အခန်း ၃၁

အပိုင်း (၃၁)

Systemက သည်ည ဖော်ထုတ်လိုက်သည့် သတင်းသည် အမှန်ပင် ကြီးမားလှသည့် ဖရဲသီးကြီးတစ်လုံး ဖြစ်ခဲ့ပြီး ထိုသတင်းကြောင့် အရှင်မင်းကြီးသည် အမျက်ဒေါသထွက်ကာ မှူးမတ်များကို ညတွင်းချင်း နန်းတော်သို့ ဆင့်ခေါ်လိုက်ရသည်အထိပင်။

"ကျန်းက ယခင်မင်းကြီးရဲ့ သေတမ်းစာကြောင့် သူ့ကို မထိခဲ့တာ။ သူက သာ့ရှန်းနဲ့ တော်ဝင်မိသားစုကို ဘာထင်နေတာလဲ”

"သုံးနှစ်တစ်ကြိမ် ရွေးချယ်ပွဲမှာတောင် ကျန်း ဒီလောက် မဖြုန်းတီးခဲ့ဘူး။ သူက ပိုလှတဲ့ မိန်းကလေးတွေ မြင်တာနဲ့ လုယူတယ်။ အရင်မင်းဆက်ရဲ့ နောက်ဆုံး ဧကရာဇ်တောင် ဒီလို မလုပ်ခဲ့ဘူး”

"သူက ကျွီရန်တစ်ယောက်ကို သတ်၊ သူ့မိန်းမကို မုဒိမ်းကျင့်၊ မမွေးသေးတဲ့ ကလေးကို သတ်၊ ဒေသခံအရာရှိတွေနဲ့ ပူးပေါင်းပြီး ကျွီရန်ရဲ့ မိဘတွေကို သတ်ဖြတ်၊ ပြီးတော့ မိန်းမကို အလောင်းဖျောက်ဖို့ ခန္ဓာကိုယ်ကို ခုတ်စဉ်းပစ်ခဲ့တယ်။ ဒီအရာတွေအားလုံးနဲ့ သူက ကောင်းကင်ကို အပေါက်ဖြစ်အောင် ထိုးဖို့ ကြိုးစားနေတာလား”

"သူ့မျက်လုံးထဲမှာ သာ့ရှန်းညီလာခံနဲ့ ကျန်း... အရှင်မင်းကြီး... ရှိသေးရဲ့လား”

အရှင်မင်းကြီးသည် အလွန်တရာ ဒေါသထွက်နေ၏။ မှူးမတ်အများအပြား၏ ရှေ့တွင် သူသည် နဂါးပလ္လင် စားပွဲခုံကို ထုနှက်လိုက်လေသည်။

ယခင်မင်းကြီးတွင် မင်းသား ၇ ပါး ရှိခဲ့သည်။ တခြားသူများသည် လျှော့ချထားသော ရာထူးများကို ယူကာ ညီလာခံသို့ ရံဖန်ရံခါ လာကြသည်။ သို့မဟုတ်လည်း ပန်းများ စိုက်ပျိုးပြီး ငှက်များနှင့် ကစားရင်း နေ့ရက်များကို ကုန်ဆုံးကြကာ ချမ်းသာကြွယ်ဝပြီး အလုပ်မရှိသူများ ဖြစ်ကြသည်။ သူတို့သည် ညီလာခံသို့ လာရန်ပင် စိတ်မဝင်စားကြပေ။ ညီတော်တိုင်းက သူ့ကို ထုတ်ဖော် ပြသနေကြသည်မှာ: အရှင်မင်းကြီး၊ ကျွန်တော်တို့ အရမ်း နာခံမှုရှိပါတယ် ဟူ၍ပင်။

အန်းဝမ်ရယ် တစ်ပါးတည်းသာ အရှင်မင်းကြီး မရောက်နိုင်သော ကျန်းနန်ရှိ နေရာတစ်ခုတွင် အထူးအဆန်း ဖြစ်နေခဲ့သည်။

အကယ်၍ အန်းဝမ်ရယ်သာ ပိုပြီး နာခံမှု ရှိခဲ့ပါက အရှင်မင်းကြီးသည် ထိုသေတမ်းစာကို ထောက်ထား၍ ငြိမ်းချမ်းရေးကို ဝယ်ယူသည်ဟု သဘောထားကာ သူ့ကို မျက်စိမှိတ်ပေးလိုက်ပေဦးမည်။

ဒီကောင်လေး ဘာလုပ်ခဲ့သလဲ။ နန်းစောင့်တပ်မှူးသည် အရှင်မင်းကြီး၏ အရင်းနှီးဆုံးလူ ဖြစ်သည်ကို သိလျက်နှင့် သူသည် လျှို့ဝှက်ကိုယ်ရံတော်များကို စေလွှတ်ကာ ကြားဖြတ်၊ ဝိုင်းရံ၊ သတ်ဖြတ်စေပြီး နန်းစောင့်တပ်မှူးကို ကျိုးစီရင်စုပြည်နယ် ထဲသို့ မဝင်နိုင်အောင် တားဆီးခဲ့သည်။ ထို့အပြင် သူသည် ဤကဲ့သို့သော ပြစ်မှုကြီးကို ကျူးလွန်ခဲ့သေးသည်။

အရှင်မင်းကြီးသည် ချူဟွားကဲ့သို့ပင် ဒေါသတကြီးဖြင့် သူ၏ မျိုးဆက်ကို ဖြတ်တောက်ပစ်မည့် ကန်ချက် အနည်းငယ်ကို ကန်ပစ်ချင်စိတ် ပေါက်သွားသည်။

အရှင်မင်းကြီး ဒေါသထွက်နေချိန်တွင် မှူးမတ်များသည် တိတ်ဆိတ်နေကြပြီး သည်အချိန်တွင် အရှင်မင်းကြီးကို ဘယ်သူကမှ စိတ်အနှောင့်အယှက် မပေးရဲပေ။

အချို့လူများက မင်းဆရာအိုကြီးကို တိတ်တဆိတ် ခိုးကြည့်လိုက်ကြသည်။ မင်းဆရာကြီး၊ ဆရာကြီး အလှည့် ရောက်ပါပြီ။

မင်းဆရာအိုကြီးသည်လည်း အစီရင်ခံစာကို ဖတ်ပြီးနောက် ဒေါသထွက်ခဲ့သော်လည်း သူသည် အသက် ၇၀ နီးပါး ရှိနေပြီဖြစ်ပြီး မင်းဆက် နှစ်ဆက်အတွင်း ထူးဆန်းအံ့ဩဖွယ်ရာ အဓိပ္ပာယ်မရှိသော အရာများစွာကို တွေ့ကြုံခဲ့ပြီး ဖြစ်သည်။

