အခန်း ၆၀၇

အခန်း(၆၀၇)

သူ့ရဲ့ ဒရုန်းအကြီးနဲ့ ဒရုန်းအသေးစားကို အသုံးပြုလိုက်တဲ့အခါ ပတ်ဝန်းကျင်တစ်ခုလုံးကို အသေအချာ သတိထားမိသွားတယ်။ မတူညီတဲ့ အမြင်အာရုံ သုံးခုဆီကနေ ရရှိလာတဲ့ အချက်အလက် ပမာဏက ပိုမိုကျယ်ပြန့်တဲ့ နယ်မြေကို အချိန်တိုအတွင်းမှာတင် လှည့်ပတ်ကြည့်ရှုနိုင်စေတယ်။

သေချာတာပေါ့ သူက သူ့ဒရုန်းရဲ့ ပုံရိပ်ဖော်အမြင်ကို သုံးထားတာမို့ အရာအားလုံးကို လိမ္မော်ရောင်နဲ့ ခရမ်းရောင် ကမ္ဘာကြီးအဖြစ် မြင်နေရတာ။ တောက်ပတဲ့ အနီရောင်အဖြစ် ပေါ်နေတဲ့အရာတွေက တန်ခိုးစွမ်းရည် ရှိနေကြောင်း ပြသနေပြီး အေးစိမ့်စိမ့် ခရမ်းရောင် ပေါ်နေတဲ့အရာတွေကတော့ စွမ်းရည်မရှိကြောင်း ပြသနေတယ်။ ထိုအကြောင်းကြောင့်ပဲ တခြားသူတွေကို ရှာဖွေရတာ အများကြီး ပိုလွယ်ကူသွားတယ်။

သိပ်မကြာခင်မှာပဲ သူ့ရဲ့ ဒရုန်းအကြီးက အဝေးတစ်နေရာမှာ လိမ္မော်ရောင် အလင်းတန်းတွေ အပြင်းအထန် ရိုက်ခတ်နေတာကို လှမ်းမြင်လိုက်ရတယ်။ အဲဒီနယ်မြေ ပတ်ပတ်လည်မှာ တန်ခိုးစွမ်းရည်တွေ ပေါက်ကွဲထွက်ပေါ်နေတာကို ကြည့်ခြင်းအားဖြင့် အဝေးမှာ တိုက်ပွဲတစ်ခု လက်ရှိဖြစ်ပွားနေတယ်ဆိုတာ အလွယ်တကူ ခန့်မှန်းနိုင်တယ်။

သူနဲ့ သူ့ရဲ့ ဒရုန်းအသေးစားတို့က လမ်းကြောင်းကို အမြန်ပြောင်းလိုက်ပြီး ဒရုန်းအကြီးရဲ့ အနောက်ကနေ လိုက်ပါသွားကြတယ်။ သူသိတဲ့သူတစ်ယောက်ယောက်နဲ့ တိုးမလားဆိုတဲ့ မျှော်လင့်ချက်နဲ့ပေါ့။

သူ့ရဲ့ အဆင့်မြင့်စွမ်းရည်ကို သုံးပြီး ထူထပ်လှတဲ့ တောအုပ်ကြီးကို ဖြတ်ကျော်ကြည့်ရှုလိုက်တဲ့အခါ အဝေးမှာ မတူညီတဲ့ အလင်းဒြပ်စင် မှော်စွမ်းအင် အမှတ်အသား နှစ်ခုကို သူ လှမ်းမြင်လိုက်ရတယ်။ သူတို့က သူသိတဲ့သူတွေတော့ လုံးဝမဟုတ်တာ သေချာတယ်။

သူ့ရဲ့ ဒရုန်းတွေက အဲဒီလှုပ်ရှားမှု ဖြစ်ပွားရာနေရာနဲ့ ကီလိုမီတာ ဝက်လောက်အကွာကို ရောက်သွားတာနဲ့ ၎င်းတို့ရဲ့ ဆဋ္ဌဂံပုံသဏ္ဌာန်တွေက အရောင် စတင်ပြောင်းလဲလာပြီး ပတ်ဝန်းကျင်က အလင်းရောင်အတိုင်း လိုက်လံထင်ဟပ်ပြသပေးတယ်။ သူတို့က ပတ်ဝန်းကျင်နဲ့ တစ်သားတည်း ကျသွားတာကြောင့် ကိုယ်ထည် ပတ်ပတ်လည်ကလိုင်းအရိပ်အယောင် ပါးပါးလေးလောက်ပဲ မြင်ရတော့တာ။

