အခန်း ၂၆

အပိုင်း (၂၆)

ဒါက ဦးထုပ်စိမ်း တန်ပြန်တိုက်ခိုက်မှုလား။

အရှင်မင်းကြီးနှင့် မှူးမတ်များက မတွေးဘဲ မနေနိုင်ကြတော့ပေ။

မနေ့ကမှ ရှီးရုံ ဧကရာဇ် ဦးထုပ်စိမ်း ၁၀ လုံး ဆောင်းရတဲ့အကြောင်း ကြားသိခဲ့ရပြီး သူတစ်ပါး၏ဒုက္ခပေါ် ဝမ်းသာအားရ ဖြစ်ခဲ့ကြသေးသည်။ systemက ဖရဲသီးတွေ မစားသုံးနိုင်ခဲ့တာကိုတောင် နှမြောတသ ဖြစ်နေခဲ့ကြသေး၏။ ဒီနေ့မှာတော့ ရှီးရုံ ဧကရာဇ်က အရှင်မင်းကြီးကို ဦးထုပ်စိမ်း ပြန်ဆောင်းပေးလိမ့်မည်ဟု ဘယ်သူက ထင်ထားမိမည်နည်း။

မင်းတို့ ဧကရာဇ်တွေက ဦးထုပ်စိမ်းစစ်ပွဲတွေကို ဒီလောက်တောင် ကြိုက်ကြတာလား။ မှူးမတ်များက သူတို့၏စိတ်ထဲတွင် တိတ်တဆိတ် မေးလိုက်ကြသည်။

ချူဟွားတစ်ယောက် ရုတ်တရက် နားလည်သွားတော့သည်။ [နိုင်ငံအချင်းချင်းရဲ့ တိုက်ပွဲဆိုတာ ဒီလိုမျိုးကိုး]

ဒါက တကယ့် စီးပွားရေးစစ်ပွဲကြီးတွေလိုပဲ။ ဥက္ကဋ္ဌက လျှို့ဝှက်ဓာတ်ပုံတွေ ရိုက်တာ၊ တရားဝင်တံဆိပ်တုံးတွေ လုယူတာ၊ ပြိုင်ဘက်တွေရဲ့ ကားဘီးကို ဖောက်တာမျိုးတွေပေါ့။

ဒါက အရမ်းကို ရိုးရှင်းပြီး ဘာမှမရှိတော့ လူတွေက ဒါကို အတုလို့တောင် သံသယဝင်မိနိုင်သည်။ တီဗီဒရာမာတွေထဲကလို မျိုးစုံပွေလီရှုပ်ထွေးတဲ့ လျှို့ဝှက်ကြံစည်မှုတွေနဲ့ အံ့ဩစရာကောင်းတဲ့ စီးပွားရေးစစ်ပွဲတွေကမှ အစစ်အမှန်တွေ ဖြစ်နေတာပဲ။

အရှင်မင်းကြီး: ? ! !

မှူးမတ်များ: ? ! !

မဟုတ်ဘူး၊ မဟုတ်ဘူး၊ မဟုတ်ဘူး။ ပုံမှန် တိုင်းပြည်အချင်းချင်း စစ်ပွဲတွေက ဒီလိုမဟုတ်ဘူး။ စစ်မြေပြင်မှာ တကယ့်လက်နက်အစစ်တွေ၊ ဓားအစစ်တွေနဲ့ တိုက်ခိုက်ကြရသလို ညီလာခံမှာလည်း အပြန်ပြန်အလှန်လှန် တွက်ချက်ကြရတာ။ ဒါ လုံးဝမဟုတ်ဘူး။ လုံးဝပဲ။

ငါတို့ရဲ့ ဂုဏ်သတင်းကို လာမစော်ကားနဲ့။

ငါတို့ရဲ့ ဗျူဟာတွေကို လာပြီး အထင်မသေးနဲ့။

ကံမကောင်းစွာဖြင့် သူတို့၏စိတ်ထဲတွင် မည်မျှပင် ကျယ်လောင်စွာ အော်ဟစ်နေပါစေ၊ ကိုယ့်ဟာကို ရှင်းလင်းလိုသည့် ဆန္ဒ မည်မျှပင် ပြင်းထန်နေပါစေ ချူဟွားနှင့် system ကတော့ စကားတစ်ခွန်းမျှ ကြားနိုင်မည် မဟုတ်ပေ။

ချူဟွား: [အရင်တစ်ခေါက်တုန်းက မိဖုရားခေါင်က ကိုယ်စားကိုယ်လုပ်တော် ထားတဲ့ ဖရဲသီးကို နင်စားတုန်းက အကြောင်းစုံ မပြောခဲ့ဘူးနော်]

System က အနည်းငယ် ခံစားလိုက်ရ၏။ [လူတစ်ယောက်ချင်းစီမှာ ဖရဲသီးတွေ အများကြီး ရှိနေတာလေ။ ငါက အကုန်လုံးကို ဖတ်လို့မပြီးနိုင်ဘူး။ ဒီ့အပြင် ဖရဲသီးစွမ်းအင်ကလည်း အများကြီး မရှိဘူး။ ငါက သူတို့ကို ကြုံသလို သုံးမပစ်ရဲဘူးလေ]

[ဒီတစ်ခေါက်မှာ အသက်ရှည်ဆေးအနှစ်၊ ကာလသားရောဂါနဲ့ တခြားရောဂါတွေရဲ့ သဲလွန်စတွေအားလုံးက ရှီးရုံကြောင့် ချိတ်ဆက်မိသွားတာ မဟုတ်ဘူးလား။ ငါက စဉ်းစားလိုက်တယ်။ သူတို့က မှူးမတ်တွေနဲ့ သူတို့မိသားစုတွေကို ပစ်မှတ်ထားနိုင်မှတော့ မိဖုရားနဲ့ ကြင်ယာတော်တွေက ဘာလို့ ဘာမှမဖြစ်ဘဲ နေနိုင်မှာလဲပေါ့။ ဒါနဲ့ ခဏလေး စစ်ကြည့်လိုက်တာ...]

