အခန်း ၈၆

အခန်း (၈၆) နှစ်သစ်ကူး ဝက်သတ်ပွဲ

ဆရာလျန်က တပ်မှူးချုပ်ကျူးမှာ ခိုယွမ်ရှန်း၏ နေရာကိုရော မွေးရာပါ ဝိညာဉ်စွမ်းအင် လျှို့ဝှက်ချက်ကိုပါ မသိဟု ခန့်မှန်းထားသော်လည်း ၎င်းမှာ သက်သေ အထောက်အထား မရှိသော ခန့်မှန်းချက် တစ်ခုသာ ဖြစ်သည်။ ယခု အခြေအနေကို ကြည့်ရသလောက် ဆရာလျန်၏ ခန့်မှန်းချက်က မှားယွင်းနေပြီး သူ၏ ဆုံးဖြတ်ချက်ကသာ မှန်ကန်နေပုံ ရသည်။

မွေးရာပါ ဝိညာဉ်စွမ်းအင်က ဤနေရာတွင် ရှိနေသရွေ့ သူက မွေးရာပါ ကျောက်စိမ်းတုံးကို အသုံးပြုပြီး ဝိညာဉ်စွမ်းအင်ကို သိမ်းယူကာ တောင်ပေါ်သို့ ပြန်ယူသွားပြီး အဆင့်တက်ရန် ကြိုးစားနိုင်ပေသည်။

''ဒီလိုဆိုရင် အနာဂတ်အတွက် မျှော်လင့်ချက် ရှိလာပြီ တပ်မှူးချုပ်ကျူး က သေချာပေါက် သေရမယ်''

ဝူရှောက်လင် ပေါ်လာသည်နှင့် တစ်ပြိုင်နက် တပ်မှူးချုပ်ကျူး၏ မျက်လုံးများ မှေးကျဉ်းသွားပြီး ဝတ်ရုံ အောက်ရှိ လက်သီးများကို တင်းကျပ်စွာ ဆုပ်ထားလိုက်သည်။ သူက မျက်မှောင်ကြုတ်ကာ သူ ပေါ့ဆသွားလို့ တစ်ဖက်လူ နောက်ယောင်ခံ လိုက်လာတာလား ဆိုသည်ကို တွေးတောလိုက်သည်။

''ငါ့ဘေးက လူတွေကပဲ သစ္စာဖောက်သွားကြတာလား''

သူ ပထမဆုံး စဉ်းစားမိသူမှာ လျိုကျစ် ပင် ဖြစ်သည်။ သူ၏ လှုပ်ရှားမှုများကို ခြေရာခံနိုင်သူမှာ လျိုကျစ် တစ်ယောက်တည်းသာ ရှိပေသည်။

"ခရိုင် တပ်မှူးချုပ် တစ်ယောက်ကို လုပ်ကြံ သတ်ဖြတ်ရင် ဘယ်လို အကျိုးဆက်တွေ ဖြစ်လာမလဲ ဆိုတာကို မင်း သိလား အခု ချက်ချင်း ဆုတ်ခွာသွားမယ် ဆိုရင် အရင်က ဖြစ်ခဲ့တဲ့ ကိစ္စတွေကို ငါ လုံးဝ ခွင့်လွှတ်ပေးမယ်"

တပ်မှူးချုပ်ကျူးက မျက်နှာကို တည်ထားပြီး တစ်ဖက်လူကို ခြိမ်းခြောက်လိုက်သည်။

သို့သော် ဝူရှောက်လင်က အေးစက်စက် ရယ်မောလိုက်ပြီး တစ်ဖက်လူက အနည်းငယ် ကလေးဆန်လွန်းသည်ဟု ခံစားလိုက်ရသည်။ အကယ်၍ သူသာ ဤအရာများကို ကြောက်ရွံ့နေမည် ဆိုပါက ယခင်က ယန်ဂူခရိုင် အတွင်းသို့ ဝင်ရောက်ပြီး ပြဿနာများ ဖန်တီးခဲ့မည် မဟုတ်ပေ။

သေချာသည်မှာ သူ့တွင် အားကိုးစရာ ရှိနေသောကြောင့်ပင်။

"ဟက်"

တပ်မှူးချုပ်ကျူးက အေးစက်စက် နှာမှုတ်လိုက်ပြီး ဝူရှောက်လင်၏ စကားကို ဆက်မစောင့်တော့ဘဲ ချက်ချင်း လှုပ်ရှားလိုက်သည်။ မြေကြီးကို ခြေထောက်ဖြင့် တစ်ချက် နင်းလိုက်ရာ ချိုင့်ခွက်ကြီး တစ်ခု ဖြစ်ပေါ်သွားပြီး သေနတ်ကျည်ဆန် တစ်ခုလို ဝူရှောက်လင်ဆီသို့ တိုက်ရိုက် ပြေးဝင်သွားခဲ့သည်။

သူက စကား တစ်ခွန်းတည်းဖြင့် တစ်ဖက်လူကို ခြောက်လှန့်နိုင်မည်ဟု ထင်မှတ်ထားလောက်အောင် မိုက်မဲသူ တစ်ယောက် မဟုတ်ပေ။ ထိုစကားများက တစ်ဖက်လူ၏ အာရုံကို လွှဲရန် သက်သက်သာ ဖြစ်သည်။ မည်သို့ပင် ဆိုစေကာမူ ယခင် တိုက်ပွဲများ အရ တစ်ဖက်လူ၏ စွမ်းအားက သူ့ထက် အနည်းငယ် သာလွန်နေကြောင်း သက်သေပြနေပြီ ဖြစ်သည်။

