အခန်း ၁၅၄

အခန်း (၁၅၄) ယဇ်ပူဇော်ခြင်း... ရှန်ကွမ်းအဆင့် ကို ချိုးဖောက် ဝင်ရောက်ခြင်း...

ထိုက်ဆန်းမြို့... အစည်းအဝေး ခန်းမဆောင်...

အပြင်ဘက်မှ ဆူညံသံများနှင့် ဆွေးနွေး ပြောဆိုမှုများ အားလုံးကို ကျန်းချဲ့ ကောင်းစွာ သိရှိထားသော်လည်း ဘာခံစားချက်မှ မရှိပေ။ ဤကဲ့သို့သော ကိစ္စများကို သူ အသားကျနေပြီ ဖြစ်သည်။

ယခုအခါ သူ၏ အတွေးများ အားလုံးက စွမ်းအား တိုးတက်ရေး အပေါ်တွင်သာ ရှိနေပေသည်။

ကျင်းယွမ် ဘုန်းကြီးကျောင်း၏ ဖိအား၊ လုကျန်းဟယ်၏ လာရောက် ရန်ရှာမှု နှင့် ချီဆန်းကျား၏ ရင်ဖွင့် စကားများ အားလုံးက ကျန်းချဲ့ကို အလွန် ရှင်းလင်းစွာ သတိပေးနေပေသည်။

ယခုအခါ သူ၏ စွမ်းအားက အလွန် အားနည်းနေသေးသည်။

စွမ်းအား မပြည့်ဝပါက အခြားသူများ၏ သားကောင် သက်သက်သာ ဖြစ်ရမည်။

ဤသဘောတရားကို သူ အမြဲတမ်း ရှင်းလင်းစွာ သိရှိထားပေသည်။

ထို့ကြောင့် ယွမ်ဟိုင် အထွတ်အထိပ် သို့ အခုလေးတင် အောင်မြင်စွာ တက်လှမ်း ပြီးနောက် ကျန်းချဲ့၏ နောက်ထပ် ပစ်မှတ်က ရှန်ကွမ်းအဆင့် သို့ ချိုးဖောက် ဝင်ရောက်ရန် ပင် ဖြစ်သည်။ နောက်ထပ် ခြေတစ်လှမ်း ထပ်မံ တက်လှမ်း နိုင်ပါက သူ၏ ကျင့်ကြံမှု စွမ်းအားက အကြီးအကျယ် တိုးတက်လာမည် ပင် ဖြစ်သည်။

ရွှမ်တန်အဆင့် မထွက်ပေါ်လာသရွေ့ ဘယ်သူကများ သူ့ကို ယှဉ်ပြိုင်နိုင်မည်နည်း။

အကယ်၍ ကျင်းယွမ် ဘုန်းကြီးကျောင်း ၏ မိစ္ဆာ နှိမ်နင်းရေး မျှော်စင် အောက်ရှိ ထိုပြိုင်ဘက်ကင်း မိစ္ဆာဓား ကိုပါ ရရှိမည် ဆိုပါက သူ၏ စွမ်းအားက နောက်တစ်ဆင့် ထပ်မံ မြင့်တက်လာမည် ပင် ဖြစ်သည်။

'စွမ်းအား... စွမ်းအား... အရေးအကြီးဆုံးက စွမ်းအားပဲ...'

ယခုအခါ သူက အမြန်ဆုံး အဆင့်တက်ရန် ဆန္ဒ ပြင်းပြနေပေသည်။

မျက်လုံးများကို မှိတ်လိုက်ပြီး ကျန်းချဲ့က သူ၏ စိတ်အာရုံကို ကောင်းကင်ယဇ်ပလ္လင်ကျောက်တိုင် နေရာ အတွင်းသို့ ဖြည်းညင်းစွာ နစ်ဝင်သွားစေခဲ့သည်။

စိတ်ဆန္ဒ တစ်ချက် ပေါ်လာပြီးနောက် ပစ်မှတ်ကို သတ်မှတ်လိုက်သည်။

[ယဇ်ပူဇော်မည့် ပစ်မှတ် - ရှန်ကွမ်းအဆင့် သို့ ချိုးဖောက် ဝင်ရောက်ခြင်း။]

[ယဇ်ပူဇော်ရန် လိုအပ်ချက် - ယွမ်ချီကျောက်တုံး အလုံး တစ်ရာ၊ အရွက်ကိုးရွက် ဝိညာဉ်ဂျင်ဆင်း တစ်ပင်၊ ဗာဂျရာ ဓာတ်တော် တစ်ဆူ၊ ရွှမ်ယွမ် ဝိညာဉ်အရည် တစ်စက်... သက်တမ်း ငါးနှစ် လျှော့ချမည်... လက်ကျန် သက်တမ်း တစ်ရာ့သုံးဆယ့်ငါးနှစ်... ပူဇော်မည်လား]

မျက်လုံးများ ဖွင့်လိုက်ရာ ကျန်းချဲ့၏ မျက်လုံး အောက်ခြေတွင် အလင်းရောင်များ တောက်ပနေပေသည်။

'ယွမ်ချီကျောက်တုံး အလုံး တစ်ရာ ဟုတ်လား...'

ဤအဆင့်တက်ခြင်း က တကယ်ကို လွယ်ကူသော ကိစ္စ မဟုတ်ပေ။ နောက်ပိုင်း ရောက်လေလေ လိုအပ်သော ယွမ်ချီကျောက်တုံး အရေအတွက်က ပိုပိုပြီး များလာလေလေ ဖြစ်ပြီး အဆမတန်ပင် မြင့်တက်နေပေသည်။ သို့သော် ကံကောင်းသည်မှာ အခုလေးတင် လုမိသားစု ခြံဝင်းကို ဖျက်ဆီးထားသော ကျန်းချဲ့၏ လက်ထဲတွင် အလွန် ချောင်လည်နေပေသည်။

ယွမ်ချီကျောက်တုံး အလုံး တစ်ရာ လောက်ကို သူ လုံးဝ ဂရုမစိုက်ပေ။

ယခင်က ယွမ်ချီကျောက်တုံး တစ်တုံး နှစ်တုံး အတွက် ခေါင်းစားပြီး စဉ်းစားခဲ့ရသည့် အခြေအနေမျိုး နှင့် လုံးဝ မတူညီတော့ပေ။

'ငါ က အရင်တုန်းက ယန်ဂူမြို့ က ကျန်းချဲ့ မဟုတ်တော့ဘူး လေ...'

သူက ချီဆန်းကျားကို တစ်ဝက်ပေးမယ်လို့ ပြောခဲ့ပေမဲ့ တစ်ဖက်လူကလည်း မက်မောခြင်း မရှိဘဲ သူ့ကိုပဲ ယူထားဖို့ ပြောခဲ့သည်။

သို့သော် အလွယ်ကူဆုံး ဖြေရှင်းပြီး သွားပြီ ဖြစ်သော်လည်း ကျန်ရှိနေသော အရာများကတော့ အလွန် ခက်ခဲလှပေသည်။

ပထမဆုံး အနေဖြင့် အရွက်ကိုးရွက် ဝိညာဉ်ဂျင်ဆင်း...

