အခန်း ၆၀၅

အခန်း(၆၀၅)

ကွမ်တမ်ခြေလှမ်း က တကယ့်ကို အစွမ်းထက်လှတဲ့ နည်းဗျူဟာတစ်ခုပဲ။ အချက်အလက်အတိုင်း ပြောရရင် ခန္ဓာကိုယ်ဖွဲ့စည်းခြင်း အဆင့်ခုနစ်ရှိတဲ့ စစ်သည်တော်တစ်ယောက်တောင် ဒါကို တုံ့ပြန်နိုင်စွမ်း မရှိခဲ့ဘူး။

ဒါပေမဲ့ ကြီးမားတဲ့ အစွမ်းသတ္တိနောက်ကွယ်မှာ ပိုပြီးတော့ ကြီးမားတဲ့ ပေးဆပ်မှုကလည်း ရှိနေပြန်တယ်။

သူ့ရဲ့ တန်ခိုးစွမ်းရည် က ကုန်ခမ်းလုနီးပါး ဖြစ်သွားခဲ့ပြီ။ အခုအချိန်မှာတော့ သူက တစ်ကြိမ်မှာ ခလုတ်တစ်ခုတည်းကိုပဲ သုံးနိုင်တော့မယ့် အခြေအနေမျိုးပေါ့။

ငါ့ရဲ့ တန်ခိုးစွမ်းရည်ကို ဘယ်လို ပြန်ဖြည့်ရမလဲ။

|အိပ်ရေးဝဝသာ အနားယူလိုက်| လို့ အနာဂတ်နိမိတ်ဖတ်ကြားသူ က အကြံပေးလာတယ်။

|လုံလောက်တဲ့ အနားယူမှု ရှိရင် တန်ခိုးစွမ်းရည်က အလိုအလျောက် ပြန်ပြည့်လာလိမ့်မယ်| |

မင်းရဲ့ အကောင်းဆုံး အခြေအနေကို ပြန်ရောက်ဖို့ မိနစ်သုံးဆယ်လောက်ပဲ ကြာမှာပါ|

ဒါက မဆိုးပါဘူးလို့ သူ တွေးလိုက်မိတယ်။ တစ်ရက်လုံး အနားယူမှ တန်ခိုးစွမ်းရည် ပြန်ပြည့်မယ်ဆိုရင်တော့ တကယ့်ကို ဆိုးဝါးမယ့် အခြေအနေပဲလေ။

ဒါပေမဲ့ ဒါကလည်း စိတ်တိုင်းကျလှတယ်တော့ မဟုတ်သေးဘူး။ ကွမ်တမ်ခြေလှမ်း ကို သုံးလိုက်တိုင်း အခုလိုမျိုး လူပါ ဂျုံဂျုံကျသွားအောင် မောပန်းသွားမယ်ဆိုရင် ဒါကို နောက်ဆုံးပိတ် အသက်ကယ်လက်နက် အဖြစ်နဲ့ပဲ သုံးလို့ရတော့မယ်။ ဝှက်ဖဲတစ်ချပ်လို့ ပြောရင်လည်း ဟုတ်တယ်။

ဒါပေမဲ့ ဒီလိုရှိနေတာကလည်း ကောင်းတဲ့အချက်ပဲ။ ဘယ်အချိန်မဆို ထွက်ပြေးဖို့ ဒါမှမဟုတ် တိုက်ခိုက်ဖို့အတွက် သုံးနိုင်မယ့် ဝှက်ဖဲတစ်ချပ် ကိုယ်ခန္ဓာမှာ ရှိနေတယ်ဆိုတာက စိတ်အေးလက်အေး ရှိစေတယ်။

ဒါပေမဲ့ ဒီလိုဆိုရင် ပွဲစဉ်ရဲ့ အချိန်အတော်များများမှာ သူက ပုံမှန်စွမ်းရည်တွေကိုပဲ အားကိုးရတော့မယ်။ အဲဒီစွမ်းရည်တွေက ဒီပွဲမှာ သုံးဖို့အတွက် လုံးဝကို မလုံလောက်သေးတဲ့ အရာတွေပဲလေ။