[အမလေး! သူ့အဖေကို မြှုပ်နှံဖို့ ကိုယ့်ကိုယ်ကိုယ် ရောင်းစားတယ်ဆိုတဲ့ လူငယ်လေးက အတုကြီးပဲ။ ကောက်ရိုးဖျာထဲမှာ လိပ်ထားတဲ့ လူသေက လျိုယွဲ့ကို ကာလသားရောဂါ ကူးစက်စေခဲ့တဲ့လူပဲ။ အဲဒီလူငယ်လေးက မိဖုရားကြီးရှေ့မှာ သူ့အဖေက အပျော်အပါးလိုက်စားပြီး သူ့အမေက ကြိုးဆွဲချသေသွားတယ်လို့ ဝမ်းနည်းစရာ ဇာတ်လမ်းတစ်ပုဒ်ကို ရောင်းချခဲ့သေးတယ်။ သူက စာအုပ်တွေကူးရင်း စာကျက်ဖို့ ပိုက်ဆံရှာခဲ့တယ်တဲ့။ ဘယ်လောက် သနားစရာကောင်းအောင် လုပ်လို့ရမလဲ၊ အဲဒီလောက် သနားစရာကောင်းအောင် လုပ်ခဲ့တာ]

ချူဟွား: "..."

[သူ့မိဘတွေကို သေဖို့ စီစဉ်ခဲ့တာပဲ။ ဟွန့်။ တော်တော် သိတတ်တဲ့ သားလိမ္မာလေးပဲ]

အရှင်မင်းကြီး: ???

မှူးမတ်များ: ???

ဒီလိုသားမျိုးက လိမ္မာတယ် ဟုတ်လား။ ဒါက သရော်နေတာလား။ သရော်တာပဲ ဖြစ်ရမယ်။

Systemက ဆက်ပြောသည်။ [ဒီဘဝဇာတ်လမ်းက ကာလသားရောဂါရှိတဲ့လူဆီက တိုက်ရိုက် ယူသုံးထားတာ။ သူ့မိသားစုမှာလည်း စာအုပ်တွေကူးပြီး စာကျက်ဖို့ ပိုက်ဆံရှာတဲ့ သားတစ်ယောက် တကယ်ရှိခဲ့တယ်။ ဒါပေမဲ့ သူ့ကို သူ့အဖေအရင်းကပဲ ပြည့်တန်ဆာအိမ်ကို ရောင်းစားလိုက်တာ]

[လူတော်တော်များများက သူတို့သမီးတွေကို ပြည့်တန်ဆာအိမ် ရောင်းစားကြပေမဲ့ သားကို ရောင်းစားတာက ရှားတယ်။ အထူးသဖြင့် တစ်ဦးတည်းသောသားကိုပေါ့။ အဲဒီလူက ဝေဖန်ခံရမှာ ကြောက်လို့ ဒီကိစ္စကို ဖုံးကွယ်ထားပြီး သူ့သား ထွက်ပြေးသွားတယ်လို့ ပြောခဲ့တာ။ ဒီတော့ ဒီလူက အကျိုးအမြတ် ရသွားတာပေါ့]

ထိုစကားကို ကြားသောအခါ ချူဟွားသည် တိတ်ဆိတ်သွားတော့၏။ အရှင်မင်းကြီးနှင့် မှူးမတ်များလည်း ဘာပြောရမှန်း မသိ ဖြစ်သွားကြသည်။

ဒီလို ဆိုးရွားတဲ့ အခြေအနေမှာတောင် စာအုပ်တွေကူးပြီး ပိုက်ဆံရှာကာ စာကျက်ဖို့ အခိုင်အမာ တောင်းဆိုခဲ့သူသည် အလွန် ဇွဲကောင်းသောသူ ဖြစ်ရမည်။ သို့သော် သူသည် သူ့အဖေအရင်းကြောင့် ပျက်စီးသွားခဲ့ရသည်။

အချို့သော ဖခင်ဗျားသည် အမှန်တကယ်ပင် ဖခင်တစ်ယောက် ဖြစ်ရန် မထိုက်တန်ကြပေ။

ချူဟွား သက်ပြင်းချလိုက်လေသည်။ [လူတွေက အမြဲတမ်း သားသမီးတွေဆီက သားသမီးဝတ္တရားကျေပွန်မှုကို တောင်းဆိုကြတယ်။ ဒါပေမဲ့ မိဘတွေဆီက ကြင်နာမှုကို ဘယ်တော့မှ မတောင်းဆိုကြဘူး]

[ကလေးတစ်ယောက်ကို မွေးလိုက်ရုံနဲ့ ပြီးသွားတာမှ မဟုတ်တာ။ သူက အသွေးအသားနဲ့ လူတစ်ယောက်လေ။ လေနဲ့ နှင်းရည်ကို သောက်ပြီး ကြီးပြင်းလာဖို့က မဖြစ်နိုင်ဘူး။ သူက သူ့ဘာသာသူ အသက်ရှင်ကျန်ရစ်ခဲ့တာ ဖြစ်နိုင်လို့လား...]

