အခန်း ၂၆၃

အခန်း (၂၆၃) မိစ္ဆာဘုရင် အောက်ခွန်း

ကြောက်မက်ဖွယ်ကောင်းသော မိစ္ဆာအရှိန်အဝါကြီးက ဝမ်ယွဲ့လသာဆောင် တစ်ခုလုံးကို ချက်ချင်း ဖုံးလွှမ်းသွားချေပြီ။ အခြားသော အရပ်မျက်နှာများမှ အကြည့်များ ရောက်ရှိလာသော်လည်း များမကြာမီမှာပင် အားလုံးက နားလည်မှုရှိစွာဖြင့် နောက်လှည့်ထွက်ခွာသွားကြလေသည်။

ပွဲကြည့်မည်ဆိုလျှင်ပင် မိမိ၏စွမ်းအားကို ထည့်သွင်းစဉ်းစားရန် လိုအပ်ပေသည်။ မိစ္ဆာနဂါးအိုကြီးမှာ ရှန်ရှန်းအဆင့်ရှိ မိစ္ဆာဘုရင် တစ်ပါးဖြစ်ရာ နတ်အာရုံတစ်စိတ်တစ်ပိုင်းမျှသာ ဖြစ်နေလင့်ကစား သာမန်သိုင်းပညာရှင်များ ယှဉ်ပြိုင်နိုင်စွမ်းရှိသော အရာမဟုတ်ပေ။

အန္တရာယ်ကို အာရုံခံမိပြီးနောက် ဤနေရာတွင် ဆက်လက်နေထိုင်ကာ ပွဲကြည့်ရဲသူ ဟူ၍ လုံးဝ မရှိသလောက်ပင် ဖြစ်သွားလေသည်။ အချိန်တိုလေးအတွင်းမှာပင် ဝမ်ယွဲ့လသာဆောင်ရှိ ဧည့်သည်များအားလုံး ထွက်ခွာသွားကြပြီ ဖြစ်သည်။ လေထုမှာလည်း ချက်ချင်းပင် လေးလံဖိစီးလာလေသည်။

မိစ္ဆာနဂါးအိုကြီးက ကျန်းချဲ့ကို အကဲခတ်လိုက်ရာ သူ၏ မျက်ဝန်းများထဲတွင် သွေးဆာလောင်မှုများနှင့်အတူ စိတ်လှုပ်ရှားမှုများပါ ပြည့်နှက်နေလေသည်။ အရောင်းအဝယ် တစ်ခုလုပ်ရုံမျှဖြင့် ဤကဲ့သို့သော မထင်မှတ်ထားသည့် အရာများ ကြုံတွေ့ရလိမ့်မည်ဟု သူ လုံးဝ ထင်မှတ်မထားခဲ့ပေ။ သို့သော် ဤသည်ကလည်း အတော်ပင် အဆင်ပြေလှပေသည်။ လူသားများ၏ နတ်ဝိညာဉ်အရသာကို သူ မခံစားရသည်မှာ ကြာမြင့်လှပြီ ဖြစ်လေသည်။ ထို့အပြင် ထိုအနှစ်သာရသွေး စက်များကိုလည်း သူ ပြန်လည်ရယူချင်နေသေးသည်။

ထိုနည်းတူစွာပင် ကျန်းချဲ့ လည်း အလွန် အံ့အားသင့်နေမိလေသည်။ သူက တစ်ဖက်လူကို သာမန် သိုင်းသခင်တစ်ပါးသာ ဖြစ်မည်ဟု ထင်မှတ်ထားခဲ့မိသည်။ မည်သို့ပင်ဆိုစေ ဘုန်းကြီးဝူချန်ကို သတ်ဖြတ်ရန်ပင် အခြားသူများကို အကူအညီတောင်းနေရသူ တစ်ယောက်၏ စွမ်းအားက မည်မျှအထိ အစွမ်းထက်နိုင်မည်နည်း။

သို့သော် နောက်ဆုံးတွင်တော့ သူ၏ တွက်ချက်မှုများ လွဲချော်သွားခဲ့ချေပြီ။ ယခုအခြေအနေအရ မည်သူက အမဲလိုက်ခံရမည့် သားကောင်ဖြစ်မည်ကို ပြောရန် ခက်ခဲနေသေးလေသည်။

သေချာသည်ကတော့ ကျန်းချဲ့၏ မျက်နှာထက်တွင် မည်သည့် ထိတ်လန့်ကြောက်ရွံ့မှုမျှ ထွက်ပေါ်မလာခဲ့ပေ။ သူ၏ လက်ထဲတွင်ရှိသော ဝိညာဉ်အသွင်ပြောင်း နတ်မှော်အဆောင် ကို မပြောလျှင်တောင်မှ မြို့ပြင်တွင် အသင့်စောင့်ဆိုင်းနေသော ဒုတိယအကြီးအကဲ ချီထျန်းဟယ် တစ်ယောက်တည်းဖြင့်ပင် ဤသူကို ရင်ဆိုင်ရန် လုံလောက်နေပြီ ဖြစ်လေသည်။

ထို့ကြောင့် သူက တစ်ဖက်လူကို လေးနက်သော အမူအရာဖြင့် အကဲခတ်လိုက်ပြီး စကားလုံး တစ်လုံးချင်းစီကို ပီပီသသ ဆိုလိုက်လေသည်။

"ဆရာတော်က မိစ္ဆာနဂါး အနှစ်သာရသွေးတွေကို ထုတ်ပေးနိုင်တာ မဆန်းတော့ပါဘူး... ခင်ဗျားက အဲ့ဒီ မိစ္ဆာနဂါးအိုကြီးရဲ့ ဝင်ပူးတာကို ခံထားရတာပဲကိုး"

တစ်ဖက်လူ ပြသလာသော အရှိန်အဝါနှင့် သဲ့သဲ့မျှ ထွက်ပေါ်နေသော မိစ္ဆာအငွေ့အသက်များအရ ကျန်းချဲ့က တစ်ဖက်လူ၏ သရုပ်မှန်ကို အကြမ်းဖျင်း ခန့်မှန်းနိုင်ခဲ့ပြီး တိုက်ရိုက်ပင် ဖွင့်ချလိုက်လေသည်။

