အခန်း ၁၀၃

အခန်း (၁၀၃) ကျန်းချဲ့ လေလွင့်နေတာ ကြာပြီ

ယခုအချိန်တွင် ဂိုပုရန်၏ မျက်လုံးများထဲ၌ ကျန်းချဲ့အပေါ် ကြောက်ရွံ့မှုများ လုံးဝ ပျောက်ကွယ်သွားပြီး သူတို့ နှစ်ယောက် တန်းတူ ဆက်ဆံနေသကဲ့သို့ ဖြစ်နေပေသည်။ သို့သော် ဤသည်မှာ သူ သေရန် ဆုံးဖြတ်ထားသောကြောင့်သာ ဖြစ်သည်။

ကျန်းချဲ့က အနည်းငယ် ခြိမ်းခြောက်လိုက်ရုံဖြင့် သူ့ကို ချက်ချင်း ပြန်လည် အောက်ကျို့သွားစေနိုင်ပေသည်။

သို့သော် ကျန်းချဲ့က သူ့ကို နောက်ဆုံး ဂုဏ်သိက္ခာကိုတော့ ချန်ထားပေးခဲ့သည်။

သူ ပြောသည်မှာ မှန်ကန်ပေသည်။ ကျန်းချဲ့က ယန်ရှန်းကို တကယ်ပင် ရင်ဆိုင်နိုင်ပြီး သူ ကိုယ်တိုင်တောင် ဝင်ပါစရာ မလိုပေ။ သို့သော် ပြဿနာက ယန်ရှန်းသည် အဆင့်ရှစ် ဒုတိယခရိုင်ဝန်၊ အစိုးရ အရာရှိ တစ်ယောက် ဖြစ်နေခြင်းပင် ဖြစ်သည်။

ရာထူးမှ ဖြုတ်ချ၍ ရသော်လည်း သတ်ဖြတ်ပါက ပြဿနာများ ဖြစ်ပေါ်လာနိုင်ပေသည်။

သူ၏ မိသားစုကို အရေးယူမည် ဆိုပါက ပို၍ပင် ကြီးမားသော ဂယက်များ ဖြစ်ပေါ်လာနိုင်ပေသည်။

ဤအချိန်တွင် ကျန်းချဲ့က သူ၏ မိသားစု တစ်ခုလုံးကို ဖျက်ဆီးပစ်ချင်ပါက အပြစ်ခံမည့်သူ တစ်ယောက် လိုအပ်ပေသည်။

ဂိုပုရန် ကလည်း ကျန်းချဲ့၏ ရည်ရွယ်ချက်ကို ရိပ်မိသဖြင့် ဤကဲ့သို့သော အကြံပြုချက်ကို ပြောဆိုခဲ့ခြင်း ဖြစ်သည်။

မည်သို့ပင်ဖြစ်စေ သူ သေရမည်မှာ သေချာနေပြီး သူ၏ သေဆုံးမှုက မိခင်အိုကြီး၏ အသက်ကို ကယ်တင်နိုင်မည် ဆိုပါက ကျန်းချဲ့ လက်ထဲရှိ ဓားတစ်လက် ဖြစ်ရန် သူ ဝန်မလေးပေ။

ကျန်းချဲ့က ခန္ဓာကိုယ်ကို အနောက်သို့ အနည်းငယ် မှီလိုက်ပြီး ပြုံးလိုက်သည်။

"ငါက စိတ်ထားနူးညံ့တယ် ဆိုတာ မင်း သိပါတယ် သားအမိ သံယောဇဉ် ကြီးမားတဲ့ ပြဇာတ်မျိုးကို ငါ မကြည့်ရက်ဆုံးပဲ မင်းမှာ ဒီလို အတွေး ရှိနေမှတော့ ငါ မင်းကို အခွင့်အရေး ပေးမယ်"

"ကျေးဇူးတင်ပါတယ်"

ဂိုပုရန်က ကျန်းချဲ့ကို စိုက်ကြည့်ကာ ကျေးဇူးတင်သည့် အမူအရာဖြင့် ပြောလိုက်ပြီး တင်းကျပ်နေသော စိတ်နှလုံးများလည်း အနည်းငယ် လျော့ကျသွားခဲ့သည်။

ယခုအခါ သူ့တွင် ဘာမှ မရှိတော့ဘဲ ကျောက်မင်ချန် နှင့် ကျန်းချဲ့တို့ အကျိုးအမြတ် သဘောတူညီမှု ရရှိသွားပြီးနောက် တစ်ခုတည်းသော နောက်ခံကလည်း လုံးဝ အသုံးမဝင်တော့ပေ။ အမှန်တကယ်တော့ သူက ကျန်းချဲ့ နှင့် ဤနေရာတွင် လာရောက် အပေးအယူ လုပ်ရန် အရည်အချင်း လုံးဝ မရှိပေ။

အကယ်၍ ကျန်းချဲ့က သူ့ကို ဂရုမစိုက်ပါက သူ ဘာမှ လုပ်နိုင်မည် မဟုတ်ပေ။

"ဒီကျေးဇူးတင်စကားကို ငါ လက်ခံတယ် သွားတော့"

ကျန်းချဲ့က လက်ဝှေ့ယမ်းလိုက်သည်။

ဂိုပုရန်က သူ့ကို ခါးညွှတ် အရိုအသေပေးကာ လက်ဝါးချင်းယှက် နှုတ်ဆက်လိုက်ပြီး အနောက်မြို့နယ် တပ်စခန်းမှ ပြတ်ပြတ်သားသား ထွက်ခွာသွားတော့သည်။ သူ၏ ကျောပြင်က ဝမ်းနည်းစရာ ကောင်းနေပြီး ခြေလှမ်းများက ပြတ်သားနေပေသည်။

