အခန်း ၁၈၈

အခန်း (၁၈၈) မင်္ဂလာ လက်ထပ်ခြင်း

ပြဿနာမှာ မပြည့်စုံသော ကျင့်စဉ် ပင်လျှင် ယခုအခါ ကျန်းဟိုင်နန်းတော် တွင် မရှိတော့ခြင်း ပင် ဖြစ်သည်။

နဂါးစိမ်း ကျန်းဟိုင် ကျင့်စဉ် နှင့် ရွှမ်ထျန်း နဂါးပြောင်းလဲခြင်း ကျင့်စဉ် တို့မှာ နန်းတော်သခင် နှင့် နန်းတော်သခင် ၏ တိုက်ရိုက် တပည့် များသာ ကျင့်ကြံခွင့် ရှိသော အဓိက ကျင့်စဉ်များ ဖြစ်ရာ သူ အနေဖြင့် လုံးဝ ရယူနိုင်ခွင့် မရှိခဲ့ပေ။ ယခင်က သူ က ကျန်းဟိုင်နန်းတော် ၏ သာမန် တိုက်ရိုက် တပည့် တစ်ယောက်သာ ဖြစ်ခဲ့ပေသည်။

နဂါးစိမ်း ကျန်းဟိုင် ကျင့်စဉ် ကို ပင်လျှင် ယခင် အကြီးအကဲများ ၏ ပါးစပ်မှ ပြောပြချက်များ ကို အခြေခံပြီး မနည်း ပြန်လည် စုစည်းထားခဲ့ရခြင်း ပင် ဖြစ်သည်။

"တကယ်ကြီး မရှိတော့ဘူးလား..."

ကျန်းချဲ့ ၏ မျက်မှောင်များ ပိုမို ကြုတ်သွားခဲ့ပြီး အနည်းငယ် မကျေမနပ် ဖြစ်သွားခဲ့သည်။

"ကျုပ် အသက် နဲ့ ရင်းပြီး ကျိန်ဆိုရဲပါတယ်... အကယ်လို့ လိမ်ညာ ပြောဆိုခဲ့မယ် ဆိုရင် ကောင်းကင် က မိုးကြိုးပစ်ခံရပြီး ကျန်းဟိုင်နန်းတော် လည်း လုံးဝ ပျက်သုဉ်းပါစေ..."

ချန်ရှန်တုန်း က အလွန် လေးနက်သော မျက်နှာထား ဖြင့် ကျိန်ဆိုလိုက်ပြီး ကျန်းချဲ့ ကို သူ၏ သဘောထားကို ပြသလိုက်သည်။

သူ အနေဖြင့် ဤကိစ္စ ကြောင့် ကျန်းချဲ့ ကို ဒေါသထွက်စေပြီး ကျန်းဟိုင်နန်းတော် သို့ ဘေးဒုက္ခ များ ရောက်ရှိလာမည် ကို လုံးဝ မလိုလားပေ။

ယခု လက်ရှိ ကျန်းချဲ့ ၏ စွမ်းအား က ဂိုဏ်းတစ်ခုလုံး ကို အလွယ်တကူ ဖျက်ဆီးပစ်နိုင်သည့် အနေအထား တွင် ရှိနေပြီ ဖြစ်သည်။

"ထားလိုက်ပါတော့... နောက်ဆုံးတော့လည်း အကြီးအကဲ ချန် ကို ယုံကြည်ရမှာပေါ့..."

ကျန်းချဲ့ က လက်ကို ဝှေ့ယမ်းပြလိုက်သော်လည်း မျက်နှာထား ကတော့ လေးနက်နေဆဲ ပင် ဖြစ်သည်။

ရွှမ်ထျန်း နဂါးပြောင်းလဲခြင်း ကျင့်စဉ် မရှိဘူး ဆိုလျှင်တော့ အခြား နည်းလမ်း တစ်ခုကို ရှာဖွေရုံသာ ရှိတော့သည်။

အဘယ်ကြောင့်ဆိုသော် အရှေ့ပင်လယ် က အလွန် ဝေးကွာလွန်းပြီး အရှေ့စွန်းနန်းတော် ၏ စွမ်းအား ကိုလည်း သူ ယခု လောလောဆယ်တွင် ရင်ဆိုင်နိုင်စွမ်း မရှိသောကြောင့် ပင် ဖြစ်သည်။

တစ်ခုတည်းသော နှမြောစရာ ကတော့ ဤကျင့်စဉ် ကို ဆက်လက် မကျင့်ကြံနိုင်တော့ခြင်း ပင် ဖြစ်သည်။

သေချာသည်မှာ ကျန်းချဲ့ တွင် အခြား နည်းလမ်း တစ်ခု ရှိနေသေးသည်။ ၎င်းမှာ ကောင်းကင်ယဇ်ပလ္လင်ကျောက်တိုင် ကို အသုံးပြုပြီး နဂါးပြောင်းလဲခြင်း ကျင့်စဉ် ၏ နောက်ဆက်တွဲ ကျင့်စဉ် များကို တွက်ချက် ဖန်တီးရန် ပင် ဖြစ်သည်။ သို့သော် ပြဿနာမှာ သင့်တော်သော ယဇ်ကောင် များ မရှိခြင်း ပင် ဖြစ်သည်။

အကယ်၍ ယဇ်ကောင် များ ရှာဖွေရန် အလွန် ခက်ခဲနေမည် ဆိုပါက သူ၏ ကိုယ်ပိုင် ကျင့်ကြံမှု များကို နှောင့်နှေးသွားစေမည် ဖြစ်သည်။ ဤသည်က အဓိက အရာ ကို မေ့ပြီး အသေးအမွှား များကို လိုက်နေသကဲ့သို့ ပင် ဖြစ်သွားပေမည်။

ကျန်းချဲ့ ၏ မျက်နှာပေါ်ရှိ စိုးရိမ် ပူပန်မှု များကို မြင်သောအခါ ချန်ရှန်တုန်း ၏ မျက်လုံးများထဲတွင် အလင်းရောင်များ တောက်ပသွားပြီး အလေးအနက် ပြောလိုက်သည်။

"တပ်မှူး ကျန်း... အရမ်း မစိုးရိမ်ပါနဲ့... တကယ်တော့ ဒီကိစ္စ က ဖြေရှင်းလို့ ရနိုင်မယ့် လမ်းစ ရှိနေပါသေးတယ်..."

"အကြီးအကဲ ချန် က ဘာကို ဆိုလိုတာလဲ..."

