အခန်း ၁၈၁

“အခန်း (၁၈၁) သိုင်းသခင်ကို ထပ်မံသတ်ဖြတ်ခြင်း

"မသေသေးပါဘူး..."

ကျန်းချဲ့က ခေါင်းကို ဖြည်းညင်းစွာ ခါယမ်းလိုက်သည်။

"တကယ်လား..."

ရွှီယွမ်တာအိုဆရာ၏ မျက်လုံးများထဲတွင် အလင်းရောင်များ တောက်ပသွားပြီး သက်ပြင်းရှည်ကြီး တစ်ချက်ကို ချလိုက်ကာ လုံးဝ စိတ်အေးသွားတော့သည်။

ရွှမ်ဟယ် မသေသေးသရွေ့ ဆက်လက် တိုက်ခိုက်ရန် မျှော်လင့်ချက် ရှိနေသေးသည်။ ထိုသို့မဟုတ်ပါက ယနေ့ ဖူလုံကျောင်းတော်၏ တာအိုလမ်းစဉ်မှာ ဤနေရာတွင် လုံးဝ ပျက်သုဉ်းသွားရတော့မည် ဖြစ်သည်။ အချိန်ခဏမျှ တောင့်ခံထားနိုင်ပါက ရွှမ်ဟယ်တာအိုဆရာ အကူအညီပေးရန် သေချာပေါက် ရောက်လာပေလိမ့်မည်။

"ဒါဆို မင်းက ဘယ်လိုလုပ်ပြီး..."

ချီဆန်းကျား၏ မျက်နှာထား အနည်းငယ် ပြောင်းလဲသွားခဲ့သည်။ သူက ကျန်းချဲ့ အနေဖြင့် ရွှမ်ဟယ်တာအိုဆရာနှင့် ဝမ်ချန်ဆရာတော်တို့ကို ရှင်းလင်းပြီးမှ သူ့ကို လာရောက်ကူညီခြင်း ဖြစ်မည်ဟု ထင်မှတ်ထားခဲ့သည်။ သို့သော် လုံးဝ မရှင်းရသေးဘဲ ရောက်လာခြင်း ဖြစ်နေသဖြင့် ဤသည်က အနည်းငယ် စိတ်လိုက်မာန်ပါ လုပ်လွန်းရာ ကျနေပေသည်။

သူကိုယ်တိုင်လည်း အချိန်အတန်ကြာအောင် ဆက်လက် တောင့်ခံထားနိုင်သေးသည်။ အကယ်၍ ဤအလောတကြီး လုပ်ရပ်ကြောင့်သာ ရှုံးနိမ့်သွားမည်ဆိုပါက တကယ်ကို နစ်နာလွန်းလှပေသည်။

"အရိုးပြာတောင် မကျန်အောင် အမှုန့်ဖြစ်သွားလို့ သူ့အလောင်း ဘယ်နားရောက်သွားလဲဆိုတာ ငါရှာမတွေ့တော့တာ... ဒါပေမဲ့ ဝမ်ချန်ဆိုတဲ့ ခေါင်းတုံးဘုန်းကြီး ကတော့ ငါ့လက်ထဲမှာတင် အသေဆိုးနဲ့ သေသွားခဲ့ပြီ..."

ကျန်းချဲ့က နှုတ်ခမ်းထောင့်ကို တွန့်ကွေးကာ တည်ငြိမ်စွာ ရယ်မောလိုက်သည်။

ရွှီယွမ်တာအိုဆရာမှာ ဆွံ့အသွားခဲ့သည်။

"ရိုင်းစိုင်းလိုက်တာ... ငါကိုယ်တော်ကိုတောင် လှောင်ပြောင်ရဲတယ်ပေါ့လေ..."

ကျန်းချဲ့၏ စကားကို ကြားလိုက်ရသောအခါ ရွှီယွမ်တာအိုဆရာ တကယ် ဒေါသထွက်သွားခဲ့သည်။ မွေးရာပါအဆင့် သာမန် သိုင်းသမားလေး တစ်ယောက်က သူ့ကို လှောင်ပြောင်ပြီး မျက်စိထဲ မထားခြင်းမှာ ကောင်းကင်နှင့် မြေကြီး မည်မျှ ကျယ်ဝန်းသည်ကို မသိဘဲ ရိုင်းစိုင်း မောက်မာလွန်းလှပေသည်။

"ဖူလုံကျောင်းတော်တောင် ပျက်သုဉ်းတော့မှာကို မင်းကို လှောင်ပြောင်တော့ကော ဘာဖြစ်လဲ..."

ကျန်းချဲ့က ဓားထိပ်ဖျားဖြင့် တစ်ဖက်လူကို တည့်တည့် ချိန်ရွယ်လိုက်သည်။

တုနန်ဆရာတော်နှင့် တိုက်ပွဲအပြီးတွင် သူ၏ ကိုယ်ပိုင်စွမ်းအားအပေါ် အခြေခံအားဖြင့် ရှင်းလင်းသော အသိအမြင်တစ်ခု ရရှိသွားခဲ့ပြီ ဖြစ်သည်။ စစ်မှန်သော ရွှမ်တန်အဆင့် သိုင်းသခင် တစ်ပါးကို လုံးဝ မယှဉ်ပြိုင်နိုင်သေးသော်လည်း ဝမ်ကျဲ့ မိစ္ဆာဓား၏ ကြောက်မက်ဖွယ်ကောင်းသော အရှိန်အဝါကို အားကိုးပြီး အကွက်အနည်းငယ်မျှတော့ တောင့်ခံနိုင်စွမ်း ရှိပေသည်။

ဤအခြေအနေတွင် အဓိက အင်အားဖြစ်သော ချီဆန်းကျားပါ ပေါင်းထည့်လိုက်မည် ဆိုပါက အရာအားလုံးက ဘာမှ ပူပန်စရာ မရှိတော့ပေ။

"မှန်တယ်... မင်းကို လှောင်ပြောင်တော့ကော ဘာဖြစ်လဲ... ရွှီယွမ်... မင်း သေရမယ့်အချိန် ရောက်ပြီ..."

ချီဆန်းကျားက အေးစက်စက် နှာမှုတ်လိုက်ပြီး ရင်ထဲမှ အလုံးကြီး လုံးဝ ကျသွားခဲ့ပြီ ဖြစ်သည်။ ရွှမ်ဟယ်တို့ လူစု သေဆုံးသွားပြီ ဆိုသည်နှင့် သူ ဘာမှ စိုးရိမ်စရာ မလိုတော့ပေ။ ချက်ချင်းပင် လှံထိပ်ကို ဝှေ့ယမ်းကာ ရွှီယွမ်တာအိုဆရာဆီသို့ တိုက်ရိုက် ထိုးနှက်လိုက်သည်။

စူးရှသော အလင်းတန်းများ ချက်ချင်း ပေါက်ကွဲထွက်ပေါ်လာပြီး ငွေရောင် မြွေကြီး တစ်ကောင် ဖန်တီးကာ လှံထိပ်ဖျားမှ ပြေးထွက်လာခဲ့သည်။ မည်သည့် တွန့်ဆုတ်မှုမျှ မရှိသလို အသိပေး နှုတ်ဆက်ခြင်းမျိုးလည်း မရှိဘဲ တိုက်ရိုက် ဝင်ရောက် တိုက်ခိုက်လိုက်ခြင်းပင် ဖြစ်သည်။