သူသာ ကွမ်တမ်ခြေလှမ်း ကို ပိုပြီး လွတ်လွတ်လပ်လပ် သုံးနိုင်မယ်ဆိုရင် တခြားကစားသမားတွေကို တန်းတူရင်ဆိုင်နိုင်မှာ ဖြစ်တယ်။ မှော်ကမ္ဘာငယ်လေး ထဲက တခြား မက်ဂ်နက်တစ် တွေနဲ့ သူ့ကြားက ကွာဟချက်ကိုလည်း လျှော့ချနိုင်လိမ့်မယ်။

ကွမ်တမ်ခြေလှမ်း က ကုန်ဆုံးစေတဲ့ တန်ခိုးစွမ်းရည် ပမာဏနဲ့ဆိုရင်တော့ ဒါက မဖြစ်နိုင်သလိုပဲ။

|မင်း ဘာတွေ ပြောနေတာလဲ။ မင်း အဲဒီအရာကို တီထွင်ပြီးသားပဲလေ။ ဒါကို သုံးလိုက်စမ်း|

သူက သူ့ရဲ့ ရင်ဘတ်ကို ငုံ့ကြည့်လိုက်တဲ့အခါ သံခလုတ်နဲ့ ခဲမဖြူတုံးတို့ ပေါင်းစပ်ထားတဲ့ စွမ်းရည်ကိရိယာကို မြင်လိုက်ရတယ်။

ဒါကပဲ မဖြစ်နိုင်တာကို ဖြစ်အောင် လုပ်ပေးခဲ့တဲ့ အရာပေါ့။ စစ်သည်တော်ရဲ့ အဆင့်ခုနစ် တန်ခိုးစွမ်းရည်ကို စုပ်ယူပြီး ကွမ်တမ်ခြေလှမ်း ကို အားဖြည့်ဖို့အတွက် သုံးနိုင်ခဲ့တာပဲ။

အဲဒီအချိန်တုန်းက သူ ဘာလုပ်နေလဲဆိုတာ သူကိုယ်တိုင်လည်း မသိခဲ့ဘူး။ စိတ်ကူးထဲကနေ ပေါ်ထွက်လာတဲ့ ပင်ကိုယ်သိစိတ်အတိုင်း သက်သက်ပဲ လုပ်ဆောင်ခဲ့တာ။

ဒါပေမဲ့ အခု ဒါကို သေသေချာချာ စောင့်ကြည့်လိုက်တဲ့ အခါမှာတော့ သူ တကယ်တမ်း ဘာကို ဖန်တီးခဲ့တာလဲဆိုတာ နားလည်လာပြီ။

ဒါက ဘက်ထရီတစ်လုံးပဲ။

တန်ခိုးစွမ်းရည် အားလုံးက သန်းပေါင်းများစွာသော အမျှင်တန်းတွေနဲ့ ဖွဲ့စည်းထားတာ ဖြစ်တယ်။ ပြီးတော့ တန်ခိုးစွမ်းရည်တစ်ခုကနေ ထွက်ပေါ်လာတဲ့ သက်ရောက်မှုတွေက အဲဒီတန်ခိုးစွမ်းရည်မှာပဲ သီးသန့်ရှိတဲ့ ပုံသဏ္ဌာန်တွေပေါ်မှာ အခြေခံထားတယ်။

သူ့ရဲ့ သံခလုတ်မှာ ကွေးကောက်မှုတွေ အများကြီး ရှိပြီး သူ့ရဲ့ ခဲမဖြူတုံးမှာတော့ ဇစ်ဇက်လိုင်းတွေ အများကြီး ရှိတယ်။ စစ်သည်တော်ရဲ့ မီးလျှံတွေကတော့ ထုံးစံအတိုင်း ထုံးထားတဲ့ အထွတ်အထိပ် ပေါင်းစပ်မှုတွေ အများကြီးနဲ့ ဖွဲ့စည်းထားတာ။