ပြီးတော့ သူတို့တွေက ဒရုန်းသံကို ကြားသွားမှာ စိုးရိမ်တာကြောင့် မိုက်ကယ်က ဒရုန်းတွေကို သင့်တော်တဲ့ အကွာအဝေးတစ်ခုမှာပဲ ရှိနေဖို့ သေချာအောင် လုပ်ဆောင်လိုက်တယ်။ ဘာတွေဖြစ်ပျက်နေလဲဆိုတာကို အနီးကပ် မြင်နိုင်ရုံ အကွာအဝေးလောက်ပေါ့။

အနားကို ရောက်သွားတာနဲ့ သူက ဒရုန်းရဲ့ အမြင်အာရုံကို ပုံမှန်အတိုင်း ပြန်ပြောင်းလိုက်တာကြောင့် သူတို့ ဘယ်လိုပုံစံ ရှိလဲဆိုတာကို မြင်လိုက်ရတယ်။

ဘယ်ဘက်အခြမ်းမှာ ရှိနေတဲ့သူက သံမဏိချပ်ဝတ်တန်ဆာ အပြည့်အစုံကို ဝတ်ဆင်ထားတဲ့ အမျိုးသားတစ်ဦး ဖြစ်ပြီး ကောင်းကင်ဘုံစစ်သည်တော်များအဖွဲ့က ဖြစ်တယ်ဆိုတာ သိသာလှတယ်။

တစ်ဖက်မှာတော့ သူ့ကို ရင်ဆိုင်နေတဲ့သူက အနက်ရောင် ဝတ်ရုံကို ဝတ်ဆင်ထားပြီး ခေါင်းပေါ်မှာ တွန့်လိပ်နေတဲ့ ဦးထုပ်ချွန်ကြီးကို ဆောင်းထားတဲ့ အမျိုးသမီးတစ်ဦး ဖြစ်တယ်။ သူမက မှော်မျှော်စင်က မှော်ပညာရှင်တစ်ဦး ဖြစ်တာ သေချာတယ်။

တိုက်ခိုက်သူ နှစ်ယောက်စလုံးက တော်တော်လေး ကြာအောင် တိုက်ခိုက်နေခဲ့ကြတဲ့ ပုံစံမျိုးပဲ။ သူတို့ရဲ့ ခန္ဓာကိုယ် ပတ်ပတ်လည်မှာ ပွတ်တိုက်မိထားတဲ့ အမှတ်အသားတွေ ရှိနေသလို ပတ်ဝန်းကျင်တစ်ခုလုံးလည်း ကမောက်ကမ ဖြစ်ပြီး ပျက်စီးဆိုးဝါးနေတာကို ကြည့်ရင် သိနိုင်တယ်။ သစ်ပင်တွေက ပြာကျနေပြီး မြေပြင်မှာလည်း ချောက်ကမ္ဘာငယ်လေးတွေ ဖြစ်ပေါ်နေကာ ပတ်ဝန်းကျင်မှာ ပျက်စီးမှုတွေ အများကြီး ရှိနေခဲ့ပြီ။

စစ်သည်တော်က သူ့ရဲ့ဓားကို လေထဲ မြှောက်ထားပြီး သူ့အထက်မှာတော့ ကျောက်တုံးဂိုလမ် ဒီဗာက ဝဲပျံလို့နေတယ်။ တစ်ဖက်က မှော်ပညာရှင်မှာကျတော့ မျက်မှန်တစ်ဖက်တပ်ထားတဲ့ မှော်ကြောင်လေးတစ်ကောင်က သူမရဲ့ ဒီဗာအဖြစ် ရှိနေတာပေါ့။

သူတို့က လက်ဂါစီ့စ်တွေထဲက ဘယ်သူမှ မဟုတ်ကြဘူး။

ဒါက သူတို့က သူ့ရဲ့ မဟာမိတ်တွေ မဟုတ်ဘူးလို့ ဆိုလိုတာပဲ။ ထိုအကြောင်းကြောင့်ပဲ သူတို့အနား ချဉ်းကပ်ဖို့ သူ တော်တော်လေး ဝေခွဲမရ ဖြစ်သွားရတယ်။