ကံမကောင်းစွာဖြင့် သူ၏ ရုတ်တရက် လှုပ်ရှားမှုက ဝူရှောက်လင်ကို လုံးဝ အံ့ဩ မသွားစေခဲ့ပေ။ ဝူရှောက်လင်က ဤအခြေအနေကို ကြိုတင် ခန့်မှန်းထားပြီး ဖြစ်သကဲ့သို့ လုံးဝ မရှောင်တိမ်းဘဲ လက်နှစ်ဖက်ဖြင့် တိုက်ရိုက် ပြန်လည် တွန်းထုတ်လိုက်သည်။

"ဝုန်း"

ပြင်းထန်သော အစိမ်းရောင် အတွင်းအား တစ်ခုက အပြင်သို့ ထွက်ပေါ်လာပြီး မျက်စိဖြင့် မြင်နိုင်သော အရှိန်ဖြင့် တပ်မှူးချုပ်ကျူးဆီသို့ ပြေးဝင်သွားခဲ့သည်။

"ခွဲလိုက်စမ်း"

တပ်မှူးချုပ်ကျူးက လက်မောင်းကို တစ်ချက် လှုပ်ရှားလိုက်ရာ အနီရင့်ရောင် အလင်းတန်း တစ်ခုက လက်မောင်း တစ်ခုလုံးကို ဖုံးလွှမ်းသွားပြီး လက်သီးဖြင့် အားကုန် ထိုးနှက်လိုက်ကာ တစ်ဖက်လူ၏ အတွင်းအားကို တိုက်ရိုက် ရင်ဆိုင်လိုက်သည်။

ပေါက်ကွဲသံ တစ်ခုနှင့်အတူ အတွင်းအား နှစ်ခုစလုံးက ဤနေရာတွင် တစ်ပြိုင်နက်တည်း ပျက်စီးသွားခဲ့သည်။ မျက်စိတစ်မှိတ် အတွင်းမှာပင် တပ်မှူးချုပ်ကျူးက ပျက်စီးသွားသော အတွင်းအားများ ကြားမှ ထွက်ပေါ်လာပြီး ဝူရှောက်လင်ကို လက်သီးဖြင့် ထိုးနှက်လိုက်သည်။

"ဟား"

ဝူရှောက်လင်က အသံကျယ်ကြီးဖြင့် ဟိန်းဟောက်လိုက်ပြီး ခန္ဓာကိုယ် အတွင်းရှိ သွေးချီများ လည်ပတ်လာကာ လက်သီးကို မြှောက်ပြီး ပြန်လည် ထိုးနှက်လိုက်သည်။

"ဘန်း ဘန်း ဘန်း"

စက္ကန့်အနည်းငယ် အတွင်းမှာပင် သူတို့ နှစ်ယောက် တိုက်ခိုက်မှု အကြိမ် ဆယ်ဂဏန်းကျော် ဖြစ်ပွားသွားခဲ့သည်။ တိုက်ခိုက်မှုတိုင်းက အလွန် ပြင်းထန်ပြီး အချင်းချင်း၏ အားနည်းချက် များကို ပစ်မှတ်ထား တိုက်ခိုက်နေကြသည်။ တိုက်ပွဲ၏ ပြင်းထန်မှုက ယခင် အကြိမ်များထက်ပင် ပိုမို ကြီးမားနေပေသည်။ အဘယ်ကြောင့်ဆိုသော် သူတို့က သူစိမ်းများ မဟုတ်တော့ဘဲ ယခင်က တစ်ကြိမ် တိုက်ခိုက်ဖူးပြီး ဖြစ်သောကြောင့်ပင်။

သို့သော် သူတို့ နှစ်ယောက်၏ စွမ်းအားက သိပ်ပြီး ကွာခြားမှု မရှိလှပေ။ အနည်းဆုံးတော့ အချိန်တိုအတွင်း အနိုင်အရှုံး ပေါ်ရန် ခက်ခဲပြီး မည်သူကမှ အသာစီး ရနိုင်မည် မဟုတ်ပေ။

သို့သော် ယနေ့ တပ်မှူးချုပ်ကျူး၏ တိုက်ခိုက်မှုများက ပိုမို ကြမ်းတမ်းနေပြီး တစ်ခါတစ်ရံတွင် မိမိ၏ ဒဏ်ရာကို ဂရုမစိုက်ဘဲ အတင်းအကျပ် ဝင်ရောက် တိုက်ခိုက်နေပေသည်။

သူတို့ နှစ်ယောက်၏ အပေါ်ဝတ်ရုံများက ပြင်းထန်သော အတွင်းအားများကြောင့် လုံးဝ စုတ်ပြဲသွားခဲ့ပြီး အဝေးမှ ကြည့်မည် ဆိုပါက လျင်မြန်စွာ ရွေ့လျားနေသော လူရိပ် နှစ်ခုကိုသာ မြင်တွေ့ရမည် ဖြစ်သည်။ သူတို့၏ ပတ်ပတ်လည် ပေတစ်ရာခန့် အတွင်းက တိုက်ပွဲ နယ်မြေ ဖြစ်နေပေသည်။

မြေကြီးပေါ်တွင် ချိုင့်ခွက်ကြီးများ အဆက်မပြတ် ဖြစ်ပေါ်နေပြီး မြစ်ကမ်းဘေးရှိ သစ်ပင်များကလည်း အတွင်းအားများကြောင့် ကျိုးကျသွားကာ ပတ်ဝန်းကျင် တစ်ခုလုံး အပျက်အစီးများ ဖြစ်နေပေသည်။

