အခန်း ၁၃၉
Vol. 14 Ch. 139
အခန်း (၁၃၉) နောက်တစ်ကြိမ်တိုက်ခိုက်ခြင်း...
ကျန်းချဲ့...
သူ၏ ထွက်ပေါ်လာမှုက တစ်ကွင်းလုံးကို ချက်ချင်း သေမင်းတမန်ကဲ့သို့ တိတ်ဆိတ်သွားစေခဲ့သည်။
ဤအချိန်တွင် ကျန်းချဲ့ ရုတ်တရက် ထွက်ပေါ်လာလိမ့်မည်ဟု မည်သူမျှ မထင်မှတ်ထားခဲ့ကြပေ။ အလွန် ရုတ်တရက် ဆန်လွန်းသဖြင့် ဤနေရာရှိ လူအားလုံး ကြိုတင် မခန့်မှန်းနိုင်ခဲ့ကြပေ။
လုရှင်းယွင်က မြေကြီးပေါ်တွင် မှောက်ခုံကျနေသော အလောင်းကို ကြည့်ပြီး ရင်ထဲတွင် ချက်ချင်း တင်းကျပ်သွားခဲ့သည်။ အဘယ်ကြောင့်ဆိုသော် တစ်ဖက်လူ ဝတ်ဆင်ထားသော အဝတ်အစားမှာ သတို့သား ဝတ်စုံ အနီရောင် ဖြစ်နေပြီး မည်သူဖြစ်ကြောင်းကို အထူးတလည် ပြောနေစရာ မလိုတော့သောကြောင့် ပင် ဖြစ်သည်။
သူ၏ ရင်ထဲတွင် မျှော်လင့်ချက် တစ်စွန်းတစ်စ ရှိနေသေးလျက် အလောင်းအနီးသို့ သွားကာ ပက်လက်လှန် ကြည့်လိုက်သည်။
မျက်နှာကို သေချာ မြင်လိုက်ရသော အခါတွင်တော့... သူ့အတွက်မူ ပြင်းထန်သော ထိုးနှက်ချက် တစ်ခုနှင့် မခြားနားတော့ပေ။
တကယ်ပဲ... လုဖျင်ကျိုး ဖြစ်နေခဲ့တယ်...
ဤမြင်ကွင်းကို ဤနေရာရှိ လူအများကလည်း ရှင်းလင်းစွာ မြင်တွေ့လိုက်ကြသည်။
"ကျန်းချဲ့..."
လုရှင်းယွင် ဒေါသထွက်လွန်းသဖြင့် လုဖျင်ကျိုး၏ အလောင်းကို ဖက်ကာ ကျယ်လောင်စွာ ဟစ်အော်နေပြီး အချိန်အတော်ကြာသည့်တိုင်အောင် မရပ်တန့်နိုင်ခဲ့ပေ။
ဤသူက လုမိသားစု၏ သခင်လေး ဖြစ်သည်။ သူ လုရှင်းယွင်၏ သားအရင်း ပင် ဖြစ်သည်။ ထို့အပြင် ယွီရှန်း လုမိသားစု၏ ဆယ်စုနှစ်များစွာ အတွင်း ပါရမီ အကောင်းဆုံး တပည့် တစ်ယောက် ဖြစ်ပြီး မျှော်လင့်ချက်လည်း ဖြစ်ပေသည်။
သို့သော် ယနေ့... မင်္ဂလာဆောင်သည့် နေ့ကြီးရက်မြတ်တွင်... သေဆုံးသွားခဲ့ရပြီ ဖြစ်သည်။
လုရှင်းယွင်က အနည်းငယ် လက်ခံနိုင်ရန် ခက်ခဲနေသော်လည်း အမှန်တရားက သူ၏ မျက်စိရှေ့တွင် ရှိနေပြီ ဖြစ်ရာ မည်မျှပင် မယုံကြည်ချင်စေကာမူ ဘာအသုံးမှ မဝင်တော့ပေ။
ကျန်းဟိုင်ဂိုဏ်းချုပ် ချန်ရှန်တုန်းက ဤမြင်ကွင်းကို မြင်သောအခါ မျက်လုံးများ အနည်းငယ် မှေးကျဉ်းသွားခဲ့သည်။ သူ၏ ခန့်မှန်းချက်က တကယ်ကို မလွဲမှားခဲ့ပေ။ ကျန်းချဲ့က ရွှမ်ယွမ် ရေလေးကို လိုအပ်နေခြင်းမှာ ယွမ်ဟိုင်အဆင့်သို့ ချိုးဖောက် ဝင်ရောက်ရန် အတွက်ပင် ဖြစ်သည်။
'တကယ်ကို ကြောက်စရာ ကောင်းလွန်းတယ်...'
ဤမျှ ငယ်ရွယ်သော အသက်အရွယ်ဖြင့် ယွမ်ဟိုင်အဆင့်သို့ တက်ရောက်နိုင်ခြင်း၊ ဤကဲ့သို့သော ကျင့်ကြံရေး အမြန်နှုန်းက အထက်ဂိုဏ်းကြီးများမှ တပည့်များနှင့် နှိုင်းယှဉ်လျှင်ပင် နောက်ကျနေမည် မဟုတ်ဘဲ အလားအလာ အလွန် ကြီးမားလှပေသည်။ တစ်ချိန်တည်းမှာပင် အလုပ်လုပ်ရာတွင်လည်း အလွန် ရက်စက် ပြတ်သားလှပေသည်။
မင်္ဂလာဆောင်သည့် နေ့တွင် လုမိသားစု သခင်လေးကို တိုက်ရိုက် သတ်ဖြတ်ပစ်ခြင်း က ဤတစ်ကြိမ် ကျန်းချဲ့ ရောက်လာခြင်းမှာ လုမိသားစုကို အပြီးတိုင် ဖျက်ဆီးပစ်ရန် ဖြစ်ကြောင်း အမြင်ကျယ်သူတိုင်းက ရှင်းလင်းစွာ သိရှိကြပေသည်။ တကယ့်ကို ရက်စက်တဲ့ ခေါင်းဆောင် တစ်ယောက်ရဲ့ အရည်အချင်းပဲ...
ကံကောင်းသည်မှာ ကျန်းဟိုင်ဂိုဏ်းနှင့် ကျန်းချဲ့ အကြားတွင် မည်သည့် ရန်ငြိုးမျှ မရှိသည့်အပြင် သူက မိတ်ဆွေဖွဲ့ရန် အတွက် ရွှမ်ယွမ် ရေလေး သုံးစက်နှင့် ယန်သုံးပါး မြက် တစ်ပင်ကိုပင် အထူး ပေးအပ်ခဲ့သေးသည်။ အကယ်၍ ကျန်းဟိုင်ဂိုဏ်းသာ ဤမျှ အလားအလာ ကြီးမားပြီး အလုပ်လုပ်ရာတွင် ရက်စက်ပြတ်သားသော ရန်သူမျိုးကို ရင်ဆိုင်ရမည် ဆိုပါက သူ့ကို သေချာပေါက် အလွန် ခေါင်းကိုက်စေမည် ပင် ဖြစ်သည်။
လီတောက်ဖျင်က မျက်မှောင် အနည်းငယ် ကြုတ်သွားပြီး ကျန်းချဲ့၏ အလုပ်လုပ်ပုံ စတိုင်ကို တကယ့်ကို အမှန်တကယ် နားလည်သွားခဲ့သည်။ တကယ်ကို မိစ္ဆာ တစ်ကောင်နဲ့ ဘာမှ မကွာခြားဘူး... အရာရှိ တစ်ယောက်နဲ့ လုံးဝ မတူဘူး...
