အခန်း ၂၈၆

အခန်း (၂၈၆) အဆုံးသတ်ခြင်း

ဒြပ်စင်ငါးပါး အစီအရင်မှ ထွက်ခွာလာပြီးနောက် သူတို့ခေါ်ဝေါ်နေသော ဒြပ်စင်ငါးပါး အမှီအခိုကင်း သိုင်းသမားများဆိုသည်မှာ ဒြပ်စင်ငါးပါး ခန္ဓာကိုယ်ကို ပိုင်ဆိုင်ထားသော ရွှမ်တန်အဆင့် သိုင်းသခင်များမျှသာ ဖြစ်ချေတော့သည်။ ကျန်းချဲ့က ရှန်ရှန်းအဆင့် စွမ်းအားများဖြင့် ခွေးတစ်ကောင်ကို သတ်ရသကဲ့သို့ အလွယ်တကူ သတ်ဖြတ်လိုက်လေသည်။

ကျန်းချဲ့၏ အစွမ်းကုန် တိုက်ခိုက်မှုကို ရင်ဆိုင်ရာတွင် မီးဒြပ်စင် အမှီအခိုကင်း သိုင်းသမားသည် လုံးဝ ယှဉ်ပြိုင်နိုင်စွမ်း မရှိခဲ့ချေ။ သူ၏ လက်ထဲရှိ မီးဒြပ်စင် အစီအရင်အလံကို အရူးအမူး အသက်သွင်းနေသော်လည်း အလံအတွင်းမှ ထွက်ပေါ်လာသော မီးတောက်များက ထိုကြောက်မက်ဖွယ်ကောင်းသော စွမ်းအားကြီးကို မတားဆီးနိုင်ခဲ့ပေ။

သွေးရောင်နဂါးကြီးက ကိုယ်ပေါ်သို့ ဝင်တိုက်လိုက်ရာ သူ၏ အကာအကွယ် စွမ်းအင်များကို တိုက်ရိုက် ချိုးဖျက်သွားပြီး သူ့ကို ပြင်းထန်စွာ ဒဏ်ရာရရှိစေကာ ပေတစ်ရာကျော်အထိ လွင့်စင်သွားစေလေသည်။

"အဟွတ် အဟွတ် အစ်ကိုကြီး မြန်မြန်ထွက်သွားပါ ကျွန်တော် သူ့ကို တားထားပေးမယ် နောက်မှ ကျွန်တော်တို့အတွက် လက်စားချေပေးပါ"

မီးဒြပ်စင် အမှီအခိုကင်း သိုင်းသမားက အော်ဟစ်လိုက်ပြီး သူ၏ ရွှေအမြုတေ အခြေခံအင်အားကို တိုက်ရိုက် လောင်ကျွမ်းစေလိုက်သည်။ သူ၏ တစ်ကိုယ်လုံးတွင် မီးတောက်တစ်ခု ချက်ချင်း ထတောက်လာလေသည်။

ပြတ်သားသော အကြည့်များဖြင့် ကျန်းချဲ့ထံသို့ ပြေးဝင်သွားလေသည်။ သူ၏ နောက်ဆုံး စွမ်းအားများဖြင့် အစ်ကိုကြီးအတွက် အချိန်ဆွဲပေးရန် ရည်ရွယ်ထားခြင်း ပင်တကား။

သို့သော် လုံးဝ အသာစီးရနေသော စွမ်းအားဖိနှိပ်မှု အောက်တွင် အရာအားလုံးက အချည်းနှီးသာ ဖြစ်လေသည်။ သွေးပင်လယ်ကြီး လှုပ်ခတ်သွားပြီး လှိုင်းလုံးများ ထကြွလာကာ မီးဒြပ်စင် သိုင်းသမား၏ ကိုယ်ပေါ်ရှိ မီးတောက်များကို မျက်တောင်တစ်ခတ်အတွင်း ငြိမ်းသတ်ပစ်လိုက်ပြီး သူ့ကိုပါ တစ်ပါတည်း ဝါးမျိုသွားလေတော့သည်။

ကျန်းချဲ့က ခြောက်သွေ့နေသော အလောင်းတစ်လောင်းကို ဆွဲမကာ ရွှေဒြပ်စင် အမှီအခိုကင်း သိုင်းသမားထံသို့ တစ်လှမ်းချင်း လျှောက်သွားလိုက်ပြီး လက်ထဲရှိ အလောင်းကို တစ်ဖက်လူထံသို့ ပစ်ချပေးလိုက်လေသည်။

"တကယ်ကို နက်ရှိုင်းတဲ့ ညီအစ်ကို သံယောဇဉ်ပါလား"

"စတုတ္ထညီ"

ရွှေဒြပ်စင် အမှီအခိုကင်း သိုင်းသမား၏ မျက်လုံးများ နီရဲသွားပြီး ရင်ထဲတွင် အမုန်းတရားများနှင့် မျှော်လင့်ချက် ကင်းမဲ့မှုများ ပြည့်နှက်သွားလေသည်။

အချိန်တိုလေး အတွင်းမှာပင် ဒြပ်စင်ငါးပါး အမှီအခိုကင်း သိုင်းသမားများထဲမှ သူ တစ်ယောက်တည်းသာ ကျန်ရစ်တော့သည်။ ထို့အပြင် ကြိုတင် ခန့်မှန်းနိုင်သည်မှာ သူ ကိုယ်တိုင်လည်း အချိန်အကြာကြီး တောင့်ခံနိုင်မည် မဟုတ်ချေ။

ဒြပ်စင်ငါးပါး အမှီအခိုကင်း သိုင်းသမားများက ရှန်ရှန်းအဆင့် မဟာသိုင်းသခင်ကို ယှဉ်ပြိုင်နိုင်စွမ်း ရှိခြင်းမှာ သူတို့၏ စွမ်းအားများ ကြီးမားနေ၍ မဟုတ်ဘဲ ဒြပ်စင်ငါးပါး အစီအရင်ကြောင့် သာ ဖြစ်လေသည်။ အမှန်တကယ်တော့ အစီအရင်၏ အထောက်အပံ့ သာ မရှိပါက သူတို့ ငါးယောက် ပေါင်းစပ် တိုက်ခိုက်လျှင်ပင် ရှန်ရှန်းအဆင့် မဟာသိုင်းသခင် တစ်ပါးကို တားဆီးနိုင်ရန် အလွန် ခက်ခဲလှပေသည်။