ဤသည်မှာ သွေးကြောပွင့် အထွတ်အထိပ် အဆင့် သိုင်းသမား နှစ်ယောက်၏ တိုက်ပွဲ အစစ်အမှန်ပင် ဖြစ်သည်။

သူတို့က မွေးရာပါ အဆင့် အောက်ရှိ အင်အား အကြီးဆုံး သူများ မဟုတ်နိုင်သော်လည်း ဤတိုက်ပွဲကို ဘေးမှ စောင့်ကြည့်နေသော ကျန်းချဲ့၏ အမြင်တွင် သူတို့ နှစ်ယောက်စလုံးက လုံးဝ မလွယ်ကူလှပေ။

အနည်းဆုံးတော့ သူ ယဇ်ပူဇော်ပြီး အဆင့်တက်သွားသည့် အခြေအနေ ထက် လုံးဝ မနိမ့်ကျပေ။ အထူးသဖြင့် ရန်သူနှင့် ရင်ဆိုင်ရာတွင် သူတို့ နှစ်ယောက်၏ တုံ့ပြန်မှု မြန်ဆန်မှုက အလွန် ကြောက်မက်ဖွယ် ကောင်းလှပေသည်။

အကယ်၍ ကြမ္မာသုံးပါး ထိတ်လန့်ဖွယ် ဓားသိုင်းကို အသုံးပြုပြီး ရူးသွပ်သော လူသတ်ငွေ့ အခြေအနေသို့ မရောက်ရှိနိုင်ပါက သူက သွေးကြောပွင့် အထွတ်အထိပ် အဆင့်သို့ ရောက်ရှိနေပြီ ဖြစ်သော်လည်း ဤကဲ့သို့ သေရေးရှင်ရေး တိုက်ပွဲမျိုးတွင် သူတို့က သူ့ထက် အနည်းငယ် သာလွန်နေမည်မှာ သေချာလှပေသည်။

အဘယ်ကြောင့်ဆိုသော် သူတို့က ဆယ်စုနှစ်ပေါင်း များစွာ တိုက်ပွဲ အတွေ့အကြုံများ ရှိထားကြပြီး သွေးထွက်သံယို တိုက်ပွဲပေါင်း များစွာကို ဖြတ်သန်း လာခဲ့သူများ ဖြစ်ကြသည်။ ထို့အပြင် လက်သီးသိုင်း၊ ဓားသိုင်း အစရှိသည့် သိုင်းပညာ မျိုးစုံကိုလည်း ကျွမ်းကျင်စွာ တတ်မြောက်ထားကြသည်။

ကြမ်းတမ်းမှုများ အပြင် ကျန်းချဲ့၏ အမြင်တွင် သူတို့၏ တိုက်ခိုက်မှုများက အလှတရား တစ်ခု လိုပင် ဖြစ်နေပေသည်။

သေချာသည်မှာ ဤသည်က အဆင့်တူ သိုင်းသမား များသာ ခံစားသိရှိနိုင်သော အရာ ဖြစ်ပြီး အကယ်၍ စွမ်းအား အဆင့် မမီပါက သူတို့ နှစ်ယောက်၏ လှုပ်ရှားမှုများကိုပင် သေချာ မြင်နိုင်မည် မဟုတ်ပေ။

အသေအကြေ တိုက်ခိုက်နေကြသည်။

ကျန်းချဲ့က သူတို့ နှစ်ယောက်၏ အဆုံးသတ်ကို အကြမ်းဖျင်း ခန့်မှန်းမိနေပြီ ဖြစ်သည်။

ခဏတာ စောင့်ကြည့်ပြီးနောက် ကျန်းချဲ့က နောက်သို့ ဖြည်းညင်းစွာ ဆုတ်ခွာလိုက်ပြီး အကွာအဝေးကို အတော်လေး ဝေးအောင် ထားလိုက်သည်။ သူက ထွက်သွားခြင်း မဟုတ်ဘဲ ဤမျှ ကောင်းမွန်သော အခွင့်အရေးကို ဘယ်လိုလုပ်ပြီး လက်လွတ်ခံမည်နည်း။

ယခုအချိန်တွင် သူက အနီးကပ် ချဉ်းကပ်၍ မရသေးပေ။ ပေသုံးရာ အတွင်း ဝင်ရောက်သွားပါက သူတို့ နှစ်ယောက်က ချက်ချင်း သတိထားမိသွားမည် ဖြစ်ပြီး သူ့တွင် မျက်စိတစ်မှိတ် အတွင်း ပေရာချီ ရွေ့လျားနိုင်သော စွမ်းရည် မျိုး လုံးဝ မရှိပေ။

သူ၏ ရွေးချယ်မှုမှာ ဤနေရာမှ ရှောင်ကွင်းပြီး အခြား တစ်နေရာမှ တစ်ဆင့် ရေထဲသို့ တိတ်တဆိတ် ဝင်ရောက်ကာ မြစ်ထဲတွင် အေးအေးဆေးဆေး စောင့်ဆိုင်းနေရန် ဖြစ်သည်။ သူတို့ နှစ်ယောက် အနိုင်အရှုံး ပေါ်သွားမှသာ အပြင်ထွက်ပြီး အကျိုးအမြတ်ကို ရယူရန် ဖြစ်သည်။

တိုက်ပွဲက ဆက်လက် ဖြစ်ပွားနေပြီး အရှိန်အဟုန်ကလည်း ပိုမို ပြင်းထန်လာခဲ့သည်။ တပ်မှူးချုပ်ကျူး၏ ဆံပင်များက ဖရိုဖရဲ ဖြစ်နေပြီး လက်မောင်းများက အပြာရောင်နှင့် ခရမ်းရောင်များ ဖြစ်နေကာ ဘယ်ဘက် ပခုံးတွင် ချိုင့်ခွက်ကြီး တစ်ခုပင် ဖြစ်ပေါ်နေပေသည်။