ဝမ်ဖန်ယွင်ကတော့ အလွန်တရာ ဝမ်းသာနေပေသည်။ ကျန်းချဲ့၏ စရိုက်နှင့် အလွယ်တကူ လက်လျှော့မည် မဟုတ်ကြောင်း သူ သိထားသော်လည်း ဤမျှလောက် အံ့ဩစရာကောင်းအောင် လုပ်ပြလိမ့်မည်ဟု မထင်မှတ်ထားခဲ့ပေ။
လုဖျင်ကျိုး သေဆုံးသွားခြင်းက ယွီရှန်း လုမိသားစု၏ လူငယ် မျိုးဆက် အဆက်ပြတ်သွားပြီဟု ဆိုလိုခြင်း ပင် ဖြစ်သည်။ ယနေ့ မပျက်စီးသွားလျှင်ပင် နောက်ပိုင်းတွင် ကြီးမားသော အရင်းအနှီးများ ပေးဆပ်ကာ မွေးရာပါအဆင့် သိုင်းသမား တစ်ယောက်ကို ထပ်မံ ပျိုးထောင်နိုင်မည် ဆိုပါကလည်း ပါရမီနှင့် အစွမ်းအစ အရ အခြား မွေးရာပါအဆင့် အင်အားစုများ၏ အမွေဆက်ခံသူများနှင့် အများကြီး ကွာဟသွားပြီ ပင် ဖြစ်သည်။
'ရက်စက်လိုက်တာ...'
လုရှင်းယွင် ဖိတ်ကြားထားသော အင်အားကြီးသူ အချို့ကတော့ ချက်ချင်း မတ်တပ် ထရပ်လိုက်ကြပြီး ကျန်းချဲ့ကို ဒေါသတကြီး စိုက်ကြည့်နေကြသည်။
"မင်္ဂလာဆောင်တဲ့ နေ့မှာ ဒီလို လုပ်ရပ်မျိုး လုပ်တာ... ကျန်းချဲ့... မင်း နဲ့ မိစ္ဆာ နဲ့ ဘာကွာတော့လို့လဲ..."
ကျဲအဲ့ ဘုန်းကြီးက အေးစက်စက် နှာမှုတ်လိုက်ပြီး ချက်ချင်းပင် ဒေါသတကြီး ဆူပူလိုက်သည်။
"မှန်တယ်... ဒီနေရာမှာ လာပြီး နှောင့်ယှက်ရဲတာ... ကျန်းချဲ့... ဒီနေ့ မင်း ဒီကနေ ထွက်သွားဖို့ မစဉ်းစားနဲ့တော့..." လက်အောက်ခံ မိသားစုမှ မွေးရာပါအဆင့် တစ်ယောက်က ချက်ချင်း ဒေါသတကြီး အော်ဟစ်လိုက်သည်။
"တကယ်ကို အနိုင်ကျင့်လွန်းတာပဲ..."
ဆေးဘုရင်တောင်ကြား၏ တောင်ကြားသခင် အိုကြီးက မျက်မှောင် တင်းကျပ်စွာ ကြုတ်လိုက်သည်။ ယခင်က ကျန်းချဲ့၏ မောက်မာသော နာမည်ဂုဏ်သတင်းကို ကြားဖူးခဲ့သော်လည်း နားဖြင့် ကြားခြင်းက အမှား ဖြစ်နိုင်ပြီး မျက်စိဖြင့် မြင်ရသည်ကသာ အမှန် ဖြစ်သဖြင့် အခြားသူများက ချဲ့ကား ပြောဆိုနေသည်ဟုသာ ထင်မှတ်ခဲ့သည်။ မည်သို့ပင်ဆိုစေ အစိုးရနှင့် သိုင်းလောကက ဆန့်ကျင်ဘက် ဖြစ်နေသဖြင့် အသရေဖျက်ခြင်း ဆိုသည်မှာ အလွန် ပုံမှန် ကိစ္စ တစ်ခု ပင် ဖြစ်သည်။
သို့သော် ယနေ့ တွေ့လိုက်ရချိန်တွင်မှ အခြားသူများ၏ ကောလာဟလများက အသရေဖျက်နေခြင်း လုံးဝ မဟုတ်ဘဲ ဤလူအတွက် အနည်းငယ်ပင် လျှော့ပြောပေးထားသေးကြောင်း သူ သိရှိသွားခဲ့သည်။ လက်တွေ့ လုပ်ရပ်များက တကယ်ကို လွန်ကဲလွန်းလှပေသည်။ မင်္ဂလာဆောင်သည့် နေ့တွင် လုမိသားစု သခင်လေးကို ဝင်ရောက် လုပ်ကြံ သတ်ဖြတ်ခြင်း က လမ်းမှန် လျှောက်သူ တစ်ယောက်၏ လုပ်ရပ် ဖြစ်ပါမည်လော။
"ကျန်းချဲ့... မင်း ငါ့ သား ကို သတ်တယ်... ဒီနေ့... ဘာ အဖိုးအခ ပဲ ပေးဆပ်ရ ပေးဆပ်ရ... မင်း ကို အသက် ပြန်လျော်ခိုင်းမယ်..."
လုရှင်းယွင်က ယခုအခါ လုဖျင်ကျိုး သေဆုံးသွားမှု၏ လှုံ့ဆော်မှု အောက်တွင် ဆုံးဖြတ်ချက်ကို လုံးဝ ခိုင်မာစွာ ချမှတ်လိုက်ပြီ ဖြစ်သည်။ ယခင်က ကျန်းချဲ့၏ လုပ်ရပ်များမှာ အရမ်းကြီး မလွန်ကဲသဖြင့် သည်းခံလိုက်၍ ရသေးသည်။ သို့သော် ယနေ့တော့ မရတော့ပေ။ သည်းခံသည် ဖြစ်စေ၊ မသည်းခံသည် ဖြစ်စေ ထိုက်အန်းဒေသတွင် ဆက်လက် ရပ်တည်နိုင်ရန် ခက်ခဲသွားပြီ ပင် ဖြစ်သည်။
အဆိုးဆုံး ဆိုလျှင် ဤလူကို သတ်ပြီး မိသားစု တစ်ခုလုံး ပြောင်းရွှေ့သွားမည်သာ ဖြစ်သည်။ လုံးဝ ဆက်ပြီး သည်းခံနေမည် မဟုတ်တော့ပေ။
"လုမိသားစု က ချင်းထျန်းဂိုဏ်း နဲ့ ပူးပေါင်းပြီး ပုန်ကန်တယ်... အပြစ် အရမ်း ကြီးမားတယ်... နှစ်ပေါင်းများစွာ ဈေးကွက်ကို လွှမ်းမိုး အနိုင်ကျင့်ပြီး အစိုးရ ကို ဆန့်ကျင်ခဲ့တယ်... အခု ခိုင်လုံတဲ့ သက်သေ အထောက်အထား တွေ ရပြီမို့ ဒီအရာရှိ က အထက် အမိန့် အရ လုမိသားစု တစ်ခုလုံး ကို သုတ်သင် ဖျက်ဆီးမယ်... ဒီနေ့ လုမိသားစု ကို ကူညီရဲတဲ့ သူ တွေကို ပါ ဆွေစဉ်မျိုးဆက် သတ်ဖြတ်မယ်... သတ္တိ ရှိရင် မင်းတို့ အားလုံး အတူတူ ဝင်လာခဲ့ကြ..."