[ထားလိုက်ပါတော့။ ဒီအကြောင်း မပြောတော့ဘူး] ဒီလို အမှိုက်လိုလူအကြောင်း ကြားရတော့ ချူဟွား နည်းနည်း ငြီးငွေ့သွားသည်။ [ဆက်ပြော]

ဖရဲသီးစား systemက အနည်းငယ် မျက်နှာပူသွားလေသည်။ [မမကြီးဟွား၊ ဒီလူက ရှီးရုံက လာတာ။ နင်နဲ့ မိဖုရားကြီးကလည်း မစိမ်းဘူး... ဒီလူက အဆင့်ဆင့် လှည့်ပတ်လာရတာဆိုတော့ ဖရဲသီးက နည်းနည်း ဈေးကြီးတယ်]

[အလုပ်ဆင်းသွားရင် မိဖုရားက ကိုယ်စားကိုယ်လုပ်တော်ကို ထားတဲ့နေရာကို သွားပြီး သူနဲ့ သိကျွမ်းရင်းနှီးအောင် အခွင့်အရေး ရှာလိုက်ကြရအောင်။ ပြီးမှ ဝယ်မလား။ ဒါဆို ဖရဲသီးစွမ်းအင် အများကြီး ချွေတာလို့ ရနိုင်တယ်]

ချူဟွားက ခဏလောက် စဉ်းစားလိုက်၏။ [အဆင်ပြေတယ်]

မှူးမတ်များ: ? ! !

သူမက အဆင်ပြေပေမဲ့ သူတို့က အဆင်မပြေကြပေ။ ဖရဲသီးစားတာကို တစ်ဝက်တစ်ပျက်နဲ့ ဘယ်လိုလုပ် ရပ်လိုက်လို့ရမှာလဲ။ ဒီလောက် ကြီးမားတဲ့ ဖရဲသီးကြီးကို။

မိဖုရားကြီးက ကိုယ်စားကိုယ်လုပ်တော်ကို ဘယ်လို ထိန်းသိမ်းထားတာလဲ။ ရှီးရုံ ဧကရာဇ်က သာ့ရှန်းအရှင်မင်းကြီးကို ဦးထုပ်စိမ်း ဘယ်လို ဆောင်းခိုင်းခဲ့တာလဲ။ သူမက သူတို့ကို ဒီအကြောင်းတွေ ပိုပြောပြသင့်တယ်လေ။

အရှင်မင်းကြီး၏ မျက်နှာတော်သည် မည်းမှောင်သွားတော့သည်။

ဖရဲသီးတွင် ပါဝင်သည့်အကြောင်းအရာက မိဖုရားကြီးနှင့် ပတ်သက်နေသောကြောင့် သူသည် အစီရင်ခံစာ၏ တစ်စိတ်တစ်ပိုင်းကို ဖြတ်တောက်ထားခဲ့ပြီး အပြည့်အစုံကိုတော့ မှူးမတ်များထံ ဘယ်သောအခါမှ မပေးပို့ခဲ့ပေ။ သို့သော်လည်း ပေါ်သွားလိမ့်မည်ဟု ဘယ်သူက သိပါမည်နည်း။

ချူဟွားက တကယ်ကို စပ်စုခြင်း မရှိသည်ကို တွေ့ရသောအခါ system သည် ဖရဲသီးစွမ်းအင် ချွေတာရန်အတွက် ယခုနေ ပြောပြဖို့ စိတ်ကူးမရှိတော့ပေ။ သူတို့ စိုးရိမ်နေကြသည်မှာ အခြားပြဿနာတစ်ခု ဖြစ်လေသည်။

ချူဟွားနှင့် system ၏ စကားပြောဆိုမှုကို မီတာ ၅၀ ပတ်လည်အတွင်းရှိ လူတိုင်း ကြားနိုင်ပြီး အထူးသီးသန့် ဆက်ဆံမှုမျိုးလည်း မရှိပေ။

ဤသို့ဆိုလျှင် သူမက ကိုယ်စားကိုယ်လုပ်တော်ထံ ပြေးသွားသည်နှင့်၊ system နှင့် နောက်ထပ် စကားအနည်းငယ် ပြောလိုက်သည်နှင့်၊ သို့မဟုတ် ထိုနေရာတွင်ပင် ပူပူနွေးနွေး ဖရဲသီးကို စားသုံးလိုက်သည်နှင့် အနီးအနားရှိ လူများလည်း သိရှိသွားကြတော့မည်။ ထိုအခါ ရှီးရုံလူမျိုးများလည်း သိရှိသွားကြလိမ့်မည်။

သူတို့ ဘယ်လို လုပ်ကြမလဲ။ အရှင်မင်းကြီးနှင့် မှူးမတ်များမှာ အနည်းငယ် ထိတ်လန့်သွားကြ၏။

သာ့ရှန်းက ရတနာတွေကို ရှီးရုံက အဲဒီလူယုတ်မာတွေ တပ်မက်သွားနိုင်သလား။ မရဘူး။ လုံးဝ မဖြစ်ရဘူး။

စောစောက လင်ယိုသည် ဖရဲသီးစားရင်း အစီရင်ခံနေခဲ့သည်။ သူသည် အလုပ်နှစ်ခုကို တစ်ပြိုင်နက် လုပ်ဆောင်ရင်း အကြောင်းအရာအားလုံးကို အစီရင်ခံခဲ့၏။

အကြီးမားဆုံး ကိစ္စကြီး ပြီးဆုံးသွားခဲ့ပြီး နန်းစောင့်တပ်မှူးက ဝူရူနှင့် လျိုယွဲ့ကို ဖိနှိပ်ထားလိုက်တော့သည်။

သူတို့က ရှီးရုံအတွက် ဆန္ဒရှိရှိဖြင့်ဖြစ်စေ၊ အတင်းအကျပ် ဖိအားပေးခံရ၍ဖြစ်စေ သာ့ရှန်းပြည်သူများကို ထိခိုက်နစ်နာအောင် လုပ်ဆောင်ခဲ့သဖြင့် သူတို့အားလုံးသည် တိုင်းပြည်သစ္စာဖောက်မှုဖြင့် တရားစွဲခံရပြီး သူတို့၏အဆုံးသတ်သည် ကောင်းမွန်လိမ့်မည် မဟုတ်ပေ။