နတ်ဘုရားပန်းပဲဖို အပိုင်းအစတွေထဲမှာ သိမ်းဆည်းထားတဲ့ တန်ခိုးစွမ်းရည် တိုင်းက ကွေးကောက်မှုတွေ ဒါမှမဟုတ် ထောင့်တွေ မရှိဘဲ ဖြောင့်စင်းတဲ့ လိုင်းတစ်လိုင်းတည်းနဲ့ ဖွဲ့စည်းထားတဲ့ အခြေခံအမျှင်တန်းတွေ ဖြစ်လိမ့်မယ်လို့ သူ ယူဆထားတယ်။

ပြီးတော့ မက်ဂ်နက်တစ် တစ်ယောက်က တန်ခိုးစွမ်းရည်ကို ထုတ်ဖော်သုံးစွဲတဲ့အခါ အဲဒီအခြေခံအမျှင်တန်းတွေက သီးသန့်ပုံသဏ္ဌာန်တွေအဖြစ် ပြောင်းလဲသွားတယ်။

ဒါကြောင့်မို့လည်း မက်ဂ်နက်တစ် တွေက တခြားသူရဲ့ တန်ခိုးစွမ်းရည်ကို ယူပြီး မိမိတို့ရဲ့ ကိုယ်ပိုင်စွမ်းရည်ကို အားဖြည့်ဖို့အတွက် သုံးလို့မရတာ ဖြစ်တယ်။

ဒါပေမဲ့ သူက အဲဒီပြဿနာအတွက် ဖြေရှင်းနည်းကို ရှာတွေ့ခဲ့ပြီ။

အခြေခံအားဖြင့် သူက ခဲမဖြူတုံးကို သုံးပြီး အဲဒီအမျှင်တန်းတွေက အခြေခံဖြောင့်စင်းတဲ့ လိုင်းတွေအဖြစ် ရှိခဲ့တဲ့ အချိန်ဆီကို အချိန်ပြန်ရွှေ့လိုက်တာ ဖြစ်တယ်။ ဒါကြောင့် သူတို့ကို သန့်စင်တဲ့ တန်ခိုးစွမ်းရည် ဖြစ်သွားစေတယ်။

အဲဒီနောက် သူ့ရဲ့ ခလုတ်က အဲဒီတန်ခိုးစွမ်းရည်တွေကို နေရာတစ်ခုတည်းမှာ ခဏရပ်တန့်စေပြီး နောက်ပိုင်းမှာ သုံးနိုင်ဖို့အတွက် စွမ်းအင်တွေကို သေသေချာချာ သိမ်းဆည်းပေးလိုက်တယ်။

သူ့ရဲ့ ဘက်ထရီအသစ်က ဒီလိုမျိုး အလုပ်လုပ်တယ်။

ဒီအရာရဲ့ ထူးခြားချက်က သူက တခြားသူရဲ့ တန်ခိုးစွမ်းရည်ကို ထိပ်တိုက်ရင်ဆိုင် တိုက်ခိုက်နေတာ မဟုတ်ဘူး။

အကယ်၍ သူသာ တိုက်ခိုက်နေတာဆိုရင် သူ့ရဲ့ နည်းပညာသုံး စွမ်းရည်တုံးတွေက အလုပ်လုပ်မှာ မဟုတ်ဘူး။ စစ်သည်တော်ရဲ့ အဆင့်ခုနစ် ကျင့်စဉ်က သူ့ရဲ့ အဆင့်လေး တန်ခိုးစွမ်းရည်တုံးတွေကို အလွယ်တကူ အနိုင်ယူသွားမှာလေ။