ယခင်က သူ၏ ပါးစပ်မှ ဘာမှ ဂရုမစိုက်ကြောင်း ပြောဆိုနေခဲ့သော်လည်း ရွှီယွမ်တာအိုဆရာ၏ ဖိအားပေးမှုကြောင့် အရပ်လေးမျက်နှာသို့ လိုက်လံ ရှောင်တိမ်းနေရသဖြင့် ရင်ထဲတွင် အနည်းငယ် မွန်းကျပ်နေခဲ့သည်။ ယခုအခါ ကျန်းချဲ့ ရောက်ရှိလာပြီဖြစ်ရာ သေချာပေါက် ကလဲ့စားချေရမည့် အချိန် ရောက်လာပြီ ဖြစ်သည်။

ရွှီယွမ်တာအိုဆရာကိုသာ သတ်ဖြတ်နိုင်ပါက ဖူလုံကျောင်းတော် ပျက်သုဉ်းသွားပြီဟု ကြေညာနိုင်မည် ဖြစ်သည်။ တစ်ချိန်တည်းမှာပင် သူ အနေဖြင့်လည်း ထိုက်အန်းဒေသကို အပြည့်အဝ ထိန်းချုပ်နိုင်ပြီး စကားတစ်ခွန်းဖြင့် အရာအားလုံးကို ခြယ်လှယ်နိုင်မည့် အာဏာကို ရရှိမည် ဖြစ်သည်။

အခြားတစ်ဖက်တွင်လည်း စိတ်ချင်း ဆက်သွယ်ထားသည့်အလား ကျန်းချဲ့က တစ်ပြိုင်နက်တည်း လှုပ်ရှားလိုက်သည်။ သူ၏ စွမ်းအားများကို စုစည်းလိုက်ပြီး သတ်ဖြတ်လိုစိတ် သုံးပါးနှင့် သွေးပင်လယ် သိုင်းစိတ်ဆန္ဒကို ဖွင့်လှစ်ကာ မိစ္ဆာဓား အပေါ်သို့ ထည့်သွင်းလိုက်သည်။

"သွေးပင်လယ်... သတ်ဖြတ်ခြင်းကပ်ဆိုး..."

မျက်စိတစ်မှိတ်အတွင်းမှာပင် ကြောက်မက်ဖွယ်ကောင်းသော ဓားအလင်းတန်း တစ်ခု ပေါက်ကွဲထွက်ပေါ်လာပြီး ရွှီယွမ်တာအိုဆရာဆီသို့ တိုက်ရိုက် ခုတ်ချလိုက်လေသည်။

"ဖိနှိပ်စမ်း..."

ကျန်းချဲ့နှင့် ချီဆန်းကျားတို့၏ တစ်ပြိုင်နက်တည်း တိုက်ခိုက်မှုကို ရင်ဆိုင်ရသောအခါ ရွှီယွမ်တာအိုဆရာက ချက်ချင်း လက်နှစ်ဖက်ဖြင့် လက်သင်္ကေတ ပြုလုပ်လိုက်သည်။

သူ၏ ရွှမ်တန်အမြုတေ အတွင်းမှ စွမ်းအားများ ထွက်ပေါ်လာပြီး အစိမ်းရောင် အလင်းတန်းများက သူ၏ တစ်ကိုယ်လုံးကို လျင်မြန်စွာ လွှမ်းခြုံသွားခဲ့သည်။ ထို့နောက် ခြေသုံးချောင်းပါ ဧရာမ ကြေးဒယ်အိုး ပုံရိပ်ယောင်ကြီး တစ်ခုအဖြစ် ပြောင်းလဲသွားခဲ့သည်။ သို့သော် ထိုကြေးဒယ်အိုးကြီးမှာ သူ့ကို အုပ်မိုးကာ လွှမ်းခြုံထားခြင်း ဖြစ်သည်။ ဗုဒ္ဓဘာသာ၏ ရွှေရောင် ခေါင်းလောင်း ကဲ့သို့သော ကာကွယ်ရေး နတ်စွမ်းရည် တစ်မျိုးပင် ဖြစ်သည်။

ကောင်းကင်ယံ ကြေးဒယ်အိုး အကာအကွယ်။

'ဝုန်း...'

ခြေသုံးချောင်းပါ ကြေးဒယ်အိုးကြီး ဖန်တီးပြီးသွားသည့် အခိုက်အတန့်တွင် တိုက်ခိုက်မှု နှစ်ခု ချက်ချင်း ကျရောက်လာပြီး အပေါ်သို့ ဝင်တိုက်မိသွားရာ ကြောက်မက်ဖွယ်ကောင်းသော ပေါက်ကွဲသံကြီး ထွက်ပေါ်လာခဲ့သည်။ ပြင်းထန်သော တုန်ခါမှု ဂယက်လှိုင်းများက အပူလှိုင်းများ အဆင့်ဆင့် ဖြစ်ပေါ်စေပြီး အရပ်လေးမျက်နှာသို့ လွင့်စင်သွားခဲ့သည်။

သို့သော် ခြေသုံးချောင်းပါ ကြေးဒယ်အိုးကြီးမှာ အနည်းငယ်မျှပင် ထိခိုက်ပျက်စီးခြင်း မရှိခဲ့ပေ။

ချီဆန်းကျား၏ မျက်လုံးများ မှေးကျဉ်းသွားပြီး မျက်နှာထား အလွန် လေးနက်သွားခဲ့သည်။

ယခင် တိုက်ပွဲတွင် ရွှီယွမ်တာအိုဆရာက ဤကဲ့သို့သော နည်းလမ်းမျိုးကို အသုံးပြုခဲ့သည်ကို သူ လုံးဝ မမြင်တွေ့ခဲ့ဖူးပေ။ သို့သော် စဉ်းစားကြည့်လျှင်လည်း ယုတ္တိရှိပေသည်။ ယခင်က ရွှီယွမ်တာအိုဆရာက အသာစီး ရနေသဖြင့် ကာကွယ်ရန် လုံးဝ မလိုအပ်ခဲ့ခြင်း ဖြစ်သည်။

သို့သော် တကယ်တမ်း လက်တွေ့တွင်မူ ရွှီယွမ်တာအိုဆရာမှာ ချီဆန်းကျား တွေးထင်ထားသလောက် သက်သောင့်သက်သာ မရှိလှပေ။ အမှန်တကယ်တော့ ဤတစ်ကြိမ်တွင် သူက အစွမ်းကုန် ထုတ်သုံးထားခြင်း ဖြစ်ပြီး ကျန်းချဲ့၏ စွမ်းအားကို စမ်းသပ်ကြည့်ရန်သာ ရည်ရွယ်ခဲ့ခြင်း ဖြစ်သည်။

အမှန်တရားက ကျန်းချဲ့ အလွန် အစွမ်းထက်ကြောင်း သက်သေပြလိုက်ပြီ ဖြစ်သည်။

ထိုသူ နှစ်ယောက်၏ တိုက်ခိုက်မှုက ကြေးဒယ်အိုးကြီးကို မဖျက်ဆီးနိုင်ခဲ့သော်လည်း အကြီးအကျယ် တုန်လှုပ်သွားစေခဲ့သည်။ သူသာ အခြေခံ အုတ်မြစ် မခိုင်မာခဲ့လျှင် ထိုသူ နှစ်ယောက်၏ ပူးပေါင်း တိုက်ခိုက်မှုကို ကာကွယ်နိုင်ရန် တကယ်ကို ခက်ခဲလှပေမည်။

"သတ်..."