ထိုညတွင်။

မူလ ယန်ဂူခရိုင် တောင်မြို့နယ် တပ်မှူး ဂိုပုရန်က ဒုတိယခရိုင်ဝန် ယန်ရှန်း၏ မိသားစု တစ်ခုလုံးကို သတ်ဖြတ်ခဲ့ပြီး အိုမင်းမစွမ်းသူများနှင့် ကလေးငယ်များကိုပါ တစ်ယောက်မကျန် သတ်ဖြတ်ခဲ့ကာ အိမ်ကို မီးရှို့ပြီး ခြံဝင်း တစ်ခုလုံးကို ပြာအဖြစ် ပြောင်းလဲပစ်ခဲ့သည်။ သူ ကိုယ်တိုင်လည်း မီးလောင်မှု အတွင်း၌ သေဆုံးသွားခဲ့သည်။

သူ မသေဆုံးမီ လူအချို့က ဒေါသတကြီး အော်ဟစ်သံကို ကြားခဲ့ရသည်။

"ယန်ရှန်း မင်းက လူတွေရဲ့ အသက်ကို မြက်ပင်လို သဘောထားပြီး အပြစ်တွေ အရမ်း ကြီးမားလွန်းတယ် ဒီနေ့ ဂိုပုရန် က ကောင်းကင်ကိုယ်စား တရားမျှတမှုကို ဖော်ဆောင်ပြီး မင်း မိသားစု တစ်ခုလုံးကို သတ်ပစ်မယ်"

ယန်ရှန်း သေဆုံးမှုက ယန်ဂူခရိုင် အတွင်း၌ ကြီးမားသော ဂယက် တစ်ခုကို ဖြစ်ပေါ်စေခဲ့သည်။ မည်သို့ပင်ဆိုစေ ရာထူးအဆင့်အတန်း အရ တွက်ချက်မည် ဆိုပါက သူ၏ အာဏာက ခရိုင်ဝန် နှင့် ခရိုင်တပ်မှူးချုပ် တို့၏ အောက်တွင်သာ ရှိပြီး အထူးသဖြင့် သတ်ဖြတ်သူမှာလည်း အရာရှိ တစ်ယောက် ဖြစ်သော ဂိုပုရန် ပင် ဖြစ်ပေသည်။

လူအများအပြားက ပြောဆို ဆွေးနွေးနေကြပြီး အဆက်မပြတ် ခန့်မှန်းနေကြပေသည်။

သို့သော် ကျန်းချဲ့ ကို သံသယဝင်သူ အနည်းငယ်သာ ရှိပေသည်။

အဘယ်ကြောင့်ဆိုသော် လူအများစုက ကျန်းချဲ့ နှင့် ဂိုပုရန် တို့ကြားရှိ သွေးကြွေးများကို သိရှိထားကြပြီး ရေနှင့် မီး ကဲ့သို့ ဖြစ်နေကာ ပူးပေါင်း ကြံစည်ရန် မဖြစ်နိုင်ကြောင်း သိထားကြသောကြောင့်ပင်။ ထို့ကြောင့် ဤသည်မှာ သူ စေခိုင်းခြင်း ဖြစ်နိုင်မည် မဟုတ်ပေ။

ထို့အပြင် ယခုအခါ ကျန်းချဲ့က နေလိုလလို တောက်ပနေပြီး အာဏာ အထွတ်အထိပ်သို့ ရောက်ရှိနေချိန် ဖြစ်ရာ မည်သူကမျှ သူ့အပေါ် အပြစ်ပုံချရန် သတ္တိ မရှိကြပေ။

ကျန်းချဲ့က ခရိုင်ဝန်ကိုပင် မျက်နှာသာ လုံးဝ မပေးရာ သူတို့က ဘာကောင်တွေမို့လို့လဲ။

အမှန်တရားကို အနည်းငယ် ရိပ်မိသူမှာ ခရိုင်ဝန် ကျောက်မင်ချန် သာ ဖြစ်ပေသည်။

မည်သို့ပင်ဆိုစေ ယခင်က ကျန်းချဲ့က ယန်ရှန်း နှင့် ဂိုပုရန် တို့ကို နှိမ်နင်းမည်ဟု သူ့ကို ပြောခဲ့သော်လည်း သူ မလှုပ်ရှားရသေးမီမှာပင် သူတို့ နှစ်ယောက်က အချင်းချင်း သတ်ဖြတ်ကာ သေဆုံးသွားကြသဖြင့် မည်သူက သံသယ မဝင်ဘဲ နေမည်နည်း။

သို့သော် သူ သေချာ စဉ်းစားပြီးနောက် ဘာမှ မသိသကဲ့သို့သာ ဟန်ဆောင်နေရန် ဆုံးဖြတ်လိုက်သည်။

ကျန်းချဲ့ ကိုယ်တိုင် လှုပ်ရှားခဲ့မှတော့ သူက နောက်ဆက်တွဲ ပြဿနာများကို ရှင်းလင်းပေးရုံသာ ရှိတော့သည်။

ထို့ကြောင့် မူလက မြို့တော်ရုံးချုပ်ကို အံ့ဩသွားစေနိုင်ပြီး ကြီးမားသော ဂယက် တစ်ခုကို ဖြစ်ပေါ်စေနိုင်သည့် အမှုကြီးကို သူ၏ မှတ်တမ်း ပြုစုမှုများဖြင့် တတ်နိုင်သမျှ သေးငယ်သွားအောင် ဖိနှိပ်ထားလိုက်သည်။