* * * * * * * *

အဲဒီလိုမဟုတ်ဘဲ သူက စစ်သည်တော်ရဲ့ တန်ခိုးစွမ်းရည်ကို တခြားဘက်ကို လမ်းကြောင်းလွှဲပေးလိုက်ရုံသက်သက်ပဲ။

သူက ဒါကို တိုက်ခိုက်နေတာ မဟုတ်တဲ့အတွက် အဲဒီစွမ်းရည်ကလည်း သူ့ကို ပြန်ပြီး မတိုက်ခိုက်ဘူး။

ဒါက ဘယ်လို မက်ဂ်နက်တစ် ဆီကမဆို ဘယ်လို တန်ခိုးစွမ်းရည်မျိုးကိုမဆို သူ စုပ်ယူနိုင်လိမ့်မယ်လို့ ဆိုလိုတာပဲ။ သူတို့က အဆင့်ခုနစ်ပဲဖြစ်ဖြစ် အဆင့်ကိုးပဲဖြစ်ဖြစ် ဂရုစိုက်စရာ မလိုတော့ဘူး။

|ငှဲ..ငှဲ..ငှဲ..ငှဲ…ငှဲ…. ဒါကြောင့်မို့လည်း မင်း တခြား မက်ဂ်နက်တစ် တွေနဲ့ ပိုပြီး တိုက်ခိုက်ရမယ်လို့ ပြောတယ်။ ကွမ်တမ်ခြေလှမ်း ပြီးတဲ့နောက် မင်း ဒီလောက်တောင် မောပန်းသွားရတဲ့ အကြောင်းရင်းက မင်းရဲ့ ကိုယ်ပိုင်တန်ခိုးစွမ်းရည်ကို သုံးခဲ့ရလို့ပဲ။ မင်းသာ တန်ခိုးစွမ်းရည်တွေကို လုံလောက်အောင် စုပ်ယူထားနိုင်ရင် ဒါကို နှစ်ကြိမ်တောင် သုံးနိုင်မှာဖြစ်ပြီး မောပန်းမှာလည်း မဟုတ်ဘူး|

အနာဂတ်နိမိတ်ဖတ်ကြားသူရဲ့ တိုက်ခိုက်လိုစိတ်ပြင်းပြမှုတွေက သူ့ဆီကိုပါ ကူးစက်လာပြီ ဖြစ်တယ်။ အခုဆိုရင် သူက တခြားကစားသမားတွေ သူ့ကို လာရောက်တိုက်ခိုက်လာအောင် သူ့ရဲ့အလံကို ပတ်ပတ်လည် ဝှေ့ယမ်းပြရရင် ကောင်းမလားလို့တောင် တွေးတောလာမိပြီ။

သူက ဘက်ထရီတွေကို တတ်နိုင်သမျှ အများကြီး ဖြည့်ထားချင်တယ်။ အဲဒီနောက်ကျရင် သူက ကွမ်တမ်ခြေလှမ်း ကို တတ်နိုင်သမျှ အကြိမ်ကြိမ် ထုတ်ဖော်သုံးစွဲနိုင်မှာ ဖြစ်တယ်။

အနာဂတ်နိမိတ်ဖတ်ကြားသူက သူ့ကို ဒီပွဲမှာ ဘာကြောင့် ကစားစေချင်လဲဆိုတာ သူ အခုမှ နားလည်တော့တယ်။ ဒီ မှော်ကမ္ဘာငယ်လေး ထဲမှာ အဆင့်မြင့် မက်ဂ်နက်တစ် တွေ ပြည့်နှက်နေတာပဲလေ။ တစ်ယောက်ချင်းစီမှာ စုပ်ယူခံရဖို့ စောင့်ဆိုင်းနေတဲ့ ဧရာမ တန်ခိုးစွမ်းရည် ပမာဏကြီး ရှိနေတာကိုး။

|ငှဲ..ငှဲ..ငှဲ..ငှဲ…ငှဲ….အခုမှပဲ ငါနဲ့ အကြိုက်ချင်း တူတော့တယ်|

သူ့ကိုယ်သူ ပြန်ပြီး စိတ်အေးအောင် လုပ်ရမယ်။ ပြောဖို့က လွယ်ပေမဲ့ လက်တွေ့လုပ်ဖို့ကျတော့ တခြားစီပဲလေ။