အဘယ်ကြောင့်ဆိုသော် သိုင်းသူတော်စင် အဆင့်ရှိသူများ ထွက်ပေါ်လာခြင်း မရှိသည့် အခြေအနေတွင် ထိုအဆင့်မှာ သိုင်းလောက၏ ထိပ်တန်း အဆင့်တွင် ရပ်တည်နေသော တည်ရှိမှု တစ်ခု ဖြစ်သောကြောင့် ပင်တကား။

"အာဟာရ အဖြစ် ပြောင်းလဲလိုက်စမ်း"

ကျန်းချဲ့က ရွှေဒြပ်စင် အမှီအခိုကင်း သိုင်းသမားကို တစ်ချက် လှမ်းကြည့်လိုက်ပြီး ညာဘက် လက်သီးကို ရုတ်တရက် ဆုပ်လိုက်လေသည်။ မျက်တောင်တစ်ခတ် အတွင်းမှာပင် ကောင်းကင်နှင့်မြေကြီး အရောင်ပြောင်းသွားပြီး အဆုံးအစမရှိသော စွမ်းအားကြီးက ကျရောက်လာကာ ရွှေဒြပ်စင် အမှီအခိုကင်း သိုင်းသမားကို နေရာမှာတင် ချည်နှောင်ထားလိုက်လေသည်။

အဆုံးအစမရှိသော သွေးပင်လယ် အမြင်အာရုံကြီးက သူ့ကို တိုက်ရိုက် ဝါးမျိုသွားလေတော့သည်။

ရွှေဒြပ်စင် အမှီအခိုကင်း သိုင်းသမားက နည်းလမ်း မျိုးစုံကို အသုံးပြုခဲ့သော်လည်း သူ ကိုယ်တိုင် တဖြည်းဖြည်းချင်း သေဆုံးနေရသည်ကိုသာ ကြည့်နေနိုင်ပြီး မျက်ဝန်းများမှာလည်း တဖြည်းဖြည်း မှေးမှိန်သွားလေတော့သည်။

အခြား တစ်ဖက်တွင်တော့...

ကျိုးရိ က အခြေအနေ မကောင်းတော့သဖြင့် ထွက်ပြေးသွားပြီး စစ်ရေးပြ တိုက်ခိုက်မှု အခင်းအကျင်း လည်း ပျက်စီးသွားသည့် အခြေအနေ အောက်တွင် ကျန်းဖျင် မှာလည်း ဤနေရာမှ ထွက်ပြေးရန် အတွေး ဝင်နေခဲ့ပြီ ဖြစ်သည်။ ရင်ထဲတွင် မကျေနပ်မှုများ ပြည့်နှက်နေသော်လည်း အမှန်တရားကို လက်ခံရမည် ဖြစ်ကြောင်း သူ သိထားလေသည်။

ကျန်းချဲ့ကို အငြိုးတကြီးဖြင့် တစ်ချက် စူးစိုက်ကြည့်လိုက်ပြီးနောက် လုံးဝ တွေဝေခြင်း မရှိတော့ဘဲ လျှို့ဝှက်ကျင့်စဉ်ကို အတင်းအကျပ် ဆက်လက် အသက်သွင်းလိုက်လေသည်။ ဓားအစီအရင်၏ ချည်နှောင်မှုကို ဖောက်ထွက်ကာ အလင်းတန်း တစ်ခုအဖြစ် ပြောင်းလဲသွားပြီး လေဟာနယ် အတွင်းသို့ လျင်မြန်စွာ ပျောက်ကွယ်သွားလေတော့သည်။

တိုက်ပွဲ အကြိမ်ကြိမ် ဆင်နွှဲခဲ့ရသော နတ်မှော်အဆောင် ကိုယ်ပွား မှာလည်း ယခုအခါ ပြိုလဲတော့မည့် အခြေအနေသို့ ရောက်ရှိနေပြီ ဖြစ်ပြီး ပုံရိပ်မှာ အလွန်တရာ ဝေဝါးနေလေပြီ။ လေဟာနယ် အတွင်း၌ တိတ်ဆိတ်စွာ ရပ်နေရင်း လေပြေ တစ်ချက် တိုက်ခတ်သွားသည့် အချိန်တွင် ဝိညာဉ်အလင်းတန်း လေးများ အဖြစ် ပြောင်းလဲသွားကာ ကောင်းကင်နှင့်မြေကြီး အကြားတွင် လုံးဝ ပျောက်ကွယ်သွားလေတော့သည်။

ချီထျန်းဟယ် လည်း ယခုအခါ လေဟာနယ် အတွင်းတွင် ပေါ်ထွက်လာပြီး အဝေးရှိ သွေးရောင် ပုံရိပ်ကို လေးနက်သော အကြည့်များဖြင့် စူးစိုက်ကြည့်နေလေသည်။ အမှန်တကယ်တော့ သူသာ တန်ဖိုးပေးဆပ်ရန် ဝန်မလေးခဲ့လျှင် ထို တောင်ပိုင်းယွဲ့ နိုင်ငံမှ စစ်သူကြီးကို သေချာပေါက် တားဆီးနိုင်မည် ပင်ဖြစ်သည်။

သို့သော် သူက ယခု အချိန်တွင် အမှန်တရားကို ရေရေရာရာ မသိရသေးသဖြင့် သူတစ်ပါး၏ အသုံးချခံ မဖြစ်လိုချေ။

ထို့အပြင် အကယ်၍ တစ်ဖက်လူက ကျန်းချဲ့ မဟုတ်ကြောင်း သေချာသွားပါက သူက တစ်ဖက်လူကိုပါ သေချာပေါက် တားဆီးမည် ပင်ဖြစ်သည်။ သူ၏ အာရုံခံမှု အရ တစ်ဖက်လူ၏ နည်းလမ်းများက လျှို့ဝှက်ဆန်းကြယ် သော်လည်း စွမ်းအားက အနည်းငယ် အားနည်းနေကြောင်း သိထားလေသည်။

မဟုတ်ပါက ဒြပ်စင်ငါးပါး အစီအရင် အတွင်းတွင် အမွှေးတိုင် တစ်တိုင်စာ အချိန်ခန့် အထိ ပိတ်လှောင်ခံနေရမည် မဟုတ်ချေ။

အကယ်၍ သူသာ ဆိုလျှင် ဒြပ်စင်ငါးပါး အမှီအခိုကင်း သိုင်းသမားများ အနေဖြင့် သူ့ကို အချိန်ဆွဲထားနိုင်မည့် စွမ်းအား မျိုး လုံးဝ ရှိမည် မဟုတ်ချေ။ သူတို့ ခေါ်ဝေါ်နေသော ဒြပ်စင်ငါးပါး အစီအရင် ဆိုသည်မှာ အလွန်ဆုံး ရှန်ရှန်းအဆင့် အစပိုင်း သို့မဟုတ် မူလဝိညာဉ် အဆင့်ရှိ မဟာသိုင်းသခင် တစ်ပါးကိုသာ ပိတ်လှောင်ထားနိုင်ပြီး အကန့်အသတ် ရှိလေသည်။