နစ်နာသူပင် မရှိတော့ရာ မည်သူက အားယားပြီး တရားမျှတမှု သွားရောက် တောင်းဆိုမည်နည်း။

ဤကိစ္စ ယန်ဂူခရိုင် အတွင်း၌ ပျံ့နှံ့နေချိန်တွင် ကျန်းချဲ့ကမူ ငွေကျပ် သောင်းဂဏန်းကို ယူဆောင်ကာ ဖုန်းတပ်ဖွဲ့သို့ ရောက်ရှိနေပြီး ချီဟွမ် ကို တွေ့ဆုံ၍ ကတိပေးထားသော ငွေများကို ပေးအပ်ရန် ပြင်ဆင်နေပေသည်။

ဂိုပုရန် နှင့် ယန်ရှန်း တို့က ယခု လက်ရှိ သူ့အတွက် သေးငယ်သော အနှောင့်အယှက်လေး တစ်ခုသာ ဖြစ်ပေသည်။

သူက ရှေ့သို့ ဆက်လက် လျှောက်လှမ်းရမည် ဖြစ်ပြီး ချီမိသားစုနှင့် ပိုမို ရင်းနှီးအောင် ပေါင်းသင်းရမည် ဖြစ်သည်။

"ငါက မင်းဆီ လူလွှတ်ပြီး ခေါ်မလို့ ပြင်နေတာ မင်းက ကိုယ့်ဘာသာ ရောက်လာလိမ့်မယ်လို့ မထင်ထားဘူး"

ချီဟွမ်က သတင်းရရှိပြီးနောက် ဖုန်းတပ်ဖွဲ့ တံခါးဝသို့ ကိုယ်တိုင် လာရောက် ကြိုဆိုကာ လေးစားမှု အပြည့်အဝ ပေးလိုက်သည်။

ကျန်းချဲ့ကို မြင်သည်နှင့် အလွန် ရင်းနှီးသောဟန် ပြသလိုက်သည်။

သေချာသည်မှာ ဤအထဲတွင် ငွေများ၏ အကျိုးသက်ရောက်မှု အများအပြား ပါဝင်သော်လည်း သူက တကယ်ပင် ကျန်းချဲ့၏ တိုးတက်မှုကို အထင်ကြီးသောကြောင့် ဖြစ်သည်။ မဟုတ်ပါက ကျန်းချဲ့ကို ဖခင်ဖြစ်သူနှင့် မိတ်ဆက်ပေးပြီး လမ်းခင်းပေးမည် မဟုတ်ပေ။

သူ၏ ဖခင်က ငွေမက်သူ တစ်ယောက် မဟုတ်ဘဲ သူ၏ မျက်စိထဲ မဝင်သော သူကို သူ ကိုယ်တိုင် မိတ်ဆက်ပေးလျှင်တောင်မှ ဖခင်ဖြစ်သူနှင့် တွေ့ခွင့်ရမည် မဟုတ်ပေ။

"ဒီပစ္စည်းတွေက ကိုင်ထားရတာ ပူတယ်လေ အစ်ကိုချီ လက်ထဲ အမြန်ဆုံး ထည့်ပေးရမှာပေါ့"

ကျန်းချဲ့က ပြုံးလျက် ပြောလိုက်သည်။

"ဟားဟားဟား ပူတယ် ဆိုရင်တော့ ငါ့အတွက် အတော်ပဲပေါ့"

ချီဟွမ်က ရယ်မောလိုက်ပြီး ကျန်းချဲ့ကို စစ်တဲ အတွင်းသို့ ဖိတ်ခေါ်ကာ စကားပြောဆိုလိုက်သည်။ အနည်းငယ် စကားပြောပြီးနောက် ကျန်းချဲ့က လွန်ခဲ့သော ရက်အနည်းငယ်က ဖြစ်ပျက်ခဲ့သော ကိစ္စရပ်များကို အကျဉ်းချုံး၍ ပြောပြလိုက်သည်။ ထိုအထဲတွင် ဝေါ့ဟူတောင် ဓားပြများကို နှိမ်နင်းခဲ့ခြင်း နှင့် ခရိုင်ရုံးတော်တွင် ပြဿနာ ရှာခဲ့ခြင်း များလည်း ပါဝင်ပေသည်။

"ဝေါ့ဟူတောင် ဓားပြတွေက ဆယ်နှစ်ကျော် နေရာယူထားတာ အစိုးရက အကြိမ်ကြိမ် နှိမ်နင်းပေမဲ့ မအောင်မြင်ခဲ့ဘူး နောက်ဆုံးတော့ မင်းလက်ထဲမှာ သေသွားလိမ့်မယ်လို့ ထင်မထားခဲ့ဘူး"

ချီဟွမ်က မနေနိုင်ဘဲ သက်ပြင်းချလိုက်မိသည်။

ဖုန်းတပ်ဖွဲ့၏ တပ်မှူး အနေဖြင့် သူ၏ တာဝန်မှာ ယန်ဂူခရိုင် နှင့် ချင်းကျန်းခရိုင် တို့၏ လုံခြုံရေးကို ကာကွယ်ရန် ဖြစ်ရာ ဝေါ့ဟူတောင် ၏ အခြေအနေ အချို့ကို သဘာဝကျကျပင် သိရှိထားပြီး သွေးကြောပွင့် အဆင့် ဂိုဏ်းချုပ် သုံးယောက် ရှိကြောင်း သိထားပေသည်။

ထို့အပြင် မြင်းစီးတပ်သား ဒါဇင်ပေါင်းများစွာကိုပါ အရန် အဖြစ် ထားရှိထားရာ သာမန် လူများ လုံးဝ ရင်ဆိုင်နိုင်မည် မဟုတ်ပေ။

"ကျွန်တော် လည်း ကံကောင်းလို့ အချောင်ရလိုက်တာပါ ဝေါ့ဟူတောင်က ဂိုဏ်းချုပ်တွေက ရတနာ လုဖို့ အတွက် တစ်ယောက်ပြီး တစ်ယောက် တောင်အောက် ဆင်းလာကြပြီး နောက်ပိုင်းတော့ ယန်ဂူခရိုင် ထဲမှာပဲ သေသွားကြတာလေ သိုင်းသမားတွေ အကုန် ပျောက်ကွယ်သွားတော့ ကျန်တဲ့ ကိစ္စတွေက လုပ်ရတာ လွယ်သွားတာပေါ့"