ဝူရူသည် သေခြင်းတရားမှ မလွတ်မြောက်နိုင်မှန်း သိနေသည်။ စိတ်ဓာတ်ကျသွားပြီး သူသည် ဘာကိုမှ ဂရုမစိုက်တော့ပေ။

လျိုယွဲ့ကိုတော့ မည်သည့်အရာက ခြောက်လှန့်လိုက်သည်မသိ။ သူမသည် အနည်းငယ် စိတ်ရှုပ်ထွေးနေပြီး ကြောင်တောင်တောင် ဖြစ်နေလေသည်။ တန်းစီနေသူများထဲမှ ချူဖျင်ကိုပင် သူမ သတိမပြုမိခဲ့ပေ။

ချူဟွားက တစ်ချိန်က သူမ၏ ရုပ်ရည်အသွင်အပြင်ကို အလွန် အလေးထားခဲ့သော လျိုယိညန်ကို ကြည့်လိုက်၏။ သူမသည် ဖရိုဖရဲ ဖြစ်နေပြီး သေလုမျောပါး ဖြစ်နေ၏။ အနည်းငယ် စိတ်မသက်မသာ ဖြစ်စရာ မြင်ကွင်းတစ်ခုပင်။

တိုင်းပြည်များကြားမှ စစ်ပွဲသည် အမှန်တကယ်တွင် နန်းတွင်းထဲမှ အမျိုးသမီးတစ်စုကို ပစ်မှတ်ထား ကြံစည်ခဲ့ပြီး သူတို့ကို မူးယစ်ဆေးစွဲစေကာ၊ ကာလသားရောဂါ ကူးစက်စေပြီး ဖောက်ပြန်မှုမှ ကလေးများ ရစေခဲ့သည်။

သူတို့သည် မူးယစ်ဆေးစွဲခြင်းနှင့် ကာလသားရောဂါ၏ လက်သည်းအောက်မှ လွတ်မြောက်နိုင်ခဲ့လျှင်ပင် အရေခွံ ခွာခံရမည်ဖြစ်ကာ သည်ခေတ်တွင် ကောင်းမွန်စွာ နေထိုင်နိုင်ရန် ခက်ခဲလိမ့်မည်။

ရှီးရုံ ဧကရာဇ်ရဲ့ နည်းလမ်းတွေက အရမ်းအောက်တန်းကျတာပဲ။

ချူဟွားတစ်ယောက် ဒေါသထွက်လာတော့သည်။ [System၊ ငါ ပင်နီဆီလင် လုပ်ချင်တယ်]

Systemသည် အခိုက်တန့် ကြောင်အမ်းအမ်း ဖြစ်သွားတော့၏။ [ကာလသားရောဂါ ဖြစ်နေတဲ့လူတွေကို ကယ်ချင်လို့လား]

ချူဟွားက ခေါင်းညိတ်လိုက်သည်။ [တရုတ်တိုင်းရင်းဆေးနဲ့ အပ်စိုက်ကုထုံးတွေက သိပ်ပြီး ထိရောက်မှာ မဟုတ်ဘူး။ ဒါကြောင့် ငါတို့ အနောက်တိုင်းဆေးကို သုံးရလိမ့်မယ်]

[ဒါက အရမ်းခက်ခဲတယ်ဆိုတာ ငါ သိပါတယ်။ အချိန်တွေ အများကြီး လိုအပ်တယ်။ ကံလည်း လိုအပ်ပြီး ဒါကို လုပ်နိုင်ခြေကလည်း မများဘူး။ တကယ်လို့ လုပ်နိုင်ခဲ့ရင်တောင် ဓာတ်မတည့်တာတွေ၊ သန့်စင်မှု မလုံလောက်တာတွေ၊ ဘေးထွက်ဆိုးကျိုးတွေ ဖြစ်စေနိုင်ပြီး သူတို့ကို အချိန်မီ ကယ်တင်နိုင်မှာ မဟုတ်ဘူး။ ဒါပေမဲ့ ငါ အကောင်းဆုံး ကြိုးစားရမယ်။ ကံကြမ္မာကို လက်ခံလိုက်ရုံထက်စာရင် ပိုကောင်းပါတယ်]

[ပြီးတော့ တကယ်လို့ ဒါကို လုပ်နိုင်ခဲ့ရင် ဒါက ပြင်ပဒဏ်ရာတွေနဲ့ ပိုးဝင်တာတွေကအစ အားလုံးကို ကယ်တင်နိုင်တယ်။ ဒါက တိုင်းပြည်နဲ့ ပြည်သူတွေကို အကျိုးပြုတဲ့ ကြီးကျယ်တဲ့အရာတစ်ခုပဲ။ ဒါကို... ကောင်းမှုကုသိုလ် စုဆောင်းတယ်လို့ပဲ သဘောထားလိုက်မယ်...]