ကျန်းချဲ့ က ခေါင်းမော့ကြည့်လိုက်ပြီး နားမလည်စွာ ဖြင့် မေးလိုက်သည်။

"အရှေ့စွန်းနန်းတော် က မိုင်ပေါင်း သောင်းချီ ကွာဝေးတဲ့ အရှေ့ပင်လယ် မှာ ရှိတယ် ဆိုပေမယ့် သိုင်းလောက အချင်းချင်း ကတော့ အမြဲတမ်း ဆက်သွယ်မှု ရှိနေကြတာပါ... ကျုပ် ကြားဖူးတာတော့ ပေလင် ချီမိသားစု ဆိုတာက နှစ်ထောင်ချီ တည်တံ့လာခဲ့တဲ့ မိသားစု ကြီး တစ်ခု ဖြစ်ပြီး အခြေခံ အုတ်မြစ် ကလည်း အရမ်း ခိုင်မာတယ်လို့ ဆိုတယ်...

တပ်မှူး ကျန်း က ပေလင် ချီမိသားစု ရဲ့ တိုက်ရိုက်မျိုးဆက် သမက် တစ်ယောက် ဖြစ်နေပြီ ဆိုတော့... အကယ်လို့ ချီမိသားစု ဆီကနေ အကူအညီ တောင်းမယ် ဆိုရင် အရှေ့စွန်းနန်းတော် အနေနဲ့ ကျင့်စဉ် တစ်ခုလေး အတွက် နဲ့ ချီမိသားစု နဲ့ ရန်သူ အဖြစ် ပြောင်းလဲသွားဖို့တော့ သိပ်မဖြစ်နိုင်ဘူး ထင်တယ်...

ဘာလို့လဲ ဆိုတော့ နဂါးစိမ်း ကျန်းဟိုင် ကျင့်စဉ် ကို အခြေခံ အဖြစ် မကျင့်ကြံထားဘူး ဆိုရင် ရွှမ်ထျန်း နဂါးပြောင်းလဲခြင်း ကျင့်စဉ် ကို အောင်မြင်အောင် ကျင့်ကြံဖို့ ဆိုတာ လုံးဝ မဖြစ်နိုင်လို့ပါပဲ..."

အမှန်တကယ်တော့ ကျန်းချဲ့ က ရွှမ်ထျန်း နဂါးပြောင်းလဲခြင်း ကျင့်စဉ် ကို လာရောက် တောင်းဆိုလိမ့်မည် ဆိုသည်ကို ချန်ရှန်တုန်း က အစောကြီး ကတည်းက တွက်ဆထားခဲ့ပြီး ဖြစ်သည်။ ထို့ကြောင့် အပြန်ပြန် အလှန်လှန် စဉ်းစားပြီးနောက် ဤအလယ်အလတ် နည်းလမ်းလေးကို စဉ်းစားမိခဲ့ခြင်း ပင် ဖြစ်သည်။

မျှော်လင့်ချက် အနည်းငယ် ရှိကောင်း ရှိနိုင်ပေသည်။

"ပေလင် ချီမိသားစု..."

ကျန်းချဲ့ ၏ မျက်လုံးများ တောက်ပသွားခဲ့သည်။

အကယ်၍ ချီမိသားစု ၏ အကူအညီ သာ ပါမည် ဆိုပါက ရွှမ်ထျန်း နဂါးပြောင်းလဲခြင်း ကျင့်စဉ် ကို ရယူနိုင်မည့် အခွင့်အရေး အလွန် ကြီးမားလှပေသည်။ သေချာသည်မှာ ကြိုတင် သတ်မှတ်ချက် တစ်ခု အနေဖြင့် ကျန်းချဲ့ က ချီမိသားစု ၏ သမက် တစ်ယောက် ဖြစ်လာရမည် ဖြစ်ပြီး အလွန် အရေးပါသော တိုက်ရိုက်မျိုးဆက် သမီး တစ်ယောက်ယောက် ကို လက်ထပ်ရမည် ပင် ဖြစ်သည်။

ဥပမာ အားဖြင့် ချီမိသားစု ၏ အလှပန်း နှစ်ပွင့် ကဲ့သို့သော မိန်းကလေး မျိုး ပင် ဖြစ်သည်။

"ကျုပ် ကတော့ အခုလေးတင် မှ ချီမိသားစု ကို သတိရသွားတာပါ... အကြီးအကဲ ချန် ရဲ့ သတိပေးမှု ကို အများကြီး ကျေးဇူးတင်ပါတယ်..."

"ဟားဟားဟား... တပ်မှူး ကျန်း က ဒီတလော အလုပ်တွေ အရမ်း များနေလို့ ခဏလောက် မေ့သွားတာ ဖြစ်မှာပါ..."

"အကြီးအကဲ ချန် ပြောတာ မှန်ပါတယ်..."

ထို့နောက် ကျန်းချဲ့ က နောက်ထပ် စကား အနည်းငယ် ပြောဆိုပြီး ချန်ရှန်တုန်း က ကျန်းချဲ့ ကို အရက်ဝိုင်း ဖြင့် ဧည့်ခံခဲ့သည်။ အရက် သုံးခွက် ခန့် သောက်ပြီးနောက် သူ၏ ရည်ရွယ်ချက်ကို ထုတ်ဖော် ပြောဆိုလိုက်သည်။ နဂါးစိမ်း ကျန်းဟိုင် ကျင့်စဉ် အပြည့်အစုံ ကို ကျန်းဟိုင်နန်းတော် ၏ အခြေခံ အဖြစ် အသုံးပြုရန် လိုချင်ကြောင်း ပင် ဖြစ်သည်။

သေချာသည်မှာ သူ က ကျန်းချဲ့ ထံမှ ကျင့်စဉ် ကို အလကား ယူရန် ရည်ရွယ်ထားခြင်း မဟုတ်ဘဲ ရွှမ်ယွမ် ရေလေးလံ နှင့် ယွမ်ကျောက်တုံး အချို့ကို အလဲအလှယ် အဖြစ် ပေးအပ်မည်ဟု ပြောဆိုခဲ့သည်။

ကျန်းချဲ့ က ခေတ္တမျှ စဉ်းစားပြီးနောက် တစ်ဖက်လူ ၏ တောင်းဆိုချက် ကို သဘောတူလိုက်သည်။

ကျန်းဟိုင်နန်းတော် နှင့် သူ၏ ကြားတွင် မည်သည့် ရန်ညိုး မှ မရှိသလို သူတို့ နှစ်ဦး ၏ ဆက်ဆံရေး ကလည်း အတော်လေး ကောင်းမွန်ပေသည်။ အထူးသဖြင့် ချန်ရှန်တုန်း က အစကတည်းက သူ့ကို ရန်သူ အဖြစ် သဘောမထားခဲ့သဖြင့် အတော်လေး အသိဉာဏ် ရှိသူ ပင် ဖြစ်သည်။