"ဟို ကျောက်မင်ချန် က ဘယ်လို ဖြစ်တာလဲ သူက ဘာဖြစ်လို့ အကြိမ်ကြိမ် တားဆီးနေတာလဲ သူက ဝေါ့ဟူတောင် နဲ့ ပူးပေါင်း ကြံစည်ထားလို့များလား"

ချီဟွမ်က မိသားစု ကြီး တစ်ခုမှ ဆင်းသက်လာသူ ဖြစ်ရာ ဤအဆင့်ကို ချက်ချင်း တွေးမိသွားခဲ့သည်။

ကျန်းချဲ့က ပြုံးရုံသာ ပြုံးနေပြီး အဓိပ္ပာယ်မှာ အလွန် ရှင်းလင်းနေပြီ ဖြစ်သည်။

"ဒီလူရဲ့ အပြစ်သက်သေတွေကို ရထားတယ် ဆိုရင် အလောတကြီး အထက်ကို မတင်ပြနဲ့ ကိုယ့်လူ ဖြစ်အောင် သိမ်းသွင်းတာ အကောင်းဆုံးပဲ ခရိုင်ဝန် တစ်ယောက်ရဲ့ အာဏာက အတော်လေး ကြီးမားတယ်"

ချီဟွမ်က အကြံပေးလိုက်သည်။

ပြည်သူများ အတွက် အလုပ်လုပ်ပေးပြီး တရားမျှတသော အရာရှိများ မရှိသည်တော့ မဟုတ်ပေ။ သို့သော် အလွန် ရှားပါးလွန်းလှသည်။ ချီဟွမ်၏ အမြင်တွင် ကျန်းချဲ့၏ အကျိုးစီးပွား နှင့် အကိုက်ညီဆုံးမှာ တိတ်တဆိတ် ထိန်းချုပ်ထားခြင်းသာ ဖြစ်သည်။

"အစ်ကိုချီ နဲ့ ကျွန်တော် တွေးတာ တူတူပဲ"

ကျန်းချဲ့ ကလည်း အများကြီး ဖုံးကွယ်မထားဘဲ ကျောက်မင်ချန် ကို တိတ်တဆိတ် ထိန်းချုပ်ထားသည့် ကိစ္စကို ချီဟွမ် ထံသို့ ပြောပြလိုက်သည်။

သေချာသည်မှာ ကျန်းချဲ့ အနေဖြင့် ယန်ဂူခရိုင် ကို ထိန်းချုပ်နိုင်လျှင်တောင်မှ ချီမိသားစု နှင့် မယှဉ်နိုင်သေးပေ။ သို့သော် အနည်းဆုံးတော့ အရင်းအနှီး အနည်းငယ် ရှိလာပြီ ဖြစ်ရာ ဖုံးကွယ်ထားရန် မဖြစ်နိုင်ပေ။

အခြားလူများ၏ အသုံးချခံ ဖြစ်လိုလျှင် ပထမဆုံး အနေဖြင့် အသုံးချခံရမည့် တန်ဖိုး ရှိရန် လိုအပ်ပေသည်။

"ရက်စက်တယ် ဉာဏ်များတယ် ကြည့်ရတာ ငါ နယ်စပ်ကနေ ပြန်လာတဲ့အခါကျရင် မင်းကို မော်ကြည့်ရတော့မယ် ထင်တယ်"

ချီဟွမ်က သဘောကျစွာ ပြုံးလိုက်သည်။

"အစ်ကိုချီ ဘယ်တော့လောက် ထွက်ခွာမှာလဲ"

"ဒီရက်ပိုင်း အတွင်းမှာပဲ အဖေ က အဆက်အသွယ်တွေ အကုန် လုပ်ထားပြီးပြီ မွေးရာပါအဆင့် ကို တက်လှမ်းဖို့ ပင်မမိသားစုဆီ သွားတော့မှာ အဲဒီရောက်ရင် ငါလည်း မွေးရာပါအဆင့် သိုင်းသမား ဖြစ်လာတော့မှာ

မင်းနဲ့ ငါ့ကြားက ကွာဟချက် က ပိုကြီးသွားပြန်ပြီ"

ချီဟွမ်က ဖြည်းညင်းစွာ ပြုံးလိုက်သည်။

"ပင်မမိသားစု"

ကျန်းချဲ့၏ မျက်ခုံးများ အနည်းငယ် မြင့်တက်သွားခဲ့သည်။ ချီမိသားစုက ဒေသခံ အင်အားကြီး မိသားစု တစ်ခု ဖြစ်ကြောင်း သူ သိထားသော်လည်း နောက်ခံက ဤမျှအထိ နက်ရှိုင်းပြီး အခက်အလက် မိသားစု တစ်ခုသာ ဖြစ်လိမ့်မည်ဟု မထင်ထားခဲ့ပေ။

ချီဟွမ်က ခေါင်းညိတ်လိုက်သည်။

"ဒါက လျှို့ဝှက်ချက်တော့ မဟုတ်ပါဘူး ငါတို့ ချီမိသားစု ရဲ့ ပင်မမိသားစု က တခြား ဒေသတွေမှာ ရှိတယ် အထူးသဖြင့် အနောက်တောင်ဘက် မှာ အင်အားနဲ့ နာမည် အတော်လေး ကြီးတယ် ငါ့အဖေ ဆိုရင်လည်း လွန်ခဲ့တဲ့ အနှစ် နှစ်ဆယ် လောက်ကနာမည်မရှိတဲ့ သူ တစ်ယောက်ပါပဲ

