သွားခဲ့တော့သည်။