ရွှေဒြပ်စင် အမှီအခိုကင်း သိုင်းသမား သေဆုံးသွားခြင်း နှင့်အတူ ဒြပ်စင်ငါးပါး အမှီအခိုကင်း သိုင်းသမားများ အားလုံး ဤနေရာတွင် အပြီးတိုင် မြှုပ်နှံခြင်း ခံလိုက်ရပြီး ကျန်းချဲ့၏ လက်ထဲတွင် အကုန်လုံး အသတ်ခံလိုက်ရလေသည်။ ဘေးပတ်ဝန်းကျင်ရှိ လေဟာနယ် လည်း တဖြည်းဖြည်း ပြန်လည် တည်ငြိမ်လာလေတော့သည်။

အစီအရင် မှ ထွက်လာပြီးနောက် ကျန်းချဲ့ ၏ လက်ထဲတွင် အစွမ်းထက်သော အရှိန်အဝါ များကို ထုတ်လွှတ်နေသည့် အစီအရင် အလံ ငါးခု ရှိနေလေသည်။ အရပ်လေးမျက်နှာ သို့ ထွက်ပြေးနေကြသော တောင်ပိုင်းယွဲ့ မှ စစ်သည်များကို တစ်ချက် လှမ်းကြည့်လိုက်ပြီးနောက် ကျန်းချဲ့ ၏ မျက်လုံးများ အနည်းငယ် ကျဉ်းမြောင်းသွားကာ နက်နက်ရှိုင်းရှိုင်း တွေးတောနေမိလေသည်။

"ကောင်လေးကျန်း ဒီတောင်ပိုင်းယွဲ့ စစ်သည်တွေကို ငါ့အတွက် သတ်ပေးစမ်း သိုင်းသခင် ငါးယောက်ဆီက ရတဲ့ အမြုတေသွေးတွေက မလုံလောက်သေးဘူး လုံးဝကို မလုံလောက်သေးဘူး"

ချီရွှယ်မိစ္ဆာသခင် က ရုတ်တရက် အသံထွက်လာလေသည်။

"ရှေ့ဆောင်ကြီး ဘာသာ ကိုယ်တိုင် လုပ်လို့ မရဘူးလား ပတ်ဝန်းကျင်မှာ အစီအရင်တွေ ရှိနေရင်တောင် အမြဲတမ်း နေသွားမှာမှ မဟုတ်တာ"

ကျန်းချဲ့က ပြန်မေးလိုက်သည်။

"ကောင်လေး မင်းက သနားကြင်နာ တတ်သွားတာလား ခုနက မင်း ထုတ်ပြသွားတဲ့ သွေးပင်လယ် အမြင်အာရုံ က ဒီအိုကြီး ကူညီပေးထားတာ မဟုတ်ဘူးနော် အကုန်လုံးက မိစ္ဆာလမ်းစဉ် က လူတွေချည်းပဲ လူတွေကို ဘယ်လောက်တောင် သတ်ခဲ့ပြီးပြီလဲ မသိနိုင်တာကို မင်းက ဘာလို့ လူကောင်း ဟန်ဆောင်နေရတာလဲ"

ချီရွှယ်မိစ္ဆာသခင် က လှောင်ပြောင် ရယ်မောလိုက်လေသည်။

"ခင်ဗျား သွေးပင်လယ် ပုလဲ ကို ကျုပ်ကို ပေးလိုက်ရင် ဒီလူတွေကို သတ်ပေးရုံတင် မကဘူး ခင်ဗျား အတွက် သိုင်းပညာရှင် တွေရဲ့ အမြုတေသွေးကို နောက်ထပ် ဆယ်ဆလောက် ထပ်ရှာပေးမယ် ဘယ်လိုလဲ"

ကျန်းချဲ့ က ချီရွှယ်မိစ္ဆာသခင် ၏ လှောင်ပြောင်မှုကို ဂရုမစိုက်ဘဲ တိုက်ရိုက်ပင် ပြန်ပြောလိုက်လေသည်။

ချီရွှယ်မိစ္ဆာသခင် က လုံးဝ တွေဝေခြင်း မရှိဘဲ မျက်တောင်တစ်ခတ် အတွင်းမှာပင် ကျန်းချဲ့ ထံမှ ခွဲထွက်သွားလေသည်။ ကျန်းချဲ့ ကိုယ်ပေါ်ရှိ သွေးရောင် သံချပ်ကာ များ တဖြည်းဖြည်း အရည်ပျော်သွားပြီးနောက် အစစ်အမှန် ရုပ်ခန္ဓာ ပေါ်ထွက်လာလေသည်။ ထို့နောက် ချီရွှယ်မိစ္ဆာသခင် က သွေးရောင် ကန့်လန့်ကာကြီး တစ်ခု အဖြစ် ပြောင်းလဲသွားလေသည်။

ဘေးပတ်ဝန်းကျင်ရှိ အရပ်လေးမျက်နှာ သို့ ထွက်ပြေးနေကြသော စစ်သည်များ အားလုံးကို ထိုအထဲတွင် လွှမ်းခြုံထားလိုက်လေသည်။

အစုလိုက်အပြုံလိုက် သတ်ဖြတ်ခြင်း... စတင်လေပြီ။

ထင်ရှားသည်ကတော့ ချီရွှယ်မိစ္ဆာသခင် က ငြင်းခုံရန်ပင် ဆန္ဒမရှိကြောင်း ပြသနေလေသည်။ သွေးပင်လယ် ပုလဲ ဆိုသည်မှာ မည်မျှ အဖိုးတန်သော တည်ရှိမှုမျိုး နည်း။ သိုင်းပညာရှင် တစ်သိန်း ၏ အမြုတေသွေး များနှင့်ပင် လဲလှယ်ရန် မတန်ချေ။ ထိုအရာက မိမိဘာသာ လောကကြီး တစ်ခု ဖန်တီးနိုင်စွမ်း ရှိသော အစစ်အမှန် ထူးဆန်းသည့် ရတနာ တစ်ပါး ပင်ဖြစ်သည်။