ချီဆန်းကျားက ဒေါသတကြီး အော်ဟစ်လိုက်ပြီး သူ၏ ပုံရိပ်က ကြေးဒယ်အိုးကြီး အရှေ့သို့ မျက်စိတစ်မှိတ်အတွင်း ရောက်ရှိသွားကာ လှံဖြင့် တစ်ချက် ထိုးနှက်လိုက်သည်။ ရွှီယွမ်တာအိုဆရာ၏ လိပ်ခွံလို အကာအကွယ်က ဘယ်လောက်တောင် ခိုင်မာနိုင်မလဲ ဆိုသည်ကို သူ တကယ်ပဲ မယုံကြည်နိုင်ပေ။

'ဘန်း...'

'ဘန်း...'

'ဘန်း...'

အချိန်တိုလေး အတွင်းမှာပင် ချီဆန်းကျားက လှံချက် ဆယ်ချက်ကျော် ဆက်တိုက် ထိုးနှက်လိုက်ပြီး လှံချက်တိုင်းက နေရာတစ်ခုတည်းသို့သာ တိတိကျကျ ကျရောက်သွားခဲ့သည်။ နောက်ဆုံးတွင် ကြီးမားလှသော ငွေရောင် အလင်းတန်းများက ကြေးဒယ်အိုးကြီးကို လှုပ်ခတ်သွားစေပြီး အက်ကြောင်း တစ်ခု ထွက်ပေါ်လာစေခဲ့သည်။

သို့သော် ရွှီယွမ်တာအိုဆရာ၏ နှုတ်ခမ်းထောင့်က တွန့်ကွေးသွားခဲ့ပြီး နောက်တစ်ခဏတွင် ကောင်းကင်ယံ ကြေးဒယ်အိုး အတွင်းမှ ချက်ချင်း ထွက်ပေါ်လာကာ ကျန်းချဲ့ဆီသို့ တိုက်ရိုက် ပြေးဝင် တိုက်ခိုက်သွားခဲ့သည်။

ဤအခိုက်အတန့်တွင် တုနန်ဆရာတော် ကြုံတွေ့ခဲ့ရသော အခက်အခဲကို သူ နောက်ဆုံးတွင် နားလည် သဘောပေါက်သွားခဲ့ပြီ ဖြစ်သည်။ ဂိုဏ်းပျက်သုဉ်းမည်မှာ သေချာနေပြီ ဖြစ်ရာ သူ လုပ်နိုင်သည်မှာ နောက်ဆုံးအချိန်တွင် ရန်သူများကို တတ်နိုင်သမျှ များများ သတ်ဖြတ်သွားရန်သာ ဖြစ်သည်။

ချီဆန်းကျားကို သတ်ဖြတ်ရန် သူ့တွင် ယုံကြည်ချက် မရှိပေ။ မည်သို့ပင်ဆိုစေ အဆင့်တူ သိုင်းသခင် တစ်ပါးကို သတ်ဖြတ်ရန် ဆိုသည်မှာ ထိုမျှလောက် မလွယ်ကူပေ။ မဟုတ်လျှင် ယခင်က ဤမျှလောက် အချိန်ကြာအောင် အကြိတ်အနယ် ဖြစ်နေမည် မဟုတ်ပေ။

သို့သော် ကျန်းချဲ့ကတော့ မတူပေ။ သူက မွေးရာပါအဆင့် ကျင့်ကြံမှုသာ ရှိသေးသည်။

နတ်လက်နက် အဆင့်အတန်းရှိသော မိစ္ဆာဓားကို ပိုင်ဆိုင်ထားလျှင်တောင် နောက်ဆုံးတွင် မွေးရာပါအဆင့် နယ်ပယ် အတွင်း၌သာ ရှိနေသေးရာ သူ့ကို သတ်ဖြတ်ရန်မှာ ချီဆန်းကျားကို သတ်ဖြတ်ခြင်းထက် အများကြီး ပိုမို လွယ်ကူပေ။

ထို့အပြင် ယနေ့ ဖူလုံကျောင်းတော်၏ ဘေးဒုက္ခများ အားလုံးက ကျန်းချဲ့ ကြောင့်သာ ဖြစ်သည်။ သူ့ကို မသတ်ဖြတ်ရပါက ရင်ထဲရှိ ဒေါသမီးများကို လုံးဝ ငြိမ်းသတ်နိုင်မည် မဟုတ်ပေ။ ဖူလုံကျောင်းတော် ပျက်သုဉ်းရမည် ဆိုလျှင်တောင် ကျန်းချဲ့ကို အတူတူ သေဖော်သေဖက် အဖြစ် ဆွဲခေါ်သွားမည် ဖြစ်သည်။

သူ အလွန် ရှင်းလင်းစွာ မြင်တွေ့နေရသည်။ ကျန်းချဲ့က တကယ်ကို ရှားပါးလှသော ကျင့်ကြံရေး ပါရမီရှင် တစ်ယောက် ဖြစ်သည်။ မဟုတ်လျှင် ဤမျှ အချိန်တိုလေးအတွင်း ဆက်တိုက် အဆင့်တက်လှမ်းနိုင်မည် မဟုတ်ပေ။ ထိပ်တန်း ပါရမီရှင် တစ်ယောက်ကို အသေဖော် အဖြစ် ဆွဲခေါ်သွားရခြင်းက တကယ်ကို တန်လှပေ။

'ဟွန့်...'

ချီဆန်းကျားက အေးစက်စက် နှာမှုတ်လိုက်သည်။ သူ၏ မျက်စိရှေ့မှာပင် ကျန်းချဲ့ကို လာရောက် တိုက်ခိုက်ခြင်းမှာ သူ့ကို အလွန် အထင်သေးလွန်းရာ ကျနေပေသည်။ ချက်ချင်းပင် ရှေ့သို့ ပြေးထွက်ရန် ပြင်လိုက်သော်လည်း သူ မလှုပ်ရှားရသေးမီမှာပင် သူ၏ အရှေ့ရှိ ကောင်းကင်ယံ ကြေးဒယ်အိုး အကာအကွယ်ကြီးမှာ ပြင်းထန်စွာ ပေါက်ကွဲ ပျက်စီးသွားခဲ့သည်။

'ဝုန်း...'

ပြင်းထန်သော ပေါက်ကွဲသံကြီး ထွက်ပေါ်လာပြီး ကောင်းကင်ယံ ကြေးဒယ်အိုး ပျက်စီးသွားကာ ကြီးမားလှသော ရိုက်ခတ်မှုက ချီဆန်းကျား၏ ကိုယ်ပေါ်သို့ တိုက်ရိုက် ကျရောက်သွားသဖြင့် သူ့ကို ပေတစ်ရာကျော်ခန့် နောက်ဆုတ်သွားစေပြီး ကိုယ်ပေါ်ရှိ သံချပ်ကာများပင် ပြိုကွဲလုနီးပါး ဖြစ်သွားခဲ့ရသည်။

"သေစမ်း..."