သူသည် စိတ်တည်ငြိမ်သွားခဲ့ပြီး အရှင်မင်းကြီးက ဒေါသထွက်နေသော ခြင်္သေ့တစ်ကောင်ကဲ့သို့ ဒေါသထွက်နေဆဲဖြစ်သည်ကို မြင်သောအခါ သူက တိုက်တွန်းပြောလိုက်၏။

"အရှင်မင်းကြီး စိတ်လျှော့တော်မူပါ။ အရေးအကြီးဆုံးကတော့ ကျိုးစီရင်စုပြည်နယ်ကို လူတွေလွှတ်ပြီး စုံစမ်းစစ်ဆေးပြီး သက်သေအထောက်အထားတွေ စုဆောင်းဖို့ပါပဲ။ အန်းဝမ်ရယ်က ကျိုးစီရင်စုပြည်နယ်မှာ မဆင်မခြင် ပြုမူခဲ့တယ်၊ လူ့အသက်ကို ပေါ့ပေါ့တန်တန် သဘောထားတယ်၊ ညီလာခံနဲ့ ဥပဒေကို အလေးမထားဘူးဆိုတာ သက်သေပြဖို့ လုံလောက်တဲ့ သက်သေအထောက်အထားတွေ ရှိရပါမယ်။ ဒီလိုမှ သူ့ကို သာ့ရှန်း ဥပဒေအတိုင်း အရေးယူနိုင်မှာပါ"

သည်စကားများ ထွက်လာသည်နှင့် ရှိသမျှလူတိုင်းက ဘေးတွင် ရှိနေသော ဖူရှို့ဝမ်ရယ်ကို တမင်တကာဖြစ်စေ မတော်တဆဖြစ်စေ ကြည့်လိုက်ကြသည်။

ဖူရှို့ဝမ်ရယ်သည် တော်ဝင်မျိုးနွယ်စု တရားရုံး၏ ညွှန်ကြားရေးမှူးဖြစ်ပြီး တော်ဝင်မျိုးနွယ်စု တရားရုံးသည် တော်ဝင်မျိုးနွယ်စု မျိုးရိုးစဉ်ဆက် ကျောက်စိမ်းစာအုပ်ကို ပြုစုခြင်းနှင့် ပြင်ဆင်ခြင်း၊ တော်ဝင်မျိုးနွယ်စု၏ ကုသိုလ်ကောင်းမှုများကို မှတ်တမ်းတင်ခြင်း၊ တော်ဝင်မျိုးနွယ်စုနှင့် သက်ဆိုင်သော အမှုအခင်းများ အပါအဝင် တော်ဝင်မိသားစု၏ ကိစ္စရပ် အားလုံးကို တာဝန်ယူရလေသည်။

အကယ်၍ တော်ဝင်မိသားစုက ပြစ်မှုကျူးလွန်ပါက တခြားဌာနများတွင် အမှုစစ်ဆေးပိုင်ခွင့် အာဏာမရှိဘဲ တော်ဝင်မျိုးနွယ်စု တရားရုံးနှင့် တရားရေးဝန်ကြီးဌာနတို့က အမှုကို ကိုင်တွယ်ရမည်။

တစ်နည်းအားဖြင့် ပြောရလျှင်: အန်းဝမ်ရယ်၏ အမှုသည် တော်ဝင်မျိုးနွယ်စု တရားရုံး၏ ခေါင်းညိတ်သဘောတူညီမှုကို စောင့်ရပေမည်။

ဖူရှို့ဝမ်ရယ်သည် ယခင်မင်းကြီး၏ ညီတော် ဖြစ်လေသည်။ သူသည် ငယ်စဉ်က စစ်မြေပြင်တွင် များစွာ အကျိုးပြုခဲ့သည်။ ဒဏ်ရာရပြီး အငြိမ်းစားယူပြီးနောက် တော်ဝင်မျိုးနွယ်စု တရားရုံး၏ ရာထူးကို လွှဲပြောင်းယူခဲ့သည်။ သူ့တွင် နာမည်ကျော်ကြားခြင်း၊ အတွေ့အကြုံနှင့် ဂုဏ်သိက္ခာတို့ လိုအပ်ချက် မရှိခဲ့ချေ။ အရှင်မင်းကြီးသည် သည်ဘကြီးတော်ကို မျက်နှာသာ အနည်းငယ် ပေးရလေသည်။

ဖူရှို့ဝမ်ရယ်သည် အလုပ်သဘောဆန်ဆန် မျက်နှာထားဖြင့် ပြောလိုက်၏။ "တော်ဝင်မျိုးနွယ်စု တရားရုံးက ဌာနအသီးသီးနဲ့ ပူးပေါင်းပြီး စုံစမ်းစစ်ဆေးမှုတွေ ပြုလုပ်သွားပါမယ်”

အရှင်မင်းကြီး အပါအဝင် လူတိုင်းက သက်ပြင်းချလိုက်ကြသည်။ သူတို့သည် ဖူရှို့ဝမ်ရယ်က ယခင်မင်းကြီးကို ထောက်ထားပြီး အန်းဝမ်ရယ်ကို အကာအကွယ်ပေးမည်ကို အမှန်တကယ် စိုးရိမ်ခဲ့ကြသည်။

အန်းဝမ်ရယ်၏ အမှုတွင် အကျင့်ပျက်ခြစားမှု၊ စည်းကမ်းဖောက်ဖျက်မှု၊ လူသတ်မှု၊ လာဘ်ပေးလာဘ်ယူမှုနှင့် အရပ်သားများ၏ ဇနီးများကို အဓမ္မ လုယူမှုတို့ ပါဝင်သည်။ ဘဏ္ဍာရေးဝန်ကြီးဌာန၊ ယဉ်ကျေးမှုဝန်ကြီးဌာန၊ တရားရေးဝန်ကြီးဌာန၊ ဝန်ထမ်းရေးရာဝန်ကြီးဌာနနှင့် တရားစီရင်ရေး ပြန်လည်သုံးသပ်ရေးရုံးတော်တို့ထဲမှ မည်သည့်ဌာနမှ လွတ်မြောက်နိုင်မည် မဟုတ်ပေ။

အနည်းဆုံးတော့ system၏ ဖော်ထုတ်မှုသည် သည်နေရာတွင် ရပ်တန့်သွားခဲ့သည်။ သို့မဟုတ်ပါက သည်အတိုင်းသာ ဆက်သွားနေလျှင် အလုပ်သမားဝန်ကြီးဌာနနှင့် စစ်ရေးဝန်ကြီးဌာနတို့ ပါဝင်လာနိုင်သည်။