နောက်ပိုင်း နယ်စပ်မှာ စစ်ရေး အောင်မြင်မှုတွေ ရပြီး ရာထူးတွေ တက်လာကာ နောက်ဆုံးတော့ ယွဲ့ဒေသ ထိုက်အန်းခရိုင် မှာ အခြေချနိုင်ခဲ့တယ် ပင်မမိသားစု ဘက်မှာ မျိုးရိုးစဉ်ဆက် မှတ်တမ်းတင်တဲ့ သူတွေက ငါတို့ မိသားစု အင်အား နည်းနည်း ရှိလာတာကို မြင်တော့

ငါတို့ မိသားစုကို အခက်အလက် မိသားစု တွေထဲ ထည့်ပေးခဲ့တယ် ဆက်ဆံရေး ကတော့ အရမ်းလည်း မနီးစပ်သလို အရမ်းလည်း မဝေးကွာဘူး တစ်ယောက်ကို တစ်ယောက် အသုံးချနေကြတာပါပဲ"

ကျန်းချဲ့က ချီဟွမ်၏ စကားကို နားလည်ပေသည်။

အင်အားနည်းပါးချိန်တွင် ချီဆန်းကျား က ချီမိသားစု နှင့် မပတ်သက်နိုင်ခဲ့ဘဲ အာဏာ ရှိလာချိန်မှသာ ချီမိသားစု ပင်မဘက်မှ အသိအမှတ်ပြုခြင်းကို ခံရကာ တစ်ယောက်က အရန်အင်အား အဖြစ် သတ်မှတ်ပြီး နောက်တစ်ယောက်က နောက်ခံ အင်အား အဖြစ် သတ်မှတ်ခဲ့ကြခြင်း ဖြစ်သည်။

တကယ်ကို အပြန်အလှန် အသုံးချနေကြခြင်းပင်။

ချီဟွမ် ဤသို့ ပြောလိုက်ခြင်းက ကျန်းချဲ့ ကို ချီမိသားစု နှင့် ပိုမို ရင်းနှီးအောင် ပေါင်းသင်းလိုစိတ်ကို ပိုမို ပြင်းထန်လာစေခဲ့သည်။ ထို့နောက် အချိန်အနည်းငယ် တွန့်ဆုတ်နေပြီးနောက် ယခု လက်ရှိ ကြုံတွေ့နေရသော အခက်အခဲများကို သူ့ထံသို့ ပြောပြလိုက်သည်။

ကျောက်မင်ချန် က ယခင်က သူ ခရိုင်ရုံးတော်တွင် ပြဿနာ ရှာခဲ့သည့် ကိစ္စကို မြို့တော်ရုံးချုပ်သို့ တိုင်တန်းခဲ့ကြောင်း ပြောပြပြီး နောက်ဆက်တွဲ ဘာဆက်လုပ်သင့်သနည်း ဟု အကြံဉာဏ် တောင်းခံလိုက်သည်။

ချီဟွမ်ကမူ 'စောစောကတည်းက သိပြီးသား' ဆိုသည့် အပြုံးမျိုး ပြုံးကာ ပြောလိုက်သည်။

"ငါ မင်းကို ခေါ်လိုက်တာလည်း ဒီကိစ္စ အတွက်ပဲ"

"ဒီကိစ္စကို အစ်ကိုလည်း သိနေတာလား"

"ငါတင် မဟုတ်ဘူး ငါ့အဖေ တောင် သိနေပြီ မနေ့ညက ငါ့ကို အထူး ခေါ်ပြီး မေးသေးတယ် ခရိုင်ဝန်ကြီး က သူ့ဆီ စာပို့ပြီး မင်းနဲ့ ငါတို့ ချီမိသားစု ဘာပတ်သက်မှု ရှိလဲလို့ မေးတယ် တဲ့

အကယ်လို့ ဒီပတ်သက်မှုသာ မရှိဘူးဆိုရင် မြို့တော်ရုံးချုပ်က အပြစ်ပေးတာ မင်းဆီ ရောက်လာလောက်ပြီ"

ချီဟွမ်က လေးနက်သော အသံဖြင့် ပြောလိုက်သည်။

အဆင့်ကိုး တပ်မှူး တစ်ယောက်က အထက်အရာရှိကို ပြန်ပြောခြင်း၊ ခရိုင်ဝန်ကို မေ့လဲသွားအောင် လုပ်ခြင်း၊ ခရိုင်ရုံးတော်ကို စစ်သည်များနှင့် ဝင်စီးခြင်း၊ ခွင့်ပြုချက် မရှိဘဲ စစ်သည်များ ငှားရမ်းခြင်း အစရှိသော ပြစ်မှုများကိုသာ သာမန် လူတစ်ယောက်ယောက် အပေါ် ပုံချလိုက်ပါက စောစောကတည်းက ရာထူးမှ ဖြုတ်ချခံရပြီး ဖြစ်မည်။

ချီမိသားစု၏ အခြေခံ ခိုင်မာမှုနှင့် တပ်မှူးချုပ်ချီ က စစ်တပ် အာဏာကို ချုပ်ကိုင်ထားမှု ကြောင့်သာ မြို့တော်ရုံးချုပ်က အလွယ်တကူ မလှုပ်ရှားရဲခြင်း ဖြစ်သည်။

"ဒါဆို တပ်မှူးချုပ်ချီ က ဘယ်လို ပြောလဲ"