ချီဆန်းကျားက ဆဲရေး တိုင်းထွာလိုက်ပြီး မျက်နှာထား အလွန် ရုပ်ဆိုးသွားခဲ့သည်။

ဤအခိုက်အတန့်တွင် ချီဆန်းကျားကို တမင် အချိန်ဆွဲထားခဲ့သော ရွှီယွမ်တာအိုဆရာက အမြန်နှုန်းကို ရုတ်တရက် မြှင့်တင်လိုက်ပြီး လက်ထဲရှိ ယပ်တောင်ကို တစ်ချက် ဝှေ့ယမ်းလိုက်ရာ အလင်းတန်း ရာချီက ကျန်းချဲ့ဆီသို့ ချက်ချင်း ပြေးဝင်လာပြီး ထက်မြက်လှသော ဓားအရှိန်အဝါ များကို ထုတ်လွှတ်နေပေသည်။

ဓားစွမ်းအင် မဟုတ်သော်လည်း ဓားစွမ်းအင်ထက်ပင် ပိုမို အစွမ်းထက်နေပေသည်။

သို့သော် ကျန်းချဲ့ ကလည်း လုံးဝ တုံ့ပြန်မှု မရှိသော သစ်သားရုပ် မဟုတ်ပေ။ ရွှီယွမ်တာအိုဆရာ ကြေးဒယ်အိုး အတွင်းမှ ထွက်ပေါ်လာသည့် အချိန်ကတည်းက ဤတစ်ကြိမ် သူ၏ ပစ်မှတ်မှာ မိမိ ဖြစ်ကြောင်း ကျန်းချဲ့ သိရှိခဲ့ပြီး ချက်ချင်းပင် တွန့်ဆုတ်မနေဘဲ နောက်သို့ လှည့်ကာ ထွက်ပြေးလိုက်သည်။

တကယ့် အစစ်အမှန် ရွှမ်တန်အဆင့် သိုင်းသခင် တစ်ပါးကို ထိပ်တိုက် ရင်ဆိုင်ရန် သူ့တွင် ထိုစွမ်းအား လုံးဝ မရှိသေးပေ။

"ထွက်ပြေးချင်နေတာလား... အသက်ကို ထားခဲ့စမ်း..."

ရွှီယွမ်တာအိုဆရာက ဒေါသတကြီး အော်ဟစ်လိုက်ပြီး ယပ်တောင်ကို နောက်တစ်ကြိမ် ထပ်မံ ဝှေ့ယမ်းလိုက်ရာ ယခင်က ထွက်ပေါ်လာသော အလင်းတန်း ရာချီက ချက်ချင်း ပြန့်ကျဲသွားပြီး ကောင်းကင်ကို ဖုံးလွှမ်းမည့် ပိုက်ကွန်ကြီး တစ်ခု အဖြစ် ပြောင်းလဲကာ ကျန်းချဲ့ကို ပိတ်လှောင်ရန် ကြိုးစားလိုက်သည်။

"ပျက်စမ်း..."

ကျန်းချဲ့က လက်တစ်ဖက်ဖြင့် အတွင်းအားများကို စုစည်းကာ နဂါးပုံသဏ္ဍာန် အတွင်းအားများကို အဆက်မပြတ် ရိုက်ထုတ်လိုက်ရာ ကောင်းကင်နှင့် မြေကြီး အကြား လှည့်ပတ်နေပြီး အပေါ်မှ ကျဆင်းလာသော အလင်းတန်း ပိုက်ကွန်ကြီး နှင့် ဝင်တိုက်မိသွားကာ မျက်စိတစ်မှိတ် အတွင်း ပတ်ဝန်းကျင်တွင် ပေါက်ကွဲသံများ အဆက်မပြတ် ထွက်ပေါ်လာခဲ့သည်။

'ဟွန့်...'

အေးစက်စက် နှာမှုတ်လိုက်ပြီး ရွှီယွမ်တာအိုဆရာက ဓားလက်သင်္ကေတကို မြှောက်လိုက်ရာ မျက်စိတစ်မှိတ် အတွင်း ပတ်ဝန်းကျင်ရှိ သဘာဝ ယွမ်ချီ စွမ်းအင်များ ဆူပွက်လာပြီး အစိမ်းရောင် ဓားစွမ်းအင် မရေမတွက်နိုင်အောင် စုစည်းလာကာ ဓားစွမ်းအင် မြစ်ကြီး တစ်စင်း အဖြစ် ပြောင်းလဲသွားခဲ့သည်။

"မိစ္ဆာကို သတ်ဖြတ်မယ်..."

ဓားစွမ်းအင် မြစ်ကြီးက ကောင်းကင်နှင့် မြေကြီးကို ဖောက်ထွင်းသွားပြီး ထက်မြက်လှသော အရှိန်အဝါများ လျှံကျနေကာ ရွှီယွမ်တာအိုဆရာက တိုးညှင်းစွာ အော်ဟစ်လိုက်သည်နှင့် ဓားစွမ်းအင် မြစ်ကြီးက လေဟာနယ်ကို ခွင်း၍ ကျန်းချဲ့ဆီသို့ ပြေးဝင်သွားကာ ဖြတ်သန်းသွားရာ နေရာတိုင်းရှိ အရာအားလုံး အမှုန့် အဖြစ် ပြောင်းလဲသွားခဲ့ရသည်။

ကျန်းချဲ့၏ မျက်နှာထား အလွန် လေးနက်သွားပြီး သူ၏ နည်းလမ်း မျိုးစုံကို အသုံးပြုကာ ချက်ချင်း ပြန်လည် တိုက်ခိုက်လိုက်သည်။

ဓားအလင်းတန်းများ၊ လက်သီး စွမ်းအားများ၊ နဂါးပုံသဏ္ဍာန် အတွင်းအားများ ဆက်တိုက် ထွက်ပေါ်လာသည်။ သို့သော် ဤနည်းလမ်းများက ဓားစွမ်းအင် မြစ်ကြီး၏ စွမ်းအားကို လျော့ကျသွားစေရုံသာ ရှိပြီး အပြည့်အဝ ဖျက်ဆီးပစ်နိုင်ခြင်း မရှိပေ။ ဓားစွမ်းအင် မြစ်ကြီးက အရှိန်အဟုန် လုံးဝ မလျော့ကျဘဲ ကျန်းချဲ့ဆီသို့ တည့်တည့် ဖိချလာခဲ့သည်။

'ဝုန်း...'

ကြီးမားလှသော ပေါက်ကွဲသံကြီး တစ်ခု ထွက်ပေါ်လာပြီး ကျန်းချဲ့မှာ အစွမ်းထက်သော ဓားစွမ်းအင်များ၏ အတင်းအကျပ် ရိုက်ချခြင်းကို ခံလိုက်ရကာ ပတ်ဝန်းကျင်ရှိ တောင်နံရံ တစ်ခု အပေါ်သို့ ရိုက်ချခံလိုက်ရသည်။ အဆုံးအစ မရှိသော ကြောက်မက်ဖွယ် ဓားစွမ်းအင်များ အားလုံးက သူ့အပေါ်သို့ ကျရောက်သွားပြီး ကျန်းချဲ့ကို မသတ်ဖြတ်ရလျှင် လုံးဝ လက်လျှော့မည် မဟုတ်သည့် အလား ဖြစ်နေပေသည်။

"ကျန်းချဲ့..."