သေချာသည်မှာ ကျန်းချဲ့ တွင် ယခုအခါ ယွမ်ကျောက်တုံး နှင့် ရွှမ်ယွမ် ရေလေးလံ တို့ မလိုအပ်တော့ပေ။ သူ လိုအပ်နေသည်မှာ သိုင်းသမား များ ပင် ဖြစ်သည်။ ထို့ကြောင့် သူ၏ နောက်ကွယ် တွင် ထောက်ပံ့ထားသော သိုင်းလောက အဖွဲ့အစည်း တစ်ခု ရှိကြောင်း ပြောပြပြီး ကျန်းဟိုင်နန်းတော် ကိုလည်း ပါဝင်ရန် ဖိတ်ခေါ်လိုက်သည်။

ချန်ရှန်တုန်း က ခေတ္တမျှ စဉ်းစားပြီးနောက် ကျန်းချဲ့ ၏ ဖိတ်ခေါ်မှုကို သဘောတူလိုက်ပြီး ထျန်းယာ မဟာမိတ်အဖွဲ့ ၏ ပထမဆုံးသော ဧည့်သည်တော် အကြီးအကဲ တစ်ယောက် ဖြစ်လာခဲ့သည်။ သူ၏ နောက်တွင်တော့ ကျန်းဟိုင်နန်းတော် မှ မွေးရာပါအဆင့် သိုင်းသမား အချို့ ကလည်း ဝင်ရောက်လာကြမည် ဖြစ်သည်။

ထို့နောက် ကျန်းချဲ့ အနေဖြင့် ဝမ်ရှိုခြံဝင်း ကိုလည်း ပါဝင်လာစေရန် ဆွဲဆောင်သွားမည် ဖြစ်သည်။

ဖြည်းဖြည်းချင်း တိုးချဲ့ သွားရမည် ဖြစ်သည်။ သိုင်းသမား များကို စုဆောင်းရသည့် အမြန်နှုန်း က အလွန် နှေးကွေးလွန်းပြီး သူ၏ အဆင့်တက်လှမ်းမှု နှုန်းကို မမီနိုင်ပေ။ အချိန်တို အတွင်း တွင် အခြား ဂိုဏ်းများမှ သိုင်းသမား များကို ဧည့်သည်တော် အကြီးအကဲ များ အဖြစ် ဖိတ်ခေါ်ပြီး ဖြည့်တင်းထားရမည် ဖြစ်သည်။

နောက်ဆုံးတွင် ဤဧည့်သည်တော် အကြီးအကဲ များကို တကယ့် လက်အောက်ငယ်သား များ အဖြစ် ဖြည်းဖြည်းချင်း ပြောင်းလဲသွားစေရမည် ဖြစ်သည်။

အရက်ဝိုင်း ပြီးဆုံးသွားပြီးနောက် ကျန်းချဲ့ က ဝမ်ရှိုခြံဝင်း သို့ မသွားရသေးမီ အချိန်မှာပင် ချီဆန်းကျား ထံမှ လူတစ်ယောက် ရောက်လာပြီး အလွန် အရေးကြီးသော ကိစ္စ တစ်ခု ဆွေးနွေးရန် ရှိသဖြင့် အမြန်ဆုံး ပြန်လာရန် ပြောကြားခဲ့သည်။

ကျန်းချဲ့ လည်း ချက်ချင်း ပင် တစ်ခုခု မှားယွင်းနေပြီ ဖြစ်ကြောင်း တွက်ဆမိလိုက်သည်။ မဟုတ်လျှင် ချီဆန်းကျား အနေဖြင့် သူ့ကို လာရောက် ရှာဖွေရန် လူလွှတ်မည် မဟုတ်ပေ။ ထို့ကြောင့် ချန်ရှန်တုန်း ကို နှုတ်ဆက်ပြီး ထိုက်ရှန်းမြို့ သို့ အမြန်ဆုံး ပြန်လာခဲ့သည်။

ယွင်ပြည်နယ်... ပေလင်ဒေသ။

တောင်ပိုင်း ပြည်နယ် များတွင် ထိပ်တန်း အင်အားစု များ ထဲမှ တစ်ခု အပါအဝင် ဖြစ်သော ချီမိသားစု သည် ပေလင် ဟူသော အမည် ကို ရယူထားခြင်း မှာ သူတို့ ၏ လွှမ်းမိုးမှု ကြောင့် ပင် ဖြစ်သည်။ ဤဒေသ အတွင်း၌ ချီမိသားစု မှလွဲ၍ အခြား မည်သည့် သိုင်းလောက အင်အားစု မှ မရှိဘဲ ဘေးထွက် မျိုးဆက် များသာ ရှိပေသည်။

ထို့အပြင် ချီမိသားစု ၏ အင်အား က အလွန် ကြီးမားလွန်းသဖြင့် သိုင်းလောက တွင် နေရာယူထားရုံ သာမက အစိုးရ အသိုင်းအဝိုင်း တွင်လည်း အလွန် နက်ရှိုင်းသော အခြေခံ အုတ်မြစ် ရှိပေသည်။ အစိုးရ က ပင်လျှင် နေရာတိုင်းတွင် လျှော့ပေးနေရပြီး မြို့တော်ဝန်၊ တပ်မှူးချုပ် နှင့် မြို့ပိုင် အစရှိသည့် ရာထူး များတွင်...

ကိုးဆယ် ရာခိုင်နှုန်း ကျော် က ချီမျိုးရိုး အမည် ခံယူထားသော အရာရှိများ ပင် ဖြစ်သည်။

သူတို့၏ ဩဇာလွှမ်းမိုးမှု က အလွန် ကြောက်မက်ဖွယ် ကောင်းလွန်းလှပေသည်။

ချီမိသားစု က ဤမျှလောက် အချိန်အကြာကြီး တည်တံ့ ခိုင်မြဲနေရခြင်းမှာ မိသားစု စည်းမျဉ်း ဥပဒေ များ တင်းကျပ်မှု ကြောင့် သာမက မျိုးဆက်တိုင်း တွင် ထူးချွန်သော သူရဲကောင်း များ ပေါ်ထွက်နေခြင်း ကြောင့် လည်း ဖြစ်သည်။ ထို့အပြင် မရေမတွက်နိုင်သော မင်္ဂလာ လက်ထပ်မှု များနှင့် သမက် ခေါ်ယူမှု များ ကြောင့် လည်း ဖြစ်ပေသည်။

