အခန်း ၃၀၇

အခန်း (၃၀၇) မင်းအမှားကိုမသိဘူး၊ သေရတော့မယ်ဆိုတာကိုပဲ သိတယ်

"တတိယခေါင်းဆောင်ဝူ၊ တိရစ္ဆာန်ကုဆရာဝန်လုံ ပြောတာ တကယ်ပဲလားဆိုတာ ဒီရဲဘော်ကို ပြောပြလိုက်စမ်းပါ..."

တုံ့ကျန်းဟွေက သံသယဖြစ်နေသေးသည်ကို မြင်သောအခါ လီလန်သည် ပြုံးလိုက်ပြီး ဝူပိုင်ရှန်းဘက်သို့ လှည့်ကြည့်လိုက်သည်။

ထိုစကားကို ကြားသောအခါ ဝူပိုင်ရှန်းမှာ တွေဝေသွားသည်။

ခေါင်းဆောင်ပိုင်ကမူ ချက်ချင်းပင် ဝင်ပြောလိုက်သည်။

"တတိယခေါင်းဆောင်ဝူ၊ တတိယခေါင်းဆောင်က မင်းကိုမေးနေတာလေ၊ ဘာဖြစ်နေတာလဲ..."

ဝူပိုင်ရှန်း သက်ပြင်းချလိုက်သည်။ သူ အပြင်ထွက်နေရသည့် အချိန်တိုလေးအတွင်းမှာပင် ပိုင်ဟူဂိုဏ်းရှိ သူ၏နေရာကို ပေးအပ်ခံလိုက်ရပြီ ဖြစ်သည်။

"တကယ်ပါ..."

ဝူပိုင်ရှန်းက ခေါင်းညိတ်လိုက်ရုံသာ တတ်နိုင်တော့သည်။

"လုံကျန်းဟူပြောတာတွေအကုန်လုံးက အမှန်တွေချည်းပါပဲ..လိမ်ညာထားတာ တစ်ခုမှ မပါပါဘူး.. ကျွန်တော့်ရဲ့ ညီမဝမ်းကွဲ ယန်တုံ့ပင်းက သူ့မွေးရပ်မြေဖြစ်တဲ့ အန်းဟွေး ထုံလင်မှာ အိမ်ထောင်ကျခဲ့ပြီး ကလေးနှစ်ယောက်တောင် ရှိနေပါပြီ.. သူက တခြားယောကျ်ားတစ်ယောက်နဲ့ ဖောက်ပြန်ခဲ့လို့သာ အရှေ့မြောက်ပိုင်းကို ထွက်ပြေးလာပြီး ကျွန်တော့်ဆီမှာ ခိုလှုံနေရတာပါ..."

ဝူပိုင်ရှန်းသည် ယန်တုံ့ပင်းကို တစ်ချက်လေးမျှပင် မကြည့်ဘဲ ဇာတ်ကြောင်းတစ်ခုလုံးကို ဖြည်းညင်းစွာ ပြောပြလိုက်သည်။

ထိုစကားကို ကြားလိုက်ရချိန်တွင် ယန်တုံ့ပင်းမှာ ကောင်းကင်ကြီး ပြိုကျလာသကဲ့သို့ ခံစားလိုက်ရသည်။

"ဝူပိုင်ရှန်း.. နင် လူယုတ်မာ"

"ငါက နင့်ညီမလေ နင် ဘယ်လိုလုပ်... ဘယ်လိုလုပ်ပြီး…”

ယန်တုံ့ပင်းမှာ စကားပင် မပြောနိုင်လောက်အောင် စိုးရိမ်ထိတ်လန့်နေသည်။

"ညီမလား.."

ဝူပိုင်ရှန်းက လှောင်ပြုံးပြုံးလိုက်သည်။

"ယန်တုံ့ပင်း နင်လုပ်ခဲ့တဲ့ ကောင်းကင်ဘုံကိုဆန့်ကျင်တဲ့ ကိစ္စတွေကို ပြန်ကြည့်ဦး နင့်ကြောင့် ငါ ယွမ်သုံးရာတောင် ဆုံးရှုံးခဲ့ရတယ်"