"ကောင်လေး... အများကြီးသိလေ ပိုပြီး ဆိုးဆိုးရွားရွား သေရလေပဲကွ"

မိစ္ဆာနဂါးအိုကြီး၏ အသံက အလွန် အက်ကွဲရှတနေပြီး ခြောက်သွေ့နေသော သစ်ခေါက်နှစ်ခု ပွတ်တိုက်နေသည့်အလား နားထောင်ရ အလွန် ဆိုးရွားလှပေသည်။ တစ်ချိန်တည်းမှာပင် သူ၏ ကိုယ်ပေါ်ရှိ ဖိအားအရှိန်အဝါများကလည်း လျင်မြန်စွာ မြင့်တက်လာလေသည်။

"ငါ့ကို သတ်ချင်တာလား... ဟက်"

ကျန်းချဲ့၏ နှုတ်ခမ်းထောင့်တွင် ခပ်ဖွဖွ အပြုံးတစ်ခု ပေါ်လာလေသည်။ ထို့နောက် သူ၏ ကိုယ်ခန္ဓာက ချက်ချင်း နေရာရွှေ့ပြောင်းသွားပြီး အလင်းတန်းတစ်ခုအဖြစ် ပြောင်းလဲကာ ဝမ်ယွဲ့လသာဆောင် တစ်ခုလုံးကို ဖောက်ထွင်း၍ ထျန်းနန်မြို့ပြင် တစ်နေရာဆီသို့ လေဟာနယ်ကို ခွင်းလျက် ပျံသန်းထွက်ခွာသွားလေသည်။

"အလကား အလုပ်တွေ လုပ်နေတာပဲ"

မိစ္ဆာနဂါးအိုကြီးက အေးစက်စွာ ရယ်မောလိုက်ပြီး သူ၏ လေသံထဲတွင် အထင်သေးမှုများ ပြည့်နှက်နေလေသည်။ ချန်ကျောက် ၏ ကိုယ်ပေါ်တွင် သူ၏ နတ်အာရုံ တစ်စိတ်တစ်ပိုင်းသာ ကပ်တွယ်နေသည် မှန်သော်လည်း သူ၏ ကျင့်ကြံမှုမှာတော့ အစစ်အမှန်ပင် ဖြစ်လေသည်။ ရှန်ရှန်းအဆင့် မဟာသိုင်းသခင် များနှင့် ရင်ဆိုင်ရမည်ဆိုလျှင်တော့ အနည်းငယ် ခက်ခဲနိုင်သော်လည်း လူသားများ၏ သာမန် ရွှမ်တန်အဆင့် သိုင်းသခင် တစ်ပါးကိုတော့ သူ လုံးဝ အရေးမစိုက်ခဲ့ချေ။

ယခင်က ဘုန်းကြီးဝူချန် ကို သူ ကိုယ်တိုင် ဝင်ရောက် မတိုက်ခိုက်ခဲ့ခြင်းမှာ ထျန်းလုံဘုန်းကြီးကျောင်း မှ ရဟန္တာများကို လှည့်စားထားလိုသောကြောင့်သာ ဖြစ်လေသည်။ မဟုတ်ပါက သူ၏ စွမ်းအားဖြင့် ဘုန်းကြီးဝူချန် ကို လက်တစ်ဖက်တည်းဖြင့်ပင် ဖိနှိပ်ပစ်နိုင်စွမ်း ရှိလေသည်။

စကားအဆုံးတွင် မိစ္ဆာနဂါးအိုကြီး ကလည်း ခြေတစ်လှမ်း လှမ်းလိုက်ကာ အနက်ရောင် အလင်းတန်းတစ်ခုအဖြစ် ပြောင်းလဲသွားပြီး ကျန်းချဲ့ ထွက်ပြေးသွားရာ လမ်းကြောင်းဆီသို့ တိုက်ရိုက် လိုက်လံ ဖမ်းဆီးတော့သည်။

ထျန်းနန်မြို့ အတွင်းရှိ မရေမတွက်နိုင်သော သိုင်းပညာရှင်များစွာက မော့ကြည့်လိုက်ကြပြီး အားလုံး၏ ရင်ထဲတွင် အံ့အားသင့်ကာ ထိတ်လန့်သွားကြလေသည်။

သို့သော် ချက်ချင်းပင် သူတို့ ပြန်လည် တည်ငြိမ်သွားကြလေသည်။ ထျန်းနန်မြို့မှာ အလယ်ပိုင်းဒေသများနှင့် မတူဘဲ အလယ်ပိုင်းဒေသ၏ နယ်စပ်ဖြစ်ရာ မရေမတွက်နိုင်သော မိစ္ဆာများနှင့် လူဆိုးများ ပုန်းခိုနေလေ့ရှိလေသည်။ မကျေနပ်သည်နှင့် လက်ပါလေ့ရှိကြပြီး ဤနေရာတွင်တော့ ဤကဲ့သို့သော လုပ်ရပ်များက အလွန် ပုံမှန်သာ ဖြစ်လေသည်။

သို့သော် ယခုတစ်ကြိမ်တွင်တော့ မည်သူကမျှ နောက်မှလိုက်၍ ပွဲမကြည့်ရဲကြချေ။ ဤကဲ့သို့သော တိုက်ပွဲမျိုးက အလင်းရောင်အောက်တွင် ကျင်းပသော တရားဝင် စိန်ခေါ်ပွဲမျိုး မဟုတ်သဖြင့် တစ်ခါတစ်ရံတွင် စပ်စုလွန်းခြင်းက မိမိကိုယ်ကို သေတွင်းထဲ ပို့သကဲ့သို့ ဖြစ်သွားနိုင်လေသည်။

ထို့ကြောင့် အဝေးသို့ ပျံသန်းသွားကြသော ထိုသူနှစ်ဦး၏ သရုပ်မှန်ကိုသာ ရပ်နေသည့် နေရာမှနေ၍ ခန့်မှန်း ပြောဆိုနေကြတော့သည်။ မည်သို့ပင်ဆိုစေ ထိုကဲ့သို့သော အရှိန်အဝါများ အရ ရွှမ်တန်အဆင့် သိုင်းသခင်များ ဖြစ်မည်မှာ အသေအချာပင်။