ဝူရှောက်လင်၏ အခြေအနေက အနည်းငယ် ပိုကောင်းသော်လည်း ညာဘက် လက်မောင်းတွင် တစ်ဖက်လူ၏ ထိုးနှက်မှုကို ခံထားရပေသည်။

"ဘန်း"

ပေါက်ကွဲသံ တစ်ခုနှင့်အတူ သူတို့ နှစ်ယောက်စလုံး နောက်သို့ လွင့်စင်သွားကြပြီး နှုတ်ခမ်းထောင့်များမှ သွေးအချို့ စီးကျလာခဲ့သည်။ ဝူရှောက်လင်က နှုတ်ခမ်းမှ သွေးများကို သုတ်လိုက်ပြီး မြေကြီးပေါ်တွင် စိုက်ထားသော ဓားကြီးကို ဆွဲထုတ်လိုက်သည်။

"တပ်မှူးချုပ်ကျူး ဒီနေ့ မင်းရဲ့ အသက်နဲ့ ငါ့ ညီအစ်ကို နှစ်ယောက်ရဲ့ ဝိညာဉ်ကို ယဇ်ပူဇော်ရမယ်"

အသံကျယ်ကြီးဖြင့် ဟိန်းဟောက်ပြီးနောက် ဝူရှောက်လင်က လှုပ်ရှားလိုက်သည်။

လက်ထဲရှိ ဓားကြီးကို လှည့်ပတ်လိုက်ရာ လေပြင်းများ တိုက်ခတ်လာပြီး ဓားပေါ်တွင် အတွင်းအားများ ဖုံးလွှမ်းသွားကာ နတ်ဘုရား တစ်ပါး ဆင်းသက်လာသကဲ့သို့ ဖြစ်နေပေသည်။

ကြောက်မက်ဖွယ် ကောင်းသော အားကြီးကြောင့် တပ်မှူးချုပ်ကျူးက လုံးဝ ပြန်လည် ခုခံ၍ မရတော့ဘဲ ဓားချက်များကို ရှောင်တိမ်းရင်း နောက်သို့ အဆက်မပြတ် ဆုတ်ခွာနေရပေသည်။

ခြေလှမ်းရှစ်လှမ်း သတ်ဖြတ်ခြင်း...

ဝူရှောက်လင်၏ နောက်ဆုံး အစွမ်းကုန် တိုက်ခိုက်မှု ဖြစ်ပြီး တပ်မှူးချုပ်ကျူးကို သတ်ဖြတ်နိုင်လျှင်တောင်မှ သူ ကိုယ်တိုင်လည်း ဒဏ်ရာ အပြင်းအထန် ရရှိမည် ဖြစ်သည်။

ဝူရှောက်လင်၏ အရှိန်အဟုန်များ တစ်ဆင့်ပြီး တစ်ဆင့် မြင့်တက်လာသည်ကို မြင်သောအခါ တပ်မှူးချုပ်ကျူး၏ မျက်နှာက အဆက်မပြတ် ပြောင်းလဲသွားခဲ့သည်။

အကယ်၍ တစ်ဖက်လူကို ဤအတိုင်း ဆက်လက် လှုပ်ရှားခွင့် ပေးထားမည် ဆိုပါက အမြင့်ဆုံး အခြေအနေသို့ ရောက်ရှိသွားချိန်တွင် သူက လုံးဝ ရှောင်တိမ်း၍ မရတော့ဘဲ အတင်းအကျပ် ကာကွယ်ရတော့မည် ဖြစ်သည်။

ထိုသို့ ဆိုလျှင် လုံးဝ ကာကွယ်နိုင်မည် မဟုတ်ပေ။

''သူ့ကို ဟန့်တားမှ ဖြစ်မယ်''

တပ်မှူးချုပ်ကျူးက နောက်သို့ ဆုတ်ခွာရင်း လူတစ်ဖက်စာခန့် ကြီးမားသော သစ်ပင်ကြီး တစ်ပင် အနီးသို့ ရောက်ရှိသွားပြီး လက်တစ်ဖက်ဖြင့် သစ်ပင်ကို ရိုက်ချိုးကာ တစ်ဖက်လူဆီသို့ ပစ်ပေါက်လိုက်သည်။ သို့သော် ဤမျှ ကြီးမားသော သစ်ပင်ကြီးကလည်း ဝူရှောက်လင်၏ လှုပ်ရှားမှုကို လုံးဝ မတားဆီးနိုင်ခဲ့ပေ။

ရေမြှုပ် တစ်ခုလို ချက်ချင်း ပျက်စီးသွားခဲ့သည်။

သို့သော် သူက ထိုအချိန်လေးကို အသုံးချပြီး သူ စီးနင်းလာသော မြင်း အနီးသို့ ရောက်ရှိသွားကာ မြင်း၏ ဘေးတွင် ချိတ်ဆွဲထားသော အိတ်ထဲမှ လှံရှည် နှစ်ပိုင်းကို ဆွဲထုတ်လိုက်ပြီး အလယ်တွင် လှည့်ကာ တင်းကျပ်စွာ ဆက်လိုက်သည်။

ထို့နောက် ဓားသွားများ တောက်ပလာပြီး ထပ်မံ ဝင်ရောက် တိုက်ခိုက်လိုက်သည်။

အေးစက်သော အလင်းတန်း တစ်ခုက အရင်ဆုံး ထွက်ပေါ်လာပြီးနောက် လှံရှည်က နဂါး တစ်ကောင်လို လျင်မြန်စွာ ပြေးဝင်သွားခဲ့သည်။