'ငါ သူတို့ကို ဒီအတိုင်းပဲ ထားခဲ့လိုက်ရမလား'

|မဟုတ်ဘူး မဟုတ်ဘူး မဟုတ်ဘူး မင်းရဲ့ ဘက်ထရီတွေကို အားသွင်းရမယ်လေ| လို့ အနာဂတ်နိမိတ်ဖတ်ကြားသူက ချက်ချင်း ဝင်ရောက်ပြောဆိုလာတယ်။

ဒီတစ်ကြိမ်တော့ အနာဂတ်နိမိတ်ဖတ်ကြားသူ ပြောတာ မှန်တယ်။ သူ့ထက် သုံးဆင့်ကနေ လေးဆင့်မက မြင့်မားတဲ့ မက်ဂ်နက်တစ်တွေ ပြည့်နှက်နေတဲ့ မှော်ကမ္ဘာငယ်လေးထဲမှာ သူ စိတ်ချလက်ချ လျှောက်သွားနိုင်ဖို့ဆိုရင် အနည်းဆုံးတော့ သူ့ရဲ့ ကွမ်တမ်ခြေလှမ်း အတွက် အားသွင်းမှုတစ်ခု ရှိထားဖို့ လိုအပ်တယ်လေ။

'ဒါက ငါ့ရဲ့ ဒရုန်းတွေ အလုပ်လုပ် မလုပ် စမ်းသပ်ကြည့်ဖို့အတွက် အကောင်းဆုံး ပထမဆုံး လေ့ကျင့်မှုပဲ'

သူတို့ ထုတ်လွှတ်နေတဲ့ တန်ခိုးစွမ်းရည်ရဲ့ တောက်ပမှု အရှိန်အဟုန်က အရင်က သူ တိုက်ခဲ့တဲ့ စစ်သည်တော်နဲ့ အတူတူပဲဆိုတာ သူ မြင်လိုက်ရတယ်။ ဒါက သူတို့တွေလည်း ခန္ဓာကိုယ်ဖွဲ့စည်းခြင်းနယ်ပယ် အဆင့်ခုနစ်လောက် ရောက်နေကြပြီလို့ ဆိုလိုတယ်။

ဒါက သူ့ရဲ့ ဘက်ထရီတွေကို အားသွင်းဖို့အတွက် အကောင်းဆုံး အချိန်ပဲ။

ထို့ကြောင့် သူက ပြတ်သားတဲ့ စိတ်ပိုင်းဖြတ်မှုနဲ့အတူ သူ့ရဲ့ ဒရုန်းတွေကို တိုက်ပွဲဆီ တဖြည်းဖြည်းချင်း နီးကပ်အောင် မောင်းနှင်လိုက်တော့တယ်။

စစ်သည်တော်က မှော်ပညာရှင်ဆီ ပြေးဝင်လိုက်ပြီး သူ့ရဲ့ဓားသွားပေါ်မှာ မြေကြီးတွေနဲ့ ကျောက်တုံးအပိုင်းအစတွေ ကပ်ပါလို့နေတယ်။ မှော်ပညာရှင်က ဒါကို မြင်မြင်ချင်းပဲ မှော်စက်ဝိုင်းတစ်ခုကို ထုတ်ဖော်လိုက်ပြီး ဘေးကင်းရာဆီ လျှောတိုက်ဆုတ်ခွာနိုင်ဖို့ သူမရဲ့ ခြေထောက်အောက်မှာ စလိုင်းမ် မျက်နှာပြင်တစ်ခုကို ဖန်တီးလိုက်တယ်။

ဓားက မှော်ပညာရှင်ရဲ့ ဝတ်ရုံကို မဆိုစလောက်လေးပဲ လွဲချော်သွားပြီး သူမရဲ့ အနောက်က သစ်ပင်ကို သွားရောက် ထိမှန်မိတယ်။