ဥပမာ အားဖြင့် ချီဆန်းကျား ဆိုလျှင် အောင်မြင်မှု များ ရရှိလာပြီးနောက် သူ၏ ဘိုးဘေး က ချီမိသားစု ၏ ဘေးထွက် မျိုးဆက် ဖြစ်နေခြင်း ကြောင့် မျိုးရိုးစဉ်ဆက် မှတ်တမ်း တွင် ထည့်သွင်းခံရပြီး ချီမိသားစု ၏ အင်အားစု ထဲသို့ ဆွဲသွင်းခံလိုက်ရခြင်း ပင် ဖြစ်သည်။ ဤမျှသာမက သိုင်းလောက မှ ထိပ်တန်း ပါရမီရှင် များ တွင် နောက်ခံ အင်အား မရှိပါက ချီမိသားစု က အမြဲတမ်း သွားရောက် ဆက်သွယ်လေ့ ရှိပေသည်။

အကယ်၍ ချီမိသားစု ထဲသို့ သမက် အဖြစ် ဝင်ရောက်ရန် သဘောတူမည် ဆိုပါက ထောက်ပံ့မှု များကို ပေးအပ်မည် ဖြစ်သည်။ သေချာသည်မှာ ဤသည်က အဖိုးအခ မပေးရဘဲ ရရှိခြင်း မဟုတ်ပေ။ အနိမ့်ဆုံး အဆင့် သမက် များ ဆိုလျှင် ကလေး မွေးလာပါက ဖခင် ၏ မျိုးရိုးနာမည် ကို ခံယူခွင့် မရှိဘဲ ချီမျိုးရိုး ကိုသာ ခံယူရမည် ဖြစ်သည်။

ပါရမီ က တကယ်ကို အဆင့်တစ်ခု အထိ ရောက်ရှိပြီး အလားအလာ ကောင်းမွန်မှသာ ချီမိသားစု မှ မိန်းကလေး များနှင့် တန်းတူ လက်ထပ်ခွင့် ရရှိမည် ဖြစ်သည်။ ဤနေ့တွင်တော့ ချီမိသားစု ၏ ဘိုးဘေး ခန်းမဆောင် အတွင်း၌ အလွန် အရေးကြီးသော မင်္ဂလာ လက်ထပ်ရေး ကိစ္စ တစ်ခုကို ဆွေးနွေး နေကြပေသည်။

မူလက ချီဆန်းကျား က ချီမိသားစု ပင်မ အိမ်တော် သို့ ပေးပို့ခဲ့သော ထောက်ခံစာ တွင် ဖော်ပြထားသည်မှာ ကျန်းချဲ့ က ယွမ်ဟိုင်အဆင့် သို့ စတင် ဝင်ရောက်ခါစ အချိန် တွင် သိုင်းစိတ်ဆန္ဒ ကို နားလည် သဘောပေါက်နိုင်ခဲ့ပြီး အဆင့်တူ သိုင်းသမား အများအပြား ကို ယှဉ်ပြိုင် တိုက်ခိုက်ကာ အနိုင်ယူနိုင်ခဲ့သည် ဟုသာ ပါရှိပေသည်။

ဤအဆင့်အတန်း က ချီမိသားစု ၏ မင်္ဂလာ လက်ထပ်မည့် သူများ ရွေးချယ်မှု စာရင်း တွင် အလယ်အလတ် အထက် အဆင့်၌ ရှိနေပေသည်။

ချီမိသားစု ၏ တိုက်ရိုက်မျိုးဆက် မိန်းကလေး တစ်ယောက် နှင့် လက်ထပ်ပေးနိုင်ပေသည်။

ဤကိစ္စကို ချီမိသားစု မှ အကြီးအကဲ အများအပြား ကလည်း သဘောတူညီခဲ့ကြပြီး ဖြစ်ရာ ချီမိသားစု ၏ ခေါင်းဆောင် ချီကျန်းနန် အနေဖြင့် ဤကိစ္စ က ပြီးဆုံးသွားပြီ ဟု ထင်မှတ်ထားခဲ့ပြီး ကျန်းချဲ့ ကို တစ်ခေါက်လောက် လာရောက် တွေ့ဆုံရန် ခေါ်ယူလိုက်ရုံ သာ ရှိတော့သည် ဟု ထင်မြင်ခဲ့ပေသည်။

သို့သော် မထင်မှတ်ဘဲ ချီဆန်းကျား ထံမှ ရောက်ရှိလာသော ဒုတိယမြောက် စာ က သူ့ကို အကြီးအကျယ် တုန်လှုပ်သွားစေခဲ့သည်။

ဤတစ်ကြိမ် တွင် ချီဆန်းကျား က ကျန်းချဲ့ ကို အစွမ်းကုန် ထောက်ခံထားပြီး ကျန်းချဲ့ ၏ အသက် က နှစ်ဆယ် ပင် မပြည့်သေးကြောင်း၊ နောက်ခံ အင်အား မရှိဘဲ အချိန်တိုလေး အတွင်း ဆက်တိုက် အဆင့်တက်လှမ်းကာ ရှန်ကွမ်းအဆင့် သို့ ရောက်ရှိနေပြီ ဖြစ်ကြောင်း များကို ဖော်ပြထားပေသည်။

ထို့အပြင် တိုးတက်လာသည် က ကျင့်ကြံမှု တစ်ခုတည်း မဟုတ်ဘဲ စွမ်းအား ကလည်း အလွန် ကြောက်မက်ဖွယ် ကောင်းလောက်အောင် ကြီးမားလာပြီး ဒေသ တစ်ခုလုံး တွင် နာမည်ကျော်ကြား ခဲ့သော ရှန်ကွမ်းအဆင့် အထွတ်အထိပ် သိုင်းသမား တစ်ယောက် ကို ပင် အလွယ်တကူ သတ်ဖြတ်နိုင်ခဲ့ကြောင်း များကိုပါ ရေးသားထားပေသည်။

သူ၏ အစွမ်းကုန် သုံးထားသော တိုက်ခိုက်မှု မျိုး ပင် မဟုတ်ခဲ့ပေ။

ကျင်းယွမ်ဘုန်းကြီးကျောင်း နှင့် ဖူလုံကျောင်းတော် တိုက်ပွဲ အကြောင်းကို အတိုချုံး ရှင်းပြထားပြီး ကျန်းချဲ့ က ရှန်ကွမ်းအဆင့် အထွတ်အထိပ် သိုင်းသမား အများအပြား ကို သတ်ဖြတ်နိုင်ခဲ့သည့် အပြင် ရွှမ်တန်အဆင့် သိုင်းသခင် ကို ပင် ယှဉ်ပြိုင် တိုက်ခိုက်နိုင်ခဲ့သည့် ကြောက်မက်ဖွယ်ကောင်းသော တိုက်ပွဲ မှတ်တမ်း များကိုပါ အလေးပေး ဖော်ပြထားပေသည်။