ကျန်းချဲ့က အေးစက်စက် နှာမှုတ်လိုက်ပြီး စစ်မှန်သော ယွမ် စွမ်းအင်၏ ပံ့ပိုးမှု အောက်တွင် သူ၏ အသံက ကြီးမား ကျယ်လောင်စွာ ထွက်ပေါ်လာပြီး ပတ်ဝန်းကျင် တစ်ခုလုံးကို လွှမ်းခြုံသွားခဲ့သည်။ ယခုအခါ မွေးရာပါ အလယ်ပိုင်းအဆင့် ယွမ်ဟိုင်အဆင့်သို့ လုံးဝ ဝင်ရောက်သွားပြီ ဖြစ်သော သူက ရှန်ကွမ်းအဆင့် သိုင်းသမား မထွက်ပေါ်လာသရွေ့ မည်သူ့ကိုမျှ မကြောက်တော့ပေ။
စကားပြောပြီးနောက် သူ၏ ရင်ခွင်ထဲမှ အချက်ပြ ဒုံးပျံ တစ်ခုကို ထုတ်ယူကာ ရုတ်တရက် ဆွဲဖောက်လိုက်သည်။
ရွှီး... ဘုန်း...
လင်းလက် တောက်ပသော မီးရှူးမီးပန်း တစ်ခုက လုမိသားစု၏ ကောင်းကင်ယံတွင် ပေါက်ကွဲသွားခဲ့သည်။ လုမိသားစုနှင့် မိုင်အနည်းငယ် အကွာတွင် စောစောကတည်းက ချုံခို စောင့်ဆိုင်းနေသော ကန်းတာပြောင်တို့ အုပ်စုကလည်း ကျန်းချဲ့၏ အချက်ပြမှုကို တွေ့ရှိသွားပြီး ချက်ချင်း လက်ဝှေ့ယမ်းပြလိုက်သည်။
"တပ်မှူးကြီးကျန်း ရဲ့ အမိန့် အရ... လုမိသားစု ကို ဝိုင်းဝန်း နှိမ်နင်းမယ်... အောင်မြင်မှု ရတဲ့ သူ ကို အကြီးအကျယ် ဆုချမယ်..."
သူ၏ ဒေါသတကြီး အော်ဟစ်သံနှင့် အတူ စောစောကတည်းက ပြင်ဆင်ထားသော စစ်သည် ထောင်ချီက လုမိသားစု ခြံဝင်းဆီသို့ အရပ်မျက်နှာ အသီးသီးမှ စတင် ဝိုင်းရံသွားကြသည်။ ထိုအထဲတွင် အတွင်းအား ဖျက်ဆီးရေး မြား ကဲ့သို့သော ကြီးမားသည့် လက်နက်ကြီးများပင် ပါဝင်နေသေးသည်။ ဤသည်မှာ မွေးရာပါအဆင့် သိုင်းသမားများကို ကာကွယ်ရန် အတွက် အစိုးရမှ တီထွင်ထားသော ကြီးမားသည့် လက်နက်ကြီးများ ပင် ဖြစ်သည်။ နတ်လက်မောင်း လေး၏ အဆင့်မြှင့်တင်ထားသော ဗားရှင်း ဟုလည်း ဆိုနိုင်ပေသည်။
မြားတံများ အပေါ်တွင် အစီအရင် ဆရာကြီးများ ရေးဆွဲထားသော ယွမ်ချီ စုစည်းမှု အစီအရင် နှင့် ချပ်ဝတ် ဖျက်ဆီးရေး အစီအရင် တို့ ပါဝင်နေပေသည်။ အတွင်းအား အကာအကွယ်များကို လျစ်လျူရှုနိုင်ပြီး မွေးရာပါအဆင့် သိုင်းသမားများ အပေါ် အလွန် ကြီးမားသော သတ်ဖြတ်နိုင်စွမ်း ရှိပေသည်။
ဤသည်မှာ ကျန်းချဲ့က ထိုက်ဆန်း မြို့တော်ဝန်ရုံးမှ ထုတ်ယူနိုင်သော အကြီးမားဆုံး လျှို့ဝှက် လက်နက် ပင် ဖြစ်သည်။ စစ်သည် ထောင်ချီ၏ ပံ့ပိုးမှုဖြင့် အဖိုးအခ အနည်းငယ် ပေးဆပ်ရန် ဝန်မလေးပါက မွေးရာပါအဆင့် တစ်ယောက် နှစ်ယောက်ကို ဝိုင်းဝန်း သတ်ဖြတ်ရန် ဆိုသည်မှာ လုံးဝ ပြဿနာ မဟုတ်ပေ။ လုမိသားစုကို ဖျက်ဆီးရန် အတွက် ကျန်းချဲ့က နည်းလမ်းပေါင်းစုံ အကုန် ထုတ်သုံးထားသည်ဟု ဆိုနိုင်ပေသည်။
ဒုန်းဒုန်းဒိုင်းဒိုင်း မြင်းခွာသံများက လုမိသားစု အနီးတစ်ဝိုက်တွင် ပဲ့တင်ထပ်သွားပြီး လူအများအပြားကို အလွန် ကြောက်ရွံ့ တုန်လှုပ်သွားစေခဲ့သည်။ လုမိသားစုဝင်များနှင့် ချက်ချင်း အကွာအဝေး တစ်ခု ခွာလိုက်ကြသည်။ သူတို့က မင်္ဂလာပွဲ လာတက်ရုံ သက်သက်သာ ဖြစ်ပြီး လုမိသားစုကို ကူညီကာ အစိုးရကို ဆန့်ကျင်ရန် လုံးဝ စိတ်မဝင်စားကြပေ။
ထိုအထဲတွင် လီတောက်ဖျင် လည်း ပါဝင်နေပေသည်။ ကျန်းချဲ့နှင့် တိုက်ခိုက်မည် ဆိုလျှင်တောင် သူက ဝိုင်းဝန်း တိုက်ခိုက်ခြင်းကို အထင်သေးပေသည်။ လုမိသားစု အတွက် ဝင်ပါပေးမည် ဆိုသည်မှာ ပို၍ပင် မဖြစ်နိုင်ပေ။
ဝမ်ဖန်ယွင် ကတော့ မျက်နှာပေါ်တွင် တွန့်ဆုတ်နေသည့် အမူအရာ ပေါ်ထွက်လာပြီး ရှေ့ထွက်ရမလား မထွက်ရဘူးလား ဆိုသည်ကို စဉ်းစားနေမိသည်။ သူ့ကိုယ်ပိုင် ကိစ္စက သေးငယ်သော်လည်း ဝမ်ရှိုခြံဝင်း နှင့် သက်ဆိုင်လာပါက ကိစ္စ ကြီးသွားပြီ ပင် ဖြစ်သည်။ ကျန်းချဲ့နှင့် ပူးပေါင်းခြင်းက သိုင်းလောက၏ မရေးသားထားသော စည်းမျဉ်းများကို ချိုးဖောက်ခြင်းနှင့် မခြားနားပေ။ အကယ်၍ ကျင်းယွမ် ဘုန်းကြီးကျောင်းသာ သိရှိသွားပါက ဝမ်ရှိုခြံဝင်းကို သေချာပေါက် အလွတ်ပေးမည် မဟုတ်ပေ။