သူမသည် ဒုတိယအကြိမ် အသက်ရှင်ခွင့် ရခဲ့သည့် အကြောင်းအရင်းကို မသိသေးပေ။ ထို့ကြောင့် သူမအား ပေးအပ်ခဲ့သော ကောင်းချီးအတွက် ကောင်းကင်ဘုံကို ကျေးဇူးတင်သည့်နည်းလမ်းအဖြစ် သူမနှင့် သူမ၏မိသားစုကို မွေးဖွားကာကွယ်ပေးခဲ့သော တိုင်းပြည်ကို ပြန်လည် ပေးဆပ်ခြင်းအဖြစ် သဘောထားလိုက်တော့သည်။

System: [ငါက အကူအညီ မပေးနိုင်ဘဲ မမကြီးဟွားကိုပဲ အားပေးနိုင်မယ်လို့ မထင်ပါနဲ့]

ချူဟွား: [ဘယ်လိုလုပ် မပေးနိုင်ရမှာလဲ။ ငါ ကျရှုံးပြီး စိတ်ဓာတ်ကျနေတဲ့အခါ နင်က အဲဒီ လတ်လတ်ဆတ်ဆတ် ဖရဲသီးတွေကို ငါ့ကို ဝေမျှလို့ရတယ်။ ဒါမှ ငါ ပျော်ရွှင်ပြီး လေ့လာဖို့ စိတ်အားထက်သန်မှု ပိုရှိလာမှာပေါ့]

[ဟမ်။ ဟုတ်သားပဲ။ ဒါဆို ဒီလိုပဲ သတ်မှတ်လိုက်ပြီ] System က ပျော်ရွှင်စွာဖြင့် ဖရဲသီးအချို့ကို အသုံးပြုကာ ပန်းများ ကြဲချလိုက်သည်။

လူတစ်ယောက်နှင့် system တစ်ခုတို့သည် သည်ကိစ္စအပေါ် သဘောတူညီမှု ရရှိသွားကြလေသည်။

ညီလာခံမှ ထွက်ခွာပြီးနောက် အရှင်မင်းကြီးသည် တော်ဝင်ဆေးဌာန အုပ်ချုပ်ရေးမှူးကို ဆင့်ခေါ်လိုက်၏။ "ပင်နီဆီလင်တဲ့၊ မင်း ဒါကို သိသလား”

တော်ဝင်ဆေးဌာန အုပ်ချုပ်ရေးမှူးက ခေါင်းခါလိုက်သည်။ "ကျွန်တော်မျိုး တစ်ခါမှ မကြားဖူးပါဘူး”

"ထားလိုက်တော့” အရှင်မင်းကြီးသည် ချူဟွား ပြောလိုက်စဉ်ကတည်းက ရှိနိုင်မည်မဟုတ်ကြောင်း အမှန်တကယ် ခန့်မှန်းမိခဲ့သော်လည်း သူသည် အနည်းငယ် လက်မခံချင် ဖြစ်နေခြင်းပင်။

ကာလသားရောဂါ ကူးစက်ခံထားရသော အရပ်ဘက်နှင့် စစ်ဘက် မှူးမတ်များနှင့် သူတို့၏မိသားစုဝင်များမှာ မနည်းလှပေ။ ရှီးရုံ၏ အစီအစဉ် စတင်ပြီး မကြာသေးသောကြောင့် ကူးစက်ခံရသူ နည်းပါးပြီး စောစီးစွာ သိရှိခဲ့ရသည်။ သူတို့ကို လောလောဆယ် အပ်စိုက်ကုထုံးနှင့် ဆေးဝါးများဖြင့် ကုသထားလိုက်သည်။

နောက်ပိုင်းတွင် အခြေအနေ မတိုးတက်လာဘဲ ပိုမိုဆိုးရွားလာပါက ချူဟွားက ပင်နီဆီလင်ကို အမြန်ဆုံး ဖော်ထုတ်နိုင်ရန်သာ မျှော်လင့်ရတော့မည်။

ပင်နီဆီလင် ဖော်ထုတ်ရန် အချိန်ရရှိရေးအတွက် ချူဟွားသည် ဘဏ္ဍာရေးဝန်ကြီးဌာန၏ စာရင်းများကို အမြန်ဆုံး အပြီးသတ်လိုခဲ့သည်။

သူမသည် အလုပ်အများကြီးကို တာဝန်ယူရလောက်အောင် မမိုက်မဲပေ။ လူတစ်ယောက်တည်းက ခေါင်းသုံးလုံး လက်ခြောက်ဖက် ရှိလျှင်ပင် အလုပ်အားလုံးကို အပြီးသတ်ရန် မဖြစ်နိုင်ပေ။

လုပ်ငန်းထိရောက်မှု မြှင့်တင်ရန်အတွက် စက်ရုံထုတ်လုပ်မှုလိုင်းပုံစံကို အသုံးပြုခဲ့ရသည်။ ဘဏ္ဍာရေးဝန်ကြီးဌာနမှ မှူးမတ်များကို အုပ်စုအနည်းငယ် ခွဲလိုက်ပြီး အုပ်စုတစ်စုက ကူးယူခြင်း၊ တစ်စုက တိုက်ဆိုင်စစ်ဆေးခြင်း၊ တစ်စုက တွက်ချက်ခြင်းနှင့် တစ်စုက အတည်ပြုခြင်းတို့ကို လုပ်ဆောင်စေသည်။ ကျွမ်းကျင်မှု မြင့်မားလာပြီးနောက် အရှိန်သည် ချက်ချင်း မြင့်တက်လာခဲ့သည်။ ဘဏ္ဍာရေးဝန်ကြီး၊ ဒုတိယ ဘဏ္ဍာရေးဝန်ကြီးနှင့် အခြားသူများအားလုံး အံ့ဩတကြီး ဖြစ်သွားရလောက်အောင်ပင် အလွန် လျင်မြန်လှသည်။

ထို့အပြင် သူမသည် နေ့စဉ် အလုပ်ချိန်ပြီးသည်နှင့် အိမ်ပြန်ရန် အချိန်မှန် ပြင်ဆင်ထားသည်။

သုံးရက်ကြာပြီးနောက် ချူဟွားသည် သူမ လိုအပ်သမျှ အားလုံးကို စီစဉ်ပြီးစီးသွားပြီဖြစ်ကာ မကြာမီ ပထမဆုံး စမ်းသပ်မှုကို စတင်နိုင်တော့မည်ဖြစ်ပြီး အနည်းငယ် ပိုပြီး သက်သောင့်သက်သာ ဖြစ်လာတော့မည်။