ကျန်းချဲ့ က နှစ်တစ်ရာ အတွင်း တွေ့ရခဲသော လောက ၏ ထိပ်တန်း ပါရမီရှင် တစ်ယောက် ဖြစ်ကြောင်း ဖြင့် ချီးကျူးထားပေသည်။

ပင်မ အိမ်တော် အနေဖြင့် ဤကိစ္စကို သေချာစွာ စဉ်းစား ဆုံးဖြတ်ရန် နှင့် မိသားစု ခေါင်းဆောင် ၏ သမီး နှစ်ယောက် ထဲမှ တစ်ယောက် ကို ကျန်းချဲ့ နှင့် လက်ထပ်ပေးပြီး ဆွဲဆောင်ရန် အကြံပြုထားပေသည်။ ကျန်းချဲ့ က ကျေးဇူးသိတတ်ပြီး ရန်ငြိုး ကိုလည်း ဆယ်ဆ ပြန်လည် တုံ့ပြန်တတ်သူ ဖြစ်ကြောင်း၊ သို့သော် သူ့ကို လုံးဝ မစော်ကားမိစေရန် အထူး သတိပေးထားပေသည်။

ထို့အပြင် ပင်မ အိမ်တော် အနေဖြင့် အလေးအနက် ထားရှိစေရန် အတွက် ချီဆန်းကျား က ဤကဲ့သို့သော ပါရမီရှင် မျိုးကို အချိန် အနည်းငယ် ကြာသည် နှင့် အခြားသူများ က သတိပြုမိသွားမည် ဖြစ်ပြီး ယခုအခါ သူ၏ အစွမ်းအစ များ ထွက်ပေါ်လာပြီ ဖြစ်ရာ အမြန်ဆုံး ဆုံးဖြတ်ချက် ချရန် လိုအပ်ကြောင်း ကိုပါ အလေးအနက် ရေးသားထားပေသည်။

ဤအကြံပြုချက် များ နှင့် စကားလုံး များ က ချီကျန်းနန် ကို အကြီးအကျယ် တုန်လှုပ်သွားစေခဲ့သည်။

မွေးရာပါအဆင့် ကို စတင် ဝင်ရောက်ခါစ အချိန် တွင် သိုင်းစိတ်ဆန္ဒ ကို နားလည် သဘောပေါက်နိုင်ခဲ့ပြီး အချိန်တိုလေး အတွင်း ဆက်တိုက် အဆင့်တက်လှမ်းကာ ရှန်ကွမ်းအဆင့် ကျင့်ကြံမှု ဖြင့် အဆင့်တူ ဝါရင့် သိုင်းသမား အများအပြား ကို ယှဉ်ပြိုင် တိုက်ခိုက်နိုင်ရုံ သာမက... အရေးအကြီးဆုံး က ရွှမ်တန်အဆင့် သိုင်းသခင် ကို ပင် ယှဉ်ပြိုင် တိုက်ခိုက်နိုင်ခဲ့ခြင်း ပင် ဖြစ်သည်။

ဒါက သာမန် သိုင်းသမား တစ်ယောက် တကယ် လုပ်နိုင်တဲ့ ကိစ္စ မျိုးလား။

အစပိုင်း တွင် ချီကျန်းနန် ကလည်း သံသယ ဝင်ခဲ့ပေသည်။ မည်သို့ပင်ဆိုစေ စာ နှစ်စောင် ကြားရှိ အချိန် က သိပ်မကွာခြားလှသဖြင့် ချီဆန်းကျား အနေဖြင့် ကျန်းချဲ့ ကို မြေတောင်မြှောက်ပေးရန် အတွက် အနည်းငယ် ချဲ့ကား ရေးသားထားခြင်းများ ရှိနိုင်သည်ဟု တွေးထင်ခဲ့ပေသည်။

ထို့ကြောင့် ဒုတိယမြောက် စာ ကို ရရှိပြီးနောက် ယွဲ့ပြည်နယ် သို့ လူလွှတ်ကာ ကျန်းချဲ့ နှင့် ပတ်သက်သော အကြောင်းအရာ များကို သွားရောက် စုံစမ်းခိုင်းခဲ့သည်။ ရရှိလာသော အဖြေ မှာ ချီဆန်းကျား ပြောသမျှ အားလုံး က အမှန်တကယ် ပင် ဖြစ်နေခြင်း ပင် ဖြစ်သည်။

ကျန်းချဲ့ က တကယ်ကို ရှားပါးလှသော အစွမ်းထက် ပါရမီရှင် တစ်ယောက် ပင် ဖြစ်သည်။

သူ၏ ပါရမီ က ဒေသ တစ်ခုလုံး တွင် ပြိုင်ဘက်ကင်း ရုံ သာမက လောက တစ်ခုလုံး တွင် ကြည့်မည် ဆိုလျှင်တောင် ထိပ်တန်း ဂိုဏ်းကြီး များ နှင့် တော်ဝင် မိသားစု မှ မျိုးဆက် များနှင့် ပင် ယှဉ်ပြိုင်နိုင်လောက်ပြီ ဖြစ်သည်။ အရေးအကြီးဆုံး အချက် မှာ သူ က နောက်ခံ အင်အား လုံးဝ မရှိခြင်း ပင် ဖြစ်သည်။

ချီမိသားစု ထဲသို့ ဆွဲဆောင်ရန် လုံးဝ ဖြစ်နိုင်ပေသည်။

ဤကဲ့သို့သော ထိပ်တန်း ပါရမီရှင် မျိုးကို မည်သည့် အင်အားစု ကမျှ လက်လွတ်ခံမည် မဟုတ်ပေ။ အကယ်၍ အင်အားကြီးသူ တစ်ယောက် အဖြစ် ပြုစုပျိုးထောင် ပေးနိုင်မည် ဆိုပါက ယခင်က ပေးဆပ်ခဲ့သမျှ အားလုံး က တန်ဖိုး ရှိသွားမည် ဖြစ်သည်။ ထို့ကြောင့် ကျန်းချဲ့ ကို သမက် အဖြစ် ရွေးချယ်ရန် သူ အလေးအနက် စဉ်းစားနေခဲ့ပေသည်။

သူ့တွင် သား တစ်ယောက် နှင့် သမီး နှစ်ယောက် ရှိပြီး အားလုံး က လူရည်ချွန် များ ဖြစ်ကြသည်။