ဝူပိုင်ရှန်းက ယန်တုံ့ပင်းကို ဆဲဆိုလိုက်သည်။

ယန်တုံ့ပင်းသည် လုံကျန်းဟူထံမှ တင်တောင်းစရိတ် ယွမ်တစ်ရာကို လိမ်လည်ယူငင်ခဲ့သောကြောင့် သူသည် ယန်တုံ့ပင်း၏ ပြဿနာများကို ရှင်းလင်းပေးရုံမှလွဲ၍ အခြားရွေးချယ်စရာ မရှိခဲ့သဖြင့် လုံကျန်းဟူကို တစ်ကြိမ် ရိုက်နှက်ခဲ့ရသည်။

ထိုကိစ္စကြောင့်ပင် သူသည် ကံကြမ္မာ၏ အကျိုးဆက်များနှင့် ရစ်ပတ်ခံခဲ့ရသည်။ လုံကျန်းဟူ၏ နောက်ကွယ်ရှိ ချင်းလုံဂိုဏ်းအပြင် ထိုလျှို့ဝှက်ဆန်းကြယ်သော အဖွဲ့ခေါင်းဆောင်လီကပါ တင်တောင်းစရိတ်၏ သုံးဆကို ပြန်ပေးရန် တောင်းဆိုခဲ့ကြသည်။

ယွမ်တစ်ရာကို သုံးနှင့်မြှောက်လျှင် ယွမ်သုံးရာ ဖြစ်သည်။

အပြည့်အဝ ယွမ်သုံးရာတိတိ။

ထိုငွေကို ပေးလိုက်ရသည်နှင့် ဝူပိုင်ရှန်းမှာ သွေးထွက်သံယို အကြီးအကျယ်ဖြစ်ခဲ့ရပြီး ယခုအခါ ယန်တုံ့ပင်းကို မြင်တိုင်း ဒေါသထွက်နေရသည်။

ယခု ယန်တုံ့ပင်းက သူတို့၏ မောင်နှမဆက်ဆံရေးကို အသုံးချကာ သူ့ကို ခြိမ်းခြောက်ရန် ကြိုးစားနေသဖြင့် ဝူပိုင်ရှန်းကို ပို၍ပင် မကျေမနပ် ဖြစ်စေခဲ့သည်။

ယန်တုံ့ပင်းမှာ မှင်သက်သွားသည်။

“ယွမ်သုံးရာ…”

"ဒါဆိုရင်..."

သူမက လုံကျန်းဟူကို အမြန်ကြည့်လိုက်သည်။

လုံကျန်းဟူ၏ မျက်နှာမှာ အေးစက်နေသော်လည်း သူမကို တစ်ချက်လေးမျှပင် ပြန်မကြည့်ပေ။ သူသည် လှည့်၍ မသေမျိုးရှစ်ပါးစားပွဲဆီသို့ ပြန်သွားကာ နေရာတစ်ခုရှာ၍ ထိုင်လိုက်သည်။

လီလန်က ပြုံးလျက် ပြောလိုက်သည်။

"ယန်တုံ့ပင်း မင်းရဲ့ အစ်ကိုကောင်းကို ကျေးဇူးတင်သင့်တယ် သူသာ မင်းရဲ့ ပြဿနာတွေကို အချိန်မီ မရှင်းပေးခဲ့ရင် မင်း အခု ပိုင်ဟူဂိုဏ်းမှာ ရှိနေမှာမဟုတ်ဘူး၊ လူသေအလောင်းတွေပစ်တဲ့ ကျင်းထဲမှာ ရောက်နေလောက်ပြီ..."

လူသေအလောင်းများ ပစ်သည့်ကျင်းဆိုသည်မှာ လူသတ်ပြီး အလောင်းဖျောက်ရန် အကောင်းဆုံးနေရာ ဖြစ်သည်။

ထိုစကားကို ကြားသောအခါ ယန်တုံ့ပင်း၏ မျက်နှာမှာ အကြီးအကျယ် ပြောင်းလဲသွားပြီး လီလန်ကို ကြောက်ရွံ့စွာ ကြည့်လိုက်သည်။

"ရှင်... ရှင်က ဘယ်သူလဲ..."

ယန်တုံ့ပင်းမှာ ထိတ်လန့်တုန်လှုပ်နေသည်။

"ငါလား..”

"ခရီးသွား မုဆိုးတစ်ယောက်ပါ..."