သူ၏ လက်ထဲတွင် အဖိုးတန်ဆုံး အရာ ပင်ဖြစ်သည်။

ထို နဂါးကြော အပိုင်းအစ လေး ပင်လျှင် ယှဉ်နိုင်မည် မဟုတ်ချေ။

"ကျန်းချဲ့"

ချီရွှယ်မိစ္ဆာသခင် ခွဲထွက်သွားပြီးနောက် အဝေးမှနေ၍ အချိန်အတော်ကြာ စောင့်ကြည့်နေခဲ့သော ချီထျန်းဟယ် လည်း ပုံရိပ်ယောင် တစ်ခုအဖြစ် ပြောင်းလဲကာ လျင်မြန်စွာ ချဉ်းကပ်လာပြီး သံသယဖြစ်ဖွယ် အမူအရာဖြင့် မေးလိုက်လေသည်။

မူလက သူက စမ်းသပ်ကြည့်ရန် ရည်ရွယ်ထားခဲ့သော်လည်း သူ စကားမပြောနိုင်မီမှာပင် ထို သွေးရောင် အလင်းတန်း များ အရည်ပျော်သွားပြီး ကျန်းချဲ့ ၏ အစစ်အမှန် ရုပ်ခန္ဓာ ပေါ်ထွက်လာသဖြင့် သူ၏ ရင်ထဲတွင် အနည်းငယ် စိတ်သက်သာရာ ရသွားလေသည်။

သို့သော် လုံးဝကြီး စိတ်ချသွားခြင်းတော့ မဟုတ်သေးပေ။

"ဒီတစ်ခေါက် ဒုတိယ အကြီးအကဲ ရဲ့ အကူအညီ အတွက် ကျေးဇူးတင်ပါတယ် ကျုပ် ရင်ထဲမှာ အမြဲတမ်း မှတ်ထားပါ့မယ်"

ကျန်းချဲ့ က လက်ယှက် အရိုအသေပေး လိုက်ပြီး မျက်ဝန်းထဲတွင် ကျေးဇူးတင်မှုများ ပြည့်နှက်နေလေသည်။

ချီထျန်းဟယ် ဝင်မပါလျှင်တောင် သူ ဘေးကင်းစွာ ဆုတ်ခွာနိုင်မည် မှန်သော်လည်း... ထိုအရာက ဆုတ်ခွာခြင်းသာ ဖြစ်ပြီး အနိုင်ရခြင်း မဟုတ်ချေ။ သူက ဒြပ်စင်ငါးပါး အစီအရင် ကို ချိုးဖျက်နိုင်သော်လည်း ဤနေရာတွင် မဟာသိုင်းသခင် တစ်ပါး နှင့် လက်ရွေးစင် စစ်သည် တစ်သောင်း ရှိနေသေးသည် မဟုတ်ပါလော။

ထို နတ်မှော်အဆောင် ကိုယ်ပွား ကလည်း အချိန်အကြာကြီး တောင့်ခံထားနိုင်မည် မဟုတ်ကြောင်း အလွန် ထင်ရှားလှပေသည်။

နောက်ဆုံး ရလဒ် ကတော့ သူ သွေးလမ်းကြောင်း ဖောက်ထွက်ရမည်သာ ဖြစ်လေသည်။

အမှန်တကယ်တော့ လျှို့ဝှက်နယ်မြေ မှ မထွက်ခွာမီ ကတည်းက ချီရွှယ်မိစ္ဆာသခင် ကလည်း ဤသို့ အကြံပြုခဲ့ခြင်း ပင်ဖြစ်သည်။

သို့သော် ထိုအချိန်က ကျန်းချဲ့ က ဘာမှ အများကြီး မပြောခဲ့ချေ။ အကြောင်းမှာ မတော်တဆမှုများ မရှိပါက ချီထျန်းဟယ် သေချာပေါက် ရောက်လာမည်ကို သူ သိထားသောကြောင့် ပင်ဖြစ်သည်။

အမှန်တကယ်လည်း ထိုအတိုင်းပင် ဖြစ်ခဲ့လေသည်။

ချီထျန်းဟယ် ဟူသော အထူး စစ်ကူတပ်ဖွဲ့ က ရုတ်တရက် ပေါ်ထွက်လာပြီး မည်သည့် ကြိုတင်ကာကွယ်မှုမျှ မရှိသော စစ်ရေးပြ တိုက်ခိုက်မှု အခင်းအကျင်း ကို တိုက်ရိုက် ဖျက်ဆီးပစ်လိုက်ခြင်းကြောင့် အောင်ပွဲကို အပြည့်အဝ အဆုံးအဖြတ် ပေးနိုင်ခဲ့ခြင်း ပင်ဖြစ်သည်။ ထို့အပြင် ထို တောင်ပိုင်းယွဲ့ မှ မဟာသိုင်းသခင် ကိုပါ အလောတကြီး ထွက်ပြေးသွားစေခဲ့လေသည်။

ထို့ကြောင့်သာ သူက ဒြပ်စင်ငါးပါး အမှီအခိုကင်း သိုင်းသမားများ ကို စိတ်အေးချမ်းသာစွာ ရှင်းလင်းနိုင်ခဲ့ခြင်း ပင်ဖြစ်သည်။

"ခုနက မင်း ဘာလို့ သွေးရောင် သံချပ်ကာ တွေ ဝတ်ဆင်ထားရတာလဲ ခုနက လူက ဘယ်သူလဲ"

ချီထျန်းဟယ် က မျက်နှာထား လေးနက်စွာဖြင့် တိုက်ရိုက်ပင် မေးမြန်းလိုက်လေသည်။

အကြောင်းမှာ စောစောက မြင်တွေ့ခဲ့ရသော နည်းလမ်းများက အလွန် ရင်းနှီးကျွမ်းဝင် နေသောကြောင့် ပင်ဖြစ်သည်။ ယခင်က အလွန် ကြီးမားသော သတ်ဖြတ်ခြင်း အပြစ်များကို ကျူးလွန်ခဲ့သည့် မိစ္ဆာခေါင်းဆောင် တစ်ယောက် နှင့် တူနေလေသည်။ သို့သော် သူ သိထားသလောက် ဆိုလျှင် ထို မိစ္ဆာခေါင်းဆောင် က ဗုဒ္ဓဘာသာ မှ နဂါးနှိမ် ရဟန္တာ ကို ပြစ်မှားမိသဖြင့် လိုက်လံ သတ်ဖြတ်ခြင်း ခံရကာ နောက်ဆုံးတွင် အသက်ဆုံးရှုံး သွားခဲ့ပြီ မဟုတ်ပါလော။

"ခုနက လူက ချီရွှယ် မိစ္ဆာသခင် ပါ အရင်က ကျုပ် သတင်း တစ်ခု ရခဲ့တယ်..."