ချီဆန်းကျားက မျက်လုံးများကို ပြူးကျယ်စွာ ဖွင့်လိုက်ပြီး သွားများကို တင်းကျပ်စွာ ကိုက်ထားလိုက်ကာ ရွှီယွမ်တာအိုဆရာ အပေါ် အလွန်အမင်း ဒေါသထွက်သွားခဲ့ပြီ ဖြစ်သည်။

ကျန်းချဲ့ဆိုသည်မှာ သူ အလွန် မျှော်လင့်ချက် ကြီးကြီးမားမား ထားရှိသော မျိုးဆက်သစ် လူငယ် တစ်ယောက် ဖြစ်ရာ ဖူလုံကျောင်းတော်တွင် ဘယ်လိုလုပ် အသေခံနိုင်မည်နည်း။ သူ နောက်ဆုတ်သွားရသည့် အခိုက်အတန့်လေးကို အခွင့်ကောင်းယူပြီး လူငယ် တစ်ယောက်ကို အသေအလဲ တိုက်ခိုက်ခြင်းမှာ တကယ်ကို သိုင်းလောက စည်းကမ်း မရှိလွန်းလှပေ။

"ဒီနေ့ ငါကိုယ်တော် က အသက်ကို စတေးပြီးတော့ ဖြစ်ဖြစ် မင်းလို ခွေးအိုကြီးကို သေချာပေါက် သတ်ပစ်မယ်..."

ဒေါသထွက်နေသော ချီဆန်းကျားက ဤစကားကို အော်ဟစ်လိုက်ပြီး နောက်တစ်ခဏတွင် သူ၏ လက်ထဲရှိ ငွေရောင် လှံရှည်၏ ဝိညာဉ် စွမ်းအားကို အတင်းအကျပ် လှုံ့ဆော်လိုက်ကာ ခန္ဓာကိုယ် အတွင်းရှိ ရွှမ်တန်အမြုတေ မှ စွမ်းအားများကို ရူးသွပ်စွာ စုစည်းပြီး ငွေရောင် လှံရှည် အပေါ်သို့ ထည့်သွင်းလိုက်သည်။

'ဝုန်း...'

မျက်စိတစ်မှိတ် အတွင်း ငွေရောင် အလင်းတန်းများ ကောင်းကင်အထိ ထိုးတက်သွားပြီး သဘာဝ ယွမ်ချီ စွမ်းအင်များကို စုစည်းကာ အပေါ်မှနေ၍ ရွှီယွမ်ဆီသို့ တည့်တည့် ရိုက်ချလိုက်လေသည်။

'ဟင်...'

ရွှီယွမ်တာအိုဆရာက လျင်မြန်စွာ သတိပြန်ဝင်လာပြီး ယပ်တောင်ကို တစ်ချက် ဝှေ့ယမ်းလိုက်ရာ အစိမ်းရောင် အလင်းတန်းများ က ကိုယ်ပတ်လည်တွင် လွှမ်းခြုံသွားခဲ့သည်။

သို့သော် ဤတစ်ကြိမ်တွင် ကောင်းကင်ယံ ကြေးဒယ်အိုး အကာအကွယ်ကို ဖန်တီးရန် အချိန်မမီတော့ဘဲ ချီဆန်းကျား၏ လှံချက်ကို အတင်းအကျပ် ကာကွယ်လိုက်ရသည်။ သူ၏ တစ်ကိုယ်လုံး ညည်းတွားသွားပြီး ခြေလှမ်း ဆယ်လှမ်းကျော် နောက်ဆုတ်သွားရကာ မှသာ အရှိန်ကို ရပ်တန့်နိုင်ခဲ့သည်။

"ကောင်းပြီ... ကောင်းပြီ... ကောင်းပြီ... ဒီလို ဆိုမှတော့ ဒီနေ့ မင်းနဲ့ငါ သူသေကိုယ်သေ တိုက်ခိုက်ကြတာပေါ့..."

ရွှီယွမ်တာအိုဆရာက ချီဆန်းကျားကို လေးနက်စွာ စူးစိုက်ကြည့်လိုက်ပြီး လက်တစ်ဖက်ဖြင့် လက်သင်္ကေတ ပြုလုပ်လိုက်သည်။

ဧရာမ အစိမ်းရောင် လက်ဝါးကြီး တစ်ခု မျက်စိတစ်မှိတ် အတွင်း ဖြစ်ပေါ်လာခဲ့သည်။

ချီဆန်းကျားက ရွှီယွမ်နှင့် စကား အပို ပြောနေရန် ရည်ရွယ်ချက် မရှိပေ။ လက်ကို မြှောက်ကာ လှံတစ်ချက် ပစ်လွှတ်လိုက်ပြီး အစိမ်းရောင် ဧရာမ လက်ဝါးကြီးကို တိုက်ရိုက် ဖျက်ဆီးပစ်လိုက်သည်။ ထို့နောက် လက်ထဲရှိ ဝိညာဉ် လှံကို စွန့်လွှတ်လိုက်ပြီး မိမိ၏ ရင်ဘတ်ကို လက်သီးဖြင့် တစ်ချက် ထုလိုက်သည်။

လောကလူသားများ အားလုံးက သူ၏ လှံသိုင်းမှာ ပြိုင်ဘက်ကင်းကြောင်း သာ သိရှိကြပြီး သူကိုယ်တိုင် လက်သီးသိုင်းကို နှစ်ပေါင်းများစွာ ကျင့်ကြံခဲ့ကြောင်း သိရှိသူ အလွန် နည်းပါးလှပေသည်။

သို့သော် သူ ကျင့်ကြံထားသော လက်သီး နတ်စွမ်းရည်မှာ အခြားသူများနှင့် အနည်းငယ် ကွာခြားပေသည်။ သူ ကျင့်ကြံထားသော လက်သီးသိုင်းမှာ မိမိကိုယ်ကိုယ် အရင် ဒဏ်ရာရစေပြီးမှ သူတစ်ပါးကို ဒဏ်ရာရစေသော သိုင်းပညာ ဖြစ်သည်။

အသက်စွန့် တိုက်ခိုက်ရသော နည်းလမ်း ဖြစ်သဖြင့် နှစ်ပေါင်းများစွာ အတွင်း ချီဆန်းကျားက ဤနည်းလမ်းကို တစ်ခါမှ မသုံးခဲ့ဖူးပေ။ သို့သော် ဤတစ်ကြိမ်တွင်တော့ မတူတော့ပေ။ သူ တကယ် ဒေါသထွက်သွားခဲ့ပြီ ဖြစ်သည်။

'ဖူး...'

ချီဆန်းကျားက သွေးတစ်လုတ်ကို အန်ထုတ်လိုက်ပြီး တစ်ကိုယ်လုံးရှိ အရှိန်အဝါများ ရုတ်တရက် မြင့်တက်လာခဲ့သည်။

'ဘန်း...'

'ဘန်း...'

'ဘန်း...'

ဆက်တိုက် လက်သီး သုံးချက်ကို ချီဆန်းကျားက မိမိ၏ ကိုယ်တွင်း အင်္ဂါများ အပေါ်သို့ ထိုးနှက်လိုက်ပြီး အနှစ်သာရ သွေး သုံးလုတ်ကို အန်ထုတ်လိုက်ရာ သူ၏ ကိုယ်ပိုင် အရှိန်အဝါများ ကလည်း အဆက်မပြတ် မြင့်တက်လာပြီး အလွန် အစွမ်းထက်သော ဖိအားကြီးများ ချက်ချင်း ထွက်ပေါ်လာခဲ့သည်။

"သေလိုက်စမ်း..."