အရွက် တစ်ရွက် ပိုများလာတိုင်း ဆေးသက်တမ်း နှစ်တစ်ရာ ပိုများခြင်း ဖြစ်ပြီး အရွက်ကိုးရွက် ဝိညာဉ်ဂျင်ဆင်း ဆိုသည်မှာ နှစ်ပေါင်း ကိုးရာ သက်တမ်း ရှိသော ဝိညာဉ်ဂျင်ဆင်း ပင် ဖြစ်သည်။

ဆိုလိုသည်မှာ အဆင့်ကိုး ဝိညာဉ်ဂျင်ဆင်း ပင် ဖြစ်သည်။

အကယ်၍ အရွက် တစ်ရွက် ထပ်များလာမည် ဆိုပါက နှစ်တစ်ထောင် သက်တမ်းရှိသော ရတနာ ဆေးပင် ပင် ဖြစ်သွားတော့မည်။

အရင်က သူ အရွက်လေးရွက် ဝိညာဉ်ဂျင်ဆင်း တစ်ပင် ဝယ်ဖို့ တောင်းဆိုတုန်းကတောင် ဝမ်ဖျင်ကျီး က ဘယ်ညာ ရွှေ့ပြီး ငြင်းဆန်ခဲ့သေးသည်။ ဤအရွက်ကိုးရွက် ဝိညာဉ်ဂျင်ဆင်း က မည်မျှ တန်ဖိုးကြီးမည် ဆိုတာကို ခန့်မှန်းကြည့်၍ ရပေသည်။ ယခုအခါ သူ စဉ်းစားနေသည်မှာ ဆေးဘုရင်တောင်ကြား အတွင်းတွင် အရွက်ကိုးရွက် ဝိညာဉ်ဂျင်ဆင်း ရှိနိုင်မလား ဆိုသည်ကို ပင် ဖြစ်သည်။

ဆေးဘုရင်တောင်ကြား က ဂိုဏ်း စတင် တည်ထောင်သည့် အချိန်မှ စ၍ ယခုအထိ ဆိုလျှင် နှစ်ပေါင်း သုံးရာ ကျော်သာ ရှိသေးကြောင်း သူ သိထားသည် မဟုတ်ပါလား။

'အရွက်ကိုးရွက် ဝိညာဉ်ဂျင်ဆင်း ကို ပျိုးထောင်နိုင်ပါ့မလား...'

ဗုဒ္ဓဘာသာ၏ ဗာဂျရာ ဓာတ်တော် ကတော့ သူ့ကို အနည်းငယ် တွေးရ ခက်စေပေသည်။

ဗာဂျရာ ဓာတ်တော် ဆိုသည်မှာ ဗာဂျရာအဆင့် ရဟန်းတော်ကြီးများ ပျံလွန်တော်မူပြီးနောက် ကျန်ရစ်ခဲ့သော အနှစ်သာရများ ဖြစ်ပြီး ဓာတ်တော် ဟု ခေါ်ဆိုကြသည်။

'ဒီအရာက... ဝိညာဉ်အလင်း ကို ဖွင့်လှစ်တာနဲ့ ဘာဆိုင်လို့လဲ...'

ဤအရာက ပို၍ပင် ရရှိရန် ခက်ခဲလှပေသည်။

သူ၏ ယခု လက်ရှိ စွမ်းအားဖြင့် ကျင်းယွမ် ဘုန်းကြီးကျောင်း ကို တိုက်ရိုက် သွားရောက် တိုက်ခိုက်ရန် ဆိုသည်မှာ မဖြစ်နိုင်ကြောင်း သူ တွေးထားပြီး ဖြစ်သည်။ လုံးဝ စွမ်းအား မရှိသလို ရွှမ်တန်အဆင့် သိုင်းဆရာကြီး ကို ယှဉ်ပြိုင်နိုင်စွမ်း လည်း မရှိပေ။

'တခြား နည်းလမ်း နဲ့ ဆိုရင်... ဒီကိစ္စ ကို ရိခုန်း ကို လွှဲပေးလိုက်ရမလား... သူ့ကို ဒီပစ္စည်း သွားခိုးဖို့ ကူညီပေးခိုင်းရမလား...'

'ကျင်းယွမ် ဘုန်းကြီးကျောင်း က နှစ်ပေါင်းများစွာ ရပ်တည်လာခဲ့ပြီး အခုဆိုရင် ဗာဂျရာအဆင့် သိုင်းဆရာကြီး တောင် ရှိနေသေးတာ ဆိုတော့... ဗာဂျရာ ဓာတ်တော် ရှိနေနိုင်ချေ အလွန် များတယ်...'

ဤသည်က ကနဦး ဖြေရှင်းနည်း တစ်ခုတော့ ရရှိသွားပြီ ပင် ဖြစ်သည်။

ရွှမ်ယွမ် ဝိညာဉ်အရည် ကိုတော့... ကျန်းချဲ့ ကြားဖူးထားပေသည်။ ဤအရာက ကျန်းဟိုင်ဂိုဏ်း၏ အဖိုးတန် ရတနာ တစ်ခု ဖြစ်ပြီး ရွှမ်ယွမ် ရေလေး ကဲ့သို့သော ဝိညာဉ် ပစ္စည်းများ နှစ်ပေါင်းများစွာ စုစည်းမှု ကြောင့်သာ ဖြစ်ပေါ်လာနိုင်ချေ ရှိပေသည်။

တစ်စက်ချင်းစီတိုင်း က အလွန် ရှားပါးလှပြီး အပြင်သို့ သတင်း ပျံ့နှံ့သွားလေ့ ရှိသော်လည်း ထိုက်အန်းဒေသ သိုင်းလောက အတွင်းသို့ ဝိညာဉ်အရည် တစ်စက်တောင် လှည့်လည် ရောင်းချခြင်း မရှိခဲ့ဖူးပေ။

"ကြည့်ရတာ... နဂါးစိမ်း ကျန်းဟိုင် ကျင့်စဉ် ကို သုံးပြီး လဲလှယ်မှ ရတော့မယ် ထင်တယ်..."

ကျန်းချဲ့ က ခဏတာ စဉ်းစားပြီးနောက် တိုးတိုးလေး ရေရွတ်လိုက်သည်။

သူ က ချန်ရှန်တုန်း ကို နောက်တစ်ကြိမ် သွားတွေ့ပြီး ပူးပေါင်း တိုက်ခိုက်မည့် ကိစ္စကို ဆွေးနွေးရန် ရည်ရွယ်ထားပြီး ဖြစ်ရာ ယခုအခါ ဤအခွင့်အရေး ကို အသုံးချပြီး ဤကိစ္စကိုပါ တစ်ပါတည်း ဖြေရှင်းလိုက်မည်။ ကျန်းဟိုင်ဂိုဏ်း ပါ ဝင်ရောက်လာမည် ဆိုပါက ကျင်းယွမ် ဘုန်းကြီးကျောင်း နှင့် ဖူလုံကျောင်းတော် တို့ ပူးပေါင်းပြီး သူ့ကို တိုက်ခိုက်ချင်လျှင်တောင်...