ကျိုးစီရင်စုပြည်နယ်တွင် ဆယ်နှစ်ကျော်ကြာ ဘုရင်ခံ ဖြစ်ခဲ့သော အန်းဝမ်ရယ်သည် နန်းစောင့်တပ်မှူး၏ သူလျှိုများက ကျိုးစီရင်စုပြည်နယ်သို့ မဝင်နိုင်သည့်အချက်ကို အခွင့်ကောင်းယူပြီး ဒေသခံအရာရှိများနှင့် ပူးပေါင်းကြံစည်ကာ တရားမဝင် အဆောက်အအုံများ တည်ဆောက်ခြင်း၊ လျှို့ဝှက်လမ်းများ တူးဖော်ခြင်း သို့မဟုတ်လည်း ခံတပ်များနှင့် လက်နက်များ ပြုလုပ်ခြင်း ရှိ၊ မရှိ မည်သူက သိနိုင်မည်နည်း။

ထို့အပြင် အန်းဝမ်ရယ်သည် တပ်ဖွဲ့များကို တိတ်တဆိတ် စုဆောင်းထားခြင်း ရှိ၊ မရှိ မည်သူ သိနိုင်မည်နည်း။

— ဘုရင်ခံများသည် တကယ့် ဧကရာဇ်များနှင့် မတူသေးပေ။ အန်းဝမ်ရယ်၏ အစာစားချင်စိတ်နှင့် သတ္တိသည် မည်သည့် အတိုင်းအတာအထိ မြင့်တက်လာသည်ကို မည်သူကမှ မသိခဲ့ကြပေ။

မှူးမတ်များသည် ထိုအကြောင်းကို စဉ်းစားရုံမျှဖြင့် ခေါင်းကိုက်သွားကြလေသည်။ ဒါကလဲ ဝါးရန် အလွန်ခက်ခဲသော အရိုးတစ်ချောင်း ဖြစ်သည်။

" နန်းစောင့်တပ်မှူးကို အရင် စုံစမ်းစစ်ဆေးဖို့ လွှတ်လိုက်သင့်လား”

"နန်းစောင့်တပ်မှူးတွေ မရေမတွက်နိုင်တဲ့ သေဆုံးမှုတွေ ကြုံခဲ့ရပြီးပြီ။ ဒါက သူတို့ကို သေတွင်းထဲ ပို့နေတာ မဟုတ်ဘူးလား”

"ယခင်မင်းကြီးက သူတို့ကို လျှို့ဝှက်ကိုယ်ရံတော်တွေ ပေးခဲ့တာ မှန်ပါတယ်။ ဒါပေမဲ့ အခု ဆယ်နှစ်ကျော်သွားပြီ။ သူတို့ အရင်ကလောက် အင်အား မကောင်းသင့်တော့ဘူး”

"ငါတို့လည်း လျှို့ဝှက်ကိုယ်ရံတော်တွေ လွှတ်လိုက်ရင်ကော”

ဧကရာဇ်တိုင်းတွင် သူ့ကို ကာကွယ်ရန် လျှို့ဝှက်ကိုယ်ရံတော်များ ရှိကြသည်။ ယခင်မင်းကြီးတွင် ရှိခဲ့ပြီး လက်ရှိ အရှင်မင်းကြီးတွင်လည်း သဘာဝအတိုင်း ရှိနေသည်။

ဒါပေမဲ့ လျှို့ဝှက်ကိုယ်ရံတော်တွေရဲ့ တာဝန်က အရှင်မင်းကြီးကို ကာကွယ်ဖို့လေ။ ဒီလိုအမှုကို စုံစမ်းစစ်ဆေးဖို့ လျှို့ဝှက်ကိုယ်ရံတော်တွေကို တကယ်ကြီး စေလွှတ်ဖို့ မဖြစ်နိုင်ဘူးလေ။ ဟုတ်တယ်မလား။ သူတို့တွေက ဒီနယ်ပယ်မှာ ကျွမ်းကျင်ကြတာ မဟုတ်ဘူး။

"လျှို့ဝှက်ကိုယ်ရံတော်တွေက အမှောင်ထဲမှာ ရှိနေတော့ ဘယ်သူမှ သူတို့ကို မသိလို့ ကြောက်စရာကောင်းတာ” မင်းဆရာအိုကြီးက သဘောမတူပေ။ "သူတို့အားလုံးကို အလင်းထဲ ထုတ်လာရင် လျှို့ဝှက်ကိုယ်ရံတော်တွေက သူတို့ရဲ့ အားသာချက်တွေကို ဆုံးရှုံးသွားလိမ့်မယ်။ အတွေ့အကြုံရှိတဲ့ နန်းစောင့်တပ်မှူးတွေထက်တောင် ပိုဆိုးသွားလိမ့်မယ်”

သို့သော် နန်းစောင့်တပ်မှူးများ၏ ကိုယ်ခံပညာသည် လျှို့ဝှက်ကိုယ်ရံတော်များလောက် မကောင်းဘဲ ယခင်မင်းကြီး၏ လျှို့ဝှက်ကိုယ်ရံတော်များ၏ ကြားဖြတ်တိုက်ခိုက်မှုကို မလွတ်မြောက်နိုင်ပေ။

အန်းဝမ်ရယ်ကို လူအများရှေ့တွင် အရေးယူရန် ယခင်မင်းကြီး၏ သေတမ်းစာက အတားအဆီးဖြစ်နေပြီး အန်းဝမ်ရယ်ကို တိတ်တဆိတ် အရေးယူရန် ယခင်မင်းကြီး ပေးခဲ့သော လျှို့ဝှက်ကိုယ်ရံတော်များက ပိတ်ဆို့ထားသည်။

မှူးမတ်အများအပြားသည် ယခင်မင်းကြီးကို စိတ်ထဲတွင် မကျေမနပ် ဖြစ်မိကြသည်။: ယခင်မင်းကြီးက ကျွန်တော်မျိုးတို့အတွက် တကယ့်ကို ကြီးမားတဲ့ အရှုပ်အထွေးကြီး ချန်ထားခဲ့တာပဲ။

အရှင်မင်းကြီးနှင့် အရပ်ဘက်၊ စစ်ဘက် မှူးမတ်များ ခေါင်းကိုက်နေသည့်ကိစ္စကို မဆိုထားနှင့်။ ဖူရှို့ဝမ်ရယ်ပင်လျှင် ပိုပြီး အန္တရာယ်ကင်းအောင် မည်သို့ လုပ်ဆောင်ရမည်ကို မသေချာတော့ပေ။