ချီဆန်းကျားက သွေးများ စွန်းထင်းနေသော သွားများကို ပေါ်အောင် ဖြဲပြလိုက်ပြီး ဒေါသတကြီး အော်ဟစ်လိုက်ရာ လက်မောင်းရှိ သံချပ်ကာ ဝတ်စုံပင် စွမ်းအားများ ပြန့်ထွက်လာမှုကို မခံနိုင်ဘဲ ပေါက်ကွဲ ပျက်စီးသွားခဲ့သည်။ ထို့နောက် သူက ရွှီယွမ်တာအိုဆရာဆီသို့ အားကုန် လက်သီး တစ်ချက် ထိုးနှက်လိုက်လေသည်။

လက်သီးချက် ထွက်ပေါ်လာသည်နှင့် ကောင်းကင်ကို တုန်လှုပ်သွားစေခဲ့သည်။

'အဟွတ်... အဟွတ်... အဟွတ်...'

တောင်နံရံ အတွင်းသို့ ရိုက်ချခံလိုက်ရသော ကျန်းချဲ့မှာ သွေးများ အဆက်မပြတ် အန်ထုတ်နေပြီး မျက်နှာထား အလွန် လေးနက်နေပေသည်။

ဤသည်မှာ သူ ရှန်ကွမ်းအဆင့်သို့ ရောက်ရှိပြီးကတည်းက ပထမဆုံး အကြိမ် အပြင်းအထန် ဒဏ်ရာ ရရှိခြင်း ပင် ဖြစ်ပြီး ရွှီယွမ်တာအိုဆရာက တကယ်ကို လည်လွန်းလှပေသည်။ ချီဆန်းကျားကို အရင် ပိတ်လှောင်ထားပြီးနောက် သူ့ကို တွန့်ဆုတ်မနေဘဲ အသေအလဲ တိုက်ခိုက်ခဲ့ခြင်း ပင် ဖြစ်သည်။

ထင်သည့်အတိုင်းပင် အသက် ရာချီ နေလာသော မိစ္ဆာအိုကြီး များ ဆိုသည်မှာ တကယ်ကို ရိုးရှင်းသူ တစ်ယောက်မှ မရှိပေ။

အကယ်၍ ဝမ်ကျဲ့ မိစ္ဆာဓားသာ အလွန် မာကျော ခိုင်ခံ့ပြီး အရှေ့တွင် ကာကွယ်ထားနိုင်၍သာ မဟုတ်လျှင် သူ ဤဓားစွမ်းအင် မြစ်ကြီးကို ဘေးကင်းစွာ ကာကွယ်နိုင်လိမ့်မည် မဟုတ်ပေ။ သို့သော် ဤသို့ ဖြစ်နေလျှင်တောင် သူ အပြင်းအထန် ဒဏ်ရာ ရရှိသွားခဲ့ပြီ ဖြစ်သည်။

သို့သော် ဤသည်က သူ နောက်ဆုတ်သွားမည်ဟု ဆိုလိုခြင်း မဟုတ်ပေ။ ဆန့်ကျင်ဘက် အနေဖြင့် သွေးများက သူ၏ ရက်စက် ကြမ်းကြုတ်မှုကို ပိုမို လှုံ့ဆော်ပေးလိုက်သကဲ့သို့ ပင် ဖြစ်နေပေသည်။

ဝမ်ကျဲ့ မိစ္ဆာဓားကို တင်းကျပ်စွာ ဆုပ်ကိုင်လိုက်ပြီး ကျန်းချဲ့၏ တစ်ကိုယ်လုံးရှိ အနှစ်သာရ သွေးများက ဓားကိုယ်ထည် အပေါ်သို့ လျင်မြန်စွာ စီးဝင်သွားပြီး စုပ်ယူခံလိုက်ရသည်။ တစ်ချိန်တည်းမှာပင် ဓားကိုယ်ထည် အပေါ်တွင်လည်း ထူးဆန်းသော အလင်းရောင်များ လင်းလက်နေပေသည်။

သူ ယခုအခါ တောင်နံရံ အတွင်း၌ ရှိနေသော်လည်း အပြင်ဘက်ရှိ အခြေအနေ များကို ရှင်းလင်းစွာ သိရှိနေပြီး အပြင်ဘက်ရှိ လှုပ်ရှားမှု များကို ကြားနေရကာ ချီဆန်းကျား နှင့် ရွှီယွမ်တို့ အသေအလဲ တိုက်ခိုက်နေကြောင်း သိရှိထားသည်။ သူ ကတော့ ဤအခွင့်အရေးကို ယူပြီး စွမ်းအားများကို စုစည်းရမည် ဖြစ်သည်။

နောက်ဆုံးတွင် တစ်ချက်တည်းဖြင့် အနိုင်အရှုံးကို အဆုံးအဖြတ် ပေးရမည်။

အဖိုးအခ အနည်းငယ် ပေးဆပ်ရမည် ဆိုလျှင်တောင် ဝမ်ကျဲ့ မိစ္ဆာဓား က တစ်ဖက်လူကို ကြီးမားလှသော အံ့အားသင့်စရာ တစ်ခု သေချာပေါက် ပေးစွမ်းနိုင်မည်ဟု သူ ယုံကြည်ထားပေသည်။

လက်သီး တစ်ချက် ထိုးနှက်လိုက်သည်နှင့် လေပြင်းများ တိုက်ခတ်ပြီး တိမ်တိုက်များ စုစည်းလာခဲ့သည်။

ချီဆန်းကျား က မျက်လုံးများ နီရဲနေပြီး မိမိကိုယ်တိုင် ပြင်းထန်စွာ ဒဏ်ရာရရှိမည်ကို လုံးဝ ဂရုမစိုက်ဘဲ ရွှီယွမ် ဆိုသော ခွေးသူခိုး ကို သေချာပေါက် ဖျက်ဆီးပစ်ရန် ဆုံးဖြတ်ထားပေသည်။

"ဘာ..."

ရွှီယွမ်တာအိုဆရာ၏ မျက်နှာထား အနည်းငယ် ပြောင်းလဲသွားခဲ့သည်။ ချီဆန်းကျား၏ ဤလက်သီးချက်က သူ့ကို ကြီးမားလှသော အန္တရာယ်ကြီး တစ်ခုကို ခံစားလိုက်ရစေသဖြင့် ချက်ချင်း အနည်းငယ်မျှ တွန့်ဆုတ်မနေဘဲ ရွှမ်တန် စွမ်းအားများကို လှုံ့ဆော်ကာ ကိုယ်ပတ်လည်ရှိ ဓားစွမ်းအင်များကို လျင်မြန်စွာ စုစည်းလိုက်သည်။

ထက်မြက်လှသော အရှိန်အဝါများ လွင့်စင်နေသည့် ဓားစွမ်းအင် မြစ်ကြီး အဖြစ်သို့ နောက်တစ်ကြိမ် ထပ်မံ ပြောင်းလဲသွားစေခဲ့သည်။

ဓားထွက်ပေါ်လာပြီး လက်သီး ကျဆင်းလာသည်။

'ဝုန်း...'