အခြားတစ်ဖက်တွင် ကျန်းချဲ့၏ သတင်းကို ရရှိထားပြီးဖြစ်သော ချီထျန်းဟယ် မှာ မြို့ပြင်တွင် ကြိုတင် စောင့်ဆိုင်းနေခဲ့လေပြီ။ ကျန်းချဲ့က ထိုသူကို အပြင်သို့ မျှားခေါ်လာသည်ကို မြင်သောအခါ ချက်ချင်းပင် မိမိကိုယ်ကို ဖုံးကွယ်၍ နောက်မှ လိုက်သွားလေသည်။ ကျန်းချဲ့ ထံမှ အချက်ပြလိုက်သည်နှင့် တစ်ပြိုင်နက် သူ ချက်ချင်း ဝင်ရောက် တိုက်ခိုက်မည် ဖြစ်လေသည်။

တစ်ချိန်တည်းမှာပင် ကျန်းချဲ့က သူ၏ အမြန်နှုန်းကို အမြင့်ဆုံး အထိ ဆွဲတင်ထားလိုက်လေသည်။ မျက်တောင်တစ်ခတ် အတွင်းမှာပင် ပေတစ်ရာကျော် အကွာအဝေးကို ဖြတ်သန်းသွားနိုင်ပြီး အဝေးမှ ကြည့်လျှင် ကြယ်ပျံတစ်စင်း ဖြတ်သန်းသွားသကဲ့သို့ အလွန် မြန်ဆန်လှပေသည်။

သို့သော် ထိုမျှ မြန်ဆန်နေလင့်ကစား သူတို့ နှစ်ဦးကြားရှိ အကွာအဝေးမှာ လုံးဝ ကွာဟသွားခြင်း မရှိခဲ့ချေ။ အကွာအဝေး တစ်ခုကို အမြဲတမ်း ထိန်းသိမ်းထားနိုင်ပြီး မိစ္ဆာနဂါးအိုကြီး က နောက်မှနေ၍ အေးအေးဆေးဆေး လိုက်ပါလာလေသည်။ သူ၏ အမူအရာက လုံးဝ အလောတကြီး မရှိဘဲ ခြံဝင်းအတွင်း လမ်းလျှောက်နေသည့်အလား ပင်။

သူ၏ စိတ်ထဲတွင်တော့ အရှေ့မှ ပြေးနေသော ရွှမ်တန်အဆင့် သိုင်းသခင်မှာ ဘာမှ မဟုတ်ချေ။ ဝေးဝေး ပြေးနိုင်လေ ပိုပြီး မြန်မြန် သေရလေပင် ဖြစ်လေသည်။

ရုတ်တရက် အရှေ့မှ အပြေးအလွှား သွားနေသော ကျန်းချဲ့၏ ကိုယ်ခန္ဓာက လျင်မြန်စွာ လှည့်ထွက်သွားပြီး လက်ကို မြှောက်ကာ အစွမ်းကုန် တိုက်ခိုက်လိုက်လေသည်။ နဂါးဟိန်းဟောက်သံ တစ်ချက် ကောင်းကင်ယံသို့ ပဲ့တင်ထပ်သွားပြီးနောက် စစ်မှန်သော နဂါးပုံရိပ် တစ်ခု က လေခွင်းသံနှင့်အတူ ထွက်ပေါ်လာလေသည်။ အားကောင်းသော အရှိန်အဝါများက မိစ္ဆာနဂါးအိုကြီး ထံသို့ တိုက်ရိုက် ဦးတည်သွားလေသည်။

ထိုကဲ့သို့သော တိုက်ခိုက်မှုကို ရင်ဆိုင်ရချိန်တွင် မိစ္ဆာနဂါးအိုကြီး၏ မျက်ဝန်းများထဲတွင်လည်း လေးနက်မှု အနည်းငယ် ထွက်ပေါ်လာလေသည်။ သို့သော် သူ့ကို အာရုံစိုက်စေခဲ့သည်မှာ ထိုတိုက်ကွက် မဟုတ်ဘဲ ထိုနဂါးပုံရိပ် ထံမှ နဂါး၏ အရှိန်အဝါ အနည်းငယ်ကို အာရုံခံမိလိုက်ခြင်းကြောင့်ပင်။ သူနှင့် အလွန် ဆင်တူသော နဂါးအရှိန်အဝါ မျိုး ပင်ဖြစ်သည်။

'မိစ္ဆာနဂါး မျိုးနွယ်စု ကပဲလား... မဟုတ်ဘူး... မတူဘူး'

'တစ်ဖက်လူက နဂါးမျိုးနွယ်စုနဲ့ ပတ်သက်တဲ့ အစွမ်းထက် ကျင့်စဉ်တစ်ခုကို ကျင့်ကြံထားတဲ့ ပုံစံမျိုးပဲ... ဒါဆိုရင်လည်း အဓိပ္ပာယ်ရှိသွားပြီ... ဘာလို့ သူက မိစ္ဆာနဂါး အနှစ်သာရသွေးကို လိုချင်နေရတာလဲ ဆိုတာ... ကျင့်ကြံဖို့အတွက် သုံးချင်လို့ကိုး'

အချိန်တိုလေး အတွင်းမှာပင် မိစ္ဆာနဂါးအိုကြီး၏ စိတ်ထဲတွင် ထိုအတွေးများ ဖြတ်ပြေးသွားလေသည်။

ထို့နောက် ပြင်းထန်စွာ တိုက်ခိုက်လာသော နဂါးပုံစံ ချီစွမ်းအင်များကို ရင်ဆိုင်ရာတွင် သူ၏ မျက်ဝန်းများထဲမှ အနီရောင် အလင်းတန်းများ တောက်ပသွားလေသည်။ သူ၏ အနောက်ဘက်တွင် ပေတစ်ရာခန့် ကြီးမားသော ပုံရိပ်ကြီး တစ်ခု လျင်မြန်စွာ ထွက်ပေါ်လာလေသည်။ မင်ရည်ကဲ့သို့ မည်းနက်နေသော အကြေးခွံများ ဝမ်းဗိုက်အောက်မှ ထွက်ပေါ်နေသော ခြေသည်းနှစ်ဖက် နှင့် ခေါင်းပေါ်ရှိ ဦးချိုတစ်ချောင်း ပါဝင်ပြီး မျက်လုံးများ ချိုင့်ဝင်နေသော ထိုအရာမှာ မိစ္ဆာနဂါး ကြီး တစ်ကောင်ပင် ဖြစ်လေသည်။