"ချူဟွားကို လွှတ်လိုက်ရင်ကော” တစ်စုံတစ်ယောက်က တိုးတိုး ပြောလိုက်သည်။

မင်းဆရာအိုကြီးက ပထမဆုံး ကန့်ကွက်လိုက်သည်။ "မဖြစ်ဘူး၊ ဒါက သတင်းအချက်အလက် စုဆောင်းရာမှာပဲ အကျိုးသက်ရောက်မှု ရှိတယ်။ ချူဟွားသာ ကျိုးစီရင်စုပြည်နယ်ကို ဝင်သွားတာနဲ့ သူ လျှို့ဝှက်ကိုယ်ရံတော်တွေရဲ့ သတ်ဖြတ်တာကို သေချာပေါက် ခံရလိမ့်မယ်”

မင်းဆရာကြီးသည်လည်း အစပိုင်းတွင် သဘောမတူခဲ့သော်လည်း မင်းဆရာအိုကြီး ပြောလိုက်သည်ကို ကြားပြီးနောက် ရုတ်တရက် တခြား အတွေးအခေါ်များ ရလာခဲ့သည်။

"ဒါပေမဲ့ လျှို့ဝှက်ကိုယ်ရံတော်တွေ ဘယ်ကလာတယ်ဆိုတာ ကြိုသိနိုင်ပြီး ငါတို့က အခွင့်အရေးကို အရယူ၊ ဝိုင်းရံ သတ်ဖြတ်ပြီး ဆုံးရှုံးမှုတွေကို လျှော့ချနိုင်တယ်”

"သူက ဖရဲသီးကို နောက်ကျမှ စားရင် ဘယ်လိုလုပ်မလဲ”

"သာ့ရှန်းက သူ့ကို လက်ရှိအချိန်မှာ ဆုံးရှုံးလို့ မဖြစ်ဘူး”

"သူ မရှိဘဲနဲ့ သာ့ရှန်းက အရင်က မကျော်ဖြတ်နိုင်ခဲ့လို့လား”

"လူလား တစ္ဆေလား မသိရသေးတဲ့ အရာတစ်ခုကို အမြန်ဆုံး ဖယ်ရှားလိုက်တာ ပိုကောင်းတယ်”

သူတို့ ဆွေးနွေးနေကြစဉ် မှူးမတ်တစ်စုသည် အရှင်မင်းကြီး၏ ရှေ့မှောက်တွင် အမှန်တကယ် ငြင်းခုံ ရန်ဖြစ်ကြပြီး တစ်ယောက်ပြီးတစ်ယောက် မျက်နှာများ နီမြန်းလာကာ လည်ပင်းများ ထူထဲလာကြသည်။

မူလက ဒေါသတကြီး ဖြစ်နေသော အရှင်မင်းကြီးသည် နဂါးပလ္လင်ပေါ်သို့ တိတ်တဆိတ် ပြန်ထိုင်လိုက်ပြီး သူတို့၏ ငြင်းခုံမှုကို အေးအေးဆေးဆေး ကြည့်ရှုနေကာ သူတို့ကို တားဆီးရန် အရိပ်အယောင်ပင် မပြခဲ့ပေ။

ဘာကို တားရမှာလဲ။ သူတို့ကို လက်ခုပ်တီးပြီး ပိုငြင်းခုံခိုင်းချင်တာ။ ဖြစ်နိုင်ရင် စိတ်လွတ်ပြီး မဟုတ်က ဟုတ်ကတွေ ပြောတဲ့အထိ ဖြစ်သွားစေချင်တယ်။

ဒီလိုနည်းနဲ့မှ systemက သူတို့ရဲ့ လျှို့ဝှက်ချက်တွေကို ဖော်ထုတ်မှာ ကြောက်လို့ systemက သာ့ရှန်းကို အကျိုးပြုမှန်း သိသိကြီးနဲ့ ချူဟွားကို ဘယ်နှယောက်က သေစေချင်နေလဲဆိုတာ ငါ သိရမှာ။

အရှင်မင်းကြီးသည် လက်ဖက်ရည်ကိုပင် အေးအေးဆေးဆေး အရသာခံ သောက်သုံးနေခဲ့သည်။

မျိုးနွယ်စု ညွှန်ကြားရေးမှူးအနေဖြင့် ဖူရှို့ဝမ်ရယ်သည် တော်ဝင်မိသားစု၏ အရေးကိုသာ ကိုင်တွယ်ပြီး ညီလာခံတွင် ဝင်ရောက် မစွက်ဖက်ခဲ့ပေ။

သူသည် အရာအားလုံးနှင့် သက်ဆိုင်ခြင်း မရှိသော တတိယပုဂ္ဂိုလ်တစ်ဦးကဲ့သို့ ဖြစ်နေပြီး ဤလူများက သူတို့၏ ကိုယ်ကျိုးအတွက် ချူဟွားနှင့် system ကို သတ်ဖြတ်ရန် ကြိုးစားနေသည်ကို အေးစက်စွာ ကြည့်ရှုနေခဲ့သည်။

ကြည့်နေရင်း ဖူရှို့ဝမ်ရယ်သည် အရှင်မင်းကြီးက လက်ဖက်ရည်တစ်ငုံ သောက်လိုက်ပြီး ကိတ်မုန့်တစ်ဖဲ့ စားလိုက်သည်ကို သတိပြုမိသွားသည်။ မှူးမတ်များ အပြင်းအထန် ရန်ဖြစ်နေသည့် မြင်ကွင်းကို အရသာရှိသော တွဲဖက်စားစရာတစ်ခုအဖြစ် သဘောထားနေသကဲ့သို့ပင်။

ဖူရှို့ဝမ်ရယ်: "..."

အရှင်မင်းကြီး၏ လက်ရှိ လုပ်ဆောင်မှုသည် ခုနက ပေါက်ကွဲလုမတတ် ဖြစ်နေခဲ့သူနှင့် လုံးဝ ကွဲပြားခြားနားနေသည်။

ဒါမှမဟုတ်...