စစ်သည်တော်ရဲ့ ဓားက သစ်ခေါက်ကို ထိမိတာနဲ့တစ်ပြိုင်နက် ထိမိတဲ့ နေရာကနေ ကြမ်းတမ်းတဲ့ ကျောက်တုံးမျက်နှာပြင်တစ်ခု ရုတ်တရက် ထွက်ပေါ်လာတယ်။ အဲဒါက သစ်ပင်တစ်ပင်လုံးဆီ ဗိုင်းရပ်စ်တစ်ခုလို ပျံ့နှံ့သွားပြီး ၎င်းရဲ့ အမြစ်တွေ၊ အရွက်တွေနဲ့ သစ်ခေါက်တွေ အားလုံးကို ကျောက်တုံးအဖြစ် ထိရောက်စွာ ပြောင်းလဲပစ်တော့တာပဲ။

သူ့ရဲ့ တိုက်ခိုက်မှု လွဲချော်သွားတာကြောင့် စစ်သည်တော်က အခုဆိုရင် ကျောက်တုံး ဖြစ်သွားခဲ့ပြီဖြစ်တဲ့ သစ်ပင်ကို ခြေထောက်နဲ့ ကန်လိုက်ပြီး ၎င်းကို အောက်ခံတစ်ခုလို သုံးကာ လမ်းကြောင်းပြောင်းပြီး အမျိုးသမီးရဲ့ နောက်ကို ဆက်လိုက်တော့တယ်။

စစ်သည်တော်က အရှိန်အဟုန်နဲ့ ရှေ့တိုးသွားပြီး သူ့အနောက်က ကျောက်တုံးသစ်ပင်ကတော့ ဖိအားကြောင့် အပိုင်းပိုင်း ကြေမွပျက်စီးကျန်ရစ်ခဲ့တယ်။

မှော်ပညာရှင်က သူမရဲ့ မှော်နှင်တံကို လေထဲ မြှောက်လိုက်ပြီး သူမအထက်က မှော်ကြောင်လေးကလည်း ၎င်းရဲ့ အမြီးကို လိုက်လံ ရမ်းခါပြနေတယ်။

သူမရဲ့ နှလုံးသားထဲက နတ်ဘုရားပန်းပဲဖို အပိုင်းအစတွေဆီကနေ အားဖြည့်ပေးထားတဲ့ ဆန်းကြယ်တဲ့ အပြာရောင် အရည်လုံးကြီးတစ်ခုက မှော်နှင်တံရဲ့ ထိပ်ဖျားမှာ ပေါ်ထွက်လာတယ်။

သူမက အဲဒီအရည်လုံးကို သူ့နောက်ကို လိုက်နေတဲ့ စစ်သည်တော်ဆီ ပစ်လွှတ်လိုက်ရာ စစ်သည်တော်ရဲ့ အရှေ့က မြက်ခင်းပြင်ကို သွားရောက် ထိမှန်မိတာပဲ။

ချက်ချင်းဆိုသလိုပဲ မြက်ခင်းပြင်က အပြာရောင် အရည်တွေအတိုင်း အရောင်ပြောင်းလဲသွားတယ်။ စစ်သည်တော်က အဲဒီမြက်ခင်းပြင်ကို နင်းမိတာနဲ့ သူ့ရဲ့ခြေထောက်တွေက အရှိန်မထိန်းနိုင်ဘဲ ရှေ့ကို လျှောထွက်သွားပြီး အနောက်ကို လဲကျသွားတော့တယ်။

မိုက်ကယ်က သူ့အနောက်ကနေ စောင့်ကြည့်နေတဲ့ ဒရုန်းတွေကတစ်ဆင့် ဒါကို မြင်နေရတယ်။ တစ်ကြိမ်ပဲ အပြန်အလှန် တိုက်ခိုက်ရသေးတယ် သူက သူတို့ရဲ့ တန်ခိုးစွမ်းရည်တွေကို အဖြေရှာမိသွားပြီ။

စစ်သည်တော်ရဲ့ တန်ခိုးစွမ်းရည်က အရာအားလုံးကို ကြိုးပဲ့လွယ်တဲ့ ကျောက်တုံးတွေအဖြစ် ပြောင်းလဲပစ်နိုင်တာ ဖြစ်တယ်။ မှော်ပညာရှင်ရဲ့ တန်ခိုးစွမ်းရည်ကတော့ လျှောချောမျက်နှာပြင်တစ်ခုကို ဖန်တီးပေးနိုင်တယ်။