ကျန်းချဲ့ က အဖြစ်အပျက် များကို တစ်ဝက် အမှန် တစ်ဝက် အမှား ဖြင့် ရှင်းပြလိုက်လေသည်။ သူ က မကြာသေးမီက မှ သူ ကိုင်ဆောင်ထားသော ဓား မှာ ချီရွှယ် မိစ္ဆာသခင် ၏ ယခင်က ဓား ဖြစ်ကြောင်း သိရှိခဲ့ရသည် ဟု ပြောလိုက်လေသည်။

ဓား၏ လမ်းညွှန်မှုကြောင့် ဤနေရာသို့ ရောက်ရှိလာခဲ့ခြင်း ဖြစ်ပြီး နောက်ပိုင်းတွင် ချီရွှယ် မိစ္ဆာသခင် နှင့် တိုက်ပွဲ ဖြစ်ပွားခဲ့ကာ အဆုံးတွင် ရန်ငြိုးများကို ဖြေရှင်းနိုင်ခဲ့ကြောင်း ပြောပြလိုက်လေသည်။

"ဒီလိုကိုး"

ချီထျန်းဟယ် က နားလည်သွားသည့် အလား ခေါင်းညိတ်လိုက်လေသည်။ သူ က စောစောက နတ်အာရုံ ဖြင့် ကျန်းချဲ့ ကို အာရုံခံ ကြည့်ခဲ့ပြီး မည်သည့် ပြဿနာမျှ မရှိကြောင်း သိထားသော်လည်း လုံးဝ သတိလက်လွတ် နေခြင်းတော့ မရှိသေးချေ။

အကြောင်းမှာ ချီရွှယ် မိစ္ဆာသခင် ၏ ယခင်က နာမည်ဆိုး မှာ အလွန် ကြီးမားလွန်းပြီး ချီမိသားစု ၏ ရတနာ များကိုပင် လုယူဖူးသောကြောင့် ပင်ဖြစ်သည်။ သို့သော် ထိုအချိန်က အကြီးအကဲချုပ် ချီထျန်းကျုံး ၏ သင်ခန်းစာ ပေးခြင်းကို ခံခဲ့ရသဖြင့် အောင်မြင်မှု မရရှိခဲ့ခြင်း သာ ဖြစ်လေသည်။

"ချီထျန်းဟယ် မင်းကိုး..."

ယခုအချိန်တွင် ချီရွှယ်မိစ္ဆာသခင် က ကိုယ်ပွား တစ်ခုကို ပြန်လည် ဖွဲ့စည်းလိုက်ပြီး သူတို့ နှစ်ယောက် အနီးသို့ ရောက်ရှိလာလေသည်။ ချီထျန်းဟယ် ၏ မျက်နှာကို အကဲခတ် ကြည့်ပြီးနောက် ချီရွှယ်မိစ္ဆာသခင် လည်း သူ၏ အမှတ်အသား ကို မှတ်မိသွားကာ အနည်းငယ် အံ့အားသင့် သွားလေသည်။

လွန်ခဲ့သော နှစ်ပေါင်း နှစ်ရာကျော် ခန့်က သူ အလယ်ပိုင်းဒေသ တွင် ထင်တိုင်းကြဲ ခဲ့စဉ် အချိန်က ချီထျန်းကျုံး၊ ချီထျန်းဟယ် တို့နှင့် ဆက်ဆံရေး ရှိခဲ့ဖူးပြီး ရန်ငြိုးများပင် ဖွဲ့ခဲ့ဖူးလေသည်။ သို့သော် ယခု လက်ရှိ ချီမိသားစု ၏ ခေါင်းဆောင် ဖြစ်သော ချီကျန်းနန် ကိုတော့ သူ သေချာ မသိရှိချေ။

သူ့အတွက်တော့ ချီကျန်းနန် ဆိုသည်မှာ အမှန်တကယ်တော့ မျိုးဆက်ငယ် တစ်ယောက် သာ ဖြစ်လေသည်။

"သွေးမိစ္ဆာ မင်း မသေသေးဘူး ကိုး"

ချီထျန်းဟယ် ၏ အေးစက်သော အကြည့်များက ချီရွှယ်မိစ္ဆာသခင် ကို စူးစိုက်ကြည့်နေပြီး မျက်ဝန်းအောက်ခြေ တွင် သတ်ဖြတ်လိုစိတ် များ ပေါ်လွင်နေလေသည်။ ယခင်က ရန်ငြိုးများ ကြောင့် သာမက ချီရွှယ်မိစ္ဆာသခင် ၏ ကိုယ်ပေါ်ရှိ ဝိညာဉ်ပစ္စည်း များကိုလည်း သူ က တပ်မက်နေသောကြောင့် ပင်ဖြစ်သည်။

ထို့အပြင် မသိမသာ ပင် ချီရွှယ်မိစ္ဆာသခင် က ကျန်းချဲ့ ကို ခြိမ်းခြောက် ထားသည် ဟု သူ တွေးမိနေလေသည်။

အကယ်၍ ယခု အချိန်တွင် တိုက်ခိုက်မည် ဆိုပါက အနိုင်ရရန် အခွင့်အရေး အလွန် ကြီးမား လှပေသည်။

"မင်းတောင် မသေသေးတာ ငါက ဘယ်လိုလုပ် သေမှာလဲ ပြီးတော့ ငါ အခု သွေးမိစ္ဆာ မဟုတ်တော့ဘူး ငါက ချီရွှယ် မိစ္ဆာသခင် မိစ္ဆာသခင် လို့ ခေါ်တယ် နားလည်လား ပြီးတော့ မင်းက ငါ့ကို ဘာလို့ အဲ့ဒီလို လာကြည့်နေရတာလဲ"

ချီရွှယ်မိစ္ဆာသခင် က အနည်းငယ် မကျေမနပ် ဖြစ်သွားလေသည်။

"မင်းလို မိစ္ဆာကောင် က မကောင်းမှုတွေ အများကြီး လုပ်ခဲ့တာ မင်းကို ဆက်ထားလို့ မဖြစ်တော့ဘူး သိုင်းလောက ကို ဆက်ပြီး ဒုက္ခမပေးနိုင်အောင် ငရဲပြည် ကို ပို့ပေးရမယ်"

ချီထျန်းဟယ် က အေးစက်စွာ နှာခေါင်းရှုံ့လိုက်ပြီး ကိုယ်ပတ်လည်ရှိ လေဟာနယ် အတွင်း၌ ဓားချီ များ မျက်တောင်တစ်ခတ် အတွင်း ဖွဲ့စည်း လာလေသည်။