သို့သော် ဤကဲ့သို့သော အခြေအနေမျိုးတွင် ဝင်မကူညီဘူး ဆိုလျှင်လည်း... သူနှင့် ကျန်းချဲ့ အကြား ညီအစ်ကို သစ္စာဆိုထားသည့် သံယောဇဉ်က ဤနေရာတွင်ပင် ပြီးဆုံးသွားပြီ ပင် ဖြစ်သည်။ ဤအခိုက်အတန့်တွင် သူ၏ ယခင်က အတွေးများကို အနည်းငယ် နောင်တရနေမိသည်။
ကျန်းချဲ့ကို လုဖျင်ကျိုး၏ မင်္ဂလာပွဲကို အနှောင့်အယှက် ပေးခိုင်းရန်သာ တွေးထားခဲ့ပြီး နှစ်ဖက်စလုံး ဤအခြေအနေ အထိ ရောက်သွားလိမ့်မည်ဟု သူ မထင်မှတ်ထားခဲ့ပေ။ 'ငါသာ မင်္ဂလာပွဲ လာမတက်ခဲ့ဘူး ဆိုရင် ဘယ်လောက် ကောင်းလိုက်မလဲ' လို့ မျှော်လင့်နေမိသည်။
သူ တွန့်ဆုတ်နေစဉ်မှာပင် လုမိသားစု ခြံဝင်း အတွင်းတွင် အုပ်စု နှစ်ခု အဖြစ် အလွန် ထင်ရှားစွာ ကွဲထွက်သွားခဲ့ပြီ ဖြစ်သည်။ တစ်ဖက်က လုရှင်းယွင်ကို အဓိက ထားပြီး ပတ်ဝန်းကျင်တွင် လုမိသားစု၏ လက်အောက်ခံ အင်အားစုများ၊ သို့မဟုတ် လုရှင်းယွင် ဖိတ်ကြားထားသော ကူညီမည့်သူများ နှင့် နောက်ဆုံးတွင် လုမိသားစု ကိုယ်တိုင်နှင့် ခွဲထွက် မျိုးနွယ်စုများမှ သိုင်းသမားများ ပင် ဖြစ်သည်။
အခြား တစ်ဖက်မှာမူ မင်္ဂလာပွဲ လာတက်ပြီး လုမိသားစုနှင့် ကျန်းချဲ့ အကြား ရန်ငြိုးများတွင် ဝင်မပါလိုသော သိုင်းလောကသားများ ပင် ဖြစ်သည်။
လုရှင်းယွင်က ပတ်ဝန်းကျင်ရှိ လှုပ်ရှားမှုများကို လုံးဝ ဂရုမစိုက်ဘဲ သူ၏ မျက်လုံးများက ကျန်းချဲ့ ဝတ်ဆင်ထားသော သတို့သား ဝတ်စုံကိုသာ စူးရဲစွာ စိုက်ကြည့်နေပေသည်။ ပြီးတော့ စောစောက နောက်ဖေးခြံဝင်း အတွင်းရှိ ယွမ်ချီ ဝဲကတော့ကို ပြန်လည် တွေးတောမိသွားသည်။
သူ၏ ခေါင်းတစ်ခုလုံး ပေါက်ကွဲထွက်သွားတော့မလို ခံစားလိုက်ရသည်။ အဆင့်တက်သွားသူက လုဖျင်ကျိုး လုံးဝ မဟုတ်ဘဲ ကျန်းချဲ့ ပင် ဖြစ်နေခဲ့သည်။ 'ဒါပေမဲ့ သူက ဘာဖြစ်လို့ လုမိသားစု အိမ်တော်မှာမှ လာပြီး အဆင့်တက်ရတာလဲ...'
အကယ်၍ လုမိသားစု၏ သိပ်သည်းသော သဘာဝ ယွမ်ချီ စွမ်းအင်များကြောင့်ဟု ပြောမည် ဆိုလျှင်လည်း ကျန်းချဲ့ကို အလွန် အထင်သေးရာ ကျလွန်းပေသည်။ ယွမ်ချီကျောက်တုံး အနည်းငယ်က အချိန်တိုအတွင်း သုံးစွဲမှုကို အစားထိုးရန် လုံလောက်နေပြီ မဟုတ်ပါလား။
သူ၏ ခေါင်းထဲတွင် အတွေးများ ရှုပ်ယှက်ခတ်နေပြီး တဖြည်းဖြည်းနှင့် တစ်ခုခုကို နားလည် သဘောပေါက်သွားသကဲ့သို့ ခံစားလိုက်ရသည်။ ချက်ချင်းပင် မျက်လုံးများ မှေးကျဉ်းသွားပြီး လေးနက်သော အသံဖြင့် မေးလိုက်သည်။
"ဟွမ်ရှန်းရှန်း ဆိုတဲ့ မိန်းမယုတ် က မင်းကို အဆင့်တက်ဖို့ ကူညီပေးခဲ့တာလား..."
"လုရှင်းယွင်... ရှင် ကမှ ယုတ်မာတာ... ရှင်တို့ လုမိသားစု တစ်ခုလုံး ကမှ ညစ်ပတ် ယုတ်မာတဲ့ ကောင်တွေ..."
အရှေ့ခြံဝင်းမှ နောက်ဖေးခြံဝင်းသို့ သွားရာ တံခါးဝတွင် ဟွမ်ရှန်းရှန်းက တစ်ကိုယ်လုံး သွေးများ ပေကျံနေလျက် လက်ထဲတွင် ခေါင်းပြတ် တစ်တွဲကို ဆွဲကိုင်လာပြီး မြေကြီးပေါ်သို့ ရုတ်တရက် ပစ်ချလိုက်သည်။ ၎င်းတို့မှာ စောစောက နောက်ဖေးခြံဝင်းသို့ လာရောက် စစ်ဆေးသော လုမိသားစုမှ သိုင်းသမားများ ပင် ဖြစ်သည်။ ယခုအခါ အားလုံးမှာ ဟွမ်ရှန်းရှန်း၏ လက်ချက်ဖြင့် အသက် ဆုံးရှုံးသွားကြပြီ ဖြစ်သည်။
"မိန်းမယုတ်..."
လုရှင်းယွင်က ဤမြင်ကွင်းကို မြင်သောအခါ ချက်ချင်း မျက်လုံးများ ပြူးကျယ်သွားပြီး မျက်လုံးများထဲတွင် ဒေါသမီးများ ပြည့်နှက်သွားခဲ့သည်။
ယခင်က သံသယ သက်သက်သာ ရှိသေးပြီး လုဖျင်ကျိုး သေဆုံးသွားမှုကြောင့် ပါးစပ်ကနေ အလွယ်တကူ မိန်းမယုတ်ဟု အော်ဟစ်လိုက်ခြင်း ဖြစ်သော်လည်း ယခုအခါတွင်တော့ ခိုင်လုံသော သက်သေ အထောက်အထားများ ရှိနေပြီ ဖြစ်သည်။ ကျန်းချဲ့နှင့် ဟွမ်ရှန်းရှန်းတို့ တိတ်တဆိတ် ပူးပေါင်းခဲ့ကြခြင်း ပင် ဖြစ်သည်။
"အောက်တန်းစားမ... မင်း... မင်း က အဲဒီ ကျန်းချဲ့ နဲ့ တိတ်တဆိတ် ပူးပေါင်းပြီး ငါ့ သား ကို သေအောင် လုပ်ခဲ့တာပေါ့... ငါ ဟွမ်မိသားစု တစ်ခုလုံး ကို အပြီးတိုင် ဖျက်ဆီးပစ်မယ်..."