[လာ။ ဖရဲသီး စားကြရအောင်]

System: [ရှီးရုံ ဧကရာဇ်ရဲ့ ဦးထုပ်စိမ်းလား၊ ဒါမှမဟုတ် သာ့ရှန်းအရှင်မင်းကြီးရဲ့ ဦးထုပ်စိမ်းလား]

ဘဏ္ဍာရေးဝန်ကြီးဌာန: “…”

နန်းစောင့်တပ်မှူး: “…”

Systemသည် ချူဟွားကြောင့် လုံးဝ ပျက်စီးသွားခဲ့ပြီး ဦးထုပ်စိမ်းအကြောင်း ပြောမိသည်နှင့် အထူးတလည် စိတ်လှုပ်ရှားနေတော့သည်။

ချူဟွားတစ်ယောက် အနည်းငယ် ကြောင်သွားတော့သည်။ [ဘာလို့ ရှီးရုံ အတွက် ရွေးစရာ ရှိနေတာလဲ။ နင်က ဖရဲသီးစွမ်းအင် ချွေတာတော့မှာ မဟုတ်ဘူးလား]

Systemက မာနကြီးစွာ နှာခေါင်းရှုံ့လိုက်ကာ [ထူးချွန်တဲ့ ဖရဲသီးစား system တစ်ခုအနေနဲ့ 188 က ကိုယ့်အားကိုယ်ကိုးတတ်ဖို့ သင်ယူခဲ့ပြီးပြီ။ ငါက သုံးရက်အတွင်း ဖရဲသီးစွမ်းအင် ၂၀,၀၀၀ ကျော် စုဆောင်းထားပြီးပြီ။ ဒါပေါ့။ ငါက အလျှံပယ် သုံးဖြုန်းနိုင်ပြီလေ]

လေသံထဲက မာနသည် အလွန် ပြင်းထန်နေသဖြင့် ချူဟွားသည် system ၏ ခေါင်းကို ဆွဲကိုင်ထားချင်စိတ် ပေါက်သွားတော့သည်။

ဘဏ္ဍာရေးဝန်ကြီးဌာန မှူးမတ်: "..."

နန်းစောင့်တပ်မှူး: "..."

သူ့ရဲ့ ကိုယ့်အားကိုယ်ကိုးတယ်ဆိုတာက နေ့ဘက်မှာ အကျင့်ပျက်ခြစားမှုတွေကို လုံ့လဝီရိယနဲ့ စုံစမ်းစစ်ဆေး၊ ညဘက် ချူဟွား အိပ်ပျော်သွားတဲ့အထိ စောင့်ကာ ဖရဲသီးစားရင်း ညည်းညူငိုယိုပြီးတဲ့နောက် နန်းတွင်းစာမေးပွဲ မေးခွန်းတွေကို လုပ်ဆောင်ခြင်းကို ဆိုလိုတာလား။

သူက ၂၄ နာရီလုံး အလုပ်လုပ်နေတာကြောင့် ညီလာခံတစ်ခုလုံး ဘယ်လောက်တောင် ဆိုးရွားနေလဲဆိုတာ သူ သိရဲ့လား။

စကားဝိုင်းကို မှတ်တမ်းပြုရသည့် နန်းစောင်းတပ်သားမှာ လက်များ ထုံကျဉ်လာသဖြင့် တစ်ယောက်ပြီး တစ်ယောက် အစာထိုးခဲ့ရသည်မှာ ၁၂ကြိမ်မကပင်။ လူအင်အား မလုံလောက်သဖြင့် ကုန်းကုန်း ၁၂ ယောက်ထံမှ လူများ လွှဲပြောင်းယူခဲ့ရသည်။ ကုန်းကုန်းများ၏ ကာယကြံ့ခိုင်မှုသည် နန်းစောင့်တပ်မှူးများလောက် မကောင်းမွန်သဖြင့် အယောက် ၂၀ ကျော် အစားထိုးခဲ့ရပြန်သည်။

တပ်မှူး လင်ယိုနှင့် နန်းစောင့်တပ်မှူးများအားလုံးသည် အကျင့်ပျက်ခြစားသော မှူးမတ်များကို ဖမ်းဆီးခြင်း၊ အကျင့်ပျက်ခြစားသော မှူးမတ်များကို ဖမ်းဆီးရန် လမ်းခုလတ်တွင် ရောက်ရှိနေခြင်းဖြင့် ၂၄ နာရီလုံး အလုပ်ရှုပ်နေကြသည်။ သူတို့သည် လေးရက်ဆက်တိုက် ကောင်းမွန်စွာ မအိပ်စက်ခဲ့ရဘဲ မျက်ကွင်းညိုနေကြသည်မှာ ပန်ဒါတစ်ကောင်လို မည်းနက်လို့ပင်။

လက်ရှိ အရှင်မင်းကြီး နန်းတက်ပြီးနောက် ငြိမ်ဝပ်ပိပြားရေးဌာနသည် ပထမဆုံးအကြိမ်အဖြစ် အရေးပေါ် တိုးချဲ့ခန့်အပ်မှုများ ပြုလုပ်ခဲ့ရလေသည်။

အသစ်ခန့်အပ်လိုက်သော လူများသည် လေ့ကျင့်မှု များများစားစား မရှိဘဲ အလုပ်သို့ စေလွှတ်ခံခဲ့ရပြီး ထိုအခြေအနေက လူသစ်များကို စိတ်လှုပ်ရှားစေခဲ့သည်။ သူတို့ စိတ်လှုပ်ရှားလာသည်နှင့် အလုပ်ကို ကြိုးစားလုပ်ကြပြီး အလုပ်ကို ကြိုးစားလုပ်ကြသည်နှင့် အားလုံး လဲကျသွားကြတော့သည်။