သိုင်းလောက တွင် ကြီးမားသော လှိုင်းလုံးကြီးများ ဖြစ်ပေါ်လာအောင် လုပ်နိုင်မည် မဟုတ်ပေ။ အဘယ်ကြောင့်ဆိုသော် အခြား အင်အားစု အများအပြား ကလည်း လိုက်ပါ လှုပ်ရှားကြမည် မဟုတ်သောကြောင့် ပင် ဖြစ်သည်။

ဤသို့ တွေးမိသည်နှင့် ကျန်းချဲ့ က ချက်ချင်း ပြင်ဆင်မှုများ စတင်လိုက်ပြီး နဂါးစိမ်း ကျန်းဟိုင် ကျင့်စဉ် ကို ဝါးရွက်လိပ် များ အပေါ်တွင် ရေးမှတ်ကာ ကျန်းဟိုင်ဂိုဏ်း သို့ ယူသွားရန် ပြင်ဆင်လိုက်သည်။ ယခုအခါ သူ က နဂါးစိမ်း ကျန်းဟိုင် ကျင့်စဉ် ကြီး အောင်မြင်ခြင်း အဆင့်သို့ မရောက်သေးဘဲ အချို့သော ကွက်လပ်များ ရှိနေသေးသော်လည်း...

ယခုဆိုရင် ဆယ်ပုံ မှာ ခုနစ်ပုံ၊ ရှစ်ပုံ လောက် အထိ ပြန်လည် ပြည့်စုံနေပြီ ဖြစ်ရာ အလွန် တန်ဖိုးရှိနေပြီ ပင် ဖြစ်သည်။

ချန်ရှန်တုန်း သေချာပေါက် စိတ်ဝင်စားလိမ့်မည်ဟု သူ ယုံကြည်ပေသည်။

မထွက်ခွာမီ ကျန်းချဲ့ က ကျူးမိသားစု အိမ်တော် သို့ တစ်ခေါက် သွားရောက်ပြီး ကျူးရွှီ ထံမှ သတင်း အချက်အလက် အချို့ကို စုံစမ်းရန် ကြိုးစားခဲ့သော်လည်း ကျူးရွှီ က ယခင် တစ်ခေါက် ပြီးကတည်းက ကျူးမိသားစု အိမ်တော် သို့ ပြန်မလာတော့ဘဲ ကျန်းဟိုင်ဂိုဏ်း အတွင်းတွင် အမြဲတမ်း ကျင့်ကြံနေခဲ့သဖြင့် သူ၏ အကြံအစည် အထမမြောက်ခဲ့ပေ။

သို့သော် သူ သွားရခြင်း ကတော့ အလကား မဖြစ်ခဲ့ပေ။

သခင်မကြီးကျူး နှင့် အတူတူ သေချာ စကားပြောဆို ခဲ့ရပေသည်။

ထို့နောက်တွင် ဗုံးကြဲ လေယာဉ်များ ကိုပါ အသုံးပြုပြီး သူမကို အကြီးအကျယ် ဗုံးကြဲ တိုက်ခိုက်ခဲ့ကာ နောက်ဆုံးတွင် သန်းပေါင်းများစွာသော လက်ရွေးစင် စစ်သည်များ ကိုပါ စွန့်လွှတ်လိုက်ရမှသာ အဆုံးသတ် သွားခဲ့သည်။ သို့သော် သခင်မကြီးကျူး ကလည်း အရှုံးမပေးဘဲ ကြီးမားသော ရှုံးနိမ့်မှု ကို သိနေလျက်နှင့်ပင် တုံ့ပြန် တိုက်ခိုက်မှု အဖြစ် သန်းပေါင်းများစွာသော လက်ရွေးစင် စစ်သည်များ ကို တစ်လုပ်တည်း ဝါးမြိုပစ်ခဲ့ပေသည်။

"တပ်မှူးကြီးကျန်း လာရောက် လည်ပတ်တာ... ကျုပ် အတွက် တကယ့်ကို ဂုဏ်ယူစရာ ပါပဲ..."

ကျန်းဟိုင်ဂိုဏ်း ၏ ပင်မ ခန်းမဆောင် အတွင်းသို့ ရောက်ရှိပြီး မကြာမီမှာပင် ကျန်းချဲ့ က ကျန်းဟိုင်ဂိုဏ်း အတွင်းရှိ ဝိညာဉ် လက်ဖက်ရည် ကို မြည်းစမ်းနေစဉ် ချန်ရှန်တုန်း ၏ ရယ်မောသံ က သူ၏ နားထဲသို့ ရောက်ရှိလာခဲ့ပြီ ဖြစ်သည်။

ဤသည်ကို ကြည့်ခြင်းအားဖြင့် ဝမ်ဖျင်ကျီး ၏ သဘောထား နှင့် အလွန် ကွာခြားကြောင်း မြင်တွေ့နိုင်ပေသည်။

"ကျန်းဟိုင်ဂိုဏ်း က ထိုက်အန်းဒေသ ရဲ့ ထိပ်တန်း အင်အားစု ခြောက်ခု ထဲက တစ်ခု ဆိုတော့... လာရောက် လည်ပတ်ခွင့် ရတာ က ကျန်း ရဲ့ ဂုဏ်ယူစရာ ပါ... စီနီယာကြီးချန် အရမ်း ယဉ်ကျေးလွန်းနေပါပြီ..." ကျန်းချဲ့ က ဟီးဟီး ရယ်မောလိုက်သည်။

"မြို့တော်ဝန်ရုံး ရဲ့ ကိစ္စ ကို ကျုပ် ကြားပြီးပါပြီ... ချီဆန်းကျား က မင်း အပေါ် တကယ်ကို အလေးထားတာပဲ... လုမိသားစု အဘိုးကြီး ရဲ့ အလောင်း ကို မြို့တံခါးဝ မှာ ချိတ်ဆွဲထားတာ ကို ကြည့်ရင် တကယ်ကို ဒေါသထွက်သွားတယ် ဆိုတာ သိသာတယ်..."

ချန်ရှန်တုန်း က သက်ပြင်းချကာ ပြောလိုက်သည်။

သို့သော် သေချာ စဉ်းစားကြည့်ပါက ဤကိစ္စ က အလွန် ပုံမှန် ပင် ဖြစ်သည်။

ကျန်းချဲ့ က ချီဆန်းကျား ၏ လူယုံ ဖြစ်ရုံသာမက ထိပ်တန်း သိုင်းပညာ ပါရမီရှင် တစ်ယောက် လည်း ဖြစ်သည်။ အကယ်၍ သူ့နေရာတွင် သာ ဆိုလျှင် သူ၏ ကျန်းဟိုင်ဂိုဏ်း မှ ပါရမီရှင် များကို အသက်ကြီးသူ တစ်ယောက်က လာရောက် အနိုင်ကျင့်မည် ဆိုပါက သူ လည်း ပိုပြီး ဒေါသထွက်မည် ပင် ဖြစ်သည်။

"လုကျန်းဟယ် က မြို့တော်ဝန်ရုံး ကို ဖျက်ဆီးတယ် ဆိုတာ ပုန်ကန်တာ နဲ့ အတူတူပဲ... မြို့တံခါး မှာ ချိတ်ဆွဲပြီး တခြား သူတွေ ကို သတိပေးတာ ကလည်း ဖြစ်သင့်တဲ့ ကိစ္စ ပါပဲ... ကျုပ် က နောက်ရက် အနည်းငယ် နေရင် သူ့အလောင်း ကို လုမိသားစု ခြံဝင်း ဆီ ပြန်ပို့ပေးမလို့ လုပ်နေတာ...