ကျန်းချဲ့က ဤမေးခွန်းကို အလွန် ဂရုစိုက်ပေသည်။

ကျူးရွှိ ၏ နှုတ်မှ ထိုက်အန်းဒေသ ၏ တကယ့် အင်အားစု အခြေအနေများကို သိရှိပြီးကတည်းက ကျန်းချဲ့က ကိစ္စ တစ်ခုကို နားလည်သွားခဲ့သည်။ သူ၏ နောင်အနာဂတ် မွေးရာပါအဆင့် ယဇ်ပူဇော်စရာ ပစ္စည်းများကို စုဆောင်းရန် အတွက် ထို အင်အားကြီး အဖွဲ့အစည်းများနှင့် တိုက်ခိုက်ရမည်မှာ အစောနှင့် အနှောင်း သာ ဖြစ်သည်။

အကယ်၍ အနောက်တွင် ကျောထောက်နောက်ခံ ပေးမည့်သူ မရှိပါက သူ၏ အခြေအနေက အလွန် အန္တရာယ် များပေမည်။

နောက်ဆက်တွဲ ကျင့်ကြံရေး အစီအစဉ်များကိုပင် ရွှေ့ဆိုင်းရနိုင်ပေသည်။

"ငါ့အဖေ ရှေ့မှာ ငါ မင်းအတွက် စကားကောင်းတွေ အများကြီး ပြောပေးခဲ့တယ် မင်းကို အထင်အမြင် မဆိုးပါဘူး မင်းကို တစ်ခေါက်လောက် တွေ့ကြည့်မယ် တဲ့ အကယ်လို့ အခြေအနေ ကောင်းရင် ငါ့အဖေ ရဲ့ မျက်စိကျတာကို ခံရနိုင်တယ်"

"ကျွန်တော် လည်း တပ်မှူးချုပ်ချီ ရဲ့ နာမည်ကို ကြားနေရတာ ကြာပါပြီ ရင်ထဲမှာ အမြဲ လေးစားနေတာပါ"

"ဒါဆိုရင် အခုပဲ မင်းကို သွားတွေ့ခိုင်းလိုက်ရမလား"

"သွားကြတာပေါ့"

ချီဟွမ် က လမ်းပြပြီး သူတို့ နှစ်ယောက်က တစ်ယောက် မြင်းတစ်ကောင်စီ စီးကာ အလျင်အမြန် ခရီးဆက်ခဲ့ရာ နှစ်နာရီခန့် အကြာတွင် ဖုန်းတပ်ဖွဲ့ မှ ထိုက်အန်းဒေသ မြို့တော် အနီးရှိ လက်နက်ကိုင် စစ်တပ်စခန်း သို့ ရောက်ရှိသွားခဲ့သည်။

ဤနေရာမှာ ထိုက်အန်းဒေသရှိ တပ်စခန်း အသီးသီး၏ ဗဟိုဌာနချုပ် ပင် ဖြစ်သည်။

ထိုက်အန်းဒေသ ၏ အင်အားအကြီးဆုံး ခေါင်းဆောင် နှစ်ယောက်ထဲမှ တစ်ယောက် ဖြစ်သော တပ်မှူးချုပ်ချီ က ဤနေရာတွင် အခြေစိုက်ပေသည်။

သူက တကယ့် ခေါင်းဆောင်ကြီး တစ်ယောက် ဖြစ်ပြီး စကား တစ်ခွန်းတည်းဖြင့် လူတစ်ယောက်၏ ကံကြမ္မာကို ပြောင်းလဲပေးနိုင်စွမ်း ရှိပေသည်။

ချီဟွမ်၏ အဆင့်အတန်းကို လက်နက်ကိုင် စစ်တပ်စခန်း အတွင်း၌ လူတိုင်း သိသည်ဟု မဆိုနိုင်သော်လည်း တံခါးစောင့် တပ်မှူးများကတော့ ကောင်းစွာ သိရှိကြပြီး ခါးပတ်ပြားများကို စစ်ဆေးခြင်း မပြုရုံသာမက သူ့ကို ခါးညွှတ် အရိုအသေပင် ပေးကြပေသည်။

ကျန်းချဲ့ လည်း စစ်တပ်စခန်း အတွင်းရှိ ဗဟိုစစ်တဲကြီး သို့ အလျင်အမြန် ခေါ်ဆောင်သွားခြင်း ခံရသည်။

သတင်းပို့ပြီးနောက် သူတို့ နှစ်ယောက်ကို အထဲသို့ ဝင်ခွင့် ပြုလိုက်သည်။

ချီဟွမ်က လက်ဝါးချင်းယှက် အရိုအသေပေးလိုက်သည်။

"အဖေ ကို ဂါရဝပြုပါတယ်"

ကျန်းချဲ့ ကလည်း လက်ဝါးချင်းယှက်ကာ ခါးညွှတ် အရိုအသေပေးလိုက်သည်။

"ယန်ဂူခရိုင် အနောက်မြို့နယ် တပ်မှူး ကျန်းချဲ့ တပ်မှူးချုပ် ကို ဂါရဝပြုပါတယ်"

စားပွဲပေါ်တွင် တပ်မှူးချုပ်ချီ က ခေါင်းမော့ကာ သူတို့ နှစ်ယောက်ကို ဂရုမစိုက်သည့်ဟန်ဖြင့် တစ်ချက် ကြည့်လိုက်သော်လည်း ရုတ်တရက် သူ၏ မျက်လုံးများ မှေးကျဉ်းသွားပြီး ကြီးမားလှသော ဖိအား တစ်ခုက ကျန်းချဲ့ နှင့် ချီဟွမ် တို့ အပေါ်သို့ ကျရောက်လာရာ ချီဟွမ် ၏ ရင်ထဲတွင် အလွန် ထိတ်လန့်သွားပြီး နောက်သို့ တစ်လှမ်း ဆုတ်လိုက်မိသည်။

သို့သော် ကျန်းချဲ့ကမူ တစ်ဖက်လူ၏ ဖိအားကို ခံနိုင်ရည် ရှိနေပေသည်။

"အဖေ အဲဒါ ဘာလုပ်တာလဲ"