ဘဏ္ဍာရေးဝန်ကြီးဌာန ဘက်တွင်မူ သူတို့သည် စာရင်းများကို စစ်ဆေးရပြီး အကျင့်ပျက်ခြစားသော မှူးမတ်များထံမှ ရရှိသော ငွေများကို စုဆောင်းရသည်။ ဘဏ္ဍာတိုက်တွင် ငွေများ ပိုမို များပြားလာပြီး ထိုငွေများကို အချိန်ကြာမြင့်စွာ ငွေ စောင့်ဆိုင်းနေသော ဌာနအသီးသီးသို့ ဖြန့်ဝေပေးရသည်။ သူတို့သည် လက်များ ကျဉ်တက်သွားသည်အထိ ငွေရေတွက်ရသည့် ခံစားချက်ကို ပထမဆုံးအကြိမ် ခံစားခဲ့ရခြင်းပင်။

အထက်ပါအချက်များမှာ နေ့ဘက်တွင် အကျင့်ပျက်ခြစားမှုများကို စုံစမ်းစစ်ဆေးခြင်း၏ သက်ရောက်မှုသာ ဖြစ်သည်။ ညဘက်တွင် နန်းတွင်းစာမေးပွဲ မေးခွန်းများ လုပ်ဆောင်ခြင်း၏ သက်ရောက်မှုကတော့ ပိုလို့ပင် လွန်ကဲလှသည်။

ချူဟွားသည် ချူချင်းအတွက် စာရွက်စာတမ်းများစွာ ရရှိရန် ငွေများစွာ သုံးစွဲခဲ့ရပြီး ၎င်းတို့တွင် လက်ရှိအရှင်မင်းကြီး နန်းတက်ပြီးနောက် နန်းတွင်းစာမေးပွဲတိုင်းမှ ထိပ်တန်းသုံးဦးနှင့် ထူးချွန်သော ကျင့်ရှီများ ပါဝင်နေသည်။ ထိုအထဲတွင် အချို့သော မှူးမတ်များ၏ မိန့်ခွန်းများ၊ နိုင်ငံရေးဆိုင်ရာ စာတမ်းများ၊ ကဗျာများနှင့် ဝှက်ထားသော မရေမတွက်နိုင်သော ဖရဲသီးများ ပါဝင်သည်။

အရှင်မင်းကြီးနှင့် မှူးမတ်များသည် နေ့ဘက်တွင် အုပ်ချုပ်အရေးများဖြင့် အလွန် အလုပ်ရှုပ်နေကြသဖြင့် အပန်းဖြေရန် ဖရဲသီးအချို့ စားသုံးလိုကြသည်။ ရလဒ်အနေဖြင့် မကြာသေးမီက ဖရဲသီးများမှာ အကျင့်ပျက်ခြစားမှု သို့မဟုတ် နန်းတွင်းစာမေးပွဲများသာ ဖြစ်နေပြီး ၎င်းတို့တွင် လာဘ်ပေးလာဘ်ယူမှု၊ မေးခွန်းများ ပေါက်ကြားမှု၊ အခြားသူများအတွက် ဖြေဆိုပေးမှုနှင့် လူသတ်မှုတို့ ရောနှောပါဝင်နေသည်။ သူတို့သည် နွမ်းနယ်သော မျက်နှာဖြင့်သာ အချိန်ပို ဆက်လက်လုပ်ရန်သာ တတ်နိုင်တော့၏။

တရားရေးဝန်ကြီးဌာနတွင် မှူးမတ်များ မလုံလောက်သဖြင့် တရားစီရင်ရေး ပြန်လည်သုံးသပ်ရေးရုံးတော်ကိုပါ သူတို့နှင့်အတူ ဆွဲခေါ်သွားခဲ့သည်။ ဌာနနှစ်ခုသည် လက်တွဲကာ ခေါင်းပင်မထောင်နိုင်တော့ချေ။

နန်းတွင်းစာမေးပွဲ ဖြေဆိုရန် သို့မဟုတ် အမှုအခင်းများ စုံစမ်းစစ်ဆေးရန် မလိုအပ်သော စစ်ဘက် စစ်သူကြီးများသည် နန်းတွင်းစာမေးပွဲ ဖရဲသီးများကို ရက်အတန်ကြာ ဆက်တိုက် စားသုံးပြီးနောက် အရပ်ဘက် မှူးမတ်များနှင့် နန်းတွင်းစာမေးပွဲ မေးခွန်းများအကြောင်း ပြောဆိုနိုင်လာကြတော့သည်။

နန်းတွင်းစာမေးပွဲများမှတစ်ဆင့် အစိုးရအဖွဲ့သို့ ဝင်ရောက်လာသော အရပ်ဘက် မှူးမတ်များသည် အကျပ်အတည်း ပိုခံစားလာရပြီး သူတို့သည် အလုပ်ထိရောက်မှုကို တစ်ဖန် ပြန်လည် မြှင့်တင်ကာ သူတို့၏ အိပ်ချိန်ကို လျှော့ချလိုက်ကြလေသည်။ သူတို့သည် ဖရဲသီးကိုသာ စားသုံးနေသော ကလေးတစ်ယောက်ကို ရှုံးနိမ့်သွားမည်ကို စိုးရိမ်သဖြင့် ကြိုးစားပမ်းစား လေ့လာကြရတော့သည်။

စစ်ဘက် စစ်သူကြီးများက အရပ်ဘက် မှူးမတ်များ ကြိတ်ကြိုးစားနေသည်ကို သတိပြုမိသွားသလား။ သို့ဆိုလျှင် သူတို့လည်း ရှုံးနိမ့်လို့ မဖြစ်ပေ။