"မင်းလုပ်ခဲ့တဲ့ ရွံစရာကောင်းတဲ့ လုပ်ရပ်တွေကို ငါကြည့်မနေနိုင်တော့လို့ တိရစ္ဆာန်ကုဆရာဝန်လုံအတွက် တရားမျှတမှုရှာပေးဖို့ ဒီနေ့ ပိုင်ဟူဂိုဏ်းကို တမင်လာခဲ့တာပဲ..."

လီလန်သည် ယန်တုံ့ပင်းကို ငုံ့ကြည့်ကာ ရယ်မော၍ ပြောလိုက်သည်။

"ရှင်ပဲ…”

"ဒါတွေအကုန်လုံး ရှင်လုပ်ခဲ့တာပဲ..”

"လုံကျန်းဟူက ဘယ်ကနေများ ဒီလောက်သတ္တိတွေ ရလာတာလဲလို့ တွေးနေတာ၊ နောက်ကွယ်က ကြိုးကိုင်နေတာ ရှင်ပဲကိုး”

ယန်တုံ့ပင်း၏ အသံမှာ ရုတ်တရက် သွေးရူးသွေးတမ်း ဖြစ်သွားသည်။

"အဟက်…ယန်တုံ့ပင်း၊ သေရမယ့်ဆဲဆဲကို ရမ်းကားရဲသေးတယ်ပေါ့"

"ခေါင်းဆောင်ပိုင်…သူ့ကို ပါးရိုက်လိုက်စမ်း”

လီလန်က လှောင်ပြုံးဖြင့် ပြောလိုက်သည်။

"ဟုတ်ကဲ့ တတိယခေါင်းဆောင်..."

ဝူပိုင်ရှန်းက ပြန်ဖြေသံပေးလိုက်ပြီး လျှောက်သွားကာ တပည့်တစ်ယောက် ကမ်းပေးသော သစ်သားပြားကို ယူ၍ ယန်တုံ့ပင်း၏ မျက်နှာကို အားကုန်လွှဲရိုက်လိုက်သည်။

“ဖြန်း... ဖြန်း... ဖြန်း..."

မကြာမီမှာပင် ယန်တုံ့ပင်း၏ နှုတ်ခမ်းနီဆိုးထားသော ပါးစပ်မှာ ရိုက်နှက်ခံရမှုကြောင့် ဖူးရောင်ကာ ခရမ်းရောင်သန်းသွားပြီး သွေးများ ထွက်လာသဖြင့် တကယ်ကို ကြောက်မက်ဖွယ်ကောင်းသော မြင်ကွင်းတစ်ခု ဖြစ်သွားတော့သည်။

"မိန်းမတစ်ယောက်က အိမ်ထောင်ကျပြီးရင် ခင်ပွန်းကို ကူညီပြီး ကလေးတွေကို ပြုစုပျိုးထောင်ရမယ့်အစား၊ ယောက္ခမတွေကို မလုပ်ကျွေးဘဲ အိမ်မှာ လူမရှိတဲ့အချိန်ကို အခွင့်ကောင်းယူပြီး တခြားယောကျ်ားတစ်ယောက်နဲ့ ဖောက်ပြန်ရုံတင်မကဘူး၊ အဲဒီလူကို အိမ်အထိပါ ခေါ်လာသေးတယ် မင်းလို မိန်းမပျက်မျိုးက ရှေးခေတ်ကဆိုရင် ဝက်လှောင်ခြံထဲထည့်ပြီး ရေနစ်သတ်ခံရမှာ"

"မင်းက ကံကောင်းလို့ လွတ်မြောက်လာပြီး အရှေ့မြောက်ပိုင်းက မင်းရဲ့ အစ်ကိုဝမ်းကွဲဆီမှာ လာခိုလှုံခွင့်ရတာ ဒါပေမဲ့ မင်းက သင်ခန်းစာမယူတဲ့အပြင် ပိုတောင်ဆိုးလာသေးတယ်၊ မင်းအပေါ်ကောင်းတဲ့ ရိုးသားတဲ့ ရဲဘော်တစ်ယောက်ပြီး တစ်ယောက်ကို လိမ်ညာနေခဲ့တယ်..."