ချီဟွမ်၏ မျက်နှာပေါ်တွင် ထိတ်လန့်သွားသည့် အမူအရာများ ပေါ်ထွက်လာပြီး ဖခင်ဖြစ်သူ ရုတ်တရက် ဤသို့ လုပ်ဆောင်လိမ့်မည်ဟု လုံးဝ ထင်မှတ်မထားခဲ့သဖြင့် ကျန်းချဲ့ ကို အလျင်အမြန် ကြည့်လိုက်ရာ ကျန်းချဲ့ ၏ မျက်နှာ အမူအရာ မပြောင်းလဲသည်ကို မြင်သောအခါမှ သက်ပြင်းချနိုင်တော့သည်။

ကျန်းချဲ့ ၏ မျက်နှာ အမူအရာ မပြောင်းလဲခြင်းမှာ တပ်မှူးချုပ်ချီ က ရန်လိုမှု မပြသဘဲ သူ့ကို စမ်းသပ်ရုံသာ ဖြစ်သောကြောင့်ပင်။

"နောက်ဆို စစ်တပ်စခန်း ထဲမှာ ရာထူးနာမည် နဲ့ပဲ ခေါ်"

ချီဆန်းကျားက လေးနက်သော အသံဖြင့် ပြောလိုက်သည်။

"ဟုတ်ကဲ့ပါ"

ချီဟွမ်က ပါးစပ်ဟလိုက်သော်လည်း စကားကို ပြန်မျိုချလိုက်ပြီး ခေါင်းညိတ်လိုက်သည်။

"ဟွမ်အာ က မင်း သွေးကြောပွင့် အဆင့် ရှိတယ်လို့ ပြောတယ် တွေ့တွေ့ချင်းပဲ မင်းက ငါ့ကို အံ့ဩစရာ တစ်ခု ပေးလိုက်တာပဲ မွေးရာပါ အဆင့်ကို တက်လှမ်းသွားပြီကိုး ဒါကြောင့် မင်းက ဒီလောက် ရဲတင်းနေတာကိုး အားကိုးစရာ ရှိနေတာကိုး"

ချီဆန်းကျား၏ စွမ်းအားက အလွန် ကြီးမားပြီး ကျန်းချဲ့ထက် အများကြီး သာလွန်ပေသည်။

သူ့ကို ပထမဆုံး မြင်လိုက်ရသည်နှင့် တပြိုင်နက် သူ၏ ခန္ဓာကိုယ် ပတ်လည်ရှိ ကောင်းကင်နှင့် မြေကြီး၏ စွမ်းအင်များ လှုပ်ရှားမှုကို ခံစားသိရှိလိုက်ပြီး သွေးကြောပွင့် အဆင့် သိုင်းသမား တစ်ယောက် လုံးဝ မဖြစ်နိုင်ကြောင်း သိရှိလိုက်ရာ ချက်ချင်း စမ်းသပ်ကြည့်လိုက်ရာ တကယ်ပင် မှန်ကန်နေပေသည်။

'မွေးရာပါအဆင့်'

ချီဟွမ်က မျက်လုံးများ ပြူးကျယ်သွားပြီး ကျန်းချဲ့ ကို လှည့်ကြည့်လိုက်သည်။

'ဒီကောင်လေး ဘယ်တုန်းက မွေးရာပါအဆင့် ဖြစ်သွားတာလဲ’

သူ ဘာမှ မသိခဲ့ဘူး။

'အရင်က သူ အဆင့်တက်လှမ်းတော့မည်ဟု ကြွားဝါခဲ့သော်လည်း ယခု ကြည့်ရသည်မှာ... 'တကယ်ကို ကြွားဝါချင်စရာ ကောင်းနေပေသည်။

ကျန်းချဲ့က ချီဟွမ်ကို ပြုံးပြလိုက်ပြီးနောက် ပြောလိုက်သည်။

"ကျွန်တော် လွန်ခဲ့တဲ့ ရက်အနည်းငယ်ကမှ ကံကောင်းလို့ မွေးရာပါ ဝိညာဉ်စွမ်းအင် တစ်ခု ရလာပြီး အဆင့်တက်လှမ်းနိုင်ခဲ့တာပါ တမင် ဖုံးကွယ်ထားတာ မဟုတ်ပါဘူး တပ်မှူးချုပ် ခွင့်လွှတ်ပေးပါ"

"မင်းက ခရိုင်ရုံးတော်ရဲ့ လက်အောက်ခံ ဆိုတော့ ငါ့ရဲ့ လက်အောက်ခံလို့ မခေါ်နိုင်ပါဘူး အရင် ထိုင်ပါဦး"

တပ်မှူးချုပ်ချီ၏ မျက်နှာပေါ်တွင် ရှားရှားပါးပါး အပြုံးတစ်ခု ပေါ်လာခဲ့သည်။

အကယ်၍ ကျန်းချဲ့က သွေးကြောပွင့် အထွတ်အထိပ် အဆင့်သာ ဖြစ်ပြီး သူ စစ်ဆေးကြည့်၍ ဘာပြဿနာမှ မရှိပါက သူ၏ လက်အောက်သို့ သိမ်းသွင်းမည် ဖြစ်သော်လည်း သဘောထားက ယခုလောက် ကောင်းမွန်မည် မဟုတ်ပေ။ မည်သို့ပင်ဆိုစေ သူ၏ လက်အောက်ရှိ သွေးကြောပွင့် အဆင့် သိုင်းသမားများက လက်နှစ်ဖက်ဖြင့်ပင် ရေတွက်၍ မရနိုင်လောက်အောင် များပြားလှပေသည်။