တိုက်ခိုက်မှု နှစ်ခု က တိုက်ရိုက် ဝင်တိုက်မိသွားကြသည်။ ကြီးမားလှသော အသံကြီး တစ်ခု ထွက်ပေါ်လာပြီး ကောင်းကင်နှင့် မြေကြီးကို တုန်ခါသွားစေခဲ့သည်။

မရေမတွက်နိုင်သော ဓားစွမ်းအင်များ အားလုံးက လက်သီးစွမ်းအား၏ ဖျက်ဆီးခြင်းကို ခံလိုက်ရပြီး ပြန့်ထွက်သွားသော ဂယက်လှိုင်းများက ပတ်ဝန်းကျင်ကို အပျက်အစီးများ အဖြစ်သို့ ပြောင်းလဲသွားစေခဲ့သည်။ သို့သော် သူ၏ အစွမ်းအထက်ဆုံးသော နည်းလမ်း ဖြစ်နေလျှင်တောင် ချီဆန်းကျား၏ လက်သီးစွမ်းအားကို လုံးဝ မဖျက်ဆီးနိုင်ခဲ့ဘဲ သူ၏ ကာကွယ်ရေး အတွင်းအား အပေါ်သို့ တိုက်ရိုက် ကျရောက်သွားခဲ့သည်။

'ဘန်း...'

ကာကွယ်ရေး အတွင်းအားများ ပျက်စီးသွားပြီး ရွှီယွမ်တာအိုဆရာ၏ နှုတ်ခမ်းထောင့်မှ သွေးများ စီးကျလာကာ ပေတစ်ရာကျော်ခန့် နောက်ဆုတ်သွားရပြီး ခန္ဓာကိုယ် အတွင်းရှိ သွေးချီများ ဆူပွက်နေကာ မျက်နှာထားက အလွန် လေးနက်နေပေသည်။

"ကောင်းလိုက်တဲ့ နည်းလမ်းပဲ..."

ပြိုင်ဘက် တစ်ယောက် ဖြစ်နေလျှင်တောင် ရွှီယွမ်တာအိုဆရာ က ချီဆန်းကျား၏ ဤလက်သီးချက်၏ ကြမ်းကြုတ်မှုကို အသိအမှတ် မပြုဘဲ မနေနိုင်ခဲ့ပေ။

သေချာသည်မှာ အဖိုးအခ အနေဖြင့် ယခုအခါ ချီဆန်းကျား မှာလည်း ပြင်းထန်သော ဒဏ်ရာကို ရရှိထားပြီး တစ်ကိုယ်လုံးရှိ အရှိန်အဝါများက အတက်အကျ ဖြစ်နေကာ မေးအောက်ရှိ မုတ်ဆိတ်မွေးများ ပင်လျှင် သွေးများဖြင့် စွန်းထင်းနေပေသည်။

"ခွေးမသား..."

ချီဆန်းကျား တွင် ယခင်က အရှိန်အဝါများ လုံးဝ မရှိတော့ဘဲ တိုက်ရိုက် ဆဲရေးတိုင်းထွာလိုက်သည်။

အဘယ်ကြောင့်ဆိုသော် ယခုအခါ ကျန်းချဲ့၏ အခြေအနေ ဘယ်လို ရှိနေသလဲ ဆိုသည်ကို သူ မသိသလို သွားရောက် စစ်ဆေးရန်လည်း ခွန်အား မရှိတော့ဘဲ ရွှီယွမ်တာအိုဆရာ ကို အရင် သတ်ဖြတ်ရန် သာ ရှိတော့သောကြောင့် ပင် ဖြစ်သည်။ ထို့နောက် မိမိ၏ ဒဏ်ရာကို လုံးဝ ဂရုမစိုက်တော့ဘဲ ရင်ဘတ်ကို လက်သီးဖြင့် အဆက်မပြတ် ထုကာ အနှစ်သာရ သွေးများကို စုစည်းလိုက်သည်။

တစ်ချိန်တည်းမှာပင် လက်တစ်ဖက်ဖြင့် ငွေရောင် လှံရှည်ကို ပြန်လည် ခေါ်ယူလိုက်ပြီး ပါးစပ်ထဲမှ အနှစ်သာရ သွေးများ အားလုံးကို ငွေရောင် လှံရှည် အပေါ်သို့ ပက်ဖြန်းလိုက်ကာ နောက်တစ်ခဏတွင် ချီဆန်းကျား က တစ်ဖက်လူကို စကား အပိုပြောရန် အခွင့်အရေး မပေးတော့ဘဲ လှံဖြင့် ချက်ချင်း ထိုးနှက်လိုက်လေသည်။

'ဟွန့်...'

"ငါကိုယ်တော်က မင်းကို တကယ် ကြောက်နေတယ်လို့ ထင်နေတာလား..."

ရွှီယွမ်တာအိုဆရာ ၏ မျက်လုံးများ မှေးကျဉ်းသွားပြီး လက်ထဲရှိ ယပ်တောင်ကို တိုက်ရိုက် ပစ်လွှတ်လိုက်ကာ လက်နှစ်ဖက်ဖြင့် လက်သင်္ကေတ များကို အဆက်မပြတ် ပြုလုပ်လိုက်သည်။ အလင်းရောင်များ ထွက်ပေါ်နေသော အစိမ်းရောင် နတ်လက်သင်္ကေတ တစ်ခုက အရှေ့တွင် ဖြစ်ပေါ်လာပြီး တစ်ကိုယ်လုံးရှိ စွမ်းအားများ က ထိုလက်သင်္ကေတ အတွင်းသို့ အဆက်မပြတ် စုစည်းဝင်ရောက်သွားသည်။ ဖူလုံ တောင်လှုပ် နတ်လက်သင်္ကေတ။

ဤသည်မှာ သူ ကိုယ်တိုင် ဖန်တီးထားသော နတ်စွမ်းရည် တစ်ခု ဖြစ်ပြီး သူ၏ အစွမ်းအထက်ဆုံးသော သတ်ကွက်များထဲမှ တစ်ခုလည်း ဖြစ်သည်။ စွမ်းအား အရ နှိုင်းယှဉ်ကြည့်မည် ဆိုပါက ဓားစွမ်းအင် မြစ်ကြီး ထက် အနည်းငယ်မျှပင် မနိမ့်ကျရာ ဤတစ်ကြိမ် တွင်လည်း ၎င်းကို အသုံးပြုလိုက်ခြင်း ပင် ဖြစ်သည်။

'ဝုန်း...'

တောက်ပသော လှံအလင်းတန်း က အစိမ်းရောင် နတ်လက်သင်္ကေတ အပေါ်သို့ ကျရောက်သွားပြီး ပေါက်ကွဲသံကြီး ထွက်ပေါ်လာသော်လည်း တိုက်ခိုက်မှု နှစ်ခုစလုံး လုံးဝ ပျက်စီးမသွားဘဲ လေဟာနယ် ထဲတွင် အကြိတ်အနယ် ဖြစ်နေဆဲ ပင် ဖြစ်ကာ သူတို့ နှစ်ယောက်စလုံး က ရွှမ်တန် စွမ်းအားများကို အဆက်မပြတ် လှုံ့ဆော်နေကြသည်။

"ဟား..."

"သတ်..."