တစ်မိသားစုလုံး အတူတူ ရှိနေတာ ကမှ အရေးအကြီးဆုံး ပဲ မဟုတ်လား..."

ကျန်းချဲ့ က ပြုံးလျက် ပြောလိုက်သည်။

ချန်ရှန်တုန်း ကတော့ ဟားဟား ရယ်မောလိုက်ပြီး...

"တပ်မှူးကြီးကျန်း မှာ ဒီလိုမျိုး စိတ်ကူး တွေ ရှိလိမ့်မယ် လို့ မထင်ထားခဲ့ဘူး..."

စကား အနည်းငယ် ပြောဆိုပြီးနောက် ကျန်းချဲ့ က လာရောက်ရသည့် အကြောင်းရင်း ကို လုံးဝ မပြသသေးသည်ကို မြင်သောအခါ ချန်ရှန်တုန်း က ချက်ချင်း မေးလိုက်သည်။

"တပ်မှူးကြီးကျန်း ဒီတစ်ခေါက် လာတာ ဘာကိစ္စ များ ရှိလို့လဲ မသိဘူး..."

"ကျန်းဟိုင်ဂိုဏ်း နဲ့ အရောင်းအဝယ် တစ်ခု လုပ်ချင်လို့ပါ..."

"ဘာအရောင်းအဝယ် လဲ... ပြောပြပါဦး..."

ချန်ရှန်တုန်း မျက်ခုံးများ ပင့်တက်သွားပြီး စပ်စုချင်စိတ်များ ဖြစ်ပေါ်လာခဲ့သည်။

"ဒီကိစ္စ သာ အောင်မြင်သွားရင် နောက်ပိုင်း ကျန်းဟိုင်ဂိုဏ်း က အရင်က ဂုဏ်ကျက်သရေ တွေ တစ်စိတ်တစ်ပိုင်း ကို ပြန်လည် ရရှိလာနိုင်ပြီး ထိုက်အန်းဒေသ ကို ကြီးစိုးနိုင်လိမ့်မယ်... ဘယ်လိုလဲ... စီနီယာကြီးချန် ဒီကိစ္စ ကို စိတ်ဝင်စားလား..." ကျန်းချဲ့ နှုတ်ခမ်းထောင့်တွင် အပြုံး တစ်ခု ပေါ်လာပြီး စိတ်ဝင်စားအောင် ဆွဲဆောင်လိုက်သည်။

သို့သော် ချန်ရှန်တုန်း က လူအိုကြီး တစ်ယောက် ဖြစ်ရာ မျက်လုံးများ လှုပ်ရှားသွားပြီး သူ၏ ခန့်မှန်းချက် အရ အမှန်တရား အချို့ကို ခန့်မှန်းမိသွားကာ လေးနက်သော အသံဖြင့် မေးလိုက်သည်။

"တပ်မှူးကြီးကျန်း က ကျင်းယွမ် ဘုန်းကြီးကျောင်း ကို ဖျက်ဆီးဖို့ ပြင်ဆင်နေတာလား..."

"ကျန်း ရဲ့ နဂါးစိမ်း ကျန်းဟိုင် ကျင့်စဉ် နဲ့ လိုက်ဖက်ညီတာ က ကျန်းဟိုင်ဂိုဏ်း နဲ့ ရေစက် ပါနေလို့ပဲ ဖြစ်ရမယ်... ငါ့ကို အသိဆုံး သူက စီနီယာကြီးချန် ပါပဲ... မှန်ပါတယ်... ကျင်းယွမ် ဘုန်းကြီးကျောင်း ကို အတူတူ ပူးပေါင်း ဖျက်ဆီးဖို့ပါပဲ... အဲဒီလို လုပ်လိုက်ရင် ကျန်းဟိုင်ဂိုဏ်း အနေနဲ့ ကျင်းယွမ် ဘုန်းကြီးကျောင်း ရဲ့ အကျိုးအမြတ် တွေကို သိမ်းပိုက်နိုင်မယ် လေ...

ဒီလို ဆိုရင် နှစ် အနည်းငယ် အတွင်း မှာတင် ကျန်းဟိုင်ဂိုဏ်း ရဲ့ အရှိန်အဝါ တွေ ကြီးမားလာပြီး နောက်ပိုင်း မှာ အရင် က ဘိုးဘေး တွေ ရဲ့ ဂုဏ်ကျက်သရေ တွေကို ပြန်ရလာနိုင်ချေ မရှိဘူး လို့ ဘယ်သူ ပြောနိုင်မှာလဲ..."

ချန်ရှန်တုန်း ၏ မျက်လုံးများ မှေးမှိန်သွားပြီး အရှေ့ရှိ လက်ဖက်ရည် ပန်းကန်လုံး ကို ခဏတာမျှ စိုက်ကြည့်နေပေသည်။ ကျန်းချဲ့ ၏ စကား အနည်းငယ် ဖြင့် သူ လုံးဝ မျောပါသွားမည် မဟုတ်ဘဲ ဤကိစ္စ ၏ အန္တရာယ် ကို ကောင်းစွာ သိရှိထားပေသည်။

"ကျင်းယွမ် ဘုန်းကြီးကျောင်း ရဲ့ စွမ်းအား က အရမ်း ကြီးမားလွန်းတယ်... ဖျက်ဆီးဖို့ ဆိုတာ မလွယ်ဘူး... ငါတို့ ကျန်းဟိုင်ဂိုဏ်း တစ်ခုတည်း ရဲ့ အင်အား နဲ့ ဆိုရင် သေဖို့ သက်သက်ပဲ ဖြစ်မှာ..."

"ကျန်းဟိုင်ဂိုဏ်း တစ်ခုတည်း တော့ ဘယ်ဟုတ်ပါ့မလဲ... ဝမ်ရှိုခြံဝင်း က ဝမ်နျန်ကွေ့ ရယ်၊ ကျုပ် ထိုက်ဆန်း မြို့တော်ဝန်ရုံး ရယ်၊ ပြီးတော့ တပ်မှူးချုပ်ချီ လည်း အတူတူ လှုပ်ရှားကြမှာပဲ... ထိုက်အန်းဒေသ မှာ နှစ်ပေါင်းများစွာ အမြစ်တွယ်နေတဲ့ ဒီအဆိပ်အတောက် ကို ရှင်းလင်း ဖယ်ရှားပစ်မှာ..."