တန်ခိုးစွမ်းရည်တွေကို စုပ်ယူချင်တာမို့ သူက သူ့ရဲ့ ဒရုန်းကို ကျောက်တုံးဖြစ်ပြီး ကြေမွသွားတဲ့ သစ်ပင်အနားဆီ ပိုပြီး နီးကပ်အောင် မောင်းနှင်လိုက်တယ်။ သူက ၎င်းနဲ့ တစ်မီတာလောက်အကွာကို ရောက်သွားတာနဲ့ စစ်သည်တော်ရဲ့ တန်ခိုးစွမ်းရည်ကို ဖွဲ့စည်းထားတဲ့ အမျှင်တန်းတွေကို မြင်လိုက်ရတယ်။ အဲဒါက စွေစောင်းနေပြီး ကျောက်တုံးကြီးတစ်ခုရဲ့ ကြမ်းတမ်းတဲ့ အနားသတ်လိုင်း ပုံစံမျိုး ဖြစ်ပေါ်နေတာ။

ပြီးတော့ စစ်သည်တော်က ဒီကျောက်တုံးသစ်ပင်နဲ့ ဝေးရာကို ရောက်နေရင်တောင်မှ သူ့ကို အဲဒီသစ်ပင်နဲ့ ချိတ်ဆက်ပေးထားတဲ့ အမျှင်တန်းတစ်ခု ရှိနေတုန်းပဲ ဖြစ်တယ်။

သူက သူ့ရဲ့ ဒရုန်းအကြီးကို ပိုပြီး နီးကပ်အောင် မောင်းနှင်လိုက်ပြီး ကျောက်တုံးသစ်ပင်နဲ့ စစ်သည်တော်ဆီ ချိတ်ဆက်ထားတဲ့ အမျှင်တန်းတို့ရဲ့ ကြားထဲမှာ ထားရှိလိုက်တယ်။

သူက ဒရုန်းရဲ့ ကိုယ်ထည်မှာ တပ်ဆင်ထားတဲ့ ဘက်ထရီနဲ့ အဲဒီအမျှင်တန်းကို အံကိုက်ဖြစ်သွားအောင် အပြည့်အဝ ထိန်းချုပ်မောင်းနှင်လိုက်တယ်။

ပြီးတော့ ဒီလိုမျိုး လုပ်လိုက်ရုံတင်ရှိသေးတယ် ကျောက်တုံးသစ်ပင်ဆီကို ပံ့ပိုးပေးနေတဲ့ တန်ခိုးစွမ်းရည်တွေက ဘက်ထရီဆီကို စုပ်ယူခြင်း ခံလိုက်ရတော့တာပဲ။

[၁%... ၂%... ၃%]

"ဟင်း... ဒါက တော်တော်လေး နှေးတာပဲ" လို့ သူက တိုးတိုးလေး ရေရွတ်လိုက်တယ်။

သူ့ရဲ့ ကိုယ်ပိုင်တန်ခိုးစွမ်းရည်ကို မသုံးဘဲ ကွမ်တမ်ခြေလှမ်း ကို အသုံးပြုနိုင်ဖို့ဆိုရင် အနည်းဆုံးတော့ ဘက်ထရီရဲ့ ၃၀ ရာခိုင်နှုန်းအထိ ပြည့်နေဖို့ လိုအပ်တယ်။

ဒီလို အရှိန်မျိုးနဲ့ဆိုရင် အဲဒီပမာဏအထိ ပြည့်ဖို့အတွက် မိနစ်သုံးဆယ်လောက် ကြာလိမ့်မယ်။

ဒါက စစ်သည်တော်က ဒီကျောက်တုံးသစ်ပင်ဆီကို တန်ခိုးစွမ်းရည်တွေ တိုးမြှင့်ပေးဖို့အတွက် တက်တက်ကြွကြွ အားစိုက်ထုတ်ခြင်း မရှိတာကြောင့်ပဲလို့ သူ ရိပ်မိလိုက်တယ်။