ဝေဝါးစွာ ပေါ်ထွက်လာပြီး ချီရွှယ်မိစ္ဆာသခင် ကို ထိုအထဲတွင် လွှမ်းခြုံထားလိုက်လေသည်။

ချီရွှယ်မိစ္ဆာသခင် က ဤ အခြေအနေကို မြင်သောအခါ အလျင်အမြန် ပုံရိပ်ယောင် အဖြစ် ပြောင်းလဲကာ ကျန်းချဲ့ ၏ အနောက်သို့ ဝင်ပုန်း လိုက်လေသည်။

"ငါသာ အစွမ်းထက်ဆုံး အချိန်ဆိုရင် ချီထျန်းဟယ် မင်းက ငါ့ရှေ့မှာ ရပ်နေဖို့တောင် အရည်အချင်း မရှိဘူး ချီထျန်းကျုံး ကို လွှတ်လိုက်ရင်တောင် ယှဉ်နိုင်ရုံလောက်ပဲ ရှိဦးမယ် အခု ဒီအိုကြီး က အရမ်း အားနည်း နေတဲ့ အချိန်မှာ မင်းက ငါ့ကို လာတိုက်ခိုက်တာ ဘာစွမ်းရည်လဲ"

"ပြီးတော့ ကောင်လေးကျန်း မင်း မြန်မြန် စကားပြောလေ မဟုတ်ရင် ခဏနေ တကယ် ချကြတဲ့ အခါ မတော်တဆ ချီထျန်းဟယ် ကို သတ်မိသွားရင် မကောင်းဘူးနော်"

ကျန်းချဲ့ က ချီရွှယ်မိစ္ဆာသခင် ကို တစ်ချက် လှမ်းကြည့်လိုက်ပြီး အလျင်အမြန် ပြောလိုက်လေသည်။

"ဒုတိယ အကြီးအကဲ ခဏနေပါဦး ရှေ့ဆောင်ကြီးချီရွှယ် က အခု ပြုပြင်ပြောင်းလဲ နေပါပြီ ပြီးတော့ ကျုပ် နဲ့ သွေးကျိန်စာ ချုပ်ဆို ထားပြီး ကျုပ် အတွက် ဆယ်နှစ် တာအို အစောင့်အရှောက် လုပ်ပေး ဖို့ သဘောတူ ထားပါတယ် ဒုတိယ အကြီးအကဲ က ကျုပ် မျက်နှာကို ထောက်ပြီး စစ်ပြေငြိမ်း ပေးလို့ ရမလား"

ချီမိသားစု နှင့် ချီရွှယ်မိစ္ဆာသခင် တို့ နှစ်ဦးစလုံး က သူ၏ အကူအညီ များ ဖြစ်ကြရာ သူတို့ တကယ် တိုက်ခိုက် ကြမည်ကို သူ လုံးဝ မလိုလားချေ။

"ပြုပြင် ပြောင်းလဲ တယ် ဟုတ်လား သူ့ ပုံစံ က ပြုပြင် ပြောင်းလဲ ထားတဲ့ ပုံစံ နဲ့ တူလို့လား"

ချီထျန်းဟယ် က ကျန်းချဲ့ ၏ စကားကို ကြားသောအခါ အရင်ဆုံး မျက်မှောင်ကျုံ့ သွားပြီးနောက် အဝေးရှိ တောင်ပိုင်းယွဲ့ စစ်သည်များ အဆက်မပြတ် လဲကျ သေဆုံး နေသော မြင်ကွင်းကို လက်ညှိုးထိုး ကာ ပြောလိုက်လေသည်။

"ချီထျန်းဟယ် မင်း ဒီမှာ လူကောင်း ဟန်ဆောင် မနေနဲ့ ဒီအိုကြီး သတ်တာ က အလယ်ပိုင်းဒေသ က သိုင်းပညာရှင် တွေ မဟုတ်ဘူး အပြင်ဘက် က လူရိုင်း တွေပဲ အရင်က တာ့ကျိုး နိုင်ငံတော် တည်ထောင် တဲ့ စစ်ပွဲ မှာ ချီမိသားစု လည်း ပါဝင် ခဲ့တာပဲ"

"မင်းတို့ ချီမိသားစု သတ်ခဲ့တဲ့ လူတွေ က ဒီအိုကြီး ထက် မနည်း ပါဘူး မဟုတ်ရင် မြောက်လင် မြို့စား ရာထူး ကို ဘယ်လိုလုပ် အစဉ်အဆက် ဆက်ခံ ခွင့် ရမှာလဲ"

ချီရွှယ်မိစ္ဆာသခင် က အလွန် မခံချိမခံသာ ဖြင့် ပြန်လည် ချေပ လိုက်လေသည်။

အကယ်၍ သူသာ အစွမ်းထက်ဆုံး အချိန် ဆိုလျှင် မြောက်လင် ချီမိသားစု ၏ အမာခံ စခန်း သို့ မဝင်ရဲ သည်မှလွဲ၍ ကျန်သည့် နေရာများတွင် သူ့ကို မည်သူ က တားဆီး နိုင်မည်နည်း။ ချီထျန်းကျုံး ပင်လျှင် သူ့ကို ဘာမှ လုပ်နိုင်မည် မဟုတ်ချေ။ ရှန်ရှန်းအဆင့် အလယ်အလတ် ရှိသော ချီထျန်းဟယ် ကိုတော့ ဆိုဖွယ်ရာ မရှိတော့ပေ။

"စကားတတ်တိုင်း လျှောက်ပြောနေတာပဲ"

ချီထျန်းဟယ် က အေးစက်စွာ နှာခေါင်းရှုံ့လိုက်လေသည်။

"ချီထျန်းဟယ် မင်း လည်း အရမ်း ကိုယ့်ကိုယ်ကိုယ် ယုံကြည် မနေနဲ့ ဒီအိုကြီး နဲ့ ကောင်လေးကျန်း ကြားမှာ သွေးကျိန်စာ သာ မရှိရင် မင်း ငါ့ကို လုံးဝ ဖမ်းနိုင်မှာ မဟုတ်ဘူး ငါ ထွက်သွားချင်ရင် သိုင်းသူတော်စင် မထွက်လာ သရွေ့ ဘယ်သူက ငါ့ကို ဘာလုပ်နိုင်မှာလဲ"