ဖူရှို့ဝမ်ရယ်၏ မျက်ခုံးများ အနည်းငယ် တွဲကျသွားတော့သည်။ အရှင်မင်းကြီးက ငါတို့ကို တမင်တကာ ကစားနေတာ ဖြစ်နိုင်မလား။

ဒါပေါ့။ မင်းတို့ ဧကရာဇ်တွေက စိတ်နှလုံး ညစ်ပတ်ကြတယ်။

နာရီဝက်ခန့် ကြာပြီးနောက် ထိုအုပ်စုသည် အသံများ အက်ကွဲလာပြီး ရပ်တန့်လိုက်ရမှသာ ငြင်းခုံမှု ရပ်သွားခဲ့လေသည်။ ကုန်းကုန်းများက လက်ဖက်ရည် ယူလာပေးကြပြီး သူတို့သည် လည်ချောင်းရှင်းရန် အလုပ်များနေကြသဖြင့် တော်ဝင်စာကြည့်ဆောင်သည် နောက်ဆုံးတွင် တိတ်ဆိတ်သွားတော့သည်။

မင်းဆရာအိုကြီးသည် အချိန်အတော်ကြာ ကြည့်ရှုနေခဲ့ပြီး အချိန် တော်တော်လေး တန်ပြီဟု မြင်သောအခါ ဘဏ္ဍာရေးဝန်ကြီးကို မျက်ရိပ်ပြလိုက်သည်။

ဘဏ္ဍာရေးဝန်ကြီးသည် ထပ်မစောင့်နိုင်တော့ဘဲ ပြောလိုက်လေသည်။ "လွန်ခဲ့တဲ့၄နှစ်က စာရင်းတွေ ရှင်းဖို့ လုပ်နေပြီ။ ဒီအချိန်မှာ တစ်ယောက်ယောက်က ချူဟွားကို ရဖို့ အလျင်စလို လုပ်ရဲလုပ်ကြည့်၊ ခင်ဗျား ဌာနတစ်ခုလုံးကို လစာ ကတိခံငွေစက္ကူတွေ လက်ခံရအောင် လုပ်လိုက်လို့ ကျွန်တော့်ကို အပြစ်မတင်နဲ့”

"ဖူး——" မှူးမတ်တစ်ဦး မတော်တဆ လက်ဖက်ရည် သီးသွားလေသည်။

"အဟွတ်——" မှူးမတ်တစ်ဦး မတော်တဆ နင်သွားသည်။

မှူးမတ်များသည် ဘဏ္ဍာရေးဝန်ကြီးကို တိတ်တဆိတ် ပြစ်တင် ရှုတ်ချလိုက်ကြသည်။ ခင်ဗျားက အရမ်း လူမိုက်ဆန်မနေဘူးလား။

လစာ ကတိခံငွေစက္ကူ။ ဒါကလည်း သည်အကြောင်းနှင့် ပတ်သက်ပြီး ရယ်စရာ ဇာတ်လမ်းတစ်ပုဒ်ပင်။

လွန်ခဲ့သော ၄ နှစ်က သာ့ရှန်းတစ်နိုင်ငံလုံး သဘာဝဘေးအန္တရာယ်များ ပြည့်နှက်နေပြီး ဟိုမှယူ ဒီမှဆွဲ လုပ်ပြီးသည့်တိုင် ကြီးမားသော ငွေကြေး ကွာဟမှုကြီး ရှိနေဆဲပင်။ မှူးမတ်များ၏ လစာများကို အချိန်မီ မပေးနိုင်ခဲ့သည်ကလည်း အမှန်ပင်။

ဘဏ္ဍာရေးဝန်ကြီးဌာနမှ မှူးမတ်အားလုံးသည် စိုးရိမ်ပူပန်လွန်းသဖြင့် မျက်နှာများ ညှိုးငယ်ကာ ပါးစပ်များတွင် အပူဖုများ ပေါက်နေကြသည်။ ပိုက်ဆံလေး နည်းနည်းပါးပါးရနိုင်သည့် နေရာကို ဘယ်သူမှ မသိခဲ့ကြပေ။

နောက်ပိုင်းတွင် ယခု ဘဏ္ဍာရေးဝန်ကြီး ဖြစ်နေသော ယခင် ဘဏ္ဍာရေး ဒုတိယဝန်ကြီးသည် သူ၏ ဇနီးထံမှ ကတိခံငွေစက္ကူ အကြောင်း ကြားသိခဲ့ပြီး ထိုစဉ်က ဘဏ္ဍာရေးဝန်ကြီး ယွမ်ဝေကို အကြံဉာဏ်တစ်ခု ပေးခဲ့လေသည်။

ယွမ်ဝေသည် ငွေသားအစား လစာ ကတိခံငွေစက္ကူများ ထုတ်ပေးခြင်းသည် ကိစ္စကောင်းတစ်ခု ဖြစ်သည်ဟု တွေးထင်ခဲ့လေသည်။

ထို့ကြောင့် မြို့တော်မှ မှူးမတ်များ၏ ကြာမြင့်စွာ မရရှိသေးသော လစာများကို နောက်ဆုံးတွင် ကတိခံငွေစက္ကူများ အသွင်ဖြင့် ပေးချေခဲ့သည်။ ဆိုလိုသည်မှာ ဘဏ္ဍာတိုက် ပြည့်သွားပြီးနောက် သူတို့သည် ကတိခံငွေစက္ကူများဖြင့် လစာများ လက်ခံရရှိနိုင်မည်။

လစာ မပေးဘူးလို့ ပြောလိုက်တာလား။ ပေးလိုက်ပြီလေ။

လစာ ပေးတယ်လို့ ပြောရမှာလား။ ဒါပေမဲ့ ငွေသားက မရခဲ့ဘူး။

ထိုတစ်နှစ်လုံး မြို့တော်ရှိ မှူးမတ်အားလုံးသည် လစာ ကတိခံငွေစက္ကူများကို လက်ခံရရှိခဲ့ကြသည်။

အချို့ မိသားစုများ အမှန်တကယ် အခက်အခဲ ကြုံတွေ့ပါက သူတို့နှင့် ဆက်ဆံရေး ကောင်းမွန်သော လုပ်ဖော်ကိုင်ဖက်များထံမှ ငွေများ ချေးငှားပြီးနောက် အကြွေးဆပ်ရန် လစာ ကတိခံငွေစက္ကူများကို အသုံးပြုခဲ့ကြသည်။

အခက်ခဲဆုံး ကာလကို ကျော်လွန်ပြီးနောက် ဘဏ္ဍာတိုက်တွင် ငွေအချို့ ရှိလာပြီး လစာများကို ဖြည်းဖြည်းချင်း စတင် ပေးချေခဲ့သည်။

သို့သော် အကြွေးများစွာ ရှိနေသောကြောင့် ပြန်ဆပ်ရန် မလွယ်ကူခဲ့ပေ။ ငွေ မရှားသော အချို့ မှူးမတ်များသည် သူတို့၏ လစာများ အားလုံးကို ကတိခံငွေစက္ကူများကိုင်ထားပြီး အပြည့်ပြန်ရရန် နှစ်ပေါင်းများစွာ စောင့်ဆိုင်းခဲ့ရသည်။

လူတိုင်းသည် ထိုကာလကို နောက်ဆုံးတွင် မေ့လျော့သွားခဲ့ပြီး ယခုအခါ ဘဏ္ဍာရေးဝန်ကြီးက ပြန်လည် သတိပေးလိုက်သည်။ ထိုခံစားချက်မှာ... ဖော်ပြလို့ မရနိုင်သည့်အရာပင်။