ကျန်းချဲ့ က လေးနက်သော အသံဖြင့် ပြန်ဖြေလိုက်သည်။

ချန်ရှန်တုန်း မျက်နှာပေါ်တွင် အံ့အားသင့်မှုများ ဖြစ်ပေါ်လာခဲ့သည်။ ချီဆန်းကျား ပါဝင်လာမည် ဆိုသည်မှာ ပုံမှန် ဖြစ်သော်လည်း ဝမ်နျန်ကွေ့ ပါဝင်လာမည် ဆိုသည်ကတော့ မတူညီတော့ပေ။

သိုင်းလောက မှ လူများက သူ့အကြောင်း ပြောဆိုရာတွင် လူနဲ့ နာမည်နဲ့ လိုက်တယ် ဟု ပြောလေ့ ရှိကြသည်။ ပုံမှန် အချိန်များတွင် အလွန် သတိထားတတ်ပြီး အခြား သူများနှင့် ရန်ငြိုး ဖွဲ့လေ့ သိပ်မရှိပေ။ ယခုအခါ ကျန်းချဲ့၏ ဖျောင်းဖျမှု အောက်တွင် လှုပ်ရှားရန် သဘောတူလိုက်ပြီး ပစ်မှတ် ကလည်း ကျင်းယွမ် ဘုန်းကြီးကျောင်း ဖြစ်နေခြင်း က တကယ်ကို သာမန် မဟုတ်ပေ။

"တကယ်ပဲလား..."

"စီနီယာကြီးချန် က ကျန်း က ရမ်းသမ်း လိမ်ညာ ပြောတတ်တဲ့ လူမျိုး လို့ ထင်နေတာလား..." ကျန်းချဲ့ က ပြန်လည် မေးခွန်း ထုတ်လိုက်သည်။

"အဲဒီလိုတော့ မဟုတ်ပါဘူး... ဝမ်နျန်ကွေ့ ရဲ့ စရိုက် နဲ့ ဆိုရင် လှုပ်ရှားဖို့ သဘောတူတယ် ဆိုတာ တကယ်ကို အံ့ဩစရာ ကောင်းနေလို့ပါ..."

"ဟီးဟီးဟီး... စီနီယာကြီးချန် မသိသေးဘူး ထင်တယ်... ကျုပ် နဲ့ ဦးလေးဝမ် ရဲ့ သား ဝမ်ဖန်ယွင် က ညီအစ်ကို သစ္စာ ဆိုထားတဲ့ ညီအစ်ကို တွေလေ... ညီအစ်ကို သံယောဇဉ် ရှိကြတယ်... ပြီးတော့ ဦးလေးဝမ် ကလည်း သဘောထား ကြီးတဲ့ သူ တစ်ယောက် ပါ...

နည်းနည်း ဖျောင်းဖျ လိုက်တာ နဲ့ ဒီကိစ္စ ကို သဘောတူသွားတာပါပဲ... ဒါပေမဲ့ အမှန်တိုင်း ပြောရရင် ဝမ်ရှိုခြံဝင်း တစ်ခုတည်း နဲ့တော့ အာမခံချက် သိပ်မရှိသေးဘူး... ဒါကြောင့် ကျန်းဟိုင်ဂိုဏ်း ကိုပါ အတူတူ ချမ်းသာဖို့ လာခေါ်တာ...

စီနီယာကြီးချန် ဘယ်လို သဘောရလဲ..."

ယခုအချိန် အထိ ကျန်းချဲ့ ၏ လိမ်ညာ ပြောဆိုမှု များက လုံးဝ စက်ဝိုင်း တစ်ခု လို ဖြစ်သွားခဲ့ပြီ ဖြစ်သည်။ ကျန်းဟိုင်ဂိုဏ်း က နောက်ဆုံး ကွင်းဆက် လေး ပင် ဖြစ်ရာ ယခုအခါ သူ ၏ ပါးစပ် မှ ထွက်လာသော စကား များ အားလုံးက အမှန်တရား များ သာ ဖြစ်နေပေသည်။

'ချီဆန်းကျား... ဝမ်နျန်ကွေ့...'

ချန်ရှန်တုန်း မျက်နှာပေါ်တွင် စဉ်းစားခန်း ဝင်သွားပြီး ဤကိစ္စ၏ ဖြစ်နိုင်ချေ ကို စဉ်းစားနေပေသည်။ သို့သော် ဘယ်လိုပဲ စဉ်းစားစဉ်းစား ဤကိစ္စ က တကယ်ကို အလားအလာ ရှိနေပေသည်။

အကယ်၍ အောင်မြင်သွားပါက ကြီးမားသော အကျိုးအမြတ်များ ရရှိမည် ပင် ဖြစ်သည်။

'လုပ်နိုင်တယ်...'

သို့သော် အခြေအနေ အရ ကျန်းချဲ့ က သူ့ကို လိမ်ညာထားခြင်း မရှိရပေ။

ကျန်းချဲ့ ကလည်း လောမကြီးဘဲ ဝိညာဉ် လက်ဖက်ရည် ကို အေးဆေးစွာ သောက်ရင်း ချန်ရှန်တုန်း ၏ အဖြေ ကို စောင့်ဆိုင်းနေပေသည်။

"တပ်မှူးကြီးကျန်း အနေနဲ့ တကယ်လို့ လှုပ်ရှားမယ် ဆိုရင် သေချာမှု ဘယ်လောက် ရာခိုင်နှုန်း လောက် ရှိမယ် ထင်လဲ..."

ချန်ရှန်တုန်း က အချိန်အတော်ကြာ တိတ်ဆိတ်နေပြီးမှ ကျန်းချဲ့ ကို ကြည့်ကာ မေးလိုက်သည်။

"အကယ်လို့ စီနီယာကြီးချန် က မပူးပေါင်းဘူး ဆိုရင် ၇၀ ရာခိုင်နှုန်း လောက်ပဲ ရှိတယ်... ဒါပေမဲ့ ကျန်းဟိုင်ဂိုဏ်း သာ အတူတူ လှုပ်ရှားမယ် ဆိုရင်တော့... ၉၉ ရာခိုင်နှုန်း သေချာသွားပြီ... ကျန်တဲ့ ၁ ရာခိုင်နှုန်း ကတော့ ကြိုတင် မခန့်မှန်းနိုင်တဲ့ အခြေအနေ တွေ အတွက် ချန်ထားတာပါ..."

ကျန်းချဲ့ က ပြုံးလျက် ပြောလိုက်သည်။

"ကိစ္စ ပြီးသွားရင် တပ်မှူးကြီးကျန်း က တကယ်ပဲ ကျင်းယွမ် ဘုန်းကြီးကျောင်း ရဲ့ အကျိုးအမြတ် တွေကို စွန့်လွှတ်ရက် ပါ့မလား..."

ချန်ရှန်တုန်း အနည်းငယ် သံသယ ရှိနေဆဲ ပင် ဖြစ်သည်။ မည်သို့ပင်ဆိုစေ ကျင်းယွမ် ဘုန်းကြီးကျောင်း ထိန်းချုပ်ထားသော အရင်းအမြစ်များ က အလွန် ကြီးမားလှပြီး ကြီးမားသော စည်းစိမ် ဥစ္စာကြီး တစ်ခု ပင် ဖြစ်သည်။ အကယ်၍ ၎င်းကို ရရှိပါက ကျန်းဟိုင်ဂိုဏ်း အတွက် ကြီးမားသော တိုးတက်မှု တစ်ခု ဖြစ်လာမည် ပင် ဖြစ်သည်။

"ကျုပ် က ငွေကြေး ပိုင်ဆိုင်မှု တွေကိုပဲ ယူမှာပါ... ကျန်တာ တွေ အားလုံး က စီနီယာကြီးချန် နဲ့ ဦးလေးဝမ် တို့ အတူတူ ခွဲဝေ ယူကြပါ... ဒီအချိန် က စပြီး ဒီထိုက်အန်းဒေသ သိုင်းလောက မှာ ငါတို့ သုံးယောက် ပဲ ဆုံးဖြတ်ခွင့် ရှိတော့မယ်..."