ချီရွှယ်မိစ္ဆာသခင် က အလျှော့မပေးဘဲ ပြန်လည် တုံ့ပြန် လိုက်လေသည်။

သူ က ယခင်က ပိုင်ယွဲ့ နိုင်ငံများကို ပတ်မွှေ ခဲ့ပြီး စွမ်းအား များ အလွန် ကြီးမား သော်လည်း အရေးအကြီးဆုံး အချက်မှာ သူ၏ ထွက်ပြေး ရန် နည်းလမ်း က အလွန် အံ့မခန်း ဖြစ်နေသောကြောင့် ပင်ဖြစ်သည်။ သူ၏ သွေးအသွင်ပြောင်း ထွက်ပြေးခြင်း အတတ်ပညာ ကို အဆင့်တူ များထဲတွင် ယှဉ်ပြိုင် နိုင်သူ အလွန် ရှားပါး လှပေသည်။

ယခု အချိန် တွင် အခြေခံ အင်အားများ အားလုံး ဆုံးရှုံး သွားခဲ့ပြီ ဖြစ်သော်လည်း တန်ဖိုး ပေးဆပ် ရန် ဆန္ဒ ရှိပါက ထွက်ပြေး ရန် ဆိုသည်မှာ ပြဿနာ မရှိချေ။

"ဒီလူ ရဲ့ ကိုယ်ပေါ်မှာ သွေးကြွေး တွေ အရမ်း များလွန်းတယ် သူ့ကို တာအို အစောင့်အရှောက် လုပ်ခိုင်း ရင် သေချာပေါက် ပြဿနာ တွေ ရှိလာလိမ့်မယ်"

ချီထျန်းဟယ် က ချီရွှယ်မိစ္ဆာသခင် ကို လျစ်လျူရှု ထားနိုင်သော်လည်း ကျန်းချဲ့ ၏ အတွေးများကိုတော့ လျစ်လျူရှု ထား၍ မရနိုင်ချေ။

ချီမိသားစု က သူ၏ အပေါ်တွင် အများကြီး ရင်းနှီးမြှုပ်နှံ ထားပြီးပြီ ဖြစ်ရာ သေးငယ်သော ကိစ္စလေး တစ်ခုကြောင့် ရန်သူများ ဖြစ်သွားမည် ဆိုပါက ၎င်းမှာ အလွန် မိုက်မဲသော လုပ်ရပ် ပင်ဖြစ်လေသည်။ ထို့အပြင် သူ ကလည်း ကျန်းချဲ့ ကို အလွန် အထင်ကြီး လေးစား လေသည်။

နှစ်အနည်းငယ် အတွင်းမှာပင် သူ ကြီးပြင်း လာနိုင်မည်ဟု ယုံကြည် နေလေသည်။

သို့သော် သူ က ချီရွှယ်မိစ္ဆာသခင် ကို တကယ်ပဲ အထင်မကြီးချေ။ သူ က ကျန်းချဲ့ အတွက် ပြဿနာများ ယူဆောင် လာနိုင်ခြေ ပိုများ သည်ဟု ထင်မြင် နေလေသည်။ အခြား အရာများကို မဆိုထားနှင့်... နဂါးနှိမ် ရဟန္တာ တစ်ပါးတည်း ပင် အလွန် ကြီးမားသော ရန်သူကြီး ပင်ဖြစ်သည်။

နှစ်ပေါင်း တစ်ရာ ကြာမြင့် သွားပြီ ဖြစ်ရာ ထို ရဟန္တာ မှာ ယခု အချိန် တွင် ရှန်ရှန်းအဆင့် တွင် ရှိနေမည် မဟုတ်တော့ချေ။

ချီမိသားစု ရရှိထားသော သတင်းများ အရ... နဂါးနှိမ် ရဟန္တာ မှာ ဗောဓိသတ် အဆင့်... ဆိုလိုသည်မှာ သိုင်းသူတော်စင် အဆင့်သို့ တက်လှမ်း သွားပြီ ဖြစ်နိုင်လေသည်။

"ဒီအိုကြီး ကို နှစ်အနည်းငယ် လောက် အချိန်ပေး အစွမ်းထက်ဆုံး အချိန်ကို ပြန်ရောက်ဖို့ ဆိုတာ ပြဿနာ မရှိဘူး အဲ့ဒီ အချိန်ကျရင် ဘာပြဿနာ မှ ရှိလာစရာ အကြောင်း မရှိဘူး ချီထျန်းဟယ် မင်း ဒီမှာ သွေးခွဲ မနေနဲ့"

ကျန်းချဲ့ မျက်နှာပေါ်တွင် တွေဝေ နေသော အမူအရာ ပေါ်လာသည်ကို မြင်သောအခါ ချီရွှယ်မိစ္ဆာသခင် လည်း ယခု အချိန် တွင် အနည်းငယ် စိုးရိမ် လာလေသည်။

အရင်က သူ က ကျန်းချဲ့ ကို တာအို အစောင့်အရှောက် လုပ်ပေး ရန် အနည်းငယ် ဆန္ဒ မရှိခဲ့သော်လည်း... ဘေးပတ်ဝန်းကျင်ရှိ အရှိန်အဝါ များကို အာရုံခံ မိပြီးနောက် တွင်တော့ ထိုသို့ မတွေးတော့ချေ။ ထို နဂါးနှိမ် ဆိုသော ကတုံး က သူ့ကို စောင့်ကြည့် နေဆဲ ပင်ဖြစ်သည်။

သူ ကိုယ်ထင်ပြ ရန် အလွန် ခက်ခဲ သလို ယခု အစစ်အမှန် ရုပ်ခန္ဓာ ကိုပါ ထုတ်ပြ လိုက်ပြီ ဖြစ်ရာ တောင်ပိုင်းယွဲ့ နိုင်ငံ ကလည်း သူ့ကို အလွယ်တကူ အလွတ်ပေး မည် မဟုတ်ချေ။

အကယ်၍ သူ့ကို ကူညီမည့်သူ မရှိပါက ပြန်လည် ကောင်းမွန် လာရန် အလွန် ခက်ခဲ လှပေသည်။

ထို့အပြင် အရေးအကြီးဆုံး အချက်မှာ ယခု အချိန် တွင် သူ က ချီထျန်းဟယ် နှင့် နောက်ထပ် တစ်ကြိမ် တိုက်ပွဲ ဆင်နွှဲ ရန် လုံးဝ မတောင့်ခံ နိုင်တော့ခြင်း ပင်ဖြစ်သည်။