- ခင်ဗျား... သေခါနီး အဘိုးကြီးက ဒီအကြောင်း ထုတ်ပြောရဲသေးတယ်။ ခင်ဗျားကြောင့် မဟုတ်ရင် ကျုပ်တို့ တစ်နှစ်လုံး ကတိခံငွေစက္ကူတွေ လက်ခံရမှာလား။

သူတို့သည် စိုက်ကြည့်ခဲ့ကြသော်လည်း ဘဏ္ဍာရေးဝန်ကြီးသည် လုံးဝ မကြောက်ဘဲ ပြန်စိုက်ကြည့်လိုက်သည်။ "ချူဟွားက ဘဏ္ဍာရေးဝန်ကြီးဌာနမှာ ၈ ရက်ပဲ ရှိသေးတယ်။ နိုင်ငံတော် ဘဏ္ဍာတိုက်က ရှေးဟောင်း ကျောက်စိမ်းတွေ၊ လက်ရေးလှတွေနဲ့ ပန်းချီကားတွေကို မထည့်ဘဲ ငွေသား သန်း ၈၀ ကို သိမ်းဆည်းရမိပြီးပြီ။ သူက နိုင်ငံတော် ဘဏ္ဍာတိုက် ကြွယ်ဝမှုအတွက် အကြီးမားဆုံး ပံ့ပိုးကူညီသူပဲ”

"ကျန်းနန် တစ်ခု မပြောနဲ့၊ ကျန်းနန် ဆယ်ခုစာတောင် ဘေးအန္တရာယ် ကယ်ဆယ်ရေးအတွက် လုံလောက်တယ်။ သာ့ရှန်း တည်ထောင်လာတာ နှစ် ၁၁၇ နှစ် ရှိပြီ။ ဘယ်နှစ်မှာ နိုင်ငံတော် ဘဏ္ဍာတိုက်မှာ ဒီလောက် ပိုက်ဆံတွေ အများကြီး ရှိခဲ့လဲ။ ဘယ်နှစ်မှာ ဘဏ္ဍာရေးဝန်ကြီးဌာနက ရန်ပုံငွေတွေကို ဒီလောက် လွယ်လွယ်ကူကူနဲ့ ရက်ရက်ရောရော ခွဲဝေပေးနိုင်ခဲ့လဲ”

"ခင်ဗျားတို့ထဲက တစ်ယောက်ယောက် မကျေနပ်ဘူးဆိုရင် ဘဏ္ဍာရေးဝန်ကြီးဌာနကို သွားပြီး တစ်ရက်လောက် အလုပ်လုပ်ကြည့်လိုက်။ ကျွန်တော် အများကြီး မတောင်းဆိုဘူး။ တစ်နေ့ကို ငွေ ဆယ်သန်း ဝင်အောင် ရှာနိုင်သရွေ့ ဘဏ္ဍာရေးဝန်ကြီး ရာထူးကို ခင်ဗျားကို ပေးလိုက်လို့ ရတယ်”

ရိုးသားသောသူ ဒေါသထွက်လာသည်နှင့် သူပြောလိုက်သော စကားလုံးတိုင်းသည် မှူးမတ်အားလုံး၏ ကျောရိုးကို ထိမှန်သွားခဲ့လေသည်။

- မင်းတို့မှာ အကျင့်ပျက်ခြစားမှု စုံစမ်းစစ်ဆေးနိုင်တဲ့၊ ပိုင်ဆိုင်မှုတွေ သိမ်းဆည်းနိုင်တဲ့၊ ပိုက်ဆံရှာနိုင်တဲ့ အရည်အချင်း ရှိလို့လား။

- မင်းတို့မှာ အရည်အချင်း မရှိဘဲနဲ့ ငါ့လူကို သတ်ချင်နေတာလား။

- တစ်နေ့လုံး အရှုပ်တွေလုပ်ဖို့ပဲသိတဲ့ မင်းတို့ရဲ့ နံစော်နေတဲ့ ပါးစပ်တွေကို ပိတ်ထားလိုက်စမ်း။

- ထပ်ပြီး ဖိအားပေးကြည့်မလား။ ယုံချင်ယုံ မယုံချင်နေ၊ မင်းတို့ကို တစ်သက်လုံး လစာ ကတိခံငွေစက္ကူတွေပဲ လက်ခံရအောင် ငါ လုပ်ပစ်မယ်။

မှူးမတ်များ: ကြက်တစ်ကောင်လို တိတ်ဆိတ်သွားကြသည်။

တော်ဝင်စာကြည့်ဆောင်သည် အရှင်မင်းကြီး လက်ဖက်ရည် သောက်သုံးနေသည့် ခပ်ဖျော့ဖျော့ အသံကိုသာ ကြားရလောက်သည်အထိ အလွန်တရာ တိတ်ဆိတ်သွားခဲ့သည်။

သာ့ရှန်းသည် နိုင်ငံတည်ထောင်ခဲ့သည့် နှစ်များတစ်လျှောက်လုံး အဘယ်ကြောင့် မွဲပြာကျနေခဲ့ရသနည်း။

အကြောင်းမှာ အရင်မင်းဆက်၏ ဧကရာဇ်သည် ငွေသုံးစွဲရာတွင် အလွန် ကောင်းလွန်းသောကြောင့်ပင်။ သူသည် ငွေများ အကြွေးတင်ခဲ့ပြီး ပြန်မဆပ်ခဲ့ပေ။

ခမ်းနားထည်ဝါသော နန်းတော်များ တည်ဆောက်ခြင်း၊ တောင်မှမြောက်သို့ တူးမြောင်းများ ဖောက်လုပ်ခြင်း၊ သုံးထပ်မြင့် သင်္ဘောကြီးများ တည်ဆောက်ခြင်း စသည်ဖြင့် သူသည် ပျော်ရွှင်မှုအတွက် မည်သည့်အရာကိုမှ လက်လွတ်မခံခဲ့ပေ။

ရွှေ့ပြောင်းလုပ်သားများကို စုဆောင်းခဲ့သည်။ သစ်များကို စုဆောင်းခဲ့သည်။ အုတ်များနှင့် အမိုးပြားများကို စုဆောင်းခဲ့သည်။ သို့သော် ပေးချေမှုမှာ အမြဲတမ်း နောက်ကျနေခဲ့သည်။ ကုန်သည်များနှင့် ပြည်သူများ အသက်မရှင်နိုင်တော့သည့်တိုင် သူသည် ပိုက်ဆံအကြောင်းကို လုံးဝ မစဉ်းစားခဲ့ပေ။