တပ်မှူးချုပ်ကျူးက လက်သီးနှင့် ခြေထောက် အတတ်ပညာ များကိုသာ ကျွမ်းကျင်သည် မဟုတ်ပေ။ ယခင်က နယ်စပ်တွင် တိုက်ပွဲဝင်ခဲ့စဉ်က သူက အလွန် ရက်စက်ပြီး ထက်မြက်သော လှံသိုင်းကိုလည်း လေ့ကျင့်ထားခဲ့သည်။

ဝူရှောက်လင်၏ ပြင်းထန်သော ဖိအားပေးမှု အောက်တွင် သူ ဆက်လက် သည်းခံ၍ မရတော့ကြောင်း ကောင်းစွာ သဘောပေါက်သွားခဲ့သည်။ မဟုတ်ပါက မွေးရာပါ ဝိညာဉ်စွမ်းအင်ကို သူများ လက်ထဲသို့ ထည့်ပေးလိုက်ရမည် ဖြစ်သည်။

ဤသည်ကို လုံးဝ ခွင့်မလွှတ်နိုင်ပေ။ သူတို့ နှစ်ယောက် ထဲမှ တစ်ယောက်သာ အသက်ရှင် ကျန်ရစ်ရမည်။

"လာစမ်း"

တပ်မှူးချုပ်ကျူးက နောက်မဆုတ်ဘဲ အရှေ့သို့ တိုးဝင်လာသည်ကို မြင်သောအခါ ဝူရှောက်လင်က အလွန် ဝမ်းသာသွားခဲ့သည်။ ယခုအချိန်တွင် သူ၏ ခြေလှမ်းရှစ်လှမ်း သတ်ဖြတ်ခြင်း အားက အလွန် ကြောက်မက်ဖွယ် ကောင်းသော အခြေအနေသို့ ရောက်ရှိနေပြီ ဖြစ်ရာ တစ်ဖက်လူ၏ တုံ့ပြန် တိုက်ခိုက်မှုကို လုံးဝ မကြောက်ရွံ့တော့ပေ။

"ချွင်"

အလွန် ပြင်းထန်သော လှံချက် တစ်ချက်ဖြင့် တပ်မှူးချုပ်ကျူးက တစ်ဖက်လူ၏ အရှိန်အဟုန်ကို ဟန့်တားရန် ကြိုးစားခဲ့သော်လည်း လုံးဝ မအောင်မြင်ခဲ့ပေ။ လှံရှည်က ဘေးသို့ လွင့်စင်သွားပြီး ခွန်အား ချင်း ယှဉ်မည် ဆိုပါက သူက တစ်ဖက်လူကို လုံးဝ မမီပေ။

နောက်ဆုတ်ရင်း တိုက်ခိုက်နေရသည်...

တပ်မှူးချုပ်ကျူးက အဆက်မပြတ် လှုပ်ရှားနေပြီး အကွာအဝေးကို အသုံးပြုကာ အသာစီး ရရန် ကြိုးစားနေသည်။ တစ်ဖက်လူနှင့် အတင်းအကျပ် အားမပြိုင်ဘဲ လှံသိုင်းဖြင့် တစ်ဖက်လူ၏ အားနည်းချက် များကိုသာ လိုက်လံ ရှာဖွေနေပြီး နောက်ဆုံး အဆုံးအဖြတ် ပေးမည့် အချက်ကိုသာ စောင့်ဆိုင်းနေပေသည်။

ဤလောကတွင် ပြီးပြည့်စုံသော ကျင့်စဉ် ဆိုတာ မရှိသလို ပြီးပြည့်စုံသော လူဆိုတာလည်း မရှိပေ။ အားလုံးက လူအပေါ်တွင်သာ မူတည်ပေသည်။

သူတို့ နှစ်ယောက်၏ တိုက်ပွဲက နောက်ထပ် ခုနစ်မိနစ်ခန့် ဆက်လက် ဖြစ်ပွားခဲ့ပြီး သူတို့၏ နေရာများကလည်း အဆက်မပြတ် ပြောင်းလဲနေခဲ့သည်။ သူတို့ ဖြတ်သန်းသွားသော နေရာတိုင်းတွင် ဖြစ်ပေါ်လာသော အပျက်အစီးများက ယခင် လက်သီးနှင့် ခြေထောက် တိုက်ပွဲများထက် အများကြီး ပိုမို ကြီးမားနေပေသည်။

အချိန် အနည်းငယ် ကြာပြီးနောက် သူတို့ နှစ်ယောက်စလုံး အနည်းငယ် အားကုန်လာခဲ့သည်။

ဤမျှ ကြီးမားသော စွမ်းအင် အသုံးပြုမှုက သွေးကြောပွင့် အထွတ်အထိပ် အဆင့် သိုင်းသမား များအတွက်ပင် ခံနိုင်ရည် ရှိရန် အလွန် ခက်ခဲလှပေသည်။ ယခုအခါ သူတို့ နှစ်ယောက်၏ အနိုင်အရှုံးက ပေါ်လွင်နေပြီ ဖြစ်သည်။

တပ်မှူးချုပ်ကျူး၏ လှံသိုင်းက အလွန် ကြမ်းတမ်းသော်လည်း အနည်းငယ် အရေးနိမ့်နေဆဲ ဖြစ်သည်။