"သွေးကျိန်စာ ရဲ့ ချည်နှောင်မှု အရ ကျုပ် နဲ့ မိစ္ဆာသခင် ကြားမှာ အစောကြီး ကတည်းက သဘောတူညီချက် ရှိထားပြီး ပါပြီ ဒုတိယ အကြီးအကဲ ဒီကိစ္စ ကို ယာယီ ဖယ်ထား လိုက်လို့ ရမလား"

ကျန်းချဲ့ က နောက်ဆုံး တွင်တော့ ဤ ရန်ငြိုး ကို ဖြေရှင်း လိုလေသည်။

ချီထျန်းဟယ် က ကျန်းချဲ့ ကို လေးနက်စွာ တစ်ချက် ကြည့်လိုက်ပြီး ရင်ထဲတွင် ကျန်းချဲ့ ၏ အတွေးများကို ခန့်မှန်း မိသွားလေသည်။ ကျန်းချဲ့ က သူ၏ ကိုယ်ပိုင် စွမ်းအားများကို တိုးပွား စေလိုပြီး ချီမိသားစု ၏ လက်အောက်ခံ အဖြစ် မနေလိုကြောင်း သိရှိ သွားလေသည်။

ချီရွှယ်မိစ္ဆာသခင် ဖြစ်နေလျှင်တောင် မှ လုံခြုံရေး အရ သူ က ပူးပေါင်း ရန် ဆန္ဒ ရှိနေလေသည်။

"မင်း က စကား စလာမှတော့ ဒီကိစ္စ ကို ဒီမှာပဲ အဆုံးသတ် လိုက်ကြတာပေါ့ ဒါပေမဲ့ သွေးမိစ္ဆာ ဒီအိုကြီး က ခုနက မင်းကို ကူညီ ခဲ့တယ် ဆိုတော့ မင်း က ဒီအိုကြီး ကို ကျေးဇူးဆပ် တဲ့ အနေနဲ့ တစ်ခုခု ထုတ်ပေး သင့်တယ် မဟုတ်ဘူးလား"

ချီထျန်းဟယ် က စကားလမ်းကြောင်း လွှဲလိုက်ပြီး ချီရွှယ်မိစ္ဆာသခင် ထံမှ တစ်ခုခု ကို ခြိမ်းခြောက် တောင်းယူ ရန် ကြိုးစား လိုက်လေသည်။

"ချီထျန်းဟယ် မင်း အရမ်း လွန်မလာ နဲ့နော် မင်း က ကျန်းချဲ့ ကို ကူညီ တာလေ ဒီအိုကြီး ကို ကူညီ တာ မှ မဟုတ်တာ"

ချီရွှယ်မိစ္ဆာသခင် က မျက်လုံးများ ပြူးကျယ် သွားလေသည်။ သူ ၏ လက်ထဲတွင် ယခုအခါ နဂါးကြော နှင့် သွေးပင်လယ် ပုလဲ မှလွဲ၍ အခြား မည်သည့် အရာမျှ မရှိတော့ချေ။

မည်သည့် ဝိညာဉ်ပစ္စည်း ကိုမျှ လုံးဝ ထုတ်ပေး နိုင်မည် မဟုတ်ချေ။

"တစ်ကိစ္စ ကို တစ်ကိစ္စ တသီးတသန့် ပဲ မင်း က ကျေးဇူး တင်ရမယ့် အခြေအနေ ဖြစ်သွားပြီ ဆိုတော့ ပစ္စည်း နဲ့ ပြန်ဆပ် ရမှာပဲ"

ချီထျန်းဟယ် က တည်ငြိမ်စွာ ပြောလိုက်လေသည်။

ချီရွှယ်မိစ္ဆာသခင် က လေပြင်း တစ်ချက် ရှူသွင်း လိုက်ပြီး ကျန်းချဲ့ အရင်က သူ၏ ထံမှ လျော်ကြေး တောင်းခံ ခဲ့သည်မှာ မည်သူ့ ထံမှ သင်ယူ ထားခဲ့သနည်း ဆိုသည်ကို နောက်ဆုံး တွင်တော့ နားလည် သွားလေတော့သည်။ ခေတ္တမျှ စဉ်းစား ပြီးနောက် သူ က တိုက်ရိုက် ပင် သဘောထား ကို ထုတ်ဖော် လိုက်လေသည်။

"အနှစ် တစ်ရာ အချိန် အတွင်းမှာ ဒီအိုကြီး ရဲ့ လက်ထဲမှာ ဝိညာဉ်ပစ္စည်း နည်းနည်း ပဲ ကျန်တော့တယ် အဲ့ဒါတွေ လည်း ကျန်းချဲ့ ကို ပေးလိုက်ပြီ အခု ထုတ်ပေး လို့ ရမယ့် ပစ္စည်း ဘာမှ မရှိတော့ဘူး မင်း လိုချင်ရင်တောင် မရှိဘူး ဒါပေမဲ့ ငါ့ ကိုယ်ပေါ်မှာ မရှိပေမဲ့ တခြား နေရာမှာ ရှိတယ် မင်း သွားယူ ရဲလား"

"ဘယ်နေရာ လဲ"

ချီထျန်းဟယ် မျက်မှောင်ကျုံ့ ကာ မေးလိုက်လေသည်။

ကျန်းချဲ့ ကလည်း ချီရွှယ်မိစ္ဆာသခင် ထံသို့ အကြည့် ရောက်သွားလေသည်။

"သေချာပေါက် တောင်ပိုင်းယွဲ့ နိုင်ငံ ရဲ့ နန်းတော် ပေါ့ မင်း နဲ့ ငါ နဲ့ ပူးပေါင်း ပြီး မဟာသိုင်းသခင် နှစ်ယောက် ရုတ်တရက် ဝင်တိုက် မယ် ဆိုရင် သေချာပေါက် အပြတ်အသတ် လုယူ နိုင်မှာပဲ မင်း လည်း အခု ကျင့်ကြံမှု ကို တိုးတက် စေဖို့ တခြား ဝိညာဉ်ပစ္စည်း တွေ လိုအပ် နေမယ် မဟုတ်ဘူးလား ပြီးတော့ ကောင်လေးကျန်း မင်း က ဘဝသုံးပါး ရွှေကြာစေ့ ကို လိုချင် နေတာ မဟုတ်ဘူးလား သွားယူ ရဲလား"

ချီရွှယ်မိစ္ဆာသခင် ၏ မျက်နှာပေါ်တွင် အပြုံး တစ်ခု ပေါ်လာလေသည်။

ဝိညာဉ်ပစ္စည်း မရှိလျှင် ပြဿနာ မရှိပေ... သွားယူရန် နေရာ ရှိလျှင် ရပြီ ပင်ဖြစ်သည်။