ဒေါသမီးများ တောက်လောင်နေသော လုရှင်းယွင်က လုံးဝ သည်းမခံနိုင်တော့ဘဲ ခန္ဓာကိုယ်က မျက်စိတစ်မှိတ် အတွင်း လှုပ်ရှားသွားပြီး ဟွမ်ရှန်းရှန်းကို ဖမ်းဆီးကာ ဤနေရာတွင်ပင် သတ်ဖြတ်ပစ်ရန် ပြင်လိုက်သည်။
သို့သော် သူ အနည်းငယ် လှုပ်ရှားလိုက်ရုံမျှဖြင့် လေဟာနယ်ထက်ရှိ ကျန်းချဲ့က လက်ကို အလွယ်တကူ မြှောက်လိုက်သည်ကို မြင်လိုက်ရသည်။
ဝုန်း...
နဂါး ဟိန်းဟောက်သံ တစ်ခု ပဲ့တင်ထပ်သွားပြီး ကျန်းချဲ့ ပတ်ဝန်းကျင်ရှိ သဘာဝ ယွမ်ချီ စွမ်းအင်များက မျက်စိတစ်မှိတ် အတွင်း ပေပေါင်းများစွာ အရွယ်အစားရှိသော ရွှေရောင် နဂါးပုံသဏ္ဍာန် အတွင်းအား (Astral Qi) တစ်ခု အဖြစ် ပြောင်းလဲသွားကာ လေပြင်းများ တိုက်ခတ်လာပြီး လုရှင်းယွင်ထံသို့ ဝင်ရောက်သွားခဲ့သည်။
"ဘုန်း..."
လမ်းတစ်ဝက်သို့ ရောက်နေသော လုရှင်းယွင်က အန္တရာယ်ကို ခံစားလိုက်ရပြီး ချက်ချင်း သတိဝင်လာကာ လက်တစ်ဖက်ဖြင့် လက်ဝါးရာ တစ်ခုကို ဖန်တီး၍ ကျန်းချဲ့၏ နဂါးပုံသဏ္ဍာန် အတွင်းအားကို ကာကွယ်လိုက်ရာ မျက်စိတစ်မှိတ် အတွင်းမှာပင် အလွန် ကြောက်မက်ဖွယ်ကောင်းသော ကြီးမားသည့် ပေါက်ကွဲသံကြီး တစ်ခု ထွက်ပေါ်လာခဲ့သည်။ သူ ဖန်တီးထားသော လက်ဝါးရာက မျက်စိတစ်မှိတ် အတွင်းမှာပင် ကွဲကြေသွားသော်လည်း နဂါးပုံသဏ္ဍာန် အတွင်းအား ကတော့ အရှိန်အဝါ ကြီးမားနေဆဲ ပင် ဖြစ်သည်။
လုရှင်းယွင်က ခန္ဓာကိုယ်ကို လှည့်ပတ်လိုက်ပြီး ဤတိုက်ခိုက်မှုကို သီသီလေး ရှောင်တိမ်းသွားနိုင်ခဲ့သည်။
မြေကြီးပေါ်တွင် ကြီးမားသော တွင်းပေါက်ကြီး တစ်ခု ဖြစ်ပေါ်သွားပြီး ဖုန်လုံးကြီးများ ထသွားကာ မီးခိုးများ အူတက်လာခဲ့သည်။
ဖုန်မှုန့်များ ကွဲလွင့်သွားချိန်တွင် ယခင်က မူလ နေရာတွင် ရှိနေသော ဟွမ်ရှန်းရှန်းက ကျန်းချဲ့၏ အနီးသို့ ရောက်ရှိနေပြီ ဖြစ်ပြီး ကျန်းချဲ့က သူမ၏ သေးသွယ်သော ခါးလေးကို လက်တစ်ဖက်ဖြင့် ဖက်ထားကာ လုရှင်းယွင်ကို စိုက်ကြည့်လျက် တည်ငြိမ်စွာ ပြောလိုက်သည်။
"ခွေးကောင်... လေသံ ကတော့ မာသားပဲ... စွမ်းအား ကတော့ သိပ်မကောင်းလှဘူး..."
'တုန်လှုပ်မှု...'
ယခုအခါ ပတ်ဝန်းကျင်ရှိ လူများ အားလုံး အလွန်တရာ အံ့ဩ တုန်လှုပ်နေကြပြီ ဖြစ်သည်။ သိုင်းသမား တစ်ယောက်က လက်တစ်ချက် လှုပ်ရှားလိုက်သည်နှင့် အစွမ်းအစ ရှိမရှိ ကို သိနိုင်ပေသည်။ ကျန်းချဲ့က လက်တစ်ဖက် မြှောက်ပြီး ရိုက်ချလိုက်ရုံဖြင့် လုရှင်းယွင်ကို ခုခံရန် ခက်ခဲစေပြီး နောက်သို့သာ ဆုတ်သွားစေခဲ့သည်။
သူ၏ စွမ်းအား မည်မျှ ကြီးမားကြောင်း သိသာလှပေသည်။
ဒါဆိုရင် ယခုအခါ ကျန်းချဲ့၏ စွမ်းအားက မည်သည့် အတိုင်းအတာ အထိ ရောက်ရှိနေပြီနည်း။ ယွမ်ဟိုင်အဆင့်သို့ ဝင်ရောက်ခါစ ရှိသေးသော်လည်း ပြိုင်ဘက်ကင်း နေပြီလား။ ထို့အပြင် ဟွမ်ရှန်းရှန်း ထွက်ပေါ်လာခြင်းက ဘာကို သက်သေပြနေသနည်း။
သူမ၏ ရေခဲဖီးနစ် ဝိညာဉ်စွမ်းအင်ကို ကျန်းချဲ့ထံသို့ ဆက်သလိုက်ပြီ ဖြစ်ကြောင်း သက်သေပြနေခြင်း ပင် ဖြစ်သည်။ လုမိသားစုက နှစ်ပေါင်းများစွာ ကြိုးစားပမ်းစား အကြံအစည်များ ထုတ်ခဲ့ပြီး ဟွမ်ရှန်းရှန်း အသက် ဆယ်နှစ်ကျော် အရွယ်တွင် လျှို့ဝှက် ခန္ဓာကိုယ် ပါရှိကြောင်း သိရှိပြီးကတည်းက ဟွမ်မိသားစုနှင့် စေ့စပ်ရန် နည်းလမ်းမျိုးစုံ အသုံးပြုခဲ့ကာ ဟွမ်ရှန်းရှန်း၏ ကျင့်ကြံရေး အတွက်လည်း အများကြီး အားစိုက်ထုတ်ခဲ့ကြသည်။
ထို့အပြင် ဟွမ်ရှန်းရှန်း အဆင့်တက်နိုင်စေရန် အတွက် သင့်တော်သော မွေးရာပါ ဝိညာဉ်စွမ်းအင် ကိုပင် အပင်ပန်းခံ ရှာဖွေပေးခဲ့ကြသေးသည်။ ဤမျှလောက် ကြီးမားသော အရင်းအနှီးများ ထည့်ဝင်ခဲ့သော်လည်း ရလဒ် အနေဖြင့် ကျန်းချဲ့ အတွက် မင်္ဂလာ ဝတ်စုံ ချုပ်ပေးလိုက်သကဲ့သို့ ဖြစ်သွားခဲ့သည်လား။
ဤသည်မှာ လုမိသားစု အတွက် အကြီးမားဆုံး အရှက်ကွဲမှု ပင် ဖြစ်သည်။ နောက်ပိုင်း ထိုက်အန်းဒေသ တွင်လည်း ဟာသ တစ်ခု ဖြစ်လာတော့မည် ပင် ဖြစ်သည်။
ဝမ်ဖန်ယွင်က မျက်လုံးများ ပြူးကျယ်သွားပြီး ယခုအခါ ကျန်းချဲ့ကို ကြည့်နေသော အကြည့်များတွင် ကြောက်ရွံ့ လေးစားမှုများနှင့် ချီးကျူးမှုများ ပြည့်နှက်နေပေသည်။
'တကယ် သန်မာတာပဲ...'