သိပ်ပြီး အရေးမပါလှပေ။

သို့သော် မွေးရာပါ အဆင့် ဆိုလျှင်တော့ မတူညီတော့ပေ။ ဤကဲ့သို့သော စွမ်းအားမျိုးက ထိုက်အန်းဒေသ တစ်ခုလုံးတွင်ပင် ပထမတန်းစား အဆင့်ဟု ခေါ်ဆိုနိုင်ပြီး သူ၏ လက်အောက်ရှိ မွေးရာပါအဆင့် သိုင်းသမားများမှာလည်း လက်ချိုး ရေတွက်၍ ရလောက်အောင် နည်းပါးလှပေသည်။

ကျန်းချဲ့၏ အသက်အရွယ် နှင့် ယှဉ်ကြည့်မည် ဆိုပါက တကယ်ကို ပါရမီ ထူးချွန်သူ တစ်ယောက် ဖြစ်ပေသည်။

ဤကဲ့သို့သော အရည်အချင်း ရှိသူကို လုံးဝ လက်လွတ်ခံ၍ မရပေ။

မွေးရာပါအဆင့် သိုင်းသမား တိုင်းက အလွန် တန်ဖိုးရှိသော စစ်ရေး အင်အားများ ဖြစ်ပေသည်။

"ကျေးဇူးတင်ပါတယ် တပ်မှူးချုပ်"

ကျန်းချဲ့က စကားကို နားထောင်ကာ ချီဆန်းကျား၏ အောက်ဘက် နေရာတွင် ဝင်ထိုင်လိုက်သည်။

ချီဆန်းကျားက ကျန်းချဲ့ကို ဂရုတစိုက် ကြည့်နေချိန်တွင် ကျန်းချဲ့ ကလည်း တစ်ဖက်လူကို လေ့လာနေပေသည်။ ဝမ်းနည်းစရာ ကောင်းသည်မှာ သူ၏ အာရုံခံစားမှု အရ ချီဆန်းကျားက ဓားအိမ်ထဲတွင် ဖုံးကွယ်ထားသော ဓားသွား တစ်လက် ကဲ့သို့ ဖြစ်နေသော်လည်း ထက်မြက်သော အရှိန်အဝါများက ခပ်ရေးရေး ထွက်ပေါ်နေပေသည်။

ထို့အပြင် မတ်စောက်သော တောင်ကြီး တစ်လုံး ကဲ့သို့ ဂုဏ်သိက္ခာ ကြီးမားလှပေသည်။

တစ်ချိန်တည်းမှာပင် ပင်လယ်ကြီး တစ်ခု ကဲ့သို့ အပေါ်ယံတွင် တည်ငြိမ်နေသော်လည်း လေတိုက်၍ လှိုင်းထလာပါက ကြီးမားသော လှိုင်းလုံးကြီးများက ကမ်းခြေကို ရိုက်ခတ်လာမည်မှာ သေချာလှပေသည်။

သူ၏ စွမ်းအားက သူ့ထက် အများကြီး သာလွန်ပေသည်။

အဆင့်ငါး တပ်မှူးချုပ် တစ်ယောက် ဖြစ်ရကျိုး နပ်ပေသည်။

"ဟွမ်အာ က မင်းကို ထောက်ခံခဲ့တာ အခု တွေ့လိုက်ရတော့ တကယ်ကို ရုပ်ရည် သန့်ပြန့်ပြီး ထက်မြက်တဲ့ အရည်အချင်းတွေ ရှိပေမဲ့ တစ်ချိန်တည်းမှာပဲ တောင်ကြီး တစ်လုံးလို တည်ငြိမ်နေတယ် ဒီအရွယ်နဲ့ ဒီလောက် အရှိန်အဝါ မျိုး ရှိနေတာ အနာဂတ်မှာ တကယ်ကို တိုးတက်လာမယ့်သူပဲ

ခရိုင်ရုံးတော်မှာ ဆက်နေတာက မင်းရဲ့ အရည်အချင်းတွေကို နှမြောစရာ ကောင်းလွန်းတယ် မြို့တော်ရုံးချုပ် က မင်းရဲ့ စွမ်းအားတွေကြောင့် မင်းကို နေရာပေးကောင်း ပေးနိုင်ပေမဲ့ မင်းက အင်အား နည်းပါးတော့ တခြားလူတွေရဲ့ အသုံးချခံ ဖြစ်သွားနိုင်တယ်….ဒါ့အပြင် မင်းက ရမ်းကားလွန်းတော့ ရှေ့ဆက်ဖို့ ခက်လိမ့်မယ်

ငါ့လက်အောက်ကို ဝင်မလား"

ချီဆန်းကျားက မုတ်ဆိတ်မွေးများကို ပွတ်သပ်ရင်း ကျန်းချဲ့ကို ပြုံးရွှင်သော မျက်နှာဖြင့် ကြည့်ကာ မေးလိုက်သည်။

ကျန်းချဲ့က အစပိုင်းတွင် ချီဆန်းကျား က သူ့ကို ဖိအားပေးမည်ဟု ထင်မှတ်ထားခဲ့သော်လည်း ယခု ကြည့်ရသည်မှာ... မွေးရာပါအဆင့် စွမ်းအားက တကယ်ပင် တစ်ဖက်လူကို ဆွဲဆောင်နိုင်သည့် ကြီးမားသော အပေးအယူ တစ်ခု ဖြစ်နေပြီး ဤသည်က သူ လိုချင်နေသော အရာပင် မဟုတ်ပါလား။

ထို့ကြောင့် ချက်ချင်း မတ်တတ်ရပ်ကာ လက်ဝါးချင်းယှက် အရိုအသေပေးလိုက်သည်။

"ကျန်းချဲ့ လေလွင့်နေတာ ကြာပြီ တကယ့် ခေါင်းဆောင်ကောင်းနဲ့ မတွေ့ခဲ့ရတာကိုပဲ ဝမ်းနည်းမိပါတယ်”