"ယန်တုံ့ပင်း မင်းလို မိန်းမမျိုးက အပိုင်းပိုင်းအစစ ခုတ်ထစ်ခံရဖို့ ထိုက်တန်တယ်”

လီလန်က ယန်တုံ့ပင်းကို စိုက်ကြည့်ကာ တင်းမာစွာ ပြောလိုက်သည်။

လီလန်သည် မူလက မုဆိုးတစ်ယောက်ဖြစ်ပြီး သားရဲတိရစ္ဆာန်များနှင့် မကြာခဏ တိုက်ခိုက်လေ့ရှိသဖြင့် သူ၏ကိုယ်တွင် သွေးနံ့များ စွဲနေသည်။ သူ၏စကားများက ယန်တုံ့ပင်းကို အတွင်းစိတ်ထဲအထိ တုန်လှုပ်သွားစေသည်။

သူမသည် ကြောက်မက်ဖွယ်ကောင်းသော လူပုံစံသားရဲတစ်ကောင်နှင့် ရင်ဆိုင်နေရသကဲ့သို့ ခံစားနေရသည်။

လီလန်၏ ခိုင်မာသော ဆုံးဖြတ်ချက်နှင့် ပေါင်းစပ်လိုက်သောအခါ ပါးရိုက်မည်ဟုပြောလျှင် တကယ်ရိုက်မည်သာ ဖြစ်သည်။

သူက သူမကို လူသေအလောင်းများ ပစ်သည့်ကျင်းထဲတွင် မြှုပ်နှံမည်ဟုပင် ပြောခဲ့သေးသည်။

ယန်တုံ့ပင်းမှာ ကြောက်လန့်သွားသည်။

ပိုင်ဟူဂိုဏ်းက သူမကို သတ်ပြီး အမှိုက်လိုမျိုး လူသေအလောင်းတွေ ပစ်တဲ့ကျင်းထဲ လွှင့်ပစ်မှာကို သူမ တကယ် ကြောက်နေသည်။

ယန်တုံ့ပင်းသည် ပိုင်ဟူဂိုဏ်း မည်မျှ ကြောက်စရာကောင်းကြောင်းကို သိသည်။

သူမ၏ အစ်ကိုဝမ်းကွဲမှာ ပိုင်ဟူဂိုဏ်းတွင် ရက်စက်မှုဖြင့် နာမည်ကြီးသော အမာရွတ်ကြီးနှင့် တတိယခေါင်းဆောင်ဝူ ဖြစ်သည်။

ပိုင်ဟူဂိုဏ်း၏ ကြောက်မက်ဖွယ်ရာကို သူမ ဘယ်လိုလုပ် မသိဘဲ နေမည်နည်း။

"ဟင့်အင်း... မဟုတ်ပါဘူး..."

"ကျွန်မ မှားသွားပါပြီ၊ မှားမှန်းသိပါပြီ၊ ဆရာဝန်လုံကို မလိမ်သင့်ပါဘူး.. အဲဒီ တင်တောင်းစရိတ် ယွမ်တစ်ရာကို မယူသင့်ပါဘူး..."

"ဆရာဝန်လုံ…ကျေးဇူးပြုပြီး... တောင်းပန်ပါတယ်..ရှင့်ကို ရှိခိုးပါ့မယ်၊ ကျေးဇူးပြုပြီး ခွင့်လွှတ်ပေးပါ၊ ကျွန်မကို မသတ်ဖို့ သူတို့ကို ပြောပေးပါနော်..."

"ကျေးဇူးပြုပြီး..."

ယန်တုံ့ပင်း၏ အသံမှာ ငိုသံပါနေပြီး လုံကျန်းဟူကို ဆက်တိုက် ရှိခိုးနေတော့သည်။

ဒုန်း... ဒုန်း... ဒုန်း…

ရှိခိုးနေသော အသံမှာ ကျယ်လောင်လှပြီး ပိုင်ဟူဂိုဏ်း၏ ဌာနချုပ်တစ်ခုလုံးတွင် ပဲ့တင်ထပ်နေသည်။

သို့သော် လုံကျန်းဟူကမူ ထိုဘက်သို့ တစ်ချက်လေးမျှပင် လှည့်မကြည့်ပေ။ သူသည် ခေါင်းငုံ့ကာ အရက်ခွက်ကို ကိုင်၍ သောက်နေရုံသာ ဖြစ်သည်။

လီလန်က အေးစက်စွာ နှာခေါင်းရှုံ့လိုက်သည်။

"ယန်တုံ့ပင်း မင်းက မင်းအမှားကို သိတာမဟုတ်ဘူး၊ မင်း သေရတော့မယ်ဆိုတာကို သိနေလို့..."