သာ့ရှန်းသည် အရင်မင်းဆက်ကို ဖြုတ်ချခဲ့သော်လည်း နိုင်ငံနှင့် ပြည်သူ့ဘဝကို တည်ငြိမ်စေလိုပါက အရင်မင်းဆက်၏ အကြွေးများကို လက်ခံပြီး နေရာတိုင်းရှိ အပေါက်များကို ဖြည့်ဆည်းပေးရုံမှတပါး တခြား နည်းလမ်း မရှိခဲ့ပေ။

သို့မဟုတ်ပါက ပြည်သူအများစု သေဆုံးသွားခြင်းဖြစ်စေ တခြား အိမ်နီးချင်းနိုင်ငံများသို့ ထွက်ပြေးသွားခြင်းဖြစ်စေ သာ့ရှန်းကို တည်ထောင်ခြင်းသည် အဘယ်အကျိုး ရှိမည်နည်း။

အပေါက်ကို ဖြည့်လိုက်သည်နှင့် သာ့ရှန်း၏ ဘဏ္ဍာတိုက်ထဲမှ ငွေများသည် ထည့်မထားမီကပင် ကုန်လုနီးပါး ဖြစ်နေခဲ့သည်။

၎င်းကို ဘဏ္ဍာတိုက်ဟု ခေါ်သော်လည်း အမှန်တကယ်တွင် အထဲတွင် ဘာမှ မရှိခဲ့ပေ။

ဤနေရာတွင် နောက်ထပ် စိတ်ဝင်စားစရာ ဇာတ်လမ်းတစ်ပုဒ် ရှိသေးသည်။ မဟာသူခိုးကြီး ခုံးခုံးသည် နာမည်ကျော်ရေးအတွက် တောင်‌ပေါ်မှနေ၍ လောကကြီးထဲသို့ ထွက်လာခဲ့ချိန်တွင် သူသည် ဘဏ္ဍာတိုက်ကို ခိုးယူရန် ဆုံးဖြတ်ခဲ့သည်။

ဘဏ္ဍာတိုက်သည် ထောင်ချောက်များဖြင့် ပြည့်နှက်နေသည်။ မဟာသူခိုးကြီးခုံးခုံးသည် အစွမ်းကုန် ကြိုးစားခဲ့ပြီး နောက်ဆုံးတွင် အဆင့် ၁၈ ဆင့်ကို ဖြတ်ကျော်နိုင်ခဲ့သည်။ ရလဒ်အနေဖြင့် သူသည် အထဲသို့ ဝင်ရောက်သောအခါ မှင်တက်သွားခဲ့ရသည်။ အထဲတွင် လုံးဝ ဗလာကျင်းနေပြီး ကြေးနီတစ်ပြားမှ မရှိခဲ့ပေ။

နောက်ပိုင်းတွင် မဟာသူခိုးကြီးခုံးခုံးသည် လောကတစ်ဝှမ်းတွင် ကျော်ကြားလာခဲ့သည်။

အကြောင်းမှာ သူသည် ဘဏ္ဍာတိုက်ထဲတွင် ငွေတစ်ကျပ် နှစ်ကျပ်နှင့်အတူ မှတ်စုတစ်ခု ထားခဲ့သောကြောင့်ပင်။ -ဒါနဲ့ သကြားလုံး ဝယ်စားလိုက်။

မှတ်စု ချန်ထားခဲ့ရုံဆိုလျှင်တော့ တော်သေးသည်။ အပြင်သို့ ထွက်သွားပြီးနောက် သူသည် နေရာအနှံ့တွင် မဟုတ်မမှန် သတင်းများ ဖြန့်ခဲ့ပြီး လောကထဲက လူတိုင်းကို ဘဏ္ဍာတိုက်သည် ဖုန်မှုန့်များသာ ကျန်တော့သည်အထိ ဆင်းရဲလွန်းကြောင်း သိစေခဲ့သည်။ ဆင်းရဲလွန်းသဖြင့် သူခိုးက မကြည့်ရက်နိုင်ဘဲ အလွန်အမင်း မခါးသီးစေရန် ချိုချဉ်တစ်ခုခု ဝယ်စားရန် ငွေတစ်ကျပ်နှစ်ကျပ်ဖြင့် ဆုချီးမြှင့်ခဲ့သည် ဟူ၍ပင်။

သာ့ရှန်းတွင် အမြင့်မြတ်ဆုံး ဧကရာဇ်မှစ၍ အဆင့်မရှိသော မှူးမတ်ငယ်များအထိ အပြင်ထွက်သည့်အခါတိုင်း အမေးခံရလိမ့်မည်။ ဒီနေ့ ဘဏ္ဍာတိုက်ထဲမှာ ပိုက်ဆံ ရှိလား ဟူ၍။

ရှက်ဖို့ကောင်းချက်။

သာ့ရှန်း၏ ဒုတိယမြောက် ဧကရာဇ်သည် ဒေါသထွက်လွန်းသဖြင့် တစ်နိုင်ငံလုံး အတိုင်းအတာဖြင့် ဖမ်းဝရမ်း ထုတ်ခဲ့သည်။

ကံဆိုးချင်တော့ သူ့ကို မဖမ်းမိခဲ့ပေ။

ထိုအဖြစ်အပျက်၏ သက်ရောက်မှုသည် မျှော်လင့်ထားသည်ထက် ပိုကြီးမားခဲ့ပြီး ဘဏ္ဍာရေးဝန်ကြီးဌာန၏ မှူးမတ်များသည် ဆယ်စုနှစ်များစွာ ကြာပြီးသည့်တိုင် တွန့်တိုနေဆဲ ဖြစ်သည်။

သူတို့ ဘယ်လိုလုပ် မတွန့်တိုဘဲ နေနိုင်မည်နည်း။ အကယ်၍ နောက်ထပ် မဟာသူခိုးတစ်ဦးက ဘဏ္ဍာတိုက်ကို ခိုးယူပြီး အထဲတွင် ပိုက်ဆံ များများစားစား မရှိသည်ကို တွေ့ရှိသွားပါက သာ့ရှန်းနှင့် ညီလာခံသည် မျက်နှာ ရှိနေဦးမည်တဲ့လား။ ဘဏ္ဍာရေးဝန်ကြီးဌာနမှ မှူးမတ်အားလုံးသည် ခေါက်ဆွဲကြိုးတစ်ချောင်းစီ ရှာပြီး ဘဏ္ဍာတိုက် တံခါးဝတွင် ကြိုးဆွဲချ သေသင့်တော့သည်။

မင်းဆရာအိုကြီးသည် သည်အဖြစ်အပျက်ကို စဉ်းစားမိသောအခါ မျက်နှာ ပျက်သွားတော့သည်။ သူသည် သူ သေတမ်းစာထဲ ခြေတစ်လှမ်း လှမ်းနေချိန်တွင် ထိုကဲ့သို့သော အရာမျိုး ဖြစ်ပွားမည်ကို မလိုလားခဲ့ပေ။