နေ့စဉ် လေ့ကျင့်ခန်းများ လုပ်ဆောင်ပြီး လက်အောက်ငယ်သားများကို လေ့ကျင့်ပေးသည်။ စာအုပ်များအတွက်တော့ ထားလိုက်ပါတော့။ ဒါက စစ်ဘက် စစ်သူကြီးများ၏ အားသာချက် မဟုတ်ပေ။ သို့သော် ဖရဲသီးစား system ဖြစ်သော ထိုကလေးပင် အလွန် ကြိုးစားနေမှတော့ သားသမီး၊ မြေးမြစ်များ ရှိနေပြီဖြစ်သော ဖခင်၊ အဘိုးများ ဖြစ်နေသည့် သူတို့က ဘယ်လိုလုပ် ပျင်းရိနေနိုင်မည်နည်း။

ကောင်းပြီလေ။ ဒါက ကြိတ်ကြိုးစားရုံပဲ မဟုတ်လား။ သူတို့လည်း နှာခေါင်းပိတ်ပြီး လိုက်လုပ်ကြတာပေါ့။

အရပ်ဘက် မှူးမတ်များက စစ်ဘက် စစ်သူကြီးများ ကြိတ်ကြိုးစားနေသည်ကို မြင်သောအခါ သာယာဝပြောသော ခေတ်ကာလမှ အရပ်ဘက် မှူးမတ်များက စစ်ဘက် စစ်သူကြီးများကို မည်သို့ အရှုံးပေးနိုင်ပါမည်နည်း၊ သူတို့ မျက်နှာ မလိုချင်ကြတော့ဘူးလား။

ကြိတ်ကြိုးစား။ သေတဲ့အထိ ကြိတ်ကြိုးစား။

မင်းလည်း ကြိတ်ကြိုးစား၊ ငါလည်း ကြိတ်ကြိုးစား၊ သူလည်း ကြိတ်ကြိုးစား။ ညီလာခံတစ်ခုလုံး ရှုပ်ယှက်ခတ်နေတော့သည်။

အရမ်း ပင်ပန်းနေပါပြီ။ ကျေးဇူးပြုပြီးတော့... ဝူး ဝူး။

ချူဟွားနှင့် system တို့သည် သူတို့က ညီလာခံတစ်ခုလုံးကို ရူးသွပ်သွားအောင် တွန်းပို့နေမှန်း မသိရှိကြဘဲ ပျော်ရွှင်စွာ ဖရဲသီးများ စားသုံးနေကြဆဲပင်။

System က သူ့လက်ကို ဝှေ့ယမ်းလိုက်ပြီး ဂုဏ်ယူစွာဖြင့် ပြောလိုက်၏။ [ငါ နှစ်ခုလုံး ဝယ်လိုက်ပြီ]

ခဏအကြာတွင် system သည် ဖရဲသီးများ စားသုံးပြီးနောက် ရယ်မောသံများနှင့်အတူ ပြန်လည် ရောက်ရှိလာသည်။ [ဝိုး။ ဟားဟားဟား။ မမကြီးဟွား။ ရှီးရုံ ဧကရာဇ် ဘယ်လောက်တောင် ထူးဆန်းလဲဆိုတာ နင် လုံးဝ တွေးတောင် တွေးမိမှာ မဟုတ်ဘူး]

ချူဟွား၏ စပ်စုလိုစိတ်ကို နှိုးဆွလိုက်၏။ [ဘာလဲ]

System: [သာ့ရှန်းအရှင်မင်းကြီးကို ဦးထုပ်စိမ်း ဆောင်းခိုင်းဖို့အတွက် သူက ရှီးရုံနဲ့ သာ့ရှန်း နယ်စပ်က သာ့ရှန်းအရှင်မင်းကြီးနဲ့ ရုပ်ရည် နည်းနည်း ဆင်တူတဲ့ မိန်းမတချို့ကို ရှာပြီး ကလေးတွေ မွေးခိုင်းခဲ့တယ်။ ပြီးတော့ သာ့ရှန်းအရှင်မင်းကြီးနဲ့ အတူဆုံး သားတစ်ယောက်ကို ရွေးပြီး ဒီကို လွှတ်လိုက်တာ]

ချူဟွား: [အိုး ဝိုး]

ဘဏ္ဍာရေးဝန်ကြီးဌာန မှူးမတ်များနှင့် နန်းစောင့်တပ်မှူး: အိုး ဝိုး။

ချူဟွား၏ လက်သည်းသည် စမ်းသပ်သည့် ခြေလှမ်းတစ်လှမ်း လှမ်းလိုက်သည်။ [ဒါဆို ရှီးရုံ ဧကရာဇ်က ဘယ်သူ့ကို ကြိုက်တာလဲ။ သာ့ရှန်းအရှင်မင်းကြီးကိုလား ဒါမှမဟုတ် သာ့ရှန်းမိဖုရားကြီးကိုလား]

[အဲဒီလူငယ်လေးက သူ့အဖေအရင်းက ရှီးရုံ ဧကရာဇ်မှန်း သိရဲ့လား။ သူက သာ့ရှန်းအရှင်မင်းကြီးကို မြင်ပြီးနောက် သူ့ကိုယ်သူ သာ့ရှန်းအရှင်မင်းကြီးရဲ့ သားလို့ ထင်သွားမှာလား။ ဒီနေရာမှာ ဘယ်သူက ဦးထုပ်စိမ်း ဆောင်းခိုင်းနေတာလဲ]

System: [ဟမ်]

ဘဏ္ဍာရေးဝန်ကြီးဌာန မှူးမတ်များနှင့် နန်းစောင့်တပ်မှူးများ: ဟမ်။ ဟမ်။

…