ဤ မိစ္ဆာနဂါးကြီးမှာ ပုံရိပ်ယောင် နဂါးချီစွမ်းအင်များ နှင့် မတူဘဲ အလွန် ပီပြင်လှပေသည်။ သူ၏ အကြေးခွံများပေါ်မှ တောက်ပနေသော အလင်းရောင်များကိုပင် မြင်တွေ့နိုင်လေသည်။ ကျယ်လောင်စွာ ဟိန်းဟောက်လိုက်ပြီး နဂါးပုံစံ ချီစွမ်းအင်များကို တစ်ကိုက်တည်းနှင့် ဝမ်းဗိုက်ထဲသို့ မျိုချပစ်လိုက်လေသည်။ ပုံရိပ်ယောင်အမြုတေအဆင့် သိုင်းသခင် တစ်ပါးကိုပင် သတ်ဖြတ်နိုင်စွမ်းရှိသော ပုံရိပ်ယောင် နဂါးကြီးမှာ အစစ်အမှန် မိစ္ဆာနဂါးကြီး၏ အရှေ့တွင်တော့ ဘာမှ မဟုတ်တော့သကဲ့သို့ အလွယ်တကူ ပျက်စီးသွားခဲ့လေသည်။

"နဂါးပုံစံ ချီစွမ်းအင်... နဂါးအရှိန်အဝါ အနည်းငယ်... မင်းက မြောက်လင် ချီမိသားစုရဲ့ သမက် ကျန်းချဲ့ လား"

မိစ္ဆာနဂါးအိုကြီးက တစ်ဖက်လူ၏ ရင်းနှီးနေသော တိုက်ကွက်များကို ကြည့်ကာ ကောလာဟလများ နှင့် တိုက်ဆိုင် စစ်ဆေးကြည့်ပြီးနောက် အချိန်တိုအတွင်းမှာပင် ကျန်းချဲ့၏ သရုပ်မှန်ကို ရိပ်မိသွားလေသည်။ သူ၏ မျက်ဝန်းများက ကျန်းချဲ့ကို စူးစိုက်ကြည့်ကာ စဉ်းစားခန်း ဝင်နေလေသည်။

"ကျုပ်က ထျန်းလုံဘုန်းကြီးကျောင်းရဲ့ နဂါးချည်နှောင်ရေတွင်းထဲမှာ မိစ္ဆာဘုရင်အဆင့် မိစ္ဆာနဂါးကြီး တစ်ကောင်ကို ဖိနှိပ်ထားတယ်လို့ပဲ ကြားဖူးတာ... စီနီယာ့ရဲ့ နာမည်ကိုတော့ မသိသေးဘူးဗျ"

ကျန်းချဲ့က လက်ကိုနောက်ပစ်ကာ မာနမကြီးဘဲ နှိမ့်ချခြင်းလည်း မရှိစွာဖြင့် မေးလိုက်လေသည်။

"ဒီဘုရင်က... အောက်ခွန်း ပဲ"

မိစ္ဆာနဂါးအိုကြီးက သူ၏ သရုပ်မှန်ကို အနည်းငယ်မျှပင် ဖုံးကွယ်မထားခဲ့ချေ။ အကြောင်းမှာ သူ၏ အမြင်တွင် ကျန်းချဲ့၌ ချီမိသားစု ကဲ့သို့သော နောက်ခံအင်အား ရှိနေလျှင်တောင်မှ သူ၏ အစားအစာ သက်သက်သာ ဖြစ်သောကြောင့်ပင်။ သေမည့်သူ တစ်ယောက်၏ အရှေ့တွင် ဆက်လက် ဖုံးကွယ်ထားရန် လုံးဝ မလိုအပ်တော့ချေ။

"အောက်ခွန်း"

ကျန်းချဲ့က တီးတိုးရေရွတ်လိုက်ပြီးနောက် ဆက်ပြောလိုက်လေသည်။

"စီနီယာက နဂါးချည်နှောင်ရေတွင်း ထဲကနေတောင် လွတ်မြောက်လာနိုင်တယ် ဆိုတော့... တကယ်ကို ဂုဏ်ပြုစရာ ကောင်းတဲ့ ကိစ္စပါပဲ"

"ကောင်လေး... မင်း ငါ့ကို ကောင်းကင်ဘုံအထိ ရောက်အောင် မြှောက်ပြောနေရင်တောင် ဒီနေ့ မင်းသေရမှာပဲ... ဒါပေမဲ့ မင်းက ငါတို့ နဂါးမျိုးနွယ်စုရဲ့ ကျင့်စဉ်ကို ကျင့်ကြံထားတဲ့ မျက်နှာနဲ့တော့... မင်းကို နာကျင်မှုမရှိဘဲ သေခွင့်ပေးလိုက်မယ်"

မိစ္ဆာနဂါးအိုကြီးက ကျန်းချဲ့နှင့် ဤနေရာတွင် စကားစမြည် ပြောနေရန် စိတ်ဝင်စားခြင်း မရှိချေ။ နောက်တစ်စက္ကန့်တွင် သူ၏ နောက်ကွယ်ရှိ မိစ္ဆာနဂါးရုပ်တု ပါဝင်နေသော ပုံရိပ်ကြီးက ချက်ချင်းပင် လှုပ်ရှားလာလေသည်။ လက်သည်းတစ်ချက် ကုတ်ခြစ်လိုက်ရာ လေဟာနယ် တစ်ခုလုံး အရောင်ပြောင်းသွားလေသည်။ မရေမတွက်နိုင်သော တိမ်မည်းများ စုရုံးလာပြီး အစွမ်းထက်သော ဖိအားများက ကျန်းချဲ့ကိုပင် ပြင်းထန်သော အန္တရာယ်ကို ခံစားလာရစေလေသည်။