ရွှမ်တန်အဆင့် သိုင်းသခင် နှစ်ပါးစလုံး ယခုအခါတွင် သူတို့၏ စွမ်းအားများ အားလုံးကို အစွမ်းကုန် အသုံးပြုနေကြပေသည်။

တောင်ဂူ အတွင်း၌ ဖုန်လုံးကြီးများ ကြားမှတစ်ဆင့် ကျန်းချဲ့က အဝေးရှိ မြင်ကွင်းကို မြင်တွေ့လိုက်ရပြီး ဖြူလျော့နေသော မျက်နှာဖြင့် လက်ထဲရှိ ဝမ်ကျဲ့ မိစ္ဆာဓားကို တုန်ယင်စွာဖြင့် အပေါ်သို့ မြှောက်လိုက်သည်။

အခွင့်အရေးက... ယခု အချိန်ပင် ဖြစ်သည်။

"ဂါး..."

ဓား မြှောက်လာပြီး ဓား ကျဆင်းသွားသည်။

ကောင်းကင်နှင့် မြေကြီးကို တုန်လှုပ်သွားစေသော နဂါးဟိန်းသံကြီး တစ်ခု ထွက်ပေါ်လာပြီး ဤတစ်ကြိမ်တွင် ကျန်းချဲ့ ခုတ်ချလိုက်သည်မှာ ဓားအလင်းတန်း မဟုတ်တော့ဘဲ ပေသုံးရာကျော်ခန့် ကြီးမားသော ဧရာမ နဂါးပုံသဏ္ဍာန် အတွင်းအား ကြီး တစ်ခု ပင် ဖြစ်သည်။ သူ၏ တစ်ကိုယ်လုံးရှိ စွမ်းအားများ အားလုံး စုစည်းထားခြင်း ပင် ဖြစ်သည်။

နဂါးခေါင်းကြီးက ဟိန်းဟောက်လျက် ရွှီယွမ်တာအိုဆရာ ဆီသို့ အပေါ်မှနေ၍ ဖိချသွားခဲ့သည်။

နဂါး ကိုယ်ထည် အပေါ်တွင်လည်း နဂါး အကြေးခွံများ ကဲ့သို့ မိစ္ဆာ မျဉ်းကြောင်းများ ပြည့်နှက်နေပေသည်။ ဤတစ်ကြိမ်တွင် ကျန်းချဲ့ က မမျှော်လင့်ထားသော အခြေအနေများ မဖြစ်ပေါ်စေရန် ဝမ်ကျဲ့ မိစ္ဆာဓားကို အနှစ်သာရ သွေးများ အပြည့်အဝ ကျွေးမွေးခဲ့ပြီး မိစ္ဆာစိတ် ကို လုံးဝ လှုံ့ဆော်လိုက်ခြင်း ပင် ဖြစ်သည်။

ဆိုလိုသည်မှာ ဤဓားချက် က ကျန်းချဲ့ အနေဖြင့် မိစ္ဆာဓား၏ စွမ်းအားကို အသုံးပြုပြီး ခုတ်ချလိုက်ခြင်း ပင် ဖြစ်သည် ဟု ဆိုနိုင်ပေသည်။ ထွက်ပေါ်လာသော အရှိန်အဝါ ကလည်း သေချာပေါက် ကောင်းကင်နှင့် မြေကြီးကို တုန်လှုပ်သွားစေပေသည်။

"ဘာ..."

ရွှီယွမ်တာအိုဆရာက နောက်သို့ လှည့်ကြည့်လိုက်ရာ မျက်နှာထား ချက်ချင်း အကြီးအကျယ် ပြောင်းလဲသွားခဲ့သည်။

ကျန်းချဲ့ တွင် ခွန်အား ကျန်ရှိနေသေးလိမ့်မည် ဟု သူ လုံးဝ ထင်မှတ် မထားခဲ့ပေ။ ဤဓားချက် က သူ့ကို ကြီးမားလှသော အန္တရာယ်ကြီး တစ်ခုကို ခံစားလိုက်ရစေပြီး သူ ရှောင်တိမ်းချင်သော်လည်း ချီဆန်းကျား က အရှေ့တွင် ရှိနေသဖြင့် လုံးဝ ရှောင်တိမ်း၍ မရနိုင်တော့ပေ။

"သတ်..."

ကျန်းချဲ့ လှုပ်ရှားလိုက်သည်ကို မြင်သောအခါ ချီဆန်းကျား လည်း စိတ်အေးသွားသည် နှင့် တစ်ပြိုင်နက် ဒေါသတကြီး အော်ဟစ်လိုက်ပြီး အနှစ်သာရ သွေး တစ်လုတ်ကို ထပ်မံ အန်ထုတ်ကာ ငွေရောင် လှံရှည် အပေါ်သို့ ပေါင်းစပ်လိုက်ရာ အရှိန်အဝါ များ ထပ်မံ မြင့်တက်လာခဲ့သည်။

ဤတစ်ကြိမ်တွင် သူ က ရွှီယွမ်တာအိုဆရာ ၏ အသက်ကို အပြီးတိုင် အဆုံးသတ်ရန် ပြင်ဆင်လိုက်ပြီ ဖြစ်သည်။

"ဖိနှိပ်စမ်း..."

လက်တစ်ဖက်ဖြင့် ထိုဖူလုံတောင်လှုပ် နတ်လက်သင်္ကေတကို ဖိထိန်းထားပြီး ကျန်လက်တစ်ဖက်ဖြင့် ရွှီယွမ်တာအိုဆရာက လျင်မြန်စွာ လက်သင်္ကေတ ပြုလုပ်ကာ ခြေသုံးချောင်းပါ ကြေးဒယ်အိုးကြီး ကို ဖန်တီးပြီး ကိုယ်ပေါ်တွင် လွှမ်းခြုံကာ ကျန်းချဲ့၏ ဤတိုက်ခိုက်မှုကို ကာကွယ်ရန် ကြိုးစားလိုက်သည်။

သို့သော် သူ ရင်ဆိုင်နေရသည်မှာ လူနှစ်ယောက်၏ တစ်ပြိုင်နက်တည်း တိုက်ခိုက်မှု ပင် ဖြစ်သည်။

'ဘန်း...'

မျက်စိတစ်မှိတ်အတွင်း သူ အာရုံလွှဲသွားသည့် အခိုက်အတန့်လေးမှာပင် ဖူလုံတောင်လှုပ် နတ်လက်သင်္ကေတ က ချက်ချင်း ပျက်စီးသွားခဲ့သည်။

ငွေရောင် လှံအလင်းတန်း က ကြေးဒယ်အိုးကြီး အပေါ်သို့ တိုက်ရိုက် ကျရောက်သွားပြီး အပေါက် တစ်ပေါက် ဖောက်ထွင်းသွားကာ ရင်ဘတ် မှနေ၍ ရွှီယွမ် ကို ထိုးဖောက်သွားခဲ့သည်။ တစ်ချိန်တည်းမှာပင် နဂါးဟိန်းသံ နှင့်အတူ နဂါးကြီး က ချက်ချင်း ပါးစပ်ကို ဖြဲကားလိုက်ပြီး ခြေသုံးချောင်းပါ ကြေးဒယ်အိုးကြီး နှင့် အတူ ရွှီယွမ် ကို တစ်လုပ်တည်း မျိုချပစ်လိုက်လေတော့သည်။