သူ စစ်သည်တော်နဲ့ တိုက်ခဲ့တုန်းက စစ်သည်တော်က သူ့ရဲ့ အကာအကွယ်တွေကို လောင်ကျွမ်းဖျက်ဆီးပစ်ဖို့အတွက် သူ့ရဲ့ တန်ခိုးစွမ်းရည်ကို ရည်ရွယ်ချက်ရှိရှိ သုံးခဲ့တာ ဖြစ်တယ်။ အဲဒီတုန်းက အဆက်မပြတ် စီးဆင်းနေတဲ့ စွမ်းအားတွေ ရှိနေတာမို့ စက္ကန့်ပိုင်းအတွင်းမှာတင် ဘက်ထရီကို အားအပြည့် သွင်းနိုင်ခဲ့တာလေ။

ထို့ကြောင့် သူက ဘက်ထရီတွေကို အားအမြန် သွင်းချင်တယ်ဆိုရင် သူ့ရဲ့ ဒရုန်းတွေကို တိုက်ပွဲရဲ့ ရှေ့တည့်တည့်ဆီ ရွှေ့ရမှာ ဖြစ်တယ်။ သို့ပေမဲ့ အဲဒီလောက် နီးကပ်တဲ့ အကွာအဝေးမှာဆိုရင် သူတို့က သူ့ရဲ့ ဒရုန်းကို ကျိန်းသေပေါက် ရှာတွေ့သွားကြလိမ့်မယ်။

'ငါ ဒီမှာပဲ နေပြီး အဲဒီလျှောချောမြက်ခင်းပြင်နဲ့ ကျောက်တုံးသစ်ပင်ဆီကနေ စုပ်ယူလို့လည်း ရတာပဲ' 'ဒါကတော့ ဘေးအကင်းဆုံး နည်းလမ်းပေါ့'

သူသာ အဲဒီလို လုပ်မယ်ဆိုရင် သူတို့က သူ့ရဲ့ ဒရုန်းအကြောင်းကို လုံးဝ သိကြမှာ မဟုတ်ပါဘူး။

ဒါပေမဲ့ သူက နည်းနည်းတော့ စိတ်မရှည်ဖြစ်နေတယ်။ သူက သူ့ရဲ့ ဘက်ထရီတွေကို တတ်နိုင်သမျှ အမြန်ဆုံး အားသွင်းချင်နေတာကိုး။

ဖြေရှင်းနည်းကို စဉ်းစားဖို့ ကြိုးစားနေစဉ်မှာပဲ စစ်သည်တော်နဲ့ မှော်ပညာရှင်တို့က တစ်ယောက်ကိုတစ်ယောက် အနိုင်ယူဖို့အတွက် သူတို့ရဲ့ တန်ခိုးစွမ်းရည်တွေကို ပတ်ပတ်လည် ဝှေ့ယမ်းပစ်လွှတ်ရင်း တိုက်ပွဲကို ဆက်လက် ဆင်နွှဲနေကြဆဲ ဖြစ်တယ်။

ဒီမှာတင် သူက ဒရုန်းရဲ့ တန်ခိုးစွမ်းရည် အမြင်ကနေတစ်ဆင့် အရာတစ်ခုကို သတိထားမိသွားတယ်။

သူတို့ရဲ့ တန်ခိုးစွမ်းရည်က အရာဝတ္ထုတစ်ခုဆီကို ကျရောက်ပြီး ၎င်းရဲ့ အရှိန်အဟုန်ကို စတင် သက်ရောက်မှု ရှိစေတဲ့ အဲဒီစက္ကန့်ပိုင်းလေးမှာတင် သူတို့ရဲ့ နတ်ဘုရားပန်းပဲဖို အပိုင်းအစတွေဆီကနေ ဧရာမ တန်ခိုးစွမ်းရည် လှိုင်းလုံးကြီးတစ်ခု ထွက်ပေါ်လာတာကို မြင်လိုက်ရတယ်။

သူသာ သူ့ရဲ့ ဒရုန်းကို တိုက်ခိုက်မှုရဲ့ ရှေ့တည့်တည့် မြင်ကွင်းထဲကို ရောက်အောင် တစ်နည်းနည်းနဲ့ မောင်းနှင်နိုင်မယ်ဆိုရင် အဲဒီတန်ခိုးစွမ်းရည် အားလုံးကို အပြည့်အဝ စုပ်ယူနိုင်လိမ့်မယ် မဟုတ်လား။

* * * * * * * *

စာစဉ်(၅၁)