ကျန်းချဲ့က လုံးဝ တွေဝေခြင်းမရှိဘဲ လက်သီးနှစ်ဖက်ကို ရိုက်ခတ်လိုက်ရာ သွေးပင်လယ် အစီအရင် ထဲမှ နဂါးပုံစံ ချီစွမ်းအင်များ ထွက်ပေါ်လာပြီး မိစ္ဆာနဂါး ပုံရိပ်ကြီးကို ဝင်ရောက် တိုက်ခိုက်လေသည်။ သို့သော် နှမြောစရာ ကောင်းသည်မှာ သူ၏ အစွမ်းကုန် တိုက်ခိုက်မှုက တစ်ခဏမျှသာ ဟန့်တားနိုင်ခဲ့ပြီး မိစ္ဆာနဂါးကြီး အပေါ် မည်သည့် ထိခိုက်မှုမျှ မဖြစ်စေခဲ့ချေ။

သို့သော် ကျန်းချဲ့ လိုချင်သည်ကလည်း တစ်ဖက်လူကို အမှန်တကယ် အနိုင်ယူရန် မဟုတ်ပေ။

တစ်ဖက်လူမှာ ထိုမိစ္ဆာနဂါးအိုကြီး ၏ ကိုယ်ပွားဖြစ်ကြောင်း သိလိုက်ရချိန် ကတည်းက ကျန်းချဲ့က ကိုယ်တိုင် တိုက်ခိုက်မည့် အစီအစဉ်ကို ရုပ်သိမ်းလိုက်လေသည်။ နောက်ပြောင်နေတာလား... အဲ့ဒါက ရှန်ရှန်းအဆင့် နဲ့ ညီမျှတဲ့ ကြောက်မက်ဖွယ် မိစ္ဆာဘုရင်ကြီး လေ။

ယခု သူက စစ်မှန်သောအမြုတေ အဆင့်သာ ရှိနေသေးသည်ကို ထားလိုက်ဦး ရွှေအမြုတေ အဆင့်ကို ရောက်သွားလျှင်တောင်မှ...

အကယ်၍ ရွှေအမြုတေ အဆင့်ကို ရောက်သွားမည် ဆိုလျှင် မိစ္ဆာနဂါးအိုကြီး ၏ ကိုယ်ပွား တစ်ခုတည်းကိုသာ ရင်ဆိုင်ရမည် ဆိုပါက သူ မတိုက်ခိုက်နိုင်စရာ အကြောင်းမရှိပေ။ သို့သော် လက်ရှိ ပြဿနာမှာ သူ က ရွှေအမြုတေ အဆင့်သို့ ရောက်ရှိရန် အလှမ်းဝေးနေသေးခြင်း ပင် ဖြစ်လေသည်။

သူ ဤသို့ လုပ်ဆောင်ရခြင်း၏ ရည်ရွယ်ချက်မှာ ဒုတိယအကြီးအကဲ ချီထျန်းဟယ် ကို အချက်ပြရန်သာ ဖြစ်လေသည်။

ထင်ထားသည့်အတိုင်းပင် ကျန်းချဲ့၏ တိုက်ကွက်များ ပျက်စီးသွားချိန်တွင် လေဟာနယ် ထဲမှ အဖြူရောင် ဝတ်ရုံဖြင့် ပုံရိပ်တစ်ခု ဖြည်းညင်းစွာ ထွက်ပေါ်လာလေသည်။ သူ၏ လက်ထဲမှ ဓားရှည်တစ်လက် ထွက်ပေါ်လာပြီး ဓားအလင်းတန်းများ က ကောင်းကင်နှင့်မြေကြီး အနှံ့ တောက်ပသွားလေသည်။ ဓားချီ နဂါးကြီး တစ်ကောင်အလား လေခွင်းသံနှင့်အတူ မိစ္ဆာနဂါး ပုံရိပ်ကြီးကို ဝင်ရောက် တိုက်ခိုက်လေတော့သည်။

ဝုန်း... ဒိုင်း...

ရှန်ရှန်းအဆင့် တိုက်ကွက် နှစ်ခု ရိုက်ခတ်သွားပြီး ချက်ချင်းပင် ပျက်စီးသွားလေသည်။ ဓားချီ နဂါးကြီးရော မိစ္ဆာနဂါး ပုံရိပ်ကြီးပါ ရိုက်ခတ်မှု အတွင်းမှာပင် အပိုင်းပိုင်းအစစ ပြတ်တောက် ပျက်စီးသွားကြလေသည်။

အောက်ခွန်း ၏ မျက်နှာထားက ချက်ချင်း မှောင်မိုက်သွားပြီး အလွန် ကြည့်ရဆိုးနေလေသည်။ အကယ်၍ သူ၏ ခန္ဓာကိုယ်အစစ် သာ ဤနေရာတွင် ရှိနေမည်ဆိုပါက သာမန် ရှန်ရှန်းအဆင့် မဟာသိုင်းသခင် တစ်ပါးကို သူ လုံးဝ အရေးစိုက်မည် မဟုတ်ပေ။ သို့သော် ယခု အရေးကြီးဆုံး ပြဿနာမှာ သူက ခွဲထွက်လာသော နတ်အာရုံ တစ်စိတ်တစ်ပိုင်း သာ ဖြစ်နေခြင်း ပင်ဖြစ်သည်။ ထို့ကြောင့် မဟာသိုင်းသခင် တစ်ပါးကို ယှဉ်ပြိုင်ရန် အလွန် ခက်ခဲလှပေသည်။

"မင်းလို မိစ္ဆာနဂါးအိုကြီးက တိတ်တဆိတ် လွတ်မြောက်လာနိုင်လိမ့်မယ်လို့ တကယ်ကို ထင်မထားခဲ့ဘူး"

ချီထျန်းဟယ် ကလည်း အောက်ခွန်း ၏ သရုပ်မှန်ကို ခန့်မှန်းမိသွားပြီး ကိုယ်ခန္ဓာ နေရာရွှေ့ပြောင်းကာ ကျန်းချဲ့၏ ဘေးတွင် ပေါ်လာလေသည်။ ထို့နောက် တစ်ဖက်လူကို လေးနက်သော အမူအရာဖြင့် အကဲခတ်နေလေသည်။

"မင်းက ဘယ်သူလဲ"

အောက်ခွန်း က အသံကို နှိမ့်ချကာ မေးလိုက်လေသည်။

"ချီမိသားစု... ချီထျန်းဟယ် ပဲ"

ဒုတိယအကြီးအကဲက အဖြူရောင် ဝတ်ရုံဖြင့် မတ်မတ်ရပ်ကာ ဂုဏ်ယူဝင့်ကြွားစွာ ပြောလိုက်လေသည်။