သူ၏ သား ဆိုလျှင် အသက် သုံးဆယ် ကျော် ရုံသာ ရှိသေးသော်လည်း ရွှမ်တန်အဆင့် အလယ်အလတ် သို့ ရောက်ရှိနေပြီ ဖြစ်ပြီး ပါရမီ က အလွန် မြင့်မားသဖြင့် ချီမိသားစု ၏ နောက်ထပ် ခေါင်းဆောင် အဖြစ် သတ်မှတ်ခံထားရသူ ပင် ဖြစ်သည်။

သမီး နှစ်ယောက် ကလည်း သာမန် မဟုတ်ပေ။ နှစ်ယောက်စလုံး က ဝိညာဉ် ခန္ဓာကိုယ် များကို ပိုင်ဆိုင်ထားကြပြီး ရုပ်ရည် ကလည်း အလွန် လှပလွန်းသဖြင့် ချီမိသားစု ၏ အလှပန်း နှစ်ပွင့် ဟု တင်စားခေါ်ဝေါ် ကြကာ ယွင်ပြည်နယ် တွင် နာမည်ကျော်ကြား နေပြီး အင်အားစု အများအပြား က လက်ထပ်ရန် ကမ်းလှမ်းနေကြပေသည်။

သို့သော် သူ က ယောကျ်ားလေး ကို မျက်နှာသာ ပေးပြီး မိန်းကလေး ကို နှိမ့်ချ ဆက်ဆံတတ်သူ မဟုတ်သဖြင့် သမီး များကို ဘေးနားတွင် အချိန် အတန်ကြာ ထားရှိချင်သေးသောကြောင့် ယခုအချိန် အထိ အလှပန်း နှစ်ပွင့် စလုံး အိမ်ထောင် မပြုရသေးခြင်း ပင် ဖြစ်သည်။ သို့သော် ယခင်က ရယ်စရာ အနေဖြင့် ယွဲ့ပြည်နယ် မှ ဝေ့မိသားစု ၏ သခင်လေး နှင့် အငယ်ဆုံး သမီး ကို လက်ထပ်ပေးမည် ဟု နှုတ်ကတိ ပေးထားခဲ့ဖူးပေသည်။

အကယ်၍ ကျန်းချဲ့ နှင့် လက်ထပ်ပေးမည် ဆိုပါက သမီးကြီး ဖြစ်သော ချီဝမ်ကျင်း သာ ရှိတော့ပေသည်။

သေချာသည်မှာ ဤကဲ့သို့သော အဆင့်အတန်း ရှိသည့် မင်္ဂလာ လက်ထပ်မှု မျိုးကို သူ က မိသားစု ခေါင်းဆောင် ဖြစ်နေလျှင်တောင် တစ်ယောက်တည်း ဆုံးဖြတ်၍ မရနိုင်ဘဲ ချီမိသားစု မှ အကြီးအကဲ များ၏ အကြံဉာဏ် ကို တောင်းခံရမည် ဖြစ်သည်။ ထို့ကြောင့် စဉ်းစားပြီးနောက် ချီမိသားစု မှ အကြီးအကဲ အားလုံးကို ခေါ်ယူ စုစည်းလိုက်သည်။

ကျန်းချဲ့ ၏ အကြောင်းအရာ များကို အစမှ အဆုံးထိ ပြန်လည် ရှင်းပြလိုက်ပြီး ချီဆန်းကျား ၏ စာကိုလည်း အားလုံး ထံသို့ လှည့်လည် ဖတ်ရှုခိုင်းလိုက်သည်။

ဘိုးဘေး ခန်းမဆောင် အတွင်း၌ လုံးဝ တိတ်ဆိတ် ငြိမ်သက်သွားခဲ့သည်။

အကြီးအကဲ အားလုံး က ဆူညံခြင်း မရှိဘဲ စာကို တစ်ယောက်ပြီး တစ်ယောက် ဖတ်ရှုကာ လေးနက်စွာ စဉ်းစား နေကြပေသည်။

"ဘေးထွက် မျိုးဆက် က ချီဆန်းကျား က တကယ်ပဲ ကံကောင်းပြီး ရွှမ်တန်အဆင့် သို့ ချိုးဖောက် ဝင်ရောက်ကာ သိုင်းသခင် ဖြစ်လာလိမ့်မယ် လို့ မထင်ထားဘူး... အရင်တုန်းက မိသားစု ခေါင်းဆောင် က သူ့ကို ဂိုဏ်းထဲ ဝင်ဖို့ ဖိတ်ခေါ်တုန်းက... သူ့ရဲ့ ကျင့်ကြံမှု က ဒီလောက်နဲ့ပဲ ရပ်တန့်သွားပြီ လို့ ငါကိုယ်တော် ထင်ထားခဲ့တာ..."

"ဟားဟား... ဒါကလည်း ဝမ်းသာစရာ ကိစ္စ ပါပဲ... သိုင်းသခင် တစ်ယောက် တိုးလာတာ က ချီမိသားစု အတွက် အရမ်းကြီး အရေးမပါဘူး ဆိုပေမယ့်... အင်အား တစ်ခု တိုးလာတာပဲလေ... ထိုက်အန်းဒေသ က ချီမိသားစု အဖွဲ့ခွဲ ကို အရင်းအမြစ် တွေ ပိုပြီး ထောက်ပံ့ပေးဖို့ ငါကိုယ်တော် အကြံပြုပါတယ်..."

"ထောက်ခံတယ်..."

"ထောက်ခံတယ်..."

ချီဆန်းကျား က ချီမိသားစု သို့ ပေးပို့ခဲ့သော စာထဲတွင် ကျန်းချဲ့ ၏ ပါရမီ ကို အဓိကထား ရှင်းပြထားသည့် အပြင် သူ ကိုယ်တိုင် လည်း ရွှမ်တန်အဆင့် သို့ ရောက်ရှိသွားပြီ ဖြစ်ကြောင်း ကိုပါ ထည့်သွင်း ရေးသားထားပေသည်။ ဤသည်က သူ၏ အဆင့်အတန်း နှင့် ရရှိမည့် ထောက်ပံ့မှု များနှင့် သက်ဆိုင်နေပေသည်။

"အကြီးအကဲ အားလုံး ထောက်ခံတယ် ဆိုရင်လည်း... ထိုက်အန်းဒေသ က ချီမိသားစု အဖွဲ့ခွဲ ကို ဒုတိယ အဆင့် အထိ မြှင့်တင်ပေးလိုက်မယ်... ဒါပေမဲ့ ဒီနေ့ အကြီးအကဲ တွေကို ခေါ်ယူ စုစည်းရတဲ့ အဓိက အကြောင်းရင်း က ချီဆန်းကျား ပြောထားတဲ့ ကျန်းချဲ့ ရဲ့ ကိစ္စကို ဆွေးနွေးဖို့ပဲ..."