ဆုတ်ခွာနေရုံသာ တတ်နိုင်ပြီး ပြန်လည် တိုက်ခိုက်ရန် ခက်ခဲနေပေသည်။

သို့သော် ယခု လက်ရှိ အခြေအနေ အရ အနိုင်အရှုံး ပေါ်သွားလျှင်တောင်မှ အသက် အသေအချာ သတ်ဖြတ်ရန်မှာ အလွန် ခက်ခဲနေဆဲ ဖြစ်သည်။ ထို့ကြောင့် ဝူရှောက်လင်က အားနည်းချက် တစ်ခုကို တမင်တကာ ဖန်တီးပေးလိုက်ရသည်။

"ရွှပ်"

တပ်မှူးချုပ်ကျူးက အဆက်မပြတ် တိုက်ခိုက်နေရင်း အကျင့် တစ်ခု ဖြစ်သွားပြီး တစ်ဖက်လူ၏ ထောင်ချောက်ထဲသို့ ကျဆင်းသွားခဲ့သည်။ လှံ တစ်ချက်က ဝူရှောက်လင်၏ ပခုံးကို ထိုးဖောက် ဝင်ရောက်သွားသော်လည်း ဝူရှောက်လင်က သူ့ကိုယ်ပေါ်ရှိ သွေးထွက်နေသော အပေါက်ကို လုံးဝ ဂရုမစိုက်ပေ။

လက်တစ်ဖက်က တပ်မှူးချုပ်ကျူး၏ လှံရိုးကို တင်းကျပ်စွာ ဆုပ်ကိုင်ထားပြီး ကျန်လက်တစ်ဖက်က အားယူကာ တပ်မှူးချုပ်ကျူး၏ ခေါင်းဆီသို့ ရိုက်ချလိုက်သည်။

"ဒုက္ခပဲ"

အမှန်တကယ်တော့ လှံကို ထိုးလိုက်သည်နှင့် တစ်ပြိုင်နက် တပ်မှူးချုပ်ကျူး၏ ရင်ထဲတွင် အနည်းငယ် မကောင်းသော ခံစားမှု တစ်ခု ဖြစ်ပေါ်လာခဲ့သည်။ အထူးသဖြင့် တစ်ဖက်လူက လှံရိုးကို အတင်း ဆုပ်ကိုင်လိုက်ချိန်တွင် သူ အလွန် ထိတ်လန့်သွားပြီး လှံရှည်ကို ချက်ချင်း လွှတ်ချလိုက်ရန် ပြင်လိုက်သည်။

သို့သော် ဝူရှောက်လင်က ဒဏ်ရာ အပြင်းအထန် အထိခံပြီး ဖန်တီးပေးခဲ့သော အခွင့်အရေးကို ဘယ်လိုလုပ်ပြီး အလွယ်တကူ လက်လွတ်ခံမည်နည်း။

တပ်မှူးချုပ်ကျူး၏ အတွေးများက မြန်ဆန်သော်လည်း ခန္ဓာကိုယ်၏ တုံ့ပြန်မှုက နောက်ကျနေခဲ့သည်။ ဝူရှောက်လင်၏ ဓားချက်ကို အတင်းအကျပ် ခံလိုက်ရပြီး ဓားကျောဖြင့် အရိုက်ခံရခြင်း ဖြစ်သော်လည်း ထိုကြီးမားသော အားကြီးကြောင့် သူ၏ ခန္ဓာကိုယ်က ပေအတော်များများ အထိ လွင့်စင်သွားခဲ့သည်။

နောက်သို့ လွင့်စင်နေစဉ် အတွင်း တပ်မှူးချုပ်ကျူး၏ ရင်ဘတ်က ချိုင့်ဝင်သွားသည်ကို ရှင်းလင်းစွာ မြင်တွေ့နိုင်ပြီး အနည်းဆုံး နံရိုး အများအပြား ကျိုးသွားပြီ ဖြစ်ကြောင်း သေချာလှပေသည်။

"ဝေါ့"

တပ်မှူးချုပ်ကျူးက ရင်ဘတ်ကို ဖိကာ ပါးစပ်မှ သွေးများ ပန်းထုတ်လိုက်ပြီး သူ၏ မျက်လုံးများထဲတွင် မကျေနပ်မှုများ ပြည့်နှက်နေပေသည်။

ဝူရှောက်လင်က သေမင်းကို မကြောက်သော မိစ္ဆာ တစ်ကောင်လို လှံရှည်ကို ဆွဲထုတ်ကာ နောက်သို့ လွှင့်ပစ်လိုက်ပြီး ဓားကြီးကို လက်နှစ်ဖက်ဖြင့် ကိုင်ကာ တောင်ကြီး တစ်လုံး ပြိုကျလာသကဲ့သို့ အပေါ်မှနေ၍ အားကုန် ရိုက်ချလိုက်သည်။

"ဘန်း"

ဓား တစ်ချက် အကျတွင် မြေကြီးပေါ်၌ ပေအတော်များများ ရှည်လျားပြီး သုံးလက်မခန့် နက်သော ဓားရာကြီး တစ်ခု ဖြစ်ပေါ်သွားခဲ့သည်။

တပ်မှူးချုပ်ကျူးကမူ ခန္ဓာကိုယ်ကို အတင်း ရွှေ့လိုက်သဖြင့် ထိုတိုက်ခိုက်မှုမှ သီသီလေး လွတ်မြောက်သွားခဲ့သည်။

ဟူး... ဟူး... ဟူး...