"ဒီဘုရင်က ချီထျန်းကျုံး ကိုပဲ ကြားဖူးတာ... မင်းလိုလူကတော့... အဆင့်မမီသေးပါဘူးကွာ"

အောက်ခွန်း က အရှုံးမပေးဘဲ လေသံထဲတွင် အထင်သေးမှုများ ပါဝင်နေလေသည်။

"တကယ်လို့ မင်းရဲ့ ခန္ဓာကိုယ်အစစ်သာ ဒီမှာရှိနေရင်... ဒီအိုကြီးက မင်းကို သုံးပုံတစ်ပုံလောက်တော့ ကြောက်ရွံ့မိမှာပဲ... ဒါပေမဲ့ အခု မင်းက ခွဲထွက်လာတဲ့ နတ်ဝိညာဉ် တစ်စိတ်တစ်ပိုင်းလေး သက်သက်ပဲကို... ဒီနေရာမှာ လာပြီး ပါးစပ်ဖွာရဲသေးတယ်ပေါ့... ဒီလိုဆိုမှတော့ ဒီအိုကြီးက မင်းရဲ့ ကျန်ရစ်တဲ့ ဝိညာဉ်ကို ဖိနှိပ်ပေးရတာပေါ့"

ချီထျန်းဟယ် က အေးစက်စွာ ပြောလိုက်လေသည်။

"မင်းလိုကောင်ကများ"

"ငါပဲပေါ့ကွ"

နှစ်ဖက်စလုံးက ဓားဆွဲထုတ်ရန် အသင့်ဖြစ်နေကြပြီ ဖြစ်လေသည်။ နောက်တစ်စက္ကန့်တွင် လုံးဝ တွေဝေခြင်းမရှိဘဲ သူတို့ နှစ်ဦးစလုံးက ချက်ချင်း ပေါက်ကွဲထွက်ကာ တိုက်ခိုက်ကြလေတော့သည်။ မိစ္ဆာနဂါး ပုံရိပ်ကြီး တစ်ခုက ရုပ်တု ၏ အစွမ်းများ ပါဝင်နေပြီး အခြား တစ်ဖက်တွင်တော့ ဒုတိယအကြီးအကဲ ချီထျန်းဟယ် ဖန်တီးလိုက်သော တောင်တန်းကြီး ရုပ်တု ပင် ဖြစ်လေသည်။ ကြောက်မက်ဖွယ် ကောင်းသော အရှိန်အဝါ နှစ်ခုက ချက်ချင်းပင် ရောယှက် ရိုက်ခတ်သွားကြလေသည်။

ပေတစ်ထောင် အကွာအဝေးမှနေ၍ ကျန်းချဲ့က ဤတိုက်ပွဲကို အလွန် လေးနက်စွာ စောင့်ကြည့်နေလေသည်။ အစပိုင်းတွင် ကျန်းချဲ့၏ အမြင်၌ ခန္ဓာကိုယ်အစစ် မဟုတ်သော မိစ္ဆာနဂါးအိုကြီး သည် ဒုတိယအကြီးအကဲ ၏ လက်ထဲတွင် အလွယ်တကူ ရှုံးနိမ့်သွားလိမ့်မည်ဟု ထင်မှတ်ထားခဲ့လေသည်။ ထို့နောက် သူ့ကို ဖိနှိပ်ချုပ်ကိုင်ရန် နည်းလမ်း ရှာနိုင်မည်ဟု တွေးထားခဲ့လေသည်။

သို့သော် သူတို့ နှစ်ဦး တကယ်တမ်း တိုက်ခိုက်ကြသော အခါမှသာ သူက မိစ္ဆာဘုရင် တစ်ပါးကို အထင်သေးမိခဲ့ကြောင်း သဘောပေါက်သွားလေသည်။ ခန္ဓာကိုယ်အစစ် မဟုတ်လျှင်တောင်မှ အောက်ခွန်း က အလွန် အစွမ်းထက်သော စွမ်းအားများကို ထုတ်ဖော်နိုင်စွမ်း ရှိလေသည်။ အစကတည်းက ဒုတိယအကြီးအကဲ ၏ ဖိနှိပ်မှုကို ခံနေရသော်လည်း လုံးဝ ပြန်လည် မခုခံနိုင်ခြင်းတော့ မဟုတ်ပေ။

ရှုံးနိမ့်မည်မှာ အသေအချာပင် ဖြစ်သော်လည်း သူ့ကို ဖိနှိပ်ချုပ်ကိုင်ရန် ဆိုသည်မှာတော့ အလွန် ခက်ခဲလှပေသည်။ ဤအချက်ကို အောက်ခွန်း ကိုယ်တိုင်လည်း ကောင်းစွာ သိရှိထားလေသည်။ စမ်းသပ် တိုက်ခိုက်ပြီးနောက် ယခုတစ်ကြိမ်တွင် ချန်ကျောက် ၏ ခန္ဓာကိုယ်ကို စွန့်လွှတ်လိုက်ရတော့မည် ဖြစ်ကြောင်း သူ သိရှိသွားလေသည်။ မဟုတ်ပါက သေချာပေါက် ထွက်ပြေးနိုင်မည် မဟုတ်ချေ။

ဤအချက်ကို တွေးမိသောအခါ သူ အလွန် ခံရခက်နေမိလေသည်။ ဤခန္ဓာကိုယ်ကို အပြည့်အဝ ထိန်းချုပ်နိုင်ရန် နှင့် နောက်ပိုင်း အစီအစဉ်များ အတွက် သူ ပေးဆပ်ခဲ့ရမှုများက မနည်းလှချေ။ ချန်ကျောက် ကို လုံးဝ သံသယ မဝင်စေရန် နှစ်ပေါင်းများစွာ အချိန်ယူခဲ့ရုံသာမက တစ်ဖက်လူ၏ ခုခံမှုများကို ဖြိုခွဲရန် အတွက် မိစ္ဆာနဂါး အနှစ်သာရသွေး များကိုပင် အသုံးပြုကာ သူ၏ ဆန္ဒများကို ဖြည့်ဆည်းပေးခဲ့ရလေသည်။ သို့သော် ယခု အောင်မြင်တော့မည့် အချိန်ရောက်မှ ဤနေရာတွင် ပိတ်ဆို့ခံလိုက်ရလေသည်။