"ဒါဆို ဖူလုံကျောင်းတော် ကကော..."

"အကယ်လို့ ဖူလုံကျောင်းတော် က အခြေအနေ ကို နားလည်မယ် ဆိုရင်တော့ သူ့ကို ဆက်ထားပေးလိုက်မယ်... အကယ်လို့ ဖူလုံကျောင်းတော် က အခြေအနေ ကို နားမလည်ဘူး ဆိုရင်တော့ ကျင်းယွမ် ဘုန်းကြီးကျောင်း ရဲ့ နောက်ကို လိုက်ခိုင်းလိုက်ရုံပေါ့..." ကျန်းချဲ့ က တစ်လုံးချင်း ပြောလိုက်သည်။

ချန်ရှန်တုန်း အသက်ကို ပြင်းပြင်း ရှူသွင်းလိုက်ပြီး ဖြည်းညင်းစွာ ခေါင်းညိတ်လိုက်ကာ...

"ကောင်းပြီ... ဒီကိစ္စ ကို ကျုပ် သဘောတူတယ်..."

"စီနီယာကြီးချန် က အခြေအနေ ကို ကောင်းကောင်း နားလည်တဲ့ သူ တစ်ယောက် ဖြစ်မယ် လို့ ကျုပ် သိပြီးသားပါ... ဒါဆိုရင် ငါတို့ ဒုတိယ အရောင်းအဝယ် တစ်ခု ကို ဆက်ပြီး ဆွေးနွေးကြတာပေါ့..."

ကျန်းချဲ့ မျက်နှာပေါ်တွင် အပြုံးများ ပေါ်လာခဲ့သည်။

"နောက်ထပ် ရှိသေးတာလား..."

ကျန်းချဲ့ က မဖြေဘဲ အင်္ကျီလက် အတွင်းမှ ဝါးရွက်လိပ် တစ်ခု ကို ထုတ်ယူကာ စားပွဲပေါ် တင်လိုက်ပြီး တစ်ဖက်လူကို ကြည့်ရင်း...

"နဂါးစိမ်း ကျန်းဟိုင် ကျင့်စဉ် က ကျန်းဟိုင်ဂိုဏ်း အတွက် ဘယ်လောက် အရေးကြီးလဲ ဆိုတာ ကျန်း က ကောင်းကောင်း သိပါတယ်... ဒီတစ်ခေါက် လာတာ က ဒီပစ္စည်း ကို လာပေးတာပါ..."

"တကယ်လား..."

ချန်ရှန်တုန်း မျက်နှာပေါ်တွင် ဝမ်းသာမှုများ ချက်ချင်း ဖြစ်ပေါ်လာပြီး အရှေ့ရှိ ဝါးရွက်လိပ် ကို မျက်တောင်မခတ်တမ်း စိုက်ကြည့်နေပေသည်။

"ပစ္စည်း က ဒီမှာ ရောက်နေပြီပဲ... အတု ဖြစ်နိုင်ပါ့မလား... ဒါပေမဲ့ မျိုးဆက်ငယ် ကြိုတင် ပြောပြချင်တာ ကတော့ ဝါးရွက်လိပ် ထဲက နဂါးစိမ်း ကျန်းဟိုင် ကျင့်စဉ် တွေ က အပြည့်အစုံ မဟုတ်သေးပါဘူး... ဆယ်ပုံ ခုနစ်ပုံ ရှစ်ပုံ လောက်ပဲ ရှိပါသေးတယ်..."

"ဘာဖြစ်လို့ အပြည့်အစုံ မဟုတ်ရတာလဲ..."

"ကျန်တဲ့ အပိုင်း တွေကို မျိုးဆက်ငယ် အနေနဲ့ စဉ်းစားဖို့ အချိန် နည်းနည်း လိုပါသေးတယ်..."

"တပ်မှူးကြီးကျန်း ဘာလိုချင်လဲ..."

လောက တွင် အလကား ရသော ပစ္စည်း ဆိုသည်မှာ မရှိကြောင်း ချန်ရှန်တုန်း နားလည်ပါသည်။ ကျန်းချဲ့ က တစ်ပိုင်း ချန်ထားခဲ့ခြင်း မှာလည်း ကျန်းဟိုင်ဂိုဏ်း ကို ဆွဲဆောင်ရန် ရည်ရွယ်ချက် ရှိနေကြောင်း ထင်ရှားပေသည်။ သို့သော် ဤမျှလောက်နှင့်ပင် သူ့ကို စိတ်လှုပ်ရှားစေရန် လုံလောက်နေပြီ ပင် ဖြစ်သည်။

လွန်ခဲ့သော နှစ်တစ်ရာ က နဂါးစိမ်း ကျန်းဟိုင် ကျင့်စဉ် ပျောက်ဆုံးသွားပြီး ကတည်းက ကျန်းဟိုင်ဂိုဏ်း က တစ်နေ့တခြား ကျဆင်းလာခဲ့ပြီး ဂိုဏ်း အတွင်းရှိ တပည့်များ၏ တိုက်ခိုက်ရေး စွမ်းအား ကလည်း အခြား ဂိုဏ်းများမှ ပင်မ တပည့်များကို မယှဉ်နိုင်တော့ပေ။

အရာအားလုံး က ကျင့်စဉ် အဆင့်အတန်း မမီသောကြောင့် ပင် ဖြစ်သည်။

"ကျန်း က ပစ္စည်း နှစ်ခု ပဲ လိုချင်ပါတယ်..."

ကျန်းချဲ့ က လက်နှစ်ချောင်း ကို ထောင်ပြလိုက်သည်။

"ဘယ်နှစ်ခု လဲ..."

"ပထမ တစ်ခု က ရွှမ်ယွမ် ဝိညာဉ်အရည် တစ်စက် ပါ... ကျန်း က ကျင့်ကြံရေး မှာ အသုံးပြုဖို့ပါ... ဒုတိယ တစ်ခု ကတော့ မွေးရာပါ ဝိညာဉ် စွမ်းအင် တစ်ခု ပါ... ဒါက ကျန်းဟိုင်ဂိုဏ်း အတွက် ဘာမှ မဟုတ်ဘူး မဟုတ်လား..."