သူ တန်ခိုးစွမ်းရည်ကို တကယ်တမ်း စုပ်ယူနိုင်ဖို့ဆိုရင် မက်ဂ်နက်တစ် တစ်ဦးရဲ့ တန်ခိုးစွမ်းရည်နဲ့ အနီးကပ် ထိတွေ့မှု ရှိဖို့ လိုအပ်တယ်။ ဒါက သူ့ရဲ့ ဘက်ထရီကို အားသွင်းချင်တိုင်း သူ့ရဲ့ အသက်ကို ရင်းရမယ်လို့ ဆိုလိုတာမို့ ဒါက စိတ်တိုင်းကျလှတဲ့ နည်းလမ်းတော့ မဟုတ်ဘူး။

တခြားနည်းလမ်း ရှိသေးလား။

သူ အလေးအနက် စဉ်းစားနေခိုက်မှာပဲ ဒရုန်းရဲ့ ပန်ကာသံတွေက သူ့နားနားမှာ တဝီဝီနဲ့ ဆက်ပြီး မြည်နေတုန်းပဲ ဖြစ်တယ်

သူ ကိုယ်တိုင်ရဲ့ ဒရုန်းကို လှည့်ကြည့်လိုက်တယ်။

ဒီမှာတင် အတွေးတစ်ခုက သူ့ခေါင်းထဲကို ဖြတ်ခနဲ ပေါ်လာတယ်။

ငါ့ရဲ့ ဒရုန်းကို သုံးရင်ကော။

သူက တိုက်ပွဲနဲ့ ဝေးရာမှာ နေနိုင်ပြီး သူ့ရဲ့ ဒရုန်းကိုပဲ တိုက်ပွဲအနား ချဉ်းကပ်ခိုင်းလို့ ရတယ်။ အဲဒီနောက် ၎င်းရဲ့ဘောင်မှာ ဘက်ထရီကို တပ်ဆင်ထားပြီး တန်ခိုးစွမ်းရည်တွေနဲ့ တတ်နိုင်သမျှ အနီးဆုံး ရောက်အောင် မောင်းနှင်ကာ စွမ်းအင်တွေကို စုပ်ယူခိုင်းလို့ ရတယ်။

သေချာတာပေါ့ ဒါက သူ့ရဲ့ ဒရုန်းကို အန္တရာယ်ထဲ တွန်းပို့ရာ ရောက်လိမ့်မယ်။ ဒါပေမဲ့ ၎င်းကို သန့်စင်တဲ့ မီသရယ် နဲ့ ပြုလုပ်ထားတာမို့ အစင်းကြောင်း တစ်ချက်လေးတောင် မထင်ဘဲ တိုက်ခိုက်မှုအချို့ကို ခံနိုင်ရည်ရှိလိမ့်မယ်လို့ သူ ယုံကြည်တယ်။

သူ ဒါကို စဉ်းစားလေလေ ပိုပြီးတော့ စိတ်လှုပ်ရှားလာလေလေပဲ။

ဒါတင်မကသေးဘူး။ ငါသာ ဒရုန်းအသေးစား အဆင့်မြှင့်တင်မှုကို ဝယ်ယူလိုက်ရင် တစ်ပြိုင်နက်တည်းမှာ ဘက်ထရီ နှစ်လုံးတောင် အားသွင်းနိုင်မှာ ဖြစ်တယ်။