ပို၍ ဆိုးရွားသည်မှာ အကယ်၍ ကျန်းချဲ့နှင့် ချီထျန်းဟယ် တို့က သူ လွတ်မြောက်လာနိုင်သည့် သတင်းကို ထျန်းလုံဘုန်းကြီးကျောင်း သို့ သတင်းပို့လိုက်ပါက သူ့ကို စောင့်ကြိုနေသည်မှာ အမှောင်မိုက်ဆုံး နဂါးချည်နှောင်ရေတွင်း ထဲတွင် ဆက်လက် အကျဉ်းချခံရမည်သာ ဖြစ်လေသည်။

သို့သော် အခြေအနေက ဤသို့ဖြစ်နေပြီမို့ သူ ဘာတတ်နိုင်မည်နည်း။ ဤခန္ဓာကိုယ်ကို စွန့်လွှတ်ပြီး အခြားနည်းလမ်းတစ်ခု ရှာဖွေရုံမှလွဲ၍ ရွေးချယ်စရာ မရှိတော့ချေ။ သူ၏ အမြန်နှုန်းဖြင့် ဆိုလျှင် ချီထျန်းဟယ် ပင်လျှင် သူ့ကို သေချာပေါက် တားဆီးနိုင်မည် မဟုတ်ဟု သူ ယုံကြည်လေသည်။ အကြောင်းမှာ တစ်ဖက်လူ အနေဖြင့် သူ၏ မူလဝိညာဉ်ကို လောင်ကျွမ်းစေကာ သူ့ကို သေသည်အထိ တိုက်ခိုက်မည် မဟုတ်သောကြောင့် ပင်ဖြစ်သည်။

ဤသို့ တွေးလိုက်ပြီးနောက် သူက တစ်ဖက်လူကို တွန်းထုတ်ကာ အကွာအဝေးကို ချဲ့လိုက်ပြီး ချက်ချင်းပင် ထွက်ပြေးရန် ပြင်လိုက်လေသည်။

သို့သော် သူ မျက်တောင်တစ်ခတ် အတွင်း ပျောက်ကွယ်မသွားမီ မှာပင် ကျန်းချဲ့က သူ၏ အနောက်ဘက် မလှမ်းမကမ်း သို့ ရောက်ရှိနေပြီ ဖြစ်ကာ အသံကို နှိမ့်ချ၍ အော်ဟစ်လိုက်လေသည်။

"စီနီယာ အောက်ခွန်း... နေပါဦး... ကျုပ်တို့ နှစ်ယောက်ကြားမှာ တိုက်ပွဲကို ရပ်တန့်လို့ ရကောင်း ရနိုင်ပါတယ်"

"မင်းလိုကောင်ကများ"

မာနကြီးသော အောက်ခွန်း ၏ မျက်နှာပေါ်တွင် အထင်သေးမှုများ ထွက်ပေါ်လာလေသည်။ ရွှမ်တန်အဆင့် သာ ရှိသေးသော ကောင်လေး တစ်ယောက်က သူ့ကို အမိန့်ပေးဖို့ ထိုက်တန်လို့လား။ မိစ္ဆာမျိုးနွယ်စု မှ ဆင်းသက်လာသော သူက တစ်သက်လုံး မာနကြီးခဲ့ပြီး အခြားသူများ၏ ချုပ်ကိုင်မှုကို လုံးဝ ခံယူမည် မဟုတ်ချေ။

"ဟုတ်တယ်... ကျုပ်ပဲပေါ့"

ကျန်းချဲ့က စကားလုံး တစ်လုံးချင်းစီကို ပီပီသသ ဆိုလိုက်လေသည်။ ထို့နောက် အောက်ခွန်း ၏ မျက်စိရှေ့တွင်ပင် အင်္ကျီလက်ထဲမှ အလင်းတန်းတစ်ခုကို ဝှေ့ယမ်းလိုက်ရာ ကြောက်မက်ဖွယ်ကောင်းသော ဖိအားများ ပါဝင်နေသည့် ဝိညာဉ်အသွင်ပြောင်း နတ်မှော်အဆောင် တစ်ခု က လေဟာနယ် ထဲတွင် ချက်ချင်း ထွက်ပေါ်လာလေသည်။

"ဝိညာဉ်အသွင်ပြောင်း နတ်မှော်အဆောင် ပါလား"

အောက်ခွန်း ၏ မျက်နှာ အကြီးအကျယ် ပြောင်းလဲသွားလေသည်။ ဤတစ်ကြိမ်တွင်တော့ သူ တကယ်ကို ထိတ်လန့်သွားခဲ့လေပြီ။ အရှေ့တွင် ချီထျန်းဟယ် ရှိနေပြီး အနောက်တွင်တော့ ဝိညာဉ်အသွင်ပြောင်း နတ်မှော်အဆောင် ရှိနေလေရာ ဤတစ်ကြိမ်တွင် သူ တကယ်ပဲ ဤနေရာတွင် ကျဆုံးသွားနိုင်လေသည်။

ချီထျန်းဟယ် လည်း ကျန်းချဲ့၏ ဝိညာဉ်အသွင်ပြောင်း နတ်မှော်အဆောင် ကို မြင်သောအခါ မျက်လုံးများ ကျဉ်းမြောင်းသွားလေသည်။ ဤ နတ်မှော်အဆောင် က ဘယ်ကလာသနည်း ဆိုသည်ကို သူ သိရှိထားလေသည်။ မိသားစုခေါင်းဆောင် ဖြစ်သူက သူ၏ ကျင့်ကြံမှု စွမ်းအားများကို အရင်းအနှီးပြု၍ ဖန်တီးထားသော နတ်မှော်အဆောင် ပင် ဖြစ်ပြီး မူလက မိသားစု သခင်လေး ချီရှောက်ယန် အတွက် ပြင်ဆင်ထားခြင်း ပင် ဖြစ်လေသည်။ သို့သော် ယခု ကျန်းချဲ့၏ လက်ထဲတွင် ရောက်ရှိနေလိမ့်မည်ဟု သူ လုံးဝ ထင်မှတ်မထားခဲ့ချေ။