ချီကျန်းနန် က ခေါင်းညိတ်လိုက်ပြီး အလယ်တွင် ထိုင်ကာ စကားလမ်းကြောင်း ကို လွှဲလိုက်သည်။

"အကယ်လို့ ဒီကောင်လေး က ချီဆန်းကျား ပြောသလိုမျိုး တကယ်ပဲ မှန်တယ် ဆိုရင်... တကယ့်ကို ရှားပါးလှတဲ့ ပါရမီရှင် တစ်ယောက်ပဲ... သူ နဲ့ လက်ထပ်ပေးတာ က ဘာမှ ပြဿနာ မရှိပါဘူး... ဒါပေမဲ့ သူ က ဝမ်ကျင်း နဲ့ နင်ပင်း ကို လက်ထပ်ချင်တယ် ဆိုတာကတော့ နည်းနည်း မသင့်တော်ဘူးလို့ မထင်ဘူးလား..."

"ဟုတ်တယ်... ဝမ်ကျင်း နဲ့ နင်ပင်း က ငါတို့ ချီမိသားစု ရဲ့ အလှပန်း နှစ်ပွင့် လေ... ယွင်ပြည်နယ် တစ်ခုလုံး မှာ နာမည်ကျော်ကြား နေတာ... လက်ထပ်ချင်တဲ့ လူတွေကလည်း မရေမတွက်နိုင်အောင် များပြားလှတယ်... အားလုံး က ထိပ်တန်း အင်အားစု တွေချည်းပဲ... ဒီကျန်းချဲ့ က ပါရမီ ကောင်းတယ် ဆိုပေမယ့် အဆင့်ခြောက် အရာရှိ သေးသေးလေး တစ်ယောက်ပဲ ရှိသေးတာ... ငါကိုယ်တော် ကတော့ သိပ်မသင့်တော်ဘူး လို့ ထင်တယ်...

လက်ထပ်ပေးဖို့ ကိုတော့ ငါကိုယ်တော် သဘောတူပါတယ်... ဒါပေမဲ့ အခြား တိုက်ရိုက်မျိုးဆက် မိန်းကလေး တွေထဲက ရွေးချယ်လို့ ရတာပဲ... ငါတို့ ချီမိသားစု က မိန်းကလေး တွေ အားလုံး က ရုပ်ရည် လှပပြီး သိမ်မွေ့ ယဉ်ကျေးကြတာချည်းပဲ... ကျန်းချဲ့ မြင်ရင် သေချာပေါက် သဘောကျမှာပါ..."

"ဟားဟား... အကြီးအကဲ ခြောက် ရဲ့ အမြင်ကို ကျုပ် သဘောမတူဘူး... အကယ်လို့ ချီဆန်းကျား ရဲ့ စာထဲက အတိုင်းသာ အမှန် ဖြစ်မယ် ဆိုရင်... ကျန်းချဲ့ ဆိုတဲ့ ကောင်လေး က ရှန်ကွမ်းအဆင့် အစပိုင်း နဲ့တင် ရွှမ်တန်အဆင့် သိုင်းသခင် ကို ပြန်လည် တိုက်ခိုက်နိုင်တဲ့ အရည်အချင်း က လောက ကြီး မှာ တကယ်ကို ရှားပါးလွန်းတယ်...

ဒီလောက် ပါရမီရှင် မျိုးကို သာမန် တိုက်ရိုက်မျိုးဆက် မိန်းကလေး တစ်ယောက် နဲ့ပဲ လက်ထပ်ပေးမယ် ဆိုရင်... ငါတို့ ချီမိသားစု က လူကို အကဲဖြတ်တဲ့ နေရာမှာ ညံ့ဖျင်းတယ် လို့ သူများတွေ လှောင်ပြောင်တာ မခံရဘူးလား... ဒီလောက ကြီး တစ်ခုလုံး မှာ မိန်းကလေး ရှိတာ ငါတို့ ချီမိသားစု တစ်ခုတည်း မှ မဟုတ်တာ... တခြား မိသားစု တွေသာ ဒီသတင်းကို သိသွားရင် သေချာပေါက် ခွဲထွက်သွားအောင် လုပ်ကြမှာပဲ...

သူတို့ရဲ့ မိသားစု ခေါင်းဆောင် ရဲ့ သမီး တွေကိုတောင် လက်ထပ်ပေးပြီး ဆွဲဆောင်ကြမှာပဲ... အဲ့ဒီ အချိန်ကျရင်... ဟွန့်... ခင်ဗျားတို့ နောင်တရနေကြရလိမ့်မယ်..."

မျက်လုံး တစ်ဖက် ကန်းနေသော အဘိုးအို တစ်ယောက် က နှာမှုတ်ကာ ပြောလိုက်သည်။

"မှန်တယ်... ဒီလို ပါရမီရှင် မျိုးကို လစ်လျူရှု ထားလို့ မရဘူး... အားလုံး လည်း မိသားစု ရဲ့ အကြီးအကဲ တွေ ဆိုတော့... လွန်ခဲ့တဲ့ နှစ်ပေါင်း ရာချီ တုန်းက ချီမိသားစု ရဲ့ ကြီးမားလှတဲ့ ဘေးဒုက္ခ ကြီး ကို သိကြမှာပါ... အဲ့ဒီတုန်းက ချီမိသားစု ရဲ့ သမက် ကသာ ဝင်မပါခဲ့ရင်...

ငါတို့ ချီမိသားစု က ဘယ်လိုလုပ်ပြီး နှစ်ထောင်ချီ တည်တံ့လာနိုင်မှာလဲ... အဲ့ဒီ ပါရမီရှင် ကလည်း သာမန် သိုင်းသမား တစ်ယောက်ပဲ ဆိုတာကို ငါကိုယ်တော် မှတ်မိသေးတယ်... ယခင် မိသားစု ခေါင်းဆောင် ကြီး က သူ့ကို မျက်နှာသာ ပေးပြီး ကိုယ့်ရဲ့ သမီး အရင်း နဲ့ လက်ထပ်ပေးကာ ဆွဲဆောင်ခဲ့တာလေ...

အကယ်လို့ ကျန်းချဲ့ သာ မကျေနပ်လို့ တခြား မိသားစု တွေရဲ့ ဆွဲဆောင်မှုကို ခံသွားရရင်... အဲ့ဒါ ငါတို့ ချီမိသားစု ရဲ့ ဆုံးရှုံးမှု ကြီး တစ်ခုပဲ..."

အခြား တစ်ယောက် ကလည်း ကွဲလွဲသော အမြင် ကို ထုတ်ဖော် ပြောဆိုလာခဲ့သည်။

'ဒေါက်... ဒေါက်...'