ထိုစကားကို ကြားသောအခါ ယန်တုံ့ပင်း၏ မျက်နှာမှာ ချက်ချင်း ဖြူရော်သွားပြီး ထိတ်လန့်တုန်လှုပ်နေသော အမူအရာ ပေါ်လာသည်။

"ဟင့်အင်း... မဟုတ်ပါဘူး..."

"ကျေးဇူးပြုပြီး... ကျေးဇူးပြုပြီး ကျွန်မကို မသတ်ပါနဲ့..."

ကျန်းချင်းလုံက လီလန်ကို အလွန်အံ့သြစွာ ကြည့်လိုက်သည်။

*အဖွဲ့ခေါင်းဆောင်လီက... ဒီမိန်းမကို သတ်တော့မှာလား…အဖွဲ့ခေါင်းဆောင်လီရဲ့ လေသံကို နားထောင်ကြည့်ရတာ တကယ်ပြောနေတာလား..

ဒါပေမဲ့ အဖွဲ့ခေါင်းဆောင်လီက အသက်နှစ်ဆယ်ကျော်လေးပဲ ရှိသေးတာလေ၊ သူတို့ဂိုဏ်းထဲကလူတောင် မဟုတ်ဘဲနဲ့ သူ့ရဲ့ လုပ်ရပ်တွေက အရမ်းကို ထက်မြက်ပြီး ပြတ်သားလွန်းတယ်။ ဒီလို စိတ်နေသဘောထားမျိုးက... သူ ကျန်းချင်းလုံ ငယ်ငယ်ကတောင် မယှဉ်နိုင်ခဲ့ဘူး*

ကျန်းချင်းလုံ ဆယ်ကျော်သက်အရွယ်တုန်းက ဂျပန်မိစ္ဆာတွေကို သတ်တဲ့အခါ သူ့လက်တွေ တုန်နေတုန်းပဲ။

အထူးသဖြင့် မိစ္ဆာတွေကို သတ်ပြီးတဲ့အခါ သူ့လက်တွေက သွေးတွေနဲ့ နီရဲနေတတ်တယ်။ ညတိုင်း အိပ်မက်ဆိုးတွေ မက်ပြီး လန့်နိုးလာတတ်တယ်။

သူ နည်းနည်းလေး အသက်ပိုကြီးလာမှပဲ အခြေအနေက တိုးတက်လာခဲ့တာဖြစ်သည်။

လီလန်က ယခု ကျန်းချင်းလုံ ထိုအချိန်တုန်းက အရွယ်လောက်ပဲ ရှိသေးသည်။ သို့ပေမဲ့ သူ၏ စိတ်နေသဘောထားက အရမ်းကို ထူးခြားလွန်း၏။

လူတစ်ယောက်ကို သတ်မယ်လို့ပြောရင် တကယ်သတ်တာလား။

ကျန်းချင်းလုံက စကားမပြောဘဲ ခေါင်းဆောင်ပိုင်နှင့် ဒုတိယခေါင်းဆောင်ပိုင်တို့ကို လှည့်ကြည့်လိုက်သည်။

သူ ကြည့်နေသည်ကို မြင်သောအခါ ဒုတိယခေါင်းဆောင်ပိုင်က ရယ်မောလိုက်သည်။

"ခေါင်းဆောင်ကျန်း ဒီကိစ္စအတွက် ကျွန်တော့်ကို လာမကြည့်နဲ့ ကျွန်တော် ဝင်မစွက်ဖက်နိုင်ဘူး ဒါက တတိယခေါင်းဆောင်ရဲ့ ကိုယ်ရေးကိုယ်တာကိစ္စပဲ၊ သူဘာသာ ရှင်းပါစေ..."

ခေါင်းဆောင်ပိုင်ကလည်း ခေါင်းညိတ်လိုက်သည်။

"အဲဒီတိရစ္ဆာန်ကုဆရာဝန်လေးက တတိယခေါင်းဆောင်ရဲ့ သူငယ်ချင်းပဲလေ ….တတိယခေါင်းဆောင်က သူ့အတွက် တရားမျှတမှု ရှာပေးချင်တယ်ဆိုရင်လည်း သူ့သဘောအတိုင်း လုပ်ပါစေ..."