"တပ်မှူးကြီးကျန်း နောက်နေတာလား... မွေးရာပါ ဝိညာဉ် စွမ်းအင် ရဲ့ တန်ဖိုး က ဘယ်ခေတ် မှာပဲ ဖြစ်ဖြစ် လမ်းဘေး က ခဲလုံး လောက် အပေါစား မဟုတ်ပါဘူး... သေချာပေါက် တန်ဖိုးကြီး ပါတယ်... ဒါပေမဲ့ ကျုပ် နားမလည်တာက ဘာဖြစ်လို့ တပ်မှူးကြီးကျန်း က ဒါကို လိုအပ်နေရတာလဲ...

မင်း ရဲ့ လက်အောက် က လူယုံ တစ်ယောက်ယောက် အဆင့်တက်ဖို့ လိုနေလို့များလား..."

ရွှမ်ယွမ် ဝိညာဉ်အရည် ကို ချန်ရှန်တုန်း နားလည်နိုင်သော်လည်း မွေးရာပါ ဝိညာဉ် စွမ်းအင် ကိုတော့ အနည်းငယ် နားမလည်နိုင်အောင် ဖြစ်နေပေသည်။

ကျန်းချဲ့ က ခေါင်းခါယမ်းကာ သက်ပြင်းချလိုက်ပြီး...

"တပ်မှူးကျူး မသေဆုံးခင် က သူ့ရဲ့ မိသားစု နဲ့ ဇနီး သမီး တွေကို စောင့်ရှောက်ပေးဖို့ ကျန်း ကို မှာထားခဲ့တယ် လေ... သူ့ သား ကျူးရွှီ ရဲ့ ပါရမီ က မဆိုးပေမဲ့ မွေးရာပါ ဝိညာဉ် စွမ်းအင် ကို လိုအပ်နေလို့ အခုထိ အဆင့် မတက်နိုင်သေးဘူး...

ကျန်း လိုချင်တဲ့ ဒီဝိညာဉ် စွမ်းအင် က ကျူးရွှီ ကို ပေးဖို့ပါ... ဒါမှသာ တပ်မှူးကျူး ရဲ့ ကျေးဇူး ကို ပြန်ဆပ်ရာ ကျမှာပါ..."

သူ က တစ်ခါတစ်ရံ ရမ်းသမ်း ပြောဆိုတတ်သော်လည်း ကတိပေးထားသော ကိစ္စ များကိုတော့ သေချာပေါက် လုပ်ဆောင်ပေးမည် ပင် ဖြစ်သည်။

"တပ်မှူးကြီးကျန်း က တကယ်ကို သံယောဇဉ် ကြီးပြီး ကတိတည်တဲ့ သူ တစ်ယောက်ပဲ..."

ချန်ရှန်တုန်း မျက်နှာပေါ်တွင် လေးစားမှုများ ဖြစ်ပေါ်လာခဲ့သည်။

အပြည့်အစုံ မဟုတ်သော နဂါးစိမ်း ကျန်းဟိုင် ကျင့်စဉ် က လောလောဆယ်တွင် အများကြီး အသုံးမဝင်သေးဘဲ ရွှမ်ယွမ် ဝိညာဉ်အရည် နှင့် မွေးရာပါ ဝိညာဉ် စွမ်းအင် ကို လဲလှယ်ရန် မလုံလောက်သေးသော်လည်း ကျန်းချဲ့၏ လုပ်ရပ်များ က သူ့ကို မိတ်ဆွေဖွဲ့ချင်စိတ် ဖြစ်ပေါ်လာစေခဲ့သည်။

နောင်တစ်ချိန် တွင် ဤလူ ကို အသုံးပြုရမည့် အချိန် ရောက်လာနိုင်ချေ ရှိသည် မဟုတ်ပါလား။

"ကောင်းပြီ... ကျုပ် ဆုံးဖြတ်လိုက်ပြီ... ပစ္စည်း တွေ အားလုံး မင်း ကို ပေးမယ်..."

သူ က ချက်ချင်း လက်တစ်ချက် ဝှေ့ယမ်းကာ ပြောလိုက်သည်။

"ကျေးဇူးတင်ပါတယ်... စီနီယာကြီးချန်..."

ကျန်းချဲ့ က အနည်းငယ် လက်ယှက် နှုတ်ဆက်လိုက်ပြီး ဝါးရွက်လိပ် ကို အရှေ့သို့ တွန်းပို့ပေးလိုက်သည်။

ဝါးရွက်လိပ် ကို ယူပြီးနောက် ချန်ရှန်တုန်း က အမှတ်တမဲ့ မေးလိုက်သည်။

"တပ်မှူးကြီးကျန်း အနေနဲ့ အခု ကျင့်စဉ် ကို ဘယ်လောက် အထိ ပြန်လည် ပြင်ဆင်ပြီးသွားပြီလဲ မသိဘူး..."

"သုံးလ အတွင်း သေချာပေါက် အပြီးသတ် ပါ့မယ်..."

သူ ၏ ကျင့်ကြံမှု ရှန်ကွမ်းအဆင့် အထွတ်အထိပ် သို့ ရောက်ရှိသွားသည့် အခါ ဤကျင့်စဉ် ကို အလိုအလျောက် ပြန်လည် ပြင်ဆင်နိုင်မည် ပင် ဖြစ်သည်။ သုံးလ အချိန် ဆိုသည်မှာ သူ က အချိန် အနည်းငယ် ပိုဆွဲပြီး ပြောလိုက်ခြင်း ပင် ဖြစ်သည်။

ချန်ရှန်တုန်း က လက်ထဲရှိ ပစ္စည်း ကို ကြည့်ပြီး ကျန်းချဲ့ ကို ကျင့်စဉ် ပြန်လည် ပြင်ဆင်ရာတွင် အထောက်အကူ ဖြစ်စေရန် လျှို့ဝှက်ချက် အချို့ ကို ပြောပြရန် ဆုံးဖြတ်လိုက်သည်။ သူ တစ်ပါး ကို ကူညီခြင်း က ကိုယ့်ကိုယ်ကိုယ် ကူညီခြင်း ပင် ဖြစ်သည်။ မဟုတ်လျှင် အချိန် ဖြုန်းရာသာ ကျလိမ့်မည်။

"တပ်မှူးကြီးကျန်း ဒီလောက် ပွင့်လင်းနေမှတော့... ကျုပ် လည်း နဂါးစိမ်း ကျန်းဟိုင် ကျင့်စဉ် ရဲ့ လျှို့ဝှက်ချက် တစ်ခု ကို ပြောပြပါ့မယ်..."

"သြော်... ဘာလျှို့ဝှက်ချက် များလဲ..."

ချန်ရှန်တုန်း က ကျန်းချဲ့ ကို စူးစိုက်ကြည့်ကာ...

"နဂါးစိမ်း ကျန်းဟိုင် ကျင့်စဉ် ကို ပြီးပြည့်စုံတဲ့ အထိ ကျင့်ကြံချင်တယ် ဆိုရင်... မွေးရာပါ နဂါး စွမ်းအင် တစ်ခု ကို ကိုယ်တွင်း ကို ပေါင်းစပ်ဖို့ အကောင်းဆုံး ပဲ... မဟုတ်ရင် ဒီကျင့်စဉ် ရဲ့ နက်နဲတဲ့ အဓိပ္ပာယ် ကို ကျင့်ကြံ အောင်မြင်ဖို့ ခက်ခဲလိမ့်မယ်... အရင်တုန်းက ကျန်းဟိုင်ဂိုဏ်း အင်အား အကောင်းဆုံး အချိန် မှာ တုန်းက...