သို့သော် သူ၏ ရင်ထဲတွင် အလွန် အံ့ဩနေသော်လည်း အပြင်တွင်တော့ ထုတ်ဖော် မပြသခဲ့ချေ။ ထို မိစ္ဆာနဂါးအိုကြီး တိတ်ဆိတ်သွားသည်ကို မြင်သောအခါ သူ လည်း ဓားကို ကိုင်ဆောင်ကာ ဘေးတစ်ဖက်တွင် ရပ်နေလိုက်ပြီး ကျန်းချဲ့ စကားပြောသည်ကို စောင့်ကြည့်နေလိုက်လေသည်။

"ဒီပစ္စည်း ရှိနေပြီဆိုတော့... စီနီယာ အောက်ခွန်း က ကျုပ်နဲ့ သေချာ စကားပြောလို့ ရပြီလား"

ကျန်းချဲ့က တစ်ဖက်လူကို တိုက်ရိုက် ကြည့်ကာ အပြုံးတစ်ခု ဖြင့် မေးလိုက်လေသည်။

မူလက သူ၏ ရည်ရွယ်ချက်မှာ တစ်ဖက်လူကို ဖိနှိပ်ချုပ်ကိုင်၍ အသုံးချရန်ပင် ဖြစ်လေသည်။ ထိုသို့ဆိုလျှင် မိစ္ဆာနဂါး အနှစ်သာရသွေး နှင့် အခြားသော ရတနာ များကို မည်သည့် တန်ဖိုးမျှ ပေးဆပ်စရာ မလိုဘဲ ရရှိနိုင်မည် ပင်ဖြစ်သည်။ သို့သော် မိစ္ဆာနဂါးအိုကြီး က ဤ ခန္ဓာကိုယ်ကို စွန့်လွှတ်ရမည် ဆိုလျှင်တောင် အဖမ်းမခံလိုကြောင်း အလွန် ထင်ရှားနေပြီး ထွက်ပြေးနိုင်စွမ်း လည်း ရှိနေလေရာ သူ အနေဖြင့် အခြား စကားလုံးများကို ပြောင်းလဲ အသုံးပြုရတော့မည် ပင် ဖြစ်လေသည်။

"မင်း ဘာအကြောင်း ဆွေးနွေးချင်တာလဲ"

အောက်ခွန်း က အလွန် သတိထားနေသော မျက်နှာထားဖြင့် နောက်ဆုံးတွင်တော့ ကျန်းချဲ့ကို အလေးအနက်ထား စတင် ဆက်ဆံလာလေသည်။

"စီနီယာ အောက်ခွန်း ရဲ့ အကြံအစည် တွေ အားလုံးက... ထျန်းလုံဘုန်းကြီးကျောင်း ရဲ့ ချုပ်ကိုင်မှု အောက်ကနေ လွတ်မြောက်ချင်လို့ ဖြစ်ရမယ်... ဒါပေမဲ့ ဒီနေ့ ကိစ္စသာ သတင်းထွက်သွားရင်... ခင်ဗျား တစ်သက်လုံး နဂါးချည်နှောင်ရေတွင်း ထဲမှာပဲ ပိတ်လှောင်ခံရလိမ့်မယ်"

"မင်းက ဒီဘုရင်ကို ခြိမ်းခြောက်နေတာလား"

အောက်ခွန်း ၏ မျက်နှာထား က မသာမယာ ဖြစ်သွားလေသည်။

"စီနီယာ က အဲ့ဒီလို သတ်မှတ်ချင်လည်း ရပါတယ်... ဒါပေမဲ့ ကျုပ် အမြင်မှာတော့ ကျုပ်တို့ နှစ်ယောက်က သူငယ်ချင်းတွေ ဖြစ်လာနိုင်တယ် လို့ ထင်တယ်... တစ်နေ့နေ့ကျရင်... ကျုပ်က ခင်ဗျားကို အဲ့ဒီ အကျဉ်းထောင် ထဲကနေ ကယ်တင်ပေးနိုင်လိမ့်မယ်လို့ ဘယ်သူ သိမလဲ"

"မင်းလိုကောင်ကများ"

"ဟုတ်တယ်... ကျုပ်ပဲပေါ့"

ကျန်းချဲ့က လေးနက်စွာ ပြောလိုက်လေသည်။

"ဟွန့်... မင်း ဘာလိုချင်တာလဲ... တကယ်လို့ ဒီဘုရင်ကို ကျွန်ပြုချင်တယ် ဆိုရင်တော့ လုံးဝ မဖြစ်နိုင်ဘူးလို့ပဲ ပြောပါရစေ... ဒီ နတ်ဝိညာဉ် တစ်စိတ်တစ်ပိုင်းကို စွန့်လွှတ်ရရင်တောင်မှ မင်းရဲ့ ချုပ်ကိုင်မှုကို ခံယူမှာ မဟုတ်ဘူး... ဒါပေမဲ့ ဒီအချက်ကလွဲရင်... ဒီဘုရင် က မင်းနဲ့ သူငယ်ချင်း ဖြစ်ဖို့ ငြင်းဆန်စရာ အကြောင်းမရှိပါဘူး"

အချိန်အတော်ကြာ တိတ်ဆိတ်နေပြီးနောက် အောက်ခွန်း လည်း နောက်ဆုံး ကျန်ရှိနေသော မျှော်လင့်ချက်လေးကို အချည်းနှီး မဖြစ်စေချင်သဖြင့် သဘောထား အနည်းငယ် ပျော့ပျောင်းသွားလေသည်။

"စီနီယာက မိစ္ဆာဘုရင် တစ်ပါးဆိုတော့ ကျွန်ပြုမယ်လို့ ပြောတာ တကယ်တော့ မသင့်တော်ပါဘူး... ကျုပ်လည်း အဲ့ဒီလို သဘောနဲ့ ပြောတာ မဟုတ်ပါဘူး"

"ဒါဆို မင်းက ဘာသဘောလဲ"

"ကျုပ်က ခင်ဗျား လွတ်မြောက်အောင် ကူညီပေးမယ်... ခင်ဗျားက ကျုပ်ကို မိစ္ဆာနဂါး အနှစ်သာရသွေး တွေ... ဒါမှမဟုတ် ခင်ဗျားဆီမှာ ရှိတဲ့ တခြား ရတနာတွေကို ပေးရမယ်”