'ကျန်းချဲ့ က တကယ်ကို အစွမ်းထက် လွန်းတယ်...'
လုမိသားစု တစ်ခုလုံး ကို ဖျက်ဆီးပစ်ချင်ရုံတင် မကဘူး... လုမိသားစု ရဲ့ နှလုံးသား ကိုပါ သတ်ဖြတ်ပစ်ချင်နေတာ... ကျန်းချဲ့ က ဒါကို ဘယ်လို လုပ်လိုက်သလဲ ဆိုတာ သူ လုံးဝ စိတ်ကူးလို့ပင် မရနိုင်ပေ။
ယခုအခါ ဟွမ်ရှန်းရှန်းက ကျန်းချဲ့၏ ရင်ခွင်ထဲတွင် လိမ္မာရေးခြားရှိစွာ မှီခိုနေသည့် ပုံစံကို ကြည့်ရင်း သူ၏ ခေါင်းထဲတွင် ယခင်က ဟွမ်ရှန်းရှန်းက လူအများ အပေါ်၊ အထူးသဖြင့် လုဖျင်ကျိုး အပေါ် အေးစက်စက် မျက်နှာထားဖြင့် ဆက်ဆံခဲ့သည်များကို ပြန်လည် အမှတ်ရမိသွားသည်။ လုဖျင်ကျိုး ရဲ့ အရှေ့မှာတော့ မောက်မာပြီး အေးစက်နေတယ်။ ကျန်းချဲ့ ရဲ့ အရှေ့မှာတော့ ခွေးလေး တစ်ကောင်လို လိမ္မာနေပြန်တယ်။
ယခုအခါ သူ က ကျန်းချဲ့ကို စီနီယာ တစ်ယောက် အဖြစ် သတ်မှတ်လိုက်ပြီ ဖြစ်သည်။ ဤသည်က လုရှင်းယွင်ကို အင်အားချင်း အနိုင်ယူလိုက်သည်ထက်ပင် သူ့ကို ပို၍ အံ့ဩသွားစေခဲ့သည်။ နည်းလမ်း တွေရော၊ အကြံအစည် တွေပါ ထိပ်တန်း အဆင့် မှာ ရှိနေတာပဲ... ဟွမ်ရှန်းရှန်းကို ဤမျှလောက် စွဲလန်းသွားစေပြီး လုမိသားစု သခင်မလေး ဆိုသော ဂုဏ်ပုဒ်ကိုပင် စွန့်လွှတ်သွားစေခဲ့သည်။
ရေခဲဖီးနစ် ဝိညာဉ်စွမ်းအင်က ဟွမ်ရှန်းရှန်း၏ ခန္ဓာကိုယ် အတွင်း၌ ရှိနေပြီး ဓားဖြင့် လည်ပင်းကို ရွယ်ကာ အတင်းအဓမ္မ စော်ကားမည် ဆိုလျှင်တောင် သူမ သဘောမတူသရွေ့ ရေခဲဖီးနစ် ဝိညာဉ်စွမ်းအင်ကို စုပ်ယူ၍ မရနိုင်ကြောင်း သိထားရမည်။ နှစ်ဖက်စလုံး၏ ဝိညာဉ်နှင့် ခန္ဓာကိုယ် ပေါင်းစပ်သွားပြီး စိတ်သဘောထား တစ်ခုတည်း ဖြစ်သွားမှသာ ဝိညာဉ်စွမ်းအင်ကို အမြင့်ဆုံး အတိုင်းအတာ အထိ သန့်စင်နိုင်မည် ဖြစ်သည်။
'အစွမ်းထက်တယ်... ယုံကြည်လို့ မရနိုင်လောက်အောင်ကို အစွမ်းထက်လွန်းတယ်...'
အံ့ဩ တုန်လှုပ်နေသူမှာ ဝမ်ဖန်ယွင် တစ်ယောက်တည်း မဟုတ်ပေ။ ပတ်ဝန်းကျင်ရှိ လူများ အားလုံး အံ့ဩ တုန်လှုပ်နေကြပြီး တိတ်ဆိတ်သွားခဲ့ကြသည်။ သို့သော် လူအများစု၏ အာရုံစိုက်မှုက ဟွမ်ရှန်းရှန်း အပေါ်တွင် မဟုတ်ဘဲ ကျန်းချဲ့ အပေါ်တွင်သာ ရှိနေကြပေသည်။ သူ၏ ကြီးမားလှသော စွမ်းအားကြောင့် အံ့ဩ ကြောက်ရွံ့နေကြခြင်း ပင် ဖြစ်သည်။
ကျန်းဟိုင်ဂိုဏ်းချုပ် ချန်ရှန်တုန်း၏ မျက်လုံးများက ယခုအခါ အလွန်အမင်း အံ့ဩ တုန်လှုပ်နေပြီး လက်နှစ်ဖက်ပင် တုန်ယင်နေကာ အလွန် စိတ်လှုပ်ရှား နေပေသည်။
'နဂါးစိမ်း ကျန်းဟိုင် ကျင့်စဉ်... သေချာပေါက် နဂါးစိမ်း ကျန်းဟိုင် ကျင့်စဉ် အမှန်ပဲ... လုံးဝ သံသယ ဖြစ်စရာ မလိုဘူး... ဒါက အဲဒီထဲက သိုင်းကွက် တစ်ခု ဖြစ်တဲ့ ကောင်းကင်ယံ က နဂါးစိမ်း ပဲ...'
လွန်ခဲ့သော နှစ်တစ်ရာခန့်က ဂိုဏ်းအတွင်းရှိ အင်အားကြီးသူများ အသုံးပြုသည်ကို သူ မြင်တွေ့ခဲ့ဖူးသည်။ ကျန်းချဲ့ အသုံးပြုသော စွမ်းအားက အများကြီး နောက်ကျနေသေးသော်လည်း သုံးပုံတစ်ပုံခန့်တော့ အသက်ဝင်နေပြီ ဖြစ်သည်။ ဤမျှ တိုတောင်းသော အချိန်အတွင်း အောင်မြင်အောင် လေ့ကျင့်နိုင်ပြီး ဤမျှလောက် စွမ်းအား ရှိနေသည်မှာ...