ဓားကြီးက အလွန် လေးလံသော်လည်း ဝူရှောက်လင်၏ လက်ထဲတွင်မူ အလွန် ပေါ့ပါး လျင်မြန်နေပြီး မျက်စိတစ်မှိတ် အတွင်းမှာပင် နောက်ထပ် ဓားတစ်ချက်ကို ထပ်မံ ရိုက်ချနိုင်ခဲ့သည်။ တပ်မှူးချုပ်ကျူးက မြေကြီးပေါ်တွင် အဆက်မပြတ် လိမ့်ကာ ရှောင်တိမ်းနေရပေသည်။

သို့သော် ထိုသို့ ရှောင်တိမ်းနေခြင်းက အချိန်အကြာကြီး မခံနိုင်ကြောင်း လူတိုင်း သိရှိထားကြသည်။

ဤသည်က တပ်မှူးချုပ်ကျူး၏ နောက်ဆုံး အသက်ရှူသံ လေးဖြင့် တောင့်ခံနေခြင်းသာ ဖြစ်သည်။

"ဘန်း"

တပ်မှူးချုပ်ကျူး ကိုယ်တိုင်လည်း ဤအချက်ကို ကောင်းစွာ သဘောပေါက်နေသဖြင့် နောက်ဆုံးတွင် အခွင့်အရေး တစ်ခုကို ရယူကာ ခြေထောက် နှစ်ဖက်ဖြင့် ကျဆင်းလာသော ဓားကြီးကို ခဏတာ ညှပ်ထားလိုက်ပြီး လက်တစ်ဖက်ဖြင့် မြေကြီးကို ပြင်းပြင်း တစ်ချက် ရိုက်ချလိုက်သည်။

တစ်ကိုယ်လုံးက လေထဲသို့ မြောက်တက်သွားပြီး ခြေထောက်ဖြင့် သုံးချက် ဆက်တိုက် ကန်လိုက်သော်လည်း လုံးဝ အသုံးမဝင်ခဲ့ပေ။ ဝူရှောက်လင်က အားလုံးကို ကာကွယ်လိုက်ပြီး တပ်မှူးချုပ်ကျူး၏ ခြေဖဝါးကို လက်သီးဖြင့် ပြန်လည် ထိုးနှက်လိုက်သည်။

"ခွပ်"

တပ်မှူးချုပ်ကျူး၏ ဘယ်ဘက် ခြေထောက်က ချက်ချင်း ကျိုးသွားပြီး မြေကြီးပေါ်သို့ ပြင်းထန်စွာ ကျရောက်သွားခဲ့သည်။

"အဟွတ် အဟွတ်"

တပ်မှူးချုပ်ကျူးက ချောင်းအနည်းငယ် ဆိုးလိုက်ပြီး ဝူရှောက်လင်ကို တစ်ချက် စိုက်ကြည့်ကာ အသက်ရှင်ချင်သော ဆန္ဒ ပြင်းပြမှုကြောင့် ခန္ဓာကိုယ် အတွင်းမှ စွမ်းအား တစ်ခု ထပ်မံ ထွက်ပေါ်လာပြီး ပြန်လည် ထရပ်ကာ ဘာစကားမှ မပြောတော့ဘဲ ယွီဟယ်မြစ် အတွင်းသို့ ခုန်ချပြီး ထွက်ပြေးရန် ပြင်လိုက်သည်။

"ထွက်ပြေးချင်တာလား အိပ်မက်သာ မက်နေလိုက်"

ဝူရှောက်လင်က အေးစက်စက် နှာမှုတ်လိုက်ပြီး လေထဲသို့ ခုန်တက်ကာ ဓားကြီးကို လက်နှစ်ဖက်ဖြင့် ကိုင်ပြီး အားကုန် ရိုက်ချလိုက်သည်။

"ဘန်း"

သို့သော် ထိုအချိန်မှာပင် လှိုင်းတံပိုးများ ထနေသော ယွီဟယ်မြစ် အတွင်းမှ လူရိပ် တစ်ခုက ရေထဲမှ ခုန်ထွက်လာပြီး တူရွင်း နှစ်ချောင်းက သူတို့ နှစ်ယောက်ဆီသို့ လျင်မြန်စွာ ပြေးဝင်လာခဲ့သည်။

ဤသည်ကမှ တကယ့်ကို မထင်မှတ်ထားသော ချုံခိုတိုက်ခိုက်မှု အစစ်အမှန် ဖြစ်သည်။

တပ်မှူးချုပ်ကျူးရော ဝူရှောက်လင်ပါ လုံးဝ ထင်မှတ်မထားခဲ့ကြသလို အနည်းငယ်မျှပင် ကြိုတင် သတိမထားမိခဲ့ကြပေ။ ကျန်းချဲ့ အသုံးချလိုက်သော အခွင့်အရေးက တကယ်ကို ပြီးပြည့်စုံလှပေသည်။

ဤသည်က သူ ယွီရှောက်ဖုန်းကို သတ်ဖြတ်ပြီး ရရှိလာသော လက်နက်များ ဖြစ်သည်။ တူရွင်း တစ်ချောင်းက တပ်မှူးချုပ်ကျူး၏ ကျောကုန်းကို ပြင်းထန်စွာ ထိမှန်သွားပြီး မြေကြီးပေါ်သို့ ထပ်မံ လဲကျသွားစေကာ လုံးဝ ပြန်မထနိုင်တော့ပေ။

နောက်ထပ် တူရွင်း တစ်ချောင်းကမူ ဝူရှောက်လင်၏ ခေါင်းဆီသို့ တိုက်ရိုက် ပြေးဝင်သွားခဲ့သည်။

"ဘန်း"