"မိန်းမတစ်ယောက်ပဲလေ သူက ဘာမှတန်ဖိုးရှိတာမှ မဟုတ်တာ။ သေသွားလည်း သေသွားပါစေ..."

ခေါင်းဆောင်ပိုင်က ငါးတစ်ကောင်ကို သတ်လိုက်သလိုမျိုး အလွန်ပေါ့ပေါ့ပါးပါး ပြောလိုက်သည်။

သို့သော်လည်း ဤသည်က ပုံမှန်ပါပဲ။ ပိုင်ဟူဂိုဏ်းသည် လွန်ခဲ့သည့် နှစ်အနည်းငယ်က ဓားပြတိုက်မှုများတွင် ပါဝင်ပတ်သက်ခဲ့ပြီး လူသတ်မှုများမှာလည်း မကြာခဏ ဖြစ်ပွားလေ့ရှိသည်။

လွန်ခဲ့သည့် နှစ်နှစ်အတွင်းမှာသာ သူတို့ မြေအောက်လောကမှ အနားယူပြီး တရားဥပဒေလမ်းကြောင်းအတိုင်း သွားနေကြခြင်း ဖြစ်သည်။

ဘယ်ဂိုဏ်းသားကများ လူမသတ်ဖူးဘဲ နေမှာလဲ။

ချင်းလုံဂိုဏ်းနှင့် ပိုင်ဟူဂိုဏ်း၏ ခေါင်းဆောင်များသည် ယန်တုံ့ပင်းကို သတ်ရန်ကိစ္စကို တတိယခေါင်းဆောင်ဝူ၏ အရှေ့တွင် ပွင့်ပွင့်လင်းလင်း ပြောဆိုနေကြသဖြင့် တတိယခေါင်းဆောင်ဝူမှာ ကြောက်ရွံ့တုန်လှုပ်နေတော့သည်။

သူသည် အလွန်စိုးရိမ်ထိတ်လန့်နေပြီး သူ၏ ညီမဝမ်းကွဲကို ကယ်တင်ရန် နည်းလမ်းရှာဖွေကာ ခေါင်းထဲတွင် အတွေးများ ခြာခြာလည်နေသည်။

"အစ်ကို... အစ်ကို”

"ကျွန်မကို ကယ်ပါဦး….ကျွန်မက ရှင့်ညီမလေ၊ သူတို့ ကျွန်မကို သတ်တော့မယ်…လူသေအလောင်းတွေ ပစ်တဲ့ကျင်းထဲမှာ မြှုပ်တော့မယ်၊ ကယ်ပါဦး”

"အစ်ကို"

သေမင်း၏ အရိပ်မည်းကြီး လွှမ်းမိုးလာချိန်တွင် ယန်တုံ့ပင်းသည် သူမ၏ နောက်ဆုံးမျှော်လင့်ချက်ဖြစ်သော ညီမဝမ်းကွဲ ဝူပိုင်ရှန်းကို ဖက်တွယ်ကာ အော်ဟစ်ငိုယိုနေတော့သည်။

"ဒါက..."

ဝူပိုင်ရှန်းမှာ စိုးရိမ်တကြီးဖြင့် လီလန်ကို အမြန်ကြည့်လိုက်သည်။

"တတိယခေါင်းဆောင်…ကျွန်တော့်ညီမ ဘယ်လောက်ပဲ မှားနေပါစေ သူ့အသက်ကို ယူရလောက်တဲ့အထိတော့..."

"မရဘူး သူ သေကိုသေရမယ်"

လီလန်က ခေါင်းခါလိုက်သည်။

"ဒီလိုမိန်းမမျိုးကို လောကကြီးထဲမှာ ထားထားရင် ဒုက္ခပေးလိမ့်မယ် သူ ဒီသင်ခန်းစာကို မယူဘူးဆိုရင် နောက်ထပ် ရဲဘော်တွေ အများကြီး သူလိမ်တာခံရပြီး မိသားစုတွေ ကွဲကွာ၊ ပိုင်ဆိုင်မှုတွေ ဆုံးရှုံးကုန်လိမ့်မယ်..."

လီလန်က တုံ့ကျန်းဟွေကို တစ်ချက်ကြည့်ကာ အေးစက်စွာ ပြောလိုက်သည်။