ဤပါရမီက သူ့ကို ချက်ချင်း တိတ်ဆိတ်သွားစေခဲ့သည်။
လီတောက်ဖျင်က ကျန်းချဲ့ကို ကြည့်နေသော အကြည့်များကလည်း ယခုအခါ အနည်းငယ် ကွာခြားနေပေသည်။ သူ၏ မျက်လုံးများထဲတွင် တိုက်ခိုက်လိုစိတ်များ မြင့်တက်လာခဲ့သည်။ မနိုင်မှန်း သိနေလျှင်တောင် ဤကဲ့သို့သော ရွယ်တူ အင်အားကြီးသူ တစ်ဦးနှင့် တိုက်ခိုက်ကြည့်ချင်နေမိသည်။
လုရှင်းယွင် ကတော့ ယခုအခါ မျက်နှာကြီး ပြာနှမ်းနေပြီ ဖြစ်သည်။ ကျန်းချဲ့ က ယွမ်ဟိုင်အဆင့်သို့ တက်ရောက်ပြီးနောက် တကယ်ကို ပိုပြီး အစွမ်းထက်လာခဲ့ပြီ ဖြစ်သည်။
"မိတ်ဆွေတို့... ဒီနေ့ ကျန်းချဲ့ နဲ့ အဲဒီ မိန်းမယုတ် ကို အတူတူ ဝိုင်းဝန်း သတ်ဖြတ်ကြရအောင်... ပြီးသွားရင် တာဝန် အားလုံးကို ကျုပ် တို့ လုမိသားစု က ယူမယ်... ပြီးတော့ မိတ်ဆွေတို့ ကို ကျေးဇူးဆပ်တဲ့ အနေနဲ့ တစ်ယောက်ကို ယွမ်ချီကျောက်တုံး ဆယ်တုံးစီ ပေးပါ့မယ်..."
အချိန်တိုလေး အတွင်း တိုက်ခိုက်မှုက သူ့ကို နားလည်သွားစေခဲ့သည်။ အကယ်၍ သူ တစ်ယောက်တည်းသာ ဆိုလျှင် ကျန်းချဲ့ကို ယှဉ်ပြိုင်နိုင်ရန် ဆိုသည်မှာ လုံးဝ မဖြစ်နိုင်ပေ။ လူအများ ပူးပေါင်းပြီးမှသာ ကျန်းချဲ့ကို ဖိနှိပ်နိုင်မည် ဖြစ်သည်။
"အမိတာဘာ... သေးငယ်တဲ့ နည်းလမ်းလေး တွေနဲ့များ ဆရာကြီး ရှေ့ လာပြီး လက်စွမ်း ပြချင်နေတယ်... ကျန်းချဲ့... ဒီနေ့ ဘုန်းဘုန်း က မင်းကို ငါတို့ ကျင်းယွမ် ဘုန်းကြီးကျောင်း ရဲ့ မှော်ပညာ တွေကို သေချာ ပြသပေးမယ်..."
ကျဲအဲ့ ဘုန်းကြီးက ကျယ်လောင်စွာ အော်ဟစ်လိုက်ပြီး သူ၏ ကိုယ်ပေါ်ရှိ ဘုန်းကြီး ဝတ်ရုံများ ကွဲအက်သွားခဲ့သည်။ အလွန် ကြမ်းတမ်းပြီး ခွန်အားများ ပြည့်နှက်နေသော ကြွက်သားများဖြင့် ဖွဲ့စည်းထားသည့် ခန္ဓာကိုယ်ကြီး ပေါ်ထွက်လာခဲ့သည်။
ဆေးဘုရင်တောင်ကြား၏ တောင်ကြားသခင် အိုကြီးမှာ ကျန်းချဲ့၏ စွမ်းအားကို မြင်တွေ့ပြီးနောက် အနည်းငယ် နောက်ဆုတ်ချင်စိတ်များ ဖြစ်ပေါ်နေသော်လည်း လူအများ မျက်မှောက်တွင် ကြိုတင် ကတိပေးထားပြီး ဖြစ်သဖြင့် မျက်နှာအပျက်ခံကာ နောက်မဆုတ်ရဲတော့ပေ။ ရင်ထဲတွင် တိတ်တဆိတ် သက်ပြင်းချလိုက်ပြီး ကျဲအဲ့ ဘုန်းကြီး၏ ဘေးတွင် သွားရပ်လိုက်ရတော့သည်။
မွေးရာပါအဆင့် မိသားစု ခေါင်းဆောင် ကတော့ ယခုအချိန်တွင် အလွန် ယုံကြည်ချက် ရှိနေပြီး လူအများ ပူးပေါင်းလိုက်လျှင် ကျန်းချဲ့ကို သတ်ဖြတ်ရန် မခက်ခဲဘူးဟု ထင်မှတ်ကာ ကျယ်လောင်စွာ အော်ဟစ်လိုက်သည်။
"မိစ္ဆာ... မောက်မာ မနေနဲ့... ဒီနေ့ မင်းကို သတ်ပြီး ငါတို့ သိုင်းလောက ရဲ့ အရှိန်အဝါ ကို မြှင့်တင်ပြမယ်..."
"ကျွန်မ ရှင် နဲ့ အတူတူ တိုက်မယ်..."
ဟွမ်ရှန်းရှန်းက လေကို ပြင်းပြင်း တစ်ချက် ရှူသွင်းလိုက်ပြီး မျက်လုံးများက ခိုင်မာနေပေသည်။
"အဘိုးကြီး တစ်ချို့ ကို ရင်ဆိုင်ဖို့ ငါ က မိန်းမ တစ်ယောက် ရဲ့ အကူအညီ ကို မလိုအပ်ပါဘူး..."
ကျန်းချဲ့က တည်ငြိမ်စွာ ပြုံးလိုက်ပြီးနောက် ကျန်းဟိုင်ဂိုဏ်းချုပ် ချန်ရှန်တုန်းကို ကြည့်ကာ လေးနက်သော အသံဖြင့် ပြောလိုက်သည်။
"စီနီယာကြီးချန်... ကျွန်တော်တို့ ရဲ့ တိုက်ပွဲ ထဲမှာ မိန်းမ တစ်ယောက် ကို မပါဝင်စေချင်ပါဘူး... ခင်ဗျား က သူမ ကို ခဏလောက် ကာကွယ်ပေးထားလို့ ရမလား..."
"တပ်မှူးကြီးကျန်း စိတ်ချပါ... ဒီမိန်းကလေး ကို ကျုပ် ကာကွယ်ပေးပါ့မယ်..."
ကျန်းချဲ့၏ စွမ်းအားကို မြင်တွေ့ပြီးနောက် ချန်ရှန်တုန်းက ကျန်းချဲ့၏ အပေါ်တွင် ဆက်လက် ရင်းနှီးမြှုပ်နှံရန် ဆုံးဖြတ်လိုက်သည်။ လုမိသားစုနှင့် အပြီးတိုင် ပြတ်စဲရမည် ဆိုလျှင်တောင် ဝန်လေးမည် မဟုတ်ပေ။ ကျန်းချဲ့က သူ့ကို စိတ်ပျက်စေမည် မဟုတ်ကြောင်း သူ ယုံကြည်ပေသည်။
"အစ်ကိုကြီး စိတ်ချပါ... ကျွန်တော် လည်း ရှိပါတယ်... မရီး ကို ဘာအနာတရ မှ မဖြစ်စေရပါဘူး..."