"သူက ရှီးရုံရဲ့ သတင်းအချက်အလက်ကို တစ်ပြားမှ မကုန်ဘဲ ရနိုင်တယ်။ ကျိုးစီရင်စုပြည်နယ်ရဲ့ သတင်းအချက်အလက်ကို လူတစ်ယောက်မှ မဆုံးရှုံးဘဲ ရနိုင်တယ်။ ခင်ဗျားတို့ လုပ်နိုင်လား”

"သူက ငါ့ရဲ့ သာ့ရှန်းညီလာခံကို ပူးပေါင်းကြံစည်မှုကနေ ကယ်တင်ခဲ့တယ်။ ချူဟွားက သာ့ရှန်းပြည်သူတွေကို ကယ်တင်ဖို့ နွားကျောက်ကို တီထွင်ခဲ့တယ်။ သာ့ရှန်းရဲ့ မှူးမတ်တွေကို ကယ်တင်ဖို့ ပင်နီဆီလင်ကို တီထွင်ခဲ့တယ်။ ခင်ဗျားတို့ သူ့ရဲ့ ကောင်းမွန်တဲ့ လုပ်ရပ်ကို သတိရတယ်ဆိုရင် ကောင်မလေးတစ်ယောက်ကို အသေခံမှာ မဟုတ်ဘူး”

ခဏတာ တိတ်ဆိတ်သွားပြီးနောက် တစ်စုံတစ်ယောက်က တိုးတိုးလေး ပြန်ပြောလိုက်သည်။ "သူ သေချင်မှ သေမှာပါ”

တရားရေးဝန်ကြီး: "သူ သေသွားရင် ခင်ဗျားက တရားရေးဝန်ကြီးဌာနကို အမှုစစ်ဆေးဖို့ ကူညီမှာလား”

ဘဏ္ဍာရေးဝန်ကြီး: "ခင်ဗျားက ဘဏ္ဍာရေးဝန်ကြီးဌာနကို အကျင့်ပျက်ခြစားမှု စုံစမ်းစစ်ဆေးဖို့ ကူညီမှာလား”

တရားစီရင်ရေး ပြန်လည်သုံးသပ်ရေးရုံးတော်၏ ဝန်ကြီးချုပ်: "ခင်ဗျားက တရားစီရင်ရေး ပြန်လည်သုံးသပ်ရေးရုံးတော်ကို အမှုဟောင်းတွေ စုံစမ်းစစ်ဆေးဖို့ ကူညီမှာလား”

ဘဏ္ဍာရေးဝန်ကြီးသည် ယဉ်ကျေးမှု၊ အလုပ်သမား၊ ဝန်ထမ်းရေးရာနှင့် စစ်ရေး ဝန်ကြီး ၄ ဦးကို မျက်လုံးများဖြင့် ဝေ့ကြည့်လိုက်ပြီး မျက်လုံးများဖြင့် ခြိမ်းခြောက်လိုက်သည်။ စကား မပြောဘူးလား။ ရတယ်။ ဒါဆိုရင် လစာ ကတိခံငွေစက္ကူအတွက် ငါ့ကို အပြစ်မတင်နဲ့။

ဒါက ခြိမ်းခြောက်မှုတစ်ခု။ ပေါ်တင် ခြိမ်းခြောက်မှုတစ်ခုပင်။

သို့သော် ဝန်ကြီးဌာန ၆ ခုစလုံးမှ မည်သူကမှ ၎င်းကို မတွန်းလှန်နိုင်ခဲ့ပေ — တစ်ပြားသည် တတိယအဆင့် မှူးမတ်တစ်ဦးကိုပင် အကြပ်ရိုက်စေနိုင်သည် မဟုတ်လား။

အလုပ်သမားဝန်ကြီးဌာနက တည်ဆောက်နေသော ကြယ်တာရာမျှော်စင်သည် မပြီးစီးသေးပေ။ အလုပ်သမားဝန်ကြီးသည် အားနည်းချက်ကို အဖမ်းခံလိုက်ရပြီး ရှေ့သို့ ထွက်လာရတော့သည်။

"ကျွန်တော်မျိုး ဒါက မဖြစ်နိုင်ဘူးလို့ ထင်ပါတယ်”

ယဉ်ကျေးမှုဝန်ကြီးဌာန၊ ဝန်ထမ်းရေးရာဝန်ကြီးဌာနနှင့် စစ်ရေးဝန်ကြီးဌာနမှ တခြား ဝန်ကြီး ၃ ဦး:

"ကျွန်တော်မျိုးလည်း ထောက်ခံပါတယ်”

မင်းဆရာအိုကြီး၊ ဝန်ကြီးဌာန ၆ ခုနှင့် တရားစီရင်ရေး ပြန်လည်သုံးသပ်ရေးရုံးတော်တို့ သဘောတူညီလိုက်သည်နှင့် ညီလာခံမှ မှူးမတ် ထက်ဝက်ခန့် သဘောတူညီခဲ့ပြီး အချို့ မှူးမတ်များအတွက် ထပ်မံ ကန့်ကွက်ရန် ခက်ခဲသွားတော့သည်။

သည်အချိန်တွင် နန်းစောင့်တပ်မှူး လင်ယိုသည် ရှေ့သို့ ထွက်လာပြီး အစီရင်ခံတင်ပြသည်။ "အရှင်မင်းကြီး၊ ချူဟွားရဲ့ အိမ်တော်မှာ တပ်စွဲထားတဲ့ နန်းစောင့်တပ်မှူးရဲ့ ပြောကြားချက်အရ နွားကျောက် သုတေသနက ချောချောမွေ့မွေ့ တိုးတက်နေပါတယ်။ နွားကျောက် ထိုးနှံခံထားရတဲ့ လူတွေရဲ့ ရောဂါလက္ခဏာတွေက အတော်လေး ပျော့ပါတယ်။ သူတို့ လုံးဝ ပျောက်ကင်းသွားတာနဲ့ တော်ဝင်ဆေးပညာ အကယ်ဒမီ အုပ်ချုပ်ရေးမှူးနဲ့ ကာကွယ်ဆေးဌာနက တော်ဝင်သမားတော်တွေက ကျောက်ရောဂါကို စမ်းသပ်မှု စတင်နိုင်ပါပြီ”

"နောက်တစ်ချက်က ချူဟွားက ဒီည ဓာတ်ခွဲခန်းထဲ ဝင်သွားပြီး ပင်နီဆီလင် စမ်းသပ်မှုကို စတင်နေပါပြီ။ အားလုံး အဆင်ပြေနေပါတယ်”

...