ဂိုဏ်း ထဲမှာ နဂါး စွမ်းအင် ကို မွေးမြူတဲ့ နည်းလမ်း တွေ ရှိခဲ့တယ်... မြေကြော စွမ်းအင် တွေကို ယူပြီး အစီအရင် တွေ နဲ့ ပြုစုပျိုးထောင်ကာ နောက်ပိုင်း မျိုးဆက် တွေ ကျင့်ကြံဖို့ အတွက် ထားပေးခဲ့တာ..."

ကျန်းချဲ့ မျက်မှောင် အနည်းငယ် ကြုတ်သွားခဲ့သည်။ ဤကိစ္စ ကို သူ ပထမဆုံး အကြိမ် ကြားဖူးခြင်း ပင် ဖြစ်သည်။

'ဒါဆို နောက်ပိုင်း ယဇ်ပူဇော်စရာ ပစ္စည်းတွေ ထဲမှာ မွေးရာပါ နဂါး စွမ်းအင် တစ်ခု လည်း ပါဝင်လာနိုင်ချေ ရှိတယ် မဟုတ်လား...'

"ဒီနဂါး စွမ်းအင် ကို သုံးဖို့ ဘယ်လောက် ကြာအောင် မွေးမြူရမလဲ..."

ချန်ရှန်တုန်း က လေးနက်သော အသံဖြင့် ပြောလိုက်သည်။

"ဆယ်နှစ် လောက် ဆိုရင် သုံးဖို့ လုံလောက်ပါပြီ... ဒါပေမဲ့ မွေးမြူတဲ့ အချိန် ပိုကြာလေ ပိုကောင်းလေပဲ... နောက်ပိုင်း အထူး ခန္ဓာကိုယ် မျိုး ကိုတောင် ကျင့်ကြံ အောင်မြင်နိုင်ချေ ရှိတယ်..."

"အထူး ခန္ဓာကိုယ်..."

ကျန်းချဲ့ မျက်မှောင် အနည်းငယ် ကြုတ်သွားခဲ့သည်။ နဂါးစိမ်း ကျန်းဟိုင် ကျင့်စဉ် တွင် ဤကဲ့သို့သော စွမ်းရည်မျိုး ရှိနေသေးတာလား။

ချန်ရှန်တုန်း က ခေါင်းညိတ်လိုက်ပြီး...

"ဒီခန္ဓာကိုယ် ကို နဂါးဟိန်း ခန္ဓာကိုယ် လို့ ခေါ်တယ်... လျှို့ဝှက် ခန္ဓာကိုယ် အမျိုးအစား တစ်ခု ပဲ... ဒါပေမဲ့ နောက်ပိုင်း မှ ကျင့်ကြံ အောင်မြင်နိုင်တာ... ဒီလို ဆိုရင် နဂါး စွမ်းအင် လည်း ပါလာပြီး စစ်မှန်တဲ့ နက်နဲတဲ့ အဓိပ္ပာယ် ကို ကျင့်ကြံ အောင်မြင်နိုင်မယ်... နောက်ပိုင်း ကျင့်ကြံရေး အတွက် လည်း အများကြီး အကျိုး ရှိတယ်..."

"နဂါး စွမ်းအင် မရှိရင် ပြီးပြည့်စုံအောင် မလုပ်နိုင်ဘူးလား..."

"သေချာပေါက် ရတာပေါ့... ဒါပေမဲ့ နောက်ပိုင်း ရွှမ်တျန်း နဂါး အသွင်ပြောင်း ကျင့်စဉ် နဲ့ အပြန်အလှန် ပေါင်းစပ်ဖို့ မဖြစ်နိုင်တော့ဘူး... နက်နဲတဲ့ အဓိပ္ပာယ် တွေ နည်းနည်း လျော့သွားလိမ့်မယ်..."

"ဒါဆို အခု ကျန်းဟိုင်ဂိုဏ်း ထဲမှာ နဂါး စွမ်းအင် ရှိသေးလား..."

အနည်းဆုံး ဆယ်နှစ် လောက် မွေးမြူရမယ့် နဂါး စွမ်းအင် ကို သူ ဘယ်လို လုပ် စောင့်နိုင်ပါ့မလဲ။

ချန်ရှန်တုန်း မျက်နှာပေါ်တွင် ရှက်ရွံ့မှုများ ဖြစ်ပေါ်လာပြီး...

"မြေနဂါး စွမ်းအင် မွေးမြူတဲ့ နည်းလမ်း က ဂိုဏ်း ထဲမှာ ရှိသေးတယ်... ဒါပေမဲ့ အရင်းအမြစ် တွေ အများကြီး ကုန်ကျတယ်... ပြီးတော့ နဂါးစိမ်း ကျန်းဟိုင် ကျင့်စဉ် ကလည်း စောစောကတည်းက ပျောက်ဆုံးသွားခဲ့တာ ဆိုတော့... ကျုပ် လည်း တစ်နေ့နေ့ ပြန်ရလာမယ် လို့ မထင်ထားခဲ့ဘူး... ဒါကြောင့် နဂါး စွမ်းအင် ကို ဆက်ပြီး မွေးမြူမထားခဲ့ဘူး..."

ကျန်းချဲ့ မျက်မှောင် တင်းကျပ်စွာ ကြုတ်သွားပြီး အနည်းငယ် မကျေမနပ် ဖြင့် မေးလိုက်သည်။

"တခြား အစားထိုး လို့ ရမယ့် နည်းလမ်း တွေ ရှိသေးလား..."

ချန်ရှန်တုန်း ခေါင်းခါယမ်းလိုက်ပြီး...

"အကယ်လို့ စစ်မှန်တဲ့ နဂါး စွမ်းအင် ဒါမှမဟုတ် နဂါးကြော စွမ်းအင် တွေ ရှိမယ် ဆိုရင် အစားထိုး လို့ ရတယ်... ဒါပေမဲ့ မြေနဂါး စွမ်းအင် ထက်စာရင် ပိုပြီး ရဖို့ ခက်ခဲလိမ့်မယ်... ဒါပေမဲ့ တပ်မှူးကြီးကျန်း အနေနဲ့ ကိုယ့်ကိုယ်ကိုယ် အထင်မသေးပါနဲ့...

တကယ်တော့ မြေနဂါး စွမ်းအင် မွေးမြူတဲ့ နည်းလမ်း က သိုင်းလောက ထဲမှာ အရမ်းကြီး တန်ဖိုးကြီးတဲ့ အရာ တော့ မဟုတ်ပါဘူး... တချို့သော ဂိုဏ်း တွေ က သူတို့ တပည့် တွေ ကျင့်ကြံဖို့ အတွက် သူတို့ ရဲ့ မြေကြော တွေ အပေါ်မှာ နဂါး စွမ်းအင် တွေကို မွေးမြူလေ့ ရှိကြတယ်...

သေချာ လိုက်ရှာမယ် ဆိုရင် အခွင့်အရေး အများကြီး ရှိပါသေးတယ်…”