အပြင်လူများပင် ရှေ့ထွက်လာသည်ကို မြင်သောအခါ ဝမ်ဖန်ယွင်က သွေးဆူလာပြီး အသံကျယ်ကြီးဖြင့် အော်ဟစ်လိုက်သည်။ ဤအော်သံ တစ်ချက်ကြောင့် သူ မည်သို့ ဆူပူခံရမည်ကို သိသော်လည်း သူ က ဒီအတိုင်း ကြည့်မနေနိုင်တော့ပေ။
"အစ်ကိုချန်... ခင်ဗျား က တကယ်ပဲ ငါတို့ လုမိသားစု နဲ့ ရန်သူ ဖြစ်ချင်တာလား..."
လုရှင်းယွင်၏ မျက်နှာက ယခုအခါ ပို၍ ဆိုးရွားလာခဲ့သည်။ တိုက်ပွဲ မစရသေးခင် မှာပင် သိုင်းလောက အင်အားစု အချို့က ကျန်းချဲ့၏ ဘက်တွင် ရပ်တည်သွားခဲ့ခြင်းက လုမိသားစုကို တကယ် မျက်နှာ မပေးရာ ရောက်လှပေသည်။
"မိတ်ဆွေလု ဒေါသမထွက်ပါနဲ့... ဒီနေ့ တိုက်ပွဲ မှာ ကျုပ် ဝင်မပါပါဘူး... ဒါပေမဲ့ လွန်ခဲ့တဲ့ ရက် အနည်းငယ် က တပ်မှူးကြီးကျန်း ဆီမှာ ကျေးဇူး တစ်ခု တင်ထားခဲ့လို့ လက်ခံပေးလိုက်ရုံပါ..." ချန်ရှန်တုန်းက တည်ငြိမ်စွာ ပြောလိုက်သည်။
ကျန်းချဲ့ မျက်လုံးဖြင့် အချက်ပြလိုက်ရာ ဟွမ်ရှန်းရှန်းက သိပ်မလိုလားသော်လည်း အလွန် လိမ္မာရေးခြားရှိစွာ အမိန့်ကို နာခံပြီး ချန်ရှန်တုန်း၏ ဘေးတွင် သွားရပ်လိုက်သည်။ ဝမ်ဖန်ယွင်ကလည်း သူမ၏ အရှေ့တွင် လျင်မြန်စွာ သွားရပ်ကာ တိုးတိုးလေး ပြောလိုက်သည်။
"မရီး စိတ်ချပါ... ကျွန်တော် ရှိနေသရွေ့ ဘယ်သူ့ကိုမှ မရီး ရဲ့ သုံးပေ ပတ်လည် ကို အကပ်မခံပါဘူး..."
"ဝမ် သခင်လေး ကို ကျေးဇူးတင်ပါတယ်..." ဟွမ်ရှန်းရှန်းက အတင်း ပြုံးပြလိုက်သည်။
"ကောင်းပြီ... အရမ်း ကောင်းတယ်... ဒါဆိုရင် မင်းကို အရင် သတ်ပြီးမှ အဲဒီ မိန်းမယုတ် ကို ရှင်းလင်းမယ်..."
လုရှင်းယွင်က ကျယ်လောင်စွာ အော်ဟစ်လိုက်ပြီး အင်္ကျီလက်ကို ဝှေ့ယမ်းလိုက်ရာ ဝိညာဉ်အလင်း တစ်ခု လင်းလက်လာပြီး ယခင်က အသုံးပြုခဲ့သော ဝိညာဉ်ဓား ထွက်ပေါ်လာခဲ့သည်။ သူ၏ အမိန့် တစ်ချက် အောက်တွင် ဆေးဘုရင်တောင်ကြား၏ တောင်ကြားသခင် အိုကြီး၊ ကျဲအဲ့ ဘုန်းကြီး နှင့် အခြား မွေးရာပါအဆင့် သိုင်းသမား တစ်ယောက်တို့က ချက်ချင်း ခုန်တက်ကာ ကျန်းချဲ့ဆီသို့ ပြေးဝင်သွားကြသည်။
သို့သော် သူတို့ လှုပ်ရှားလိုက်သည့် အခိုက်အတန့် တွင်ပင် ကျန်းချဲ့က ကြိုတင် လှုပ်ရှားလိုက်ပြီး မျက်လုံးများ ချက်ချင်း နီရဲသွားကာ သံမဏိလို မာကျောတဲ့ လက်တစ်ဖက်ဖြင့် လက်ဝါး တစ်ချက် ရိုက်ထုတ်လိုက်ရာ သွေးပင်လယ်ကြီး လှိမ့်တက်လာပြီး သွေးပင်လယ် အတွင်းမှ နဂါးစိမ်း ထွက်ပေါ်လာသကဲ့သို့ ပင် ဖြစ်သည်။
ထိုမွေးရာပါအဆင့် မိသားစု ခေါင်းဆောင်၏ ကိုယ်ပေါ်သို့ တိုက်ရိုက် ဝင်ရောက်သွားခဲ့သည်။
"ဘုန်း..."
မျက်စိတစ်မှိတ် အတွင်းမှာပင် ကြောက်မက်ဖွယ်ကောင်းသော စွမ်းအားများ ပေါက်ကွဲထွက်လာပြီး ထိုမိသားစု ခေါင်းဆောင်မှာ လုံးဝ မကာကွယ်နိုင်တော့ဘဲ အစွမ်းကုန် ခုခံရန်သာ တတ်နိုင်တော့သည်။ သို့သော် သူ၏ ကျင့်ကြံမှုက မွေးရာပါ အစပိုင်းအဆင့် သာ ရှိသဖြင့် ကျန်းချဲ့နှင့် အလွန် ကွာခြားလှပေသည်။
သူ၏ နည်းလမ်းများ အားလုံး အသုံးမဝင်တော့ဘဲ ခန္ဓာကိုယ် ပတ်လည်ရှိ အတွင်းအား အကာအကွယ်များ ပင်လျှင် မျက်စိတစ်မှိတ် အတွင်း ကွဲကြေသွားခဲ့သည်။ ကြမ်းတမ်းလှသော နဂါးပုံသဏ္ဍာန် အတွင်းအား က သူ၏ ခန္ဓာကိုယ် ပေါ်သို့ အားကုန် ဝင်ရောက်သွားခဲ့သည်။
"ဘုန်း..."
မျက်စိတစ်မှိတ် အတွင်းမှာပင် သွေးမှုန်များ လွင့်စင်သွားပြီး ပြတ်တောက်သွားသော ခြေလက် အင်္ဂါများက နေရာအနှံ့သို့ ပြန့်ကျဲ ကျဆင်းသွားခဲ့သည်။ တိုက်ခိုက်မှု တစ်ချက်တည်းဖြင့် သွေးမှုန်များ အဖြစ်သို့ ပြောင်းလဲသွားခဲ့ရသည်။
ကျန်းချဲ့က သွေးမှုန်များ အောက်တွင် ရေချိုးနေသကဲ့သို့ ရပ်နေပြီး သူ၏ ပတ်လည်ရှိ အတွင်းအားများက အဆက်မပြတ် လှုပ်ခတ်နေကာ မျက်လုံးများက သွေးရောင်များဖြင့် နီရဲနေပြီး အေးစက်သော အသံဖြင့် ပြောလိုက်သည်။
"မင်းတို့ အားလုံး အတူတူ ဝင်လာခဲ့ကြစမ်း... ကျုပ် က ဘာကို ကြောက်ရမှာလဲ…”