ထိုတူရွင်းက လေထဲတွင် ရှိနေချိန် ဖြစ်သဖြင့် လုံးဝ ရှောင်တိမ်း၍ မရဘဲ ကာကွယ်ရန်သာ တတ်နိုင်ပေသည်။ ဝူရှောက်လင်က လက်မြှောက်ကာ ကာကွယ်လိုက်သော်လည်း ကြီးမားသော အားကြီးကြောင့် သူ၏ ခန္ဓာကိုယ်က ယိမ်းယိုင်သွားပြီး ခြေလှမ်း မတည်မငြိမ်ဖြင့် မြေကြီးပေါ်သို့ လဲကျသွားခဲ့သည်။

ဘယ်ဘက် လက်မောင်းက အဆက်မပြတ် တုန်ယင်နေပြီး မြေကြီးပေါ်ရှိ တူရွင်းကို ကြည့်ကာ ဝူရှောက်လင်၏ မျက်လုံးများက ချက်ချင်း နီရဲသွားခဲ့သည်။ ဤသည်မှာ သူ၏ ညီလေး နှစ် အသုံးပြုသော တူရွင်း ဖြစ်ကြောင်း သူ ချက်ချင်း မှတ်မိလိုက်သည်။

''ညီလေး နှစ် သေသွားပြီ ဆိုတာ သေချာသွားပြီပဲ''

အမည်းရောင် မိစ္ဆာစွမ်းအင်များက ခန္ဓာကိုယ် ပတ်ပတ်လည်တွင် လွှမ်းခြုံနေပြီး တူရွင်း နှစ်ချောင်းကို ပစ်ပေါက်လိုက်သည်နှင့် တစ်ပြိုင်နက် ကျန်းချဲ့က ဝူရှောက်လင်ကို ပြန်လည် တုံ့ပြန်ခွင့် လုံးဝ မပေးဘဲ လက်မြှောက်ကာ လက်ဝါး တစ်ချက်ဖြင့် တိုက်ခိုက်လိုက်သည်။

အမည်းရောင် မိစ္ဆာစွမ်းအင်များက နဂါး တစ်ကောင်လို လျင်မြန်စွာ ပြေးဝင်သွားခဲ့သည်။

ဝူရှောက်လင်က ဓားကြီးကို အရှေ့တွင် ကာထားပြီး ကာကွယ်ရန်သာ တတ်နိုင်တော့သည်။

"ဝုန်း"

"ဝုန်း"

အခွင့်အရေး ရတုန်း အပြတ်ရှင်းရန် ကျန်းချဲ့က ယခုအချိန်တွင် ဝူရှောက်လင် တစ်ယောက်တည်းကိုသာ ပစ်မှတ်ထားနေပေသည်။ သူ့ကို သတ်ဖြတ်နိုင်ပါက ယနေ့ ကိစ္စက အောင်မြင်စွာ ပြီးဆုံးသွားပြီ ဖြစ်သည်။

ဝူရှောက်လင်က ကျန်းချဲ့ကို သတ်ဖြတ်ပြီး သူ၏ ညီလေး နှစ်ယောက် အတွက် ကလဲ့စားချေ လိုသော်လည်း တစ်ဖက်လူ ပြသလိုက်သော စွမ်းအားများက သူ့ကို အလွန် အံ့ဩ ထိတ်လန့်သွားစေခဲ့သည်။ ယခင်က သူ အကောင်းဆုံး အခြေအနေတွင် ရှိနေစဉ်က စွမ်းအားနှင့် လုံးဝ ကွာခြားမှု မရှိပေ။

ဆက်လက် တိုက်ခိုက်နေမည် ဆိုပါက သေလမ်းသာ ရှိပေမည်။

''ဒါက ချုံခိုတိုက်ခိုက်မှုပဲ''

ဤအချက်ကို သဘောပေါက်သွားသောအခါ ဝူရှောက်လင်က ဤနေရာမှ ထွက်ပြေးရန် ပြင်လိုက်သည်။ သို့သော် ကျန်းချဲ့၏ အဆက်မပြတ် တိုက်ခိုက်မှုများကြောင့် သူ လုံးဝ ဆုတ်ခွာ၍ မရတော့ဘဲ ဓားအလင်းတန်း များက လေထဲတွင် ဖြတ်ပြေးနေပြီး ဝူရှောက်လင်ကို နောက်သို့ အဆက်မပြတ် ဆုတ်ခွာစေခဲ့သည်။

နှုတ်ခမ်းထောင့်မှ ထွက်ကျလာသော သွေးများကလည်း ပိုမို များပြားလာခဲ့သည်။

ဝူရှောက်လင် သေဆုံးရန်မှာ အချိန် ပြဿနာ တစ်ခုသာ ဖြစ်ကြောင်း ကောင်းစွာ သိရှိနိုင်ပေသည်။

"အား"

ဝူရှောက်လင်က အသံကျယ်ကြီးဖြင့် ဟိန်းဟောက်လိုက်ပြီး ခန္ဓာကိုယ် အတွင်းတွင် စုဆောင်းထားသော မိစ္ဆာစွမ်းအင်များကို စတင် မီးရှို့လိုက်ရာ လူသား မဆန်သော စွမ်းအား တစ်ခု ရုတ်တရက် ထွက်ပေါ်လာပြီး အချိန်တိုအတွင်း ကျန်းချဲ့၏ တိုက်ခိုက်မှုများကို ကာကွယ်နိုင်ခဲ့သည်။

သို့သော် သူတို့ နှစ်ယောက်စလုံး သိထားသည်မှာ ဤသည်က နောက်ဆုံး အကြိမ် ပြန်လည် ခုခံခြင်းသာ ဖြစ်ကြောင်းပင်။