ချီကျန်းနန် ၏ ဘယ်ဘက် တွင် ထိုင်နေသော ဆံပင်ဖြူ အဘိုးအို ကြီး က လက်ထဲရှိ နဂါးခေါင်း တောင်ဝှေး ကို ခေါက်လိုက်ပြီး လေးနက်သော အသံဖြင့် မေးလိုက်သည်။

"အဲ့ဒီ ကျန်းချဲ့ ရဲ့ နောက်ခံ ကို သေချာ စုံစမ်းပြီးပြီလား... ချီဆန်းကျား က ချဲ့ကား ပြောထားတာများ ရှိနေမလား..."

"အကြီးအကဲ ချုပ် စိတ်ချပါ... ကျုပ် သေချာ စုံစမ်းပြီးပါပြီ... လုံးဝ အလိမ်အညာ မရှိပါဘူး... အဲ့ဒီ ကျန်းချဲ့ က တကယ်ကို ရှားပါးလှတဲ့ ပါရမီရှင် တစ်ယောက်ပါပဲ... စိတ်နေသဘောထား ကလည်း မဆိုးပါဘူး... အကျိုးအမြတ် လေး အတွက် နဲ့ ကျေးဇူးကန်းမယ့် သူမျိုး မဟုတ်ပါဘူး...

အရင်က သူ့ရဲ့ အထက်အရာရှိဟောင်း အတွက် ကလဲ့စားချေဖို့ အဖိုးအခ တွေ အများကြီး ပေးဆပ်ခဲ့ဖူးတယ်... အလုပ်လုပ်တဲ့ နေရာမှာ ရက်စက် ကြမ်းကြုတ် ပေမယ့် စည်းကမ်း ရှိတယ်... သူ့ရဲ့ စွမ်းအား ကလည်း ထိပ်တန်း ဂိုဏ်းကြီး တွေက အဆင့်တူ တိုက်ရိုက် တပည့် တွေ နဲ့ ယှဉ်ရင် အနည်းငယ်မျှတောင် မနိမ့်ကျဘူး...

အဲ့ဒါကြောင့်မို့လို့ ကျုပ် က အကြီးအကဲ တွေကို ခေါ်ယူပြီး ဒီကိစ္စကို ဆွေးနွေးရတာပါ..."

ချီကျန်းနန် က ပြန်လည် ဖြေကြားလိုက်သည်။

"နောက်ခံ ထောက်ပံ့မှု မရှိဘဲ နဲ့တောင် ဒီအဆင့် အထိ ရောက်လာနိုင်တာ... အကယ်လို့ ငါတို့ ချီမိသားစု ကို ကျောထောက်နောက်ခံ အဖြစ် ထားပြီး အရင်းအမြစ် တွေ ပေးလိုက်မယ် ဆိုရင်... လမ်းခုလတ်မှာသာ မသေသွားဘူး ဆိုရင်... နောင်တစ်ချိန်ကျရင် ရှန်ရှန်းအဆင့် ဒါမှမဟုတ် အဲ့ဒီထက် ပိုမြင့်တဲ့ အဆင့် တွေ ကိုတောင် ရောက်လာနိုင်တဲ့ အခွင့်အရေး ရှိတယ်..."

တစ်ယောက် က မုတ်ဆိတ် ကို သပ်ကာ ခေါင်းညိတ်ရင်း ပြောလိုက်သည်။

"ဒီလူ က နောက်ခံ အင်အား မရှိဘူး ဆိုတော့... အကြီးအကဲ တို့ အနေနဲ့ သူ့ကို အိမ်စောင့်သမက် အဖြစ် ခေါ်ယူလိုက်ရင် ဘယ်လိုနေမလဲ... အကယ်လို့ အဲ့လို သာ ဆိုရင်... ဝမ်ကျင်း နဲ့ နင်ပင်း ထဲက တစ်ယောက်ယောက် ကို သူနဲ့ လက်ထပ်ပေးလိုက်ရင်တောင် ဘာမှ မဖြစ်ဘူးလေ..."

"အကြီးအကဲ နှစ် တွေးတာ အရမ်း လွယ်လွန်းနေပြီ... ကြီးမားတဲ့ အောင်မြင်မှု တွေ ရမယ့် သူတိုင်း က တည်ငြိမ်တဲ့ စိတ်နေသဘောထား ရှိကြတယ်... စော်ကားလို့ မရဘူး... အဲ့ဒီ ကျန်းချဲ့ က ဘယ်လိုလုပ်ပြီး အိမ်စောင့်သမက် ဖြစ်ချင်မှာလဲ... အကယ်လို့ ချီမိသားစု ကသာ ဒီလို တုံ့ပြန်လိုက်မယ် ဆိုရင် ဒီလူ က သူ့ကို စော်ကားတယ်လို့ ထင်သွားလိမ့်မယ်..."

"မှန်တယ်... ကျန်းချဲ့ ရဲ့ ပါရမီ က စုံစမ်းပြီးပြီ ဆိုတော့... ပါရမီရှင် တစ်ယောက် ဖြစ်တာ သေချာနေပြီ... ဘယ်လိုလုပ် အိမ်စောင့်သမက် အဖြစ် ထားပြီး စော်ကားလို့ ရမှာလဲ... သတင်း ပြန့်သွားရင် ချီမိသားစု ရဲ့ နာမည် ပျက်သွားမှာပေါ့..."

အကြီးအကဲ အများအပြား က ဒုတိယ အကြီးအကဲ ၏ အကြံအစည် ကို သဘောမတူကြောင်း ပြောဆိုလာကြသည်။

အချိန်တိုလေး အတွင်းမှာပင် ကျန်းချဲ့ ၏ မင်္ဂလာ လက်ထပ်ရေး ကိစ္စ နှင့် ပတ်သက်၍ ချီမိသားစု ၏ ဘိုးဘေး ခန်းမဆောင် အတွင်း၌ အကြီးအကဲ အများအပြား အငြင်းပွား နေကြပြီး မိမိတို့ ၏ နည်းလမ်း ကသာ ပိုမို သင့်တော်သည်ဟု ထင်မြင် နေကြပေသည်။

"တော်ကြတော့... တကယ့် မိသားစု အကြီးအကဲ တွေ ဖြစ်ပါလျက် နဲ့ ဆူညံနေကြတာ... ဘယ်လို အချိုး မျိုး ချိုးနေကြတာလဲ..."

အကြီးအကဲ ချုပ် စကား စလိုက်သည် နှင့် အကြီးအကဲ အားလုံး ချက်ချင်း အသံ တိတ်သွားကြပြီး ဆက်လက် မပြောဆိုရဲကြတော့ပေ။