အခုဆိုရင် သူ့ရဲ့ အဖြေကို သူ ပိုပြီးတော့ သေချာသွားပြီ။

အရင်တုန်းကတော့ သူက ဒရုန်းအသေးစားနဲ့ သဟဇာတသေနတ် ဗားရှင်းတူး အဆင့်မြှင့်တင်မှုကို ယူမလား ဒါမှမဟုတ် အသံတိတ်ပန်ကာ နဲ့ မမြင်ရတဲ့ ကိုယ်ထည် ကို ယူမလားဆိုတာ ဝေခွဲမရ ဖြစ်နေခဲ့တာ ဖြစ်တယ်။

ဒါပေမဲ့ အခုတော့ သူ့ရဲ့ အတွေးတွေ ပြောင်းလဲသွားပြီ။

အခု သူက ဒရုန်းအသေးစားနဲ့ မမြင်ရတဲ့ ကိုယ်ထည် စနစ်တို့ကို ရယူဖို့ စီစဉ်လိုက်တယ်။ ဒါက တစ်စက်ချင်းစီအရ အဆင့်မြှင့်တင်မှု တစ်ခုနဲ့ နှစ်ခုစီ ကုန်ကျမှာ ဖြစ်တယ်။

ဒါက သူ့ကို ဘက်ထရီ နှစ်လုံး အားသွင်းနိုင်စေမယ့်အပြင် တခြားသူတွေ သတိမထားမိဘဲ တိုက်ပွဲတွေအနား ချဉ်းကပ်နိုင်ဖို့အတွက် ကိုယ်ယောင်ဖျောက် စနစ်ကိုလည်း ရရှိစေမှာပေါ့။ ဘယ်သူမှ မသိစေဘဲ သူ့ရဲ့ ဒရုန်းတွေကို အားသွင်းနိုင်လိမ့်မယ်။

ဒါပေမဲ့ သူ့မှာရှိတဲ့ ပမာဏ အကန့်အသတ်ကြောင့် လုံးဝဥဿုံ ကိုယ်ယောင်ဖျောက် စနစ်အထိတော့ အဆင့်မမြှင့်နိုင်သေးဘူး။ ပန်ကာတွေက အဝေးကနေတောင် ကြားနိုင်တဲ့ တဝီဝီ အသံကိုတော့ ထွက်ပေါ်နေဦးမှာ ဖြစ်တယ်။

သို့ပေမဲ့ တခြားသူတွေက သူ့ဒရုန်းသံကို အဝေးကနေ ကြားရရင်တောင်မှ ရှာဖွေဖို့အတွက် အချိန်အကြာကြီး မပေးဘူးဆိုရင် ၎င်းရဲ့ တိကျတဲ့ တည်နေရာကို သိနိုင်မှာ မဟုတ်ပါဘူး။

ပြီးတော့ သူက ပြင်းထန်တဲ့ တိုက်ပွဲတွေကြားထဲမှာ ရောက်နေတဲ့သူတွေကိုပဲ ပစ်မှတ်ထားမှာ ဖြစ်လို့ အဲဒီလူတွေအနေနဲ့ တဝီဝီ မြည်သံက ဘယ်ကလာလဲဆိုတာကို လိုက်ရှာဖို့ အချိန်ရမှာ မဟုတ်ဘူးလေ။

အချိန်မဖြုန်းတော့ဘဲ သူက ဒရုန်းရဲ့ အဆင့်မြှင့်တင်မှုကို ချက်ချင်း ဆွဲဖွင့်လိုက်ပြီး သူ အလိုရှိတဲ့ အရာတွေကို စတင် ဝယ်ယူလိုက်တော့တယ်။

စက္ကန့်အနည်းငယ် ကြာပြီးတဲ့နောက်မှာတော့ ဒရုန်းရဲ့ ကိုယ်ထည်ကနေ နာနိုမှုန်မွှားလေးတွေ ပေါ်ထွက်လာပြီး ၎င်းရဲ့ အဆင့်မြှင့်တင်မှု အသစ်တွေကို စတင် ပုံဖော်ပေးလိုက်တော့တယ်။

* * * * * * * *

စာစဉ်(၅၁)